| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༡༠. ཙཱུལ༹ནིཀཱསུཏྟཝཎྞནཱ
10. Cūḷanikāsuttavaṇṇanā
༨༡. དསམསྶ དུཝིདྷོ ནིཀྑེཔོ ཨཏྠུཔྤཏྟིཀོཔི པུཙྪཱཝསིཀོཔི། ཀཏརཨཏྠུཔྤཏྟིཡཾ ཀསྶ པུཙྪཱཡ ཀཐིཏནྟི ཙེ? ཨརུཎཝཏིསུཏྟནྟཨཏྠུཔྤཏྟིཡཾ (སཾ॰ ནི॰ ༡.༡༨༥ ཨཱདཡོ) ཨཱནནྡཏྠེརསྶ པུཙྪཱཡ ཀཐིཏཾ། ཨརུཎཝཏིསུཏྟནྟོ ཀེན ཀཐིཏོཏི? དྭཱིཧི བུདྡྷེཧི ཀཐིཏོ སིཁིནཱ ཙ བྷགཝཏཱ ཨམྷཱཀཉྩ སཏྠཱརཱ། ཨིམསྨཱ ཧི ཀཔྤཱ ཨེཀཏིཾསཀཔྤམཏྠཀེ ཨརུཎཝཏིནགརེ ཨརུཎཝཏོ རཉྙོ པབྷཱཝཏིཡཱ ནཱམ མཧེསིཡཱ ཀུཙྪིསྨིཾ ནིབྦཏྟིཏྭཱ པརིཔཀྐེ ཉཱཎེ མཧཱབྷིནིཀྑམནཾ ནིཀྑམིཏྭཱ སིཁཱི བྷགཝཱ བོདྷིམཎྜེ སབྦཉྙུཏཉྙཱཎཾ པཊིཝིཛ྄ཛྷིཏྭཱ པཝཏྟིཏཝརདྷམྨཙཀྐོ ཨརུཎཝཏིཾ ནིསྶཱཡ ཝིཧརནྟོ ཨེཀདིཝསཾ པཱཏོཝ སརཱིརཔྤཊིཛགྒནཾ ཀཏྭཱ མཧཱབྷིཀྑུསངྒྷཔརིཝཱརོ ‘‘ཨརུཎཝཏིཾ པིཎྜཱཡ པཝིསིསྶཱམཱི’’ཏི ནིཀྑམིཏྭཱ ཝིཧཱརདྭཱརཀོཊྛཀསམཱིཔེ ཋིཏོ ཨབྷིབྷུཾ ནཱམ ཨགྒསཱཝཀཾ ཨཱམནྟེསི – ‘‘ཨཏིཔྤགོ ཁོ, བྷིཀྑུ, ཨརུཎཝཏིཾ པིཎྜཱཡ པཝིསིཏུཾ, ཡེན ཨཉྙཏརོ བྲཧྨལོཀོ ཏེནུཔསངྐམིསྶཱམཱ’’ཏི། ཡཐཱཧ –
81. Dasamassa duvidho nikkhepo atthuppattikopi pucchāvasikopi. Kataraatthuppattiyaṃ kassa pucchāya kathitanti ce? Aruṇavatisuttantaatthuppattiyaṃ (saṃ. ni. 1.185 ādayo) ānandattherassa pucchāya kathitaṃ. Aruṇavatisuttanto kena kathitoti? Dvīhi buddhehi kathito sikhinā ca bhagavatā amhākañca satthārā. Imasmā hi kappā ekatiṃsakappamatthake aruṇavatinagare aruṇavato rañño pabhāvatiyā nāma mahesiyā kucchismiṃ nibbattitvā paripakke ñāṇe mahābhinikkhamanaṃ nikkhamitvā sikhī bhagavā bodhimaṇḍe sabbaññutaññāṇaṃ paṭivijjhitvā pavattitavaradhammacakko aruṇavatiṃ nissāya viharanto ekadivasaṃ pātova sarīrappaṭijagganaṃ katvā mahābhikkhusaṅghaparivāro ‘‘aruṇavatiṃ piṇḍāya pavisissāmī’’ti nikkhamitvā vihāradvārakoṭṭhakasamīpe ṭhito abhibhuṃ nāma aggasāvakaṃ āmantesi – ‘‘atippago kho, bhikkhu, aruṇavatiṃ piṇḍāya pavisituṃ, yena aññataro brahmaloko tenupasaṅkamissāmā’’ti. Yathāha –
‘‘ཨཐ ཁོ, བྷིཀྑཝེ, སིཁཱི བྷགཝཱ ཨརཧཾ སམྨཱསམྦུདྡྷོ ཨབྷིབྷུཾ བྷིཀྑུཾ ཨཱམནྟེསི – ‘ཨཱཡཱམ, བྲཱཧྨཎ, ཡེན ཨཉྙཏརོ བྲཧྨལོཀོ ཏེནུཔསངྐམིསྶཱམ, ན ཏཱཝ བྷཏྟཀཱལོ བྷཝིསྶཏཱི’ཏི། ‘ཨེཝཾ, བྷནྟེ’ཏི ཁོ, བྷིཀྑཝེ, ཨབྷིབྷཱུ བྷིཀྑུ སིཁིསྶ བྷགཝཏོ ཨརཧཏོ སམྨཱསམྦུདྡྷསྶ པཙྩསྶོསི། ཨཐ ཁོ, བྷིཀྑཝེ, སིཁཱི བྷགཝཱ ཨརཧཾ སམྨཱསམྦུདྡྷོ ཨབྷིབྷཱུ ཙ བྷིཀྑུ ཡེན ཨཉྙཏརོ བྲཧྨལོཀོ ཏེནུཔསངྐམིཾསཱུ’’ཏི (སཾ॰ ནི॰ ༡.༡༨༥)།
‘‘Atha kho, bhikkhave, sikhī bhagavā arahaṃ sammāsambuddho abhibhuṃ bhikkhuṃ āmantesi – ‘āyāma, brāhmaṇa, yena aññataro brahmaloko tenupasaṅkamissāma, na tāva bhattakālo bhavissatī’ti. ‘Evaṃ, bhante’ti kho, bhikkhave, abhibhū bhikkhu sikhissa bhagavato arahato sammāsambuddhassa paccassosi. Atha kho, bhikkhave, sikhī bhagavā arahaṃ sammāsambuddho abhibhū ca bhikkhu yena aññataro brahmaloko tenupasaṅkamiṃsū’’ti (saṃ. ni. 1.185).
ཏཏྠ མཧཱབྲཧྨཱ སམྨཱསམྦུདྡྷཾ དིསྭཱ ཨཏྟམནོ པཙྩུགྒམནཾ ཀཏྭཱ བྲཧྨཱསནཾ པཉྙཱཔེཏྭཱ ཨདཱསི, ཐེརསྶཱཔི ཨནུཙྪཝིཀཾ ཨཱསནཾ པཉྙཱཔཡིཾསུ། ནིསཱིདི བྷགཝཱ པཉྙཏྟེ ཨཱསནེ, ཐེརོཔི ཨཏྟནོ པཉྙཏྟཱསནེ ནིསཱིདི། མཧཱབྲཧྨཱཔི དསབལཾ ཝནྡིཏྭཱ ཨེཀམནྟཾ ནིསཱིདི།
Tattha mahābrahmā sammāsambuddhaṃ disvā attamano paccuggamanaṃ katvā brahmāsanaṃ paññāpetvā adāsi, therassāpi anucchavikaṃ āsanaṃ paññāpayiṃsu. Nisīdi bhagavā paññatte āsane, theropi attano paññattāsane nisīdi. Mahābrahmāpi dasabalaṃ vanditvā ekamantaṃ nisīdi.
ཨཐ ཁོ, བྷིཀྑཝེ, སིཁཱི བྷགཝཱ ཨབྷིབྷུཾ བྷིཀྑུཾ ཨཱམནྟེསི – ‘‘པཊིབྷཱཏུ ཏཾ, བྲཱཧྨཎ, བྲཧྨུནོ ཙ བྲཧྨཔརིསཱཡ ཙ བྲཧྨཔཱརིསཛྫཱནཉྩ དྷམྨཱིཀཐཱཏི། ‘ཨེཝཾ, བྷནྟེ’ཏི ཁོ, བྷིཀྑཝེ, ཨབྷིབྷཱུ བྷིཀྑུ སིཁིསྶ བྷགཝཏོ ཨརཧཏོ སམྨཱསམྦུདྡྷསྶ པཊིསྶུཎིཏྭཱ བྲཧྨུནོ ཙ བྲཧྨཔརིསཱཡ ཙ བྲཧྨཔཱརིསཛྫཱནཉྩ དྷམྨིཾ ཀཐཾ ཀཐེསི། ཐེརེ དྷམྨཾ ཀཐེནྟེ བྲཧྨགཎཱ ཨུཛ྄ཛྷཱཡིཾསུ – ‘‘ཙིརསྶཉྩ མཡཾ སཏྠུ བྲཧྨལོཀཱགམནཾ ལབྷིམྷ, ཨཡཉྩ བྷིཀྑུ ཋཔེཏྭཱ སཏྠཱརཾ སཡཾ དྷམྨཀཐཾ ཨཱརབྷཱི’’ཏི།
Atha kho, bhikkhave, sikhī bhagavā abhibhuṃ bhikkhuṃ āmantesi – ‘‘paṭibhātu taṃ, brāhmaṇa, brahmuno ca brahmaparisāya ca brahmapārisajjānañca dhammīkathāti. ‘Evaṃ, bhante’ti kho, bhikkhave, abhibhū bhikkhu sikhissa bhagavato arahato sammāsambuddhassa paṭissuṇitvā brahmuno ca brahmaparisāya ca brahmapārisajjānañca dhammiṃ kathaṃ kathesi. There dhammaṃ kathente brahmagaṇā ujjhāyiṃsu – ‘‘cirassañca mayaṃ satthu brahmalokāgamanaṃ labhimha, ayañca bhikkhu ṭhapetvā satthāraṃ sayaṃ dhammakathaṃ ārabhī’’ti.
སཏྠཱ ཏེསཾ ཨནཏྟམནབྷཱཝཾ ཉཏྭཱ ཨབྷིབྷུཾ བྷིཀྑུཾ ཨེཏདཝོཙ – ‘‘ཨུཛ྄ཛྷཱཡནྟི ཁོ ཏེ, བྲཱཧྨཎ, བྲཧྨཱ ཙ བྲཧྨཔརིསཱ ཙ བྲཧྨཔཱརིསཛྫཱ ཙ། ཏེན ཧི ཏྭཾ – བྲཱཧྨཎ, བྷིཡྻོསོམཏྟཱཡ སཾཝེཛེཧཱི’’ཏི། ཐེརོ སཏྠུ ཝཙནཾ སམྤཊིཙྪིཏྭཱ ཨནེཀཝིཧིཏཾ ཨིདྡྷིཝིཀུབྦནཾ ཀཏྭཱ སཧསྶིལོཀདྷཱཏུཾ སརེན ཝིཉྙཱཔེནྟོ ‘‘ཨཱརམྦྷཐ ནིཀྐམཐཱ’’ཏི (སཾ॰ ནི॰ ༡.༡༨༥) གཱཐཱདྭཡཾ ཨབྷཱསི། ཀིཾ པན ཀཏྭཱ ཐེརོ སཧསྶིལོཀདྷཱཏུཾ ཝིཉྙཱཔེསཱིཏི? ནཱིལཀསིཎཾ ཏཱཝ སམཱཔཛྫིཏྭཱ སབྦཏྠ ཨནྡྷཀཱརཾ ཕརི, ཏཏོ ‘‘ཀིམིདཾ ཨནྡྷཀཱར’’ནྟི སཏྟཱནཾ ཨཱབྷོགེ ཨུཔྤནྣེ ཨཱལོཀཾ དསྶེསི། ‘‘ཀིཾ ཨཱལོཀོ ཨཡ’’ནྟི ཝིཙིནནྟཱནཾ ཨཏྟཱནཾ དསྶེསི, སཧསྶཙཀྐཝཱལེ༹ དེཝམནུསྶཱ ཨཉྫལིཾ པགྒཎྷིཏྭཱ པགྒཎྷིཏྭཱ ཐེརཾཡེཝ ནམསྶམཱནཱ ཨཊྛཾསུ། ཐེརོ ‘‘མཧཱཛནོ མཡ྄ཧཾ དྷམྨཾ དེསེནྟསྶ སརཾ སུཎཱཏཱུ’’ཏི ཨིམཱ གཱཐཱ ཨབྷཱསི། སབྦེ ཨོསཊཱཡ པརིསཱཡ མཛ྄ཛྷེ ནིསཱིདིཏྭཱ དྷམྨཾ དེསེནྟསྶ ཝིཡ སདྡཾ ཨསྶོསུཾ། ཨཏྠོཔི ནེསཾ པཱཀཊོ ཨཧོསི།
Satthā tesaṃ anattamanabhāvaṃ ñatvā abhibhuṃ bhikkhuṃ etadavoca – ‘‘ujjhāyanti kho te, brāhmaṇa, brahmā ca brahmaparisā ca brahmapārisajjā ca. Tena hi tvaṃ – brāhmaṇa, bhiyyosomattāya saṃvejehī’’ti. Thero satthu vacanaṃ sampaṭicchitvā anekavihitaṃ iddhivikubbanaṃ katvā sahassilokadhātuṃ sarena viññāpento ‘‘ārambhatha nikkamathā’’ti (saṃ. ni. 1.185) gāthādvayaṃ abhāsi. Kiṃ pana katvā thero sahassilokadhātuṃ viññāpesīti? Nīlakasiṇaṃ tāva samāpajjitvā sabbattha andhakāraṃ phari, tato ‘‘kimidaṃ andhakāra’’nti sattānaṃ ābhoge uppanne ālokaṃ dassesi. ‘‘Kiṃ āloko aya’’nti vicinantānaṃ attānaṃ dassesi, sahassacakkavāḷe devamanussā añjaliṃ paggaṇhitvā paggaṇhitvā theraṃyeva namassamānā aṭṭhaṃsu. Thero ‘‘mahājano mayhaṃ dhammaṃ desentassa saraṃ suṇātū’’ti imā gāthā abhāsi. Sabbe osaṭāya parisāya majjhe nisīditvā dhammaṃ desentassa viya saddaṃ assosuṃ. Atthopi nesaṃ pākaṭo ahosi.
ཨཐ ཁོ བྷགཝཱ སདྡྷིཾ ཐེརེན ཨརུཎཝཏིཾ པཙྩཱགནྟྭཱ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ བྷིཀྑུསངྒྷཾ པུཙྪི – ‘‘ཨསྶུཏྠ ནོ ཏུམྷེ, བྷིཀྑཝེ, ཨབྷིབྷུསྶ བྷིཀྑུནོ བྲཧྨལོཀེ ཋིཏསྶ གཱཐཱཡོ བྷཱསམཱནསྶཱ’’ཏི། ཏེ ‘‘ཨཱམ, བྷནྟེ’’ཏི པཊིཛཱནིཏྭཱ སུཏབྷཱཝཾ ཨཱཝིཀརོནྟཱ ཏདེཝ གཱཐཱདྭཡཾ ཨུདཱཧརིཾསུ། སཏྠཱ ‘‘སཱདྷུ སཱདྷཱུ’’ཏི སཱདྷུཀཱརཾ དཏྭཱ དེསནཾ ནིཊྛཔེསི། ཨེཝཾ ཏཱཝ ཨིདཾ སུཏྟཾ ཨིཏོ ཨེཀཏིཾསཀཔྤམཏྠཀེ སིཁིནཱ བྷགཝཏཱ ཀཐིཏཾ།
Atha kho bhagavā saddhiṃ therena aruṇavatiṃ paccāgantvā piṇḍāya caritvā pacchābhattaṃ piṇḍapātapaṭikkanto bhikkhusaṅghaṃ pucchi – ‘‘assuttha no tumhe, bhikkhave, abhibhussa bhikkhuno brahmaloke ṭhitassa gāthāyo bhāsamānassā’’ti. Te ‘‘āma, bhante’’ti paṭijānitvā sutabhāvaṃ āvikarontā tadeva gāthādvayaṃ udāhariṃsu. Satthā ‘‘sādhu sādhū’’ti sādhukāraṃ datvā desanaṃ niṭṭhapesi. Evaṃ tāva idaṃ suttaṃ ito ekatiṃsakappamatthake sikhinā bhagavatā kathitaṃ.
ཨམྷཱཀཾ པན བྷགཝཱ སབྦཉྙུཏཾ པཏྟོ པཝཏྟིཏཝརདྷམྨཙཀྐོ སཱཝཏྠིཾ ཨུཔནིསྶཱཡ ཛེཏཝནེ ཝིཧརནྟོ ཛེཊྛམཱུལམཱསཔུཎྞམདིཝསེ བྷིཀྑཱུ ཨཱམནྟེཏྭཱ ཨིམཾ ཨརུཎཝཏིསུཏྟཾ པཊྛཔེསི། ཨཱནནྡཏྠེརོ བཱིཛནིཾ གཧེཏྭཱ བཱིཛཡམཱནོ ཋིཏཀོཝ ཨཱདིཏོ པཊྛཱཡ ཡཱཝ པརིཡོསཱནཱ ཨེཀབྱཉྫནམྤི ཨཧཱཔེཏྭཱ སཀལསུཏྟཾ ཨུགྒཎྷི། སོ པུནདིཝསེ པིཎྜཔཱཏཔཊིཀྐནྟོ དསབལསྶ ཝཏྟཾ དསྶེཏྭཱ ཨཏྟནོ དིཝཱཝིཧཱརཊྛཱནཾ གནྟྭཱ སདྡྷིཝིཧཱརིཀནྟེཝཱསིཀེསུ ཝཏྟཾ དསྶེཏྭཱ པཀྐནྟེསུ ཧིཡྻོ ཀཐིཏཾ ཨརུཎཝཏིསུཏྟཾ ཨཱཝཛྫེནྟོ ནིསཱིདི། ཨཐསྶ སབྦཾ སུཏྟཾ ཝིབྷཱུཏཾ ཨུཔཊྛཱསི། སོ ཙིནྟེསི – ‘‘སིཁིསྶ བྷགཝཏོ ཨགྒསཱཝཀོ བྲཧྨལོཀེ ཋཏྭཱ ཙཀྐཝཱལ༹སཧསྶེ ཨནྡྷཀཱརཾ ཝིདྷམེཏྭཱ སརཱིརོབྷཱསཾ དསྶེཏྭཱ ཨཏྟནོ སདྡཾ སཱཝེནྟོ དྷམྨཀཐཾ ཀཐེསཱིཏི ཧིཡྻོ སཏྠཱརཱ ཀཐིཏཾ, སཱཝཀསྶ ཏཱཝ ཝིསཡོ ཨེཝརཱུཔོ, དས པཱརམིཡོ པཱུརེཏྭཱ སབྦཉྙུཏཾ པཏྟོ པན སམྨཱསམྦུདྡྷོ ཀིཏྟཀཾ ཋཱནཾ སརེན ཝིཉྙཱཔེཡྻཱ’’ཏི། སོ ཨེཝཾ ཨུཔྤནྣཱཡ ཝིམཏིཡཱ ཝིནོདནཏྠཾ ཏངྑཎེཡེཝ བྷགཝནྟཾ ཨུཔསངྐམིཏྭཱ ཏམཏྠཾ པུཙྪི། ཨེཏམཏྠཾ དསྶེཏུཾ ཨཐ ཁོ ཨཱཡསྨཱ ཨཱནནྡོཏི ཝུཏྟཾ།
Amhākaṃ pana bhagavā sabbaññutaṃ patto pavattitavaradhammacakko sāvatthiṃ upanissāya jetavane viharanto jeṭṭhamūlamāsapuṇṇamadivase bhikkhū āmantetvā imaṃ aruṇavatisuttaṃ paṭṭhapesi. Ānandatthero bījaniṃ gahetvā bījayamāno ṭhitakova ādito paṭṭhāya yāva pariyosānā ekabyañjanampi ahāpetvā sakalasuttaṃ uggaṇhi. So punadivase piṇḍapātapaṭikkanto dasabalassa vattaṃ dassetvā attano divāvihāraṭṭhānaṃ gantvā saddhivihārikantevāsikesu vattaṃ dassetvā pakkantesu hiyyo kathitaṃ aruṇavatisuttaṃ āvajjento nisīdi. Athassa sabbaṃ suttaṃ vibhūtaṃ upaṭṭhāsi. So cintesi – ‘‘sikhissa bhagavato aggasāvako brahmaloke ṭhatvā cakkavāḷasahasse andhakāraṃ vidhametvā sarīrobhāsaṃ dassetvā attano saddaṃ sāvento dhammakathaṃ kathesīti hiyyo satthārā kathitaṃ, sāvakassa tāva visayo evarūpo, dasa pāramiyo pūretvā sabbaññutaṃ patto pana sammāsambuddho kittakaṃ ṭhānaṃ sarena viññāpeyyā’’ti. So evaṃ uppannāya vimatiyā vinodanatthaṃ taṅkhaṇeyeva bhagavantaṃ upasaṅkamitvā tamatthaṃ pucchi. Etamatthaṃ dassetuṃ atha kho āyasmā ānandoti vuttaṃ.
ཏཏྠ སམྨུཁཱཏི སམྨུཁཱིབྷཱུཏེན མཡཱ ཨེཏཾ སུཏཾ, ན ཨནུསྶཝེན, ན དཱུཏཔརམྤརཱཡཱཏི ཨིམིནཱ ཨདྷིཔྤཱཡེན ཨེཝམཱཧ། ཀཱིཝཏཀཾ པཧོཏི སརེན ཝིཉྙཱཔེཏུནྟི ཀིཏྟཀཾ ཋཱནཾ སརཱིརོབྷཱསེན ཝིཧཏནྡྷཀཱརཾ ཀཏྭཱ སརེན ཝིཉྙཱཔེཏུཾ སཀྐོཏི། སཱཝཀོ སོ, ཨཱནནྡ, ཨཔྤམེཡྻཱ ཏཐཱགཏཱཏི ཨིདཾ བྷགཝཱ ཨིམིནཱ ཨདྷིཔྤཱཡེནཱཧ – ཨཱནནྡ, ཏྭཾ ཀིཾ ཝདེསི, སོ པདེསཉཱཎེ ཋིཏོ སཱཝཀོ། ཏཐཱགཏཱ པན དས པཱརམིཡོ པཱུརེཏྭཱ སབྦཉྙུཏཉྙཱཎཾ པཏྟཱ ཨཔྤམེཡྻཱ། སོ ཏྭཾ ནཁསིཁཱཡ པཾསུཾ གཧེཏྭཱ མཧཱཔཐཝིཔཾསུནཱ སདྡྷིཾ ཨུཔམེནྟོ ཝིཡ ཀིཾ ནཱམེཏཾ ཝདེསི། ཨཉྙོ ཧི སཱཝཀཱནཾ ཝིསཡོ, ཨཉྙོ བུདྡྷཱནཾ། ཨཉྙོ སཱཝཀཱནཾ གོཙརོ, ཨཉྙོ བུདྡྷཱནཾ། ཨཉྙཾ སཱཝཀཱནཾ བལཾ, ཨཉྙཾ བུདྡྷཱནནྟི། ཨིཏི བྷགཝཱ ཨིམིནཱ ཨདྷིཔྤཱཡེན ཨཔྤམེཡྻབྷཱཝཾ ཝཏྭཱ ཏུཎྷཱི ཨཧོསི།
Tattha sammukhāti sammukhībhūtena mayā etaṃ sutaṃ, na anussavena, na dūtaparamparāyāti iminā adhippāyena evamāha. Kīvatakaṃ pahoti sarena viññāpetunti kittakaṃ ṭhānaṃ sarīrobhāsena vihatandhakāraṃ katvā sarena viññāpetuṃ sakkoti. Sāvako so, ānanda, appameyyā tathāgatāti idaṃ bhagavā iminā adhippāyenāha – ānanda, tvaṃ kiṃ vadesi, so padesañāṇe ṭhito sāvako. Tathāgatā pana dasa pāramiyo pūretvā sabbaññutaññāṇaṃ pattā appameyyā. So tvaṃ nakhasikhāya paṃsuṃ gahetvā mahāpathavipaṃsunā saddhiṃ upamento viya kiṃ nāmetaṃ vadesi. Añño hi sāvakānaṃ visayo, añño buddhānaṃ. Añño sāvakānaṃ gocaro, añño buddhānaṃ. Aññaṃ sāvakānaṃ balaṃ, aññaṃ buddhānanti. Iti bhagavā iminā adhippāyena appameyyabhāvaṃ vatvā tuṇhī ahosi.
ཐེརོ དུཏིཡམྤི པུཙྪི། སཏྠཱ, ‘‘ཨཱནནྡ, ཏྭཾ ཏཱལ༹ཙྪིདྡཾ གཧེཏྭཱ ཨནནྟཱཀཱསེན ཨུཔམེནྟོ ཝིཡ, ཙཱཏཀསཀུཎཾ གཧེཏྭཱ དིཡཌྜྷཡོཛནསཏིཀེན སུཔཎྞརཱཛེན ཨུཔམེནྟོ ཝིཡ, ཧཏྠིསོཎྜཱཡ ཨུདཀཾ གཧེཏྭཱ མཧཱགངྒཱཡ ཨུཔམེནྟོ ཝིཡ, ཙཏུརཏནིཀེ ཨཱཝཱཊེ ཨུདཀཾ གཧེཏྭཱ སཏྟཧི སརེཧི ཨུཔམེནྟོ ཝིཡ, ནཱལི༹ཀོདནམཏྟལཱབྷིཾ མནུསྶཾ གཧེཏྭཱ ཙཀྐཝཏྟིརཉྙཱ ཨུཔམེནྟོ ཝིཡ, པཾསུཔིསཱཙཀཾ གཧེཏྭཱ སཀྐེན དེཝརཉྙཱ ཨུཔམེནྟོ ཝིཡ, ཁཛྫོཔནཀཔྤབྷཾ གཧེཏྭཱ སཱུརིཡཔྤབྷཱཡ ཨུཔམེནྟོ ཝིཡ ཀིཾ ནཱམེཏཾ ཝདེསཱིཏི དཱིཔེནྟོ དུཏིཡམྤི ཨཔྤམེཡྻབྷཱཝམེཝ ཝཏྭཱ ཏུཎྷཱི ཨཧོསི། ཏཏོ ཐེརོ ཙིནྟེསི – ‘‘སཏྠཱ མཡཱ པུཙྪིཏོ ན ཏཱཝ ཀཐེསི, ཧནྡ ནཾ ཡཱཝཏཏིཡཾ ཡཱཙིཏྭཱ བུདྡྷསཱིཧནཱདཾ ནདཱཔེསྶཱམཱི’’ཏི། སོ ཏཏིཡམྤི ཡཱཙི། ཏཾ དསྶེཏུཾ ཏཏིཡམྤི ཁོཏིཨཱདི ཝུཏྟཾ། ཨཐསྶ བྷགཝཱ བྱཱཀརོནྟོ སུཏཱ ཏེ ཨཱནནྡཱཏིཨཱདིམཱཧ། ཐེརོ ཙིནྟེསི – ‘‘སཏྠཱ མེ ‘སུཏཱ ཏེ, ཨཱནནྡ, སཧསྶཱི ཙཱུལ༹ནིཀཱ ལོཀདྷཱཏཱུ’ཏི ཨེཏྟཀམེཝ ཝཏྭཱ ཏུཎྷཱི ཛཱཏོ, ཨིདཱནི བུདྡྷསཱིཧནཱདཾ ནདིསྶཏཱི’’ཏི སོ སཏྠཱརཾ ཡཱཙནྟོ ཨེཏསྶ བྷགཝཱ ཀཱལོཏིཨཱདིམཱཧ།
Thero dutiyampi pucchi. Satthā, ‘‘ānanda, tvaṃ tāḷacchiddaṃ gahetvā anantākāsena upamento viya, cātakasakuṇaṃ gahetvā diyaḍḍhayojanasatikena supaṇṇarājena upamento viya, hatthisoṇḍāya udakaṃ gahetvā mahāgaṅgāya upamento viya, caturatanike āvāṭe udakaṃ gahetvā sattahi sarehi upamento viya, nāḷikodanamattalābhiṃ manussaṃ gahetvā cakkavattiraññā upamento viya, paṃsupisācakaṃ gahetvā sakkena devaraññā upamento viya, khajjopanakappabhaṃ gahetvā sūriyappabhāya upamento viya kiṃ nāmetaṃ vadesīti dīpento dutiyampi appameyyabhāvameva vatvā tuṇhī ahosi. Tato thero cintesi – ‘‘satthā mayā pucchito na tāva kathesi, handa naṃ yāvatatiyaṃ yācitvā buddhasīhanādaṃ nadāpessāmī’’ti. So tatiyampi yāci. Taṃ dassetuṃ tatiyampi khotiādi vuttaṃ. Athassa bhagavā byākaronto sutā te ānandātiādimāha. Thero cintesi – ‘‘satthā me ‘sutā te, ānanda, sahassī cūḷanikā lokadhātū’ti ettakameva vatvā tuṇhī jāto, idāni buddhasīhanādaṃ nadissatī’’ti so satthāraṃ yācanto etassa bhagavā kālotiādimāha.
བྷགཝཱཔིསྶ ཝིཏྠཱརཀཐཾ ཀཐེཏུཾ ཏེན ཧཱནནྡཱཏིཨཱདིམཱཧ། ཏཏྠ ཡཱཝཏཱཏི ཡཏྟཀཾ ཋཱནཾ། ཙནྡིམསཱུརིཡཱཏི ཙནྡིམཱ ཙ སཱུརིཡོ ཙ། པརིཧརནྟཱིཏི ཝིཙརནྟི། དིསཱ བྷནྟཱིཏི སབྦདིསཱ ཨོབྷཱསནྟི། ཝིརོཙནཱཏི ཝིརོཙམཱནཱ། ཨེཏྟཱཝཏཱ ཨེཀཙཀྐཝཱལ༹ཾ པརིཙྪིནྡིཏྭཱ དསྶིཏཾ ཧོཏི། ཨིདཱནི ཏཾ སཧསྶགུཎཾ ཀཏྭཱ དསྶེནྟོ ཏཱཝ སཧསྶདྷཱ ལོཀོཏི ཨཱཧ། ཏསྨིཾ སཧསྶདྷཱ ལོཀེཏི ཏསྨིཾ སཧསྶཙཀྐཝཱལེ༹། སཧསྶཾ ཙཱཏུམཧཱརཱཛིཀཱནནྟི སཧསྶཾ ཙཱཏུམཧཱརཱཛིཀཱནཾ དེཝལོཀཱནཾ། ཡསྨཱ པན ཨེཀེཀསྨིཾ ཙཀྐཝཱལེ༹ ཙཏྟཱརོ ཙཏྟཱརོ མཧཱརཱཛཱནོ , ཏསྨཱ ཙཏྟཱརི མཧཱརཱཛསཧསྶཱནཱིཏི ཝུཏྟཾ། ཨིམིནཱ ཨུཔཱཡེན སབྦཏྠ ཨཏྠོ ཝེདིཏབྦོ། ཙཱུལ༹ནིཀཱཏི ཁུདྡིཀཱ། ཨཡཾ སཱཝཀཱནཾ ཝིསཡོ། ཀསྨཱ པནེསཱ ཨཱནཱིཏཱཏི? མཛ྄ཛྷིམིཀཱཡ ལོཀདྷཱཏུཡཱ པརིཙྪེདདསྶནཏྠཾ།
Bhagavāpissa vitthārakathaṃ kathetuṃ tena hānandātiādimāha. Tattha yāvatāti yattakaṃ ṭhānaṃ. Candimasūriyāti candimā ca sūriyo ca. Pariharantīti vicaranti. Disā bhantīti sabbadisā obhāsanti. Virocanāti virocamānā. Ettāvatā ekacakkavāḷaṃ paricchinditvā dassitaṃ hoti. Idāni taṃ sahassaguṇaṃ katvā dassento tāva sahassadhā lokoti āha. Tasmiṃ sahassadhā loketi tasmiṃ sahassacakkavāḷe. Sahassaṃ cātumahārājikānanti sahassaṃ cātumahārājikānaṃ devalokānaṃ. Yasmā pana ekekasmiṃ cakkavāḷe cattāro cattāro mahārājāno , tasmā cattāri mahārājasahassānīti vuttaṃ. Iminā upāyena sabbattha attho veditabbo. Cūḷanikāti khuddikā. Ayaṃ sāvakānaṃ visayo. Kasmā panesā ānītāti? Majjhimikāya lokadhātuyā paricchedadassanatthaṃ.
ཡཱཝཏཱཏི ཡཏྟཀཱ། ཏཱཝ སཧསྶདྷཱཏི ཏཱཝ སཧསྶབྷཱགེན། དྭིསཧསྶཱི མཛ྄ཛྷིམིཀཱ ལོཀདྷཱཏཱུཏི ཨཡཾ སཧསྶཙཀྐཝཱལཱ༹ནི སཧསྶབྷཱགེན གཎེཏྭཱ དསསཏསཧསྶཙཀྐཝཱལ༹པརིམཱཎཱ དྭིསཧསྶཱི མཛ྄ཛྷིམིཀཱ ནཱམ ལོཀདྷཱཏུ། ཨཡཾ སཱཝཀཱནཾ ཨཝིསཡོ, བུདྡྷཱནམེཝ ཝིསཡོ། ཨེཏྟཀེཔི ཧི ཋཱནེ ཏཐཱགཏཱ ཨནྡྷཀཱརཾ ཝིདྷམེཏྭཱ སརཱིརོབྷཱསཾ དསྶེཏྭཱ སརེན ཝིཉྙཱཔེཏུཾ སཀྐོནྟཱིཏི དཱིཔེཏི། ཨེཏྟཀེན བུདྡྷཱནཾ ཛཱཏིཀྑེཏྟཾ ནཱམ དསྶིཏཾ། བོདྷིསཏྟཱནཉྷི པཙྪིམབྷཝེ དེཝལོཀཏོ ཙཝིཏྭཱ མཱཏུཀུཙྪིཡཾ པཊིསནྡྷིགྒཧཎདིཝསེ ཙ ཀུཙྪིཏོ ནིཀྑམནདིཝསེ ཙ མཧཱབྷིནིཀྑམནདིཝསེ ཙ སམྦོདྷིདྷམྨཙཀྐཔྤཝཏྟནཨཱཡུསངྑཱརཝོསྶཛྫནཔརིནིབྦཱནདིཝསེསུ ཙ ཨེཏྟཀཾ ཋཱནཾ ཀམྤཏི།
Yāvatāti yattakā. Tāva sahassadhāti tāva sahassabhāgena. Dvisahassī majjhimikā lokadhātūti ayaṃ sahassacakkavāḷāni sahassabhāgena gaṇetvā dasasatasahassacakkavāḷaparimāṇā dvisahassī majjhimikā nāma lokadhātu. Ayaṃ sāvakānaṃ avisayo, buddhānameva visayo. Ettakepi hi ṭhāne tathāgatā andhakāraṃ vidhametvā sarīrobhāsaṃ dassetvā sarena viññāpetuṃ sakkontīti dīpeti. Ettakena buddhānaṃ jātikkhettaṃ nāma dassitaṃ. Bodhisattānañhi pacchimabhave devalokato cavitvā mātukucchiyaṃ paṭisandhiggahaṇadivase ca kucchito nikkhamanadivase ca mahābhinikkhamanadivase ca sambodhidhammacakkappavattanaāyusaṅkhāravossajjanaparinibbānadivasesu ca ettakaṃ ṭhānaṃ kampati.
ཏིསཧསྶཱི མཧཱསཧསྶཱིཏི སཧསྶིཏོ པཊྛཱཡ ཏཏིཡཱཏི ཏིསཧསྶཱི, སཧསྶཾ སཧསྶདྷཱ ཀཏྭཱ གཎིཏཾ མཛ྄ཛྷིམིཀཾ སཧསྶདྷཱ ཀཏྭཱ གཎིཏཏྟཱ མཧནྟེཧི སཧསྶེཧི གཎིཏཱཏི མཧཱསཧསྶཱི། ཨེཏྟཱཝཏཱ ཀོཊིསཏསཧསྶཙཀྐཝཱལ༹པརིམཱཎོ ལོཀོ དསྶིཏོ ཧོཏི། བྷགཝཱ ཨཱཀངྑམཱནོ ཨེཏྟཀེ ཋཱནེ ཨནྡྷཀཱརཾ ཝིདྷམེཏྭཱ སརཱིརོབྷཱསཾ དསྶེཏྭཱ སརེན ཝིཉྙཱཔེཡྻཱཏི། གཎཀཔུཏྟཏིསྶཏྠེརོ པན ཨེཝམཱཧ – ‘‘ན ཏིསཧསྶིམཧཱསཧསྶིལོཀདྷཱཏུཡཱ ཨེཝཾ པརིམཱཎཾ། ཨིདཉྷི ཨཱཙརིཡཱནཾ སཛ྄ཛྷཱཡམུལ༹ྷཀཾ ཝཱཙཱཡ པརིཧཱིནཊྛཱནཾ, དསཀོཊིསཏསཧསྶཙཀྐཝཱལ༹པརིམཱཎཾ པན ཋཱནཾ ཏིསཧསྶིམཧཱསཧསྶིལོཀདྷཱཏུ ནཱམཱ’’ཏི། ཨེཏྟཱཝཏཱ ཧི བྷགཝཏཱ ཨཱཎཱཀྑེཏྟཾ ནཱམ དསྶིཏཾ། ཨེཏསྨིཉྷི ཨནྟརེ ཨཱཊཱནཱཊིཡཔརིཏྟཨིསིགིལིཔརིཏྟདྷཛགྒཔརིཏྟབོཛ྄ཛྷངྒཔརིཏྟཁནྡྷཔརིཏྟ- མོརཔརིཏྟམེཏྟཔརིཏྟརཏནཔརིཏྟཱནཾ ཨཱཎཱ ཕརཏི། ཡཱཝཏཱ པན ཨཱཀངྑེཡྻཱཏི ཡཏྟཀཾ ཋཱནཾ ཨིཙྪེཡྻ, ཨིམིནཱ ཝིསཡཀྑེཏྟཾ དསྶེཏི། བུདྡྷཱནཉྷི ཝིསཡཀྑེཏྟསྶ པམཱཎཔརིཙྪེདོ ནཱམ ནཏྠི, ནཏྠིཀབྷཱཝེ ཙསྶ ཨིམཾ ཨོཔམྨཾ ཨཱཧརནྟི – ཀོཊིསཏསཧསྶཙཀྐཝཱལ༹མྷི ཡཱཝ བྲཧྨལོཀཱ སཱསཔེཧི པཱུརེཏྭཱ སཙེ ཀོཙི པུརཏྠིམཱཡ དིསཱཡ ཨེཀཙཀྐཝཱལེ༹ ཨེཀཾ སཱསཔཾ པཀྑིཔནྟོ ཨཱགཙྪེཡྻ, སབྦེཔི ཏེ སཱསཔཱ པརིཀྑཡཾ གཙྪེཡྻུཾ, ན ཏྭེཝ པུརཏྠིམཱཡ དིསཱཡ ཙཀྐཝཱལཱ༹ནི། དཀྑིཎཱདཱིསུཔི ཨེསེཝ ནཡོ། ཏཏྠ བུདྡྷཱནཾ ཨཝིསཡོ ནཱམ ནཏྠི།
Tisahassī mahāsahassīti sahassito paṭṭhāya tatiyāti tisahassī, sahassaṃ sahassadhā katvā gaṇitaṃ majjhimikaṃ sahassadhā katvā gaṇitattā mahantehi sahassehi gaṇitāti mahāsahassī. Ettāvatā koṭisatasahassacakkavāḷaparimāṇo loko dassito hoti. Bhagavā ākaṅkhamāno ettake ṭhāne andhakāraṃ vidhametvā sarīrobhāsaṃ dassetvā sarena viññāpeyyāti. Gaṇakaputtatissatthero pana evamāha – ‘‘na tisahassimahāsahassilokadhātuyā evaṃ parimāṇaṃ. Idañhi ācariyānaṃ sajjhāyamuḷhakaṃ vācāya parihīnaṭṭhānaṃ, dasakoṭisatasahassacakkavāḷaparimāṇaṃ pana ṭhānaṃ tisahassimahāsahassilokadhātu nāmā’’ti. Ettāvatā hi bhagavatā āṇākkhettaṃ nāma dassitaṃ. Etasmiñhi antare āṭānāṭiyaparittaisigiliparittadhajaggaparittabojjhaṅgaparittakhandhaparitta- moraparittamettaparittaratanaparittānaṃ āṇā pharati. Yāvatā pana ākaṅkheyyāti yattakaṃ ṭhānaṃ iccheyya, iminā visayakkhettaṃ dasseti. Buddhānañhi visayakkhettassa pamāṇaparicchedo nāma natthi, natthikabhāve cassa imaṃ opammaṃ āharanti – koṭisatasahassacakkavāḷamhi yāva brahmalokā sāsapehi pūretvā sace koci puratthimāya disāya ekacakkavāḷe ekaṃ sāsapaṃ pakkhipanto āgaccheyya, sabbepi te sāsapā parikkhayaṃ gaccheyyuṃ, na tveva puratthimāya disāya cakkavāḷāni. Dakkhiṇādīsupi eseva nayo. Tattha buddhānaṃ avisayo nāma natthi.
ཨེཝཾ ཝུཏྟེ ཐེརོ ཙིནྟེསི – ‘‘སཏྠཱ ཨེཝམཱཧ – ‘ཨཱཀངྑམཱནོ, ཨཱནནྡ, ཏཐཱགཏོ ཏིསཧསྶིམཧཱསཧསྶིལོཀདྷཱཏུཾ སརེན ཝིཉྙཱཔེཡྻ, ཡཱཝཏཱ པན ཨཱཀངྑེཡྻཱ’ཏི། ཝིསམོ ཁོ པནཱཡཾ ལོཀོ, ཨནནྟཱནི ཙཀྐཝཱལཱ༹ནི, ཨེཀསྨིཾ ཋཱནེ སཱུརིཡོ ཨུགྒཏོ ཧོཏི, ཨེཀསྨིཾ ཋཱནེ མཛ྄ཛྷེ ཋིཏོ, ཨེཀསྨིཾ ཋཱནེ ཨཏྠངྒཏོ། ཨེཀསྨིཾ ཋཱནེ པཋམཡཱམོ ཧོཏི, ཨེཀསྨིཾ ཋཱནེ མཛ྄ཛྷིམཡཱམོ, ཨེཀསྨིཾ ཋཱནེ པཙྪིམཡཱམོ། སཏྟཱཔི ཀམྨཔྤསུཏཱ, ཁིཌྜཱཔསུཏཱ, ཨཱཧཱརཔྤསུཏཱཏི ཨེཝཾ ཏེཧི ཏེཧི ཀཱརཎེཧི ཝིཀྑིཏྟཱ ཙ པམཏྟཱ ཙ ཧོནྟི། ཀཐཾ ནུ ཁོ ཏེ སཏྠཱ སརེན ཝིཉྙཱཔེཡྻཱ’’ཏི། སོ ཨེཝཾ ཙིནྟེཏྭཱ ཝིམཏིཙྪེདནཏྠཾ ཏཐཱགཏཾ པུཙྪནྟོ ཡཐཱ ཀཐཾ པནཱཏིཨཱདིམཱཧ།
Evaṃ vutte thero cintesi – ‘‘satthā evamāha – ‘ākaṅkhamāno, ānanda, tathāgato tisahassimahāsahassilokadhātuṃ sarena viññāpeyya, yāvatā pana ākaṅkheyyā’ti. Visamo kho panāyaṃ loko, anantāni cakkavāḷāni, ekasmiṃ ṭhāne sūriyo uggato hoti, ekasmiṃ ṭhāne majjhe ṭhito, ekasmiṃ ṭhāne atthaṅgato. Ekasmiṃ ṭhāne paṭhamayāmo hoti, ekasmiṃ ṭhāne majjhimayāmo, ekasmiṃ ṭhāne pacchimayāmo. Sattāpi kammappasutā, khiḍḍāpasutā, āhārappasutāti evaṃ tehi tehi kāraṇehi vikkhittā ca pamattā ca honti. Kathaṃ nu kho te satthā sarena viññāpeyyā’’ti. So evaṃ cintetvā vimaticchedanatthaṃ tathāgataṃ pucchanto yathā kathaṃ panātiādimāha.
ཨཐསྶ སཏྠཱ བྱཱཀརོནྟོ ཨིདྷཱནནྡ, ཏཐཱགཏོཏིཨཱདིམཱཧ། ཏཏྠ ཨོབྷཱསེན ཕརེཡྻཱཏི སརཱིརོབྷཱསེན ཕརེཡྻ། ཕརམཱནོ པནེས ཀིཾ ཀརེཡྻཱཏི? ཡསྨིཾ ཋཱནེ སཱུརིཡོ པཉྙཱཡཏི, ཏཏྠ ནཾ ཨཏྟནོ ཨཱནུབྷཱཝེན ཨཏྠཾ གམེཡྻ། ཡཏྠ པན ན པཉྙཱཡཏི, ཏཏྠ ནཾ ཨུཊྛཱཔེཏྭཱ མཛ྄ཛྷེ ཋཔེཡྻ ། ཏཏོ ཡཏྠ སཱུརིཡོ པཉྙཱཡཏི, ཏཏྠ མནུསྶཱ ‘‘ཨདྷུནཱཝ སཱུརིཡོ པཉྙཱཡིཏྠ, སོ ཨིདཱནེཝ ཨཏྠངྒམིཏོ, ནཱགཱཝཊྚོ ནུ ཁོ ཨཡཾ, བྷཱུཏཱཝཊྚཡཀྑཱཝཊྚདེཝཏཱཝཊྚཱནཾ ཨཉྙཏརོ’’ཏི ཝིཏྟཀྐཾ ཨུཔྤཱདེཡྻུཾ། ཡཏྠ པན ན པཉྙཱཡཏི, ཏཏྠ མནུསྶཱ ‘‘ཨདྷུནཱཝ སཱུརིཡོ ཨཏྠངྒམིཏོ, སྭཱཡཾ ཨིདཱནེཝ ཨུཊྛིཏོ, ཀིཾ ནུ ཁོ ཨཡཾ ནཱགཱཝཊྚབྷཱུཏཱཝཊྚཡཀྑཱཝཊྚདེཝཏཱཝཊྚཱནཾ ཨཉྙཏརོ’’ཏི ཝིཏཀྐཾ ཨུཔྤཱདེཡྻུཾ། ཏཏོ ཏེསུ མནུསྶེསུ ཨཱལོཀཉྩ ཨནྡྷཀཱརཉྩ ཨཱཝཛྫིཏྭཱ ‘‘ཀིཾ པཙྩཡཱ ནུ ཁོ ཨིད’’ནྟི པརིཡེསམཱནེསུ སཏྠཱ ནཱིལཀསིཎཾ སམཱཔཛྫིཏྭཱ བཧལནྡྷཀཱརཾ པཏྠརེཡྻ། ཀསྨཱ? ཏེསཾ ཀམྨཱདིཔྤསུཏཱནཾ སཏྟཱནཾ སནྟཱསཛནནཏྠཾ། ཨཐ ནེསཾ སནྟཱསཾ ཨཱཔནྣབྷཱཝཾ ཉཏྭཱ ཨོདཱཏཀསིཎསམཱཔཏྟིཾ སམཱཔཛྫིཏྭཱ པཎྜརཾ གྷནབུདྡྷརསྨིཾ ཝིསྶཛྫེནྟོ ཙནྡསཧསྶསཱུརིཡསཧསྶཨུཊྛཱནཀཱལོ ཝིཡ ཨེཀཔྤཧཱརེནེཝ སབྦཾ ཨེཀཱལོཀཾ ཀརེཡྻ། ཏཉྩ ཁོ ཏིལབཱིཛམཏྟེན ཀཱཡཔྤདེསེན ཨོབྷཱསཾ མུཉྩནྟོ། ཡོ ཧི ཙཀྐཝཱལ༹པཐཝིཾ དཱིཔཀཔལླཀཾ ཀཏྭཱ མཧཱསམུདྡེ ཨུདཀཾ ཏེལཾ ཀཏྭཱ སིནེརུཾ ཝཊྚིཾ ཀཏྭཱ ཨཉྙསྨིཾ སིནེརུམུདྡྷནི ཋཔེཏྭཱ ཛཱལེཡྻ, སོ ཨེཀཙཀྐཝཱལེ༹ཡེཝ ཨཱལོཀཾ ཀརེཡྻ། ཏཏོ པརཾ ཝིདཏྠིམྤི ཨོབྷཱསེཏུཾ ན སཀྐུཎེཡྻ། ཏཐཱགཏོ པན ཏིལཕལཔྤམཱཎེན སརཱིརཔྤདེསེན ཨོབྷཱསཾ མུཉྩིཏྭཱ ཏིསཧསྶིམཧཱསཧསྶིལོཀདྷཱཏུཾ ཨེཀོབྷཱསཾ ཀརེཡྻ ཏཏོ ཝཱ པན བྷིཡྻོ། ཨེཝཾ མཧནྟཱ ཧི བུདྡྷགུཎཱཏི།
Athassa satthā byākaronto idhānanda, tathāgatotiādimāha. Tattha obhāsena phareyyāti sarīrobhāsena phareyya. Pharamāno panesa kiṃ kareyyāti? Yasmiṃ ṭhāne sūriyo paññāyati, tattha naṃ attano ānubhāvena atthaṃ gameyya. Yattha pana na paññāyati, tattha naṃ uṭṭhāpetvā majjhe ṭhapeyya . Tato yattha sūriyo paññāyati, tattha manussā ‘‘adhunāva sūriyo paññāyittha, so idāneva atthaṅgamito, nāgāvaṭṭo nu kho ayaṃ, bhūtāvaṭṭayakkhāvaṭṭadevatāvaṭṭānaṃ aññataro’’ti vittakkaṃ uppādeyyuṃ. Yattha pana na paññāyati, tattha manussā ‘‘adhunāva sūriyo atthaṅgamito, svāyaṃ idāneva uṭṭhito, kiṃ nu kho ayaṃ nāgāvaṭṭabhūtāvaṭṭayakkhāvaṭṭadevatāvaṭṭānaṃ aññataro’’ti vitakkaṃ uppādeyyuṃ. Tato tesu manussesu ālokañca andhakārañca āvajjitvā ‘‘kiṃ paccayā nu kho ida’’nti pariyesamānesu satthā nīlakasiṇaṃ samāpajjitvā bahalandhakāraṃ patthareyya. Kasmā? Tesaṃ kammādippasutānaṃ sattānaṃ santāsajananatthaṃ. Atha nesaṃ santāsaṃ āpannabhāvaṃ ñatvā odātakasiṇasamāpattiṃ samāpajjitvā paṇḍaraṃ ghanabuddharasmiṃ vissajjento candasahassasūriyasahassauṭṭhānakālo viya ekappahāreneva sabbaṃ ekālokaṃ kareyya. Tañca kho tilabījamattena kāyappadesena obhāsaṃ muñcanto. Yo hi cakkavāḷapathaviṃ dīpakapallakaṃ katvā mahāsamudde udakaṃ telaṃ katvā sineruṃ vaṭṭiṃ katvā aññasmiṃ sinerumuddhani ṭhapetvā jāleyya, so ekacakkavāḷeyeva ālokaṃ kareyya. Tato paraṃ vidatthimpi obhāsetuṃ na sakkuṇeyya. Tathāgato pana tilaphalappamāṇena sarīrappadesena obhāsaṃ muñcitvā tisahassimahāsahassilokadhātuṃ ekobhāsaṃ kareyya tato vā pana bhiyyo. Evaṃ mahantā hi buddhaguṇāti.
ཏཾ ཨཱལོཀཾ སཉྫཱནེཡྻུནྟི ཏཾ ཨཱལོཀཾ དིསྭཱ ‘‘ཡེན སཱུརིཡོ ཨཏྠཉྩེཝ གམིཏོ ཨུཊྛཱཔིཏོ ཙ, བཧལནྡྷཀཱརཉྩ ཝིསྶཊྛཾ, ཨེས སོ པུརིསོ ཨིདཱནི ཨཱལོཀཾ ཀཏྭཱ ཋིཏོ, ཨཧོ ཨཙྪརིཡཔུརིསོ’’ཏི ཨཉྫལིཾ པགྒཡ྄ཧ ནམསྶམཱནཱ ནིསཱིདེཡྻུཾ། སདྡམནུསྶཱཝེཡྻཱཏི དྷམྨཀཐཱསདྡམནུསྶཱཝེཡྻ། ཡོ ཧི ཨེཀཾ ཙཀྐཝཱལ༹པབྦཏཾ བྷེརིཾ ཀཏྭཱ མཧཱཔཐཝིཾ བྷེརིཙམྨཾ ཀཏྭཱ སིནེརུཾ དཎྜཾ ཀཏྭཱ ཨཉྙསྨིཾ སིནེརུམཏྠཀེ ཋཔེཏྭཱ ཨཱཀོཊེཡྻ, སོ ཨེཀཙཀྐཝཱལེ༹ཡེཝ ཏཾ སདྡཾ སཱཝེཡྻ, པརཏོ ཝིདཏྠིམྤི ཨཏིཀྐཱམེཏུཾ ན སཀྐུཎེཡྻ། ཏཐཱགཏོ པན པལླངྐེ ཝཱ པཱིཋེ ཝཱ ནིསཱིདིཏྭཱ ཏིསཧསྶིམཧཱསཧསྶིལོཀདྷཱཏུཾ སརེན ཝིཉྙཱཔེཏི, ཏཏོ ཝཱ པན བྷིཡྻོ, ཨེཝཾ མཧཱནུབྷཱཝཱ ཏཐཱགཏཱཏི། ཨིཏི བྷགཝཱ ཨིམིནཱ ཨེཏྟཀེན ཝིསཡཀྑེཏྟམེཝ དསྶེཏི།
Taṃ ālokaṃ sañjāneyyunti taṃ ālokaṃ disvā ‘‘yena sūriyo atthañceva gamito uṭṭhāpito ca, bahalandhakārañca vissaṭṭhaṃ, esa so puriso idāni ālokaṃ katvā ṭhito, aho acchariyapuriso’’ti añjaliṃ paggayha namassamānā nisīdeyyuṃ. Saddamanussāveyyāti dhammakathāsaddamanussāveyya. Yo hi ekaṃ cakkavāḷapabbataṃ bheriṃ katvā mahāpathaviṃ bhericammaṃ katvā sineruṃ daṇḍaṃ katvā aññasmiṃ sinerumatthake ṭhapetvā ākoṭeyya, so ekacakkavāḷeyeva taṃ saddaṃ sāveyya, parato vidatthimpi atikkāmetuṃ na sakkuṇeyya. Tathāgato pana pallaṅke vā pīṭhe vā nisīditvā tisahassimahāsahassilokadhātuṃ sarena viññāpeti, tato vā pana bhiyyo, evaṃ mahānubhāvā tathāgatāti. Iti bhagavā iminā ettakena visayakkhettameva dasseti.
ཨིམཉྩ པན བུདྡྷསཱིཧནཱདཾ སུཏྭཱ ཐེརསྶ ཨབྦྷནྟརེ བལཝཔཱིཏི ཨུཔྤནྣཱ, སོ པཱིཏིཝསེན ཨུདཱནཾ ཨུདཱནེནྟོ ལཱབྷཱ ཝཏ མེཏིཨཱདིམཱཧ། ཏཏྠ ཡསྶ མེ སཏྠཱ ཨེཝཾམཧིདྡྷིཀོཏི ཡསྶ མཡ྄ཧཾ སཏྠཱ ཨེཝཾམཧིདྡྷིཀོ, ཏསྶ མཡ྄ཧཾ ཨེཝཾམཧིདྡྷིཀསྶ སཏྠུ པཊིལཱབྷོ ལཱབྷཱ ཙེཝ སུལདྡྷཉྩཱཏི ཨཏྠོ། ཨཐ ཝཱ ཡྭཱཧཾ ཨེཝརཱུཔསྶ སཏྠུནོ པཏྟཙཱིཝརཾ གཧེཏྭཱ ཝིཙརིཏུཾ, པཱདཔརིཀམྨཾ པིཊྛིཔརིཀམྨཾ ཀཱཏུཾ, མུཁདྷོཝནཨུདཀནྷཱནོདཀཱནི དཱཏུཾ, གནྡྷཀུཊིཔརིཝེཎཾ སམྨཛྫིཏུཾ, ཨུཔྤནྣཱཡ ཀངྑཱཡ པཉྷཾ པུཙྪིཏུཾ, མདྷུརདྷམྨཀཐཉྩ སོཏུཾ ལབྷཱམི, ཨེཏེ སབྦེཔི མཡ྄ཧཾ ལཱབྷཱ ཙེཝ སུལདྡྷཉྩཱཏིཔི སནྡྷཱཡ ཨེཝམཱཧ། ཨེཏྠ ཙ བྷགཝཏོ ཨནྡྷཀཱརཱལོཀསདྡསཝནསངྑཱཏཱནཾ ཨིདྡྷཱིནཾ མཧནྟཏཱཡ མཧིདྡྷིཀཏཱ, ཏཱསཾཡེཝ ཨནུཕརཎེན མཧཱནུབྷཱཝཏཱ ཝེདིཏབྦཱ། ཨུདཱཡཱིཏི ལཱལུ༹དཱཡིཏྠེརོ། སོ ཀིར པུབྦེ ཨུཔཊྛཱཀཏྠེརེ ཨཱགྷཱཏཾ བནྡྷིཏྭཱ ཙརཏི། ཏསྨཱ ཨིདཱནི ཨོཀཱསཾ ལབྷིཏྭཱ ཨིམསྨིཾ བུདྡྷསཱིཧནཱདཔརིཡོསཱནེ ཛལམཱནཾ དཱིཔསིཁཾ ནིབྦཱཔེནྟོ ཝིཡ ཙརནྟསྶ གོཎསྶ ཏུཎྜེ པཧཱརཾ དེནྟོ ཝིཡ བྷཏྟབྷརིཏཾ པཱཏིཾ ཨཝཀུཛྫནྟོ ཝིཡ ཐེརསྶ པསཱདབྷངྒཾ ཀརོནྟོ ཨེཝམཱཧ།
Imañca pana buddhasīhanādaṃ sutvā therassa abbhantare balavapīti uppannā, so pītivasena udānaṃ udānento lābhā vata metiādimāha. Tattha yassa me satthā evaṃmahiddhikoti yassa mayhaṃ satthā evaṃmahiddhiko, tassa mayhaṃ evaṃmahiddhikassa satthu paṭilābho lābhā ceva suladdhañcāti attho. Atha vā yvāhaṃ evarūpassa satthuno pattacīvaraṃ gahetvā vicarituṃ, pādaparikammaṃ piṭṭhiparikammaṃ kātuṃ, mukhadhovanaudakanhānodakāni dātuṃ, gandhakuṭipariveṇaṃ sammajjituṃ, uppannāya kaṅkhāya pañhaṃ pucchituṃ, madhuradhammakathañca sotuṃ labhāmi, ete sabbepi mayhaṃ lābhā ceva suladdhañcātipi sandhāya evamāha. Ettha ca bhagavato andhakārālokasaddasavanasaṅkhātānaṃ iddhīnaṃ mahantatāya mahiddhikatā, tāsaṃyeva anupharaṇena mahānubhāvatā veditabbā. Udāyīti lāḷudāyitthero. So kira pubbe upaṭṭhākatthere āghātaṃ bandhitvā carati. Tasmā idāni okāsaṃ labhitvā imasmiṃ buddhasīhanādapariyosāne jalamānaṃ dīpasikhaṃ nibbāpento viya carantassa goṇassa tuṇḍe pahāraṃ dento viya bhattabharitaṃ pātiṃ avakujjanto viya therassa pasādabhaṅgaṃ karonto evamāha.
ཨེཝཾ ཝུཏྟེ བྷགཝཱཏི ཨེཝཾ ཨུདཱཡིཏྠེརེན ཝུཏྟེ བྷགཝཱ ཡཐཱ ནཱམ པཔཱཏཏཊེ ཋཏྭཱ པཝེདྷམཱནཾ པུརིསཾ ཨེཀམནྟེ ཋིཏོ ཧིཏེསཱི པུརིསོ ‘‘ཨིཏོ ཨེཧི ཨིཏོ ཨེཧཱི’’ཏི པུནཔྤུནཾ ཝདེཡྻ, ཨེཝམེཝཾ ཨུདཱཡིཏྠེརཾ ཏསྨཱ ཝཙནཱ ནིཝཱརེནྟོ མཱ ཧེཝཾ ཨུདཱཡི, མཱ ཧེཝཾ ཨུདཱཡཱིཏི ཨཱཧ། ཏཏྠ ཧཱིཏི ནིཔཱཏམཏྟཾ, མཱ ཨེཝཾ ཨཝཙཱཏི ཨཏྠོ། མཧཱརཛྫནྟི ཙཀྐཝཏྟིརཛྫཾ། ནནུ ཙ སཏྠཱ ཨེཀསྶ སཱཝཀསྶ དྷམྨདེསནཱཡ ཨུཔྤནྣཔསཱདསྶ མཧཱནིསཾསཾ ཨཔརིཙྪིནྣཾ ཨཀཱསི, སོ ཀསྨཱ ཨིམསྶ བུདྡྷསཱིཧནཱདཾ ཨཱརབྦྷ ཨུཔྤནྣསྶ པསཱདསྶ ཨཱནིསཾསཾ པརིཙྪིནྡཏཱིཏི? ཨརིཡསཱཝཀསྶ ཨེཏྟཀཨཏྟབྷཱཝཔརིམཱཎཏྟཱ། དནྡྷཔཉྙོཔི ཧི སོཏཱཔནྣོ སཏྟཀྑཏྟུཾ དེཝེསུ ཙ མནུསྶེསུ ཙ ཨཏྟབྷཱཝཾ པཊིལབྷཏི, ཏེནསྶ གཏིཾ པརིཙྪིནྡནྟོ ཨེཝམཱཧ། དིཊྛེཝ དྷམྨེཏི ཨིམསྨིཾཡེཝ ཨཏྟབྷཱཝེ ཋཏྭཱ། པརིནིབྦཱཡིསྶཏཱིཏི ཨཔྤཙྩཡཔརིནིབྦཱནེན པརིནིབྦཱཡིསྶཏི། ཨིཏི ནིབྦཱནེན ཀཱུཊཾ གཎྷནྟོ ཨིམཾ སཱིཧནཱདསུཏྟཾ ནིཊྛཱཔེསཱིཏི།
Evaṃ vutte bhagavāti evaṃ udāyittherena vutte bhagavā yathā nāma papātataṭe ṭhatvā pavedhamānaṃ purisaṃ ekamante ṭhito hitesī puriso ‘‘ito ehi ito ehī’’ti punappunaṃ vadeyya, evamevaṃ udāyittheraṃ tasmā vacanā nivārento mā hevaṃ udāyi, mā hevaṃ udāyīti āha. Tattha hīti nipātamattaṃ, mā evaṃ avacāti attho. Mahārajjanti cakkavattirajjaṃ. Nanu ca satthā ekassa sāvakassa dhammadesanāya uppannapasādassa mahānisaṃsaṃ aparicchinnaṃ akāsi, so kasmā imassa buddhasīhanādaṃ ārabbha uppannassa pasādassa ānisaṃsaṃ paricchindatīti? Ariyasāvakassa ettakaattabhāvaparimāṇattā. Dandhapaññopi hi sotāpanno sattakkhattuṃ devesu ca manussesu ca attabhāvaṃ paṭilabhati, tenassa gatiṃ paricchindanto evamāha. Diṭṭheva dhammeti imasmiṃyeva attabhāve ṭhatvā. Parinibbāyissatīti appaccayaparinibbānena parinibbāyissati. Iti nibbānena kūṭaṃ gaṇhanto imaṃ sīhanādasuttaṃ niṭṭhāpesīti.
ཨཱནནྡཝགྒོ ཏཏིཡོ།
Ānandavaggo tatiyo.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡༠. ཙཱུལ༹ནིཀཱསུཏྟཾ • 10. Cūḷanikāsuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༠. ཙཱུལ༹ནིཀཱསུཏྟཝཎྞནཱ • 10. Cūḷanikāsuttavaṇṇanā
