| Library / Tipiṭaka / තිපිටක • Tipiṭaka / මජ්‌ඣිමනිකාය • Majjhimanikāya |
10. චූළපුණ්‌ණමසුත්‌තං
10. Cūḷapuṇṇamasuttaṃ
91. එවං මෙ සුතං – එකං සමයං භගවා සාවත්‌ථියං විහරති පුබ්‌බාරාමෙ මිගාරමාතුපාසාදෙ. තෙන ඛො පන සමයෙන භගවා තදහුපොසථෙ පන්‌නරසෙ පුණ්‌ණාය පුණ්‌ණමාය රත්‌තියා භික්‌ඛුසඞ්‌ඝපරිවුතො අබ්‌භොකාසෙ නිසින්‌නො හොති. අථ ඛො භගවා තුණ්‌හීභූතං තුණ්‌හීභූතං භික්‌ඛුසඞ්‌ඝං අනුවිලොකෙත්‌වා භික්‌ඛූ ආමන්‌තෙසි – ‘‘ජානෙය්‍ය නු ඛො, භික්‌ඛවෙ, අසප්‌පුරිසො අසප්‌පුරිසං – ‘අසප්‌පුරිසො අයං භව’’’න්‌ති? ‘‘නො හෙතං, භන්‌තෙ’’. ‘‘සාධු, භික්‌ඛවෙ; අට්‌ඨානමෙතං, භික්‌ඛවෙ, අනවකාසො යං අසප්‌පුරිසො අසප්‌පුරිසං ජානෙය්‍ය – ‘අසප්‌පුරිසො අයං භව’න්‌ති. ජානෙය්‍ය පන, භික්‌ඛවෙ, අසප්‌පුරිසො සප්‌පුරිසං – ‘සප්‌පුරිසො අයං භව’’’න්‌ති? ‘‘නො හෙතං, භන්‌තෙ’’. ‘‘සාධු, භික්‌ඛවෙ; එතම්‌පි ඛො, භික්‌ඛවෙ, අට්‌ඨානං අනවකාසො යං අසප්‌පුරිසො සප්‌පුරිසං ජානෙය්‍ය – ‘සප්‌පුරිසො අයං භව’න්‌ති. අසප්‌පුරිසො, භික්‌ඛවෙ, අස්‌සද්‌ධම්‌මසමන්‌නාගතො හොති, අසප්‌පුරිසභත්‌ති 1 හොති, අසප්‌පුරිසචින්‌තී හොති, අසප්‌පුරිසමන්‌තී හොති, අසප්‌පුරිසවාචො හොති, අසප්‌පුරිසකම්‌මන්‌තො හොති, අසප්‌පුරිසදිට්‌ඨි 2 හොති; අසප්‌පුරිසදානං දෙති’’.
91. Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena bhagavā tadahuposathe pannarase puṇṇāya puṇṇamāya rattiyā bhikkhusaṅghaparivuto abbhokāse nisinno hoti. Atha kho bhagavā tuṇhībhūtaṃ tuṇhībhūtaṃ bhikkhusaṅghaṃ anuviloketvā bhikkhū āmantesi – ‘‘jāneyya nu kho, bhikkhave, asappuriso asappurisaṃ – ‘asappuriso ayaṃ bhava’’’nti? ‘‘No hetaṃ, bhante’’. ‘‘Sādhu, bhikkhave; aṭṭhānametaṃ, bhikkhave, anavakāso yaṃ asappuriso asappurisaṃ jāneyya – ‘asappuriso ayaṃ bhava’nti. Jāneyya pana, bhikkhave, asappuriso sappurisaṃ – ‘sappuriso ayaṃ bhava’’’nti? ‘‘No hetaṃ, bhante’’. ‘‘Sādhu, bhikkhave; etampi kho, bhikkhave, aṭṭhānaṃ anavakāso yaṃ asappuriso sappurisaṃ jāneyya – ‘sappuriso ayaṃ bhava’nti. Asappuriso, bhikkhave, assaddhammasamannāgato hoti, asappurisabhatti 3 hoti, asappurisacintī hoti, asappurisamantī hoti, asappurisavāco hoti, asappurisakammanto hoti, asappurisadiṭṭhi 4 hoti; asappurisadānaṃ deti’’.
‘‘කථඤ්‌ච, භික්‌ඛවෙ, අසප්‌පුරිසො අස්‌සද්‌ධම්‌මසමන්‌නාගතො හොති? ඉධ, භික්‌ඛවෙ, අසප්‌පුරිසො අස්‌සද්‌ධො හොති, අහිරිකො හොති, අනොත්‌තප්‌පී හොති, අප්‌පස්‌සුතො හොති , කුසීතො හොති, මුට්‌ඨස්‌සති හොති, දුප්‌පඤ්‌ඤො හොති. එවං ඛො, භික්‌ඛවෙ, අසප්‌පුරිසො අස්‌සද්‌ධම්‌මසමන්‌නාගතො හොති.
‘‘Kathañca, bhikkhave, asappuriso assaddhammasamannāgato hoti? Idha, bhikkhave, asappuriso assaddho hoti, ahiriko hoti, anottappī hoti, appassuto hoti , kusīto hoti, muṭṭhassati hoti, duppañño hoti. Evaṃ kho, bhikkhave, asappuriso assaddhammasamannāgato hoti.
‘‘කථඤ්‌ච, භික්‌ඛවෙ, අසප්‌පුරිසො අසප්‌පුරිසභත්‌ති හොති? ඉධ, භික්‌ඛවෙ, අසප්‌පුරිසස්‌ස යෙ තෙ සමණබ්‍රාහ්‌මණා අස්‌සද්‌ධා අහිරිකා අනොත්‌තප්‌පිනො අප්‌පස්‌සුතා කුසීතා මුට්‌ඨස්‌සතිනො දුප්‌පඤ්‌ඤා ත්‍යාස්‌ස මිත්‌තා හොන්‌ති තෙ සහායා. එවං ඛො, භික්‌ඛවෙ, අසප්‌පුරිසො අසප්‌පුරිසභත්‌ති හොති.
‘‘Kathañca, bhikkhave, asappuriso asappurisabhatti hoti? Idha, bhikkhave, asappurisassa ye te samaṇabrāhmaṇā assaddhā ahirikā anottappino appassutā kusītā muṭṭhassatino duppaññā tyāssa mittā honti te sahāyā. Evaṃ kho, bhikkhave, asappuriso asappurisabhatti hoti.
‘‘කථඤ්‌ච, භික්‌ඛවෙ, අසප්‌පුරිසො අසප්‌පුරිසචින්‌තී හොති? ඉධ, භික්‌ඛවෙ, අසප්‌පුරිසො අත්‌තබ්‍යාබාධායපි චෙතෙති, පරබ්‍යාබාධායපි චෙතෙති, උභයබ්‍යාබාධායපි චෙතෙති. එවං ඛො, භික්‌ඛවෙ, අසප්‌පුරිසො අසප්‌පුරිසචින්‌තී හොති.
‘‘Kathañca, bhikkhave, asappuriso asappurisacintī hoti? Idha, bhikkhave, asappuriso attabyābādhāyapi ceteti, parabyābādhāyapi ceteti, ubhayabyābādhāyapi ceteti. Evaṃ kho, bhikkhave, asappuriso asappurisacintī hoti.
‘‘කථඤ්‌ච, භික්‌ඛවෙ, අසප්‌පුරිසො අසප්‌පුරිසමන්‌තී හොති? ඉධ, භික්‌ඛවෙ, අසප්‌පුරිසො අත්‌තබ්‍යාබාධායපි මන්‌තෙති, පරබ්‍යාබාධායපි මන්‌තෙති, උභයබ්‍යාබාධායපි මන්‌තෙති. එවං ඛො, භික්‌ඛවෙ, අසප්‌පුරිසො අසප්‌පුරිසමන්‌තී හොති.
‘‘Kathañca, bhikkhave, asappuriso asappurisamantī hoti? Idha, bhikkhave, asappuriso attabyābādhāyapi manteti, parabyābādhāyapi manteti, ubhayabyābādhāyapi manteti. Evaṃ kho, bhikkhave, asappuriso asappurisamantī hoti.
‘‘කථඤ්‌ච, භික්‌ඛවෙ, අසප්‌පුරිසො අසප්‌පුරිසවාචො හොති? ඉධ, භික්‌ඛවෙ, අසප්‌පුරිසො මුසාවාදී හොති, පිසුණවාචො හොති, ඵරුසවාචො හොති , සම්‌ඵප්‌පලාපී හොති. එවං ඛො, භික්‌ඛවෙ, අසප්‌පුරිසො අසප්‌පුරිසවාචො හොති.
‘‘Kathañca, bhikkhave, asappuriso asappurisavāco hoti? Idha, bhikkhave, asappuriso musāvādī hoti, pisuṇavāco hoti, pharusavāco hoti , samphappalāpī hoti. Evaṃ kho, bhikkhave, asappuriso asappurisavāco hoti.
‘‘කථඤ්‌ච, භික්‌ඛවෙ, අසප්‌පුරිසො අසප්‌පුරිසකම්‌මන්‌තො හොති? ඉධ , භික්‌ඛවෙ, අසප්‌පුරිසො පාණාතිපාතී හොති, අදින්‌නාදායී හොති, කාමෙසුමිච්‌ඡාචාරී හොති. එවං ඛො, භික්‌ඛවෙ, අසප්‌පුරිසො අසප්‌පුරිසකම්‌මන්‌තො හොති.
‘‘Kathañca, bhikkhave, asappuriso asappurisakammanto hoti? Idha , bhikkhave, asappuriso pāṇātipātī hoti, adinnādāyī hoti, kāmesumicchācārī hoti. Evaṃ kho, bhikkhave, asappuriso asappurisakammanto hoti.
‘‘කථඤ්‌ච, භික්‌ඛවෙ, අසප්‌පුරිසො අසප්‌පුරිසදිට්‌ඨි හොති? ඉධ, භික්‌ඛවෙ, අසප්‌පුරිසො එවංදිට්‌ඨි 5 හොති – ‘නත්‌ථි දින්‌නං, නත්‌ථි යිට්‌ඨං, නත්‌ථි හුතං, නත්‌ථි සුකතදුක්‌කටානං 6 කම්‌මානං ඵලං විපාකො, නත්‌ථි අයං ලොකො, නත්‌ථි පරො ලොකො, නත්‌ථි මාතා, නත්‌ථි පිතා, නත්‌ථි සත්‌තා ඔපපාතිකා, නත්‌ථි ලොකෙ සමණබ්‍රාහ්‌මණා සම්‌මග්‌ගතා 7 සම්‌මාපටිපන්‌නා, යෙ ඉමඤ්‌ච ලොකං පරඤ්‌ච ලොකං සයං අභිඤ්‌ඤා සච්‌ඡිකත්‌වා පවෙදෙන්‌තී’ති. එවං ඛො, භික්‌ඛවෙ, අසප්‌පුරිසො අසප්‌පුරිසදිට්‌ඨි හොති.
‘‘Kathañca, bhikkhave, asappuriso asappurisadiṭṭhi hoti? Idha, bhikkhave, asappuriso evaṃdiṭṭhi 8 hoti – ‘natthi dinnaṃ, natthi yiṭṭhaṃ, natthi hutaṃ, natthi sukatadukkaṭānaṃ 9 kammānaṃ phalaṃ vipāko, natthi ayaṃ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā 10 sammāpaṭipannā, ye imañca lokaṃ parañca lokaṃ sayaṃ abhiññā sacchikatvā pavedentī’ti. Evaṃ kho, bhikkhave, asappuriso asappurisadiṭṭhi hoti.
‘‘කථඤ්‌ච, භික්‌ඛවෙ, අසප්‌පුරිසො අසප්‌පුරිසදානං දෙති? ඉධ, භික්‌ඛවෙ, අසප්‌පුරිසො අසක්‌කච්‌චං දානං දෙති, අසහත්‌ථා දානං දෙති, අචිත්‌තීකත්‌වා දානං දෙති, අපවිට්‌ඨං දානං දෙති අනාගමනදිට්‌ඨිකො දානං දෙති. එවං ඛො, භික්‌ඛවෙ, අසප්‌පුරිසො අසප්‌පුරිසදානං දෙති.
‘‘Kathañca, bhikkhave, asappuriso asappurisadānaṃ deti? Idha, bhikkhave, asappuriso asakkaccaṃ dānaṃ deti, asahatthā dānaṃ deti, acittīkatvā dānaṃ deti, apaviṭṭhaṃ dānaṃ deti anāgamanadiṭṭhiko dānaṃ deti. Evaṃ kho, bhikkhave, asappuriso asappurisadānaṃ deti.
‘‘සො, භික්‌ඛවෙ, අසප්‌පුරිසො එවං අස්‌සද්‌ධම්‌මසමන්‌නාගතො, එවං අසප්‌පුරිසභත්‌ති, එවං අසප්‌පුරිසචින්‌තී, එවං අසප්‌පුරිසමන්‌තී, එවං අසප්‌පුරිසවාචො, එවං අසප්‌පුරිසකම්‌මන්‌තො, එවං අසප්‌පුරිසදිට්‌ඨි; එවං අසප්‌පුරිසදානං දත්‌වා කායස්‌ස භෙදා පරං මරණා යා අසප්‌පුරිසානං ගති තත්‌ථ උපපජ්‌ජති. කා ච, භික්‌ඛවෙ, අසප්‌පුරිසානං ගති? නිරයො වා තිරච්‌ඡානයොනි වා.
‘‘So, bhikkhave, asappuriso evaṃ assaddhammasamannāgato, evaṃ asappurisabhatti, evaṃ asappurisacintī, evaṃ asappurisamantī, evaṃ asappurisavāco, evaṃ asappurisakammanto, evaṃ asappurisadiṭṭhi; evaṃ asappurisadānaṃ datvā kāyassa bhedā paraṃ maraṇā yā asappurisānaṃ gati tattha upapajjati. Kā ca, bhikkhave, asappurisānaṃ gati? Nirayo vā tiracchānayoni vā.
92. ‘‘ජානෙය්‍ය නු ඛො, භික්‌ඛවෙ, සප්‌පුරිසො සප්‌පුරිසං – ‘සප්‌පුරිසො අයං භව’’’න්‌ති? ‘‘එවං , භන්‌තෙ’’. ‘‘සාධු, භික්‌ඛවෙ; ඨානමෙතං, භික්‌ඛවෙ, විජ්‌ජති යං සප්‌පුරිසො සප්‌පුරිසං ජානෙය්‍ය – ‘සප්‌පුරිසො අයං භව’න්‌ති. ජානෙය්‍ය පන, භික්‌ඛවෙ, සප්‌පුරිසො අසප්‌පුරිසං – ‘අසප්‌පුරිසො අයං භව’’’න්‌ති? ‘‘එවං, භන්‌තෙ’’. ‘‘සාධු, භික්‌ඛවෙ; එතම්‌පි ඛො, භික්‌ඛවෙ, ඨානං විජ්‌ජති යං සප්‌පුරිසො අසප්‌පුරිසං ජානෙය්‍ය – ‘අසප්‌පුරිසො අයං භව’න්‌ති. සප්‌පුරිසො, භික්‌ඛවෙ, සද්‌ධම්‌මසමන්‌නාගතො හොති, සප්‌පුරිසභත්‌ති හොති, සප්‌පුරිසචින්‌තී හොති, සප්‌පුරිසමන්‌තී හොති, සප්‌පුරිසවාචො හොති, සප්‌පුරිසකම්‌මන්‌තො හොති, සප්‌පුරිසදිට්‌ඨි හොති; සප්‌පුරිසදානං දෙති’’.
92. ‘‘Jāneyya nu kho, bhikkhave, sappuriso sappurisaṃ – ‘sappuriso ayaṃ bhava’’’nti? ‘‘Evaṃ , bhante’’. ‘‘Sādhu, bhikkhave; ṭhānametaṃ, bhikkhave, vijjati yaṃ sappuriso sappurisaṃ jāneyya – ‘sappuriso ayaṃ bhava’nti. Jāneyya pana, bhikkhave, sappuriso asappurisaṃ – ‘asappuriso ayaṃ bhava’’’nti? ‘‘Evaṃ, bhante’’. ‘‘Sādhu, bhikkhave; etampi kho, bhikkhave, ṭhānaṃ vijjati yaṃ sappuriso asappurisaṃ jāneyya – ‘asappuriso ayaṃ bhava’nti. Sappuriso, bhikkhave, saddhammasamannāgato hoti, sappurisabhatti hoti, sappurisacintī hoti, sappurisamantī hoti, sappurisavāco hoti, sappurisakammanto hoti, sappurisadiṭṭhi hoti; sappurisadānaṃ deti’’.
‘‘කථඤ්‌ච, භික්‌ඛවෙ, සප්‌පුරිසො සද්‌ධම්‌මසමන්‌නාගතො හොති? ඉධ, භික්‌ඛවෙ, සප්‌පුරිසො සද්‌ධො හොති, හිරිමා හොති, ඔත්‌තප්‌පී හොති, බහුස්‌සුතො හොති, ආරද්‌ධවීරියො හොති, උපට්‌ඨිතස්‌සති හොති, පඤ්‌ඤවා හොති. එවං ඛො, භික්‌ඛවෙ, සප්‌පුරිසො සද්‌ධම්‌මසමන්‌නාගතො හොති.
‘‘Kathañca, bhikkhave, sappuriso saddhammasamannāgato hoti? Idha, bhikkhave, sappuriso saddho hoti, hirimā hoti, ottappī hoti, bahussuto hoti, āraddhavīriyo hoti, upaṭṭhitassati hoti, paññavā hoti. Evaṃ kho, bhikkhave, sappuriso saddhammasamannāgato hoti.
‘‘කථඤ්‌ච, භික්‌ඛවෙ, සප්‌පුරිසො සප්‌පුරිසභත්‌ති හොති? ඉධ, භික්‌ඛවෙ, සප්‌පුරිසස්‌ස යෙ තෙ සමණබ්‍රාහ්‌මණා සද්‌ධා හිරිමන්‌තො ඔත්‌තප්‌පිනො බහුස්‌සුතා ආරද්‌ධවීරියා උපට්‌ඨිතස්‌සතිනො පඤ්‌ඤවන්‌තො ත්‍යාස්‌ස මිත්‌තා හොන්‌ති, තෙ සහායා. එවං ඛො, භික්‌ඛවෙ, සප්‌පුරිසො සප්‌පුරිසභත්‌ති හොති.
‘‘Kathañca, bhikkhave, sappuriso sappurisabhatti hoti? Idha, bhikkhave, sappurisassa ye te samaṇabrāhmaṇā saddhā hirimanto ottappino bahussutā āraddhavīriyā upaṭṭhitassatino paññavanto tyāssa mittā honti, te sahāyā. Evaṃ kho, bhikkhave, sappuriso sappurisabhatti hoti.
‘‘කථඤ්‌ච, භික්‌ඛවෙ, සප්‌පුරිසො සප්‌පුරිසචින්‌තී හොති? ඉධ, භික්‌ඛවෙ, සප්‌පුරිසො නෙවත්‌තබ්‍යාබාධාය චෙතෙති, න පරබ්‍යාබාධාය චෙතෙති, න උභයබ්‍යාබාධාය චෙතෙති. එවං ඛො, භික්‌ඛවෙ, සප්‌පුරිසො සප්‌පුරිසචින්‌තී හොති.
‘‘Kathañca, bhikkhave, sappuriso sappurisacintī hoti? Idha, bhikkhave, sappuriso nevattabyābādhāya ceteti, na parabyābādhāya ceteti, na ubhayabyābādhāya ceteti. Evaṃ kho, bhikkhave, sappuriso sappurisacintī hoti.
‘‘කථඤ්‌ච, භික්‌ඛවෙ, සප්‌පුරිසො සප්‌පුරිසමන්‌තී හොති? ඉධ, භික්‌ඛවෙ, සප්‌පුරිසො නෙවත්‌තබ්‍යාබාධාය මන්‌තෙති, න පරබ්‍යාබාධාය මන්‌තෙති, න උභයබ්‍යාබාධාය මන්‌තෙති. එවං ඛො, භික්‌ඛවෙ, සප්‌පුරිසො සප්‌පුරිසමන්‌තී හොති.
‘‘Kathañca, bhikkhave, sappuriso sappurisamantī hoti? Idha, bhikkhave, sappuriso nevattabyābādhāya manteti, na parabyābādhāya manteti, na ubhayabyābādhāya manteti. Evaṃ kho, bhikkhave, sappuriso sappurisamantī hoti.
‘‘කථඤ්‌ච, භික්‌ඛවෙ, සප්‌පුරිසො සප්‌පුරිසවාචො හොති? ඉධ, භික්‌ඛවෙ, සප්‌පුරිසො මුසාවාදා පටිවිරතො හොති, පිසුණාය වාචාය පටිවිරතො හොති, ඵරුසාය වාචාය පටිවිරතො හොති, සම්‌ඵප්‌පලාපා පටිවිරතො හොති. එවං ඛො, භික්‌ඛවෙ, සප්‌පුරිසො සප්‌පුරිසවාචො හොති.
‘‘Kathañca, bhikkhave, sappuriso sappurisavāco hoti? Idha, bhikkhave, sappuriso musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti. Evaṃ kho, bhikkhave, sappuriso sappurisavāco hoti.
‘‘කථඤ්‌ච, භික්‌ඛවෙ, සප්‌පුරිසො සප්‌පුරිසකම්‌මන්‌තො හොති? ඉධ, භික්‌ඛවෙ, සප්‌පුරිසො පාණාතිපාතා පටිවිරතො හොති, අදින්‌නාදානා පටිවිරතො හොති, කාමෙසුමිච්‌ඡාචාරා පටිවිරතො හොති. එවං ඛො, භික්‌ඛවෙ, සප්‌පුරිසො සප්‌පුරිසකම්‌මන්‌තො හොති.
‘‘Kathañca, bhikkhave, sappuriso sappurisakammanto hoti? Idha, bhikkhave, sappuriso pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti. Evaṃ kho, bhikkhave, sappuriso sappurisakammanto hoti.
‘‘කථඤ්‌ච , භික්‌ඛවෙ, සප්‌පුරිසො සප්‌පුරිසදිට්‌ඨි හොති? ඉධ, භික්‌ඛවෙ, සප්‌පුරිසො එවංදිට්‌ඨි හොති – ‘අත්‌ථි දින්‌නං, අත්‌ථි යිට්‌ඨං, අත්‌ථි හුතං, අත්‌ථි සුකතදුක්‌කටානං කම්‌මානං ඵලං විපාකො, අත්‌ථි අයං ලොකො , අත්‌ථි පරො ලොකො, අත්‌ථි මාතා, අත්‌ථි පිතා, අත්‌ථි සත්‌තා ඔපපාතිකා, අත්‌ථි ලොකෙ සමණබ්‍රාහ්‌මණා සම්‌මග්‌ගතා සම්‌මාපටිපන්‌නා යෙ ඉමඤ්‌ච ලොකං පරඤ්‌ච ලොකං සයං අභිඤ්‌ඤා සච්‌ඡිකත්‌වා පවෙදෙන්‌තී’ති. එවං ඛො, භික්‌ඛවෙ, සප්‌පුරිසො සප්‌පුරිසදිට්‌ඨි හොති.
‘‘Kathañca , bhikkhave, sappuriso sappurisadiṭṭhi hoti? Idha, bhikkhave, sappuriso evaṃdiṭṭhi hoti – ‘atthi dinnaṃ, atthi yiṭṭhaṃ, atthi hutaṃ, atthi sukatadukkaṭānaṃ kammānaṃ phalaṃ vipāko, atthi ayaṃ loko , atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentī’ti. Evaṃ kho, bhikkhave, sappuriso sappurisadiṭṭhi hoti.
‘‘කථඤ්‌ච, භික්‌ඛවෙ, සප්‌පුරිසො සප්‌පුරිසදානං දෙති? ඉධ, භික්‌ඛවෙ, සප්‌පුරිසො සක්‌කච්‌චං දානං දෙති, සහත්‌ථා දානං දෙති, චිත්‌තීකත්‌වා දානං දෙති, අනපවිට්‌ඨං දානං දෙති, ආගමනදිට්‌ඨිකො දානං දෙති. එවං ඛො, භික්‌ඛවෙ, සප්‌පුරිසො සප්‌පුරිසදානං දෙති.
‘‘Kathañca, bhikkhave, sappuriso sappurisadānaṃ deti? Idha, bhikkhave, sappuriso sakkaccaṃ dānaṃ deti, sahatthā dānaṃ deti, cittīkatvā dānaṃ deti, anapaviṭṭhaṃ dānaṃ deti, āgamanadiṭṭhiko dānaṃ deti. Evaṃ kho, bhikkhave, sappuriso sappurisadānaṃ deti.
‘‘සො, භික්‌ඛවෙ, සප්‌පුරිසො එවං සද්‌ධම්‌මසමන්‌නාගතො, එවං සප්‌පුරිසභත්‌ති, එවං සප්‌පුරිසචින්‌තී, එවං සප්‌පුරිසමන්‌තී, එවං සප්‌පුරිසවාචො, එවං සප්‌පුරිසකම්‌මන්‌තො, එවං සප්‌පුරිසදිට්‌ඨි; එවං සප්‌පුරිසදානං දත්‌වා කායස්‌ස භෙදා පරං මරණා යා සප්‌පුරිසානං ගති තත්‌ථ උපපජ්‌ජති. කා ච, භික්‌ඛවෙ, සප්‌පුරිසානං ගති? දෙවමහත්‌තතා වා මනුස්‌සමහත්‌තතා වා’’ති.
‘‘So, bhikkhave, sappuriso evaṃ saddhammasamannāgato, evaṃ sappurisabhatti, evaṃ sappurisacintī, evaṃ sappurisamantī, evaṃ sappurisavāco, evaṃ sappurisakammanto, evaṃ sappurisadiṭṭhi; evaṃ sappurisadānaṃ datvā kāyassa bhedā paraṃ maraṇā yā sappurisānaṃ gati tattha upapajjati. Kā ca, bhikkhave, sappurisānaṃ gati? Devamahattatā vā manussamahattatā vā’’ti.
ඉදමවොච භගවා. අත්‌තමනා තෙ භික්‌ඛූ භගවතො භාසිතං අභිනන්‌දුන්‌ති.
Idamavoca bhagavā. Attamanā te bhikkhū bhagavato bhāsitaṃ abhinandunti.
චූළපුණ්‌ණමසුත්‌තං නිට්‌ඨිතං දසමං.
Cūḷapuṇṇamasuttaṃ niṭṭhitaṃ dasamaṃ.
දෙවදහවග්‌ගො නිට්‌ඨිතො පඨමො.
Devadahavaggo niṭṭhito paṭhamo.
තස්‌සුද්‌දානං –
Tassuddānaṃ –
දෙවදහං පඤ්‌චත්‌තයං, කින්‌ති-සාම-සුනක්‌ඛත්‌තං;
Devadahaṃ pañcattayaṃ, kinti-sāma-sunakkhattaṃ;
සප්‌පාය-ගණ-ගොපක-මහාපුණ්‌ණචූළපුණ්‌ණඤ්‌චාති.
Sappāya-gaṇa-gopaka-mahāpuṇṇacūḷapuṇṇañcāti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) / 10. චූළපුණ්‌ණමසුත්‌තවණ්‌ණනා • 10. Cūḷapuṇṇamasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / මජ්‌ඣිමනිකාය (ටීකා) • Majjhimanikāya (ṭīkā) / 10. චූළපුණ්‌ණමසුත්‌තවණ්‌ණනා • 10. Cūḷapuṇṇamasuttavaṇṇanā
