| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༣. ཙཱུལ༹མཱལུཀྱསུཏྟཝཎྞནཱ
3. Cūḷamālukyasuttavaṇṇanā
༡༢༢. ཨེཝཾ མེ སུཏནྟི མཱལུཀྱསུཏྟཾ། ཏཏྠ མཱལུཀྱཔུཏྟསྶཱཏི ཨེཝཾནཱམཀསྶ ཐེརསྶ། ཋཔིཏཱནི པཊིཀྑིཏྟཱནཱིཏི དིཊྛིགཏཱནི ནཱམ ན བྱཱཀཱཏབྦཱནཱིཏི ཨེཝཾ ཋཔིཏཱནི ཙེཝ པཊིཀྑིཏྟཱནི ཙ། ཏཐཱགཏོཏི སཏྟོ། ཏཾ མེ ན རུཙྩཏཱིཏི ཏཾ ཨབྱཱཀརཎཾ མཡ྄ཧཾ ན རུཙྩཏི། སིཀྑཾ པཙྩཀྑཱཡཱཏི སིཀྑཾ པཊིཀྑིཔིཏྭཱ།
122.Evaṃme sutanti mālukyasuttaṃ. Tattha mālukyaputtassāti evaṃnāmakassa therassa. Ṭhapitāni paṭikkhittānīti diṭṭhigatāni nāma na byākātabbānīti evaṃ ṭhapitāni ceva paṭikkhittāni ca. Tathāgatoti satto. Taṃ me na ruccatīti taṃ abyākaraṇaṃ mayhaṃ na ruccati. Sikkhaṃpaccakkhāyāti sikkhaṃ paṭikkhipitvā.
༡༢༥. ཀོ སནྟོ ཀཾ པཙྩཱཙིཀྑསཱིཏི ཡཱཙཀོ ཝཱ ཧི ཡཱཙིཏཀཾ པཙྩཱཙིཀྑེཡྻ, ཡཱཙིཏཀོ ཝཱ ཡཱཙཀཾ། ཏྭཾ ནེཝ ཡཱཙཀོ ན ཡཱཙིཏཀོ, སོ དཱནི ཏྭཾ ཀོ སནྟོ ཀཾ པཙྩཱཙིཀྑསཱིཏི ཨཏྠོ།
125.Ko santo kaṃ paccācikkhasīti yācako vā hi yācitakaṃ paccācikkheyya, yācitako vā yācakaṃ. Tvaṃ neva yācako na yācitako, so dāni tvaṃ ko santo kaṃ paccācikkhasīti attho.
༡༢༦. ཝིདྡྷོ ཨསྶཱཏི པརསེནཱཡ ཋིཏེན ཝིདྡྷོ བྷཝེཡྻ། གཱལ༹ྷཔལེཔནེནཱཏི བཧལལེཔནེན། བྷིསཀྐནྟི ཝེཛྫཾ། སལླཀཏྟནྟི སལླཀནྟནཾ སལླཀནྟིཡསུཏྟཝཱཙཀཾ། ཨཀྐསྶཱཏི ཨཀྐཝཱཀེ གཧེཏྭཱ ཛིཡཾ ཀརོནྟི། ཏེན ཝུཏྟཾ ‘‘ཨཀྐསྶཱ’’ཏི། སཎྷསྶཱཏི ཝེཎུཝིལཱིཝསྶ། མརུཝཱཁཱིརཔཎྞཱིནམྤི ཝཱཀེཧིཡེཝ ཀརོནྟི། ཏེན ཝུཏྟཾ ཡདི ཝཱ མརུཝཱཡ ཡདི ཝཱ ཁཱིརཔཎྞིནོཏི། གཙྪནྟི པབྦཏགཙྪནདཱིགཙྪཱདཱིསུ ཛཱཏཾ། རོཔིམནྟི རོཔེཏྭཱ ཝཌྜྷིཏཾ སརཝནཏོ སརཾ གཧེཏྭཱ ཀཏཾ། སིཐིལཧནུནོཏི ཨེཝཾནཱམཀསྶ པཀྑིནོ། བྷེརཝསྶཱཏི ཀཱལ༹སཱིཧསྶ། སེམྷཱརསྶཱཏི མཀྐཊསྶ། ཨེཝཾ ནོཏི ཨེཏཱཡ དིཊྛིཡཱ སཏི ན ཧོཏཱིཏི ཨཏྠོ།
126.Viddhoassāti parasenāya ṭhitena viddho bhaveyya. Gāḷhapalepanenāti bahalalepanena. Bhisakkanti vejjaṃ. Sallakattanti sallakantanaṃ sallakantiyasuttavācakaṃ. Akkassāti akkavāke gahetvā jiyaṃ karonti. Tena vuttaṃ ‘‘akkassā’’ti. Saṇhassāti veṇuvilīvassa. Maruvākhīrapaṇṇīnampi vākehiyeva karonti. Tena vuttaṃ yadi vā maruvāya yadi vā khīrapaṇṇinoti. Gacchanti pabbatagacchanadīgacchādīsu jātaṃ. Ropimanti ropetvā vaḍḍhitaṃ saravanato saraṃ gahetvā kataṃ. Sithilahanunoti evaṃnāmakassa pakkhino. Bheravassāti kāḷasīhassa. Semhārassāti makkaṭassa. Evaṃ noti etāya diṭṭhiyā sati na hotīti attho.
༡༢༧. ཨཏྠེཝ ཛཱཏཱིཏི ཨེཏཱཡ དིཊྛིཡཱ སཏི བྲཧྨཙརིཡཝཱསོཝ ནཏྠི, ཛཱཏི པན ཨཏྠིཡེཝ། ཏཐཱ ཛརཱམརཎཱདཱིནཱིཏི དསྶེཏི། ཡེསཱཧནྟི ཡེསཾ ཨཧཾ། ནིགྷཱཏནྟི ཨུཔགྷཱཏཾ ཝིནཱསཾ། མམ སཱཝཀཱ ཧི ཨེཏེསུ ནིབྦིནྣཱ ཨིདྷེཝ ནིབྦཱནཾ པཱཔུཎནྟཱིཏི ཨདྷིཔྤཱཡོ།
127.Attheva jātīti etāya diṭṭhiyā sati brahmacariyavāsova natthi, jāti pana atthiyeva. Tathā jarāmaraṇādīnīti dasseti. Yesāhanti yesaṃ ahaṃ. Nighātanti upaghātaṃ vināsaṃ. Mama sāvakā hi etesu nibbinnā idheva nibbānaṃ pāpuṇantīti adhippāyo.
༡༢༨. ཏསྨཱཏིཧཱཏི ཡསྨཱ ཨབྱཱཀཏམེཏཾ, ཙཏུསཙྩམེཝ མཡཱ བྱཱཀཏཾ, ཏསྨཱཏི ཨཏྠོ། ན ཧེཏཾ མཱལུཀྱཔུཏྟ ཨཏྠསཾཧིཏནྟི ཨེཏཾ དིཊྛིགཏཾ ཝཱ ཨེཏཾ བྱཱཀརཎཾ ཝཱ ཀཱརཎནིསྶིཏཾ ན ཧོཏི། ན ཨཱདིབྲཧྨཙརིཡཀནྟི བྲཧྨཙརིཡསྶ ཨཱདིམཏྟམྤི པུབྦབྷཱགསཱིལམཏྟམྤི ན ཧོཏི། ན ནིབྦིདཱཡཱཏིཨཱདཱིསུ ཝཊྚེ ནིབྦིནྡནཏྠཱཡ ཝཱ ཝིརཛ྄ཛྷནཏྠཱཡ ཝཱ ཝཊྚནིརོདྷཱཡ ཝཱ རཱགཱདིཝཱུཔསམནཏྠཱཡ ཝཱ ཨབྷིཉྙེཡྻེ དྷམྨེ ཨབྷིཛཱནནཏྠཱཡ ཝཱ ཙཏུམགྒསངྑཱཏསམྦོདྷཏྠཱཡ ཝཱ ཨསངྑཏནིབྦཱནསཙྪིཀིརིཡཏྠཱཡ ཝཱ ན ཧོཏི། ཨེཏཾ ཧཱིཏི ཨེཏཾ ཙཏུསཙྩབྱཱཀརཎཾ། ཨཱདིབྲཧྨཙརིཡཀནྟི བྲཧྨཙརིཡསྶ ཨཱདིབྷཱུཏཾ པུབྦཔདཊྛཱནཾ། སེསཾ ཝུཏྟཔཊིཝིཔཀྑནཡེན ཝེདིཏབྦཾ། ཨིམམྤི དེསནཾ བྷགཝཱ ནེཡྻཔུགྒལཝསེན ནིཊྛཱཔེསཱིཏི།
128.Tasmātihāti yasmā abyākatametaṃ, catusaccameva mayā byākataṃ, tasmāti attho. Na hetaṃ mālukyaputta atthasaṃhitanti etaṃ diṭṭhigataṃ vā etaṃ byākaraṇaṃ vā kāraṇanissitaṃ na hoti. Na ādibrahmacariyakanti brahmacariyassa ādimattampi pubbabhāgasīlamattampi na hoti. Na nibbidāyātiādīsu vaṭṭe nibbindanatthāya vā virajjhanatthāya vā vaṭṭanirodhāya vā rāgādivūpasamanatthāya vā abhiññeyye dhamme abhijānanatthāya vā catumaggasaṅkhātasambodhatthāya vā asaṅkhatanibbānasacchikiriyatthāya vā na hoti. Etaṃ hīti etaṃ catusaccabyākaraṇaṃ. Ādibrahmacariyakanti brahmacariyassa ādibhūtaṃ pubbapadaṭṭhānaṃ. Sesaṃ vuttapaṭivipakkhanayena veditabbaṃ. Imampi desanaṃ bhagavā neyyapuggalavasena niṭṭhāpesīti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཙཱུལ༹མཱལུཀྱསུཏྟཝཎྞནཱ ནིཊྛིཏཱ།
Cūḷamālukyasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༣. ཙཱུལ༹མཱལུཀྱསུཏྟཾ • 3. Cūḷamālukyasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༣. ཙཱུལ༹མཱལུཀྱསུཏྟཝཎྞནཱ • 3. Cūḷamālukyasuttavaṇṇanā
