| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
১০. চূল়পুণ্ণমসুত্তৰণ্ণনা
10. Cūḷapuṇṇamasuttavaṇṇanā
৯১. এৰং মে সুতন্তি চূল়পুণ্ণমসুত্তং। তত্থ তুণ্হীভূতং তুণ্হীভূতন্তি যং যং দিসং অনুৰিলোকেতি, তত্থ তত্থ তুণ্হীভূতমেৰ। অনুৰিলোকেত্ৰাতি পঞ্চপসাদপটিমণ্ডিতানি অক্খীনি উম্মীলেত্ৰা ততো ততো ৰিলোকেত্ৰা অন্তমসো হত্থকুক্কুচ্চপাদকুক্কুচ্চানম্পি অভাৰং দিস্ৰা। অসপ্পুরিসোতি পাপপুরিসো। নো হেতং, ভন্তেতি যস্মা অন্ধো অন্ধং ৰিয সো তং জানিতুং ন সক্কোতি, তস্মা এৰমাহংসু। এতেনেৰ নযেন ইতো পরেসুপি ৰারেসু অত্থো ৰেদিতব্বো। অস্সদ্ধসমন্নাগতোতি পাপধম্মসমন্নাগতো। অসপ্পুরিসভত্তীতি অসপ্পুরিসসেৰনো। অসপ্পুরিসচিন্তীতি অসপ্পুরিসচিন্তায চিন্তকো। অসপ্পুরিসমন্তীতি অসপ্পুরিসমন্তনং মন্তেতা। অসপ্পুরিসৰাচোতি অসপ্পুরিসৰাচং ভাসিতা। অসপ্পুরিসকম্মন্তোতি অসপ্পুরিসকম্মানং কত্তা। অসপ্পুরিসদিট্ঠীতি অসপ্পুরিসদিট্ঠিযা সমন্নাগতো। অসপ্পুরিসদানন্তি অসপ্পুরিসেহি দাতব্বং দানং। ত্যাস্স মিত্তাতি তে অস্স মিত্তা। অত্তব্যাবাধাযপি চেতেতীতি পাণং হনিস্সামি, অদিন্নং আদিযিস্সামি, মিচ্ছা চরিস্সামি, দস অকুসলকম্মপথে সমাদায ৰত্তিস্সামীতি এৰং অত্তনো দুক্খত্থায চিন্তেতি। পরব্যাবাধাযাতি যথা অসুকো অসুকং পাণং হন্তি, অসুকস্স সন্তকং অদিন্নং আদিযতি, দস অকুসলকম্মপথে সমাদায ৰত্ততি, এৰং নং আণাপেস্সামীতি এৰং পরস্স দুক্খত্থায চিন্তেতি। উভযব্যাবাধাযাতি অহং অসুকঞ্চ অসুকঞ্চ গহেত্ৰা দস অকুসলকম্মপথে সমাদায ৰত্তিস্সামীতি এৰং উভযদুক্খত্থায চিন্তেতীতি।
91.Evaṃme sutanti cūḷapuṇṇamasuttaṃ. Tattha tuṇhībhūtaṃ tuṇhībhūtanti yaṃ yaṃ disaṃ anuviloketi, tattha tattha tuṇhībhūtameva. Anuviloketvāti pañcapasādapaṭimaṇḍitāni akkhīni ummīletvā tato tato viloketvā antamaso hatthakukkuccapādakukkuccānampi abhāvaṃ disvā. Asappurisoti pāpapuriso. No hetaṃ, bhanteti yasmā andho andhaṃ viya so taṃ jānituṃ na sakkoti, tasmā evamāhaṃsu. Eteneva nayena ito paresupi vāresu attho veditabbo. Assaddhasamannāgatoti pāpadhammasamannāgato. Asappurisabhattīti asappurisasevano. Asappurisacintīti asappurisacintāya cintako. Asappurisamantīti asappurisamantanaṃ mantetā. Asappurisavācoti asappurisavācaṃ bhāsitā. Asappurisakammantoti asappurisakammānaṃ kattā. Asappurisadiṭṭhīti asappurisadiṭṭhiyā samannāgato. Asappurisadānanti asappurisehi dātabbaṃ dānaṃ. Tyāssa mittāti te assa mittā. Attabyābādhāyapi cetetīti pāṇaṃ hanissāmi, adinnaṃ ādiyissāmi, micchā carissāmi, dasa akusalakammapathe samādāya vattissāmīti evaṃ attano dukkhatthāya cinteti. Parabyābādhāyāti yathā asuko asukaṃ pāṇaṃ hanti, asukassa santakaṃ adinnaṃ ādiyati, dasa akusalakammapathe samādāya vattati, evaṃ naṃ āṇāpessāmīti evaṃ parassa dukkhatthāya cinteti. Ubhayabyābādhāyāti ahaṃ asukañca asukañca gahetvā dasa akusalakammapathe samādāya vattissāmīti evaṃ ubhayadukkhatthāya cintetīti.
অত্তব্যাবাধাযপি মন্তেতীতিআদীসু অহং দস অকুসলকম্মপথে সমাদায ৰত্তিস্সামীতি মন্তেন্তো অত্তব্যাবাধায মন্তেতি নাম। অসুকং দস অকুসলকম্মপথে সমাদপেস্সামীতি মন্তেন্তো পরব্যাবাধায মন্তেতি নাম। অঞ্ঞেন সদ্ধিং – ‘‘মযং উভোপি একতো হুত্ৰা দস অকুসলকম্মপথে সমাদায ৰত্তিস্সামা’’তি মন্তেন্তো উভযব্যাবাধায মন্তেতি নাম।
Attabyābādhāyapi mantetītiādīsu ahaṃ dasa akusalakammapathe samādāya vattissāmīti mantento attabyābādhāya manteti nāma. Asukaṃ dasa akusalakammapathe samādapessāmīti mantento parabyābādhāya manteti nāma. Aññena saddhiṃ – ‘‘mayaṃ ubhopi ekato hutvā dasa akusalakammapathe samādāya vattissāmā’’ti mantento ubhayabyābādhāya manteti nāma.
অসক্কচ্চং দানং দেতীতি দেয্যধম্মম্পি পুগ্গলম্পি ন সক্করোতি। দেয্যধম্মং ন সক্করোতি নাম উত্তণ্ডুলাদিদোসসমন্নাগতং আহারং দেতি, ন পসন্নং করোতি। পুগ্গলং ন সক্করোতি নাম নিসীদনট্ঠানং অসম্মজ্জিত্ৰা যত্থ ৰা তত্থ ৰা নিসীদাপেত্ৰা যং ৰা তং ৰা আধারকং ঠপেত্ৰা দানং দেতি। অসহত্থাতি অত্তনো হত্থেন, ন দেতি, দাসকম্মকারাদীহি দাপেতি। অচিত্তিকত্ৰাতি হেট্ঠা ৰুত্তনযেন দেয্যধম্মেপি পুগ্গলেপি ন চিত্তীকারং কত্ৰা দেতি। অপৰিদ্ধন্তি ছড্ডেতুকামো হুত্ৰা ৰম্মিকে উরগং পক্খিপন্তো ৰিয দেতি। অনাগমনদিট্ঠিকোতি নো ফলপাটিকঙ্খী হুত্ৰা দেতি।
Asakkaccaṃ dānaṃ detīti deyyadhammampi puggalampi na sakkaroti. Deyyadhammaṃ na sakkaroti nāma uttaṇḍulādidosasamannāgataṃ āhāraṃ deti, na pasannaṃ karoti. Puggalaṃ na sakkaroti nāma nisīdanaṭṭhānaṃ asammajjitvā yattha vā tattha vā nisīdāpetvā yaṃ vā taṃ vā ādhārakaṃ ṭhapetvā dānaṃ deti. Asahatthāti attano hatthena, na deti, dāsakammakārādīhi dāpeti. Acittikatvāti heṭṭhā vuttanayena deyyadhammepi puggalepi na cittīkāraṃ katvā deti. Apaviddhanti chaḍḍetukāmo hutvā vammike uragaṃ pakkhipanto viya deti. Anāgamanadiṭṭhikoti no phalapāṭikaṅkhī hutvā deti.
তত্থ উপপজ্জতীতি ন দানং দত্ৰা নিরযে উপপজ্জতি। যং পন তেন পাপলদ্ধিকায মিচ্ছাদস্সনং গহিতং, তায মিচ্ছাদিট্ঠিযা নিরযে উপপজ্জতি। সুক্কপক্খো ৰুত্তপটিপক্খনযেন ৰেদিতব্বো। দেৰমহত্ততাতি ছকামাৰচরদেৰা। মনুস্সমহত্ততাতি তিণ্ণং কুলানং সম্পত্তি। সেসং সব্বত্থ উত্তানমেৰ। ইদং পন সুত্তং সুদ্ধৰট্টৰসেনেৰ কথিতন্তি।
Tatthaupapajjatīti na dānaṃ datvā niraye upapajjati. Yaṃ pana tena pāpaladdhikāya micchādassanaṃ gahitaṃ, tāya micchādiṭṭhiyā niraye upapajjati. Sukkapakkho vuttapaṭipakkhanayena veditabbo. Devamahattatāti chakāmāvacaradevā. Manussamahattatāti tiṇṇaṃ kulānaṃ sampatti. Sesaṃ sabbattha uttānameva. Idaṃ pana suttaṃ suddhavaṭṭavaseneva kathitanti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
চূল়পুণ্ণমসুত্তৰণ্ণনা নিট্ঠিতা।
Cūḷapuṇṇamasuttavaṇṇanā niṭṭhitā.
পঠমৰগ্গৰণ্ণনা নিট্ঠিতা।
Paṭhamavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ১০. চূল়পুণ্ণমসুত্তং • 10. Cūḷapuṇṇamasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ১০. চূল়পুণ্ণমসুত্তৰণ্ণনা • 10. Cūḷapuṇṇamasuttavaṇṇanā
