| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
10. жуул̣анигаасуд̇д̇аван̣н̣анаа
10. Cūḷanikāsuttavaṇṇanā
81. д̣̇асамасса д̣̇увид̇хо нигкзбо ад̇т̇уббад̇д̇игоби бужчаавасигоби. гад̇араад̇т̇уббад̇д̇ияам̣ гасса бужчааяа гат̇ид̇анд̇и жз? арун̣авад̇исуд̇д̇анд̇аад̇т̇уббад̇д̇ияам̣ (сам̣. ни. 1.185 аад̣̇аяо) аананд̣̇ад̇т̇зрасса бужчааяа гат̇ид̇ам̣. арун̣авад̇исуд̇д̇анд̇о гзна гат̇ид̇од̇и? д̣̇вийхи б̣уд̣̇д̇хзхи гат̇ид̇о сикинаа жа бхаг̇авад̇аа амхааган̃жа сад̇т̇аараа. имасмаа хи габбаа згад̇им̣сагаббамад̇т̇агз арун̣авад̇инаг̇арз арун̣авад̇о ран̃н̃о бабхаавад̇ияаа наама махзсияаа гужчисмим̣ ниб̣б̣ад̇д̇ид̇ваа барибаггз н̃аан̣з махаабхинигкаманам̣ нигкамид̇ваа сикий бхаг̇аваа б̣од̇химан̣д̣з саб̣б̣ан̃н̃уд̇ан̃н̃аан̣ам̣ бадивиж̇жхид̇ваа бавад̇д̇ид̇аварад̇хаммажагго арун̣авад̇им̣ ниссааяа вихаранд̇о згад̣̇ивасам̣ баад̇ова сарийраббадиж̇аг̇г̇анам̣ гад̇ваа махаабхигкусан̇гхабаривааро ‘‘арун̣авад̇им̣ бин̣д̣ааяа бависиссаамий’’д̇и нигкамид̇ваа вихаарад̣̇ваарагодтагасамийбз тид̇о абхибхум̣ наама аг̇г̇асаавагам̣ ааманд̇зси – ‘‘ад̇иббаг̇о ко, бхигку, арун̣авад̇им̣ бин̣д̣ааяа бависид̇ум̣, язна ан̃н̃ад̇аро б̣рахмалого д̇знубасан̇гамиссаамаа’’д̇и. яат̇ааха –
81. Dasamassa duvidho nikkhepo atthuppattikopi pucchāvasikopi. Kataraatthuppattiyaṃ kassa pucchāya kathitanti ce? Aruṇavatisuttantaatthuppattiyaṃ (saṃ. ni. 1.185 ādayo) ānandattherassa pucchāya kathitaṃ. Aruṇavatisuttanto kena kathitoti? Dvīhi buddhehi kathito sikhinā ca bhagavatā amhākañca satthārā. Imasmā hi kappā ekatiṃsakappamatthake aruṇavatinagare aruṇavato rañño pabhāvatiyā nāma mahesiyā kucchismiṃ nibbattitvā paripakke ñāṇe mahābhinikkhamanaṃ nikkhamitvā sikhī bhagavā bodhimaṇḍe sabbaññutaññāṇaṃ paṭivijjhitvā pavattitavaradhammacakko aruṇavatiṃ nissāya viharanto ekadivasaṃ pātova sarīrappaṭijagganaṃ katvā mahābhikkhusaṅghaparivāro ‘‘aruṇavatiṃ piṇḍāya pavisissāmī’’ti nikkhamitvā vihāradvārakoṭṭhakasamīpe ṭhito abhibhuṃ nāma aggasāvakaṃ āmantesi – ‘‘atippago kho, bhikkhu, aruṇavatiṃ piṇḍāya pavisituṃ, yena aññataro brahmaloko tenupasaṅkamissāmā’’ti. Yathāha –
‘‘ат̇а ко, бхигкавз, сикий бхаг̇аваа арахам̣ саммаасамб̣уд̣̇д̇хо абхибхум̣ бхигкум̣ ааманд̇зси – ‘ааяаама, б̣раахман̣а, язна ан̃н̃ад̇аро б̣рахмалого д̇знубасан̇гамиссаама, на д̇аава бхад̇д̇агаало бхависсад̇ий’д̇и. ‘звам̣, бханд̇з’д̇и ко, бхигкавз, абхибхуу бхигку сикисса бхаг̇авад̇о арахад̇о саммаасамб̣уд̣̇д̇хасса бажжассоси. ат̇а ко, бхигкавз, сикий бхаг̇аваа арахам̣ саммаасамб̣уд̣̇д̇хо абхибхуу жа бхигку язна ан̃н̃ад̇аро б̣рахмалого д̇знубасан̇гамим̣суу’’д̇и (сам̣. ни. 1.185).
‘‘Atha kho, bhikkhave, sikhī bhagavā arahaṃ sammāsambuddho abhibhuṃ bhikkhuṃ āmantesi – ‘āyāma, brāhmaṇa, yena aññataro brahmaloko tenupasaṅkamissāma, na tāva bhattakālo bhavissatī’ti. ‘Evaṃ, bhante’ti kho, bhikkhave, abhibhū bhikkhu sikhissa bhagavato arahato sammāsambuddhassa paccassosi. Atha kho, bhikkhave, sikhī bhagavā arahaṃ sammāsambuddho abhibhū ca bhikkhu yena aññataro brahmaloko tenupasaṅkamiṃsū’’ti (saṃ. ni. 1.185).
д̇ад̇т̇а махааб̣рахмаа саммаасамб̣уд̣̇д̇хам̣ д̣̇исваа ад̇д̇амано бажжуг̇г̇аманам̣ гад̇ваа б̣рахмаасанам̣ бан̃н̃аабзд̇ваа ад̣̇ааси, т̇зрассааби анужчавигам̣ аасанам̣ бан̃н̃аабаяим̣су. нисийд̣̇и бхаг̇аваа бан̃н̃ад̇д̇з аасанз, т̇зроби ад̇д̇ано бан̃н̃ад̇д̇аасанз нисийд̣̇и. махааб̣рахмааби д̣̇асаб̣алам̣ ванд̣̇ид̇ваа згаманд̇ам̣ нисийд̣̇и.
Tattha mahābrahmā sammāsambuddhaṃ disvā attamano paccuggamanaṃ katvā brahmāsanaṃ paññāpetvā adāsi, therassāpi anucchavikaṃ āsanaṃ paññāpayiṃsu. Nisīdi bhagavā paññatte āsane, theropi attano paññattāsane nisīdi. Mahābrahmāpi dasabalaṃ vanditvā ekamantaṃ nisīdi.
ат̇а ко, бхигкавз, сикий бхаг̇аваа абхибхум̣ бхигкум̣ ааманд̇зси – ‘‘бадибхаад̇у д̇ам̣, б̣раахман̣а, б̣рахмуно жа б̣рахмабарисааяа жа б̣рахмабаарисаж̇ж̇аанан̃жа д̇хаммийгат̇аад̇и. ‘звам̣, бханд̇з’д̇и ко, бхигкавз, абхибхуу бхигку сикисса бхаг̇авад̇о арахад̇о саммаасамб̣уд̣̇д̇хасса бадиссун̣ид̇ваа б̣рахмуно жа б̣рахмабарисааяа жа б̣рахмабаарисаж̇ж̇аанан̃жа д̇хаммим̣ гат̇ам̣ гат̇зси. т̇зрз д̇хаммам̣ гат̇знд̇з б̣рахмаг̇ан̣аа уж̇жхааяим̣су – ‘‘жирассан̃жа маяам̣ сад̇т̇у б̣рахмалогааг̇аманам̣ лабхимха, аяан̃жа бхигку табзд̇ваа сад̇т̇аарам̣ саяам̣ д̇хаммагат̇ам̣ аарабхий’’д̇и.
Atha kho, bhikkhave, sikhī bhagavā abhibhuṃ bhikkhuṃ āmantesi – ‘‘paṭibhātu taṃ, brāhmaṇa, brahmuno ca brahmaparisāya ca brahmapārisajjānañca dhammīkathāti. ‘Evaṃ, bhante’ti kho, bhikkhave, abhibhū bhikkhu sikhissa bhagavato arahato sammāsambuddhassa paṭissuṇitvā brahmuno ca brahmaparisāya ca brahmapārisajjānañca dhammiṃ kathaṃ kathesi. There dhammaṃ kathente brahmagaṇā ujjhāyiṃsu – ‘‘cirassañca mayaṃ satthu brahmalokāgamanaṃ labhimha, ayañca bhikkhu ṭhapetvā satthāraṃ sayaṃ dhammakathaṃ ārabhī’’ti.
сад̇т̇аа д̇зсам̣ анад̇д̇аманабхаавам̣ н̃ад̇ваа абхибхум̣ бхигкум̣ зд̇ад̣̇авожа – ‘‘уж̇жхааяанд̇и ко д̇з, б̣раахман̣а, б̣рахмаа жа б̣рахмабарисаа жа б̣рахмабаарисаж̇ж̇аа жа. д̇зна хи д̇вам̣ – б̣раахман̣а, бхияяосомад̇д̇ааяа сам̣взж̇зхий’’д̇и. т̇зро сад̇т̇у важанам̣ самбадижчид̇ваа анзгавихид̇ам̣ ид̣̇д̇хивигуб̣б̣анам̣ гад̇ваа сахассилогад̇хаад̇ум̣ сарзна вин̃н̃аабзнд̇о ‘‘аарамбхат̇а ниггамат̇аа’’д̇и (сам̣. ни. 1.185) г̇аат̇аад̣̇ваяам̣ абхааси. гим̣ бана гад̇ваа т̇зро сахассилогад̇хаад̇ум̣ вин̃н̃аабзсийд̇и? нийлагасин̣ам̣ д̇аава самаабаж̇ж̇ид̇ваа саб̣б̣ад̇т̇а анд̇хагаарам̣ пари, д̇ад̇о ‘‘гимид̣̇ам̣ анд̇хагаара’’нд̇и сад̇д̇аанам̣ аабхог̇з уббаннз аалогам̣ д̣̇ассзси. ‘‘гим̣ аалого аяа’’нд̇и вижинанд̇аанам̣ ад̇д̇аанам̣ д̣̇ассзси, сахассажаггаваал̣з д̣̇звамануссаа ан̃ж̇алим̣ баг̇г̇ан̣хид̇ваа баг̇г̇ан̣хид̇ваа т̇зрам̣язва намассамаанаа адтам̣су. т̇зро ‘‘махааж̇ано маяхам̣ д̇хаммам̣ д̣̇зсзнд̇асса сарам̣ сун̣аад̇уу’’д̇и имаа г̇аат̇аа абхааси. саб̣б̣з осадааяа барисааяа маж̇жхз нисийд̣̇ид̇ваа д̇хаммам̣ д̣̇зсзнд̇асса вияа сад̣̇д̣̇ам̣ ассосум̣. ад̇т̇оби нзсам̣ баагадо ахоси.
Satthā tesaṃ anattamanabhāvaṃ ñatvā abhibhuṃ bhikkhuṃ etadavoca – ‘‘ujjhāyanti kho te, brāhmaṇa, brahmā ca brahmaparisā ca brahmapārisajjā ca. Tena hi tvaṃ – brāhmaṇa, bhiyyosomattāya saṃvejehī’’ti. Thero satthu vacanaṃ sampaṭicchitvā anekavihitaṃ iddhivikubbanaṃ katvā sahassilokadhātuṃ sarena viññāpento ‘‘ārambhatha nikkamathā’’ti (saṃ. ni. 1.185) gāthādvayaṃ abhāsi. Kiṃ pana katvā thero sahassilokadhātuṃ viññāpesīti? Nīlakasiṇaṃ tāva samāpajjitvā sabbattha andhakāraṃ phari, tato ‘‘kimidaṃ andhakāra’’nti sattānaṃ ābhoge uppanne ālokaṃ dassesi. ‘‘Kiṃ āloko aya’’nti vicinantānaṃ attānaṃ dassesi, sahassacakkavāḷe devamanussā añjaliṃ paggaṇhitvā paggaṇhitvā theraṃyeva namassamānā aṭṭhaṃsu. Thero ‘‘mahājano mayhaṃ dhammaṃ desentassa saraṃ suṇātū’’ti imā gāthā abhāsi. Sabbe osaṭāya parisāya majjhe nisīditvā dhammaṃ desentassa viya saddaṃ assosuṃ. Atthopi nesaṃ pākaṭo ahosi.
ат̇а ко бхаг̇аваа сад̣̇д̇хим̣ т̇зрзна арун̣авад̇им̣ бажжааг̇анд̇ваа бин̣д̣ааяа жарид̇ваа бажчаабхад̇д̇ам̣ бин̣д̣абаад̇абадигганд̇о бхигкусан̇гхам̣ бужчи – ‘‘ассуд̇т̇а но д̇умхз, бхигкавз, абхибхусса бхигкуно б̣рахмалогз тид̇асса г̇аат̇ааяо бхаасамаанассаа’’д̇и. д̇з ‘‘аама, бханд̇з’’д̇и бадиж̇аанид̇ваа суд̇абхаавам̣ аавигаронд̇аа д̇ад̣̇зва г̇аат̇аад̣̇ваяам̣ уд̣̇аахарим̣су. сад̇т̇аа ‘‘саад̇ху саад̇хуу’’д̇и саад̇хугаарам̣ д̣̇ад̇ваа д̣̇зсанам̣ нидтабзси. звам̣ д̇аава ид̣̇ам̣ суд̇д̇ам̣ ид̇о згад̇им̣сагаббамад̇т̇агз сикинаа бхаг̇авад̇аа гат̇ид̇ам̣.
Atha kho bhagavā saddhiṃ therena aruṇavatiṃ paccāgantvā piṇḍāya caritvā pacchābhattaṃ piṇḍapātapaṭikkanto bhikkhusaṅghaṃ pucchi – ‘‘assuttha no tumhe, bhikkhave, abhibhussa bhikkhuno brahmaloke ṭhitassa gāthāyo bhāsamānassā’’ti. Te ‘‘āma, bhante’’ti paṭijānitvā sutabhāvaṃ āvikarontā tadeva gāthādvayaṃ udāhariṃsu. Satthā ‘‘sādhu sādhū’’ti sādhukāraṃ datvā desanaṃ niṭṭhapesi. Evaṃ tāva idaṃ suttaṃ ito ekatiṃsakappamatthake sikhinā bhagavatā kathitaṃ.
амхаагам̣ бана бхаг̇аваа саб̣б̣ан̃н̃уд̇ам̣ бад̇д̇о бавад̇д̇ид̇аварад̇хаммажагго саавад̇т̇им̣ убаниссааяа ж̇зд̇аванз вихаранд̇о ж̇здтамууламаасабун̣н̣амад̣̇ивасз бхигкуу ааманд̇зд̇ваа имам̣ арун̣авад̇исуд̇д̇ам̣ бадтабзси. аананд̣̇ад̇т̇зро б̣ийж̇аним̣ г̇ахзд̇ваа б̣ийж̇аяамаано тид̇агова аад̣̇ид̇о бадтааяа яаава барияосаанаа згаб̣яан̃ж̇анамби ахаабзд̇ваа сагаласуд̇д̇ам̣ уг̇г̇ан̣хи. со бунад̣̇ивасз бин̣д̣абаад̇абадигганд̇о д̣̇асаб̣аласса вад̇д̇ам̣ д̣̇ассзд̇ваа ад̇д̇ано д̣̇иваавихаарадтаанам̣ г̇анд̇ваа сад̣̇д̇хивихаариганд̇зваасигзсу вад̇д̇ам̣ д̣̇ассзд̇ваа багганд̇зсу хияяо гат̇ид̇ам̣ арун̣авад̇исуд̇д̇ам̣ ааваж̇ж̇знд̇о нисийд̣̇и. ат̇асса саб̣б̣ам̣ суд̇д̇ам̣ вибхууд̇ам̣ убадтааси. со жинд̇зси – ‘‘сикисса бхаг̇авад̇о аг̇г̇асааваго б̣рахмалогз тад̇ваа жаггаваал̣асахассз анд̇хагаарам̣ вид̇хамзд̇ваа сарийробхаасам̣ д̣̇ассзд̇ваа ад̇д̇ано сад̣̇д̣̇ам̣ саавзнд̇о д̇хаммагат̇ам̣ гат̇зсийд̇и хияяо сад̇т̇аараа гат̇ид̇ам̣, саавагасса д̇аава висаяо зваруубо, д̣̇аса баарамияо буурзд̇ваа саб̣б̣ан̃н̃уд̇ам̣ бад̇д̇о бана саммаасамб̣уд̣̇д̇хо гид̇д̇агам̣ таанам̣ сарзна вин̃н̃аабзяяаа’’д̇и. со звам̣ уббаннааяа вимад̇ияаа винод̣̇анад̇т̇ам̣ д̇ан̇кан̣зязва бхаг̇аванд̇ам̣ убасан̇гамид̇ваа д̇амад̇т̇ам̣ бужчи. зд̇амад̇т̇ам̣ д̣̇ассзд̇ум̣ ат̇а ко ааяасмаа аананд̣̇од̇и вуд̇д̇ам̣.
Amhākaṃ pana bhagavā sabbaññutaṃ patto pavattitavaradhammacakko sāvatthiṃ upanissāya jetavane viharanto jeṭṭhamūlamāsapuṇṇamadivase bhikkhū āmantetvā imaṃ aruṇavatisuttaṃ paṭṭhapesi. Ānandatthero bījaniṃ gahetvā bījayamāno ṭhitakova ādito paṭṭhāya yāva pariyosānā ekabyañjanampi ahāpetvā sakalasuttaṃ uggaṇhi. So punadivase piṇḍapātapaṭikkanto dasabalassa vattaṃ dassetvā attano divāvihāraṭṭhānaṃ gantvā saddhivihārikantevāsikesu vattaṃ dassetvā pakkantesu hiyyo kathitaṃ aruṇavatisuttaṃ āvajjento nisīdi. Athassa sabbaṃ suttaṃ vibhūtaṃ upaṭṭhāsi. So cintesi – ‘‘sikhissa bhagavato aggasāvako brahmaloke ṭhatvā cakkavāḷasahasse andhakāraṃ vidhametvā sarīrobhāsaṃ dassetvā attano saddaṃ sāvento dhammakathaṃ kathesīti hiyyo satthārā kathitaṃ, sāvakassa tāva visayo evarūpo, dasa pāramiyo pūretvā sabbaññutaṃ patto pana sammāsambuddho kittakaṃ ṭhānaṃ sarena viññāpeyyā’’ti. So evaṃ uppannāya vimatiyā vinodanatthaṃ taṅkhaṇeyeva bhagavantaṃ upasaṅkamitvā tamatthaṃ pucchi. Etamatthaṃ dassetuṃ atha kho āyasmā ānandoti vuttaṃ.
д̇ад̇т̇а саммукаад̇и саммукийбхууд̇зна маяаа зд̇ам̣ суд̇ам̣, на ануссавзна, на д̣̇ууд̇абарамбарааяаад̇и иминаа ад̇хиббааязна звамааха. гийвад̇агам̣ баход̇и сарзна вин̃н̃аабзд̇унд̇и гид̇д̇агам̣ таанам̣ сарийробхаасзна вихад̇анд̇хагаарам̣ гад̇ваа сарзна вин̃н̃аабзд̇ум̣ саггод̇и. сааваго со, аананд̣̇а, аббамзяяаа д̇ат̇ааг̇ад̇аад̇и ид̣̇ам̣ бхаг̇аваа иминаа ад̇хиббааязнааха – аананд̣̇а, д̇вам̣ гим̣ вад̣̇зси, со бад̣̇зсан̃аан̣з тид̇о сааваго. д̇ат̇ааг̇ад̇аа бана д̣̇аса баарамияо буурзд̇ваа саб̣б̣ан̃н̃уд̇ан̃н̃аан̣ам̣ бад̇д̇аа аббамзяяаа. со д̇вам̣ накасикааяа бам̣сум̣ г̇ахзд̇ваа махаабат̇авибам̣сунаа сад̣̇д̇хим̣ убамзнд̇о вияа гим̣ наамзд̇ам̣ вад̣̇зси. ан̃н̃о хи саавагаанам̣ висаяо, ан̃н̃о б̣уд̣̇д̇хаанам̣. ан̃н̃о саавагаанам̣ г̇ожаро, ан̃н̃о б̣уд̣̇д̇хаанам̣. ан̃н̃ам̣ саавагаанам̣ б̣алам̣, ан̃н̃ам̣ б̣уд̣̇д̇хаананд̇и. ид̇и бхаг̇аваа иминаа ад̇хиббааязна аббамзяяабхаавам̣ вад̇ваа д̇ун̣хий ахоси.
Tattha sammukhāti sammukhībhūtena mayā etaṃ sutaṃ, na anussavena, na dūtaparamparāyāti iminā adhippāyena evamāha. Kīvatakaṃ pahoti sarena viññāpetunti kittakaṃ ṭhānaṃ sarīrobhāsena vihatandhakāraṃ katvā sarena viññāpetuṃ sakkoti. Sāvako so, ānanda, appameyyā tathāgatāti idaṃ bhagavā iminā adhippāyenāha – ānanda, tvaṃ kiṃ vadesi, so padesañāṇe ṭhito sāvako. Tathāgatā pana dasa pāramiyo pūretvā sabbaññutaññāṇaṃ pattā appameyyā. So tvaṃ nakhasikhāya paṃsuṃ gahetvā mahāpathavipaṃsunā saddhiṃ upamento viya kiṃ nāmetaṃ vadesi. Añño hi sāvakānaṃ visayo, añño buddhānaṃ. Añño sāvakānaṃ gocaro, añño buddhānaṃ. Aññaṃ sāvakānaṃ balaṃ, aññaṃ buddhānanti. Iti bhagavā iminā adhippāyena appameyyabhāvaṃ vatvā tuṇhī ahosi.
т̇зро д̣̇уд̇ияамби бужчи. сад̇т̇аа, ‘‘аананд̣̇а, д̇вам̣ д̇аал̣ажчид̣̇д̣̇ам̣ г̇ахзд̇ваа ананд̇аагаасзна убамзнд̇о вияа, жаад̇агасагун̣ам̣ г̇ахзд̇ваа д̣̇ияад̣дхаяож̇анасад̇игзна субан̣н̣арааж̇зна убамзнд̇о вияа, хад̇т̇исон̣д̣ааяа уд̣̇агам̣ г̇ахзд̇ваа махааг̇ан̇г̇ааяа убамзнд̇о вияа, жад̇урад̇анигз ааваадз уд̣̇агам̣ г̇ахзд̇ваа сад̇д̇ахи сарзхи убамзнд̇о вияа, наал̣игод̣̇анамад̇д̇алаабхим̣ мануссам̣ г̇ахзд̇ваа жаггавад̇д̇иран̃н̃аа убамзнд̇о вияа, бам̣субисаажагам̣ г̇ахзд̇ваа саггзна д̣̇зваран̃н̃аа убамзнд̇о вияа, каж̇ж̇обанагаббабхам̣ г̇ахзд̇ваа суурияаббабхааяа убамзнд̇о вияа гим̣ наамзд̇ам̣ вад̣̇зсийд̇и д̣̇ийбзнд̇о д̣̇уд̇ияамби аббамзяяабхаавамзва вад̇ваа д̇ун̣хий ахоси. д̇ад̇о т̇зро жинд̇зси – ‘‘сад̇т̇аа маяаа бужчид̇о на д̇аава гат̇зси, ханд̣̇а нам̣ яаавад̇ад̇ияам̣ яаажид̇ваа б̣уд̣̇д̇хасийханаад̣̇ам̣ над̣̇аабзссаамий’’д̇и. со д̇ад̇ияамби яаажи. д̇ам̣ д̣̇ассзд̇ум̣ д̇ад̇ияамби код̇иаад̣̇и вуд̇д̇ам̣. ат̇асса бхаг̇аваа б̣яаагаронд̇о суд̇аа д̇з аананд̣̇аад̇иаад̣̇имааха. т̇зро жинд̇зси – ‘‘сад̇т̇аа мз ‘суд̇аа д̇з, аананд̣̇а, сахассий жуул̣анигаа логад̇хаад̇уу’д̇и зд̇д̇агамзва вад̇ваа д̇ун̣хий ж̇аад̇о, ид̣̇аани б̣уд̣̇д̇хасийханаад̣̇ам̣ над̣̇иссад̇ий’’д̇и со сад̇т̇аарам̣ яаажанд̇о зд̇асса бхаг̇аваа гаалод̇иаад̣̇имааха.
Thero dutiyampi pucchi. Satthā, ‘‘ānanda, tvaṃ tāḷacchiddaṃ gahetvā anantākāsena upamento viya, cātakasakuṇaṃ gahetvā diyaḍḍhayojanasatikena supaṇṇarājena upamento viya, hatthisoṇḍāya udakaṃ gahetvā mahāgaṅgāya upamento viya, caturatanike āvāṭe udakaṃ gahetvā sattahi sarehi upamento viya, nāḷikodanamattalābhiṃ manussaṃ gahetvā cakkavattiraññā upamento viya, paṃsupisācakaṃ gahetvā sakkena devaraññā upamento viya, khajjopanakappabhaṃ gahetvā sūriyappabhāya upamento viya kiṃ nāmetaṃ vadesīti dīpento dutiyampi appameyyabhāvameva vatvā tuṇhī ahosi. Tato thero cintesi – ‘‘satthā mayā pucchito na tāva kathesi, handa naṃ yāvatatiyaṃ yācitvā buddhasīhanādaṃ nadāpessāmī’’ti. So tatiyampi yāci. Taṃ dassetuṃ tatiyampi khotiādi vuttaṃ. Athassa bhagavā byākaronto sutā te ānandātiādimāha. Thero cintesi – ‘‘satthā me ‘sutā te, ānanda, sahassī cūḷanikā lokadhātū’ti ettakameva vatvā tuṇhī jāto, idāni buddhasīhanādaṃ nadissatī’’ti so satthāraṃ yācanto etassa bhagavā kālotiādimāha.
бхаг̇аваабисса вид̇т̇аарагат̇ам̣ гат̇зд̇ум̣ д̇зна хаананд̣̇аад̇иаад̣̇имааха. д̇ад̇т̇а яаавад̇аад̇и яад̇д̇агам̣ таанам̣. жанд̣̇имасуурияаад̇и жанд̣̇имаа жа суурияо жа. барихаранд̇ийд̇и вижаранд̇и. д̣̇исаа бханд̇ийд̇и саб̣б̣ад̣̇исаа обхаасанд̇и. вирожанаад̇и вирожамаанаа. зд̇д̇аавад̇аа згажаггаваал̣ам̣ барижчинд̣̇ид̇ваа д̣̇ассид̇ам̣ ход̇и. ид̣̇аани д̇ам̣ сахассаг̇ун̣ам̣ гад̇ваа д̣̇ассзнд̇о д̇аава сахассад̇хаа логод̇и ааха. д̇асмим̣ сахассад̇хаа логзд̇и д̇асмим̣ сахассажаггаваал̣з. сахассам̣ жаад̇умахаарааж̇игаананд̇и сахассам̣ жаад̇умахаарааж̇игаанам̣ д̣̇звалогаанам̣. яасмаа бана згзгасмим̣ жаггаваал̣з жад̇д̇ааро жад̇д̇ааро махаарааж̇аано , д̇асмаа жад̇д̇аари махаарааж̇асахассаанийд̇и вуд̇д̇ам̣. иминаа убааязна саб̣б̣ад̇т̇а ад̇т̇о взд̣̇ид̇аб̣б̣о. жуул̣анигаад̇и куд̣̇д̣̇игаа. аяам̣ саавагаанам̣ висаяо. гасмаа банзсаа аанийд̇аад̇и? маж̇жхимигааяа логад̇хаад̇уяаа барижчзд̣̇ад̣̇ассанад̇т̇ам̣.
Bhagavāpissa vitthārakathaṃ kathetuṃ tena hānandātiādimāha. Tattha yāvatāti yattakaṃ ṭhānaṃ. Candimasūriyāti candimā ca sūriyo ca. Pariharantīti vicaranti. Disā bhantīti sabbadisā obhāsanti. Virocanāti virocamānā. Ettāvatā ekacakkavāḷaṃ paricchinditvā dassitaṃ hoti. Idāni taṃ sahassaguṇaṃ katvā dassento tāva sahassadhā lokoti āha. Tasmiṃ sahassadhā loketi tasmiṃ sahassacakkavāḷe. Sahassaṃ cātumahārājikānanti sahassaṃ cātumahārājikānaṃ devalokānaṃ. Yasmā pana ekekasmiṃ cakkavāḷe cattāro cattāro mahārājāno , tasmā cattāri mahārājasahassānīti vuttaṃ. Iminā upāyena sabbattha attho veditabbo. Cūḷanikāti khuddikā. Ayaṃ sāvakānaṃ visayo. Kasmā panesā ānītāti? Majjhimikāya lokadhātuyā paricchedadassanatthaṃ.
яаавад̇аад̇и яад̇д̇агаа. д̇аава сахассад̇хаад̇и д̇аава сахассабхааг̇зна. д̣̇висахассий маж̇жхимигаа логад̇хаад̇ууд̇и аяам̣ сахассажаггаваал̣аани сахассабхааг̇зна г̇ан̣зд̇ваа д̣̇асасад̇асахассажаггаваал̣абаримаан̣аа д̣̇висахассий маж̇жхимигаа наама логад̇хаад̇у. аяам̣ саавагаанам̣ ависаяо, б̣уд̣̇д̇хаанамзва висаяо. зд̇д̇агзби хи таанз д̇ат̇ааг̇ад̇аа анд̇хагаарам̣ вид̇хамзд̇ваа сарийробхаасам̣ д̣̇ассзд̇ваа сарзна вин̃н̃аабзд̇ум̣ саггонд̇ийд̇и д̣̇ийбзд̇и. зд̇д̇агзна б̣уд̣̇д̇хаанам̣ ж̇аад̇игкзд̇д̇ам̣ наама д̣̇ассид̇ам̣. б̣од̇хисад̇д̇аанан̃хи бажчимабхавз д̣̇звалогад̇о жавид̇ваа маад̇угужчияам̣ бадисанд̇хиг̇г̇ахан̣ад̣̇ивасз жа гужчид̇о нигкаманад̣̇ивасз жа махаабхинигкаманад̣̇ивасз жа самб̣од̇хид̇хаммажаггаббавад̇д̇анаааяусан̇кааравоссаж̇ж̇анабариниб̣б̣аанад̣̇ивасзсу жа зд̇д̇агам̣ таанам̣ гамбад̇и.
Yāvatāti yattakā. Tāva sahassadhāti tāva sahassabhāgena. Dvisahassī majjhimikā lokadhātūti ayaṃ sahassacakkavāḷāni sahassabhāgena gaṇetvā dasasatasahassacakkavāḷaparimāṇā dvisahassī majjhimikā nāma lokadhātu. Ayaṃ sāvakānaṃ avisayo, buddhānameva visayo. Ettakepi hi ṭhāne tathāgatā andhakāraṃ vidhametvā sarīrobhāsaṃ dassetvā sarena viññāpetuṃ sakkontīti dīpeti. Ettakena buddhānaṃ jātikkhettaṃ nāma dassitaṃ. Bodhisattānañhi pacchimabhave devalokato cavitvā mātukucchiyaṃ paṭisandhiggahaṇadivase ca kucchito nikkhamanadivase ca mahābhinikkhamanadivase ca sambodhidhammacakkappavattanaāyusaṅkhāravossajjanaparinibbānadivasesu ca ettakaṃ ṭhānaṃ kampati.
д̇исахассий махаасахассийд̇и сахассид̇о бадтааяа д̇ад̇ияаад̇и д̇исахассий, сахассам̣ сахассад̇хаа гад̇ваа г̇ан̣ид̇ам̣ маж̇жхимигам̣ сахассад̇хаа гад̇ваа г̇ан̣ид̇ад̇д̇аа маханд̇зхи сахассзхи г̇ан̣ид̇аад̇и махаасахассий. зд̇д̇аавад̇аа годисад̇асахассажаггаваал̣абаримаан̣о лого д̣̇ассид̇о ход̇и. бхаг̇аваа ааган̇камаано зд̇д̇агз таанз анд̇хагаарам̣ вид̇хамзд̇ваа сарийробхаасам̣ д̣̇ассзд̇ваа сарзна вин̃н̃аабзяяаад̇и. г̇ан̣агабуд̇д̇ад̇иссад̇т̇зро бана звамааха – ‘‘на д̇исахассимахаасахассилогад̇хаад̇уяаа звам̣ баримаан̣ам̣. ид̣̇ан̃хи аажарияаанам̣ саж̇жхааяамул̣хагам̣ ваажааяа барихийнадтаанам̣, д̣̇асагодисад̇асахассажаггаваал̣абаримаан̣ам̣ бана таанам̣ д̇исахассимахаасахассилогад̇хаад̇у наамаа’’д̇и. зд̇д̇аавад̇аа хи бхаг̇авад̇аа аан̣аагкзд̇д̇ам̣ наама д̣̇ассид̇ам̣. зд̇асмин̃хи анд̇арз аадаанаадияабарид̇д̇аисиг̇илибарид̇д̇ад̇хаж̇аг̇г̇абарид̇д̇аб̣ож̇жхан̇г̇абарид̇д̇аканд̇хабарид̇д̇а- морабарид̇д̇амзд̇д̇абарид̇д̇арад̇анабарид̇д̇аанам̣ аан̣аа парад̇и. яаавад̇аа бана ааган̇кзяяаад̇и яад̇д̇агам̣ таанам̣ ижчзяяа, иминаа висаяагкзд̇д̇ам̣ д̣̇ассзд̇и. б̣уд̣̇д̇хаанан̃хи висаяагкзд̇д̇асса бамаан̣абарижчзд̣̇о наама над̇т̇и, над̇т̇игабхаавз жасса имам̣ обаммам̣ аахаранд̇и – годисад̇асахассажаггаваал̣амхи яаава б̣рахмалогаа саасабзхи буурзд̇ваа сажз гожи бурад̇т̇имааяа д̣̇исааяа згажаггаваал̣з згам̣ саасабам̣ багкибанд̇о ааг̇ажчзяяа, саб̣б̣зби д̇з саасабаа баригкаяам̣ г̇ажчзяяум̣, на д̇взва бурад̇т̇имааяа д̣̇исааяа жаггаваал̣аани. д̣̇агкин̣аад̣̇ийсуби зсзва наяо. д̇ад̇т̇а б̣уд̣̇д̇хаанам̣ ависаяо наама над̇т̇и.
Tisahassī mahāsahassīti sahassito paṭṭhāya tatiyāti tisahassī, sahassaṃ sahassadhā katvā gaṇitaṃ majjhimikaṃ sahassadhā katvā gaṇitattā mahantehi sahassehi gaṇitāti mahāsahassī. Ettāvatā koṭisatasahassacakkavāḷaparimāṇo loko dassito hoti. Bhagavā ākaṅkhamāno ettake ṭhāne andhakāraṃ vidhametvā sarīrobhāsaṃ dassetvā sarena viññāpeyyāti. Gaṇakaputtatissatthero pana evamāha – ‘‘na tisahassimahāsahassilokadhātuyā evaṃ parimāṇaṃ. Idañhi ācariyānaṃ sajjhāyamuḷhakaṃ vācāya parihīnaṭṭhānaṃ, dasakoṭisatasahassacakkavāḷaparimāṇaṃ pana ṭhānaṃ tisahassimahāsahassilokadhātu nāmā’’ti. Ettāvatā hi bhagavatā āṇākkhettaṃ nāma dassitaṃ. Etasmiñhi antare āṭānāṭiyaparittaisigiliparittadhajaggaparittabojjhaṅgaparittakhandhaparitta- moraparittamettaparittaratanaparittānaṃ āṇā pharati. Yāvatā pana ākaṅkheyyāti yattakaṃ ṭhānaṃ iccheyya, iminā visayakkhettaṃ dasseti. Buddhānañhi visayakkhettassa pamāṇaparicchedo nāma natthi, natthikabhāve cassa imaṃ opammaṃ āharanti – koṭisatasahassacakkavāḷamhi yāva brahmalokā sāsapehi pūretvā sace koci puratthimāya disāya ekacakkavāḷe ekaṃ sāsapaṃ pakkhipanto āgaccheyya, sabbepi te sāsapā parikkhayaṃ gaccheyyuṃ, na tveva puratthimāya disāya cakkavāḷāni. Dakkhiṇādīsupi eseva nayo. Tattha buddhānaṃ avisayo nāma natthi.
звам̣ вуд̇д̇з т̇зро жинд̇зси – ‘‘сад̇т̇аа звамааха – ‘ааган̇камаано, аананд̣̇а, д̇ат̇ааг̇ад̇о д̇исахассимахаасахассилогад̇хаад̇ум̣ сарзна вин̃н̃аабзяяа, яаавад̇аа бана ааган̇кзяяаа’д̇и. висамо ко банааяам̣ лого, ананд̇аани жаггаваал̣аани, згасмим̣ таанз суурияо уг̇г̇ад̇о ход̇и, згасмим̣ таанз маж̇жхз тид̇о, згасмим̣ таанз ад̇т̇ан̇г̇ад̇о. згасмим̣ таанз батамаяаамо ход̇и, згасмим̣ таанз маж̇жхимаяаамо, згасмим̣ таанз бажчимаяаамо. сад̇д̇ааби гаммаббасуд̇аа, кид̣д̣аабасуд̇аа, аахаараббасуд̇аад̇и звам̣ д̇зхи д̇зхи гааран̣зхи вигкид̇д̇аа жа бамад̇д̇аа жа хонд̇и. гат̇ам̣ ну ко д̇з сад̇т̇аа сарзна вин̃н̃аабзяяаа’’д̇и. со звам̣ жинд̇зд̇ваа вимад̇ижчзд̣̇анад̇т̇ам̣ д̇ат̇ааг̇ад̇ам̣ бужчанд̇о яат̇аа гат̇ам̣ банаад̇иаад̣̇имааха.
Evaṃ vutte thero cintesi – ‘‘satthā evamāha – ‘ākaṅkhamāno, ānanda, tathāgato tisahassimahāsahassilokadhātuṃ sarena viññāpeyya, yāvatā pana ākaṅkheyyā’ti. Visamo kho panāyaṃ loko, anantāni cakkavāḷāni, ekasmiṃ ṭhāne sūriyo uggato hoti, ekasmiṃ ṭhāne majjhe ṭhito, ekasmiṃ ṭhāne atthaṅgato. Ekasmiṃ ṭhāne paṭhamayāmo hoti, ekasmiṃ ṭhāne majjhimayāmo, ekasmiṃ ṭhāne pacchimayāmo. Sattāpi kammappasutā, khiḍḍāpasutā, āhārappasutāti evaṃ tehi tehi kāraṇehi vikkhittā ca pamattā ca honti. Kathaṃ nu kho te satthā sarena viññāpeyyā’’ti. So evaṃ cintetvā vimaticchedanatthaṃ tathāgataṃ pucchanto yathā kathaṃ panātiādimāha.
ат̇асса сад̇т̇аа б̣яаагаронд̇о ид̇хаананд̣̇а, д̇ат̇ааг̇ад̇од̇иаад̣̇имааха. д̇ад̇т̇а обхаасзна парзяяаад̇и сарийробхаасзна парзяяа. парамаано банзса гим̣ гарзяяаад̇и? яасмим̣ таанз суурияо бан̃н̃ааяад̇и, д̇ад̇т̇а нам̣ ад̇д̇ано аанубхаавзна ад̇т̇ам̣ г̇амзяяа. яад̇т̇а бана на бан̃н̃ааяад̇и, д̇ад̇т̇а нам̣ удтаабзд̇ваа маж̇жхз табзяяа . д̇ад̇о яад̇т̇а суурияо бан̃н̃ааяад̇и, д̇ад̇т̇а мануссаа ‘‘ад̇хунаава суурияо бан̃н̃ааяид̇т̇а, со ид̣̇аанзва ад̇т̇ан̇г̇амид̇о, нааг̇ааваддо ну ко аяам̣, бхууд̇ааваддаяагкааваддад̣̇звад̇ааваддаанам̣ ан̃н̃ад̇аро’’д̇и вид̇д̇аггам̣ уббаад̣̇зяяум̣. яад̇т̇а бана на бан̃н̃ааяад̇и, д̇ад̇т̇а мануссаа ‘‘ад̇хунаава суурияо ад̇т̇ан̇г̇амид̇о, свааяам̣ ид̣̇аанзва удтид̇о, гим̣ ну ко аяам̣ нааг̇ааваддабхууд̇ааваддаяагкааваддад̣̇звад̇ааваддаанам̣ ан̃н̃ад̇аро’’д̇и вид̇аггам̣ уббаад̣̇зяяум̣. д̇ад̇о д̇зсу мануссзсу аалоган̃жа анд̇хагааран̃жа ааваж̇ж̇ид̇ваа ‘‘гим̣ бажжаяаа ну ко ид̣̇а’’нд̇и бариязсамаанзсу сад̇т̇аа нийлагасин̣ам̣ самаабаж̇ж̇ид̇ваа б̣ахаланд̇хагаарам̣ бад̇т̇арзяяа. гасмаа? д̇зсам̣ гаммаад̣̇иббасуд̇аанам̣ сад̇д̇аанам̣ санд̇аасаж̇ананад̇т̇ам̣. ат̇а нзсам̣ санд̇аасам̣ аабаннабхаавам̣ н̃ад̇ваа од̣̇аад̇агасин̣асамаабад̇д̇им̣ самаабаж̇ж̇ид̇ваа бан̣д̣арам̣ гханаб̣уд̣̇д̇харасмим̣ виссаж̇ж̇знд̇о жанд̣̇асахассасуурияасахассаудтаанагаало вияа згаббахаарзнзва саб̣б̣ам̣ згаалогам̣ гарзяяа. д̇ан̃жа ко д̇илаб̣ийж̇амад̇д̇зна гааяаббад̣̇зсзна обхаасам̣ мун̃жанд̇о. яо хи жаггаваал̣абат̇авим̣ д̣̇ийбагабаллагам̣ гад̇ваа махаасамуд̣̇д̣̇з уд̣̇агам̣ д̇злам̣ гад̇ваа синзрум̣ ваддим̣ гад̇ваа ан̃н̃асмим̣ синзрумуд̣̇д̇хани табзд̇ваа ж̇аалзяяа, со згажаггаваал̣зязва аалогам̣ гарзяяа. д̇ад̇о барам̣ вид̣̇ад̇т̇имби обхаасзд̇ум̣ на саггун̣зяяа. д̇ат̇ааг̇ад̇о бана д̇илапалаббамаан̣зна сарийраббад̣̇зсзна обхаасам̣ мун̃жид̇ваа д̇исахассимахаасахассилогад̇хаад̇ум̣ згобхаасам̣ гарзяяа д̇ад̇о ваа бана бхияяо. звам̣ маханд̇аа хи б̣уд̣̇д̇хаг̇ун̣аад̇и.
Athassa satthā byākaronto idhānanda, tathāgatotiādimāha. Tattha obhāsena phareyyāti sarīrobhāsena phareyya. Pharamāno panesa kiṃ kareyyāti? Yasmiṃ ṭhāne sūriyo paññāyati, tattha naṃ attano ānubhāvena atthaṃ gameyya. Yattha pana na paññāyati, tattha naṃ uṭṭhāpetvā majjhe ṭhapeyya . Tato yattha sūriyo paññāyati, tattha manussā ‘‘adhunāva sūriyo paññāyittha, so idāneva atthaṅgamito, nāgāvaṭṭo nu kho ayaṃ, bhūtāvaṭṭayakkhāvaṭṭadevatāvaṭṭānaṃ aññataro’’ti vittakkaṃ uppādeyyuṃ. Yattha pana na paññāyati, tattha manussā ‘‘adhunāva sūriyo atthaṅgamito, svāyaṃ idāneva uṭṭhito, kiṃ nu kho ayaṃ nāgāvaṭṭabhūtāvaṭṭayakkhāvaṭṭadevatāvaṭṭānaṃ aññataro’’ti vitakkaṃ uppādeyyuṃ. Tato tesu manussesu ālokañca andhakārañca āvajjitvā ‘‘kiṃ paccayā nu kho ida’’nti pariyesamānesu satthā nīlakasiṇaṃ samāpajjitvā bahalandhakāraṃ patthareyya. Kasmā? Tesaṃ kammādippasutānaṃ sattānaṃ santāsajananatthaṃ. Atha nesaṃ santāsaṃ āpannabhāvaṃ ñatvā odātakasiṇasamāpattiṃ samāpajjitvā paṇḍaraṃ ghanabuddharasmiṃ vissajjento candasahassasūriyasahassauṭṭhānakālo viya ekappahāreneva sabbaṃ ekālokaṃ kareyya. Tañca kho tilabījamattena kāyappadesena obhāsaṃ muñcanto. Yo hi cakkavāḷapathaviṃ dīpakapallakaṃ katvā mahāsamudde udakaṃ telaṃ katvā sineruṃ vaṭṭiṃ katvā aññasmiṃ sinerumuddhani ṭhapetvā jāleyya, so ekacakkavāḷeyeva ālokaṃ kareyya. Tato paraṃ vidatthimpi obhāsetuṃ na sakkuṇeyya. Tathāgato pana tilaphalappamāṇena sarīrappadesena obhāsaṃ muñcitvā tisahassimahāsahassilokadhātuṃ ekobhāsaṃ kareyya tato vā pana bhiyyo. Evaṃ mahantā hi buddhaguṇāti.
д̇ам̣ аалогам̣ сан̃ж̇аанзяяунд̇и д̇ам̣ аалогам̣ д̣̇исваа ‘‘язна суурияо ад̇т̇ан̃жзва г̇амид̇о удтаабид̇о жа, б̣ахаланд̇хагааран̃жа виссадтам̣, зса со бурисо ид̣̇аани аалогам̣ гад̇ваа тид̇о, ахо ажчарияабурисо’’д̇и ан̃ж̇алим̣ баг̇г̇аяха намассамаанаа нисийд̣̇зяяум̣. сад̣̇д̣̇амануссаавзяяаад̇и д̇хаммагат̇аасад̣̇д̣̇амануссаавзяяа. яо хи згам̣ жаггаваал̣абаб̣б̣ад̇ам̣ бхзрим̣ гад̇ваа махаабат̇авим̣ бхзрижаммам̣ гад̇ваа синзрум̣ д̣̇ан̣д̣ам̣ гад̇ваа ан̃н̃асмим̣ синзрумад̇т̇агз табзд̇ваа аагодзяяа, со згажаггаваал̣зязва д̇ам̣ сад̣̇д̣̇ам̣ саавзяяа, барад̇о вид̣̇ад̇т̇имби ад̇иггаамзд̇ум̣ на саггун̣зяяа. д̇ат̇ааг̇ад̇о бана баллан̇гз ваа бийтз ваа нисийд̣̇ид̇ваа д̇исахассимахаасахассилогад̇хаад̇ум̣ сарзна вин̃н̃аабзд̇и, д̇ад̇о ваа бана бхияяо, звам̣ махаанубхааваа д̇ат̇ааг̇ад̇аад̇и. ид̇и бхаг̇аваа иминаа зд̇д̇агзна висаяагкзд̇д̇амзва д̣̇ассзд̇и.
Taṃ ālokaṃ sañjāneyyunti taṃ ālokaṃ disvā ‘‘yena sūriyo atthañceva gamito uṭṭhāpito ca, bahalandhakārañca vissaṭṭhaṃ, esa so puriso idāni ālokaṃ katvā ṭhito, aho acchariyapuriso’’ti añjaliṃ paggayha namassamānā nisīdeyyuṃ. Saddamanussāveyyāti dhammakathāsaddamanussāveyya. Yo hi ekaṃ cakkavāḷapabbataṃ bheriṃ katvā mahāpathaviṃ bhericammaṃ katvā sineruṃ daṇḍaṃ katvā aññasmiṃ sinerumatthake ṭhapetvā ākoṭeyya, so ekacakkavāḷeyeva taṃ saddaṃ sāveyya, parato vidatthimpi atikkāmetuṃ na sakkuṇeyya. Tathāgato pana pallaṅke vā pīṭhe vā nisīditvā tisahassimahāsahassilokadhātuṃ sarena viññāpeti, tato vā pana bhiyyo, evaṃ mahānubhāvā tathāgatāti. Iti bhagavā iminā ettakena visayakkhettameva dasseti.
иман̃жа бана б̣уд̣̇д̇хасийханаад̣̇ам̣ суд̇ваа т̇зрасса аб̣бханд̇арз б̣алавабийд̇и уббаннаа, со бийд̇ивасзна уд̣̇аанам̣ уд̣̇аанзнд̇о лаабхаа вад̇а мзд̇иаад̣̇имааха. д̇ад̇т̇а яасса мз сад̇т̇аа звам̣махид̣̇д̇хигод̇и яасса маяхам̣ сад̇т̇аа звам̣махид̣̇д̇хиго, д̇асса маяхам̣ звам̣махид̣̇д̇хигасса сад̇т̇у бадилаабхо лаабхаа жзва сулад̣̇д̇хан̃жаад̇и ад̇т̇о. ат̇а ваа яваахам̣ зваруубасса сад̇т̇уно бад̇д̇ажийварам̣ г̇ахзд̇ваа вижарид̇ум̣, баад̣̇абаригаммам̣ бидтибаригаммам̣ гаад̇ум̣, мукад̇хованауд̣̇аганхаанод̣̇агаани д̣̇аад̇ум̣, г̇анд̇хагудибаривзн̣ам̣ саммаж̇ж̇ид̇ум̣, уббаннааяа ган̇кааяа бан̃хам̣ бужчид̇ум̣, мад̇хурад̇хаммагат̇ан̃жа сод̇ум̣ лабхаами, зд̇з саб̣б̣зби маяхам̣ лаабхаа жзва сулад̣̇д̇хан̃жаад̇иби санд̇хааяа звамааха. зд̇т̇а жа бхаг̇авад̇о анд̇хагаараалогасад̣̇д̣̇асаванасан̇каад̇аанам̣ ид̣̇д̇хийнам̣ маханд̇ад̇ааяа махид̣̇д̇хигад̇аа, д̇аасам̣язва анупаран̣зна махаанубхаавад̇аа взд̣̇ид̇аб̣б̣аа. уд̣̇ааяийд̇и лаал̣уд̣̇ааяид̇т̇зро. со гира буб̣б̣з убадтаагад̇т̇зрз аагхаад̇ам̣ б̣анд̇хид̇ваа жарад̇и. д̇асмаа ид̣̇аани огаасам̣ лабхид̇ваа имасмим̣ б̣уд̣̇д̇хасийханаад̣̇абарияосаанз ж̇аламаанам̣ д̣̇ийбасикам̣ ниб̣б̣аабзнд̇о вияа жаранд̇асса г̇он̣асса д̇ун̣д̣з бахаарам̣ д̣̇знд̇о вияа бхад̇д̇абхарид̇ам̣ баад̇им̣ авагуж̇ж̇анд̇о вияа т̇зрасса басаад̣̇абхан̇г̇ам̣ гаронд̇о звамааха.
Imañca pana buddhasīhanādaṃ sutvā therassa abbhantare balavapīti uppannā, so pītivasena udānaṃ udānento lābhā vata metiādimāha. Tattha yassa me satthā evaṃmahiddhikoti yassa mayhaṃ satthā evaṃmahiddhiko, tassa mayhaṃ evaṃmahiddhikassa satthu paṭilābho lābhā ceva suladdhañcāti attho. Atha vā yvāhaṃ evarūpassa satthuno pattacīvaraṃ gahetvā vicarituṃ, pādaparikammaṃ piṭṭhiparikammaṃ kātuṃ, mukhadhovanaudakanhānodakāni dātuṃ, gandhakuṭipariveṇaṃ sammajjituṃ, uppannāya kaṅkhāya pañhaṃ pucchituṃ, madhuradhammakathañca sotuṃ labhāmi, ete sabbepi mayhaṃ lābhā ceva suladdhañcātipi sandhāya evamāha. Ettha ca bhagavato andhakārālokasaddasavanasaṅkhātānaṃ iddhīnaṃ mahantatāya mahiddhikatā, tāsaṃyeva anupharaṇena mahānubhāvatā veditabbā. Udāyīti lāḷudāyitthero. So kira pubbe upaṭṭhākatthere āghātaṃ bandhitvā carati. Tasmā idāni okāsaṃ labhitvā imasmiṃ buddhasīhanādapariyosāne jalamānaṃ dīpasikhaṃ nibbāpento viya carantassa goṇassa tuṇḍe pahāraṃ dento viya bhattabharitaṃ pātiṃ avakujjanto viya therassa pasādabhaṅgaṃ karonto evamāha.
звам̣ вуд̇д̇з бхаг̇аваад̇и звам̣ уд̣̇ааяид̇т̇зрзна вуд̇д̇з бхаг̇аваа яат̇аа наама бабаад̇ад̇адз тад̇ваа бавзд̇хамаанам̣ бурисам̣ згаманд̇з тид̇о хид̇зсий бурисо ‘‘ид̇о зхи ид̇о зхий’’д̇и бунаббунам̣ вад̣̇зяяа, звамзвам̣ уд̣̇ааяид̇т̇зрам̣ д̇асмаа важанаа ниваарзнд̇о маа хзвам̣ уд̣̇ааяи, маа хзвам̣ уд̣̇ааяийд̇и ааха. д̇ад̇т̇а хийд̇и нибаад̇амад̇д̇ам̣, маа звам̣ аважаад̇и ад̇т̇о. махаараж̇ж̇анд̇и жаггавад̇д̇ираж̇ж̇ам̣. нану жа сад̇т̇аа згасса саавагасса д̇хаммад̣̇зсанааяа уббаннабасаад̣̇асса махаанисам̣сам̣ абарижчиннам̣ агааси, со гасмаа имасса б̣уд̣̇д̇хасийханаад̣̇ам̣ аараб̣бха уббаннасса басаад̣̇асса аанисам̣сам̣ барижчинд̣̇ад̇ийд̇и? арияасаавагасса зд̇д̇агаад̇д̇абхаавабаримаан̣ад̇д̇аа. д̣̇анд̇хабан̃н̃оби хи сод̇аабанно сад̇д̇агкад̇д̇ум̣ д̣̇звзсу жа мануссзсу жа ад̇д̇абхаавам̣ бадилабхад̇и, д̇знасса г̇ад̇им̣ барижчинд̣̇анд̇о звамааха. д̣̇идтзва д̇хаммзд̇и имасмим̣язва ад̇д̇абхаавз тад̇ваа. бариниб̣б̣ааяиссад̇ийд̇и аббажжаяабариниб̣б̣аанзна бариниб̣б̣ааяиссад̇и. ид̇и ниб̣б̣аанзна гуудам̣ г̇ан̣ханд̇о имам̣ сийханаад̣̇асуд̇д̇ам̣ нидтаабзсийд̇и.
Evaṃ vutte bhagavāti evaṃ udāyittherena vutte bhagavā yathā nāma papātataṭe ṭhatvā pavedhamānaṃ purisaṃ ekamante ṭhito hitesī puriso ‘‘ito ehi ito ehī’’ti punappunaṃ vadeyya, evamevaṃ udāyittheraṃ tasmā vacanā nivārento mā hevaṃ udāyi, mā hevaṃ udāyīti āha. Tattha hīti nipātamattaṃ, mā evaṃ avacāti attho. Mahārajjanti cakkavattirajjaṃ. Nanu ca satthā ekassa sāvakassa dhammadesanāya uppannapasādassa mahānisaṃsaṃ aparicchinnaṃ akāsi, so kasmā imassa buddhasīhanādaṃ ārabbha uppannassa pasādassa ānisaṃsaṃ paricchindatīti? Ariyasāvakassa ettakaattabhāvaparimāṇattā. Dandhapaññopi hi sotāpanno sattakkhattuṃ devesu ca manussesu ca attabhāvaṃ paṭilabhati, tenassa gatiṃ paricchindanto evamāha. Diṭṭheva dhammeti imasmiṃyeva attabhāve ṭhatvā. Parinibbāyissatīti appaccayaparinibbānena parinibbāyissati. Iti nibbānena kūṭaṃ gaṇhanto imaṃ sīhanādasuttaṃ niṭṭhāpesīti.
аананд̣̇аваг̇г̇о д̇ад̇ияо.
Ānandavaggo tatiyo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 10. жуул̣анигаасуд̇д̇ам̣ • 10. Cūḷanikāsuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 10. жуул̣анигаасуд̇д̇аван̣н̣анаа • 10. Cūḷanikāsuttavaṇṇanā
