| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
10. சூளபுண்ணமஸுத்தவண்ணனா
10. Cūḷapuṇṇamasuttavaṇṇanā
91. துண்ஹீபூ⁴தங் துண்ஹீபூ⁴தந்தி ஆமேடி³தவசனங் ப்³யாபனிச்சா²வஸேன வுத்தந்தி ஆஹ – ‘‘யங் யங் தி³ஸ’’ந்திஆதி³. அனுவிலோகெத்வாதி எத்த² அனுஸத்³தோ³பி ப்³யாபனிச்சா²யமேவாதி அனு அனு விலோகெத்வாதி அத்தோ². தேனேவாஹ – ‘‘ததோ ததோ விலோகெத்வா’’தி. அஸந்தோ நீசோ புரிஸோதி அஸப்புரிஸோதி ஆஹ – ‘‘பாபபுரிஸோ லாமகபுரிஸோ’’தி. ஸோதி அஸப்புரிஸோ. தந்தி அஸப்புரிஸங் ஜானிதுங் ந ஸக்கோதி அஸப்புரிஸத⁴ம்மானங் யாதா²வதோ அஜானநதோ. பாபத⁴ம்மஸமன்னாக³தோதி காயது³ச்சரிதாதி³அஸந்துட்டி²தாதி³லாமகத⁴ம்மஸமன்னாக³தோ. அஸப்புரிஸே ப⁴த்தி ஏதஸ்ஸாதி அஸப்புரிஸப⁴த்தி. தேனாஹ – ‘‘அஸப்புரிஸஸேவனோ’’தி. அஸப்புரிஸத⁴ம்மோ அஸப்புரிஸோ உத்தரபத³லோபேன, தேஸங் சிந்தனஸீலோதி அஸப்புரிஸசிந்தீ. தேனாஹ ‘‘அஸப்புரிஸசிந்தாய சிந்தகோ’’தி, து³ச்சிந்திதசிந்தீதி அத்தோ². அஸப்புரிஸமந்தனந்தி அஸாது⁴ஜனவிசாரங் அஸப்புரிஸவீமங்ஸங். அஸப்புரிஸவாசந்தி சதுப்³பி³த⁴ங் து³ப்³பா⁴ஸிதங். அஸப்புரிஸகம்மங் நாம திவித⁴ம்பி காயது³ச்சரிதங். அஸப்புரிஸதி³ட்டி² நாம விஸேஸதோ த³ஸவத்து²கா மிச்சா²தி³ட்டி², தாய ஸமன்னாக³தோ அஸப்புரிஸதி³ட்டி²யா ஸமன்னாக³தோ, அஸப்புரிஸதா³னங் நாம அஸக்கச்சதா³னாதி³. ஸப்³போ³பாயமத்தோ² பாளிதோ ஏவ விஞ்ஞாயதி.
91.Tuṇhībhūtaṃtuṇhībhūtanti āmeḍitavacanaṃ byāpanicchāvasena vuttanti āha – ‘‘yaṃ yaṃ disa’’ntiādi. Anuviloketvāti ettha anusaddopi byāpanicchāyamevāti anu anu viloketvāti attho. Tenevāha – ‘‘tato tato viloketvā’’ti. Asanto nīco purisoti asappurisoti āha – ‘‘pāpapuriso lāmakapuriso’’ti. Soti asappuriso. Tanti asappurisaṃ jānituṃ na sakkoti asappurisadhammānaṃ yāthāvato ajānanato. Pāpadhammasamannāgatoti kāyaduccaritādiasantuṭṭhitādilāmakadhammasamannāgato. Asappurise bhatti etassāti asappurisabhatti. Tenāha – ‘‘asappurisasevano’’ti. Asappurisadhammo asappuriso uttarapadalopena, tesaṃ cintanasīloti asappurisacintī. Tenāha ‘‘asappurisacintāya cintako’’ti, duccintitacintīti attho. Asappurisamantananti asādhujanavicāraṃ asappurisavīmaṃsaṃ. Asappurisavācanti catubbidhaṃ dubbhāsitaṃ. Asappurisakammaṃ nāma tividhampi kāyaduccaritaṃ. Asappurisadiṭṭhi nāma visesato dasavatthukā micchādiṭṭhi, tāya samannāgato asappurisadiṭṭhiyā samannāgato, asappurisadānaṃ nāma asakkaccadānādi. Sabbopāyamattho pāḷito eva viññāyati.
‘‘பாணங் ஹனிஸ்ஸாமீ’’திஆதி³கா சேதனா காமங் பரப்³யாபா³தா⁴யபி ஹோதியேவ, யதா² பன ஸா அத்தனோ ப³லவதரது³க்க²த்தா²ய ஹோதி, ததா² ந பரஸ்ஸாதி இமமத்த²ங் த³ஸ்ஸேதுங், ‘‘அத்தனோ து³க்க²த்தா²ய சிந்தேதி’’இச்சேவ வுத்தோ. யதா² அஸுகோ அஸுகந்திஆதீ³ஹி பாபகோ பாபவிபாகேகதே³ஸங் ப³லவங் க³ருதரங் வா பச்சனுபொ⁴ந்தோபி யதா² பரோ பச்சனுபோ⁴தி, ந ததா² ஸயந்தி த³ஸ்ஸேதி. தேனாஹ ‘‘பரப்³யாபா³தா⁴யா’’தி. க³ஹெத்வாதி பாபகிரியாய ஸஹாயபா⁴வேன க³ஹெத்வா.
‘‘Pāṇaṃ hanissāmī’’tiādikā cetanā kāmaṃ parabyābādhāyapi hotiyeva, yathā pana sā attano balavataradukkhatthāya hoti, tathā na parassāti imamatthaṃ dassetuṃ, ‘‘attano dukkhatthāya cinteti’’icceva vutto. Yathā asuko asukantiādīhi pāpako pāpavipākekadesaṃ balavaṃ garutaraṃ vā paccanubhontopi yathā paro paccanubhoti, na tathā sayanti dasseti. Tenāha ‘‘parabyābādhāyā’’ti. Gahetvāti pāpakiriyāya sahāyabhāvena gahetvā.
அஸக்கச்சந்தி அனாத³ரங் கத்வா. தெ³ய்யத⁴ம்மஸ்ஸ அஸக்கரணங் அப்பஸன்னாகாரோ, புக்³க³லஸ்ஸ அஸக்கரணங் அக³ருகரணந்தி இமமத்த²ங் த³ஸ்ஸெந்தோ, ‘‘தெ³ய்யத⁴ம்மங் ந ஸக்கரோதி நாமா’’திஆதி³மாஹ. அசித்தீகத்வாதி ந சித்தே கத்வா, ந பூஜெத்வாதி அத்தோ². பூஜெந்தோ ஹி பூஜேதப்³ப³வத்து²ங் சித்தே ட²பேதி, ததோ ந ப³ஹி கரோதி. சித்தங் வா அச்ச²ரியங் கத்வா படிபத்தி சித்தீகரணங், ஸம்பா⁴வனகிரியா. தப்படிக்கே²பதோ அசித்தீகரணங், அஸம்பா⁴வனகிரியா. அபவித்³த⁴ந்தி உச்சி²ட்டா²தி³ச²ட்³ட³னீயத⁴ம்மங் விய அவகி²த்தகங். தேனாஹ – ‘‘ச²ட்³டே³துகாமோ வியா’’திஆதி³. ரோக³ங் பக்கி²பந்தோ வியாதி ரோகி³கஸரீரங் ஓத³னாதீ³ஹி பமஜ்ஜித்வா வம்மிகே ரோக³ங் பக்கி²பந்தோ விய. அத்³தா⁴ இமஸ்ஸ தா³னஸ்ஸ ப²லங் மமேவ ஆக³ச்ச²தீதி ஏவங் யஸ்ஸ ததா² தி³ட்டி² அத்தி², ஸோ ஆக³மனதி³ட்டி²கோ, அயங் பன ந தாதி³ஸோதி ஆஹ ‘‘அனாக³மனதி³ட்டி²கோ’’தி. தேனாஹ – ‘‘நோ ப²லபாடிகங்கீ² ஹுத்வா தே³தீ’’தி.
Asakkaccanti anādaraṃ katvā. Deyyadhammassa asakkaraṇaṃ appasannākāro, puggalassa asakkaraṇaṃ agarukaraṇanti imamatthaṃ dassento, ‘‘deyyadhammaṃ na sakkaroti nāmā’’tiādimāha. Acittīkatvāti na citte katvā, na pūjetvāti attho. Pūjento hi pūjetabbavatthuṃ citte ṭhapeti, tato na bahi karoti. Cittaṃ vā acchariyaṃ katvā paṭipatti cittīkaraṇaṃ, sambhāvanakiriyā. Tappaṭikkhepato acittīkaraṇaṃ, asambhāvanakiriyā. Apaviddhanti ucchiṭṭhādichaḍḍanīyadhammaṃ viya avakhittakaṃ. Tenāha – ‘‘chaḍḍetukāmo viyā’’tiādi. Rogaṃ pakkhipantoviyāti rogikasarīraṃ odanādīhi pamajjitvā vammike rogaṃ pakkhipanto viya. Addhā imassa dānassa phalaṃ mameva āgacchatīti evaṃ yassa tathā diṭṭhi atthi, so āgamanadiṭṭhiko, ayaṃ pana na tādisoti āha ‘‘anāgamanadiṭṭhiko’’ti. Tenāha – ‘‘no phalapāṭikaṅkhī hutvā detī’’ti.
காமஞ்சாயங் யதா²வுத்தபுக்³க³லோ அஸத்³த⁴ம்மாதீ³ஹி பாபத⁴ம்மேஹி ஸமன்னாக³தோ, தேஹி பன ஸப்³பே³ஹிபி மிச்சா²த³ஸ்ஸனங் மஹாஸாவஜ்ஜந்தி த³ஸ்ஸேதுங், ‘‘தாய மிச்சா²தி³ட்டி²யா நிரயே உபபஜ்ஜதீ’’தி வுத்தங். வுத்தபடிபக்க²னயேனாதி கண்ஹபக்கே² வுத்தஸ்ஸ அத்த²ஸ்ஸ விபரியாயேன ஸுக்கபக்கே² அத்தோ² வேதி³தப்³போ³. ‘‘ஸதே³வகங் லோக’’ந்திஆதீ³ஸு (பாரா॰ 1) தே³வஸத்³தோ³ ச²காமாவசரதே³வேஸு, ஏவமிதா⁴தி ஆஹ ‘‘ச²காமாவசரதே³வா’’தி. தத்த² ப்³ரஹ்மானங் விஸுங் க³ஹிதத்தா காமாவசரதே³வக்³க³ஹணந்தி சே? இத⁴ தா³னப²லஸ்ஸ அதி⁴ப்பேதத்தா காமாவசரதே³வக்³க³ஹணங் , தத்தா²பி ச²காமாவசரக்³க³ஹணங் த³ட்ட²ப்³ப³ங் தே³வமஹத்ததாதி³வசனதோ. திண்ணங் குலானங் ஸம்பத்தீதி க²த்தியமஹத்தாதீ³னங் திண்ணங் குலானங் ஸம்பத்தி, ந கேவலங் குலஸம்பதா³ ஏவ அதி⁴ப்பேதா, அத² கோ² தத்த² ஆயுவண்ணயஸபோ⁴க³இஸ்ஸரியாதி³ஸம்பதா³பி அதி⁴ப்பேதாதி த³ட்ட²ப்³ப³ங் உளாரஸ்ஸ தா³னமயபுஞ்ஞஸ்ஸ வஸேன தேஸம்பி ஸமிஜ்ஜ²னதோ. ஸுத்³த⁴வட்டவஸேனேவ கதி²தங் ஸுக்கபக்கே²பி ஸப்³ப³ஸோ விவட்டஸ்ஸ அனாமட்ட²த்தா. ஸத்³தா⁴த³யோ ஹி லோகியகுஸலஸம்பா⁴ரா ஏவெத்த² அதி⁴ப்பேதாதி. ஸேஸங் ஸுவிஞ்ஞெய்யமேவ.
Kāmañcāyaṃ yathāvuttapuggalo asaddhammādīhi pāpadhammehi samannāgato, tehi pana sabbehipi micchādassanaṃ mahāsāvajjanti dassetuṃ, ‘‘tāya micchādiṭṭhiyā niraye upapajjatī’’ti vuttaṃ. Vuttapaṭipakkhanayenāti kaṇhapakkhe vuttassa atthassa vipariyāyena sukkapakkhe attho veditabbo. ‘‘Sadevakaṃ loka’’ntiādīsu (pārā. 1) devasaddo chakāmāvacaradevesu, evamidhāti āha ‘‘chakāmāvacaradevā’’ti. Tattha brahmānaṃ visuṃ gahitattā kāmāvacaradevaggahaṇanti ce? Idha dānaphalassa adhippetattā kāmāvacaradevaggahaṇaṃ , tatthāpi chakāmāvacaraggahaṇaṃ daṭṭhabbaṃ devamahattatādivacanato. Tiṇṇaṃ kulānaṃ sampattīti khattiyamahattādīnaṃ tiṇṇaṃ kulānaṃ sampatti, na kevalaṃ kulasampadā eva adhippetā, atha kho tattha āyuvaṇṇayasabhogaissariyādisampadāpi adhippetāti daṭṭhabbaṃ uḷārassa dānamayapuññassa vasena tesampi samijjhanato. Suddhavaṭṭavaseneva kathitaṃ sukkapakkhepi sabbaso vivaṭṭassa anāmaṭṭhattā. Saddhādayo hi lokiyakusalasambhārā evettha adhippetāti. Sesaṃ suviññeyyameva.
சூளபுண்ணமஸுத்தவண்ணனாய லீனத்த²ப்பகாஸனா ஸமத்தா.
Cūḷapuṇṇamasuttavaṇṇanāya līnatthappakāsanā samattā.
நிட்டி²தா ச தே³வத³ஹவக்³க³வண்ணனா.
Niṭṭhitā ca devadahavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. சூளபுண்ணமஸுத்தங் • 10. Cūḷapuṇṇamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 10. சூளபுண்ணமஸுத்தவண்ணனா • 10. Cūḷapuṇṇamasuttavaṇṇanā
