| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৯. চূল়সকুলুদাযিসুত্তৰণ্ণনা
9. Cūḷasakuludāyisuttavaṇṇanā
২৭১. পঞ্হোতি ঞাতুং ইচ্ছিতো অত্থো, তদেৰ ধম্মদেসনায নিমিত্তভাৰতো কারণং। উপট্ঠাতূতি ঞাণস্স গোচরভাৰং উপগচ্ছতু। যেন কারণেনাতি যেন তুয্হং উপট্ঠিতেন কারণেন ধম্মদেসনা উপট্ঠহেয্য, তং পন পরিব্বাজকস্স অজ্ঝাসযৰসেন তথা ৰুত্তং। তেনাহ ‘‘এতেন হি…পে॰… দীপেতী’’তি। একঙ্গণানীতি পিধানাভাৰেন একঙ্গণসদিসানি। তেনাহ ‘‘পাকটানী’’তি।
271.Pañhoti ñātuṃ icchito attho, tadeva dhammadesanāya nimittabhāvato kāraṇaṃ. Upaṭṭhātūti ñāṇassa gocarabhāvaṃ upagacchatu. Yena kāraṇenāti yena tuyhaṃ upaṭṭhitena kāraṇena dhammadesanā upaṭṭhaheyya, taṃ pana paribbājakassa ajjhāsayavasena tathā vuttaṃ. Tenāha ‘‘etena hi…pe… dīpetī’’ti. Ekaṅgaṇānīti pidhānābhāvena ekaṅgaṇasadisāni. Tenāha ‘‘pākaṭānī’’ti.
জানন্তোতি অত্তনো তথাভাৰং সযং জানন্তো। সক্কচ্চং সুস্সূসতীতি ‘‘তথাভূতংযেৰ মং তথা অৰোচা’’তি সাদরং সুস্সূসতি। তস্মাতি দিব্বচক্খুলাভিনো অনাগতংসঞাণলাভতো। এৰমাহাতি ‘‘যো খো, উদাযি, দিব্বেন চক্খুনা’’তি আরভিত্ৰা ‘‘সো ৰা মং অপরন্তং আরব্ভ পঞ্হং পুচ্ছেয্যা’’তি এৰং অৰোচ।
Jānantoti attano tathābhāvaṃ sayaṃ jānanto. Sakkaccaṃ sussūsatīti ‘‘tathābhūtaṃyeva maṃ tathā avocā’’ti sādaraṃ sussūsati. Tasmāti dibbacakkhulābhino anāgataṃsañāṇalābhato. Evamāhāti ‘‘yo kho, udāyi, dibbena cakkhunā’’ti ārabhitvā ‘‘so vā maṃ aparantaṃ ārabbha pañhaṃ puccheyyā’’ti evaṃ avoca.
ইতরন্তি অৰসিট্ঠং ইমস্মিং ঠানে ৰত্তব্বং। ৰুত্তনযমেৰাতি ‘‘যো হি লাভী’’তিআদিনা ৰুত্তনযমেৰ। অতীতেতি পুব্বেনিৰাসানুস্সতিঞাণস্স ৰিসযভূতে অত্থে। অনাগতেতি অনাগতংসঞাণস্স ৰিসযভূতে অনাগতে অত্থে।
Itaranti avasiṭṭhaṃ imasmiṃ ṭhāne vattabbaṃ. Vuttanayamevāti ‘‘yo hi lābhī’’tiādinā vuttanayameva. Atīteti pubbenivāsānussatiñāṇassa visayabhūte atthe. Anāgateti anāgataṃsañāṇassa visayabhūte anāgate atthe.
পংসুপদেসে নিব্বত্তনতো পংসুসমোকিণ্ণসরীরতায পংসুপিসাচকং। একং মূলং গহেত্ৰাতি দীঘসো হেট্ঠিমন্তেন চতুরঙ্গুলং, উপরিমন্তেন ৰিদত্থিকং রুক্খগচ্ছলতাদীসু যস্স কস্সচি একং মূলং গহেত্ৰা অঞ্ঞজাতিকানং অদিস্সমানকাযো হোতি। অযং কির নেসং জাতিসিদ্ধা ধম্মতা। তত্রাতি তস্স মূলৰসেন অদিস্সমানকতায। ন দিস্সতি ঞাণেন ন পস্সতি।
Paṃsupadese nibbattanato paṃsusamokiṇṇasarīratāya paṃsupisācakaṃ. Ekaṃ mūlaṃ gahetvāti dīghaso heṭṭhimantena caturaṅgulaṃ, uparimantena vidatthikaṃ rukkhagacchalatādīsu yassa kassaci ekaṃ mūlaṃ gahetvā aññajātikānaṃ adissamānakāyo hoti. Ayaṃ kira nesaṃ jātisiddhā dhammatā. Tatrāti tassa mūlavasena adissamānakatāya. Na dissati ñāṇena na passati.
২৭২. ন চ অত্থং দীপেয্যাতি অধিপ্পেতমত্থং সা ৰাচা সরূপতো ন চ দীপেয্য, কেৰলং ৰাচামত্তমেৰাতি অধিপ্পাযো। পটিহরিতব্বট্ঠেন পরসন্তানে নেতব্বট্ঠেন পটিহারিয-সদ্দদ্ৰারেন ৰিঞ্ঞাতব্বো ভাৰত্থো, সোৰ পাটিহীরকো নিরুত্তিনযেন, নত্থি এতস্স পাটিহীরকন্তি অপ্পাটিহীরকতং, ত-সদ্দেন পদং ৰড্ঢেত্ৰা তথা ৰুত্তং, অনিয্যানং। তেনাহ ‘‘নিরত্থকং সম্পজ্জতী’’তি। সুভকিণ্হদেৰলোকে খন্ধা ৰিয জোতেতীতি ইমিনা – ‘‘দিব্বো রূপী মনোমযো সব্বঙ্গপচ্চঙ্গী অহীনিন্দ্রিযো অত্তা’’তি ইমমত্থং দস্সেতি।
272.Na ca atthaṃ dīpeyyāti adhippetamatthaṃ sā vācā sarūpato na ca dīpeyya, kevalaṃ vācāmattamevāti adhippāyo. Paṭiharitabbaṭṭhena parasantāne netabbaṭṭhena paṭihāriya-saddadvārena viññātabbo bhāvattho, sova pāṭihīrako niruttinayena, natthi etassa pāṭihīrakanti appāṭihīrakataṃ, ta-saddena padaṃ vaḍḍhetvā tathā vuttaṃ, aniyyānaṃ. Tenāha ‘‘niratthakaṃ sampajjatī’’ti. Subhakiṇhadevaloke khandhā viya jotetīti iminā – ‘‘dibbo rūpī manomayo sabbaṅgapaccaṅgī ahīnindriyo attā’’ti imamatthaṃ dasseti.
২৭৩. সউপসগ্গপদস্স অত্থো উপসগ্গেন ৰিনাপি ৰিঞ্ঞাযতীতি আহ ‘‘ৰিদ্ধেতি উব্বিদ্ধে’’তি। সা চস্স উব্বিদ্ধতা উপক্কিলেসৰিগমেন সুচিভাৰেন উপট্ঠানন্তি আহ ‘‘মেঘৰিগমেন দূরীভূতে’’তি। ইন্দনীলমণি ৰিয দিব্বতি জোতেতীতি দেৰো, আকাসো। ‘‘অড্ঢরত্তসমযে’’তি ৰত্তব্বে ভুম্মত্থে ৰিহিতৰচনানং অচ্চন্তসংযোগাভাৰা উপযোগৰচনং ৰেদিতব্বং। পুণ্ণমাসিযঞ্হি গগনমজ্ঝস্স পুরতো ৰা পচ্ছতো ৰা অন্তে ঠিতে অড্ঢরত্তে সমযো ভিন্নো নাম হোতি, মজ্ঝে এৰ পন ঠিতো অভিন্নো নাম। তেনাহ ‘‘অভিন্নে অড্ঢরত্তসমযে’’তি।
273. Saupasaggapadassa attho upasaggena vināpi viññāyatīti āha ‘‘viddheti ubbiddhe’’ti. Sā cassa ubbiddhatā upakkilesavigamena sucibhāvena upaṭṭhānanti āha ‘‘meghavigamena dūrībhūte’’ti. Indanīlamaṇi viya dibbati jotetīti devo, ākāso. ‘‘Aḍḍharattasamaye’’ti vattabbe bhummatthe vihitavacanānaṃ accantasaṃyogābhāvā upayogavacanaṃ veditabbaṃ. Puṇṇamāsiyañhi gaganamajjhassa purato vā pacchato vā ante ṭhite aḍḍharatte samayo bhinno nāma hoti, majjhe eva pana ṭhito abhinno nāma. Tenāha ‘‘abhinne aḍḍharattasamaye’’ti.
যে অনুভোন্তীতি যে দেৰা চন্দিমসূরিযানং আভা অনুভোন্তি ৰিনিভুঞ্জন্তি ৰল়ঞ্জন্তি চ তেহি দেৰেহি বহূ চেৰ বহুতরা চ চন্দিমসূরিযানং আভা অননুভোন্তো। তেনাহ – ‘‘অত্তনো সরীরোভাসেনেৰ আলোকং ফরিত্ৰা ৰিহরন্তী’’তি।
Ye anubhontīti ye devā candimasūriyānaṃ ābhā anubhonti vinibhuñjanti vaḷañjanti ca tehi devehi bahū ceva bahutarā ca candimasūriyānaṃ ābhā ananubhonto. Tenāha – ‘‘attano sarīrobhāseneva ālokaṃ pharitvā viharantī’’ti.
২৭৪. পুচ্ছামূল়্হো পন জাতো ‘‘অযং পরমো ৰণ্ণো’’তি গহিতপদস্স ৰিধমনেন। অচেলকপাল়িন্তি ‘‘অচেলকো হোতি মুত্তাচারো’’তিআদিনযপ্পৰত্তং (দী॰ নি॰ ১.৩৯৪) অচেলকপটিপত্তিদীপকগন্থং, গন্থসীসেনেৰ তেন পকাসিতৰাদানি ৰদতি। সুরামেরযপানমনুযুত্তপুগ্গলস্স সুরাপানতো ৰিরতি তস্স কাযং চিত্তঞ্চ তাপেন্তী সংৰত্ততীতি সুরাপানৰিরতি (তপো, সোযেৰ গুণো। তেনাহ ‘‘সুরাপানৰিরতীতি অত্থো’’তি)।
274.Pucchāmūḷho pana jāto ‘‘ayaṃ paramo vaṇṇo’’ti gahitapadassa vidhamanena. Acelakapāḷinti ‘‘acelako hoti muttācāro’’tiādinayappavattaṃ (dī. ni. 1.394) acelakapaṭipattidīpakaganthaṃ, ganthasīseneva tena pakāsitavādāni vadati. Surāmerayapānamanuyuttapuggalassa surāpānato virati tassa kāyaṃ cittañca tāpentī saṃvattatīti surāpānavirati (tapo, soyeva guṇo. Tenāha ‘‘surāpānaviratīti attho’’ti).
২৭৫. একন্তং অচ্চন্তমেৰ সুখং অস্সাতি একন্তসুখং। পঞ্চসু ধম্মেসূতি ‘‘পাণাতিপাতা পটিৰিরতী’’তিআদীসু পঞ্চসু সীলাচারধম্মেসু। ন জানিংসূতি সম্মোসেন অনুপট্ঠহন্তি তদত্থং ন বুজ্ঝন্তি। বুদ্ধুপ্পাদেন কির ৰিহততেজানি মহানুভাৰানি মন্তপদানি ৰিয বাহিরকানং যোগাৰচরগন্থেন সদ্ধিং যোগাৰচরপটিপদা নস্সতি। উগ্গণ্হিংসূতি ‘‘পঞ্চ পুব্বভাগধম্মে’’তিআদিৰচনমত্তং উগ্গণ্হিংসু। ততিযজ্ঝানতোতি কারণোপচারেন ফলং ৰদতি, ফলভূততো ততিযজ্ঝানতো।
275. Ekantaṃ accantameva sukhaṃ assāti ekantasukhaṃ. Pañcasu dhammesūti ‘‘pāṇātipātā paṭiviratī’’tiādīsu pañcasu sīlācāradhammesu. Na jāniṃsūti sammosena anupaṭṭhahanti tadatthaṃ na bujjhanti. Buddhuppādena kira vihatatejāni mahānubhāvāni mantapadāni viya bāhirakānaṃ yogāvacaraganthena saddhiṃ yogāvacarapaṭipadā nassati. Uggaṇhiṃsūti ‘‘pañca pubbabhāgadhamme’’tiādivacanamattaṃ uggaṇhiṃsu. Tatiyajjhānatoti kāraṇopacārena phalaṃ vadati, phalabhūtato tatiyajjhānato.
২৭৬. একন্তসুখস্স লোকস্স পটিলাভেন পত্তিযা তত্থ নিব্বত্তি পটিলাভসচ্ছিকিরিযা। একন্তসুখে লোকে অনভিনিব্বত্তিত্ৰা এৰ ইদ্ধিযা তত্থ গন্ত্ৰা তস্স সত্তলোকস্স ভাজনলোকস্স চ পচ্চক্খতো দস্সনং পচ্চক্খসচ্ছিকিরিযা। তেনাহ ‘‘তত্থা’’তিআদি।
276. Ekantasukhassa lokassa paṭilābhena pattiyā tattha nibbatti paṭilābhasacchikiriyā. Ekantasukhe loke anabhinibbattitvā eva iddhiyā tattha gantvā tassa sattalokassa bhājanalokassa ca paccakkhato dassanaṃ paccakkhasacchikiriyā. Tenāha ‘‘tatthā’’tiādi.
২৭৭. উদঞ্চনিকোতি উদঞ্চনো। ৰিঞ্ঝুপব্বতপস্সে গামানং অনিৰিট্ঠত্তা তিংসযোজনমত্তং ঠানং অটৰী নাম, তত্থ সেনাসনং, তস্মিং অটৰিসেনাসনে পধানকম্মিকানং ভিক্খূনং বহূনং তত্থ নিৰাসেন একং পধানঘরং অহোসি।
277.Udañcanikoti udañcano. Viñjhupabbatapasse gāmānaṃ aniviṭṭhattā tiṃsayojanamattaṃ ṭhānaṃ aṭavī nāma, tattha senāsanaṃ, tasmiṃ aṭavisenāsane padhānakammikānaṃ bhikkhūnaṃ bahūnaṃ tattha nivāsena ekaṃ padhānagharaṃ ahosi.
চূল়সকুলুদাযিসুত্তৰণ্ণনায লীনত্থপ্পকাসনা সমত্তা।
Cūḷasakuludāyisuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৯. চূল়সকুলুদাযিসুত্তং • 9. Cūḷasakuludāyisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৯. চূল়সকুলুদাযিসুত্তৰণ্ণনা • 9. Cūḷasakuludāyisuttavaṇṇanā
