| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༩. ཙཱུལ༹སཀུལུདཱཡིསུཏྟཝཎྞནཱ
9. Cūḷasakuludāyisuttavaṇṇanā
༢༧༠. ཨེཝཾ མེ སུཏནྟི ཙཱུལ༹སཀུལུདཱཡིསུཏྟཾ། ཏཏྠ ཡདཱ པན, བྷནྟེ, བྷགཝཱཏི ཨིདཾ པརིབྦཱཛཀོ དྷམྨཀཐཾ སོཏུཀཱམོ བྷགཝཏོ དྷམྨདེསནཱཡ སཱལཡབྷཱཝཾ དསྶེནྟོ ཨཱཧ།
270.Evaṃme sutanti cūḷasakuludāyisuttaṃ. Tattha yadā pana, bhante, bhagavāti idaṃ paribbājako dhammakathaṃ sotukāmo bhagavato dhammadesanāya sālayabhāvaṃ dassento āha.
༢༧༡. ཏཾཡེཝེཏྠ པཊིབྷཱཏཱུཏི སཙེ དྷམྨཾ སོཏུཀཱམོ, ཏུཡ྄ཧེཝེཏྠ ཨེཀོ པཉྷོ ཨེཀཾ ཀཱརཎཾ ཨུཔཊྛཱཏུ། ཡཐཱ མཾ པཊིབྷཱསེཡྻཱཏི ཡེན ཀཱརཎེན མམ དྷམྨདེསནཱ ཨུཔཊྛཧེཡྻ, ཨེཏེན ཧི ཀཱརཎེན ཀཐཱཡ སམུཊྛིཏཱཡ སུཁཾ དྷམྨཾ དེསེཏུནྟི དཱིཔེཏི། ཏསྶ མཡ྄ཧཾ, བྷནྟེཏི སོ ཀིར ཏཾ དིསྭཱ – ‘‘སཙེ བྷགཝཱ ཨིདྷ ཨབྷཝིསྶཱ, ཨཡམེཏསྶ བྷཱསིཏསྶ ཨཏྠོཏི དཱིཔསཧསྶཾ ཝིཡ ཨུཛྫལཱཔེཏྭཱ ཨཛྫ མེ པཱཀཊཾ ཨཀརིསྶཱ’’ཏི དསབལཾཡེཝ ཨནུསྶརི། ཏསྨཱ ཏསྶ མཡ྄ཧཾ, བྷནྟེཏིཨཱདིམཱཧ། ཏཏྠ ཨཧོ ནཱུནཱཏི ཨནུསྶརཎཏྠེ ནིཔཱཏདྭཡཾ། ཏེན ཏསྶ བྷགཝནྟཾ ཨནུསྶརནྟསྶ ཨེཏདཧོསི ‘‘ཨཧོ ནཱུན བྷགཝཱ ཨཧོ ནཱུན སུགཏོ’’ཏི། ཡོ ཨིམེསནྟི ཡོ ཨིམེསཾ དྷམྨཱནཾ། སུཀུསལོཏི སུཊྛུ ཀུསལོ ནིཔུཎོ ཚེཀོ། སོ བྷགཝཱ ཨཧོ ནཱུན ཀཐེཡྻ, སོ སུགཏོ ཨཧོ ནཱུན ཀཐེཡྻ, ཏསྶ ཧི བྷགཝཏོ པུབྦེནིཝཱསཉཱཎསྶ ཨནེཀཱནི ཀཔྤཀོཊིསཧསྶཱནི ཨེཀངྒཎཱནི པཱཀཊཱནཱིཏི, ཨཡམེཏྠ ཨདྷིཔྤཱཡོ།
271.Taṃyevettha paṭibhātūti sace dhammaṃ sotukāmo, tuyhevettha eko pañho ekaṃ kāraṇaṃ upaṭṭhātu. Yathā maṃ paṭibhāseyyāti yena kāraṇena mama dhammadesanā upaṭṭhaheyya, etena hi kāraṇena kathāya samuṭṭhitāya sukhaṃ dhammaṃ desetunti dīpeti. Tassa mayhaṃ, bhanteti so kira taṃ disvā – ‘‘sace bhagavā idha abhavissā, ayametassa bhāsitassa atthoti dīpasahassaṃ viya ujjalāpetvā ajja me pākaṭaṃ akarissā’’ti dasabalaṃyeva anussari. Tasmā tassa mayhaṃ, bhantetiādimāha. Tattha aho nūnāti anussaraṇatthe nipātadvayaṃ. Tena tassa bhagavantaṃ anussarantassa etadahosi ‘‘aho nūna bhagavā aho nūna sugato’’ti. Yo imesanti yo imesaṃ dhammānaṃ. Sukusaloti suṭṭhu kusalo nipuṇo cheko. So bhagavā aho nūna katheyya, so sugato aho nūna katheyya, tassa hi bhagavato pubbenivāsañāṇassa anekāni kappakoṭisahassāni ekaṅgaṇāni pākaṭānīti, ayamettha adhippāyo.
ཏསྶ ཝཱཧཾ པུབྦནྟཾ ཨཱརབྦྷཱཏི ཡོ ཧི ལཱབྷཱི ཧོཏི, སོ ‘‘པུབྦེ ཏྭཾ ཁཏྟིཡོ ཨཧོསི, བྲཱཧྨཎོ ཨཧོསཱི’’ཏི ཝུཏྟེ ཛཱནནྟོ སཀྐཙྩཾ སུསྶཱུསཏི། ཨལཱབྷཱི པན – ‘‘ཨེཝཾ བྷཝིསྶཏི ཨེཝཾ བྷཝིསྶཏཱི’’ཏི སཱིསཀམྤམེཏྟམེཝ དསྶེཏི། ཏསྨཱ ཨེཝམཱཧ – ‘‘ཏསྶ ཝཱཧཾ པུབྦནྟཾ ཨཱརབྦྷ པཉྷསྶ ཝེཡྻཱཀརཎེན ཙིཏྟཾ ཨཱརཱདྷེཡྻ’’ནྟི།
Tassa vāhaṃ pubbantaṃ ārabbhāti yo hi lābhī hoti, so ‘‘pubbe tvaṃ khattiyo ahosi, brāhmaṇo ahosī’’ti vutte jānanto sakkaccaṃ sussūsati. Alābhī pana – ‘‘evaṃ bhavissati evaṃ bhavissatī’’ti sīsakampamettameva dasseti. Tasmā evamāha – ‘‘tassa vāhaṃ pubbantaṃ ārabbha pañhassa veyyākaraṇena cittaṃ ārādheyya’’nti.
སོ ཝཱ མཾ ཨཔརནྟནྟི དིབྦཙཀྑུལཱབྷིནོ ཧི ཨནཱགཏཾསཉཱཎཾ ཨིཛ྄ཛྷཏི, ཏསྨཱ ཨེཝམཱཧ། ཨིཏརཾ པུབྦེ ཝུཏྟནཡམེཝ།
So vā maṃ aparantanti dibbacakkhulābhino hi anāgataṃsañāṇaṃ ijjhati, tasmā evamāha. Itaraṃ pubbe vuttanayameva.
དྷམྨཾ ཏེ དེསེསྶཱམཱིཏི ཨཡཾ ཀིར ཨཏཱིཏེ དེསིཡམཱནེཔི ན བུཛ྄ཛྷིསྶཏི, ཨནཱགཏེ དེསིཡམཱནེཔི ན བུཛ྄ཛྷིསྶཏི། ཨཐསྶ བྷགཝཱ སཎྷསུཁུམཾ པཙྩཡཱཀཱརཾ དེསེཏུཀཱམོ ཨེཝམཱཧ། ཀིཾ པན ཏཾ བུཛ྄ཛྷིསྶཏཱིཏི? ཨེཏཾ པགེཝ ན བུཛ྄ཛྷིསྶཏི, ཨནཱགཏེ པནསྶ ཝཱསནཱཡ པཙྩཡོ བྷཝིསྶཏཱིཏི དིསྭཱ བྷགཝཱ ཨེཝམཱཧ།
Dhammaṃte desessāmīti ayaṃ kira atīte desiyamānepi na bujjhissati, anāgate desiyamānepi na bujjhissati. Athassa bhagavā saṇhasukhumaṃ paccayākāraṃ desetukāmo evamāha. Kiṃ pana taṃ bujjhissatīti? Etaṃ pageva na bujjhissati, anāgate panassa vāsanāya paccayo bhavissatīti disvā bhagavā evamāha.
པཾསུཔིསཱཙཀནྟི ཨསུཙིཊྛཱནེ ནིབྦཏྟཔིསཱཙཾ། སོ ཧི ཨེཀཾ མཱུལཾ གཧེཏྭཱ ཨདིསྶམཱནཀཱཡོ ཧོཏི། ཏཏྲིདཾ ཝཏྠུ – ཨེཀཱ ཀིར ཡཀྑིནཱི དྭེ དཱརཀེ ཐཱུཔཱརཱམདྭཱརེ ནིསཱིདཱཔེཏྭཱ ཨཱཧཱརཔརིཡེསནཏྠཾ ནགརཾ གཏཱ། དཱརཀཱ ཨེཀཾ པིཎྜཔཱཏིཀཏྠེརཾ དིསྭཱ ཨཱཧཾསུ, – ‘‘བྷནྟེ, ཨམྷཱཀཾ མཱཏཱ ཨནྟོ ནགརཾ པཝིཊྛཱ, ཏསྶཱ ཝདེཡྻཱཐ ‘ཡཾ ཝཱ ཏཾ ཝཱ ལདྡྷཀཾ, གཧེཏྭཱ སཱིགྷཾ གཙྪ, དཱརཀཱ ཏེ ཛིགྷཙྪིཏཾ སནྡྷཱརེཏུཾ ན སཀྐོནྟཱི’’’ཏི། ཏམཧཾ ཀཐཾ པསྶིསྶཱམཱིཏི? ཨིདཾ, བྷནྟེ, གཎྷཐཱཏི ཨེཀཾ མཱུལཁཎྜཾ ཨདཾསུ། ཐེརསྶ ཨནེཀཱནི ཡཀྑསཧསྶཱནི པཉྙཱཡིཾསུ, སོ དཱརཀེཧི དིནྣསཉྙཱཎེན ཏཾ ཡཀྑིནིཾ ཨདྡས ཝིརཱུཔཾ བཱིབྷཙྪཾ ཀེཝལཾ ཝཱིཐིཡཾ གབྦྷམལཾ པཙྩཱསཱིསམཱནཾ། དིསྭཱ ཏམཏྠཾ ཀཐེསི ། ཀཐཾ མཾ ཏྭཾ པསྶསཱིཏི ཝུཏྟེ མཱུལཁཎྜཾ དསྶེསི, སཱ ཨཙྪིནྡིཏྭཱ གཎྷི། ཨེཝཾ པཾསུཔིསཱཙཀཱ ཨེཀཾ མཱུལཾ གཧེཏྭཱ ཨདིསྶམཱནཀཱཡཱ ཧོནྟི། ཏཾ སནྡྷཱཡེས ‘‘པཾསུཔིསཱཙཀམྤི ན པསྶཱམཱི’’ཏི ཨཱཧ། ན པཀྑཱཡཏཱིཏི ན དིསྶཏི ན ཨུཔཊྛཱཏི།
Paṃsupisācakanti asuciṭṭhāne nibbattapisācaṃ. So hi ekaṃ mūlaṃ gahetvā adissamānakāyo hoti. Tatridaṃ vatthu – ekā kira yakkhinī dve dārake thūpārāmadvāre nisīdāpetvā āhārapariyesanatthaṃ nagaraṃ gatā. Dārakā ekaṃ piṇḍapātikattheraṃ disvā āhaṃsu, – ‘‘bhante, amhākaṃ mātā anto nagaraṃ paviṭṭhā, tassā vadeyyātha ‘yaṃ vā taṃ vā laddhakaṃ, gahetvā sīghaṃ gaccha, dārakā te jighacchitaṃ sandhāretuṃ na sakkontī’’’ti. Tamahaṃ kathaṃ passissāmīti? Idaṃ, bhante, gaṇhathāti ekaṃ mūlakhaṇḍaṃ adaṃsu. Therassa anekāni yakkhasahassāni paññāyiṃsu, so dārakehi dinnasaññāṇena taṃ yakkhiniṃ addasa virūpaṃ bībhacchaṃ kevalaṃ vīthiyaṃ gabbhamalaṃ paccāsīsamānaṃ. Disvā tamatthaṃ kathesi . Kathaṃ maṃ tvaṃ passasīti vutte mūlakhaṇḍaṃ dassesi, sā acchinditvā gaṇhi. Evaṃ paṃsupisācakā ekaṃ mūlaṃ gahetvā adissamānakāyā honti. Taṃ sandhāyesa ‘‘paṃsupisācakampi na passāmī’’ti āha. Na pakkhāyatīti na dissati na upaṭṭhāti.
༢༧༢. དཱིགྷཱཔི ཁོ ཏེ ཨེསཱཏི ཨུདཱཡི ཨེསཱ ཏཝ ཝཱཙཱ དཱིགྷཱཔི བྷཝེཡྻ, ཨེཝཾ ཝདནྟསྶ ཝསྶསཏམྤི ཝསྶསཧསྶམྤི པཝཏྟེཡྻ, ན ཙ ཨཏྠཾ དཱིཔེཡྻཱཏི ཨདྷིཔྤཱཡོ། ཨཔྤཱཊིཧཱིརཀཏནྟི ཨནིཡྻཱནིཀཾ ཨམཱུལཀཾ ནིརཏྠཀཾ སམྤཛྫཏཱིཏི ཨཏྠོ།
272.Dīghāpi kho te esāti udāyi esā tava vācā dīghāpi bhaveyya, evaṃ vadantassa vassasatampi vassasahassampi pavatteyya, na ca atthaṃ dīpeyyāti adhippāyo. Appāṭihīrakatanti aniyyānikaṃ amūlakaṃ niratthakaṃ sampajjatīti attho.
ཨིདཱནི ཏཾ ཝཎྞཾ དསྶེནྟོ སེཡྻཐཱཔི, བྷནྟེཏིཨཱདིམཱཧ། ཏཏྠ པཎྜུཀམྦལེ ནིཀྑིཏྟོཏི ཝིསབྷཱགཝཎྞེ རཏྟཀམྦལེ ཋཔིཏོ། ཨེཝཾཝཎྞོ ཨཏྟཱ ཧོཏཱིཏི ཨིདཾ སོ སུབྷཀིཎྷདེཝལོཀེ ནིབྦཏྟཀྑནྡྷེ སནྡྷཱཡ – ‘‘ཨམྷཱཀཾ མཏཀཱལེ ཨཏྟཱ སུབྷཀིཎྷདེཝལོཀེ ཁནྡྷཱ ཝིཡ ཛོཏེཏཱི’’ཏི ཝདཏི།
Idāni taṃ vaṇṇaṃ dassento seyyathāpi, bhantetiādimāha. Tattha paṇḍukambale nikkhittoti visabhāgavaṇṇe rattakambale ṭhapito. Evaṃvaṇṇo attā hotīti idaṃ so subhakiṇhadevaloke nibbattakkhandhe sandhāya – ‘‘amhākaṃ matakāle attā subhakiṇhadevaloke khandhā viya jotetī’’ti vadati.
༢༧༣. ཨཡཾ ཨིམེསཾ ཨུབྷིནྣནྟི སོ ཀིར ཡསྨཱ མཎིསྶ བཧི ཨཱབྷཱ ན ནིཙྪརཏི, ཁཛྫོཔནཀསྶ ཨངྒུལདྭངྒུལཙཏུརངྒུལམཏྟཾ ནིཙྪརཏི, མཧཱཁཛྫོཔནཀསྶ པན ཁལ༹མཎྜལམཏྟམྤི ནིཙྪརཏིཡེཝ, ཏསྨཱ ཨེཝམཱཧ།
273.Ayaṃimesaṃ ubhinnanti so kira yasmā maṇissa bahi ābhā na niccharati, khajjopanakassa aṅguladvaṅgulacaturaṅgulamattaṃ niccharati, mahākhajjopanakassa pana khaḷamaṇḍalamattampi niccharatiyeva, tasmā evamāha.
ཝིདྡྷེཏི ཨུབྦིདྡྷེ, མེགྷཝིགམེན དཱུརཱིབྷཱུཏེཏི ཨཏྠོ། ཝིགཏཝལཱཧཀེཏི ཨཔགཏམེགྷེ། དེཝེཏི ཨཱཀཱསེ། ཨོསདྷིཏཱརཀཱཏི སུཀྐཏཱརཀཱ། སཱ ཧི ཡསྨཱ ཏསྶཱ ཨུདཡཏོ པཊྛཱཡ ཏེན སཉྙཱཎེན ཨོསདྷཱནི གཎྷནྟིཔི པིཝནྟིཔི, ཏསྨཱ ‘‘ཨོསདྷིཏཱརཀཱ’’ཏི ཝུཙྩཏི། ཨབྷིདོ ཨཌྜྷརཏྟསམཡནྟི ཨབྷིནྣེ ཨཌྜྷརཏྟསམཡེ། ཨིམིནཱ གགནམཛ྄ཛྷེ ཋིཏཙནྡཾ དསྶེཏི། ཨབྷིདོ མཛ྄ཛྷནྷིཀེཔི ཨེསེཝ ནཡོ།
Viddheti ubbiddhe, meghavigamena dūrībhūteti attho. Vigatavalāhaketi apagatameghe. Deveti ākāse. Osadhitārakāti sukkatārakā. Sā hi yasmā tassā udayato paṭṭhāya tena saññāṇena osadhāni gaṇhantipi pivantipi, tasmā ‘‘osadhitārakā’’ti vuccati. Abhido aḍḍharattasamayanti abhinne aḍḍharattasamaye. Iminā gaganamajjhe ṭhitacandaṃ dasseti. Abhido majjhanhikepi eseva nayo.
ཨཏོ ཁོཏི ཡེ ཨནུབྷོནྟི, ཏེཧི བཧུཏརཱ, བཧཱུ ཙེཝ བཧུཏརཱ ཙཱཏི ཨཏྠོ། ཨཱབྷཱ ནཱནུབྷོནྟཱིཏི ཨོབྷཱསཾ ན ཝལ༹ཉྫནྟི, ཨཏྟནོ སརཱིརོབྷཱསེནེཝ ཨཱལོཀཾ ཕརིཏྭཱ ཝིཧརནྟི།
Ato khoti ye anubhonti, tehi bahutarā, bahū ceva bahutarā cāti attho. Ābhā nānubhontīti obhāsaṃ na vaḷañjanti, attano sarīrobhāseneva ālokaṃ pharitvā viharanti.
༢༧༤. ཨིདཱནི ཡསྨཱ སོ ‘‘ཨེཀནྟསུཁཾ ལོཀཾ པུཙྪིསྶཱམཱི’’ཏི ནིསིནྣོ, པུཙྪཱམཱུལ༹ྷོ པན ཛཱཏོ, ཏསྨཱ ནཾ བྷགཝཱ ཏཾ པུཙྪཾ སརཱཔེནྟོ ཀིཾ པན, ཨུདཱཡི, ཨཏྠི ཨེཀནྟསུཁོ ལོཀོཏིཨཱདིམཱཧ། ཏཏྠ ཨཱཀཱརཝཏཱིཏི ཀཱརཎཝཏཱི། ཨཉྙཏརཾ ཝཱ པན ཏཔོགུཎནྟི ཨཙེལཀཔཱལི༹ཾ སནྡྷཱཡཱཧ, སུརཱཔཱནཝིརཏཱིཏི ཨཏྠོ།
274. Idāni yasmā so ‘‘ekantasukhaṃ lokaṃ pucchissāmī’’ti nisinno, pucchāmūḷho pana jāto, tasmā naṃ bhagavā taṃ pucchaṃ sarāpento kiṃ pana, udāyi, atthi ekantasukho lokotiādimāha. Tattha ākāravatīti kāraṇavatī. Aññataraṃ vā pana tapoguṇanti acelakapāḷiṃ sandhāyāha, surāpānaviratīti attho.
༢༧༥. ཀཏམཱ པན སཱ, བྷནྟེ, ཨཱཀཱརཝཏཱི པཊིཔདཱ ཨེཀནྟསུཁསྶཱཏི ཀསྨཱ པུཙྪཏི? ཨེཝཾ ཀིརསྶ ཨཧོསི – ‘‘མཡཾ སཏྟཱནཾ ཨེཀནྟསུཁཾ ཝདཱམ, པཊིཔདཾ པན ཀཱལེན སུཁཾ ཀཱལེན དུཀྑཾ ཝདཱམ། ཨེཀནྟསུཁསྶ ཁོ པན ཨཏྟནོ པཊིཔདཱཡཔི ཨེཀནྟསུཁཱཡ བྷཝིཏབྦཾ། ཨམྷཱཀཾ ཀཐཱ ཨནིཡྻཱནིཀཱ, སཏྠུ ཀཐཱཝ ནིཡྻཱནིཀཱ’’ཏི། ཨིདཱནི སཏྠཱརཾཡེཝ པུཙྪིཏྭཱ ཛཱནིསྶཱམཱིཏི ཏསྨཱ པུཙྪཏི།
275.Katamā pana sā, bhante, ākāravatī paṭipadā ekantasukhassāti kasmā pucchati? Evaṃ kirassa ahosi – ‘‘mayaṃ sattānaṃ ekantasukhaṃ vadāma, paṭipadaṃ pana kālena sukhaṃ kālena dukkhaṃ vadāma. Ekantasukhassa kho pana attano paṭipadāyapi ekantasukhāya bhavitabbaṃ. Amhākaṃ kathā aniyyānikā, satthu kathāva niyyānikā’’ti. Idāni satthāraṃyeva pucchitvā jānissāmīti tasmā pucchati.
ཨེཏྠ མཡཾ ཨནསྶཱམཱཏི ཨེཏསྨིཾ ཀཱརཎེ མཡཾ ཨནསྶཱམ། ཀསྨཱ པན ཨེཝམཱཧཾསུ? ཏེ ཀིར པུབྦེ པཉྩསུ དྷམྨེསུ པཏིཊྛཱཡ ཀསིཎཔརིཀམྨཾ ཀཏྭཱ ཏཏིཡཛ྄ཛྷཱནཾ ནིབྦཏྟེཏྭཱ ཨཔརིཧཱིནཛ྄ཛྷཱནཱ ཀཱལཾ ཀཏྭཱ སུབྷཀིཎྷེསུ ནིབྦཏྟནྟཱིཏི ཛཱནནྟི, གཙྪནྟེ གཙྪནྟེ པན ཀཱལེ ཀསིཎཔརིཀམྨམྤི ན ཛཱནིཾསུ, ཏཏིཡཛ྄ཛྷཱནམྤི ནིབྦཏྟེཏུཾ ནཱསཀྑིཾསུ། པཉྩ པུབྦབྷཱགདྷམྨེ པན ‘‘ཨཱཀཱརཝཏཱི པཊིཔདཱ’’ཏི ཨུགྒཧེཏྭཱ ཏཏིཡཛ྄ཛྷཱནཾ ‘‘ཨེཀནྟསུཁོ ལོཀོ’’ཏི ཨུགྒཎྷིཾསུ། ཏསྨཱ ཨེཝམཱཧཾསུ། ཨུཏྟརིཏརནྟི ཨིཏོ པཉྩཧི དྷམྨེཧི ཨུཏྟརིཏརཾ པཊིཔདཾ ཝཱ ཏཏིཡཛ྄ཛྷཱནཏོ ཨུཏྟརིཏརཾ ཨེཀནྟསུཁཾ ལོཀཾ ཝཱ ན ཛཱནཱམཱཏི ཝུཏྟཾ ཧོཏི། ཨཔྤསདྡེ ཀཏྭཱཏི ཨེཀཔྤཧཱརེནེཝ མཧཱསདྡཾ ཀཱཏུཾ ཨཱརདྡྷེ ནིསྶདྡེ ཀཏྭཱ།
Etthamayaṃ anassāmāti etasmiṃ kāraṇe mayaṃ anassāma. Kasmā pana evamāhaṃsu? Te kira pubbe pañcasu dhammesu patiṭṭhāya kasiṇaparikammaṃ katvā tatiyajjhānaṃ nibbattetvā aparihīnajjhānā kālaṃ katvā subhakiṇhesu nibbattantīti jānanti, gacchante gacchante pana kāle kasiṇaparikammampi na jāniṃsu, tatiyajjhānampi nibbattetuṃ nāsakkhiṃsu. Pañca pubbabhāgadhamme pana ‘‘ākāravatī paṭipadā’’ti uggahetvā tatiyajjhānaṃ ‘‘ekantasukho loko’’ti uggaṇhiṃsu. Tasmā evamāhaṃsu. Uttaritaranti ito pañcahi dhammehi uttaritaraṃ paṭipadaṃ vā tatiyajjhānato uttaritaraṃ ekantasukhaṃ lokaṃ vā na jānāmāti vuttaṃ hoti. Appasadde katvāti ekappahāreneva mahāsaddaṃ kātuṃ āraddhe nissadde katvā.
༢༧༦. སཙྪིཀིརིཡཱཧེཏཱུཏི ཨེཏྠ དྭེ སཙྪིཀིརིཡཱ པཊིལཱབྷསཙྪིཀིརིཡཱ ཙ པཙྩཀྑསཙྪིཀིརིཡཱ ཙ། ཏཏྠ ཏཏིཡཛ྄ཛྷཱནཾ ནིབྦཏྟེཏྭཱ ཨཔརིཧཱིནཛ྄ཛྷཱནོ ཀཱལཾ ཀཏྭཱ སུབྷཀིཎྷལོཀེ ཏེསཾ དེཝཱནཾ སམཱནཱཡུཝཎྞོ ཧུཏྭཱ ནིབྦཏྟཏི, ཨཡཾ པཊིལཱབྷསཙྪིཀིརིཡཱ ནཱམ། ཙཏུཏྠཛ྄ཛྷཱནཾ ནིབྦཏྟེཏྭཱ ཨིདྡྷིཝིཀུབྦནེན སུབྷཀིཎྷལོཀཾ གནྟྭཱ ཏེཧི དེཝེཧི སདྡྷིཾ སནྟིཊྛཏི སལླཔཏི སཱཀཙྪཾ ཨཱཔཛྫཏི, ཨཡཾ པཙྩཀྑསཙྪིཀིརིཡཱ ནཱམ། ཏཱསཾ དྭིནྣམྤི ཏཏིཡཛ྄ཛྷཱནཾ ཨཱཀཱརཝཏཱི པཊིཔདཱ ནཱམ། ཏཉྷི ཨནུཔྤཱདེཏྭཱ ནེཝ སཀྐཱ སུབྷཀིཎྷལོཀེ ནིབྦཏྟིཏུཾ, ན ཙཏུཏྠཛ྄ཛྷཱནཾ ཨུཔྤཱདེཏུཾ། ཨིཏི དུཝིདྷམྤེཏཾ སཙྪིཀིརིཡཾ སནྡྷཱཡ – ‘‘ཨེཏསྶ ནཱུན, བྷནྟེ, ཨེཀནྟསུཁསྶ ལོཀསྶ སཙྪིཀིརིཡཱཧེཏཱུ’’ཏི ཨཱཧ།
276.Sacchikiriyāhetūti ettha dve sacchikiriyā paṭilābhasacchikiriyā ca paccakkhasacchikiriyā ca. Tattha tatiyajjhānaṃ nibbattetvā aparihīnajjhāno kālaṃ katvā subhakiṇhaloke tesaṃ devānaṃ samānāyuvaṇṇo hutvā nibbattati, ayaṃ paṭilābhasacchikiriyā nāma. Catutthajjhānaṃ nibbattetvā iddhivikubbanena subhakiṇhalokaṃ gantvā tehi devehi saddhiṃ santiṭṭhati sallapati sākacchaṃ āpajjati, ayaṃ paccakkhasacchikiriyā nāma. Tāsaṃ dvinnampi tatiyajjhānaṃ ākāravatī paṭipadā nāma. Tañhi anuppādetvā neva sakkā subhakiṇhaloke nibbattituṃ, na catutthajjhānaṃ uppādetuṃ. Iti duvidhampetaṃ sacchikiriyaṃ sandhāya – ‘‘etassa nūna, bhante, ekantasukhassa lokassa sacchikiriyāhetū’’ti āha.
༢༧༧. ཨུདཉྩནིཀོཏི ཨུདཀཝཱརཀོ། ཨནྟརཱཡམཀཱསཱིཏི ཡཐཱ པབྦཛྫཾ ན ལབྷཏི, ཨེཝཾ ཨུཔདྡུཏམཀཱསི ཡཐཱ ཏཾ ཨུཔནིསྶཡཝིཔནྣཾ། ཨཡཾ ཀིར ཀསྶཔབུདྡྷཀཱལེ པབྦཛིཏྭཱ སམཎདྷམྨམཀཱསི། ཨཐསྶ ཨེཀོ སཧཱཡཀོ བྷིཀྑུ སཱསནེ ཨནབྷིརཏོ, ‘‘ཨཱཝུསོ, ཝིབྦྷམིསྶཱམཱི’’ཏི ཨཱརོཙེསི། སོ ཏསྶ པཏྟཙཱིཝརེ ལོབྷཾ ཨུཔྤཱདེཏྭཱ གིཧིབྷཱཝཱཡ ཝཎྞཾ ཨབྷཱསི། ཨིཏརོ ཏསྶ པཏྟཙཱིཝརཾ དཏྭཱ ཝིབྦྷམི། ཏེནསྶ ཀམྨུནཱ ཨིདཱནི བྷགཝཏོ སམྨུཁཱ པབྦཛྫཱཡ ཨནྟརཱཡོ ཛཱཏོ། བྷགཝཏཱ པནསྶ པུརིམསུཏྟཾ ཨཏིརེཀབྷཱཎཝཱརམཏྟཾ, ཨིདཾ བྷཱཎཝཱརམཏྟནྟི ཨེཏྟཀཱཡ ཏནྟིཡཱ དྷམྨོ ཀཐིཏོ, ཨེཀདེསནཱཡཔི མགྒཕལཔཊིཝེདྷོ ན ཛཱཏོ, ཨནཱགཏེ པནསྶ པཙྩཡོ བྷཝིསྶཏཱིཏི བྷགཝཱ དྷམྨཾ དེསེཏི། ཨནཱགཏེ པཙྩཡབྷཱཝཉྩསྶ དིསྭཱ བྷགཝཱ དྷརམཱནོ ཨེཀཾ བྷིཀྑུམྤི མེཏྟཱཝིཧཱརིམྷི ཨེཏདགྒེ ན ཋཔེསི། པསྶཏི ཧི བྷགཝཱ – ‘‘ཨནཱགཏེ ཨཡཾ མམ སཱསནེ པབྦཛིཏྭཱ མེཏྟཱཝིཧཱརཱིནཾ ཨགྒོ བྷཝིསྶཏཱི’’ཏི།
277.Udañcanikoti udakavārako. Antarāyamakāsīti yathā pabbajjaṃ na labhati, evaṃ upaddutamakāsi yathā taṃ upanissayavipannaṃ. Ayaṃ kira kassapabuddhakāle pabbajitvā samaṇadhammamakāsi. Athassa eko sahāyako bhikkhu sāsane anabhirato, ‘‘āvuso, vibbhamissāmī’’ti ārocesi. So tassa pattacīvare lobhaṃ uppādetvā gihibhāvāya vaṇṇaṃ abhāsi. Itaro tassa pattacīvaraṃ datvā vibbhami. Tenassa kammunā idāni bhagavato sammukhā pabbajjāya antarāyo jāto. Bhagavatā panassa purimasuttaṃ atirekabhāṇavāramattaṃ, idaṃ bhāṇavāramattanti ettakāya tantiyā dhammo kathito, ekadesanāyapi maggaphalapaṭivedho na jāto, anāgate panassa paccayo bhavissatīti bhagavā dhammaṃ deseti. Anāgate paccayabhāvañcassa disvā bhagavā dharamāno ekaṃ bhikkhumpi mettāvihārimhi etadagge na ṭhapesi. Passati hi bhagavā – ‘‘anāgate ayaṃ mama sāsane pabbajitvā mettāvihārīnaṃ aggo bhavissatī’’ti.
སོ བྷགཝཏི པརིནིབྦུཏེ དྷམྨཱསོཀརཱཛཀཱལེ པཱཊལིཔུཏྟེ ནིབྦཏྟིཏྭཱ པབྦཛིཏྭཱ ཨརཧཏྟཔྤཏྟོ ཨསྶགུཏྟཏྠེརོ ནཱམ ཧུཏྭཱ མེཏྟཱཝིཧཱརཱིནཾ ཨགྒོ ཨཧོསི། ཐེརསྶ མེཏྟཱནུབྷཱཝེན ཏིརཙྪཱནགཏཱཔི མེཏྟཙིཏྟཾ པཊིལབྷིཾསུ, ཐེརོ སཀལཛམྦུདཱིཔེ བྷིཀྑུསངྒྷསྶ ཨོཝཱདཱཙརིཡོ ཧུཏྭཱ ཝཏྟནིསེནཱསནེ ཨཱཝསི, ཏིཾསཡོཛནམཏྟཱ ཨཊཝཱི ཨེཀཾ པདྷཱནགྷརཾ ཨཧོསི། ཐེརོ ཨཱཀཱསེ ཙམྨཁཎྜཾ པཏྠརིཏྭཱ ཏཏྠ ནིསིནྣོ ཀམྨཊྛཱནཾ ཀཐེསི། གཙྪནྟེ གཙྪནྟེ ཀཱལེ བྷིཀྑཱཙཱརམྤི ཨགནྟྭཱ ཝིཧཱརེ ནིསིནྣོ ཀམྨཊྛཱནཾ ཀཐེསི, མནུསྶཱ ཝིཧཱརམེཝ གནྟྭཱ དཱནམདཾསུ། དྷམྨཱསོཀརཱཛཱ ཐེརསྶ གུཎཾ སུཏྭཱ དཊྛུཀཱམོ ཏིཀྑཏྟུཾ པཧིཎི། ཐེརོ བྷིཀྑུསངྒྷསྶ ཨོཝཱདཾ དམྨཱིཏི ཨེཀཝཱརམྤི ན གཏོཏི།
So bhagavati parinibbute dhammāsokarājakāle pāṭaliputte nibbattitvā pabbajitvā arahattappatto assaguttatthero nāma hutvā mettāvihārīnaṃ aggo ahosi. Therassa mettānubhāvena tiracchānagatāpi mettacittaṃ paṭilabhiṃsu, thero sakalajambudīpe bhikkhusaṅghassa ovādācariyo hutvā vattanisenāsane āvasi, tiṃsayojanamattā aṭavī ekaṃ padhānagharaṃ ahosi. Thero ākāse cammakhaṇḍaṃ pattharitvā tattha nisinno kammaṭṭhānaṃ kathesi. Gacchante gacchante kāle bhikkhācārampi agantvā vihāre nisinno kammaṭṭhānaṃ kathesi, manussā vihārameva gantvā dānamadaṃsu. Dhammāsokarājā therassa guṇaṃ sutvā daṭṭhukāmo tikkhattuṃ pahiṇi. Thero bhikkhusaṅghassa ovādaṃ dammīti ekavārampi na gatoti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཙཱུལ༹སཀུལུདཱཡིསུཏྟཝཎྞནཱ ནིཊྛིཏཱ།
Cūḷasakuludāyisuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༩. ཙཱུལ༹སཀུལུདཱཡིསུཏྟཾ • 9. Cūḷasakuludāyisuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༩. ཙཱུལ༹སཀུལུདཱཡིསུཏྟཝཎྞནཱ • 9. Cūḷasakuludāyisuttavaṇṇanā
