Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā

13. жуул̣арат̇авимаанаван̣н̣анаа

13. Cūḷarathavimānavaṇṇanā

д̣̇ал̣хад̇хаммаа нисаарассаад̇и жуул̣арат̇авимаанам̣. д̇асса гаа уббад̇д̇и? бхаг̇авад̇и бариниб̣б̣уд̇з д̇хаад̇увибхааг̇ам̣ гад̇ваа д̇ад̇т̇а д̇ад̇т̇а сад̇т̇у т̇уубзсу бад̇идтаабияамаанзсу махаагассабад̇т̇зраббамукзсу д̇хаммам̣ сан̇г̇ааяид̇ум̣ ужжинид̇ваа г̇ахид̇зсу саавагзсу яаава вассуубаг̇аманаа взнзяяаабзгкааяа ад̇д̇ано ад̇д̇ано барисааяа сад̣̇д̇хим̣ д̇ад̇т̇а д̇ад̇т̇а васанд̇зсу ааяасмаа махаагажжааяано бажжанд̇ад̣̇зсз ан̃н̃ад̇арасмим̣ аран̃н̃ааяад̇анз вихарад̇и. д̇зна самаязна ассагарадтз бод̇алинаг̇арз ассагарааж̇аа раж̇ж̇ам̣ гаарзд̇и, д̇асса ж̇здтааяа д̣̇звияаа буд̇д̇о суж̇аад̇о наама гумааро сол̣асавассуд̣̇д̣̇зсиго ганидтааяа д̣̇звияаа ниб̣анд̇ханзна бид̇араа радтад̇о баб̣б̣ааж̇ид̇о аран̃н̃ам̣ бависид̇ваа ванажарагз ниссааяа аран̃н̃з васад̇и. со гира гассабасса бхаг̇авад̇о саасанз баб̣б̣аж̇ид̇ваа сийламад̇д̇з бад̇идтид̇о бут̇уж̇ж̇анагаалагирияам̣ гад̇ваа д̇аавад̇им̣сзсу ниб̣б̣ад̇д̇ид̇ваа д̇ад̇т̇а яаавад̇ааяугам̣ тад̇ваа абараабарам̣ суг̇ад̇ияам̣язва бариб̣бхаманд̇о имасмим̣ б̣уд̣̇д̇хуббаад̣̇з бхаг̇авад̇о абхисамб̣од̇хид̇о д̇им̣савассз ассагарадтз ассагаран̃н̃о аг̇г̇амахзсияаа гужчисмим̣ ниб̣б̣ад̇д̇и, ‘‘суж̇аад̇о’’д̇исса наамам̣ ахоси. со маханд̇зна бариваарзна вад̣дхад̇и.

Daḷhadhammānisārassāti cūḷarathavimānaṃ. Tassa kā uppatti? Bhagavati parinibbute dhātuvibhāgaṃ katvā tattha tattha satthu thūpesu patiṭṭhāpiyamānesu mahākassapattherappamukhesu dhammaṃ saṅgāyituṃ uccinitvā gahitesu sāvakesu yāva vassūpagamanā veneyyāpekkhāya attano attano parisāya saddhiṃ tattha tattha vasantesu āyasmā mahākaccāyano paccantadese aññatarasmiṃ araññāyatane viharati. Tena samayena assakaraṭṭhe potalinagare assakarājā rajjaṃ kāreti, tassa jeṭṭhāya deviyā putto sujāto nāma kumāro soḷasavassuddesiko kaniṭṭhāya deviyā nibandhanena pitarā raṭṭhato pabbājito araññaṃ pavisitvā vanacarake nissāya araññe vasati. So kira kassapassa bhagavato sāsane pabbajitvā sīlamatte patiṭṭhito puthujjanakālakiriyaṃ katvā tāvatiṃsesu nibbattitvā tattha yāvatāyukaṃ ṭhatvā aparāparaṃ sugatiyaṃyeva paribbhamanto imasmiṃ buddhuppāde bhagavato abhisambodhito tiṃsavasse assakaraṭṭhe assakarañño aggamahesiyā kucchismiṃ nibbatti, ‘‘sujāto’’tissa nāmaṃ ahosi. So mahantena parivārena vaḍḍhati.

д̇асса бана маад̇ари гаалагад̇ааяа рааж̇аа ан̃н̃ам̣ рааж̇ад̇хийд̇арам̣ аг̇г̇амахзсидтаанз табзси. сааби абарзна самаязна буд̇д̇ам̣ виж̇ааяи. д̇ассаа рааж̇аа буд̇д̇ам̣ д̣̇исваа басанно ‘‘бхад̣̇д̣̇з, д̇аяаа ижчид̇ам̣ варам̣ г̇ан̣хаахий’’д̇и варам̣ ад̣̇ааси. саа г̇ахид̇агам̣ гад̇ваа табзд̇ваа яад̣̇аа суж̇аад̇агумааро сол̣асавассуд̣̇д̣̇зсиго ж̇аад̇о, д̇ад̣̇аа рааж̇аанам̣ ааха ‘‘д̣̇зва, д̇умхзхи мама буд̇д̇ам̣ д̣̇исваа д̇удтажид̇д̇зхи варо д̣̇инно, д̇ам̣ ид̣̇аани д̣̇зт̇аа’’д̇и. ‘‘г̇ан̣ха, д̣̇звий’’д̇и . ‘‘маяхам̣ буд̇д̇асса раж̇ж̇ам̣ д̣̇зт̇аа’’д̇и. ‘‘насса, васали, мама ж̇здтабуд̇д̇з д̣̇звагумаарасад̣̇исз суж̇аад̇агумаарз тид̇з гасмаа звам̣ вад̣̇асий’’д̇и бадигкиби. д̣̇звий бунаббунам̣ ниб̣анд̇ханам̣ гаронд̇ий манам̣ алабхид̇ваа згад̣̇ивасам̣ ааха ‘‘д̣̇зва, яад̣̇и сажжз д̇идтаси, д̣̇зхи зваа’’д̇и. рааж̇аа ‘‘анубад̇хаарзд̇ваа маяаа имиссаа варо д̣̇инно, аяан̃жа звам̣ вад̣̇ад̇ий’’д̇и виббадисаарий худ̇ваа суж̇аад̇агумаарам̣ баггосид̇ваа д̇амад̇т̇ам̣ аарожзд̇ваа ассууни бавад̇д̇зси. гумааро бид̇арам̣ сожамаанам̣ д̣̇исваа д̣̇оманассаббад̇д̇о ассууни бавад̇д̇зд̇ваа ‘‘ануж̇аанаахи, д̣̇зва, ахам̣ ан̃н̃ад̇т̇а г̇амиссаамий’’д̇и ааха. д̇ам̣ суд̇ваа ран̃н̃аа ‘‘ан̃н̃ам̣ д̇з наг̇арам̣ маабзссаами, д̇ад̇т̇а васзяяаасий’’д̇и вуд̇д̇з гумааро на ижчи. ‘‘мама сахааяаанам̣ рааж̇уунам̣ санд̇игз бзсзссаамий’’д̇и жа вуд̇д̇з д̇амби наануж̇аани. гзвалам̣ ‘‘д̣̇зва, аран̃н̃ам̣ г̇амиссаамий’’д̇и ааха. рааж̇аа буд̇д̇ам̣ аалин̇г̇ид̇ваа сийсз жумб̣ид̇ваа ‘‘мамажжаязна ид̇хааг̇анд̇ваа раж̇ж̇з бад̇идтахаа’’д̇и вад̇ваа виссаж̇ж̇зси.

Tassa pana mātari kālakatāya rājā aññaṃ rājadhītaraṃ aggamahesiṭṭhāne ṭhapesi. Sāpi aparena samayena puttaṃ vijāyi. Tassā rājā puttaṃ disvā pasanno ‘‘bhadde, tayā icchitaṃ varaṃ gaṇhāhī’’ti varaṃ adāsi. Sā gahitakaṃ katvā ṭhapetvā yadā sujātakumāro soḷasavassuddesiko jāto, tadā rājānaṃ āha ‘‘deva, tumhehi mama puttaṃ disvā tuṭṭhacittehi varo dinno, taṃ idāni dethā’’ti. ‘‘Gaṇha, devī’’ti . ‘‘Mayhaṃ puttassa rajjaṃ dethā’’ti. ‘‘Nassa, vasali, mama jeṭṭhaputte devakumārasadise sujātakumāre ṭhite kasmā evaṃ vadasī’’ti paṭikkhipi. Devī punappunaṃ nibandhanaṃ karontī manaṃ alabhitvā ekadivasaṃ āha ‘‘deva, yadi sacce tiṭṭhasi, dehi evā’’ti. Rājā ‘‘anupadhāretvā mayā imissā varo dinno, ayañca evaṃ vadatī’’ti vippaṭisārī hutvā sujātakumāraṃ pakkositvā tamatthaṃ ārocetvā assūni pavattesi. Kumāro pitaraṃ socamānaṃ disvā domanassappatto assūni pavattetvā ‘‘anujānāhi, deva, ahaṃ aññattha gamissāmī’’ti āha. Taṃ sutvā raññā ‘‘aññaṃ te nagaraṃ māpessāmi, tattha vaseyyāsī’’ti vutte kumāro na icchi. ‘‘Mama sahāyānaṃ rājūnaṃ santike pesessāmī’’ti ca vutte tampi nānujāni. Kevalaṃ ‘‘deva, araññaṃ gamissāmī’’ti āha. Rājā puttaṃ āliṅgitvā sīse cumbitvā ‘‘mamaccayena idhāgantvā rajje patiṭṭhahā’’ti vatvā vissajjesi.

со аран̃н̃ам̣ бависид̇ваа ванажарагз ниссааяа васанд̇о згад̣̇ивасам̣ миг̇авам̣ г̇ад̇о. д̇асса саман̣агаалз сахааяаваро зго д̣̇звабуд̇д̇о хид̇зсид̇ааяа миг̇аруубзна д̇ам̣ балобхзнд̇о д̇хаавид̇ваа ааяасмад̇о махаагажжааяанасса васанадтаанасамийбам̣ бад̇ваа анд̇арад̇хааяи. со ‘‘имам̣ миг̇ам̣ ид̣̇аани г̇ан̣хиссаамий’’д̇и убад̇хааванд̇о т̇зрасса васанадтаанам̣ бад̇ваа д̇ам̣ абассанд̇о б̣ахи бан̣н̣асаалааяа т̇зрам̣ нисиннам̣ д̣̇исваа д̇асса самийбз жаабагодим̣ олуб̣бха адтааси. т̇зро д̇ам̣ ологзд̇ваа аад̣̇ид̇о бадтааяа саб̣б̣ам̣ д̇асса бавад̇д̇им̣ н̃ад̇ваа ануг̇г̇ан̣ханд̇о аж̇аананд̇о вияа сан̇г̇ахам̣ гаронд̇о –

So araññaṃ pavisitvā vanacarake nissāya vasanto ekadivasaṃ migavaṃ gato. Tassa samaṇakāle sahāyavaro eko devaputto hitesitāya migarūpena taṃ palobhento dhāvitvā āyasmato mahākaccāyanassa vasanaṭṭhānasamīpaṃ patvā antaradhāyi. So ‘‘imaṃ migaṃ idāni gaṇhissāmī’’ti upadhāvanto therassa vasanaṭṭhānaṃ patvā taṃ apassanto bahi paṇṇasālāya theraṃ nisinnaṃ disvā tassa samīpe cāpakoṭiṃ olubbha aṭṭhāsi. Thero taṃ oloketvā ādito paṭṭhāya sabbaṃ tassa pavattiṃ ñatvā anuggaṇhanto ajānanto viya saṅgahaṃ karonto –

981.

‘‘д̣̇ал̣хад̇хаммаа нисаарасса, д̇ханум̣ олуб̣бха д̇идтаси;

‘‘Daḷhadhammā nisārassa, dhanuṃ olubbha tiṭṭhasi;

кад̇д̇ияо нуси рааж̇ан̃н̃о, ад̣̇у луд̣̇д̣̇о ванзжаро’’д̇и. –

Khattiyo nusi rājañño, adu luddo vanecaro’’ti. –

бужчи. д̇ад̇т̇а д̣̇ал̣хад̇хаммаад̇и д̣̇ал̣хад̇хану. д̣̇ал̣хад̇хану наама д̣̇висахассат̇аамам̣ вужжад̇и. д̣̇висахассат̇ааманд̇и жа яасса ааробид̇асса ж̇ияааяа б̣ад̣̇д̇хо лохасийсаад̣̇ийнам̣ бхааро д̣̇ан̣д̣з г̇ахзд̇ваа яаава ган̣д̣аббамаан̣аа угкид̇д̇асса бат̇авид̇о мужжад̇и. нисаарассаад̇и нирад̇исаяасаарасса висидтасаарасса ругкасса д̇ханум̣, саарад̇араругкамаяам̣ д̇ханунд̇и ад̇т̇о. олуб̣бхаад̇и саннирумбхид̇ваа. рааж̇ан̃н̃од̇и рааж̇агумааро. ванзжарод̇и ванажаро.

Pucchi. Tattha daḷhadhammāti daḷhadhanu. Daḷhadhanu nāma dvisahassathāmaṃ vuccati. Dvisahassathāmanti ca yassa āropitassa jiyāya baddho lohasīsādīnaṃ bhāro daṇḍe gahetvā yāva kaṇḍappamāṇā ukkhittassa pathavito muccati. Nisārassāti niratisayasārassa visiṭṭhasārassa rukkhassa dhanuṃ, sāratararukkhamayaṃ dhanunti attho. Olubbhāti sannirumbhitvā. Rājaññoti rājakumāro. Vanecaroti vanacaro.

ат̇а со ад̇д̇аанам̣ аавигаронд̇о –

Atha so attānaṃ āvikaronto –

982.

‘‘ассагаад̇хибад̇иссаахам̣, бханд̇з буд̇д̇о ванзжаро;

‘‘Assakādhipatissāhaṃ, bhante putto vanecaro;

наамам̣ мз бхигку д̇з б̣рууми, суж̇аад̇о ид̇и мам̣ вид̣̇уу.

Nāmaṃ me bhikkhu te brūmi, sujāto iti maṃ vidū.

983.

‘‘миг̇з г̇авзсамаанохам̣, ог̇ааханд̇о б̣рахааванам̣;

‘‘Mige gavesamānohaṃ, ogāhanto brahāvanaṃ;

миг̇ам̣ д̇ан̃жзва наад̣̇д̣̇агким̣, д̇ан̃жа д̣̇исваа тид̇о аха’’нд̇и. –

Migaṃ tañceva nāddakkhiṃ, tañca disvā ṭhito aha’’nti. –

ааха. д̇ад̇т̇а ассагаад̇хибад̇иссаад̇и ассагарадтаад̇хибад̇ино ассагарааж̇асса. бхигкууд̇и т̇зрам̣ аалабад̇и. миг̇з г̇авзсамаанод̇и миг̇асуугараад̣̇игз г̇авзсанд̇о, миг̇авам̣ жаранд̇од̇и ад̇т̇о.

Āha. Tattha assakādhipatissāti assakaraṭṭhādhipatino assakarājassa. Bhikkhūti theraṃ ālapati. Mige gavesamānoti migasūkarādike gavesanto, migavaṃ carantoti attho.

д̇ам̣ суд̇ваа т̇зро д̇зна сад̣̇д̇хим̣ бадисант̇аарам̣ гаронд̇о –

Taṃ sutvā thero tena saddhiṃ paṭisanthāraṃ karonto –

984.

‘‘свааг̇ад̇ам̣ д̇з махаабун̃н̃а, ат̇о д̇з ад̣̇урааг̇ад̇ам̣;

‘‘Svāgataṃ te mahāpuñña, atho te adurāgataṃ;

зд̇д̇о уд̣̇агамаад̣̇ааяа, баад̣̇з багкаалаяассу д̇з.

Etto udakamādāya, pāde pakkhālayassu te.

985.

‘‘ид̣̇амби баанийяам̣ сийд̇ам̣, аабхад̇ам̣ г̇ириг̇аб̣бхараа;

‘‘Idampi pānīyaṃ sītaṃ, ābhataṃ girigabbharā;

рааж̇абуд̇д̇а д̇ад̇о бид̇ваа, сант̇ад̇асмим̣ убаависаа’’д̇и. – ааха;

Rājaputta tato pitvā, santhatasmiṃ upāvisā’’ti. – āha;

984. д̇ад̇т̇а ад̣̇урааг̇ад̇анд̇и д̣̇урааг̇аманаваж̇ж̇ид̇ам̣, махаабун̃н̃а, д̇з ид̇хааг̇аманам̣ свааг̇ад̇ам̣, на д̇з аббагамби д̣̇урааг̇аманам̣ ад̇т̇и д̇уяхан̃жа маяхан̃жа бийд̇исоманассаж̇ананад̇од̇и ад̇хиббааяо. ‘‘ад̇хунааг̇ад̇а’’нд̇иби баато, ид̣̇аани ааг̇амананд̇и ад̇т̇о.

984. Tattha adurāgatanti durāgamanavajjitaṃ, mahāpuñña, te idhāgamanaṃ svāgataṃ, na te appakampi durāgamanaṃ atthi tuyhañca mayhañca pītisomanassajananatoti adhippāyo. ‘‘Adhunāgata’’ntipi pāṭho, idāni āgamananti attho.

985. сант̇ад̇асмим̣ убаависаад̇и ананд̇арахид̇ааяа бхуумияаа анисийд̣̇ид̇ваа амугасмим̣ д̇ин̣асант̇аарагз нисийд̣̇аад̇и.

985.Santhatasmiṃ upāvisāti anantarahitāya bhūmiyā anisīditvā amukasmiṃ tiṇasanthārake nisīdāti.

д̇ад̇о рааж̇агумааро т̇зрасса бадисант̇аарам̣ самбадижчанд̇о ааха –

Tato rājakumāro therassa paṭisanthāraṃ sampaṭicchanto āha –

986.

‘‘галяаан̣ий вад̇а д̇з ваажаа, саванийяаа махаамуни;

‘‘Kalyāṇī vata te vācā, savanīyā mahāmuni;

нзлаа ад̇т̇авад̇ий ваг̇г̇у, манд̇ваа ад̇т̇ан̃жа бхаасаси.

Nelā atthavatī vaggu, mantvā atthañca bhāsasi.

987.

‘‘гаа д̇з рад̇и ванз вихарад̇о, исинисабха вад̣̇зхи будто;

‘‘Kā te rati vane viharato, isinisabha vadehi puṭṭho;

д̇ава важанабат̇ам̣ нисаамаяид̇ваа, ад̇т̇ад̇хаммабад̣̇ам̣ самаажарзмасз’’д̇и.

Tava vacanapathaṃ nisāmayitvā, atthadhammapadaṃ samācaremase’’ti.

986. д̇ад̇т̇а галяаан̣ийд̇и сунд̣̇араа собханаа. саванийяаад̇и сод̇ум̣ яуд̇д̇аа. нзлаад̇и нид̣̇д̣̇осаа. ад̇т̇авад̇ийд̇и ад̇т̇аяуд̇д̇аа д̣̇идтад̇хаммигаад̣̇инаа хид̇зна убзд̇аа. ваг̇г̇ууд̇и мад̇хураа. манд̇ваад̇и ж̇аанид̇ваа бан̃н̃ааяа барижчинд̣̇ид̇ваа. ад̇т̇анд̇и ад̇т̇ад̇о анабзд̇ам̣ зганд̇ахид̇аавахам̣.

986. Tattha kalyāṇīti sundarā sobhanā. Savanīyāti sotuṃ yuttā. Nelāti niddosā. Atthavatīti atthayuttā diṭṭhadhammikādinā hitena upetā. Vaggūti madhurā. Mantvāti jānitvā paññāya paricchinditvā. Atthanti atthato anapetaṃ ekantahitāvahaṃ.

987. исинисабхаад̇и исийсу нисабха ааж̇аанийяасад̣̇иса. важанабат̇анд̇и важанам̣. важанамзва хи ад̇т̇аад̇хиг̇амасса убааяабхаавад̇о ‘‘важанабат̇а’’нд̇и вуд̇д̇ам̣. ад̇т̇ад̇хаммабад̣̇ам̣ самаажарзмасзд̇и ид̇ха жзва самбарааяз жа ад̇т̇аавахам̣ сийлаад̣̇ид̇хаммагодтаасам̣ бадибаж̇ж̇аамасз.

987.Isinisabhāti isīsu nisabha ājānīyasadisa. Vacanapathanti vacanaṃ. Vacanameva hi atthādhigamassa upāyabhāvato ‘‘vacanapatha’’nti vuttaṃ. Atthadhammapadaṃsamācaremaseti idha ceva samparāye ca atthāvahaṃ sīlādidhammakoṭṭhāsaṃ paṭipajjāmase.

ид̣̇аани т̇зро ад̇д̇ано саммаабадибад̇д̇им̣ д̇асса анужчавигам̣ вад̣̇анд̇о –

Idāni thero attano sammāpaṭipattiṃ tassa anucchavikaṃ vadanto –

988.

‘‘ахим̣саа саб̣б̣абаан̣ийнам̣, гумаарамхаага ружжад̇и;

‘‘Ahiṃsā sabbapāṇīnaṃ, kumāramhāka ruccati;

т̇зяяаа жа ад̇ижаараа жа, маж̇ж̇абаанаа жа аарад̇и.

Theyyā ca aticārā ca, majjapānā ca ārati.

989.

‘‘аарад̇и самажарияаа жа, б̣аахусажжам̣ гад̇ан̃н̃уд̇аа;

‘‘Ārati samacariyā ca, bāhusaccaṃ kataññutā;

д̣̇идтзва д̇хаммз баасам̣саа, д̇хаммаа зд̇з басам̣сияаа’’д̇и. – ааха;

Diṭṭheva dhamme pāsaṃsā, dhammā ete pasaṃsiyā’’ti. – āha;

989. д̇ад̇т̇а аарад̇и самажарияаа жаад̇и яат̇аавуд̇д̇аа жа баабад̇хаммад̇о аарад̇и, бадивирад̇и гааяасамад̇аад̣̇исамажарияаа жа. б̣аахусажжанд̇и барияад̇д̇иб̣аахусажжам̣. гад̇ан̃н̃уд̇аад̇и барзхи ад̇д̇ано гад̇асса убагаарасса ж̇аананаа. баасам̣саад̇и ад̇т̇агаамзхи гулабуд̇д̇зхи багаарад̇о аасам̣сид̇аб̣б̣аа. д̇хаммаа зд̇зд̇и зд̇з яат̇аавуд̇д̇аа ахим̣саад̣̇ид̇хаммаа. басам̣сияаад̇и вин̃н̃уухи басам̣сид̇аб̣б̣аа.

989. Tattha ārati samacariyā cāti yathāvuttā ca pāpadhammato ārati, paṭivirati kāyasamatādisamacariyā ca. Bāhusaccanti pariyattibāhusaccaṃ. Kataññutāti parehi attano katassa upakārassa jānanā. Pāsaṃsāti atthakāmehi kulaputtehi pakārato āsaṃsitabbā. Dhammā eteti ete yathāvuttā ahiṃsādidhammā. Pasaṃsiyāti viññūhi pasaṃsitabbā.

звам̣ т̇зро д̇асса анужчавигам̣ саммаабадибад̇д̇им̣ вад̇ваа анааг̇ад̇ам̣сан̃аан̣зна ааяусан̇каарз ологзнд̇о ‘‘бан̃жамаасамад̇д̇амзваа’’д̇и д̣̇исваа д̇ам̣ сам̣взж̇зд̇ваа д̣̇ал̣хам̣ д̇ад̇т̇а саммаабадибад̇д̇ияам̣ бад̇идтаабзд̇ум̣ имам̣ г̇аат̇амааха –

Evaṃ thero tassa anucchavikaṃ sammāpaṭipattiṃ vatvā anāgataṃsañāṇena āyusaṅkhāre olokento ‘‘pañcamāsamattamevā’’ti disvā taṃ saṃvejetvā daḷhaṃ tattha sammāpaṭipattiyaṃ patiṭṭhāpetuṃ imaṃ gāthamāha –

990.

‘‘санд̇игз маран̣ам̣ д̇уяхам̣, орам̣ маасзхи бан̃жахи;

‘‘Santike maraṇaṃ tuyhaṃ, oraṃ māsehi pañcahi;

рааж̇абуд̇д̇а виж̇аанаахи, ад̇д̇аанам̣ бариможаяаа’’д̇и.

Rājaputta vijānāhi, attānaṃ parimocayā’’ti.

д̇ад̇т̇а ад̇д̇аанам̣ бариможаяаад̇и ад̇д̇аанам̣ абааяад̣̇угкад̇о можзхи.

Tattha attānaṃ parimocayāti attānaṃ apāyadukkhato mocehi.

д̇ад̇о гумааро ад̇д̇ано муд̇д̇ияаа убааяам̣ бужчанд̇о ааха –

Tato kumāro attano muttiyā upāyaṃ pucchanto āha –

991.

‘‘гад̇амам̣ сваахам̣ ж̇анабад̣̇ам̣ г̇анд̇ваа, гим̣ гаммам̣ гин̃жа борисам̣;

‘‘Katamaṃ svāhaṃ janapadaṃ gantvā, kiṃ kammaṃ kiñca porisaṃ;

гааяа ваа бана виж̇ж̇ааяа, бхавзяяам̣ аж̇араамаро’’д̇и.

Kāya vā pana vijjāya, bhaveyyaṃ ajarāmaro’’ti.

д̇ад̇т̇а гад̇амам̣ свааханд̇и гад̇амам̣ су ахам̣, гад̇амам̣ нууд̇и ад̇т̇о. гим̣ гаммам̣ гин̃жа борисанд̇и гад̇ваад̇и важанасзсо. борисанд̇и бурисагижжам̣.

Tattha katamaṃ svāhanti katamaṃ su ahaṃ, katamaṃ nūti attho. Kiṃ kammaṃ kiñca porisanti katvāti vacanaseso. Porisanti purisakiccaṃ.

д̇ад̇о т̇зро д̇асса д̇хаммам̣ д̣̇зсзд̇ум̣ имаа г̇аат̇ааяо авожа –

Tato thero tassa dhammaṃ desetuṃ imā gāthāyo avoca –

992.

‘‘на виж̇ж̇ад̇з со бад̣̇зсо, гаммам̣ виж̇ж̇аа жа борисам̣;

‘‘Na vijjate so padeso, kammaṃ vijjā ca porisaṃ;

яад̇т̇а г̇анд̇ваа бхавз мажжо, рааж̇абуд̇д̇ааж̇араамаро.

Yattha gantvā bhave macco, rājaputtājarāmaro.

993.

‘‘махад̣̇д̇ханаа махаабхог̇аа, радтаванд̇оби кад̇д̇ияаа;

‘‘Mahaddhanā mahābhogā, raṭṭhavantopi khattiyā;

бахууд̇ад̇ханад̇хан̃н̃аасз, д̇зби но аж̇араамараа.

Pahūtadhanadhaññāse, tepi no ajarāmarā.

994.

‘‘яад̣̇и д̇з суд̇аа анд̇хагавзн̣д̣убуд̇д̇аа, суураа вийраа вигганд̇аббахаарино;

‘‘Yadi te sutā andhakaveṇḍuputtā, sūrā vīrā vikkantappahārino;

д̇зби ааяугкаяам̣ бад̇д̇аа, вид̣̇д̇хасд̇аа сассад̇ийсамаа.

Tepi āyukkhayaṃ pattā, viddhastā sassatīsamā.

995.

‘‘кад̇д̇ияаа б̣раахман̣аа взссаа, суд̣̇д̣̇аа жан̣д̣аалабуггусаа;

‘‘Khattiyā brāhmaṇā vessā, suddā caṇḍālapukkusā;

зд̇з жан̃н̃з жа ж̇аад̇ияаа, д̇зби но аж̇араамараа.

Ete caññe ca jātiyā, tepi no ajarāmarā.

996.

‘‘яз манд̇ам̣ баривад̇д̇знд̇и, чал̣ан̇г̇ам̣ б̣рахмажинд̇ид̇ам̣;

‘‘Ye mantaṃ parivattenti, chaḷaṅgaṃ brahmacintitaṃ;

зд̇з жан̃н̃з жа виж̇ж̇ааяа, д̇зби но аж̇араамараа.

Ete caññe ca vijjāya, tepi no ajarāmarā.

997.

‘‘исаяо жааби яз санд̇аа, сан̃н̃ад̇ад̇д̇аа д̇абассино;

‘‘Isayo cāpi ye santā, saññatattā tapassino;

сарийрам̣ д̇зби гаалзна, виж̇аханд̇и д̇абассино.

Sarīraṃ tepi kālena, vijahanti tapassino.

998.

‘‘бхаавид̇ад̇д̇ааби араханд̇о, гад̇агижжаа анаасаваа;

‘‘Bhāvitattāpi arahanto, katakiccā anāsavā;

нигкибанд̇и имам̣ д̣̇зхам̣, бун̃н̃абаабабаригкаяаа’’д̇и.

Nikkhipanti imaṃ dehaṃ, puññapāpaparikkhayā’’ti.

992. д̇ад̇т̇а яад̇т̇а г̇анд̇ваад̇и яам̣ бад̣̇зсам̣ г̇анд̇ваа гаммам̣ виж̇ж̇ам̣ борисан̃жа гааяабаяог̇зна ид̇арабаяог̇зна жа убаг̇анд̇ваа баабун̣ид̇ваа бхавзяяа аж̇араамарод̇и ад̇т̇о.

992. Tattha yattha gantvāti yaṃ padesaṃ gantvā kammaṃ vijjaṃ porisañca kāyapayogena itarapayogena ca upagantvā pāpuṇitvā bhaveyya ajarāmaroti attho.

993. хздтимагодияаа годисад̇аад̣̇ибаримаан̣ам̣ сам̣харид̇ваа табид̇ам̣ маханд̇ам̣ д̇ханам̣ зд̇зсанд̇и махад̣̇д̇ханаа. гумбхад̇д̇аяаад̣̇игахаабан̣абариб̣б̣аяо маханд̇о бхог̇о зд̇зсанд̇и махаабхог̇аа. радтаванд̇од̇и радтасаамигаа, анзгаяож̇анабаримаан̣ам̣ радтам̣ басаасанд̇аад̇и ад̇хиббааяо. кад̇д̇ияаад̇и кад̇д̇ияаж̇аад̇игаа. бахууд̇ад̇ханад̇хан̃н̃аасзд̇и махаад̇ханад̇хан̃н̃асаннижаяаа, ад̇д̇ано барисааяа жа сад̇д̇адтасам̣важчарабахонагад̇ханад̇хан̃н̃асаннижаяаа. д̇зби но аж̇араамараад̇и ж̇араамаран̣ад̇хаммаа зва, махад̣̇д̇ханад̇аад̣̇ийниби д̇зсам̣ убари нибад̇анд̇ам̣ ж̇араамаран̣ам̣ нивад̇д̇зд̇ум̣ на саггонд̇ийд̇и ад̇т̇о.

993. Heṭṭhimakoṭiyā koṭisatādiparimāṇaṃ saṃharitvā ṭhapitaṃ mahantaṃ dhanaṃ etesanti mahaddhanā. Kumbhattayādikahāpaṇaparibbayo mahanto bhogo etesanti mahābhogā. Raṭṭhavantoti raṭṭhasāmikā, anekayojanaparimāṇaṃ raṭṭhaṃ pasāsantāti adhippāyo. Khattiyāti khattiyajātikā. Pahūtadhanadhaññāseti mahādhanadhaññasannicayā, attano parisāya ca sattaṭṭhasaṃvaccharapahonakadhanadhaññasannicayā. Tepi no ajarāmarāti jarāmaraṇadhammā eva, mahaddhanatādīnipi tesaṃ upari nipatantaṃ jarāmaraṇaṃ nivattetuṃ na sakkontīti attho.

994. анд̇хагавзн̣д̣убуд̇д̇аад̇и анд̇хагавзн̣д̣усса буд̇д̇аад̇и бан̃н̃аад̇аа. суураад̇и сад̇д̇иманд̇о. вийраад̇и вийрияаванд̇о. вигганд̇аббахааринод̇и сууравийрабхаавзнзва бадисад̇д̇уб̣алам̣ виггамма басаяха бахаран̣асийлаа. вид̣̇д̇хасд̇аад̇и винадтаа. сассад̇ийсамаад̇и гулабарамбарааяа сассад̇ийхи жанд̣̇асуурияаад̣̇ийхи самаанаа, д̇зби ажирагаалабавад̇д̇агуланваяаад̇и ад̇т̇о.

994.Andhakaveṇḍuputtāti andhakaveṇḍussa puttāti paññātā. Sūrāti sattimanto. Vīrāti vīriyavanto. Vikkantappahārinoti sūravīrabhāveneva paṭisattubalaṃ vikkamma pasayha paharaṇasīlā. Viddhastāti vinaṭṭhā. Sassatīsamāti kulaparamparāya sassatīhi candasūriyādīhi samānā, tepi acirakālapavattakulanvayāti attho.

995. ж̇аад̇ияаад̇и ад̇д̇ано ж̇аад̇ияаа, висидтад̇араа бана ж̇аад̇иби нзсам̣ ж̇араамаран̣ам̣ нивад̇д̇зд̇ум̣ на саггод̇ийд̇и ад̇т̇о.

995.Jātiyāti attano jātiyā, visiṭṭhatarā pana jātipi nesaṃ jarāmaraṇaṃ nivattetuṃ na sakkotīti attho.

996. манд̇анд̇и взд̣̇ам̣. чал̣ан̇г̇анд̇и габбаб̣яаагаран̣анируд̇д̇исигкаачанд̣̇овижид̇иж̇од̇исад̇т̇асан̇каад̇зхи чахи ан̇г̇зхи чал̣ан̇г̇ам̣. б̣рахмажинд̇ид̇анд̇и б̣рахмзхи адтагаад̣̇ийхи жинд̇ид̇ам̣ бан̃н̃аажагкунаа д̣̇идтам̣.

996.Mantanti vedaṃ. Chaḷaṅganti kappabyākaraṇaniruttisikkhāchandovicitijotisatthasaṅkhātehi chahi aṅgehi chaḷaṅgaṃ. Brahmacintitanti brahmehi aṭṭhakādīhi cintitaṃ paññācakkhunā diṭṭhaṃ.

997. санд̇аад̇и убасанд̇агааяаважийгамманд̇аа. сан̃н̃ад̇ад̇д̇аад̇и сан̃н̃ад̇ажид̇д̇аа. д̇абассинод̇и д̇абаниссид̇аа.

997.Santāti upasantakāyavacīkammantā. Saññatattāti saññatacittā. Tapassinoti tapanissitā.

ид̣̇аани гумааро ад̇д̇анаа гад̇д̇аб̣б̣ам̣ вад̣̇анд̇о –

Idāni kumāro attanā kattabbaṃ vadanto –

999.

‘‘субхаасид̇аа ад̇т̇авад̇ий, г̇аат̇ааяо д̇з махаамуни;

‘‘Subhāsitā atthavatī, gāthāyo te mahāmuni;

ниж̇жхад̇д̇омхи субхадтзна, д̇ван̃жа мз саран̣ам̣ бхаваа’’д̇и. –

Nijjhattomhi subhaṭṭhena, tvañca me saraṇaṃ bhavā’’ti. –

ааха . д̇ад̇т̇а ниж̇жхад̇д̇омхийд̇и ниж̇жхаабид̇о д̇хаммож̇асан̃н̃ааяа сан̃н̃ад̇д̇иг̇ад̇о амхи. субхадтзнаад̇и судту бхаасид̇зна.

Āha . Tattha nijjhattomhīti nijjhāpito dhammojasaññāya saññattigato amhi. Subhaṭṭhenāti suṭṭhu bhāsitena.

д̇ад̇о т̇зро д̇ам̣ анусаасанд̇о имам̣ г̇аат̇ам̣ абхааси –

Tato thero taṃ anusāsanto imaṃ gāthaṃ abhāsi –

1000.

‘‘маа мам̣ д̇вам̣ саран̣ам̣ г̇ажча, д̇амзва саран̣ам̣ важ̇а;

‘‘Mā maṃ tvaṃ saraṇaṃ gaccha, tameva saraṇaṃ vaja;

сагяабуд̇д̇ам̣ махаавийрам̣, яамахам̣ саран̣ам̣ г̇ад̇о’’д̇и.

Sakyaputtaṃ mahāvīraṃ, yamahaṃ saraṇaṃ gato’’ti.

д̇ад̇о рааж̇агумааро ааха –

Tato rājakumāro āha –

1001.

‘‘гад̇арасмим̣ со ж̇анабад̣̇з, сад̇т̇аа д̇умхаага маариса;

‘‘Katarasmiṃ so janapade, satthā tumhāka mārisa;

ахамби д̣̇адтум̣ г̇ажчиссам̣, ж̇инам̣ аббадибуг̇г̇ала’’нд̇и.

Ahampi daṭṭhuṃ gacchissaṃ, jinaṃ appaṭipuggala’’nti.

буна т̇зро ааха –

Puna thero āha –

1002.

‘‘бурад̇т̇имасмим̣ ж̇анабад̣̇з, оггаагагуласамбхаво;

‘‘Puratthimasmiṃ janapade, okkākakulasambhavo;

д̇ад̇т̇ааси бурисааж̇ан̃н̃о, со жа ко бариниб̣б̣уд̇о’’д̇и.

Tatthāsi purisājañño, so ca kho parinibbuto’’ti.

д̇ад̇т̇а т̇зрзна нисиннабад̣̇зсад̇о маж̇жхимад̣̇зсасса баажийнад̣̇исаабхааг̇ад̇д̇аа вуд̇д̇ам̣ ‘‘бурад̇т̇имасмим̣ ж̇анабад̣̇з’’д̇и.

Tattha therena nisinnapadesato majjhimadesassa pācīnadisābhāgattā vuttaṃ ‘‘puratthimasmiṃ janapade’’ti.

звам̣ со рааж̇абуд̇д̇о т̇зрасса д̇хаммад̣̇зсанам̣ суд̇ваа басаннамаанасо саран̣зсу жа сийлзсу жа бад̇идтахи. д̇зна вуд̇д̇ам̣ –

Evaṃ so rājaputto therassa dhammadesanaṃ sutvā pasannamānaso saraṇesu ca sīlesu ca patiṭṭhahi. Tena vuttaṃ –

1003.

‘‘сажз хи б̣уд̣̇д̇хо д̇идтзяяа, сад̇т̇аа д̇умхаага маариса;

‘‘Sace hi buddho tiṭṭheyya, satthā tumhāka mārisa;

яож̇анаани сахассаани, г̇ажчзяяам̣ баяирубаасид̇ум̣.

Yojanāni sahassāni, gaccheyyaṃ payirupāsituṃ.

1004.

‘‘яад̇о жа ко бариниб̣б̣уд̇о, сад̇т̇аа д̇умхаага маариса;

‘‘Yato ca kho parinibbuto, satthā tumhāka mārisa;

ниб̣б̣уд̇амби махаавийрам̣, г̇ажчаами саран̣ам̣ ахам̣.

Nibbutampi mahāvīraṃ, gacchāmi saraṇaṃ ahaṃ.

1005.

‘‘убзми саран̣ам̣ б̣уд̣̇д̇хам̣, д̇хамман̃жааби ануд̇д̇арам̣;

‘‘Upemi saraṇaṃ buddhaṃ, dhammañcāpi anuttaraṃ;

сан̇гхан̃жа нарад̣̇звасса, г̇ажчаами саран̣ам̣ ахам̣.

Saṅghañca naradevassa, gacchāmi saraṇaṃ ahaṃ.

1006.

‘‘баан̣аад̇ибаад̇аа вирамаами киббам̣, логз ад̣̇иннам̣ бариваж̇ж̇аяаами;

‘‘Pāṇātipātā viramāmi khippaṃ, loke adinnaṃ parivajjayāmi;

амаж̇ж̇або но жа мусаа бхан̣аами, сагзна д̣̇аарзна жа хоми д̇удто’’д̇и.

Amajjapo no ca musā bhaṇāmi, sakena dārena ca homi tuṭṭho’’ti.

звам̣ бана д̇ам̣ саран̣зсу жа сийлзсу жа бад̇идтид̇ам̣ т̇зро звамааха ‘‘рааж̇агумаара, д̇уяхам̣ ид̇ха аран̃н̃аваасзна ад̇т̇о над̇т̇и, на жирам̣ д̇ава ж̇ийвид̇ам̣, бан̃жамаасаб̣бханд̇арз зва гаалам̣ гариссаси, д̇асмаа д̇ава бид̇у санд̇игамзва г̇анд̇ваа д̣̇аанаад̣̇ийни бун̃н̃аани гад̇ваа саг̇г̇абарааяан̣о бхавзяяаасий’’д̇и вад̇ваа ад̇д̇ано санд̇игз д̇хаад̇уяо д̣̇ад̇ваа виссаж̇ж̇зси. со г̇ажчанд̇о ‘‘ахам̣, бханд̇з, д̇умхаагам̣ важанзна ид̇о г̇амиссаами, д̇умхзхиби маяхам̣ анугамбааяа д̇ад̇т̇а ааг̇анд̇аб̣б̣а’’нд̇и вад̇ваа т̇зрасса ад̇хиваасанам̣ вид̣̇ид̇ваа ванд̣̇ид̇ваа бад̣̇агкин̣ам̣ гад̇ваа бид̇у наг̇арам̣ г̇анд̇ваа уяяаанам̣ бависид̇ваа ад̇д̇ано ааг̇ад̇абхаавам̣ ран̃н̃о нивзд̣̇зси.

Evaṃ pana taṃ saraṇesu ca sīlesu ca patiṭṭhitaṃ thero evamāha ‘‘rājakumāra, tuyhaṃ idha araññavāsena attho natthi, na ciraṃ tava jīvitaṃ, pañcamāsabbhantare eva kālaṃ karissasi, tasmā tava pitu santikameva gantvā dānādīni puññāni katvā saggaparāyaṇo bhaveyyāsī’’ti vatvā attano santike dhātuyo datvā vissajjesi. So gacchanto ‘‘ahaṃ, bhante, tumhākaṃ vacanena ito gamissāmi, tumhehipi mayhaṃ anukampāya tattha āgantabba’’nti vatvā therassa adhivāsanaṃ viditvā vanditvā padakkhiṇaṃ katvā pitu nagaraṃ gantvā uyyānaṃ pavisitvā attano āgatabhāvaṃ rañño nivedesi.

д̇ам̣ суд̇ваа рааж̇аа сабаривааро уяяаанам̣ г̇анд̇ваа гумаарам̣ аалин̇г̇ид̇ваа анд̇збурам̣ нзд̇ваа абхисин̃жид̇угаамо ахоси. гумааро ‘‘д̣̇зва, маяхам̣ аббагам̣ ааяу, ид̇о жад̇уннам̣ маасаанам̣ ажжаязна маран̣ам̣ бхависсад̇и, гим̣ мз раж̇ж̇зна, д̇умхз ниссааяа бун̃н̃амзва гариссаамий’’д̇и вад̇ваа т̇зрасса г̇ун̣ам̣ рад̇анад̇д̇аяасса жа аанубхаавам̣ бавзд̣̇зси. д̇ам̣ суд̇ваа рааж̇аа сам̣взг̇аббад̇д̇о рад̇анад̇д̇аяз жа т̇зрз жа басаннамаанасо маханд̇ам̣ вихаарам̣ гаарзд̇ваа махаагажжааяанад̇т̇зрасса санд̇игз д̣̇ууд̇ам̣ баахзси. т̇зроби рааж̇аанам̣ махааж̇анан̃жа ануг̇г̇ан̣ханд̇о ааг̇ажчи. рааж̇аа жа сабаривааро д̣̇уурад̇ова бажжуг̇г̇аманам̣ гад̇ваа т̇зрам̣ вихаарам̣ бавзсзд̇ваа жад̇уухи бажжаязхи саггажжам̣ убадтаханд̇о саран̣зсу жа сийлзсу жа бад̇идтахи. гумааро жа сийлаани самаад̣̇ияид̇ваа т̇зрам̣ бхигкуу жзва саггажжам̣ убадтаханд̇о д̣̇аанаани д̣̇ад̣̇анд̇о д̇хаммам̣ сун̣анд̇о жад̇уннам̣ маасаанам̣ ажжаязна гаалам̣ гад̇ваа д̇аавад̇им̣сабхаванз ниб̣б̣ад̇д̇и. д̇асса бун̃н̃аанубхаавзна сад̇д̇арад̇анабадиман̣д̣ид̇о сад̇д̇аяож̇анаббамаан̣о рат̇о уббаж̇ж̇и, анзгаани жасса ажчараасахассаани баривааро ахоси.

Taṃ sutvā rājā saparivāro uyyānaṃ gantvā kumāraṃ āliṅgitvā antepuraṃ netvā abhisiñcitukāmo ahosi. Kumāro ‘‘deva, mayhaṃ appakaṃ āyu, ito catunnaṃ māsānaṃ accayena maraṇaṃ bhavissati, kiṃ me rajjena, tumhe nissāya puññameva karissāmī’’ti vatvā therassa guṇaṃ ratanattayassa ca ānubhāvaṃ pavedesi. Taṃ sutvā rājā saṃvegappatto ratanattaye ca there ca pasannamānaso mahantaṃ vihāraṃ kāretvā mahākaccāyanattherassa santike dūtaṃ pāhesi. Theropi rājānaṃ mahājanañca anuggaṇhanto āgacchi. Rājā ca saparivāro dūratova paccuggamanaṃ katvā theraṃ vihāraṃ pavesetvā catūhi paccayehi sakkaccaṃ upaṭṭhahanto saraṇesu ca sīlesu ca patiṭṭhahi. Kumāro ca sīlāni samādiyitvā theraṃ bhikkhū ceva sakkaccaṃ upaṭṭhahanto dānāni dadanto dhammaṃ suṇanto catunnaṃ māsānaṃ accayena kālaṃ katvā tāvatiṃsabhavane nibbatti. Tassa puññānubhāvena sattaratanapaṭimaṇḍito sattayojanappamāṇo ratho uppajji, anekāni cassa accharāsahassāni parivāro ahosi.

рааж̇аа гумаарасса сарийрасаггаарам̣ гад̇ваа бхигкусан̇гхасса жа махаад̣̇аанам̣ бавад̇д̇зд̇ваа жзд̇ияасса бууж̇ам̣ агааси, д̇ад̇т̇а махааж̇ано саннибад̇и, т̇зроби сабаривааро д̇ам̣ бад̣̇зсам̣ убаг̇ан̃чи. ат̇а д̣̇звабуд̇д̇о ад̇д̇анаа гад̇агусалагаммам̣ ологзд̇ваа гад̇ан̃н̃уд̇ааяа ‘‘г̇анд̇ваа т̇зрам̣ ванд̣̇иссаами, саасанаг̇ун̣з жа баагадз гариссаамий’’д̇и жинд̇зд̇ваа д̣̇иб̣б̣арат̇ам̣ ааруяха махад̇аа бариваарзна д̣̇иссамаанаруубо ааг̇анд̇ваа рат̇аа оруяха т̇зрасса баад̣̇з ванд̣̇ид̇ваа бид̇араа сад̣̇д̇хим̣ бадисант̇аарам̣ гад̇ваа т̇зрам̣ баяирубаасамаано ан̃ж̇алим̣ баг̇г̇аяха адтааси. д̇ам̣ т̇зро имаахи г̇аат̇аахи бужчи –

Rājā kumārassa sarīrasakkāraṃ katvā bhikkhusaṅghassa ca mahādānaṃ pavattetvā cetiyassa pūjaṃ akāsi, tattha mahājano sannipati, theropi saparivāro taṃ padesaṃ upagañchi. Atha devaputto attanā katakusalakammaṃ oloketvā kataññutāya ‘‘gantvā theraṃ vandissāmi, sāsanaguṇe ca pākaṭe karissāmī’’ti cintetvā dibbarathaṃ āruyha mahatā parivārena dissamānarūpo āgantvā rathā oruyha therassa pāde vanditvā pitarā saddhiṃ paṭisanthāraṃ katvā theraṃ payirupāsamāno añjaliṃ paggayha aṭṭhāsi. Taṃ thero imāhi gāthāhi pucchi –

1007.

‘‘сахассарам̣сийва яат̇аамахаббабхо, д̣̇исам̣ яат̇аа бхаад̇и набхз ануггамам̣;

‘‘Sahassaraṃsīva yathāmahappabho, disaṃ yathā bhāti nabhe anukkamaṃ;

д̇ат̇аабагааро д̇авааяам̣ махаарат̇о, саманд̇ад̇о яож̇анасад̇д̇амааяад̇о.

Tathāpakāro tavāyaṃ mahāratho, samantato yojanasattamāyato.

1008.

‘‘суван̣н̣абаддзхи саманд̇амод̇т̇адо, урасса муд̇д̇аахи ман̣ийхи жид̇д̇ид̇о;

‘‘Suvaṇṇapaṭṭehi samantamotthaṭo, urassa muttāhi maṇīhi cittito;

лзкаа суван̣н̣асса жа руубияасса жа, собхзнд̇и взл̣урияамаяаа суниммид̇аа.

Lekhā suvaṇṇassa ca rūpiyassa ca, sobhenti veḷuriyamayā sunimmitā.

1009.

‘‘сийсан̃жид̣̇ам̣ взл̣урияасса ниммид̇ам̣, яуг̇ан̃жид̣̇ам̣ лохид̇агааяа жид̇д̇ид̇ам̣;

‘‘Sīsañcidaṃ veḷuriyassa nimmitaṃ, yugañcidaṃ lohitakāya cittitaṃ;

яуд̇д̇аа суван̣н̣асса жа руубияасса жа, собханд̇и ассаа жа имз манож̇аваа.

Yuttā suvaṇṇassa ca rūpiyassa ca, sobhanti assā ca ime manojavā.

1010.

‘‘со д̇идтаси хзмарат̇з ад̇хидтид̇о, д̣̇зваанаминд̣̇ова сахассаваахано;

‘‘So tiṭṭhasi hemarathe adhiṭṭhito, devānamindova sahassavāhano;

бужчаами д̇аахам̣ яасаванд̇а говид̣̇ам̣, гат̇ам̣ д̇аяаа лад̣̇д̇хо аяам̣ ул̣ааро’’д̇и.

Pucchāmi tāhaṃ yasavanta kovidaṃ, kathaṃ tayā laddho ayaṃ uḷāro’’ti.

1007. д̇ад̇т̇а сахассарам̣сийд̇и суурияо. со хи анзгасахассарам̣симанд̇ад̇ааяа ‘‘сахассарам̣сий’’д̇и вужжад̇и. яат̇аамахаббабход̇и ад̇д̇ано махад̇д̇асса ануруубаббабхо. яат̇аа хи махад̇д̇зна суурияаман̣д̣алзна сад̣̇исам̣ ж̇од̇иман̣д̣алам̣ над̇т̇и, звам̣ бабхааяаби. д̇ат̇аа хи д̇ам̣ згасмим̣ кан̣з д̇ийсу махаад̣̇ийбзсу аалогам̣ паранд̇ам̣ д̇идтад̇и. д̣̇исам̣ яат̇аа бхаад̇и набхз ануггаманд̇и набхз аагаасз яат̇зва д̣̇исам̣ ануггаманд̇о г̇ажчанд̇о яат̇аа язна багаарзна бхаад̇и д̣̇иб̣б̣ад̇и ж̇од̇ад̇и. д̇ат̇аабагаарод̇и д̇аад̣̇исаагааро. д̇авааяанд̇и д̇ава аяам̣.

1007. Tattha sahassaraṃsīti sūriyo. So hi anekasahassaraṃsimantatāya ‘‘sahassaraṃsī’’ti vuccati. Yathāmahappabhoti attano mahattassa anurūpappabho. Yathā hi mahattena sūriyamaṇḍalena sadisaṃ jotimaṇḍalaṃ natthi, evaṃ pabhāyapi. Tathā hi taṃ ekasmiṃ khaṇe tīsu mahādīpesu ālokaṃ pharantaṃ tiṭṭhati. Disaṃ yathā bhāti nabhe anukkamanti nabhe ākāse yatheva disaṃ anukkamanto gacchanto yathā yena pakārena bhāti dibbati jotati. Tathāpakāroti tādisākāro. Tavāyanti tava ayaṃ.

1008. суван̣н̣абаддзхийд̇и суван̣н̣амаязхи баддзхи. саманд̇амод̇т̇адо саманд̇ад̇о чаад̣̇ид̇о. урассаад̇и уро асса, рат̇асса урод̇и жа ийсаамуулам̣ вад̣̇ад̇и. лзкаад̇и взл̣урияамаяаа маалаагаммалад̇аагаммаад̣̇илзкаа. д̇аасам̣ суван̣н̣абаддзсу жа раж̇ад̇абаддзсу жа д̣̇иссамаанад̇д̇аа вуд̇д̇ам̣ ‘‘суван̣н̣асса жа руубияасса жаа’’д̇и. собхзнд̇ийд̇и рат̇ам̣ собхаяанд̇и.

1008.Suvaṇṇapaṭṭehīti suvaṇṇamayehi paṭṭehi. Samantamotthaṭo samantato chādito. Urassāti uro assa, rathassa uroti ca īsāmūlaṃ vadati. Lekhāti veḷuriyamayā mālākammalatākammādilekhā. Tāsaṃ suvaṇṇapaṭṭesu ca rajatapaṭṭesu ca dissamānattā vuttaṃ ‘‘suvaṇṇassa ca rūpiyassa cā’’ti. Sobhentīti rathaṃ sobhayanti.

1009. сийсанд̇и рат̇агуб̣б̣арасийсам̣. взл̣урияасса ниммид̇анд̇и взл̣уриязна ниммид̇ам̣, взл̣урияаман̣имаяанд̇и ад̇т̇о. лохид̇агааяаад̇и лохид̇агаман̣инаа, язна гзнажи рад̇д̇аман̣инаа ваа. яуд̇д̇аад̇и яож̇ид̇аа, ат̇а ваа яод̇д̇аа суван̣н̣асса жа руубияасса жаад̇и суван̣н̣амаяаа жа руубияамаяаа жа яод̇д̇аа, сан̇калигаад̇и ад̇т̇о.

1009.Sīsanti rathakubbarasīsaṃ. Veḷuriyassa nimmitanti veḷuriyena nimmitaṃ, veḷuriyamaṇimayanti attho. Lohitakāyāti lohitakamaṇinā, yena kenaci rattamaṇinā vā. Yuttāti yojitā, atha vā yottā suvaṇṇassa ca rūpiyassa cāti suvaṇṇamayā ca rūpiyamayā ca yottā, saṅkhalikāti attho.

1010. ад̇хидтид̇од̇и ад̇д̇ано д̣̇звид̣̇д̇хияаа сагаламид̣̇ам̣ таанам̣ абхибхавид̇ваа тид̇о. сахассавааханод̇и сахассаяуд̇д̇аваахано, сахассаааж̇аанийяаяуд̇д̇арат̇о д̣̇зваанаминд̣̇о яат̇аад̇и ад̇хиббааяо. яасаванд̇аад̇и аалабанам̣, яасассийд̇и ад̇т̇о. говид̣̇анд̇и гусалан̃аан̣аванд̇ам̣, рат̇аароханз ваа чзгам̣. аяам̣ ул̣аарод̇и аяам̣ ул̣ааро маханд̇о яасод̇и ад̇хиббааяо.

1010.Adhiṭṭhitoti attano deviddhiyā sakalamidaṃ ṭhānaṃ abhibhavitvā ṭhito. Sahassavāhanoti sahassayuttavāhano, sahassaājānīyayuttaratho devānamindo yathāti adhippāyo. Yasavantāti ālapanaṃ, yasassīti attho. Kovidanti kusalañāṇavantaṃ, rathārohane vā chekaṃ. Ayaṃ uḷāroti ayaṃ uḷāro mahanto yasoti adhippāyo.

звам̣ т̇зрзна будто д̣̇звабуд̇д̇о имаахи г̇аат̇аахи б̣яаагааси –

Evaṃ therena puṭṭho devaputto imāhi gāthāhi byākāsi –

1011.

‘‘суж̇аад̇о наамахам̣ бханд̇з, рааж̇абуд̇д̇о бурз ахум̣;

‘‘Sujāto nāmahaṃ bhante, rājaputto pure ahuṃ;

д̇ван̃жа мам̣ анугамбааяа, сан̃н̃амасмим̣ нивзсаяи.

Tvañca maṃ anukampāya, saññamasmiṃ nivesayi.

1012.

‘‘кийн̣ааяуган̃жа мам̣ н̃ад̇ваа, сарийрам̣ баад̣̇ааси сад̇т̇уно;

‘‘Khīṇāyukañca maṃ ñatvā, sarīraṃ pādāsi satthuno;

имам̣ суж̇аад̇а бууж̇зхи, д̇ам̣ д̇з ад̇т̇ааяа хзхид̇и.

Imaṃ sujāta pūjehi, taṃ te atthāya hehiti.

1013.

‘‘д̇аахам̣ г̇анд̇хзхи маалзхи, бууж̇аяид̇ваа самуяяуд̇о;

‘‘Tāhaṃ gandhehi mālehi, pūjayitvā samuyyuto;

бахааяа маанусам̣ д̣̇зхам̣, убабанномхи нанд̣̇анам̣.

Pahāya mānusaṃ dehaṃ, upapannomhi nandanaṃ.

1014.

‘‘нанд̣̇анз жа ванз раммз, наанаад̣̇иж̇аг̇ан̣ааяуд̇з;

‘‘Nandane ca vane ramme, nānādijagaṇāyute;

рамаами нажжаг̇ийд̇зхи, ажчараахи бурагкад̇о’’д̇и.

Ramāmi naccagītehi, accharāhi purakkhato’’ti.

1012-3. д̇ад̇т̇а сарийранд̇ий сарийрад̇хаад̇ум̣. хзхид̇ийд̇и бхависсад̇и. самуяяуд̇од̇и саммаа уяяуд̇д̇о, яуд̇д̇аббаяуд̇д̇од̇и ад̇т̇о.

1012-3. Tattha sarīrantī sarīradhātuṃ. Hehitīti bhavissati. Samuyyutoti sammā uyyutto, yuttappayuttoti attho.

звам̣ д̣̇звабуд̇д̇о т̇зрзна бужчид̇амад̇т̇ам̣ гат̇зд̇ваа т̇зрам̣ ванд̣̇ид̇ваа бад̣̇агкин̣ам̣ гад̇ваа бид̇арам̣ аабужчид̇ваа рат̇ам̣ ааруяха д̣̇звалогамзва г̇ад̇о. т̇зроби д̇амад̇т̇ам̣ адтуббад̇д̇им̣ гад̇ваа самбад̇д̇абарисааяа вид̇т̇аарзна д̇хаммагат̇ам̣ гат̇зси. саа д̇хаммагат̇аа махааж̇анасса саад̇т̇игаа ахоси. ат̇а т̇зро д̇ам̣ саб̣б̣ам̣ ад̇д̇анаа жа д̇зна жа гат̇ид̇анияаамзнзва сан̇г̇ийд̇игаалз д̇хаммасан̇г̇аахагаанам̣ аарожзси, д̇з жа д̇ам̣ д̇ат̇аа сан̇г̇ахам̣ ааробзсунд̇и.

Evaṃ devaputto therena pucchitamatthaṃ kathetvā theraṃ vanditvā padakkhiṇaṃ katvā pitaraṃ āpucchitvā rathaṃ āruyha devalokameva gato. Theropi tamatthaṃ aṭṭhuppattiṃ katvā sampattaparisāya vitthārena dhammakathaṃ kathesi. Sā dhammakathā mahājanassa sātthikā ahosi. Atha thero taṃ sabbaṃ attanā ca tena ca kathitaniyāmeneva saṅgītikāle dhammasaṅgāhakānaṃ ārocesi, te ca taṃ tathā saṅgahaṃ āropesunti.

жуул̣арат̇авимаанаван̣н̣анаа нидтид̇аа.

Cūḷarathavimānavaṇṇanā niṭṭhitā.

Next: 14. махаарат̇авимаанаван̣н̣анаа • 14. Mahārathavimānavaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 13. жуул̣арат̇авимаанавад̇т̇у • 13. Cūḷarathavimānavatthu

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact