| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[193] 3. சூளபது³மஜாதகவண்ணனா
[193] 3. Cūḷapadumajātakavaṇṇanā
அயமேவ ஸா அஹமபி ஸோ அனஞ்ஞோதி இத³ங் ஸத்தா² ஜேதவனே விஹரந்தோ உக்கண்டி²தபி⁴க்கு²ங் ஆரப்³ப⁴ கதே²ஸி. வத்து² உம்மாத³ந்தீஜாதகே (ஜா॰ 2.20.57 ஆத³யோ) ஆவிப⁴விஸ்ஸதி. ஸோ பன பி⁴க்கு² ஸத்தா²ரா ‘‘ஸச்சங் கிர த்வங், பி⁴க்கு², உக்கண்டி²தோ’’தி வுத்தே ‘‘ஸச்சங், ப⁴க³வா’’தி வத்வா ‘‘கேன பன த்வங் உக்கண்டா²பிதோ’’தி வுத்தே ‘‘அஹங், ப⁴ந்தே, ஏகங் அலங்கதபடியத்தங் மாதுகா³மங் தி³ஸ்வா கிலேஸானுவத்தகோ ஹுத்வா உக்கண்டி²தொம்ஹீ’’தி ஆஹ. அத² நங் ஸத்தா² ‘‘பி⁴க்கு², மாதுகா³மோ நாம அகதஞ்ஞூ மித்தது³ப்³பீ⁴ ப³ஹுமாயா, போராணகபண்டி³தாபி அத்தனோ த³க்கி²ணஜாணுலோஹிதங் பாயெத்வா யாவஜீவிததா³னம்பி த³த்வா மாதுகா³மஸ்ஸ சித்தங் ந லபி⁴ங்ஸூ’’தி வத்வா அதீதங் ஆஹரி.
Ayameva sā ahamapi so anaññoti idaṃ satthā jetavane viharanto ukkaṇṭhitabhikkhuṃ ārabbha kathesi. Vatthu ummādantījātake (jā. 2.20.57 ādayo) āvibhavissati. So pana bhikkhu satthārā ‘‘saccaṃ kira tvaṃ, bhikkhu, ukkaṇṭhito’’ti vutte ‘‘saccaṃ, bhagavā’’ti vatvā ‘‘kena pana tvaṃ ukkaṇṭhāpito’’ti vutte ‘‘ahaṃ, bhante, ekaṃ alaṅkatapaṭiyattaṃ mātugāmaṃ disvā kilesānuvattako hutvā ukkaṇṭhitomhī’’ti āha. Atha naṃ satthā ‘‘bhikkhu, mātugāmo nāma akataññū mittadubbhī bahumāyā, porāṇakapaṇḍitāpi attano dakkhiṇajāṇulohitaṃ pāyetvā yāvajīvitadānampi datvā mātugāmassa cittaṃ na labhiṃsū’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ தஸ்ஸ அக்³க³மஹேஸியா குச்சி²ம்ஹி நிப்³ப³த்தி, நாமக்³க³ஹணதி³வஸே சஸ்ஸ ‘‘பது³மகுமாரோ’’தி நாமங் அகங்ஸு. தஸ்ஸ அபரேன ச² கனிட்ட²பா⁴திகா அஹேஸுங். தே ஸத்தபி ஜனா அனுபுப்³பே³ன வுட்³டி⁴ப்பத்தா க⁴ராவாஸங் க³ஹெத்வா ரஞ்ஞோ ஸஹாயா விய விசரந்தி. அதே²கதி³வஸங் ராஜா ராஜங்க³ணங் ஓலோகெந்தோ டி²தோ தே மஹாபரிவாரேன ராஜுபட்டா²னங் ஆக³ச்ச²ந்தே தி³ஸ்வா ‘‘இமே மங் வதி⁴த்வா ரஜ்ஜம்பி க³ண்ஹெய்யு’’ந்தி ஆஸங்கங் உப்பாதெ³த்வா தே பக்கோஸாபெத்வா – ‘‘தாதா, தும்ஹே இமஸ்மிங் நக³ரே வஸிதுங் ந லப⁴த², அஞ்ஞத்த² க³ந்த்வா மம அச்சயேன ஆக³ந்த்வா குலஸந்தகங் ரஜ்ஜங் க³ண்ஹதா²’’தி ஆஹ. தே பிது வசனங் ஸம்படிச்சி²த்வா ரோதி³த்வா கந்தி³த்வா அத்தனோ அத்தனோ க⁴ரானி க³ந்த்வா பஜாபதியோ ஆதா³ய ‘‘யத்த² வா தத்த² வா க³ந்த்வா ஜீவிஸ்ஸாமா’’தி நக³ரா நிக்க²மித்வா மக்³க³ங் க³ச்ச²ந்தா ஏகங் கந்தாரங் பத்வா அன்னபானங் அலப⁴மானா கு²த³ங் அதி⁴வாஸேதுங் அஸக்கொந்தா ‘‘மயங் ஜீவமானா இத்தி²யோ லபி⁴ஸ்ஸாமா’’தி கனிட்ட²ஸ்ஸ ப⁴ரியங் மாரெத்வா தேரஸ கொட்டா²ஸே கத்வா மங்ஸங் கா²தி³ங்ஸு. போ³தி⁴ஸத்தோ அத்தனோ ச ப⁴ரியாய ச லத்³த⁴கொட்டா²ஸேஸு ஏகங் ட²பெத்வா ஏகங் த்³வேபி கா²தி³ங்ஸு. ஏவங் ச² தி³வஸே ச² இத்தி²யோ மாரெத்வா மங்ஸங் கா²தி³ங்ஸு.
Atīte bārāṇasiyaṃ brahmadatte rajjaṃ kārente bodhisatto tassa aggamahesiyā kucchimhi nibbatti, nāmaggahaṇadivase cassa ‘‘padumakumāro’’ti nāmaṃ akaṃsu. Tassa aparena cha kaniṭṭhabhātikā ahesuṃ. Te sattapi janā anupubbena vuḍḍhippattā gharāvāsaṃ gahetvā rañño sahāyā viya vicaranti. Athekadivasaṃ rājā rājaṅgaṇaṃ olokento ṭhito te mahāparivārena rājupaṭṭhānaṃ āgacchante disvā ‘‘ime maṃ vadhitvā rajjampi gaṇheyyu’’nti āsaṅkaṃ uppādetvā te pakkosāpetvā – ‘‘tātā, tumhe imasmiṃ nagare vasituṃ na labhatha, aññattha gantvā mama accayena āgantvā kulasantakaṃ rajjaṃ gaṇhathā’’ti āha. Te pitu vacanaṃ sampaṭicchitvā roditvā kanditvā attano attano gharāni gantvā pajāpatiyo ādāya ‘‘yattha vā tattha vā gantvā jīvissāmā’’ti nagarā nikkhamitvā maggaṃ gacchantā ekaṃ kantāraṃ patvā annapānaṃ alabhamānā khudaṃ adhivāsetuṃ asakkontā ‘‘mayaṃ jīvamānā itthiyo labhissāmā’’ti kaniṭṭhassa bhariyaṃ māretvā terasa koṭṭhāse katvā maṃsaṃ khādiṃsu. Bodhisatto attano ca bhariyāya ca laddhakoṭṭhāsesu ekaṃ ṭhapetvā ekaṃ dvepi khādiṃsu. Evaṃ cha divase cha itthiyo māretvā maṃsaṃ khādiṃsu.
போ³தி⁴ஸத்தோ பன தி³வஸே தி³வஸே ஏகேகங் ட²பெத்வா ச² கொட்டா²ஸே ட²பேஸி. ஸத்தமே தி³வஸே ‘‘போ³தி⁴ஸத்தஸ்ஸ ப⁴ரியங் மாரெஸ்ஸாமா’’தி வுத்தே போ³தி⁴ஸத்தோ தே ச² கொட்டா²ஸே தேஸங் த³த்வா ‘‘அஜ்ஜ தாவ இமே ச² கொட்டா²ஸே கா²த³த², ஸ்வே ஜானிஸ்ஸாமா’’தி வத்வா தேஸங் மங்ஸங் கா²தி³த்வா நித்³தா³யனகாலே ப⁴ரியங் க³ஹெத்வா பலாயி. ஸா தோ²கங் க³ந்த்வா ‘‘க³ந்துங் ந ஸக்கோமி, ஸாமீ’’தி ஆஹ. அத² நங் போ³தி⁴ஸத்தோ க²ந்தே⁴னாதா³ய அருணுக்³க³மனவேலாய கந்தாரா நிக்க²மி. ஸா ஸூரியே உக்³க³தே ‘‘பிபாஸிதாம்ஹி, ஸாமீ’’தி ஆஹ. போ³தி⁴ஸத்தோ ‘‘உத³கங் நத்தி², ப⁴த்³தே³’’தி வத்வா புனப்புனங் கதி²தே க²க்³கே³ன த³க்கி²ணஜாணுகங் பஹரித்வா – ‘‘ப⁴த்³தே³, பானீயங் நத்தி², இத³ங் பன மே த³க்கி²ணஜாணுலோஹிதங் பிவமானா நிஸீதா³ஹீ’’தி ஆஹ. ஸா ததா² அகாஸி. தே அனுபுப்³பே³ன மஹாக³ங்க³ங் பத்வா பிவித்வா ச ந்ஹத்வா ச ப²லாப²லங் கா²தி³த்வா பா²ஸுகட்டா²னே விஸ்ஸமித்வா ஏகஸ்மிங் க³ங்கா³னிவத்தனே அஸ்ஸமபத³ங் மாபெத்வா வாஸங் கப்பேஸுங்.
Bodhisatto pana divase divase ekekaṃ ṭhapetvā cha koṭṭhāse ṭhapesi. Sattame divase ‘‘bodhisattassa bhariyaṃ māressāmā’’ti vutte bodhisatto te cha koṭṭhāse tesaṃ datvā ‘‘ajja tāva ime cha koṭṭhāse khādatha, sve jānissāmā’’ti vatvā tesaṃ maṃsaṃ khāditvā niddāyanakāle bhariyaṃ gahetvā palāyi. Sā thokaṃ gantvā ‘‘gantuṃ na sakkomi, sāmī’’ti āha. Atha naṃ bodhisatto khandhenādāya aruṇuggamanavelāya kantārā nikkhami. Sā sūriye uggate ‘‘pipāsitāmhi, sāmī’’ti āha. Bodhisatto ‘‘udakaṃ natthi, bhadde’’ti vatvā punappunaṃ kathite khaggena dakkhiṇajāṇukaṃ paharitvā – ‘‘bhadde, pānīyaṃ natthi, idaṃ pana me dakkhiṇajāṇulohitaṃ pivamānā nisīdāhī’’ti āha. Sā tathā akāsi. Te anupubbena mahāgaṅgaṃ patvā pivitvā ca nhatvā ca phalāphalaṃ khāditvā phāsukaṭṭhāne vissamitvā ekasmiṃ gaṅgānivattane assamapadaṃ māpetvā vāsaṃ kappesuṃ.
அதே²கதி³வஸங் உபரிக³ங்கா³ய ராஜாபராதி⁴கங் சோரங் ஹத்த²பாதே³ ச கண்ணனாஸஞ்ச சி²ந்தி³த்வா ஏகஸ்மிங் அம்ப³ணகே நிபஜ்ஜாபெத்வா மஹாக³ங்கா³ய பவாஹேஸுங். ஸோ மஹந்தங் அட்டஸ்ஸரங் கரொந்தோ தங் டா²னங் பாபுணி. போ³தி⁴ஸத்தோ தஸ்ஸ கருணங் பரிதே³விதஸத்³த³ங் ஸுத்வா ‘‘து³க்க²ப்பத்தோ ஸத்தோ மயி டி²தே மா நஸ்ஸீ’’தி க³ங்கா³தீரங் க³ந்த்வா தங் உத்தாரெத்வா அஸ்ஸமபத³ங் ஆனெத்வா காஸாவதோ⁴வனலேபனாதீ³ஹி வணபடிகம்மங் அகாஸி. ப⁴ரியா பனஸ்ஸ ‘‘ஏவரூபங் நாம து³ஸ்ஸீலங் குண்ட²ங் க³ங்கா³ய ஆவாஹெத்வா படிஜக்³க³ந்தோ விசரதீ’’தி வத்வா தங் குண்ட²ங் ஜிகு³ச்ச²மானா நிட்டு²ப⁴ந்தீ விசரதி. போ³தி⁴ஸத்தோ தஸ்ஸ வணேஸு ஸங்விருள்ஹேஸு ப⁴ரியாய ஸத்³தி⁴ங் தங் அஸ்ஸமபதே³யேவ ட²பெத்வா அடவிதோ ப²லாப²லானி ஆஹரித்வா தஞ்ச ப⁴ரியஞ்ச போஸேஸி. தேஸு ஏவங் வஸந்தேஸு ஸா இத்தீ² ஏதஸ்மிங் குண்டே² படிப³த்³த⁴சித்தா ஹுத்வா தேன ஸத்³தி⁴ங் அனாசாரங் சரித்வா ஏகேனுபாயேன போ³தி⁴ஸத்தங் மாரேதுகாமா ஹுத்வா ஏவமாஹ – ‘‘ஸாமி, அஹங் தும்ஹாகங் அங்ஸே நிஸீதி³த்வா கந்தாரா நிக்க²மமானா ஏகங் பப்³ப³தங் ஓலோகெத்வா அய்யே பப்³ப³தம்ஹி நிப்³ப³த்ததே³வதே ‘ஸசே அஹங் ஸாமிகேன ஸத்³தி⁴ங் அரோகா³ ஜீவிதங் லபி⁴ஸ்ஸாமி, ப³லிகம்மங் தே கரிஸ்ஸாமீ’தி ஆயாசிங், ஸா மங் இதா³னி உத்தாஸேதி, கரோமஸ்ஸா ப³லிகம்ம’’ந்தி. போ³தி⁴ஸத்தோ தங் மாயங் அஜானந்தோ ‘‘ஸாதூ⁴’’தி ஸம்படிச்சி²த்வா ப³லிகம்மங் ஸஜ்ஜெத்வா தாய ப³லிபா⁴ஜனங் கா³ஹாபெத்வா பப்³ப³தமத்த²கங் அபி⁴ருஹி. அத² நங் ஸா ஏவமாஹ – ‘‘ஸாமி, தே³வதாயபி த்வஞ்ஞேவ உத்தமதே³வதா, பட²மங் தாவ தங் வனபுப்பே²ஹி பூஜெத்வா பத³க்கி²ணங் கத்வா வந்தி³த்வா பச்சா² தே³வதாய ப³லிகம்மங் கரிஸ்ஸாமீ’’தி. ஸா போ³தி⁴ஸத்தங் பபாதாபி⁴முக²ங் ட²பெத்வா வனபுப்பே²ஹி பூஜெத்வா பத³க்கி²ணங் கத்வா வந்தி³துகாமா விய ஹுத்வா பிட்டி²பஸ்ஸே ட²த்வா பிட்டி²யங் பஹரித்வா பபாதே பாதெத்வா ‘‘தி³ட்டா² மே பச்சாமித்தஸ்ஸ பிட்டீ²’’தி துட்ட²மானஸா பப்³ப³தா ஓரோஹித்வா குண்ட²ஸ்ஸ ஸந்திகங் அக³மாஸி.
Athekadivasaṃ uparigaṅgāya rājāparādhikaṃ coraṃ hatthapāde ca kaṇṇanāsañca chinditvā ekasmiṃ ambaṇake nipajjāpetvā mahāgaṅgāya pavāhesuṃ. So mahantaṃ aṭṭassaraṃ karonto taṃ ṭhānaṃ pāpuṇi. Bodhisatto tassa karuṇaṃ paridevitasaddaṃ sutvā ‘‘dukkhappatto satto mayi ṭhite mā nassī’’ti gaṅgātīraṃ gantvā taṃ uttāretvā assamapadaṃ ānetvā kāsāvadhovanalepanādīhi vaṇapaṭikammaṃ akāsi. Bhariyā panassa ‘‘evarūpaṃ nāma dussīlaṃ kuṇṭhaṃ gaṅgāya āvāhetvā paṭijagganto vicaratī’’ti vatvā taṃ kuṇṭhaṃ jigucchamānā niṭṭhubhantī vicarati. Bodhisatto tassa vaṇesu saṃviruḷhesu bhariyāya saddhiṃ taṃ assamapadeyeva ṭhapetvā aṭavito phalāphalāni āharitvā tañca bhariyañca posesi. Tesu evaṃ vasantesu sā itthī etasmiṃ kuṇṭhe paṭibaddhacittā hutvā tena saddhiṃ anācāraṃ caritvā ekenupāyena bodhisattaṃ māretukāmā hutvā evamāha – ‘‘sāmi, ahaṃ tumhākaṃ aṃse nisīditvā kantārā nikkhamamānā ekaṃ pabbataṃ oloketvā ayye pabbatamhi nibbattadevate ‘sace ahaṃ sāmikena saddhiṃ arogā jīvitaṃ labhissāmi, balikammaṃ te karissāmī’ti āyāciṃ, sā maṃ idāni uttāseti, karomassā balikamma’’nti. Bodhisatto taṃ māyaṃ ajānanto ‘‘sādhū’’ti sampaṭicchitvā balikammaṃ sajjetvā tāya balibhājanaṃ gāhāpetvā pabbatamatthakaṃ abhiruhi. Atha naṃ sā evamāha – ‘‘sāmi, devatāyapi tvaññeva uttamadevatā, paṭhamaṃ tāva taṃ vanapupphehi pūjetvā padakkhiṇaṃ katvā vanditvā pacchā devatāya balikammaṃ karissāmī’’ti. Sā bodhisattaṃ papātābhimukhaṃ ṭhapetvā vanapupphehi pūjetvā padakkhiṇaṃ katvā vanditukāmā viya hutvā piṭṭhipasse ṭhatvā piṭṭhiyaṃ paharitvā papāte pātetvā ‘‘diṭṭhā me paccāmittassa piṭṭhī’’ti tuṭṭhamānasā pabbatā orohitvā kuṇṭhassa santikaṃ agamāsi.
போ³தி⁴ஸத்தோபி பபாதானுஸாரேன பப்³ப³தா பதந்தோ உது³ம்ப³ரருக்க²மத்த²கே ஏகஸ்மிங் அகண்டகே பத்தஸஞ்ச²ன்னே கு³ம்பே³ லக்³கி³, ஹெட்டா²பப்³ப³தங் பன ஓரோஹிதுங் ந ஸக்கா. ஸோ உது³ம்ப³ரப²லானி கா²தி³த்வா ஸாக²ந்தரே நிஸீதி³. அதே²கோ மஹாஸரீரோ கோ³த⁴ராஜா ஹெட்டா²பப்³ப³தபாத³தோ அபி⁴ருஹித்வா தஸ்மிங் உது³ம்ப³ரப²லானி கா²த³தி. ஸோ தங் தி³வஸங் போ³தி⁴ஸத்தங் தி³ஸ்வா பலாயி, புனதி³வஸே ஆக³ந்த்வா ஏகஸ்மிங் பஸ்ஸே ப²லானி கா²தி³த்வா பக்காமி. ஸோ ஏவங் புனப்புனங் ஆக³ச்ச²ந்தோ போ³தி⁴ஸத்தேன ஸத்³தி⁴ங் விஸ்ஸாஸங் ஆபஜ்ஜித்வா ‘‘த்வங் இமங் டா²னங் கேன காரணேன ஆக³தோஸீ’’தி புச்சி²த்வா ‘‘இமினா நாம காரணேனா’’தி வுத்தே ‘‘தேன ஹி மா பா⁴யீ’’தி வத்வா போ³தி⁴ஸத்தங் அத்தனோ பிட்டி²யங் நிபஜ்ஜாபெத்வா ஓதாரெத்வா அரஞ்ஞதோ நிக்க²மித்வா மஹாமக்³கே³ ட²பெத்வா ‘‘த்வங் இமினா மக்³கே³ன க³ச்சா²ஹீ’’தி உய்யோஜெத்வா அரஞ்ஞமேவ பாவிஸி. போ³தி⁴ஸத்தோ ஏகங் கா³மகங் க³ந்த்வா தத்தே²வ வஸந்தோ பிது காலகதபா⁴வங் ஸுத்வா பா³ராணஸிங் க³ந்த்வா குலஸந்தகே ரஜ்ஜே பதிட்டா²ய பது³மராஜா நாம ஹுத்வா த³ஸ ராஜத⁴ம்மே அகோபெத்வா த⁴ம்மேன ரஜ்ஜங் காரெந்தோ சதூஸு நக³ரத்³வாரேஸு நக³ரமஜ்ஜே² நிவேஸனத்³வாரேதி ச² தா³னஸாலாயோ காரெத்வா தே³வஸிகங் ச² ஸதஸஹஸ்ஸானி விஸ்ஸஜ்ஜெத்வா தா³னங் அதா³ஸி.
Bodhisattopi papātānusārena pabbatā patanto udumbararukkhamatthake ekasmiṃ akaṇṭake pattasañchanne gumbe laggi, heṭṭhāpabbataṃ pana orohituṃ na sakkā. So udumbaraphalāni khāditvā sākhantare nisīdi. Atheko mahāsarīro godharājā heṭṭhāpabbatapādato abhiruhitvā tasmiṃ udumbaraphalāni khādati. So taṃ divasaṃ bodhisattaṃ disvā palāyi, punadivase āgantvā ekasmiṃ passe phalāni khāditvā pakkāmi. So evaṃ punappunaṃ āgacchanto bodhisattena saddhiṃ vissāsaṃ āpajjitvā ‘‘tvaṃ imaṃ ṭhānaṃ kena kāraṇena āgatosī’’ti pucchitvā ‘‘iminā nāma kāraṇenā’’ti vutte ‘‘tena hi mā bhāyī’’ti vatvā bodhisattaṃ attano piṭṭhiyaṃ nipajjāpetvā otāretvā araññato nikkhamitvā mahāmagge ṭhapetvā ‘‘tvaṃ iminā maggena gacchāhī’’ti uyyojetvā araññameva pāvisi. Bodhisatto ekaṃ gāmakaṃ gantvā tattheva vasanto pitu kālakatabhāvaṃ sutvā bārāṇasiṃ gantvā kulasantake rajje patiṭṭhāya padumarājā nāma hutvā dasa rājadhamme akopetvā dhammena rajjaṃ kārento catūsu nagaradvāresu nagaramajjhe nivesanadvāreti cha dānasālāyo kāretvā devasikaṃ cha satasahassāni vissajjetvā dānaṃ adāsi.
ஸாபி கோ² இத்தீ² தங் குண்ட²ங் க²ந்தே⁴ நிஸீதா³பெத்வா அரஞ்ஞா நிக்க²மித்வா மனுஸ்ஸபதே² பி⁴க்க²ங் சரமானா யாகு³ப⁴த்தங் ஸங்ஹரித்வா தங் குண்ட²ங் போஸேஸி. மனுஸ்ஸா ‘‘அயங் தே கிங் ஹோதீ’’தி புச்சி²யமானா ‘‘அஹங் ஏதஸ்ஸ மாதுலதீ⁴தா, பிதுச்சா²புத்தோ மே ஏஸோ, ஏதஸ்ஸேவ மங் அத³ங்ஸு, ஸாஹங் வஜ்ஜ²ப்பத்தம்பி அத்தனோ ஸாமிகங் உக்கி²பித்வா பரிஹரந்தீ பி⁴க்க²ங் சரித்வா போஸேமீ’’தி. மனுஸ்ஸா ‘‘அயங் பதிப்³ப³தா’’தி ததோ பட்டா²ய ப³ஹுதரங் யாகு³ப⁴த்தங் அத³ங்ஸு. அபரே பன ஜனா ஏவமாஹங்ஸு – ‘‘த்வங் மா ஏவங் விசரி, பது³மராஜா பா³ராணஸியங் ரஜ்ஜங் காரேதி, ஸகலஜம்பு³தீ³பங் ஸங்கோ²பெ⁴த்வா தா³னங் தே³தி, ஸோ தங் தி³ஸ்வா துஸ்ஸிஸ்ஸதி, துட்டோ² தே ப³ஹுங் த⁴னங் த³ஸ்ஸதி, தவ ஸாமிகங் இதே⁴வ நிஸீதா³பெத்வா க³ச்சா²’’தி தி²ரங் கத்வா வெத்தபச்சி²ங் அத³ங்ஸு. ஸா அனாசாரா தங் குண்ட²ங் வெத்தபச்சி²யங் நிஸீதா³பெத்வா பச்சி²ங் உக்கி²பித்வா பா³ராணஸிங் க³ந்த்வா தா³னஸாலாஸு பு⁴ஞ்ஜமானா விசரதி. போ³தி⁴ஸத்தோ அலங்கதஹத்தி²க்க²ந்த⁴வரக³தோ தா³னக்³க³ங் க³ந்த்வா அட்ட²ன்னங் வா த³ஸன்னங் வா ஸஹத்தா² தா³னங் த³த்வா புன கே³ஹங் க³ச்ச²தி . ஸா அனாசாரா தங் குண்ட²ங் பச்சி²யங் நிஸீதா³பெத்வா பச்சி²ங் உக்கி²பித்வா தஸ்ஸ க³மனமக்³கே³ அட்டா²ஸி.
Sāpi kho itthī taṃ kuṇṭhaṃ khandhe nisīdāpetvā araññā nikkhamitvā manussapathe bhikkhaṃ caramānā yāgubhattaṃ saṃharitvā taṃ kuṇṭhaṃ posesi. Manussā ‘‘ayaṃ te kiṃ hotī’’ti pucchiyamānā ‘‘ahaṃ etassa mātuladhītā, pitucchāputto me eso, etasseva maṃ adaṃsu, sāhaṃ vajjhappattampi attano sāmikaṃ ukkhipitvā pariharantī bhikkhaṃ caritvā posemī’’ti. Manussā ‘‘ayaṃ patibbatā’’ti tato paṭṭhāya bahutaraṃ yāgubhattaṃ adaṃsu. Apare pana janā evamāhaṃsu – ‘‘tvaṃ mā evaṃ vicari, padumarājā bārāṇasiyaṃ rajjaṃ kāreti, sakalajambudīpaṃ saṅkhobhetvā dānaṃ deti, so taṃ disvā tussissati, tuṭṭho te bahuṃ dhanaṃ dassati, tava sāmikaṃ idheva nisīdāpetvā gacchā’’ti thiraṃ katvā vettapacchiṃ adaṃsu. Sā anācārā taṃ kuṇṭhaṃ vettapacchiyaṃ nisīdāpetvā pacchiṃ ukkhipitvā bārāṇasiṃ gantvā dānasālāsu bhuñjamānā vicarati. Bodhisatto alaṅkatahatthikkhandhavaragato dānaggaṃ gantvā aṭṭhannaṃ vā dasannaṃ vā sahatthā dānaṃ datvā puna gehaṃ gacchati . Sā anācārā taṃ kuṇṭhaṃ pacchiyaṃ nisīdāpetvā pacchiṃ ukkhipitvā tassa gamanamagge aṭṭhāsi.
ராஜா தி³ஸ்வா ‘‘கிங் ஏத’’ந்தி புச்சி². ‘‘ஏகா, தே³வ, பதிப்³ப³தா’’தி. அத² நங் பக்கோஸாபெத்வா ஸஞ்ஜானித்வா குண்ட²ங் பச்சி²யா நீஹராபெத்வா ‘‘அயங் தே கிங் ஹோதீ’’தி புச்சி². ஸா ‘‘பிதுச்சா²புத்தோ மே, தே³வ, குலத³த்திகோ ஸாமிகோ’’தி ஆஹ. மனுஸ்ஸா தங் அந்தரங் அஜானந்தா ‘‘அஹோ பதிப்³ப³தா’’திஆதீ³னி வத்வா தங் அனாசாரித்தி²ங் வண்ணயிங்ஸு. புன ராஜா ‘‘அயங் தே குண்டோ² குலத³த்திகோ ஸாமிகோ’’தி புச்சி². ஸா ராஜானங் அஸஞ்ஜானந்தீ ‘‘ஆம, தே³வா’’தி ஸூரா ஹுத்வா கதே²ஸி. அத² நங் ராஜா ‘‘கிங் ஏஸ பா³ராணஸிரஞ்ஞோ புத்தோ, நனு த்வங் பது³மகுமாரஸ்ஸ ப⁴ரியா அஸுகரஞ்ஞோ தீ⁴தா, அஸுகா நாம மம ஜாணுலோஹிதங் பிவித்வா இமஸ்மிங் குண்டே² படிப³த்³த⁴சித்தா மங் பபாதே பாதேஸி. ஸா இதா³னி த்வங் நலாடேன மச்சுங் க³ஹெத்வா மங் ‘மதோ’தி மஞ்ஞமானா இமங் டா²னங் ஆக³தா, நனு அஹங் ஜீவாமீ’’தி வத்வா அமச்சே ஆமந்தெத்வா ‘‘போ⁴, அமச்சா நனு சாஹங் தும்ஹேஹி புட்டோ² ஏவங் கதே²ஸிங் ‘மம கனிட்ட²பா⁴திகா ச² இத்தி²யோ மாரெத்வா மங்ஸங் கா²தி³ங்ஸு, அஹங் பன மய்ஹங் ப⁴ரியங் அரோக³ங் கத்வா க³ங்கா³தீரங் நெத்வா அஸ்ஸமபதே³ வஸந்தோ ஏகங் வஜ்ஜ²ப்பத்தங் குண்ட²ங் உத்தாரெத்வா படிஜக்³கி³ங். ஸா இத்தீ² ஏதஸ்மிங் படிப³த்³த⁴சித்தா மங் பப்³ப³தபாதே³ பாதேஸி. அஹங் அத்தனோ மெத்தசித்ததாய ஜீவிதங் லபி⁴’ந்தி. யாய அஹங் பப்³ப³தா பாதிதோ, ந ஸா அஞ்ஞா, ஏஸா து³ஸ்ஸீலா, ஸோபி வஜ்ஜ²ப்பத்தோ குண்டோ² ந அஞ்ஞோ, அயமேவா’’தி வத்வா இமா கா³தா² அவோச –
Rājā disvā ‘‘kiṃ eta’’nti pucchi. ‘‘Ekā, deva, patibbatā’’ti. Atha naṃ pakkosāpetvā sañjānitvā kuṇṭhaṃ pacchiyā nīharāpetvā ‘‘ayaṃ te kiṃ hotī’’ti pucchi. Sā ‘‘pitucchāputto me, deva, kuladattiko sāmiko’’ti āha. Manussā taṃ antaraṃ ajānantā ‘‘aho patibbatā’’tiādīni vatvā taṃ anācāritthiṃ vaṇṇayiṃsu. Puna rājā ‘‘ayaṃ te kuṇṭho kuladattiko sāmiko’’ti pucchi. Sā rājānaṃ asañjānantī ‘‘āma, devā’’ti sūrā hutvā kathesi. Atha naṃ rājā ‘‘kiṃ esa bārāṇasirañño putto, nanu tvaṃ padumakumārassa bhariyā asukarañño dhītā, asukā nāma mama jāṇulohitaṃ pivitvā imasmiṃ kuṇṭhe paṭibaddhacittā maṃ papāte pātesi. Sā idāni tvaṃ nalāṭena maccuṃ gahetvā maṃ ‘mato’ti maññamānā imaṃ ṭhānaṃ āgatā, nanu ahaṃ jīvāmī’’ti vatvā amacce āmantetvā ‘‘bho, amaccā nanu cāhaṃ tumhehi puṭṭho evaṃ kathesiṃ ‘mama kaniṭṭhabhātikā cha itthiyo māretvā maṃsaṃ khādiṃsu, ahaṃ pana mayhaṃ bhariyaṃ arogaṃ katvā gaṅgātīraṃ netvā assamapade vasanto ekaṃ vajjhappattaṃ kuṇṭhaṃ uttāretvā paṭijaggiṃ. Sā itthī etasmiṃ paṭibaddhacittā maṃ pabbatapāde pātesi. Ahaṃ attano mettacittatāya jīvitaṃ labhi’nti. Yāya ahaṃ pabbatā pātito, na sā aññā, esā dussīlā, sopi vajjhappatto kuṇṭho na añño, ayamevā’’ti vatvā imā gāthā avoca –
85.
85.
‘‘அயமேவ ஸா அஹமபி ஸோ அனஞ்ஞோ, அயமேவ ஸோ ஹத்த²ச்சி²ன்னோ அனஞ்ஞோ;
‘‘Ayameva sā ahamapi so anañño, ayameva so hatthacchinno anañño;
யமாஹ ‘கோமாரபதீ மம’ந்தி, வஜ்ஜி²த்தி²யோ நத்தி² இத்தீ²ஸு ஸச்சங்.
Yamāha ‘komārapatī mama’nti, vajjhitthiyo natthi itthīsu saccaṃ.
86.
86.
‘‘இமஞ்ச ஜம்மங் முஸலேன ஹந்த்வா, லுத்³த³ங் ச²வங் பரதா³ரூபஸேவிங்;
‘‘Imañca jammaṃ musalena hantvā, luddaṃ chavaṃ paradārūpaseviṃ;
இமிஸ்ஸா ச நங் பாபபதிப்³ப³தாய, ஜீவந்தியா சி²ந்த³த² கண்ணனாஸ’’ந்தி.
Imissā ca naṃ pāpapatibbatāya, jīvantiyā chindatha kaṇṇanāsa’’nti.
தத்த² யமாஹ கோமாரபதீ மமந்தி யங் ஏஸா ‘‘அயங் மே, கோமாரபதி, குலத³த்திகோ ஸாமிகோ’’தி ஆஹ, அயமேவ ஸோ, ந அஞ்ஞோ. ‘‘யமாஹு , கோமாரபதீ’’திபி பாடோ². அயமேவ ஹி பொத்த²கேஸு லிகி²தோ, தஸ்ஸாபி அயமேவத்தோ², வசனவிபல்லாஸோ பனெத்த² வேதி³தப்³போ³. யஞ்ஹி ரஞ்ஞா வுத்தங், ததே³வ இத⁴ ஆக³தங். வஜ்ஜி²த்தி²யோதி இத்தி²யோ நாம வஜ்ஜா² வதி⁴தப்³பா³ ஏவ. நத்தி² இத்தீ²ஸு ஸச்சந்தி ஏதாஸு ஸபா⁴வோ நாமேகோ நத்தி². ‘‘இமஞ்ச ஜம்ம’’ந்திஆதி³ த்³வின்னம்பி தேஸங் த³ண்டா³ணாபனவஸேன வுத்தங். தத்த² ஜம்மந்தி லாமகங். முஸலேன ஹந்த்வாதி முஸலேன ஹனித்வா போதெ²த்வா அட்டீ²னி ப⁴ஞ்ஜித்வா சுண்ணவிசுண்ணங் கத்வா. லுத்³த³ந்தி தா³ருணங். ச²வந்தி கு³ணாபா⁴வேன நிஜ்ஜீவங் மதஸதி³ஸங். இமிஸ்ஸா ச நந்தி எத்த² நந்தி நிபாதமத்தங், இமிஸ்ஸா ச பாபபதிப்³ப³தாய அனாசாராய து³ஸ்ஸீலாய ஜீவந்தியாவ கண்ணனாஸங் சி²ந்த³தா²தி அத்தோ².
Tattha yamāha komārapatī mamanti yaṃ esā ‘‘ayaṃ me, komārapati, kuladattiko sāmiko’’ti āha, ayameva so, na añño. ‘‘Yamāhu , komārapatī’’tipi pāṭho. Ayameva hi potthakesu likhito, tassāpi ayamevattho, vacanavipallāso panettha veditabbo. Yañhi raññā vuttaṃ, tadeva idha āgataṃ. Vajjhitthiyoti itthiyo nāma vajjhā vadhitabbā eva. Natthi itthīsu saccanti etāsu sabhāvo nāmeko natthi. ‘‘Imañca jamma’’ntiādi dvinnampi tesaṃ daṇḍāṇāpanavasena vuttaṃ. Tattha jammanti lāmakaṃ. Musalena hantvāti musalena hanitvā pothetvā aṭṭhīni bhañjitvā cuṇṇavicuṇṇaṃ katvā. Luddanti dāruṇaṃ. Chavanti guṇābhāvena nijjīvaṃ matasadisaṃ. Imissāca nanti ettha nanti nipātamattaṃ, imissā ca pāpapatibbatāya anācārāya dussīlāya jīvantiyāva kaṇṇanāsaṃ chindathāti attho.
போ³தி⁴ஸத்தோ கோத⁴ங் அதி⁴வாஸேதுங் அஸக்கொந்தோ ஏவங் தேஸங் த³ண்ட³ங் ஆணாபெத்வாபி ந ததா² காரேஸி . கோபங் பன மந்த³ங் கத்வா யதா² ஸா பச்சி²ங் ஸீஸதோ ஓரோபேதுங் ந ஸக்கோதி, ஏவங் கா³ள்ஹதரங் ப³ந்தா⁴பெத்வா குண்ட²ங் தத்த² பக்கி²பாபெத்வா அத்தனோ விஜிதா நீஹராபேஸி.
Bodhisatto kodhaṃ adhivāsetuṃ asakkonto evaṃ tesaṃ daṇḍaṃ āṇāpetvāpi na tathā kāresi . Kopaṃ pana mandaṃ katvā yathā sā pacchiṃ sīsato oropetuṃ na sakkoti, evaṃ gāḷhataraṃ bandhāpetvā kuṇṭhaṃ tattha pakkhipāpetvā attano vijitā nīharāpesi.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி – ஸச்சபரியோஸானே உக்கண்டி²தபி⁴க்கு² ஸோதாபத்திப²லே பதிட்ட²ஹி. ‘‘ததா³ ச² பா⁴தரோ அஞ்ஞதரா தே²ரா அஹேஸுங், ப⁴ரியா சிஞ்சமாணவிகா, குண்டோ² தே³வத³த்தோ, கோ³த⁴ராஜா ஆனந்தோ³, பது³மராஜா பன அஹமேவ அஹோஸி’’ந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi – saccapariyosāne ukkaṇṭhitabhikkhu sotāpattiphale patiṭṭhahi. ‘‘Tadā cha bhātaro aññatarā therā ahesuṃ, bhariyā ciñcamāṇavikā, kuṇṭho devadatto, godharājā ānando, padumarājā pana ahameva ahosi’’nti.
சூளபது³மஜாதகவண்ணனா ததியா.
Cūḷapadumajātakavaṇṇanā tatiyā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 193. சூளபது³மஜாதகங் • 193. Cūḷapadumajātakaṃ
