| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. சூளனிகாஸுத்தவண்ணனா
10. Cūḷanikāsuttavaṇṇanā
81. த³ஸமே அருணவதிஸுத்தந்தஅட்டு²ப்பத்தியந்தி ‘‘பூ⁴தபுப்³ப³ங், பி⁴க்க²வே, ராஜா அஹோஸி அருணவா நாம. ரஞ்ஞோ கோ² பன, பி⁴க்க²வே, அருணவதோ அருணவதீ நாம ராஜதா⁴னீ அஹோஸி. அருணவதிங் கோ² பன, பி⁴க்க²வே, ராஜதா⁴னிங் ஸிகீ² ப⁴க³வா அரஹங் ஸம்மாஸம்பு³த்³தோ⁴ உபனிஸ்ஸாய விஹாஸி. ஸிகி²ஸ்ஸ கோ² பன, பி⁴க்க²வே, ப⁴க³வதோ அரஹதோ ஸம்மாஸம்பு³த்³த⁴ஸ்ஸ அபி⁴பூ⁴ஸம்ப⁴வங் நாம ஸாவகயுக³ங் அஹோஸி அக்³க³ங் ப⁴த்³த³யுக³ங். அத² கோ², பி⁴க்க²வே, ஸிகீ² ப⁴க³வா அரஹங் ஸம்மாஸம்பு³த்³தோ⁴ அபி⁴பு⁴ங் பி⁴க்கு²ங் ஆமந்தேஸீ’’திஆதி³னா ப்³ரஹ்மஸங்யுத்தே (ஸங்॰ நி॰ 1.185) ஆக³தஸ்ஸ அருணவதிஸுத்தந்தஸ்ஸ அட்டு²ப்பத்தியங். அதிப்பகோ³தி அதிவிய பகோ³, அதிவிய பாதோதி அத்தோ², ந தாவ குலேஸு ப⁴த்தங் நிட்டா²தீதி வுத்தங் ஹோதி.
81. Dasame aruṇavatisuttantaaṭṭhuppattiyanti ‘‘bhūtapubbaṃ, bhikkhave, rājā ahosi aruṇavā nāma. Rañño kho pana, bhikkhave, aruṇavato aruṇavatī nāma rājadhānī ahosi. Aruṇavatiṃ kho pana, bhikkhave, rājadhāniṃ sikhī bhagavā arahaṃ sammāsambuddho upanissāya vihāsi. Sikhissa kho pana, bhikkhave, bhagavato arahato sammāsambuddhassa abhibhūsambhavaṃ nāma sāvakayugaṃ ahosi aggaṃ bhaddayugaṃ. Atha kho, bhikkhave, sikhī bhagavā arahaṃ sammāsambuddho abhibhuṃ bhikkhuṃ āmantesī’’tiādinā brahmasaṃyutte (saṃ. ni. 1.185) āgatassa aruṇavatisuttantassa aṭṭhuppattiyaṃ. Atippagoti ativiya pago, ativiya pātoti attho, na tāva kulesu bhattaṃ niṭṭhātīti vuttaṃ hoti.
உஜ்ஜா²யந்தீதி அவஜா²யந்தி, ஹெட்டா² கத்வா சிந்தெந்தி, லாமகதோ சிந்தெந்தி. அனேகவிஹிதங் இத்³தி⁴விகுப்³ப³னங் கத்வாதி ‘‘பகதிவண்ணங் விஜஹித்வா நாக³வண்ணங் வா த³ஸ்ஸேதி, ஸுபண்ணவண்ணங் வா த³ஸ்ஸேதீ’’திஆதி³னா (படி॰ ம॰ 3.13) நயேன ஆக³தங் அனேகப்பகாரங் இத்³தி⁴விகுப்³ப³னங் கத்வா. ஸஹஸ்ஸிலோகதா⁴துந்தி சக்கவாளஸஹஸ்ஸங். கா³தா²த்³வயங் அபா⁴ஸீதி தே²ரோ கிர ‘‘கத²ங் தே³ஸிதா கோ² த⁴ம்மதே³ஸனா ஸப்³பே³ஸங் பியா மனாபா’’தி சிந்தெத்வா ‘‘ஸப்³பே³பி பாஸண்டா³ ஸப்³பே³ தே³வமனுஸ்ஸா அத்தனோ அத்தனோ ஸமயே புரிஸகாரங் வண்ணயந்தி, வீரியஸ்ஸ அவண்ணவாதீ³ நாம நத்தி², வீரியப்படிஸங்யுத்தங் கத்வா தே³ஸெஸ்ஸாமி. ஏவமஸ்ஸ த⁴ம்மதே³ஸனா ஸப்³பே³ஸங் பியா ப⁴விஸ்ஸதி மனாபா’’தி ஞத்வா தீஸு பிடகேஸு விசினித்வா ‘‘ஆரம்ப⁴த² நிக்கமதா²’’தி (ஸங்॰ நி॰ 1.186) இத³ங் கா³தா²த்³வயங் அபா⁴ஸி.
Ujjhāyantīti avajhāyanti, heṭṭhā katvā cintenti, lāmakato cintenti. Anekavihitaṃ iddhivikubbanaṃ katvāti ‘‘pakativaṇṇaṃ vijahitvā nāgavaṇṇaṃ vā dasseti, supaṇṇavaṇṇaṃ vā dassetī’’tiādinā (paṭi. ma. 3.13) nayena āgataṃ anekappakāraṃ iddhivikubbanaṃ katvā. Sahassilokadhātunti cakkavāḷasahassaṃ. Gāthādvayaṃ abhāsīti thero kira ‘‘kathaṃ desitā kho dhammadesanā sabbesaṃ piyā manāpā’’ti cintetvā ‘‘sabbepi pāsaṇḍā sabbe devamanussā attano attano samaye purisakāraṃ vaṇṇayanti, vīriyassa avaṇṇavādī nāma natthi, vīriyappaṭisaṃyuttaṃ katvā desessāmi. Evamassa dhammadesanā sabbesaṃ piyā bhavissati manāpā’’ti ñatvā tīsu piṭakesu vicinitvā ‘‘ārambhatha nikkamathā’’ti (saṃ. ni. 1.186) idaṃ gāthādvayaṃ abhāsi.
கிங் ஆலோகோ அயந்தி கஸ்ஸ நு கோ² அயங் ஆலோகோதி. விசினந்தானந்தி சிந்தெந்தானங். ஸப்³பே³தி லோகதா⁴துயங் ஸப்³பே³ தே³வா ச மனுஸ்ஸா ச. ஓஸடாய பரிஸாயாதி த⁴ம்மஸ்ஸவனத்த²ங் ஸமோஸடாய பரிமிதபரிச்சி²ன்னாய பரிஸாய. அத்தோ²பி நேஸங் பாகடோ அஹோஸீதி ந கேவலங் தே ஸத்³த³மேவ அஸ்ஸோஸுங், அத² கோ² அத்தோ²பி தேஸங் பகதிஸவனூபசாரே விய பாகடோ அஹோஸி. தேன ஸஹஸ்ஸங் லோகதா⁴துங் விஞ்ஞாபேதீதி அதி⁴ப்பாயோ.
Kiṃ āloko ayanti kassa nu kho ayaṃ ālokoti. Vicinantānanti cintentānaṃ. Sabbeti lokadhātuyaṃ sabbe devā ca manussā ca. Osaṭāya parisāyāti dhammassavanatthaṃ samosaṭāya parimitaparicchinnāya parisāya. Atthopi nesaṃ pākaṭo ahosīti na kevalaṃ te saddameva assosuṃ, atha kho atthopi tesaṃ pakatisavanūpacāre viya pākaṭo ahosi. Tena sahassaṃ lokadhātuṃ viññāpetīti adhippāyo.
பரிஹரந்தீதி ஸினேருங் த³க்கி²ணதோ கத்வா பரிவத்தெந்தி. விரோசமானாதி அத்தனோ ஜுதியா தி³ப்³ப³மானா, ஸோப⁴மானா வா. தாவ ஸஹஸ்ஸதா⁴ லோகோதி யத்தகோ சந்தி³மஸூரியேஹி ஓபா⁴ஸியமானோ லோகதா⁴துஸங்கா²தோ ஏகேகோ லோகோ, தத்தகேன பமாணேன ஸஹஸ்ஸதா⁴ லோகோ, இமினா சக்கவாளேன ஸத்³தி⁴ங் சக்கவாளஸஹஸ்ஸந்தி அத்தோ². கஸ்மா பனேஸா ஆனீதாதி ஏஸா சூளனிகா லோகதா⁴து கஸ்மா ப⁴க³வதா ஆனீதா, தே³ஸிதாதி அத்தோ². மஜ்ஜி²மிகாய லோகதா⁴துயா பரிச்சே²த³த³ஸ்ஸனத்த²ந்தி த்³விஸஹஸ்ஸிலோகதா⁴துயா பரிமாணத³ஸ்ஸனத்த²ங்.
Pariharantīti sineruṃ dakkhiṇato katvā parivattenti. Virocamānāti attano jutiyā dibbamānā, sobhamānā vā. Tāva sahassadhā lokoti yattako candimasūriyehi obhāsiyamāno lokadhātusaṅkhāto ekeko loko, tattakena pamāṇena sahassadhā loko, iminā cakkavāḷena saddhiṃ cakkavāḷasahassanti attho. Kasmā panesā ānītāti esā cūḷanikā lokadhātu kasmā bhagavatā ānītā, desitāti attho. Majjhimikāya lokadhātuyā paricchedadassanatthanti dvisahassilokadhātuyā parimāṇadassanatthaṃ.
ஸஹஸ்ஸிலோகதா⁴துயா ஸஹஸ்ஸீ த்³விஸஹஸ்ஸிலோகதா⁴து, ஸா சக்கவாளக³ணனாய த³ஸஸதஸஹஸ்ஸசக்கவாளபரிமாணா. தேனாஹ ‘‘ஸஹஸ்ஸசக்கவாளானி ஸஹஸ்ஸபா⁴கே³ன க³ணெத்வா’’திஆதி³. கம்பனதே³வதூபஸங்கமனாதி³னா ஜாதசக்கவாளேன ஸஹ யோக³க்கே²மங் டா²னங் ஜாதிக்கெ²த்தங். தத்தகாய ஏவ ஜாதிக்கெ²த்தபா⁴வோ த⁴ம்மதாவஸேனேவ வேதி³தப்³போ³, ‘‘பரிக்³க³ஹவஸேனா’’தி கேசி. ஸப்³பே³ஸம்பி பு³த்³தா⁴னங் ஏவங் ஜாதிக்கெ²த்தங் தன்னிவாஸீனங்யேவ ச தே³வதானங் த⁴ம்மாபி⁴ஸமயோதி வத³ந்தி. படிஸந்தி⁴க்³க³ஹணாதீ³னங் ஸத்தன்னங்யேவ க³ஹணங் நித³ஸ்ஸனமத்தங் மஹாபி⁴னீஹாராதி³காலேபி தஸ்ஸ பகம்பனஸ்ஸ லப்³ப⁴னதோ.
Sahassilokadhātuyā sahassī dvisahassilokadhātu, sā cakkavāḷagaṇanāya dasasatasahassacakkavāḷaparimāṇā. Tenāha ‘‘sahassacakkavāḷāni sahassabhāgena gaṇetvā’’tiādi. Kampanadevatūpasaṅkamanādinā jātacakkavāḷena saha yogakkhemaṃ ṭhānaṃ jātikkhettaṃ. Tattakāya eva jātikkhettabhāvo dhammatāvaseneva veditabbo, ‘‘pariggahavasenā’’ti keci. Sabbesampi buddhānaṃ evaṃ jātikkhettaṃ tannivāsīnaṃyeva ca devatānaṃ dhammābhisamayoti vadanti. Paṭisandhiggahaṇādīnaṃ sattannaṃyeva gahaṇaṃ nidassanamattaṃ mahābhinīhārādikālepi tassa pakampanassa labbhanato.
ஸஹஸ்ஸங் ஸஹஸ்ஸதா⁴ கத்வா க³ணிதங் மஜ்ஜி²மிகந்திஆதி³னா மஜ்ஜி²மிகாய லோகதா⁴துயா ஸஹஸ்ஸங் திஸஹஸ்ஸிலோகதா⁴து, ஸாயேவ ச மஹாஸஹஸ்ஸிலோகதா⁴தூதி த³ஸ்ஸேதி. ஸரஸேனேவ ஆணாபவத்தனங் ஆணாக்கெ²த்தங், யங் ஏகஜ்ஜ²ங் ஸங்வட்டதி விவட்டதி ச. ஆணா ப²ரதீதி தன்னிவாஸிதே³வதானங் ஸிரஸா ஸம்படிச்ச²னேன வத்ததி, தஞ்ச கோ² கேவலங் பு³த்³தா⁴னுபா⁴வேனேவ, அதி⁴ப்பாயவஸேன ச பன ‘‘யாவதா பன ஆகங்கெ²ய்யா’’தி (அ॰ நி॰ 3.81) வசனதோ பு³த்³தா⁴னங் அவிஸயோ நாம நத்தி², விஸயக்கெ²த்தஸ்ஸ பமாணபரிச்சே²தோ³ நாம நத்தி². விஸமோதி ஸூரியுக்³க³மனாதீ³னங் விஸமபா⁴வதோ விஸமோ. தேனேவாஹ ‘‘ஏகஸ்மிங் டா²னே ஸூரியோ உக்³க³தோ ஹோதீ’’திஆதி³. ஸேஸமெத்த² ஸுவிஞ்ஞெய்யமேவ.
Sahassaṃ sahassadhā katvā gaṇitaṃ majjhimikantiādinā majjhimikāya lokadhātuyā sahassaṃ tisahassilokadhātu, sāyeva ca mahāsahassilokadhātūti dasseti. Saraseneva āṇāpavattanaṃ āṇākkhettaṃ, yaṃ ekajjhaṃ saṃvaṭṭati vivaṭṭati ca. Āṇā pharatīti tannivāsidevatānaṃ sirasā sampaṭicchanena vattati, tañca kho kevalaṃ buddhānubhāveneva, adhippāyavasena ca pana ‘‘yāvatā pana ākaṅkheyyā’’ti (a. ni. 3.81) vacanato buddhānaṃ avisayo nāma natthi, visayakkhettassa pamāṇaparicchedo nāma natthi. Visamoti sūriyuggamanādīnaṃ visamabhāvato visamo. Tenevāha ‘‘ekasmiṃ ṭhāne sūriyo uggato hotī’’tiādi. Sesamettha suviññeyyameva.
சூளனிகாஸுத்தவண்ணனா நிட்டி²தா.
Cūḷanikāsuttavaṇṇanā niṭṭhitā.
ஆனந்த³வக்³க³வண்ணனா நிட்டி²தா.
Ānandavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. சூளனிகாஸுத்தங் • 10. Cūḷanikāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. சூளனிகாஸுத்தவண்ணனா • 10. Cūḷanikāsuttavaṇṇanā
