| Library / Tipiṭaka / තිපිටක • Tipiṭaka / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) |
3. චූළමාලුක්‍යසුත්‌තවණ්‌ණනා
3. Cūḷamālukyasuttavaṇṇanā
122. එවං මෙ සුතන්‌ති මාලුක්‍යසුත්‌තං. තත්‌ථ මාලුක්‍යපුත්‌තස්‌සාති එවංනාමකස්‌ස ථෙරස්‌ස. ඨපිතානි පටික්‌ඛිත්‌තානීති දිට්‌ඨිගතානි නාම න බ්‍යාකාතබ්‌බානීති එවං ඨපිතානි චෙව පටික්‌ඛිත්‌තානි ච. තථාගතොති සත්‌තො. තං මෙ න රුච්‌චතීති තං අබ්‍යාකරණං මය්‌හං න රුච්‌චති. සික්‌ඛං පච්‌චක්‌ඛායාති සික්‌ඛං පටික්‌ඛිපිත්‌වා.
122.Evaṃme sutanti mālukyasuttaṃ. Tattha mālukyaputtassāti evaṃnāmakassa therassa. Ṭhapitāni paṭikkhittānīti diṭṭhigatāni nāma na byākātabbānīti evaṃ ṭhapitāni ceva paṭikkhittāni ca. Tathāgatoti satto. Taṃ me na ruccatīti taṃ abyākaraṇaṃ mayhaṃ na ruccati. Sikkhaṃpaccakkhāyāti sikkhaṃ paṭikkhipitvā.
125. කො සන්‌තො කං පච්‌චාචික්‌ඛසීති යාචකො වා හි යාචිතකං පච්‌චාචික්‌ඛෙය්‍ය, යාචිතකො වා යාචකං. ත්‌වං නෙව යාචකො න යාචිතකො, සො දානි ත්‌වං කො සන්‌තො කං පච්‌චාචික්‌ඛසීති අත්‌ථො.
125.Ko santo kaṃ paccācikkhasīti yācako vā hi yācitakaṃ paccācikkheyya, yācitako vā yācakaṃ. Tvaṃ neva yācako na yācitako, so dāni tvaṃ ko santo kaṃ paccācikkhasīti attho.
126. විද්‌ධො අස්‌සාති පරසෙනාය ඨිතෙන විද්‌ධො භවෙය්‍ය. ගාළ්‌හපලෙපනෙනාති බහලලෙපනෙන. භිසක්‌කන්‌ති වෙජ්‌ජං. සල්‌ලකත්‌තන්‌ති සල්‌ලකන්‌තනං සල්‌ලකන්‌තියසුත්‌තවාචකං. අක්‌කස්‌සාති අක්‌කවාකෙ ගහෙත්‌වා ජියං කරොන්‌ති. තෙන වුත්‌තං ‘‘අක්‌කස්‌සා’’ති. සණ්‌හස්‌සාති වෙණුවිලීවස්‌ස. මරුවාඛීරපණ්‌ණීනම්‌පි වාකෙහියෙව කරොන්‌ති. තෙන වුත්‌තං යදි වා මරුවාය යදි වා ඛීරපණ්‌ණිනොති. ගච්‌ඡන්‌ති පබ්‌බතගච්‌ඡනදීගච්‌ඡාදීසු ජාතං. රොපිමන්‌ති රොපෙත්‌වා වඩ්‌ඪිතං සරවනතො සරං ගහෙත්‌වා කතං. සිථිලහනුනොති එවංනාමකස්‌ස පක්‌ඛිනො. භෙරවස්‌සාති කාළසීහස්‌ස. සෙම්‌හාරස්‌සාති මක්‌කටස්‌ස. එවං නොති එතාය දිට්‌ඨියා සති න හොතීති අත්‌ථො.
126.Viddhoassāti parasenāya ṭhitena viddho bhaveyya. Gāḷhapalepanenāti bahalalepanena. Bhisakkanti vejjaṃ. Sallakattanti sallakantanaṃ sallakantiyasuttavācakaṃ. Akkassāti akkavāke gahetvā jiyaṃ karonti. Tena vuttaṃ ‘‘akkassā’’ti. Saṇhassāti veṇuvilīvassa. Maruvākhīrapaṇṇīnampi vākehiyeva karonti. Tena vuttaṃ yadi vā maruvāya yadi vā khīrapaṇṇinoti. Gacchanti pabbatagacchanadīgacchādīsu jātaṃ. Ropimanti ropetvā vaḍḍhitaṃ saravanato saraṃ gahetvā kataṃ. Sithilahanunoti evaṃnāmakassa pakkhino. Bheravassāti kāḷasīhassa. Semhārassāti makkaṭassa. Evaṃ noti etāya diṭṭhiyā sati na hotīti attho.
127. අත්‌ථෙව ජාතීති එතාය දිට්‌ඨියා සති බ්‍රහ්‌මචරියවාසොව නත්‌ථි, ජාති පන අත්‌ථියෙව. තථා ජරාමරණාදීනීති දස්‌සෙති. යෙසාහන්‌ති යෙසං අහං. නිඝාතන්‌ති උපඝාතං විනාසං. මම සාවකා හි එතෙසු නිබ්‌බින්‌නා ඉධෙව නිබ්‌බානං පාපුණන්‌තීති අධිප්‌පායො.
127.Attheva jātīti etāya diṭṭhiyā sati brahmacariyavāsova natthi, jāti pana atthiyeva. Tathā jarāmaraṇādīnīti dasseti. Yesāhanti yesaṃ ahaṃ. Nighātanti upaghātaṃ vināsaṃ. Mama sāvakā hi etesu nibbinnā idheva nibbānaṃ pāpuṇantīti adhippāyo.
128. තස්‌මාතිහාති යස්‌මා අබ්‍යාකතමෙතං, චතුසච්‌චමෙව මයා බ්‍යාකතං, තස්‌මාති අත්‌ථො. න හෙතං මාලුක්‍යපුත්‌ත අත්‌ථසංහිතන්‌ති එතං දිට්‌ඨිගතං වා එතං බ්‍යාකරණං වා කාරණනිස්‌සිතං න හොති. න ආදිබ්‍රහ්‌මචරියකන්‌ති බ්‍රහ්‌මචරියස්‌ස ආදිමත්‌තම්‌පි පුබ්‌බභාගසීලමත්‌තම්‌පි න හොති. න නිබ්‌බිදායාතිආදීසු වට්‌ටෙ නිබ්‌බින්‌දනත්‌ථාය වා විරජ්‌ඣනත්‌ථාය වා වට්‌ටනිරොධාය වා රාගාදිවූපසමනත්‌ථාය වා අභිඤ්‌ඤෙය්‍යෙ ධම්‌මෙ අභිජානනත්‌ථාය වා චතුමග්‌ගසඞ්‌ඛාතසම්‌බොධත්‌ථාය වා අසඞ්‌ඛතනිබ්‌බානසච්‌ඡිකිරියත්‌ථාය වා න හොති. එතං හීති එතං චතුසච්‌චබ්‍යාකරණං. ආදිබ්‍රහ්‌මචරියකන්‌ති බ්‍රහ්‌මචරියස්‌ස ආදිභූතං පුබ්‌බපදට්‌ඨානං. සෙසං වුත්‌තපටිවිපක්‌ඛනයෙන වෙදිතබ්‌බං. ඉමම්‌පි දෙසනං භගවා නෙය්‍යපුග්‌ගලවසෙන නිට්‌ඨාපෙසීති.
128.Tasmātihāti yasmā abyākatametaṃ, catusaccameva mayā byākataṃ, tasmāti attho. Na hetaṃ mālukyaputta atthasaṃhitanti etaṃ diṭṭhigataṃ vā etaṃ byākaraṇaṃ vā kāraṇanissitaṃ na hoti. Na ādibrahmacariyakanti brahmacariyassa ādimattampi pubbabhāgasīlamattampi na hoti. Na nibbidāyātiādīsu vaṭṭe nibbindanatthāya vā virajjhanatthāya vā vaṭṭanirodhāya vā rāgādivūpasamanatthāya vā abhiññeyye dhamme abhijānanatthāya vā catumaggasaṅkhātasambodhatthāya vā asaṅkhatanibbānasacchikiriyatthāya vā na hoti. Etaṃ hīti etaṃ catusaccabyākaraṇaṃ. Ādibrahmacariyakanti brahmacariyassa ādibhūtaṃ pubbapadaṭṭhānaṃ. Sesaṃ vuttapaṭivipakkhanayena veditabbaṃ. Imampi desanaṃ bhagavā neyyapuggalavasena niṭṭhāpesīti.
පපඤ්‌චසූදනියා මජ්‌ඣිමනිකායට්‌ඨකථාය
Papañcasūdaniyā majjhimanikāyaṭṭhakathāya
චූළමාලුක්‍යසුත්‌තවණ්‌ණනා නිට්‌ඨිතා.
Cūḷamālukyasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / මජ්‌ඣිමනිකාය • Majjhimanikāya / 3. චූළමාලුක්‍යසුත්‌තං • 3. Cūḷamālukyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / මජ්‌ඣිමනිකාය (ටීකා) • Majjhimanikāya (ṭīkā) / 3. චූළමාලුක්‍යසුත්‌තවණ්‌ණනා • 3. Cūḷamālukyasuttavaṇṇanā
