| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
১০. চূল়পুণ্ণমসুত্তং
10. Cūḷapuṇṇamasuttaṃ
৯১. এৰং মে সুতং – একং সমযং ভগৰা সাৰত্থিযং ৰিহরতি পুব্বারামে মিগারমাতুপাসাদে। তেন খো পন সমযেন ভগৰা তদহুপোসথে পন্নরসে পুণ্ণায পুণ্ণমায রত্তিযা ভিক্খুসঙ্ঘপরিৰুতো অব্ভোকাসে নিসিন্নো হোতি। অথ খো ভগৰা তুণ্হীভূতং তুণ্হীভূতং ভিক্খুসঙ্ঘং অনুৰিলোকেত্ৰা ভিক্খূ আমন্তেসি – ‘‘জানেয্য নু খো, ভিক্খৰে, অসপ্পুরিসো অসপ্পুরিসং – ‘অসপ্পুরিসো অযং ভৰ’’’ন্তি? ‘‘নো হেতং, ভন্তে’’। ‘‘সাধু, ভিক্খৰে; অট্ঠানমেতং, ভিক্খৰে, অনৰকাসো যং অসপ্পুরিসো অসপ্পুরিসং জানেয্য – ‘অসপ্পুরিসো অযং ভৰ’ন্তি। জানেয্য পন, ভিক্খৰে, অসপ্পুরিসো সপ্পুরিসং – ‘সপ্পুরিসো অযং ভৰ’’’ন্তি? ‘‘নো হেতং, ভন্তে’’। ‘‘সাধু, ভিক্খৰে; এতম্পি খো, ভিক্খৰে, অট্ঠানং অনৰকাসো যং অসপ্পুরিসো সপ্পুরিসং জানেয্য – ‘সপ্পুরিসো অযং ভৰ’ন্তি। অসপ্পুরিসো, ভিক্খৰে, অস্সদ্ধম্মসমন্নাগতো হোতি, অসপ্পুরিসভত্তি 1 হোতি, অসপ্পুরিসচিন্তী হোতি, অসপ্পুরিসমন্তী হোতি, অসপ্পুরিসৰাচো হোতি, অসপ্পুরিসকম্মন্তো হোতি, অসপ্পুরিসদিট্ঠি 2 হোতি; অসপ্পুরিসদানং দেতি’’।
91. Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena bhagavā tadahuposathe pannarase puṇṇāya puṇṇamāya rattiyā bhikkhusaṅghaparivuto abbhokāse nisinno hoti. Atha kho bhagavā tuṇhībhūtaṃ tuṇhībhūtaṃ bhikkhusaṅghaṃ anuviloketvā bhikkhū āmantesi – ‘‘jāneyya nu kho, bhikkhave, asappuriso asappurisaṃ – ‘asappuriso ayaṃ bhava’’’nti? ‘‘No hetaṃ, bhante’’. ‘‘Sādhu, bhikkhave; aṭṭhānametaṃ, bhikkhave, anavakāso yaṃ asappuriso asappurisaṃ jāneyya – ‘asappuriso ayaṃ bhava’nti. Jāneyya pana, bhikkhave, asappuriso sappurisaṃ – ‘sappuriso ayaṃ bhava’’’nti? ‘‘No hetaṃ, bhante’’. ‘‘Sādhu, bhikkhave; etampi kho, bhikkhave, aṭṭhānaṃ anavakāso yaṃ asappuriso sappurisaṃ jāneyya – ‘sappuriso ayaṃ bhava’nti. Asappuriso, bhikkhave, assaddhammasamannāgato hoti, asappurisabhatti 3 hoti, asappurisacintī hoti, asappurisamantī hoti, asappurisavāco hoti, asappurisakammanto hoti, asappurisadiṭṭhi 4 hoti; asappurisadānaṃ deti’’.
‘‘কথঞ্চ, ভিক্খৰে, অসপ্পুরিসো অস্সদ্ধম্মসমন্নাগতো হোতি? ইধ, ভিক্খৰে, অসপ্পুরিসো অস্সদ্ধো হোতি, অহিরিকো হোতি, অনোত্তপ্পী হোতি, অপ্পস্সুতো হোতি , কুসীতো হোতি, মুট্ঠস্সতি হোতি, দুপ্পঞ্ঞো হোতি। এৰং খো, ভিক্খৰে, অসপ্পুরিসো অস্সদ্ধম্মসমন্নাগতো হোতি।
‘‘Kathañca, bhikkhave, asappuriso assaddhammasamannāgato hoti? Idha, bhikkhave, asappuriso assaddho hoti, ahiriko hoti, anottappī hoti, appassuto hoti , kusīto hoti, muṭṭhassati hoti, duppañño hoti. Evaṃ kho, bhikkhave, asappuriso assaddhammasamannāgato hoti.
‘‘কথঞ্চ, ভিক্খৰে, অসপ্পুরিসো অসপ্পুরিসভত্তি হোতি? ইধ, ভিক্খৰে, অসপ্পুরিসস্স যে তে সমণব্রাহ্মণা অস্সদ্ধা অহিরিকা অনোত্তপ্পিনো অপ্পস্সুতা কুসীতা মুট্ঠস্সতিনো দুপ্পঞ্ঞা ত্যাস্স মিত্তা হোন্তি তে সহাযা। এৰং খো, ভিক্খৰে, অসপ্পুরিসো অসপ্পুরিসভত্তি হোতি।
‘‘Kathañca, bhikkhave, asappuriso asappurisabhatti hoti? Idha, bhikkhave, asappurisassa ye te samaṇabrāhmaṇā assaddhā ahirikā anottappino appassutā kusītā muṭṭhassatino duppaññā tyāssa mittā honti te sahāyā. Evaṃ kho, bhikkhave, asappuriso asappurisabhatti hoti.
‘‘কথঞ্চ, ভিক্খৰে, অসপ্পুরিসো অসপ্পুরিসচিন্তী হোতি? ইধ, ভিক্খৰে, অসপ্পুরিসো অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি। এৰং খো, ভিক্খৰে, অসপ্পুরিসো অসপ্পুরিসচিন্তী হোতি।
‘‘Kathañca, bhikkhave, asappuriso asappurisacintī hoti? Idha, bhikkhave, asappuriso attabyābādhāyapi ceteti, parabyābādhāyapi ceteti, ubhayabyābādhāyapi ceteti. Evaṃ kho, bhikkhave, asappuriso asappurisacintī hoti.
‘‘কথঞ্চ, ভিক্খৰে, অসপ্পুরিসো অসপ্পুরিসমন্তী হোতি? ইধ, ভিক্খৰে, অসপ্পুরিসো অত্তব্যাবাধাযপি মন্তেতি, পরব্যাবাধাযপি মন্তেতি, উভযব্যাবাধাযপি মন্তেতি। এৰং খো, ভিক্খৰে, অসপ্পুরিসো অসপ্পুরিসমন্তী হোতি।
‘‘Kathañca, bhikkhave, asappuriso asappurisamantī hoti? Idha, bhikkhave, asappuriso attabyābādhāyapi manteti, parabyābādhāyapi manteti, ubhayabyābādhāyapi manteti. Evaṃ kho, bhikkhave, asappuriso asappurisamantī hoti.
‘‘কথঞ্চ, ভিক্খৰে, অসপ্পুরিসো অসপ্পুরিসৰাচো হোতি? ইধ, ভিক্খৰে, অসপ্পুরিসো মুসাৰাদী হোতি, পিসুণৰাচো হোতি, ফরুসৰাচো হোতি , সম্ফপ্পলাপী হোতি। এৰং খো, ভিক্খৰে, অসপ্পুরিসো অসপ্পুরিসৰাচো হোতি।
‘‘Kathañca, bhikkhave, asappuriso asappurisavāco hoti? Idha, bhikkhave, asappuriso musāvādī hoti, pisuṇavāco hoti, pharusavāco hoti , samphappalāpī hoti. Evaṃ kho, bhikkhave, asappuriso asappurisavāco hoti.
‘‘কথঞ্চ, ভিক্খৰে, অসপ্পুরিসো অসপ্পুরিসকম্মন্তো হোতি? ইধ , ভিক্খৰে, অসপ্পুরিসো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি। এৰং খো, ভিক্খৰে, অসপ্পুরিসো অসপ্পুরিসকম্মন্তো হোতি।
‘‘Kathañca, bhikkhave, asappuriso asappurisakammanto hoti? Idha , bhikkhave, asappuriso pāṇātipātī hoti, adinnādāyī hoti, kāmesumicchācārī hoti. Evaṃ kho, bhikkhave, asappuriso asappurisakammanto hoti.
‘‘কথঞ্চ, ভিক্খৰে, অসপ্পুরিসো অসপ্পুরিসদিট্ঠি হোতি? ইধ, ভিক্খৰে, অসপ্পুরিসো এৰংদিট্ঠি 5 হোতি – ‘নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং 6 কম্মানং ফলং ৰিপাকো, নত্থি অযং লোকো, নত্থি পরো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা 7 সম্মাপটিপন্না, যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি। এৰং খো, ভিক্খৰে, অসপ্পুরিসো অসপ্পুরিসদিট্ঠি হোতি।
‘‘Kathañca, bhikkhave, asappuriso asappurisadiṭṭhi hoti? Idha, bhikkhave, asappuriso evaṃdiṭṭhi 8 hoti – ‘natthi dinnaṃ, natthi yiṭṭhaṃ, natthi hutaṃ, natthi sukatadukkaṭānaṃ 9 kammānaṃ phalaṃ vipāko, natthi ayaṃ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā 10 sammāpaṭipannā, ye imañca lokaṃ parañca lokaṃ sayaṃ abhiññā sacchikatvā pavedentī’ti. Evaṃ kho, bhikkhave, asappuriso asappurisadiṭṭhi hoti.
‘‘কথঞ্চ, ভিক্খৰে, অসপ্পুরিসো অসপ্পুরিসদানং দেতি? ইধ, ভিক্খৰে, অসপ্পুরিসো অসক্কচ্চং দানং দেতি, অসহত্থা দানং দেতি, অচিত্তীকত্ৰা দানং দেতি, অপৰিট্ঠং দানং দেতি অনাগমনদিট্ঠিকো দানং দেতি। এৰং খো, ভিক্খৰে, অসপ্পুরিসো অসপ্পুরিসদানং দেতি।
‘‘Kathañca, bhikkhave, asappuriso asappurisadānaṃ deti? Idha, bhikkhave, asappuriso asakkaccaṃ dānaṃ deti, asahatthā dānaṃ deti, acittīkatvā dānaṃ deti, apaviṭṭhaṃ dānaṃ deti anāgamanadiṭṭhiko dānaṃ deti. Evaṃ kho, bhikkhave, asappuriso asappurisadānaṃ deti.
‘‘সো, ভিক্খৰে, অসপ্পুরিসো এৰং অস্সদ্ধম্মসমন্নাগতো, এৰং অসপ্পুরিসভত্তি, এৰং অসপ্পুরিসচিন্তী, এৰং অসপ্পুরিসমন্তী, এৰং অসপ্পুরিসৰাচো, এৰং অসপ্পুরিসকম্মন্তো, এৰং অসপ্পুরিসদিট্ঠি; এৰং অসপ্পুরিসদানং দত্ৰা কাযস্স ভেদা পরং মরণা যা অসপ্পুরিসানং গতি তত্থ উপপজ্জতি। কা চ, ভিক্খৰে, অসপ্পুরিসানং গতি? নিরযো ৰা তিরচ্ছানযোনি ৰা।
‘‘So, bhikkhave, asappuriso evaṃ assaddhammasamannāgato, evaṃ asappurisabhatti, evaṃ asappurisacintī, evaṃ asappurisamantī, evaṃ asappurisavāco, evaṃ asappurisakammanto, evaṃ asappurisadiṭṭhi; evaṃ asappurisadānaṃ datvā kāyassa bhedā paraṃ maraṇā yā asappurisānaṃ gati tattha upapajjati. Kā ca, bhikkhave, asappurisānaṃ gati? Nirayo vā tiracchānayoni vā.
৯২. ‘‘জানেয্য নু খো, ভিক্খৰে, সপ্পুরিসো সপ্পুরিসং – ‘সপ্পুরিসো অযং ভৰ’’’ন্তি? ‘‘এৰং , ভন্তে’’। ‘‘সাধু, ভিক্খৰে; ঠানমেতং, ভিক্খৰে, ৰিজ্জতি যং সপ্পুরিসো সপ্পুরিসং জানেয্য – ‘সপ্পুরিসো অযং ভৰ’ন্তি। জানেয্য পন, ভিক্খৰে, সপ্পুরিসো অসপ্পুরিসং – ‘অসপ্পুরিসো অযং ভৰ’’’ন্তি? ‘‘এৰং, ভন্তে’’। ‘‘সাধু, ভিক্খৰে; এতম্পি খো, ভিক্খৰে, ঠানং ৰিজ্জতি যং সপ্পুরিসো অসপ্পুরিসং জানেয্য – ‘অসপ্পুরিসো অযং ভৰ’ন্তি। সপ্পুরিসো, ভিক্খৰে, সদ্ধম্মসমন্নাগতো হোতি, সপ্পুরিসভত্তি হোতি, সপ্পুরিসচিন্তী হোতি, সপ্পুরিসমন্তী হোতি, সপ্পুরিসৰাচো হোতি, সপ্পুরিসকম্মন্তো হোতি, সপ্পুরিসদিট্ঠি হোতি; সপ্পুরিসদানং দেতি’’।
92. ‘‘Jāneyya nu kho, bhikkhave, sappuriso sappurisaṃ – ‘sappuriso ayaṃ bhava’’’nti? ‘‘Evaṃ , bhante’’. ‘‘Sādhu, bhikkhave; ṭhānametaṃ, bhikkhave, vijjati yaṃ sappuriso sappurisaṃ jāneyya – ‘sappuriso ayaṃ bhava’nti. Jāneyya pana, bhikkhave, sappuriso asappurisaṃ – ‘asappuriso ayaṃ bhava’’’nti? ‘‘Evaṃ, bhante’’. ‘‘Sādhu, bhikkhave; etampi kho, bhikkhave, ṭhānaṃ vijjati yaṃ sappuriso asappurisaṃ jāneyya – ‘asappuriso ayaṃ bhava’nti. Sappuriso, bhikkhave, saddhammasamannāgato hoti, sappurisabhatti hoti, sappurisacintī hoti, sappurisamantī hoti, sappurisavāco hoti, sappurisakammanto hoti, sappurisadiṭṭhi hoti; sappurisadānaṃ deti’’.
‘‘কথঞ্চ, ভিক্খৰে, সপ্পুরিসো সদ্ধম্মসমন্নাগতো হোতি? ইধ, ভিক্খৰে, সপ্পুরিসো সদ্ধো হোতি, হিরিমা হোতি, ওত্তপ্পী হোতি, বহুস্সুতো হোতি, আরদ্ধৰীরিযো হোতি, উপট্ঠিতস্সতি হোতি, পঞ্ঞৰা হোতি। এৰং খো, ভিক্খৰে, সপ্পুরিসো সদ্ধম্মসমন্নাগতো হোতি।
‘‘Kathañca, bhikkhave, sappuriso saddhammasamannāgato hoti? Idha, bhikkhave, sappuriso saddho hoti, hirimā hoti, ottappī hoti, bahussuto hoti, āraddhavīriyo hoti, upaṭṭhitassati hoti, paññavā hoti. Evaṃ kho, bhikkhave, sappuriso saddhammasamannāgato hoti.
‘‘কথঞ্চ, ভিক্খৰে, সপ্পুরিসো সপ্পুরিসভত্তি হোতি? ইধ, ভিক্খৰে, সপ্পুরিসস্স যে তে সমণব্রাহ্মণা সদ্ধা হিরিমন্তো ওত্তপ্পিনো বহুস্সুতা আরদ্ধৰীরিযা উপট্ঠিতস্সতিনো পঞ্ঞৰন্তো ত্যাস্স মিত্তা হোন্তি, তে সহাযা। এৰং খো, ভিক্খৰে, সপ্পুরিসো সপ্পুরিসভত্তি হোতি।
‘‘Kathañca, bhikkhave, sappuriso sappurisabhatti hoti? Idha, bhikkhave, sappurisassa ye te samaṇabrāhmaṇā saddhā hirimanto ottappino bahussutā āraddhavīriyā upaṭṭhitassatino paññavanto tyāssa mittā honti, te sahāyā. Evaṃ kho, bhikkhave, sappuriso sappurisabhatti hoti.
‘‘কথঞ্চ, ভিক্খৰে, সপ্পুরিসো সপ্পুরিসচিন্তী হোতি? ইধ, ভিক্খৰে, সপ্পুরিসো নেৰত্তব্যাবাধায চেতেতি, ন পরব্যাবাধায চেতেতি, ন উভযব্যাবাধায চেতেতি। এৰং খো, ভিক্খৰে, সপ্পুরিসো সপ্পুরিসচিন্তী হোতি।
‘‘Kathañca, bhikkhave, sappuriso sappurisacintī hoti? Idha, bhikkhave, sappuriso nevattabyābādhāya ceteti, na parabyābādhāya ceteti, na ubhayabyābādhāya ceteti. Evaṃ kho, bhikkhave, sappuriso sappurisacintī hoti.
‘‘কথঞ্চ, ভিক্খৰে, সপ্পুরিসো সপ্পুরিসমন্তী হোতি? ইধ, ভিক্খৰে, সপ্পুরিসো নেৰত্তব্যাবাধায মন্তেতি, ন পরব্যাবাধায মন্তেতি, ন উভযব্যাবাধায মন্তেতি। এৰং খো, ভিক্খৰে, সপ্পুরিসো সপ্পুরিসমন্তী হোতি।
‘‘Kathañca, bhikkhave, sappuriso sappurisamantī hoti? Idha, bhikkhave, sappuriso nevattabyābādhāya manteti, na parabyābādhāya manteti, na ubhayabyābādhāya manteti. Evaṃ kho, bhikkhave, sappuriso sappurisamantī hoti.
‘‘কথঞ্চ, ভিক্খৰে, সপ্পুরিসো সপ্পুরিসৰাচো হোতি? ইধ, ভিক্খৰে, সপ্পুরিসো মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি। এৰং খো, ভিক্খৰে, সপ্পুরিসো সপ্পুরিসৰাচো হোতি।
‘‘Kathañca, bhikkhave, sappuriso sappurisavāco hoti? Idha, bhikkhave, sappuriso musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti. Evaṃ kho, bhikkhave, sappuriso sappurisavāco hoti.
‘‘কথঞ্চ, ভিক্খৰে, সপ্পুরিসো সপ্পুরিসকম্মন্তো হোতি? ইধ, ভিক্খৰে, সপ্পুরিসো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি। এৰং খো, ভিক্খৰে, সপ্পুরিসো সপ্পুরিসকম্মন্তো হোতি।
‘‘Kathañca, bhikkhave, sappuriso sappurisakammanto hoti? Idha, bhikkhave, sappuriso pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti. Evaṃ kho, bhikkhave, sappuriso sappurisakammanto hoti.
‘‘কথঞ্চ , ভিক্খৰে, সপ্পুরিসো সপ্পুরিসদিট্ঠি হোতি? ইধ, ভিক্খৰে, সপ্পুরিসো এৰংদিট্ঠি হোতি – ‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো , অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি। এৰং খো, ভিক্খৰে, সপ্পুরিসো সপ্পুরিসদিট্ঠি হোতি।
‘‘Kathañca , bhikkhave, sappuriso sappurisadiṭṭhi hoti? Idha, bhikkhave, sappuriso evaṃdiṭṭhi hoti – ‘atthi dinnaṃ, atthi yiṭṭhaṃ, atthi hutaṃ, atthi sukatadukkaṭānaṃ kammānaṃ phalaṃ vipāko, atthi ayaṃ loko , atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentī’ti. Evaṃ kho, bhikkhave, sappuriso sappurisadiṭṭhi hoti.
‘‘কথঞ্চ, ভিক্খৰে, সপ্পুরিসো সপ্পুরিসদানং দেতি? ইধ, ভিক্খৰে, সপ্পুরিসো সক্কচ্চং দানং দেতি, সহত্থা দানং দেতি, চিত্তীকত্ৰা দানং দেতি, অনপৰিট্ঠং দানং দেতি, আগমনদিট্ঠিকো দানং দেতি। এৰং খো, ভিক্খৰে, সপ্পুরিসো সপ্পুরিসদানং দেতি।
‘‘Kathañca, bhikkhave, sappuriso sappurisadānaṃ deti? Idha, bhikkhave, sappuriso sakkaccaṃ dānaṃ deti, sahatthā dānaṃ deti, cittīkatvā dānaṃ deti, anapaviṭṭhaṃ dānaṃ deti, āgamanadiṭṭhiko dānaṃ deti. Evaṃ kho, bhikkhave, sappuriso sappurisadānaṃ deti.
‘‘সো, ভিক্খৰে, সপ্পুরিসো এৰং সদ্ধম্মসমন্নাগতো, এৰং সপ্পুরিসভত্তি, এৰং সপ্পুরিসচিন্তী, এৰং সপ্পুরিসমন্তী, এৰং সপ্পুরিসৰাচো, এৰং সপ্পুরিসকম্মন্তো, এৰং সপ্পুরিসদিট্ঠি; এৰং সপ্পুরিসদানং দত্ৰা কাযস্স ভেদা পরং মরণা যা সপ্পুরিসানং গতি তত্থ উপপজ্জতি। কা চ, ভিক্খৰে, সপ্পুরিসানং গতি? দেৰমহত্ততা ৰা মনুস্সমহত্ততা ৰা’’তি।
‘‘So, bhikkhave, sappuriso evaṃ saddhammasamannāgato, evaṃ sappurisabhatti, evaṃ sappurisacintī, evaṃ sappurisamantī, evaṃ sappurisavāco, evaṃ sappurisakammanto, evaṃ sappurisadiṭṭhi; evaṃ sappurisadānaṃ datvā kāyassa bhedā paraṃ maraṇā yā sappurisānaṃ gati tattha upapajjati. Kā ca, bhikkhave, sappurisānaṃ gati? Devamahattatā vā manussamahattatā vā’’ti.
ইদমৰোচ ভগৰা। অত্তমনা তে ভিক্খূ ভগৰতো ভাসিতং অভিনন্দুন্তি।
Idamavoca bhagavā. Attamanā te bhikkhū bhagavato bhāsitaṃ abhinandunti.
চূল়পুণ্ণমসুত্তং নিট্ঠিতং দসমং।
Cūḷapuṇṇamasuttaṃ niṭṭhitaṃ dasamaṃ.
দেৰদহৰগ্গো নিট্ঠিতো পঠমো।
Devadahavaggo niṭṭhito paṭhamo.
তস্সুদ্দানং –
Tassuddānaṃ –
দেৰদহং পঞ্চত্তযং, কিন্তি-সাম-সুনক্খত্তং।
Devadahaṃ pañcattayaṃ, kinti-sāma-sunakkhattaṃ;
সপ্পায-গণ-গোপক-মহাপুণ্ণচূল়পুণ্ণঞ্চাতি॥
Sappāya-gaṇa-gopaka-mahāpuṇṇacūḷapuṇṇañcāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ১০. চূল়পুণ্ণমসুত্তৰণ্ণনা • 10. Cūḷapuṇṇamasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ১০. চূল়পুণ্ণমসুত্তৰণ্ণনা • 10. Cūḷapuṇṇamasuttavaṇṇanā
