| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ • Majjhimanikāya |
੧੦. ਚੂਲ਼ਪੁਣ੍ਣਮਸੁਤ੍ਤਂ
10. Cūḷapuṇṇamasuttaṃ
੯੧. ਏવਂ ਮੇ ਸੁਤਂ – ਏਕਂ ਸਮਯਂ ਭਗવਾ ਸਾવਤ੍ਥਿਯਂ વਿਹਰਤਿ ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇ। ਤੇਨ ਖੋ ਪਨ ਸਮਯੇਨ ਭਗવਾ ਤਦਹੁਪੋਸਥੇ ਪਨ੍ਨਰਸੇ ਪੁਣ੍ਣਾਯ ਪੁਣ੍ਣਮਾਯ ਰਤ੍ਤਿਯਾ ਭਿਕ੍ਖੁਸਙ੍ਘਪਰਿવੁਤੋ ਅਬ੍ਭੋਕਾਸੇ ਨਿਸਿਨ੍ਨੋ ਹੋਤਿ। ਅਥ ਖੋ ਭਗવਾ ਤੁਣ੍ਹੀਭੂਤਂ ਤੁਣ੍ਹੀਭੂਤਂ ਭਿਕ੍ਖੁਸਙ੍ਘਂ ਅਨੁવਿਲੋਕੇਤ੍વਾ ਭਿਕ੍ਖੂ ਆਮਨ੍ਤੇਸਿ – ‘‘ਜਾਨੇਯ੍ਯ ਨੁ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਂ – ‘ਅਸਪ੍ਪੁਰਿਸੋ ਅਯਂ ਭવ’’’ਨ੍ਤਿ? ‘‘ਨੋ ਹੇਤਂ, ਭਨ੍ਤੇ’’। ‘‘ਸਾਧੁ, ਭਿਕ੍ਖવੇ; ਅਟ੍ਠਾਨਮੇਤਂ, ਭਿਕ੍ਖવੇ, ਅਨવਕਾਸੋ ਯਂ ਅਸਪ੍ਪੁਰਿਸੋ ਅਸਪ੍ਪੁਰਿਸਂ ਜਾਨੇਯ੍ਯ – ‘ਅਸਪ੍ਪੁਰਿਸੋ ਅਯਂ ਭવ’ਨ੍ਤਿ। ਜਾਨੇਯ੍ਯ ਪਨ, ਭਿਕ੍ਖવੇ, ਅਸਪ੍ਪੁਰਿਸੋ ਸਪ੍ਪੁਰਿਸਂ – ‘ਸਪ੍ਪੁਰਿਸੋ ਅਯਂ ਭવ’’’ਨ੍ਤਿ? ‘‘ਨੋ ਹੇਤਂ, ਭਨ੍ਤੇ’’। ‘‘ਸਾਧੁ, ਭਿਕ੍ਖવੇ; ਏਤਮ੍ਪਿ ਖੋ, ਭਿਕ੍ਖવੇ, ਅਟ੍ਠਾਨਂ ਅਨવਕਾਸੋ ਯਂ ਅਸਪ੍ਪੁਰਿਸੋ ਸਪ੍ਪੁਰਿਸਂ ਜਾਨੇਯ੍ਯ – ‘ਸਪ੍ਪੁਰਿਸੋ ਅਯਂ ਭવ’ਨ੍ਤਿ। ਅਸਪ੍ਪੁਰਿਸੋ, ਭਿਕ੍ਖવੇ, ਅਸ੍ਸਦ੍ਧਮ੍ਮਸਮਨ੍ਨਾਗਤੋ ਹੋਤਿ, ਅਸਪ੍ਪੁਰਿਸਭਤ੍ਤਿ 1 ਹੋਤਿ, ਅਸਪ੍ਪੁਰਿਸਚਿਨ੍ਤੀ ਹੋਤਿ, ਅਸਪ੍ਪੁਰਿਸਮਨ੍ਤੀ ਹੋਤਿ, ਅਸਪ੍ਪੁਰਿਸવਾਚੋ ਹੋਤਿ, ਅਸਪ੍ਪੁਰਿਸਕਮ੍ਮਨ੍ਤੋ ਹੋਤਿ, ਅਸਪ੍ਪੁਰਿਸਦਿਟ੍ਠਿ 2 ਹੋਤਿ; ਅਸਪ੍ਪੁਰਿਸਦਾਨਂ ਦੇਤਿ’’।
91. Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena bhagavā tadahuposathe pannarase puṇṇāya puṇṇamāya rattiyā bhikkhusaṅghaparivuto abbhokāse nisinno hoti. Atha kho bhagavā tuṇhībhūtaṃ tuṇhībhūtaṃ bhikkhusaṅghaṃ anuviloketvā bhikkhū āmantesi – ‘‘jāneyya nu kho, bhikkhave, asappuriso asappurisaṃ – ‘asappuriso ayaṃ bhava’’’nti? ‘‘No hetaṃ, bhante’’. ‘‘Sādhu, bhikkhave; aṭṭhānametaṃ, bhikkhave, anavakāso yaṃ asappuriso asappurisaṃ jāneyya – ‘asappuriso ayaṃ bhava’nti. Jāneyya pana, bhikkhave, asappuriso sappurisaṃ – ‘sappuriso ayaṃ bhava’’’nti? ‘‘No hetaṃ, bhante’’. ‘‘Sādhu, bhikkhave; etampi kho, bhikkhave, aṭṭhānaṃ anavakāso yaṃ asappuriso sappurisaṃ jāneyya – ‘sappuriso ayaṃ bhava’nti. Asappuriso, bhikkhave, assaddhammasamannāgato hoti, asappurisabhatti 3 hoti, asappurisacintī hoti, asappurisamantī hoti, asappurisavāco hoti, asappurisakammanto hoti, asappurisadiṭṭhi 4 hoti; asappurisadānaṃ deti’’.
‘‘ਕਥਞ੍ਚ, ਭਿਕ੍ਖવੇ, ਅਸਪ੍ਪੁਰਿਸੋ ਅਸ੍ਸਦ੍ਧਮ੍ਮਸਮਨ੍ਨਾਗਤੋ ਹੋਤਿ? ਇਧ, ਭਿਕ੍ਖવੇ, ਅਸਪ੍ਪੁਰਿਸੋ ਅਸ੍ਸਦ੍ਧੋ ਹੋਤਿ, ਅਹਿਰਿਕੋ ਹੋਤਿ, ਅਨੋਤ੍ਤਪ੍ਪੀ ਹੋਤਿ, ਅਪ੍ਪਸ੍ਸੁਤੋ ਹੋਤਿ , ਕੁਸੀਤੋ ਹੋਤਿ, ਮੁਟ੍ਠਸ੍ਸਤਿ ਹੋਤਿ, ਦੁਪ੍ਪਞ੍ਞੋ ਹੋਤਿ। ਏવਂ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸ੍ਸਦ੍ਧਮ੍ਮਸਮਨ੍ਨਾਗਤੋ ਹੋਤਿ।
‘‘Kathañca, bhikkhave, asappuriso assaddhammasamannāgato hoti? Idha, bhikkhave, asappuriso assaddho hoti, ahiriko hoti, anottappī hoti, appassuto hoti , kusīto hoti, muṭṭhassati hoti, duppañño hoti. Evaṃ kho, bhikkhave, asappuriso assaddhammasamannāgato hoti.
‘‘ਕਥਞ੍ਚ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਭਤ੍ਤਿ ਹੋਤਿ? ਇਧ, ਭਿਕ੍ਖવੇ, ਅਸਪ੍ਪੁਰਿਸਸ੍ਸ ਯੇ ਤੇ ਸਮਣਬ੍ਰਾਹ੍ਮਣਾ ਅਸ੍ਸਦ੍ਧਾ ਅਹਿਰਿਕਾ ਅਨੋਤ੍ਤਪ੍ਪਿਨੋ ਅਪ੍ਪਸ੍ਸੁਤਾ ਕੁਸੀਤਾ ਮੁਟ੍ਠਸ੍ਸਤਿਨੋ ਦੁਪ੍ਪਞ੍ਞਾ ਤ੍ਯਾਸ੍ਸ ਮਿਤ੍ਤਾ ਹੋਨ੍ਤਿ ਤੇ ਸਹਾਯਾ। ਏવਂ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਭਤ੍ਤਿ ਹੋਤਿ।
‘‘Kathañca, bhikkhave, asappuriso asappurisabhatti hoti? Idha, bhikkhave, asappurisassa ye te samaṇabrāhmaṇā assaddhā ahirikā anottappino appassutā kusītā muṭṭhassatino duppaññā tyāssa mittā honti te sahāyā. Evaṃ kho, bhikkhave, asappuriso asappurisabhatti hoti.
‘‘ਕਥਞ੍ਚ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਚਿਨ੍ਤੀ ਹੋਤਿ? ਇਧ, ਭਿਕ੍ਖવੇ, ਅਸਪ੍ਪੁਰਿਸੋ ਅਤ੍ਤਬ੍ਯਾਬਾਧਾਯਪਿ ਚੇਤੇਤਿ, ਪਰਬ੍ਯਾਬਾਧਾਯਪਿ ਚੇਤੇਤਿ, ਉਭਯਬ੍ਯਾਬਾਧਾਯਪਿ ਚੇਤੇਤਿ। ਏવਂ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਚਿਨ੍ਤੀ ਹੋਤਿ।
‘‘Kathañca, bhikkhave, asappuriso asappurisacintī hoti? Idha, bhikkhave, asappuriso attabyābādhāyapi ceteti, parabyābādhāyapi ceteti, ubhayabyābādhāyapi ceteti. Evaṃ kho, bhikkhave, asappuriso asappurisacintī hoti.
‘‘ਕਥਞ੍ਚ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਮਨ੍ਤੀ ਹੋਤਿ? ਇਧ, ਭਿਕ੍ਖવੇ, ਅਸਪ੍ਪੁਰਿਸੋ ਅਤ੍ਤਬ੍ਯਾਬਾਧਾਯਪਿ ਮਨ੍ਤੇਤਿ, ਪਰਬ੍ਯਾਬਾਧਾਯਪਿ ਮਨ੍ਤੇਤਿ, ਉਭਯਬ੍ਯਾਬਾਧਾਯਪਿ ਮਨ੍ਤੇਤਿ। ਏવਂ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਮਨ੍ਤੀ ਹੋਤਿ।
‘‘Kathañca, bhikkhave, asappuriso asappurisamantī hoti? Idha, bhikkhave, asappuriso attabyābādhāyapi manteti, parabyābādhāyapi manteti, ubhayabyābādhāyapi manteti. Evaṃ kho, bhikkhave, asappuriso asappurisamantī hoti.
‘‘ਕਥਞ੍ਚ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸવਾਚੋ ਹੋਤਿ? ਇਧ, ਭਿਕ੍ਖવੇ, ਅਸਪ੍ਪੁਰਿਸੋ ਮੁਸਾવਾਦੀ ਹੋਤਿ, ਪਿਸੁਣવਾਚੋ ਹੋਤਿ, ਫਰੁਸવਾਚੋ ਹੋਤਿ , ਸਮ੍ਫਪ੍ਪਲਾਪੀ ਹੋਤਿ। ਏવਂ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸવਾਚੋ ਹੋਤਿ।
‘‘Kathañca, bhikkhave, asappuriso asappurisavāco hoti? Idha, bhikkhave, asappuriso musāvādī hoti, pisuṇavāco hoti, pharusavāco hoti , samphappalāpī hoti. Evaṃ kho, bhikkhave, asappuriso asappurisavāco hoti.
‘‘ਕਥਞ੍ਚ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਕਮ੍ਮਨ੍ਤੋ ਹੋਤਿ? ਇਧ , ਭਿਕ੍ਖવੇ, ਅਸਪ੍ਪੁਰਿਸੋ ਪਾਣਾਤਿਪਾਤੀ ਹੋਤਿ, ਅਦਿਨ੍ਨਾਦਾਯੀ ਹੋਤਿ, ਕਾਮੇਸੁਮਿਚ੍ਛਾਚਾਰੀ ਹੋਤਿ। ਏવਂ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਕਮ੍ਮਨ੍ਤੋ ਹੋਤਿ।
‘‘Kathañca, bhikkhave, asappuriso asappurisakammanto hoti? Idha , bhikkhave, asappuriso pāṇātipātī hoti, adinnādāyī hoti, kāmesumicchācārī hoti. Evaṃ kho, bhikkhave, asappuriso asappurisakammanto hoti.
‘‘ਕਥਞ੍ਚ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਦਿਟ੍ਠਿ ਹੋਤਿ? ਇਧ, ਭਿਕ੍ਖવੇ, ਅਸਪ੍ਪੁਰਿਸੋ ਏવਂਦਿਟ੍ਠਿ 5 ਹੋਤਿ – ‘ਨਤ੍ਥਿ ਦਿਨ੍ਨਂ, ਨਤ੍ਥਿ ਯਿਟ੍ਠਂ, ਨਤ੍ਥਿ ਹੁਤਂ, ਨਤ੍ਥਿ ਸੁਕਤਦੁਕ੍ਕਟਾਨਂ 6 ਕਮ੍ਮਾਨਂ ਫਲਂ વਿਪਾਕੋ, ਨਤ੍ਥਿ ਅਯਂ ਲੋਕੋ, ਨਤ੍ਥਿ ਪਰੋ ਲੋਕੋ, ਨਤ੍ਥਿ ਮਾਤਾ, ਨਤ੍ਥਿ ਪਿਤਾ, ਨਤ੍ਥਿ ਸਤ੍ਤਾ ਓਪਪਾਤਿਕਾ, ਨਤ੍ਥਿ ਲੋਕੇ ਸਮਣਬ੍ਰਾਹ੍ਮਣਾ ਸਮ੍ਮਗ੍ਗਤਾ 7 ਸਮ੍ਮਾਪਟਿਪਨ੍ਨਾ, ਯੇ ਇਮਞ੍ਚ ਲੋਕਂ ਪਰਞ੍ਚ ਲੋਕਂ ਸਯਂ ਅਭਿਞ੍ਞਾ ਸਚ੍ਛਿਕਤ੍વਾ ਪવੇਦੇਨ੍ਤੀ’ਤਿ। ਏવਂ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਦਿਟ੍ਠਿ ਹੋਤਿ।
‘‘Kathañca, bhikkhave, asappuriso asappurisadiṭṭhi hoti? Idha, bhikkhave, asappuriso evaṃdiṭṭhi 8 hoti – ‘natthi dinnaṃ, natthi yiṭṭhaṃ, natthi hutaṃ, natthi sukatadukkaṭānaṃ 9 kammānaṃ phalaṃ vipāko, natthi ayaṃ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā 10 sammāpaṭipannā, ye imañca lokaṃ parañca lokaṃ sayaṃ abhiññā sacchikatvā pavedentī’ti. Evaṃ kho, bhikkhave, asappuriso asappurisadiṭṭhi hoti.
‘‘ਕਥਞ੍ਚ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਦਾਨਂ ਦੇਤਿ? ਇਧ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਕ੍ਕਚ੍ਚਂ ਦਾਨਂ ਦੇਤਿ, ਅਸਹਤ੍ਥਾ ਦਾਨਂ ਦੇਤਿ, ਅਚਿਤ੍ਤੀਕਤ੍વਾ ਦਾਨਂ ਦੇਤਿ, ਅਪવਿਟ੍ਠਂ ਦਾਨਂ ਦੇਤਿ ਅਨਾਗਮਨਦਿਟ੍ਠਿਕੋ ਦਾਨਂ ਦੇਤਿ। ਏવਂ ਖੋ, ਭਿਕ੍ਖવੇ, ਅਸਪ੍ਪੁਰਿਸੋ ਅਸਪ੍ਪੁਰਿਸਦਾਨਂ ਦੇਤਿ।
‘‘Kathañca, bhikkhave, asappuriso asappurisadānaṃ deti? Idha, bhikkhave, asappuriso asakkaccaṃ dānaṃ deti, asahatthā dānaṃ deti, acittīkatvā dānaṃ deti, apaviṭṭhaṃ dānaṃ deti anāgamanadiṭṭhiko dānaṃ deti. Evaṃ kho, bhikkhave, asappuriso asappurisadānaṃ deti.
‘‘ਸੋ, ਭਿਕ੍ਖવੇ, ਅਸਪ੍ਪੁਰਿਸੋ ਏવਂ ਅਸ੍ਸਦ੍ਧਮ੍ਮਸਮਨ੍ਨਾਗਤੋ, ਏવਂ ਅਸਪ੍ਪੁਰਿਸਭਤ੍ਤਿ, ਏવਂ ਅਸਪ੍ਪੁਰਿਸਚਿਨ੍ਤੀ, ਏવਂ ਅਸਪ੍ਪੁਰਿਸਮਨ੍ਤੀ, ਏવਂ ਅਸਪ੍ਪੁਰਿਸવਾਚੋ, ਏવਂ ਅਸਪ੍ਪੁਰਿਸਕਮ੍ਮਨ੍ਤੋ, ਏવਂ ਅਸਪ੍ਪੁਰਿਸਦਿਟ੍ਠਿ; ਏવਂ ਅਸਪ੍ਪੁਰਿਸਦਾਨਂ ਦਤ੍વਾ ਕਾਯਸ੍ਸ ਭੇਦਾ ਪਰਂ ਮਰਣਾ ਯਾ ਅਸਪ੍ਪੁਰਿਸਾਨਂ ਗਤਿ ਤਤ੍ਥ ਉਪਪਜ੍ਜਤਿ। ਕਾ ਚ, ਭਿਕ੍ਖવੇ, ਅਸਪ੍ਪੁਰਿਸਾਨਂ ਗਤਿ? ਨਿਰਯੋ વਾ ਤਿਰਚ੍ਛਾਨਯੋਨਿ વਾ।
‘‘So, bhikkhave, asappuriso evaṃ assaddhammasamannāgato, evaṃ asappurisabhatti, evaṃ asappurisacintī, evaṃ asappurisamantī, evaṃ asappurisavāco, evaṃ asappurisakammanto, evaṃ asappurisadiṭṭhi; evaṃ asappurisadānaṃ datvā kāyassa bhedā paraṃ maraṇā yā asappurisānaṃ gati tattha upapajjati. Kā ca, bhikkhave, asappurisānaṃ gati? Nirayo vā tiracchānayoni vā.
੯੨. ‘‘ਜਾਨੇਯ੍ਯ ਨੁ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਂ – ‘ਸਪ੍ਪੁਰਿਸੋ ਅਯਂ ਭવ’’’ਨ੍ਤਿ? ‘‘ਏવਂ , ਭਨ੍ਤੇ’’। ‘‘ਸਾਧੁ, ਭਿਕ੍ਖવੇ; ਠਾਨਮੇਤਂ, ਭਿਕ੍ਖવੇ, વਿਜ੍ਜਤਿ ਯਂ ਸਪ੍ਪੁਰਿਸੋ ਸਪ੍ਪੁਰਿਸਂ ਜਾਨੇਯ੍ਯ – ‘ਸਪ੍ਪੁਰਿਸੋ ਅਯਂ ਭવ’ਨ੍ਤਿ। ਜਾਨੇਯ੍ਯ ਪਨ, ਭਿਕ੍ਖવੇ, ਸਪ੍ਪੁਰਿਸੋ ਅਸਪ੍ਪੁਰਿਸਂ – ‘ਅਸਪ੍ਪੁਰਿਸੋ ਅਯਂ ਭવ’’’ਨ੍ਤਿ? ‘‘ਏવਂ, ਭਨ੍ਤੇ’’। ‘‘ਸਾਧੁ, ਭਿਕ੍ਖવੇ; ਏਤਮ੍ਪਿ ਖੋ, ਭਿਕ੍ਖવੇ, ਠਾਨਂ વਿਜ੍ਜਤਿ ਯਂ ਸਪ੍ਪੁਰਿਸੋ ਅਸਪ੍ਪੁਰਿਸਂ ਜਾਨੇਯ੍ਯ – ‘ਅਸਪ੍ਪੁਰਿਸੋ ਅਯਂ ਭવ’ਨ੍ਤਿ। ਸਪ੍ਪੁਰਿਸੋ, ਭਿਕ੍ਖવੇ, ਸਦ੍ਧਮ੍ਮਸਮਨ੍ਨਾਗਤੋ ਹੋਤਿ, ਸਪ੍ਪੁਰਿਸਭਤ੍ਤਿ ਹੋਤਿ, ਸਪ੍ਪੁਰਿਸਚਿਨ੍ਤੀ ਹੋਤਿ, ਸਪ੍ਪੁਰਿਸਮਨ੍ਤੀ ਹੋਤਿ, ਸਪ੍ਪੁਰਿਸવਾਚੋ ਹੋਤਿ, ਸਪ੍ਪੁਰਿਸਕਮ੍ਮਨ੍ਤੋ ਹੋਤਿ, ਸਪ੍ਪੁਰਿਸਦਿਟ੍ਠਿ ਹੋਤਿ; ਸਪ੍ਪੁਰਿਸਦਾਨਂ ਦੇਤਿ’’।
92. ‘‘Jāneyya nu kho, bhikkhave, sappuriso sappurisaṃ – ‘sappuriso ayaṃ bhava’’’nti? ‘‘Evaṃ , bhante’’. ‘‘Sādhu, bhikkhave; ṭhānametaṃ, bhikkhave, vijjati yaṃ sappuriso sappurisaṃ jāneyya – ‘sappuriso ayaṃ bhava’nti. Jāneyya pana, bhikkhave, sappuriso asappurisaṃ – ‘asappuriso ayaṃ bhava’’’nti? ‘‘Evaṃ, bhante’’. ‘‘Sādhu, bhikkhave; etampi kho, bhikkhave, ṭhānaṃ vijjati yaṃ sappuriso asappurisaṃ jāneyya – ‘asappuriso ayaṃ bhava’nti. Sappuriso, bhikkhave, saddhammasamannāgato hoti, sappurisabhatti hoti, sappurisacintī hoti, sappurisamantī hoti, sappurisavāco hoti, sappurisakammanto hoti, sappurisadiṭṭhi hoti; sappurisadānaṃ deti’’.
‘‘ਕਥਞ੍ਚ, ਭਿਕ੍ਖવੇ, ਸਪ੍ਪੁਰਿਸੋ ਸਦ੍ਧਮ੍ਮਸਮਨ੍ਨਾਗਤੋ ਹੋਤਿ? ਇਧ, ਭਿਕ੍ਖવੇ, ਸਪ੍ਪੁਰਿਸੋ ਸਦ੍ਧੋ ਹੋਤਿ, ਹਿਰਿਮਾ ਹੋਤਿ, ਓਤ੍ਤਪ੍ਪੀ ਹੋਤਿ, ਬਹੁਸ੍ਸੁਤੋ ਹੋਤਿ, ਆਰਦ੍ਧવੀਰਿਯੋ ਹੋਤਿ, ਉਪਟ੍ਠਿਤਸ੍ਸਤਿ ਹੋਤਿ, ਪਞ੍ਞવਾ ਹੋਤਿ। ਏવਂ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਦ੍ਧਮ੍ਮਸਮਨ੍ਨਾਗਤੋ ਹੋਤਿ।
‘‘Kathañca, bhikkhave, sappuriso saddhammasamannāgato hoti? Idha, bhikkhave, sappuriso saddho hoti, hirimā hoti, ottappī hoti, bahussuto hoti, āraddhavīriyo hoti, upaṭṭhitassati hoti, paññavā hoti. Evaṃ kho, bhikkhave, sappuriso saddhammasamannāgato hoti.
‘‘ਕਥਞ੍ਚ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਭਤ੍ਤਿ ਹੋਤਿ? ਇਧ, ਭਿਕ੍ਖવੇ, ਸਪ੍ਪੁਰਿਸਸ੍ਸ ਯੇ ਤੇ ਸਮਣਬ੍ਰਾਹ੍ਮਣਾ ਸਦ੍ਧਾ ਹਿਰਿਮਨ੍ਤੋ ਓਤ੍ਤਪ੍ਪਿਨੋ ਬਹੁਸ੍ਸੁਤਾ ਆਰਦ੍ਧવੀਰਿਯਾ ਉਪਟ੍ਠਿਤਸ੍ਸਤਿਨੋ ਪਞ੍ਞવਨ੍ਤੋ ਤ੍ਯਾਸ੍ਸ ਮਿਤ੍ਤਾ ਹੋਨ੍ਤਿ, ਤੇ ਸਹਾਯਾ। ਏવਂ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਭਤ੍ਤਿ ਹੋਤਿ।
‘‘Kathañca, bhikkhave, sappuriso sappurisabhatti hoti? Idha, bhikkhave, sappurisassa ye te samaṇabrāhmaṇā saddhā hirimanto ottappino bahussutā āraddhavīriyā upaṭṭhitassatino paññavanto tyāssa mittā honti, te sahāyā. Evaṃ kho, bhikkhave, sappuriso sappurisabhatti hoti.
‘‘ਕਥਞ੍ਚ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਚਿਨ੍ਤੀ ਹੋਤਿ? ਇਧ, ਭਿਕ੍ਖવੇ, ਸਪ੍ਪੁਰਿਸੋ ਨੇવਤ੍ਤਬ੍ਯਾਬਾਧਾਯ ਚੇਤੇਤਿ, ਨ ਪਰਬ੍ਯਾਬਾਧਾਯ ਚੇਤੇਤਿ, ਨ ਉਭਯਬ੍ਯਾਬਾਧਾਯ ਚੇਤੇਤਿ। ਏવਂ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਚਿਨ੍ਤੀ ਹੋਤਿ।
‘‘Kathañca, bhikkhave, sappuriso sappurisacintī hoti? Idha, bhikkhave, sappuriso nevattabyābādhāya ceteti, na parabyābādhāya ceteti, na ubhayabyābādhāya ceteti. Evaṃ kho, bhikkhave, sappuriso sappurisacintī hoti.
‘‘ਕਥਞ੍ਚ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਮਨ੍ਤੀ ਹੋਤਿ? ਇਧ, ਭਿਕ੍ਖવੇ, ਸਪ੍ਪੁਰਿਸੋ ਨੇવਤ੍ਤਬ੍ਯਾਬਾਧਾਯ ਮਨ੍ਤੇਤਿ, ਨ ਪਰਬ੍ਯਾਬਾਧਾਯ ਮਨ੍ਤੇਤਿ, ਨ ਉਭਯਬ੍ਯਾਬਾਧਾਯ ਮਨ੍ਤੇਤਿ। ਏવਂ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਮਨ੍ਤੀ ਹੋਤਿ।
‘‘Kathañca, bhikkhave, sappuriso sappurisamantī hoti? Idha, bhikkhave, sappuriso nevattabyābādhāya manteti, na parabyābādhāya manteti, na ubhayabyābādhāya manteti. Evaṃ kho, bhikkhave, sappuriso sappurisamantī hoti.
‘‘ਕਥਞ੍ਚ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸવਾਚੋ ਹੋਤਿ? ਇਧ, ਭਿਕ੍ਖવੇ, ਸਪ੍ਪੁਰਿਸੋ ਮੁਸਾવਾਦਾ ਪਟਿવਿਰਤੋ ਹੋਤਿ, ਪਿਸੁਣਾਯ વਾਚਾਯ ਪਟਿવਿਰਤੋ ਹੋਤਿ, ਫਰੁਸਾਯ વਾਚਾਯ ਪਟਿવਿਰਤੋ ਹੋਤਿ, ਸਮ੍ਫਪ੍ਪਲਾਪਾ ਪਟਿવਿਰਤੋ ਹੋਤਿ। ਏવਂ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸવਾਚੋ ਹੋਤਿ।
‘‘Kathañca, bhikkhave, sappuriso sappurisavāco hoti? Idha, bhikkhave, sappuriso musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti. Evaṃ kho, bhikkhave, sappuriso sappurisavāco hoti.
‘‘ਕਥਞ੍ਚ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਕਮ੍ਮਨ੍ਤੋ ਹੋਤਿ? ਇਧ, ਭਿਕ੍ਖવੇ, ਸਪ੍ਪੁਰਿਸੋ ਪਾਣਾਤਿਪਾਤਾ ਪਟਿવਿਰਤੋ ਹੋਤਿ, ਅਦਿਨ੍ਨਾਦਾਨਾ ਪਟਿવਿਰਤੋ ਹੋਤਿ, ਕਾਮੇਸੁਮਿਚ੍ਛਾਚਾਰਾ ਪਟਿવਿਰਤੋ ਹੋਤਿ। ਏવਂ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਕਮ੍ਮਨ੍ਤੋ ਹੋਤਿ।
‘‘Kathañca, bhikkhave, sappuriso sappurisakammanto hoti? Idha, bhikkhave, sappuriso pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti. Evaṃ kho, bhikkhave, sappuriso sappurisakammanto hoti.
‘‘ਕਥਞ੍ਚ , ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਦਿਟ੍ਠਿ ਹੋਤਿ? ਇਧ, ਭਿਕ੍ਖવੇ, ਸਪ੍ਪੁਰਿਸੋ ਏવਂਦਿਟ੍ਠਿ ਹੋਤਿ – ‘ਅਤ੍ਥਿ ਦਿਨ੍ਨਂ, ਅਤ੍ਥਿ ਯਿਟ੍ਠਂ, ਅਤ੍ਥਿ ਹੁਤਂ, ਅਤ੍ਥਿ ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ વਿਪਾਕੋ, ਅਤ੍ਥਿ ਅਯਂ ਲੋਕੋ , ਅਤ੍ਥਿ ਪਰੋ ਲੋਕੋ, ਅਤ੍ਥਿ ਮਾਤਾ, ਅਤ੍ਥਿ ਪਿਤਾ, ਅਤ੍ਥਿ ਸਤ੍ਤਾ ਓਪਪਾਤਿਕਾ, ਅਤ੍ਥਿ ਲੋਕੇ ਸਮਣਬ੍ਰਾਹ੍ਮਣਾ ਸਮ੍ਮਗ੍ਗਤਾ ਸਮ੍ਮਾਪਟਿਪਨ੍ਨਾ ਯੇ ਇਮਞ੍ਚ ਲੋਕਂ ਪਰਞ੍ਚ ਲੋਕਂ ਸਯਂ ਅਭਿਞ੍ਞਾ ਸਚ੍ਛਿਕਤ੍વਾ ਪવੇਦੇਨ੍ਤੀ’ਤਿ। ਏવਂ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਦਿਟ੍ਠਿ ਹੋਤਿ।
‘‘Kathañca , bhikkhave, sappuriso sappurisadiṭṭhi hoti? Idha, bhikkhave, sappuriso evaṃdiṭṭhi hoti – ‘atthi dinnaṃ, atthi yiṭṭhaṃ, atthi hutaṃ, atthi sukatadukkaṭānaṃ kammānaṃ phalaṃ vipāko, atthi ayaṃ loko , atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentī’ti. Evaṃ kho, bhikkhave, sappuriso sappurisadiṭṭhi hoti.
‘‘ਕਥਞ੍ਚ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਦਾਨਂ ਦੇਤਿ? ਇਧ, ਭਿਕ੍ਖવੇ, ਸਪ੍ਪੁਰਿਸੋ ਸਕ੍ਕਚ੍ਚਂ ਦਾਨਂ ਦੇਤਿ, ਸਹਤ੍ਥਾ ਦਾਨਂ ਦੇਤਿ, ਚਿਤ੍ਤੀਕਤ੍વਾ ਦਾਨਂ ਦੇਤਿ, ਅਨਪવਿਟ੍ਠਂ ਦਾਨਂ ਦੇਤਿ, ਆਗਮਨਦਿਟ੍ਠਿਕੋ ਦਾਨਂ ਦੇਤਿ। ਏવਂ ਖੋ, ਭਿਕ੍ਖવੇ, ਸਪ੍ਪੁਰਿਸੋ ਸਪ੍ਪੁਰਿਸਦਾਨਂ ਦੇਤਿ।
‘‘Kathañca, bhikkhave, sappuriso sappurisadānaṃ deti? Idha, bhikkhave, sappuriso sakkaccaṃ dānaṃ deti, sahatthā dānaṃ deti, cittīkatvā dānaṃ deti, anapaviṭṭhaṃ dānaṃ deti, āgamanadiṭṭhiko dānaṃ deti. Evaṃ kho, bhikkhave, sappuriso sappurisadānaṃ deti.
‘‘ਸੋ, ਭਿਕ੍ਖવੇ, ਸਪ੍ਪੁਰਿਸੋ ਏવਂ ਸਦ੍ਧਮ੍ਮਸਮਨ੍ਨਾਗਤੋ, ਏવਂ ਸਪ੍ਪੁਰਿਸਭਤ੍ਤਿ, ਏવਂ ਸਪ੍ਪੁਰਿਸਚਿਨ੍ਤੀ, ਏવਂ ਸਪ੍ਪੁਰਿਸਮਨ੍ਤੀ, ਏવਂ ਸਪ੍ਪੁਰਿਸવਾਚੋ, ਏવਂ ਸਪ੍ਪੁਰਿਸਕਮ੍ਮਨ੍ਤੋ, ਏવਂ ਸਪ੍ਪੁਰਿਸਦਿਟ੍ਠਿ; ਏવਂ ਸਪ੍ਪੁਰਿਸਦਾਨਂ ਦਤ੍વਾ ਕਾਯਸ੍ਸ ਭੇਦਾ ਪਰਂ ਮਰਣਾ ਯਾ ਸਪ੍ਪੁਰਿਸਾਨਂ ਗਤਿ ਤਤ੍ਥ ਉਪਪਜ੍ਜਤਿ। ਕਾ ਚ, ਭਿਕ੍ਖવੇ, ਸਪ੍ਪੁਰਿਸਾਨਂ ਗਤਿ? ਦੇવਮਹਤ੍ਤਤਾ વਾ ਮਨੁਸ੍ਸਮਹਤ੍ਤਤਾ વਾ’’ਤਿ।
‘‘So, bhikkhave, sappuriso evaṃ saddhammasamannāgato, evaṃ sappurisabhatti, evaṃ sappurisacintī, evaṃ sappurisamantī, evaṃ sappurisavāco, evaṃ sappurisakammanto, evaṃ sappurisadiṭṭhi; evaṃ sappurisadānaṃ datvā kāyassa bhedā paraṃ maraṇā yā sappurisānaṃ gati tattha upapajjati. Kā ca, bhikkhave, sappurisānaṃ gati? Devamahattatā vā manussamahattatā vā’’ti.
ਇਦਮવੋਚ ਭਗવਾ। ਅਤ੍ਤਮਨਾ ਤੇ ਭਿਕ੍ਖੂ ਭਗવਤੋ ਭਾਸਿਤਂ ਅਭਿਨਨ੍ਦੁਨ੍ਤਿ।
Idamavoca bhagavā. Attamanā te bhikkhū bhagavato bhāsitaṃ abhinandunti.
ਚੂਲ਼ਪੁਣ੍ਣਮਸੁਤ੍ਤਂ ਨਿਟ੍ਠਿਤਂ ਦਸਮਂ।
Cūḷapuṇṇamasuttaṃ niṭṭhitaṃ dasamaṃ.
ਦੇવਦਹવਗ੍ਗੋ ਨਿਟ੍ਠਿਤੋ ਪਠਮੋ।
Devadahavaggo niṭṭhito paṭhamo.
ਤਸ੍ਸੁਦ੍ਦਾਨਂ –
Tassuddānaṃ –
ਦੇવਦਹਂ ਪਞ੍ਚਤ੍ਤਯਂ, ਕਿਨ੍ਤਿ-ਸਾਮ-ਸੁਨਕ੍ਖਤ੍ਤਂ।
Devadahaṃ pañcattayaṃ, kinti-sāma-sunakkhattaṃ;
ਸਪ੍ਪਾਯ-ਗਣ-ਗੋਪਕ-ਮਹਾਪੁਣ੍ਣਚੂਲ਼ਪੁਣ੍ਣਞ੍ਚਾਤਿ॥
Sappāya-gaṇa-gopaka-mahāpuṇṇacūḷapuṇṇañcāti.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੧੦. ਚੂਲ਼ਪੁਣ੍ਣਮਸੁਤ੍ਤવਣ੍ਣਨਾ • 10. Cūḷapuṇṇamasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੧੦. ਚੂਲ਼ਪੁਣ੍ਣਮਸੁਤ੍ਤવਣ੍ਣਨਾ • 10. Cūḷapuṇṇamasuttavaṇṇanā
