| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৯. চূল়সকুলুদাযিসুত্তং
9. Cūḷasakuludāyisuttaṃ
২৬৯. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন সকুলুদাযী পরিব্বাজকো মোরনিৰাপে পরিব্বাজকারামে পটিৰসতি মহতিযা পরিব্বাজকপরিসায সদ্ধিং। অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসি। অথ খো ভগৰতো এতদহোসি – ‘‘অতিপ্পগো খো তাৰ রাজগহে পিণ্ডায চরিতুং। যংনূনাহং যেন মোরনিৰাপো পরিব্বাজকারামো যেন সকুলুদাযী পরিব্বাজকো তেনুপসঙ্কমেয্য’’ন্তি। অথ খো ভগৰা যেন মোরনিৰাপো পরিব্বাজকারামো তেনুপসঙ্কমি।
269. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena sakuludāyī paribbājako moranivāpe paribbājakārāme paṭivasati mahatiyā paribbājakaparisāya saddhiṃ. Atha kho bhagavā pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi. Atha kho bhagavato etadahosi – ‘‘atippago kho tāva rājagahe piṇḍāya carituṃ. Yaṃnūnāhaṃ yena moranivāpo paribbājakārāmo yena sakuludāyī paribbājako tenupasaṅkameyya’’nti. Atha kho bhagavā yena moranivāpo paribbājakārāmo tenupasaṅkami.
তেন খো পন সমযেন সকুলুদাযী পরিব্বাজকো মহতিযা পরিব্বাজকপরিসায সদ্ধিং নিসিন্নো হোতি উন্নাদিনিযা উচ্চাসদ্দমহাসদ্দায অনেকৰিহিতং তিরচ্ছানকথং কথেন্তিযা, সেয্যথিদং – রাজকথং চোরকথং মহামত্তকথং সেনাকথং ভযকথং যুদ্ধকথং অন্নকথং পানকথং ৰত্থকথং সযনকথং মালাকথং গন্ধকথং ঞাতিকথং যানকথং গামকথং নিগমকথং নগরকথং জনপদকথং ইত্থিকথং সূরকথং ৰিসিখাকথং কুম্ভট্ঠানকথং পুব্বপেতকথং নানত্তকথং লোকক্খাযিকং সমুদ্দক্খাযিকং ইতিভৰাভৰকথং ইতি ৰা। অদ্দসা খো সকুলুদাযী পরিব্বাজকো ভগৰন্তং দূরতোৰ আগচ্ছন্তং। দিস্ৰান সকং পরিসং সণ্ঠাপেসি – ‘‘অপ্পসদ্দা ভোন্তো হোন্তু, মা ভোন্তো সদ্দমকত্থ। অযং সমণো গোতমো আগচ্ছতি; অপ্পসদ্দকামো খো পন সো আযস্মা অপ্পসদ্দস্স ৰণ্ণৰাদী। অপ্পেৰ নাম অপ্পসদ্দং পরিসং ৰিদিত্ৰা উপসঙ্কমিতব্বং মঞ্ঞেয্যা’’তি। অথ খো তে পরিব্বাজকা তুণ্হী অহেসুং ।
Tena kho pana samayena sakuludāyī paribbājako mahatiyā paribbājakaparisāya saddhiṃ nisinno hoti unnādiniyā uccāsaddamahāsaddāya anekavihitaṃ tiracchānakathaṃ kathentiyā, seyyathidaṃ – rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ annakathaṃ pānakathaṃ vatthakathaṃ sayanakathaṃ mālākathaṃ gandhakathaṃ ñātikathaṃ yānakathaṃ gāmakathaṃ nigamakathaṃ nagarakathaṃ janapadakathaṃ itthikathaṃ sūrakathaṃ visikhākathaṃ kumbhaṭṭhānakathaṃ pubbapetakathaṃ nānattakathaṃ lokakkhāyikaṃ samuddakkhāyikaṃ itibhavābhavakathaṃ iti vā. Addasā kho sakuludāyī paribbājako bhagavantaṃ dūratova āgacchantaṃ. Disvāna sakaṃ parisaṃ saṇṭhāpesi – ‘‘appasaddā bhonto hontu, mā bhonto saddamakattha. Ayaṃ samaṇo gotamo āgacchati; appasaddakāmo kho pana so āyasmā appasaddassa vaṇṇavādī. Appeva nāma appasaddaṃ parisaṃ viditvā upasaṅkamitabbaṃ maññeyyā’’ti. Atha kho te paribbājakā tuṇhī ahesuṃ .
২৭০. অথ খো ভগৰা যেন সকুলুদাযী পরিব্বাজকো তেনুপসঙ্কমি। অথ খো সকুলুদাযী পরিব্বাজকো ভগৰন্তং এতদৰোচ – ‘‘এতু খো, ভন্তে, ভগৰা। স্ৰাগতং, ভন্তে, ভগৰতো। চিরস্সং খো, ভন্তে, ভগৰা ইমং পরিযাযমকাসি যদিদং ইধাগমনায। নিসীদতু, ভন্তে, ভগৰা; ইদমাসনং পঞ্ঞত্ত’’ন্তি। নিসীদি ভগৰা পঞ্ঞত্তে আসনে। সকুলুদাযীপি খো পরিব্বাজকো অঞ্ঞতরং নীচং আসনং গহেত্ৰা একমন্তং নিসীদি। একমন্তং নিসিন্নং খো সকুলুদাযিং পরিব্বাজকং ভগৰা এতদৰোচ – ‘‘কায নুত্থ, উদাযি, এতরহি কথায সন্নিসিন্না, কা চ পন ৰো অন্তরাকথা ৰিপ্পকতা’’তি? ‘‘তিট্ঠতেসা, ভন্তে, কথা যায মযং এতরহি কথায সন্নিসিন্না। নেসা, ভন্তে, কথা ভগৰতো দুল্লভা ভৰিস্সতি পচ্ছাপি সৰনায। যদাহং, ভন্তে, ইমং পরিসং অনুপসঙ্কন্তো হোমি অথাযং পরিসা অনেকৰিহিতং তিরচ্ছানকথং কথেন্তী নিসিন্না হোতি; যদা চ খো অহং, ভন্তে, ইমং পরিসং উপসঙ্কন্তো হোমি অথাযং পরিসা মমঞ্ঞেৰ মুখং উল্লোকেন্তী নিসিন্না হোতি – ‘যং নো সমণো উদাযী ধম্মং ভাসিস্সতি তং 1 সোস্সামা’তি; যদা পন , ভন্তে, ভগৰা ইমং পরিসং উপসঙ্কন্তো হোতি অথাহঞ্চেৰ অযঞ্চ পরিসা ভগৰতো মুখং উল্লোকেন্তা 2 নিসিন্না হোম – ‘যং নো ভগৰা ধম্মং ভাসিস্সতি তং সোস্সামা’’’তি।
270. Atha kho bhagavā yena sakuludāyī paribbājako tenupasaṅkami. Atha kho sakuludāyī paribbājako bhagavantaṃ etadavoca – ‘‘etu kho, bhante, bhagavā. Svāgataṃ, bhante, bhagavato. Cirassaṃ kho, bhante, bhagavā imaṃ pariyāyamakāsi yadidaṃ idhāgamanāya. Nisīdatu, bhante, bhagavā; idamāsanaṃ paññatta’’nti. Nisīdi bhagavā paññatte āsane. Sakuludāyīpi kho paribbājako aññataraṃ nīcaṃ āsanaṃ gahetvā ekamantaṃ nisīdi. Ekamantaṃ nisinnaṃ kho sakuludāyiṃ paribbājakaṃ bhagavā etadavoca – ‘‘kāya nuttha, udāyi, etarahi kathāya sannisinnā, kā ca pana vo antarākathā vippakatā’’ti? ‘‘Tiṭṭhatesā, bhante, kathā yāya mayaṃ etarahi kathāya sannisinnā. Nesā, bhante, kathā bhagavato dullabhā bhavissati pacchāpi savanāya. Yadāhaṃ, bhante, imaṃ parisaṃ anupasaṅkanto homi athāyaṃ parisā anekavihitaṃ tiracchānakathaṃ kathentī nisinnā hoti; yadā ca kho ahaṃ, bhante, imaṃ parisaṃ upasaṅkanto homi athāyaṃ parisā mamaññeva mukhaṃ ullokentī nisinnā hoti – ‘yaṃ no samaṇo udāyī dhammaṃ bhāsissati taṃ 3 sossāmā’ti; yadā pana , bhante, bhagavā imaṃ parisaṃ upasaṅkanto hoti athāhañceva ayañca parisā bhagavato mukhaṃ ullokentā 4 nisinnā homa – ‘yaṃ no bhagavā dhammaṃ bhāsissati taṃ sossāmā’’’ti.
২৭১. ‘‘তেনহুদাযি, তংযেৰেত্থ পটিভাতু যথা মং পটিভাসেয্যা’’সি। ‘‘পুরিমানি , ভন্তে, দিৰসানি পুরিমতরানি সব্বঞ্ঞূ সব্বদস্সাৰী অপরিসেসং ঞাণদস্সনং পটিজানমানো ‘চরতো চ মে তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিত’ন্তি। সো মযা 5 পুব্বন্তং আরব্ভ পঞ্হং পুট্ঠো সমানো অঞ্ঞেনঞ্ঞং পটিচরি, বহিদ্ধা কথং অপনামেসি, কোপঞ্চ দোসঞ্চ অপ্পচ্চযঞ্চ পাত্ৰাকাসি। তস্স ময্হং, ভন্তে, ভগৰন্তংযেৰ আরব্ভ সতি উদপাদি – ‘অহো নূন ভগৰা, অহো নূন সুগতো! যো ইমেসং ধম্মানং সুকুসলো’’’তি। ‘‘কো পন সো, উদাযি, সব্বঞ্ঞূ সব্বদস্সাৰী অপরিসেসং ঞাণদস্সনং পটিজানমানো ‘চরতো চ মে তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিত’ন্তি, যো তযা পুব্বন্তং আরব্ভ পঞ্হং পুট্ঠো সমানো অঞ্ঞেনঞ্ঞং পটিচরি, বহিদ্ধা কথং অপনামেসি কোপঞ্চ দোসঞ্চ অপ্পচ্চযঞ্চ পাত্ৰাকাসী’’তি? ‘নিগণ্ঠো, ভন্তে, নাটপুত্তো’তি।
271. ‘‘Tenahudāyi, taṃyevettha paṭibhātu yathā maṃ paṭibhāseyyā’’si. ‘‘Purimāni , bhante, divasāni purimatarāni sabbaññū sabbadassāvī aparisesaṃ ñāṇadassanaṃ paṭijānamāno ‘carato ca me tiṭṭhato ca suttassa ca jāgarassa ca satataṃ samitaṃ ñāṇadassanaṃ paccupaṭṭhita’nti. So mayā 6 pubbantaṃ ārabbha pañhaṃ puṭṭho samāno aññenaññaṃ paṭicari, bahiddhā kathaṃ apanāmesi, kopañca dosañca appaccayañca pātvākāsi. Tassa mayhaṃ, bhante, bhagavantaṃyeva ārabbha sati udapādi – ‘aho nūna bhagavā, aho nūna sugato! Yo imesaṃ dhammānaṃ sukusalo’’’ti. ‘‘Ko pana so, udāyi, sabbaññū sabbadassāvī aparisesaṃ ñāṇadassanaṃ paṭijānamāno ‘carato ca me tiṭṭhato ca suttassa ca jāgarassa ca satataṃ samitaṃ ñāṇadassanaṃ paccupaṭṭhita’nti, yo tayā pubbantaṃ ārabbha pañhaṃ puṭṭho samāno aññenaññaṃ paṭicari, bahiddhā kathaṃ apanāmesi kopañca dosañca appaccayañca pātvākāsī’’ti? ‘Nigaṇṭho, bhante, nāṭaputto’ti.
‘‘যো খো, উদাযি, অনেকৰিহিতং পুব্বেনিৰাসং অনুস্সরেয্য, সেয্যথিদং – একম্পি জাতিং দ্ৰেপি জাতিযো…পে॰… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরেয্য, সো ৰা মং পুব্বন্তং আরব্ভ পঞ্হং পুচ্ছেয্য, তং ৰাহং পুব্বন্তং আরব্ভ পঞ্হং পুচ্ছেয্যং; সো ৰা মে পুব্বন্তং আরব্ভ পঞ্হস্স ৰেয্যাকরণেন চিত্তং আরাধেয্য, তস্স ৰাহং পুব্বন্তং আরব্ভ পঞ্হস্স ৰেয্যাকরণেন চিত্তং আরাধেয্যং।
‘‘Yo kho, udāyi, anekavihitaṃ pubbenivāsaṃ anussareyya, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussareyya, so vā maṃ pubbantaṃ ārabbha pañhaṃ puccheyya, taṃ vāhaṃ pubbantaṃ ārabbha pañhaṃ puccheyyaṃ; so vā me pubbantaṃ ārabbha pañhassa veyyākaraṇena cittaṃ ārādheyya, tassa vāhaṃ pubbantaṃ ārabbha pañhassa veyyākaraṇena cittaṃ ārādheyyaṃ.
‘‘যো 7 খো, উদাযি, দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সেয্য চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানেয্য, সো ৰা মং অপরন্তং আরব্ভ পঞ্হং পুচ্ছেয্য, তং ৰাহং অপরন্তং আরব্ভ পঞ্হং পুচ্ছেয্যং; সো ৰা মে অপরন্তং আরব্ভ পঞ্হস্স ৰেয্যাকরণেন চিত্তং আরাধেয্য, তস্স ৰাহং অপরন্তং আরব্ভ পঞ্হস্স ৰেয্যাকরণেন চিত্তং আরাধেয্যং।
‘‘Yo 8 kho, udāyi, dibbena cakkhunā visuddhena atikkantamānusakena satte passeyya cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajāneyya, so vā maṃ aparantaṃ ārabbha pañhaṃ puccheyya, taṃ vāhaṃ aparantaṃ ārabbha pañhaṃ puccheyyaṃ; so vā me aparantaṃ ārabbha pañhassa veyyākaraṇena cittaṃ ārādheyya, tassa vāhaṃ aparantaṃ ārabbha pañhassa veyyākaraṇena cittaṃ ārādheyyaṃ.
‘‘অপি চ, উদাযি, তিট্ঠতু পুব্বন্তো, তিট্ঠতু অপরন্তো। ধম্মং তে দেসেস্সামি – ইমস্মিং সতি ইদং হোতি, ইমস্সুপ্পাদা ইদং উপ্পজ্জতি; ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতী’’তি।
‘‘Api ca, udāyi, tiṭṭhatu pubbanto, tiṭṭhatu aparanto. Dhammaṃ te desessāmi – imasmiṃ sati idaṃ hoti, imassuppādā idaṃ uppajjati; imasmiṃ asati idaṃ na hoti, imassa nirodhā idaṃ nirujjhatī’’ti.
‘‘অহঞ্হি, ভন্তে, যাৰতকম্পি মে ইমিনা অত্তভাৰেন পচ্চনুভূতং তম্পি নপ্পহোমি সাকারং সউদ্দেসং অনুস্সরিতুং, কুতো পনাহং অনেকৰিহিতং পুব্বেনিৰাসং অনুস্সরিস্সামি, সেয্যথিদং – একম্পি জাতিং দ্ৰেপি জাতিযো…পে॰… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরিস্সামি, সেয্যথাপি ভগৰা? অহঞ্হি, ভন্তে, এতরহি পংসুপিসাচকম্পি ন পস্সামি, কুতো পনাহং দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সিস্সামি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানিস্সামি, সেয্যথাপি ভগৰা? যং পন মং, ভন্তে, ভগৰা এৰমাহ – ‘অপি চ, উদাযি, তিট্ঠতু পুব্বন্তো, তিট্ঠতু অপরন্তো; ধম্মং তে দেসেস্সামি – ইমস্মিং সতি ইদং হোতি, ইমস্সুপ্পাদা ইদং উপ্পজ্জতি; ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতী’তি তঞ্চ পন মে ভিয্যোসোমত্তায ন পক্খাযতি। অপ্পেৰ নামাহং, ভন্তে, সকে আচরিযকে ভগৰতো চিত্তং আরাধেয্যং পঞ্হস্স ৰেয্যাকরণেনা’’তি।
‘‘Ahañhi, bhante, yāvatakampi me iminā attabhāvena paccanubhūtaṃ tampi nappahomi sākāraṃ sauddesaṃ anussarituṃ, kuto panāhaṃ anekavihitaṃ pubbenivāsaṃ anussarissāmi, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarissāmi, seyyathāpi bhagavā? Ahañhi, bhante, etarahi paṃsupisācakampi na passāmi, kuto panāhaṃ dibbena cakkhunā visuddhena atikkantamānusakena satte passissāmi cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānissāmi, seyyathāpi bhagavā? Yaṃ pana maṃ, bhante, bhagavā evamāha – ‘api ca, udāyi, tiṭṭhatu pubbanto, tiṭṭhatu aparanto; dhammaṃ te desessāmi – imasmiṃ sati idaṃ hoti, imassuppādā idaṃ uppajjati; imasmiṃ asati idaṃ na hoti, imassa nirodhā idaṃ nirujjhatī’ti tañca pana me bhiyyosomattāya na pakkhāyati. Appeva nāmāhaṃ, bhante, sake ācariyake bhagavato cittaṃ ārādheyyaṃ pañhassa veyyākaraṇenā’’ti.
২৭২. ‘‘কিন্তি পন তে, উদাযি, সকে আচরিযকে হোতী’’তি? ‘‘অম্হাকং, ভন্তে, সকে আচরিযকে এৰং হোতি – ‘অযং পরমো ৰণ্ণো, অযং পরমো ৰণ্ণো’’’তি।
272. ‘‘Kinti pana te, udāyi, sake ācariyake hotī’’ti? ‘‘Amhākaṃ, bhante, sake ācariyake evaṃ hoti – ‘ayaṃ paramo vaṇṇo, ayaṃ paramo vaṇṇo’’’ti.
‘‘যং পন তে এতং, উদাযি, সকে আচরিযকে এৰং হোতি – ‘অযং পরমো ৰণ্ণো, অযং পরমো ৰণ্ণো’তি, কতমো সো পরমো ৰণ্ণো’’তি? ‘‘যস্মা, ভন্তে, ৰণ্ণা অঞ্ঞো ৰণ্ণো উত্তরিতরো ৰা পণীততরো ৰা নত্থি সো পরমো ৰণ্ণো’’তি।
‘‘Yaṃ pana te etaṃ, udāyi, sake ācariyake evaṃ hoti – ‘ayaṃ paramo vaṇṇo, ayaṃ paramo vaṇṇo’ti, katamo so paramo vaṇṇo’’ti? ‘‘Yasmā, bhante, vaṇṇā añño vaṇṇo uttaritaro vā paṇītataro vā natthi so paramo vaṇṇo’’ti.
‘‘কতমো পন সো পরমো ৰণ্ণো যস্মা ৰণ্ণা অঞ্ঞো ৰণ্ণো উত্তরিতরো ৰা পণীততরো ৰা নত্থী’’তি? ‘‘যস্মা , ভন্তে, ৰণ্ণা অঞ্ঞো ৰণ্ণো উত্তরিতরো ৰা পণীততরো ৰা নত্থি সো পরমো ৰণ্ণো’’তি।
‘‘Katamo pana so paramo vaṇṇo yasmā vaṇṇā añño vaṇṇo uttaritaro vā paṇītataro vā natthī’’ti? ‘‘Yasmā , bhante, vaṇṇā añño vaṇṇo uttaritaro vā paṇītataro vā natthi so paramo vaṇṇo’’ti.
‘‘দীঘাপি খো তে এসা, উদাযি, ফরেয্য – ‘যস্মা, ভন্তে, ৰণ্ণা অঞ্ঞো ৰণ্ণো উত্তরিতরো ৰা পণীততরো ৰা নত্থি সো পরমো ৰণ্ণো’তি ৰদেসি, তঞ্চ ৰণ্ণং ন পঞ্ঞপেসি। সেয্যথাপি, উদাযি, পুরিসো এৰং ৰদেয্য – ‘অহং যা ইমস্মিং জনপদে জনপদকল্যাণী তং ইচ্ছামি, তং কামেমী’তি। তমেনং এৰং ৰদেয্যুং – ‘অম্ভো পুরিস, যং ত্ৰং জনপদকল্যাণিং ইচ্ছসি কামেসি, জানাসি তং জনপদকল্যাণিং – খত্তিযী ৰা ব্রাহ্মণী ৰা ৰেস্সী ৰা সুদ্দী ৰা’’তি? ইতি পুট্ঠো ‘নো’তি ৰদেয্য। তমেনং এৰং ৰদেয্যুং – ‘অম্ভো পুরিস, যং ত্ৰং জনপদকল্যাণিং ইচ্ছসি কামেসি, জানাসি তং জনপদকল্যাণিং – এৰংনামা এৰংগোত্তাতি ৰাতি…পে॰… দীঘা ৰা রস্সা ৰা মজ্ঝিমা ৰা কাল়ী ৰা সামা ৰা মঙ্গুরচ্ছৰী ৰাতি… অমুকস্মিং গামে ৰা নিগমে ৰা নগরে ৰা’তি? ইতি পুট্ঠো ‘নো’তি ৰদেয্য। তমেনং এৰং ৰদেয্যুং – ‘অম্ভো পুরিস, যং ত্ৰং ন জানাসি ন পস্সসি, তং ত্ৰং ইচ্ছসি কামেসী’’’তি? ইতি পুট্ঠো ‘আমা’তি ৰদেয্য।
‘‘Dīghāpi kho te esā, udāyi, phareyya – ‘yasmā, bhante, vaṇṇā añño vaṇṇo uttaritaro vā paṇītataro vā natthi so paramo vaṇṇo’ti vadesi, tañca vaṇṇaṃ na paññapesi. Seyyathāpi, udāyi, puriso evaṃ vadeyya – ‘ahaṃ yā imasmiṃ janapade janapadakalyāṇī taṃ icchāmi, taṃ kāmemī’ti. Tamenaṃ evaṃ vadeyyuṃ – ‘ambho purisa, yaṃ tvaṃ janapadakalyāṇiṃ icchasi kāmesi, jānāsi taṃ janapadakalyāṇiṃ – khattiyī vā brāhmaṇī vā vessī vā suddī vā’’ti? Iti puṭṭho ‘no’ti vadeyya. Tamenaṃ evaṃ vadeyyuṃ – ‘ambho purisa, yaṃ tvaṃ janapadakalyāṇiṃ icchasi kāmesi, jānāsi taṃ janapadakalyāṇiṃ – evaṃnāmā evaṃgottāti vāti…pe… dīghā vā rassā vā majjhimā vā kāḷī vā sāmā vā maṅguracchavī vāti… amukasmiṃ gāme vā nigame vā nagare vā’ti? Iti puṭṭho ‘no’ti vadeyya. Tamenaṃ evaṃ vadeyyuṃ – ‘ambho purisa, yaṃ tvaṃ na jānāsi na passasi, taṃ tvaṃ icchasi kāmesī’’’ti? Iti puṭṭho ‘āmā’ti vadeyya.
‘‘তং কিং মঞ্ঞসি, উদাযি – ননু এৰং সন্তে, তস্স পুরিসস্স অপ্পাটিহীরকতং ভাসিতং সম্পজ্জতী’’তি? ‘‘অদ্ধা খো, ভন্তে, এৰং সন্তে তস্স পুরিসস্স অপ্পাটিহীরকতং ভাসিতং সম্পজ্জতী’’তি।
‘‘Taṃ kiṃ maññasi, udāyi – nanu evaṃ sante, tassa purisassa appāṭihīrakataṃ bhāsitaṃ sampajjatī’’ti? ‘‘Addhā kho, bhante, evaṃ sante tassa purisassa appāṭihīrakataṃ bhāsitaṃ sampajjatī’’ti.
‘‘এৰমেৰ খো ত্ৰং, উদাযি, ‘যস্মা, ভন্তে, ৰণ্ণা অঞ্ঞো ৰণ্ণো উত্তরিতরো ৰা পণীততরো ৰা নত্থি সো পরমো ৰণ্ণো’তি ৰদেসি, তঞ্চ ৰণ্ণং ন পঞ্ঞপেসী’’তি।
‘‘Evameva kho tvaṃ, udāyi, ‘yasmā, bhante, vaṇṇā añño vaṇṇo uttaritaro vā paṇītataro vā natthi so paramo vaṇṇo’ti vadesi, tañca vaṇṇaṃ na paññapesī’’ti.
‘‘সেয্যথাপি, ভন্তে, মণি ৰেল়ুরিযো সুভো জাতিমা অট্ঠংসো সুপরিকম্মকতো পণ্ডুকম্বলে নিক্খিত্তো ভাসতে চ তপতে চ ৰিরোচতি চ, এৰং ৰণ্ণো অত্তা হোতি অরোগো পরং মরণা’’তি।
‘‘Seyyathāpi, bhante, maṇi veḷuriyo subho jātimā aṭṭhaṃso suparikammakato paṇḍukambale nikkhitto bhāsate ca tapate ca virocati ca, evaṃ vaṇṇo attā hoti arogo paraṃ maraṇā’’ti.
২৭৩. ‘‘তং কিং মঞ্ঞসি, উদাযি, যো ৰা মণি ৰেল়ুরিযো সুভো জাতিমা অট্ঠংসো সুপরিকম্মকতো পণ্ডুকম্বলে নিক্খিত্তো ভাসতে চ তপতে চ ৰিরোচতি চ, যো ৰা রত্তন্ধকারতিমিসায কিমি খজ্জোপনকো – ইমেসং উভিন্নং ৰণ্ণানং কতমো ৰণ্ণো অভিক্কন্ততরো চ পণীততরো চা’’তি? ‘‘য্ৰাযং, ভন্তে, রত্তন্ধকারতিমিসায কিমি খজ্জোপনকো – অযং ইমেসং উভিন্নং ৰণ্ণানং অভিক্কন্ততরো চ পণীততরো চা’’তি।
273. ‘‘Taṃ kiṃ maññasi, udāyi, yo vā maṇi veḷuriyo subho jātimā aṭṭhaṃso suparikammakato paṇḍukambale nikkhitto bhāsate ca tapate ca virocati ca, yo vā rattandhakāratimisāya kimi khajjopanako – imesaṃ ubhinnaṃ vaṇṇānaṃ katamo vaṇṇo abhikkantataro ca paṇītataro cā’’ti? ‘‘Yvāyaṃ, bhante, rattandhakāratimisāya kimi khajjopanako – ayaṃ imesaṃ ubhinnaṃ vaṇṇānaṃ abhikkantataro ca paṇītataro cā’’ti.
‘‘তং কিং মঞ্ঞসি, উদাযি, যো ৰা রত্তন্ধকারতিমিসায কিমি খজ্জোপনকো, যো ৰা রত্তন্ধকারতিমিসায তেলপ্পদীপো – ইমেসং উভিন্নং ৰণ্ণানং কতমো ৰণ্ণো অভিক্কন্ততরো চ পণীততরো চা’’তি? ‘‘য্ৰাযং, ভন্তে, রত্তন্ধকারতিমিসায তেলপ্পদীপো – অযং ইমেসং উভিন্নং ৰণ্ণানং অভিক্কন্ততরো চ পণীততরো চা’’তি।
‘‘Taṃ kiṃ maññasi, udāyi, yo vā rattandhakāratimisāya kimi khajjopanako, yo vā rattandhakāratimisāya telappadīpo – imesaṃ ubhinnaṃ vaṇṇānaṃ katamo vaṇṇo abhikkantataro ca paṇītataro cā’’ti? ‘‘Yvāyaṃ, bhante, rattandhakāratimisāya telappadīpo – ayaṃ imesaṃ ubhinnaṃ vaṇṇānaṃ abhikkantataro ca paṇītataro cā’’ti.
‘‘তং কিং মঞ্ঞসি, উদাযি, যো ৰা রত্তন্ধকারতিমিসায তেলপ্পদীপো, যো ৰা রত্তন্ধকারতিমিসায মহাঅগ্গিক্খন্ধো – ইমেসং উভিন্নং ৰণ্ণানং কতমো ৰণ্ণো অভিক্কন্ততরো চ পণীততরো চা’’তি? ‘‘য্ৰাযং, ভন্তে, রত্তন্ধকারতিমিসায মহাঅগ্গিক্খন্ধো – অযং ইমেসং উভিন্নং ৰণ্ণানং অভিক্কন্ততরো চ পণীততরো চা’’তি।
‘‘Taṃ kiṃ maññasi, udāyi, yo vā rattandhakāratimisāya telappadīpo, yo vā rattandhakāratimisāya mahāaggikkhandho – imesaṃ ubhinnaṃ vaṇṇānaṃ katamo vaṇṇo abhikkantataro ca paṇītataro cā’’ti? ‘‘Yvāyaṃ, bhante, rattandhakāratimisāya mahāaggikkhandho – ayaṃ imesaṃ ubhinnaṃ vaṇṇānaṃ abhikkantataro ca paṇītataro cā’’ti.
‘‘তং কিং মঞ্ঞসি, উদাযি, যো ৰা রত্তন্ধকারতিমিসায মহাঅগ্গিক্খন্ধো, যা ৰা রত্তিযা পচ্চূসসমযং ৰিদ্ধে ৰিগতৰলাহকে দেৰে ওসধিতারকা – ইমেসং উভিন্নং ৰণ্ণানং কতমো ৰণ্ণো অভিক্কন্ততরো চ পণীততরো চা’’তি? ‘‘য্ৰাযং, ভন্তে, রত্তিযা পচ্চূসসমযং ৰিদ্ধে ৰিগতৰলাহকে দেৰে ওসধিতারকা – অযং ইমেসং উভিন্নং ৰণ্ণানং অভিক্কন্ততরো চ পণীততরো চা’’তি।
‘‘Taṃ kiṃ maññasi, udāyi, yo vā rattandhakāratimisāya mahāaggikkhandho, yā vā rattiyā paccūsasamayaṃ viddhe vigatavalāhake deve osadhitārakā – imesaṃ ubhinnaṃ vaṇṇānaṃ katamo vaṇṇo abhikkantataro ca paṇītataro cā’’ti? ‘‘Yvāyaṃ, bhante, rattiyā paccūsasamayaṃ viddhe vigatavalāhake deve osadhitārakā – ayaṃ imesaṃ ubhinnaṃ vaṇṇānaṃ abhikkantataro ca paṇītataro cā’’ti.
‘‘তং কিং মঞ্ঞসি, উদাযি, যা ৰা রত্তিযা পচ্চূসসমযং ৰিদ্ধে ৰিগতৰলাহকে দেৰে ওসধিতারকা, যো ৰা তদহুপোসথে পন্নরসে ৰিদ্ধে ৰিগতৰলাহকে দেৰে অভিদো 9 অড্ঢরত্তসমযং চন্দো – ইমেসং উভিন্নং ৰণ্ণানং কতমো ৰণ্ণো অভিক্কন্ততরো চ পণীততরো চা’’তি? ‘‘য্ৰাযং, ভন্তে, তদহুপোসথে পন্নরসে ৰিদ্ধে ৰিগতৰলাহকে দেৰে অভিদো অড্ঢরত্তসমযং চন্দো – অযং ইমেসং উভিন্নং ৰণ্ণানং অভিক্কন্ততরো চ পণীততরো চা’’তি।
‘‘Taṃ kiṃ maññasi, udāyi, yā vā rattiyā paccūsasamayaṃ viddhe vigatavalāhake deve osadhitārakā, yo vā tadahuposathe pannarase viddhe vigatavalāhake deve abhido 10 aḍḍharattasamayaṃ cando – imesaṃ ubhinnaṃ vaṇṇānaṃ katamo vaṇṇo abhikkantataro ca paṇītataro cā’’ti? ‘‘Yvāyaṃ, bhante, tadahuposathe pannarase viddhe vigatavalāhake deve abhido aḍḍharattasamayaṃ cando – ayaṃ imesaṃ ubhinnaṃ vaṇṇānaṃ abhikkantataro ca paṇītataro cā’’ti.
‘‘তং কিং মঞ্ঞসি, উদাযি, যো ৰা তদহুপোসথে পন্নরসে ৰিদ্ধে ৰিগতৰলাহকে দেৰে অভিদো অড্ঢরত্তসমযং চন্দো, যো ৰা ৰস্সানং পচ্ছিমে মাসে সরদসমযে ৰিদ্ধে ৰিগতৰলাহকে দেৰে অভিদো মজ্ঝন্হিকসমযং সূরিযো – ইমেসং উভিন্নং ৰণ্ণানং কতমো ৰণ্ণো অভিক্কন্ততরো চ পণীততরো চা’’তি? ‘‘য্ৰাযং, ভন্তে, ৰস্সানং পচ্ছিমে মাসে সরদসমযে ৰিদ্ধে ৰিগতৰলাহকে দেৰে অভিদো মজ্ঝন্হিকসমযং সূরিযো – অযং ইমেসং উভিন্নং ৰণ্ণানং অভিক্কন্ততরো চ পণীততরো চা’’তি।
‘‘Taṃ kiṃ maññasi, udāyi, yo vā tadahuposathe pannarase viddhe vigatavalāhake deve abhido aḍḍharattasamayaṃ cando, yo vā vassānaṃ pacchime māse saradasamaye viddhe vigatavalāhake deve abhido majjhanhikasamayaṃ sūriyo – imesaṃ ubhinnaṃ vaṇṇānaṃ katamo vaṇṇo abhikkantataro ca paṇītataro cā’’ti? ‘‘Yvāyaṃ, bhante, vassānaṃ pacchime māse saradasamaye viddhe vigatavalāhake deve abhido majjhanhikasamayaṃ sūriyo – ayaṃ imesaṃ ubhinnaṃ vaṇṇānaṃ abhikkantataro ca paṇītataro cā’’ti.
‘‘অতো খো তে, উদাযি, বহূ হি বহুতরা দেৰা যে ইমেসং চন্দিমসূরিযানং আভা নানুভোন্তি, ত্যাহং পজানামি। অথ চ পনাহং ন ৰদামি – ‘যস্মা ৰণ্ণা অঞ্ঞো ৰণ্ণো উত্তরিতরো ৰা পণীততরো ৰা নত্থী’তি। অথ চ পন ত্ৰং, উদাযি, ‘য্ৰাযং ৰণ্ণো কিমিনা খজ্জোপনকেন নিহীনতরো 11 চ পতিকিট্ঠতরো চ সো পরমো ৰণ্ণো’তি ৰদেসি, তঞ্চ ৰণ্ণং ন পঞ্ঞপেসী’’তি। ‘‘অচ্ছিদং 12 ভগৰা কথং, অচ্ছিদং সুগতো কথ’’ন্তি!
‘‘Ato kho te, udāyi, bahū hi bahutarā devā ye imesaṃ candimasūriyānaṃ ābhā nānubhonti, tyāhaṃ pajānāmi. Atha ca panāhaṃ na vadāmi – ‘yasmā vaṇṇā añño vaṇṇo uttaritaro vā paṇītataro vā natthī’ti. Atha ca pana tvaṃ, udāyi, ‘yvāyaṃ vaṇṇo kiminā khajjopanakena nihīnataro 13 ca patikiṭṭhataro ca so paramo vaṇṇo’ti vadesi, tañca vaṇṇaṃ na paññapesī’’ti. ‘‘Acchidaṃ 14 bhagavā kathaṃ, acchidaṃ sugato katha’’nti!
‘‘কিং পন ত্ৰং, উদাযি, এৰং ৰদেসি – ‘অচ্ছিদং ভগৰা কথং, অচ্ছিদং সুগতো কথং’’’তি? ‘‘অম্হাকং, ভন্তে, সকে আচরিযকে এৰং হোতি – ‘অযং পরমো ৰণ্ণো, অযং পরমো ৰণ্ণো’তি। তে মযং, ভন্তে, ভগৰতা সকে আচরিযকে সমনুযুঞ্জিযমানা সমনুগ্গাহিযমানা সমনুভাসিযমানা রিত্তা তুচ্ছা অপরদ্ধা’’তি।
‘‘Kiṃ pana tvaṃ, udāyi, evaṃ vadesi – ‘acchidaṃ bhagavā kathaṃ, acchidaṃ sugato kathaṃ’’’ti? ‘‘Amhākaṃ, bhante, sake ācariyake evaṃ hoti – ‘ayaṃ paramo vaṇṇo, ayaṃ paramo vaṇṇo’ti. Te mayaṃ, bhante, bhagavatā sake ācariyake samanuyuñjiyamānā samanuggāhiyamānā samanubhāsiyamānā rittā tucchā aparaddhā’’ti.
২৭৪. ‘‘কিং পনুদাযি, অত্থি একন্তসুখো লোকো, অত্থি আকারৰতী পটিপদা একন্তসুখস্স লোকস্স সচ্ছিকিরিযাযা’’তি? ‘‘অম্হাকং, ভন্তে, সকে আচরিযকে এৰং হোতি – ‘অত্থি একন্তসুখো লোকো, অত্থি আকারৰতী পটিপদা একন্তসুখস্স লোকস্স সচ্ছিকিরিযাযা’’’তি।
274. ‘‘Kiṃ panudāyi, atthi ekantasukho loko, atthi ākāravatī paṭipadā ekantasukhassa lokassa sacchikiriyāyā’’ti? ‘‘Amhākaṃ, bhante, sake ācariyake evaṃ hoti – ‘atthi ekantasukho loko, atthi ākāravatī paṭipadā ekantasukhassa lokassa sacchikiriyāyā’’’ti.
‘‘কতমা পন সা, উদাযি, আকারৰতী পটিপদা একন্তসুখস্স লোকস্স সচ্ছিকিরিযাযা’’তি? ‘‘ইধ, ভন্তে, একচ্চো পাণাতিপাতং পহায পাণাতিপাতা পটিৰিরতো হোতি, অদিন্নাদানং পহায অদিন্নাদানা পটিৰিরতো হোতি, কামেসুমিচ্ছাচারং পহায কামেসুমিচ্ছাচারা পটিৰিরতো হোতি, মুসাৰাদং পহায মুসাৰাদা পটিৰিরতো হোতি, অঞ্ঞতরং ৰা পন তপোগুণং সমাদায ৰত্ততি। অযং খো সা, ভন্তে, আকারৰতী পটিপদা একন্তসুখস্স লোকস্স সচ্ছিকিরিযাযা’’তি।
‘‘Katamā pana sā, udāyi, ākāravatī paṭipadā ekantasukhassa lokassa sacchikiriyāyā’’ti? ‘‘Idha, bhante, ekacco pāṇātipātaṃ pahāya pāṇātipātā paṭivirato hoti, adinnādānaṃ pahāya adinnādānā paṭivirato hoti, kāmesumicchācāraṃ pahāya kāmesumicchācārā paṭivirato hoti, musāvādaṃ pahāya musāvādā paṭivirato hoti, aññataraṃ vā pana tapoguṇaṃ samādāya vattati. Ayaṃ kho sā, bhante, ākāravatī paṭipadā ekantasukhassa lokassa sacchikiriyāyā’’ti.
‘‘তং কিং মঞ্ঞসি, উদাযি, যস্মিং সমযে পাণাতিপাতং পহায পাণাতিপাতা পটিৰিরতো হোতি, একন্তসুখী ৰা তস্মিং সমযে অত্তা হোতি সুখদুক্খী ৰা’’তি? ‘‘সুখদুক্খী, ভন্তে’’।
‘‘Taṃ kiṃ maññasi, udāyi, yasmiṃ samaye pāṇātipātaṃ pahāya pāṇātipātā paṭivirato hoti, ekantasukhī vā tasmiṃ samaye attā hoti sukhadukkhī vā’’ti? ‘‘Sukhadukkhī, bhante’’.
‘‘তং কিং মঞ্ঞসি, উদাযি, যস্মিং সমযে অদিন্নাদানং পহায অদিন্নাদানা পটিৰিরতো হোতি, একন্তসুখী ৰা তস্মিং সমযে অত্তা হোতি সুখদুক্খী ৰা’’তি? ‘‘সুখদুক্খী, ভন্তে’’।
‘‘Taṃ kiṃ maññasi, udāyi, yasmiṃ samaye adinnādānaṃ pahāya adinnādānā paṭivirato hoti, ekantasukhī vā tasmiṃ samaye attā hoti sukhadukkhī vā’’ti? ‘‘Sukhadukkhī, bhante’’.
‘‘তং কিং মঞ্ঞসি, উদাযি, যস্মিং সমযে কামেসুমিচ্ছাচারং পহায কামেসুমিচ্ছাচারা পটিৰিরতো হোতি, একন্তসুখী ৰা তস্মিং সমযে অত্তা হোতি সুখদুক্খী ৰা’’তি? ‘‘সুখদুক্খী, ভন্তে’’।
‘‘Taṃ kiṃ maññasi, udāyi, yasmiṃ samaye kāmesumicchācāraṃ pahāya kāmesumicchācārā paṭivirato hoti, ekantasukhī vā tasmiṃ samaye attā hoti sukhadukkhī vā’’ti? ‘‘Sukhadukkhī, bhante’’.
‘‘তং কিং মঞ্ঞসি, উদাযি, যস্মিং সমযে মুসাৰাদং পহায মুসাৰাদা পটিৰিরতো হোতি, একন্তসুখী ৰা তস্মিং সমযে অত্তা হোতি সুখদুক্খী ৰা’’তি? ‘‘সুখদুক্খী, ভন্তে’’।
‘‘Taṃ kiṃ maññasi, udāyi, yasmiṃ samaye musāvādaṃ pahāya musāvādā paṭivirato hoti, ekantasukhī vā tasmiṃ samaye attā hoti sukhadukkhī vā’’ti? ‘‘Sukhadukkhī, bhante’’.
‘‘তং কিং মঞ্ঞসি, উদাযি, যস্মিং সমযে অঞ্ঞতরং তপোগুণং সমাদায ৰত্ততি, একন্তসুখী ৰা তস্মিং সমযে অত্তা হোতি সুখদুক্খী ৰা’’তি? ‘‘সুখদুক্খী, ভন্তে’’।
‘‘Taṃ kiṃ maññasi, udāyi, yasmiṃ samaye aññataraṃ tapoguṇaṃ samādāya vattati, ekantasukhī vā tasmiṃ samaye attā hoti sukhadukkhī vā’’ti? ‘‘Sukhadukkhī, bhante’’.
‘‘তং কিং মঞ্ঞসি, উদাযি, অপি নু খো ৰোকিণ্ণসুখদুক্খং পটিপদং আগম্ম একন্তসুখস্স লোকস্স সচ্ছিকিরিযা হোতী’’তি 15? ‘‘অচ্ছিদং ভগৰা কথং, অচ্ছিদং সুগতো কথ’’ন্তি!
‘‘Taṃ kiṃ maññasi, udāyi, api nu kho vokiṇṇasukhadukkhaṃ paṭipadaṃ āgamma ekantasukhassa lokassa sacchikiriyā hotī’’ti 16? ‘‘Acchidaṃ bhagavā kathaṃ, acchidaṃ sugato katha’’nti!
‘‘কিং পন ত্ৰং, উদাযি, ৰদেসি – ‘অচ্ছিদং ভগৰা কথং, অচ্ছিদং সুগতো কথং’’’তি? ‘‘অম্হাকং, ভন্তে, সকে আচরিযকে এৰং হোতি – ‘অত্থি একন্তসুখো লোকো, অত্থি আকারৰতী পটিপদা একন্তসুখস্স লোকস্স সচ্ছিকিরিযাযা’তি। তে মযং, ভন্তে, ভগৰতা সকে আচরিযকে সমনুযুঞ্জিযমানা সমনুগ্গাহিযমানা সমনুভাসিযমানা রিত্তা তুচ্ছা অপরদ্ধা’’তি 17।
‘‘Kiṃ pana tvaṃ, udāyi, vadesi – ‘acchidaṃ bhagavā kathaṃ, acchidaṃ sugato kathaṃ’’’ti? ‘‘Amhākaṃ, bhante, sake ācariyake evaṃ hoti – ‘atthi ekantasukho loko, atthi ākāravatī paṭipadā ekantasukhassa lokassa sacchikiriyāyā’ti. Te mayaṃ, bhante, bhagavatā sake ācariyake samanuyuñjiyamānā samanuggāhiyamānā samanubhāsiyamānā rittā tucchā aparaddhā’’ti 18.
২৭৫. ‘‘কিং পন, ভন্তে, অত্থি একন্তসুখো লোকো, অত্থি আকারৰতী পটিপদা একন্তসুখস্স লোকস্স সচ্ছিকিরিযাযা’’তি? ‘‘অত্থি খো, উদাযি, একন্তসুখো লোকো, অত্থি আকারৰতী পটিপদা একন্তসুখস্স লোকস্স সচ্ছিকিরিযাযা’’তি।
275. ‘‘Kiṃ pana, bhante, atthi ekantasukho loko, atthi ākāravatī paṭipadā ekantasukhassa lokassa sacchikiriyāyā’’ti? ‘‘Atthi kho, udāyi, ekantasukho loko, atthi ākāravatī paṭipadā ekantasukhassa lokassa sacchikiriyāyā’’ti.
‘‘কতমা পন সা, ভন্তে, আকারৰতী পটিপদা একন্তসুখস্স লোকস্স সচ্ছিকিরিযাযা’’তি? ‘‘ইধুদাযি, ভিক্খু ৰিৰিচ্চেৰ কামেহি…পে॰… পঠমং ঝানং উপসম্পজ্জ ৰিহরতি; ৰিতক্কৰিচারানং ৰূপসমা… দুতিযং ঝানং উপসম্পজ্জ ৰিহরতি; পীতিযা চ ৰিরাগা… ততিযং ঝানং উপসম্পজ্জ ৰিহরতি – অযং খো সা, উদাযি, আকারৰতী পটিপদা একন্তসুখস্স লোকস্স সচ্ছিকিরিযাযা’’তি।
‘‘Katamā pana sā, bhante, ākāravatī paṭipadā ekantasukhassa lokassa sacchikiriyāyā’’ti? ‘‘Idhudāyi, bhikkhu vivicceva kāmehi…pe… paṭhamaṃ jhānaṃ upasampajja viharati; vitakkavicārānaṃ vūpasamā… dutiyaṃ jhānaṃ upasampajja viharati; pītiyā ca virāgā… tatiyaṃ jhānaṃ upasampajja viharati – ayaṃ kho sā, udāyi, ākāravatī paṭipadā ekantasukhassa lokassa sacchikiriyāyā’’ti.
‘‘ন 19 খো সা, ভন্তে, আকারৰতী পটিপদা একন্তসুখস্স লোকস্স সচ্ছিকিরিযায, সচ্ছিকতো হিস্স, ভন্তে, এত্তাৰতা একন্তসুখো লোকো হোতী’’তি। ‘‘ন খ্ৰাস্স, উদাযি, এত্তাৰতা একন্তসুখো লোকো সচ্ছিকতো হোতি; আকারৰতীত্ৰেৰ সা পটিপদা একন্তসুখস্স লোকস্স সচ্ছিকিরিযাযা’’তি।
‘‘Na 20 kho sā, bhante, ākāravatī paṭipadā ekantasukhassa lokassa sacchikiriyāya, sacchikato hissa, bhante, ettāvatā ekantasukho loko hotī’’ti. ‘‘Na khvāssa, udāyi, ettāvatā ekantasukho loko sacchikato hoti; ākāravatītveva sā paṭipadā ekantasukhassa lokassa sacchikiriyāyā’’ti.
এৰং ৰুত্তে, সকুলুদাযিস্স পরিব্বাজকস্স পরিসা উন্নাদিনী উচ্চাসদ্দমহাসদ্দা অহোসি – ‘‘এত্থ মযং অনস্সাম সাচরিযকা, এত্থ মযং অনস্সাম 21 সাচরিযকা! ন মযং ইতো ভিয্যো উত্তরিতরং পজানামা’’তি।
Evaṃ vutte, sakuludāyissa paribbājakassa parisā unnādinī uccāsaddamahāsaddā ahosi – ‘‘ettha mayaṃ anassāma sācariyakā, ettha mayaṃ anassāma 22 sācariyakā! Na mayaṃ ito bhiyyo uttaritaraṃ pajānāmā’’ti.
অথ খো সকুলুদাযী পরিব্বাজকো তে পরিব্বাজকে অপ্পসদ্দে কত্ৰা ভগৰন্তং এতদৰোচ – ‘‘কিত্তাৰতা পনাস্স, ভন্তে, একন্তসুখো লোকো সচ্ছিকতো হোতী’’তি? ‘‘ইধুদাযি, ভিক্খু সুখস্স চ পহানা…পে॰… চতুত্থং ঝানং… উপসম্পজ্জ ৰিহরতি। যা তা দেৰতা একন্তসুখং লোকং উপপন্না তাহি দেৰতাহি সদ্ধিং সন্তিট্ঠতি সল্লপতি সাকচ্ছং সমাপজ্জতি। এত্তাৰতা খ্ৰাস্স, উদাযি, একন্তসুখো লোকো সচ্ছিকতো হোতী’’তি।
Atha kho sakuludāyī paribbājako te paribbājake appasadde katvā bhagavantaṃ etadavoca – ‘‘kittāvatā panāssa, bhante, ekantasukho loko sacchikato hotī’’ti? ‘‘Idhudāyi, bhikkhu sukhassa ca pahānā…pe… catutthaṃ jhānaṃ… upasampajja viharati. Yā tā devatā ekantasukhaṃ lokaṃ upapannā tāhi devatāhi saddhiṃ santiṭṭhati sallapati sākacchaṃ samāpajjati. Ettāvatā khvāssa, udāyi, ekantasukho loko sacchikato hotī’’ti.
২৭৬. ‘‘এতস্স নূন, ভন্তে, একন্তসুখস্স লোকস্স সচ্ছিকিরিযাহেতু ভিক্খূ ভগৰতি ব্রহ্মচরিযং চরন্তী’’তি? ‘‘ন খো, উদাযি, একন্তসুখস্স লোকস্স সচ্ছিকিরিযাহেতু ভিক্খূ মযি ব্রহ্মচরিযং চরন্তি। অত্থি খো, উদাযি , অঞ্ঞেৰ ধম্মা উত্তরিতরা চ পণীততরা চ যেসং সচ্ছিকিরিযাহেতু ভিক্খূ মযি ব্রহ্মচরিযং চরন্তী’’তি।
276. ‘‘Etassa nūna, bhante, ekantasukhassa lokassa sacchikiriyāhetu bhikkhū bhagavati brahmacariyaṃ carantī’’ti? ‘‘Na kho, udāyi, ekantasukhassa lokassa sacchikiriyāhetu bhikkhū mayi brahmacariyaṃ caranti. Atthi kho, udāyi , aññeva dhammā uttaritarā ca paṇītatarā ca yesaṃ sacchikiriyāhetu bhikkhū mayi brahmacariyaṃ carantī’’ti.
‘‘কতমে পন তে, ভন্তে, ধম্মা উত্তরিতরা চ পণীততরা চ যেসং সচ্ছিকিরিযাহেতু ভিক্খূ ভগৰতি ব্রহ্মচরিযং চরন্তী’’তি? ‘‘ইধুদাযি, তথাগতো লোকে উপ্পজ্জতি অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা…পে॰… সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে ৰিৰিচ্চেৰ কামেহি…পে॰… পঠমং ঝানং উপসম্পজ্জ ৰিহরতি। অযম্পি খো, উদাযি, ধম্মো উত্তরিতরো চ পণীততরো চ যস্স সচ্ছিকিরিযাহেতু ভিক্খূ মযি ব্রহ্মচরিযং চরন্তি’’।
‘‘Katame pana te, bhante, dhammā uttaritarā ca paṇītatarā ca yesaṃ sacchikiriyāhetu bhikkhū bhagavati brahmacariyaṃ carantī’’ti? ‘‘Idhudāyi, tathāgato loke uppajjati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā…pe… so ime pañca nīvaraṇe pahāya cetaso upakkilese paññāya dubbalīkaraṇe vivicceva kāmehi…pe… paṭhamaṃ jhānaṃ upasampajja viharati. Ayampi kho, udāyi, dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṃ caranti’’.
‘‘পুন চপরং, উদাযি, ভিক্খু ৰিতক্কৰিচারানং ৰূপসমা…পে॰… দুতিযং ঝানং… ততিযং ঝানং… চতুত্থং ঝানং উপসম্পজ্জ ৰিহরতি। অযম্পি খো, উদাযি, ধম্মো উত্তরিতরো চ পণীততরো চ যস্স সচ্ছিকিরিযাহেতু ভিক্খূ মযি ব্রহ্মচরিযং চরন্তি।
‘‘Puna caparaṃ, udāyi, bhikkhu vitakkavicārānaṃ vūpasamā…pe… dutiyaṃ jhānaṃ… tatiyaṃ jhānaṃ… catutthaṃ jhānaṃ upasampajja viharati. Ayampi kho, udāyi, dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṃ caranti.
‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনিন্নামেতি। সো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো…পে॰… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি। অযম্পি খো, উদাযি, ধম্মো উত্তরিতরো চ পণীততরো চ যস্স সচ্ছিকিরিযাহেতু ভিক্খূ মযি ব্রহ্মচরিযং চরন্তি।
‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṃ abhininnāmeti. So anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarati. Ayampi kho, udāyi, dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṃ caranti.
‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে সত্তানং চুতূপপাতঞাণায চিত্তং অভিনিন্নামেতি। সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে…পে॰… যথাকম্মূপগে সত্তে পজানাতি। অযম্পি খো, উদাযি, ধম্মো উত্তরিতরো চ পণীততরো চ যস্স সচ্ছিকিরিযাহেতু ভিক্খূ মযি ব্রহ্মচরিযং চরন্তি।
‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṃ cutūpapātañāṇāya cittaṃ abhininnāmeti. So dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate…pe… yathākammūpage satte pajānāti. Ayampi kho, udāyi, dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṃ caranti.
‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি । সো ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি…পে॰… ‘অযং দুক্খনিরোধো’তি… ‘অযং দুক্খনিরোধগামিনী পটিপদা’তি… ‘ইমে আসৰা’তি যথাভূতং পজানাতি, ‘অযং আসৰসমুদযো’তি… ‘অযং আসৰনিরোধো’তি… ‘অযং আসৰনিরোধগামিনী পটিপদা’তি যথাভূতং পজানাতি। তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি। ৰিমুত্তস্মিং ৰিমুত্তমিতি ঞাণং হোতি। ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি। অযম্পি খো, উদাযি, ধম্মো উত্তরিতরো চ পণীততরো চ যস্স সচ্ছিকিরিযাহেতু ভিক্খূ মযি ব্রহ্মচরিযং চরন্তি। ইমে খো, উদাযি, ধম্মা উত্তরিতরা চ পণীততরা চ যেসং সচ্ছিকিরিযাহেতু ভিক্খূ মযি ব্রহ্মচরিযং চরন্তী’’তি।
‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmeti . So ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti…pe… ‘ayaṃ dukkhanirodho’ti… ‘ayaṃ dukkhanirodhagāminī paṭipadā’ti… ‘ime āsavā’ti yathābhūtaṃ pajānāti, ‘ayaṃ āsavasamudayo’ti… ‘ayaṃ āsavanirodho’ti… ‘ayaṃ āsavanirodhagāminī paṭipadā’ti yathābhūtaṃ pajānāti. Tassa evaṃ jānato evaṃ passato kāmāsavāpi cittaṃ vimuccati, bhavāsavāpi cittaṃ vimuccati, avijjāsavāpi cittaṃ vimuccati. Vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti. Ayampi kho, udāyi, dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṃ caranti. Ime kho, udāyi, dhammā uttaritarā ca paṇītatarā ca yesaṃ sacchikiriyāhetu bhikkhū mayi brahmacariyaṃ carantī’’ti.
২৭৭. এৰং ৰুত্তে, সকুলুদাযী পরিব্বাজকো ভগৰন্তং এতদৰোচ – ‘‘অভিক্কন্তং, ভন্তে , অভিক্কন্তং, ভন্তে! সেয্যথাপি, ভন্তে, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – ‘চক্খুমন্তো রূপানি দক্খন্তী’তি; এৰমেৰং ভগৰতা অনেকপরিযাযেন ধম্মো পকাসিতো। এসাহং, ভন্তে, ভগৰন্তং সরণং গচ্ছামি ধম্মঞ্চ ভিক্খুসঙ্ঘঞ্চ। লভেয্যাহং, ভন্তে, ভগৰতো সন্তিকে পব্বজ্জং, লভেয্যং উপসম্পদ’’ন্তি।
277. Evaṃ vutte, sakuludāyī paribbājako bhagavantaṃ etadavoca – ‘‘abhikkantaṃ, bhante , abhikkantaṃ, bhante! Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – ‘cakkhumanto rūpāni dakkhantī’ti; evamevaṃ bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañca. Labheyyāhaṃ, bhante, bhagavato santike pabbajjaṃ, labheyyaṃ upasampada’’nti.
এৰং ৰুত্তে, সকুলুদাযিস্স পরিব্বাজকস্স পরিসা সকুলুদাযিং পরিব্বাজকং এতদৰোচুং – ‘‘মা ভৰং, উদাযি, সমণে গোতমে ব্রহ্মচরিযং চরি; মা ভৰং, উদাযি, আচরিযো হুত্ৰা অন্তেৰাসীৰাসং ৰসি। সেয্যথাপি নাম উদকমণিকো 23 হুত্ৰা উদঞ্চনিকো 24 অস্স, এৰং সম্পদমিদং 25 ভোতো উদাযিস্স ভৰিস্সতি। মা ভৰং, উদাযি, সমণে গোতমে ব্রহ্মচরিযং চরি; মা ভৰং, উদাযি, আচরিযো হুত্ৰা অন্তেৰাসীৰাসং ৰসী’’তি। ইতি হিদং সকুলুদাযিস্স পরিব্বাজকস্স পরিসা সকুলুদাযিং পরিব্বাজকং অন্তরাযমকাসি ভগৰতি ব্রহ্মচরিযেতি।
Evaṃ vutte, sakuludāyissa paribbājakassa parisā sakuludāyiṃ paribbājakaṃ etadavocuṃ – ‘‘mā bhavaṃ, udāyi, samaṇe gotame brahmacariyaṃ cari; mā bhavaṃ, udāyi, ācariyo hutvā antevāsīvāsaṃ vasi. Seyyathāpi nāma udakamaṇiko 26 hutvā udañcaniko 27 assa, evaṃ sampadamidaṃ 28 bhoto udāyissa bhavissati. Mā bhavaṃ, udāyi, samaṇe gotame brahmacariyaṃ cari; mā bhavaṃ, udāyi, ācariyo hutvā antevāsīvāsaṃ vasī’’ti. Iti hidaṃ sakuludāyissa paribbājakassa parisā sakuludāyiṃ paribbājakaṃ antarāyamakāsi bhagavati brahmacariyeti.
চূল়সকুলুদাযিসুত্তং নিট্ঠিতং নৰমং।
Cūḷasakuludāyisuttaṃ niṭṭhitaṃ navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৯. চূল়সকুলুদাযিসুত্তৰণ্ণনা • 9. Cūḷasakuludāyisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৯. চূল়সকুলুদাযিসুত্তৰণ্ণনা • 9. Cūḷasakuludāyisuttavaṇṇanā
