| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
10. சூளஸாரோபமஸுத்தவண்ணனா
10. Cūḷasāropamasuttavaṇṇanā
312. பிங்க³லதா⁴துகோதி பிங்க³லஸபா⁴வோ பிங்க³லச்ச²விகோ, பிங்க³லக்கோ²தி வா அத்தோ². பப்³ப³ஜிதஸமூஹஸங்கா²தோ ஸங்கோ⁴, ந ஸீலாதி³கு³ணேஹி ஸங்க³ஹிதப்³ப³பா⁴வேன. ஸங்கோ⁴ ஏதேஸங் அத்தி² பரிவாரபூ⁴தோதி ஸங்கி⁴னோ. ஸ்வேவாதி ஸோ ஏவ பப்³ப³ஜிதஸமூஹஸங்கா²தோ. ஆசாரஸிக்கா²பனவஸேனாதி அத்தனா பரிகப்பிதஅசேலவதாதி³ஆசாரஸிக்கா²பனவஸேன. பஞ்ஞாதாதி யதா²ஸகங் ஸமாதி³ன்னவதவஸேன சேவ விஞ்ஞாதலத்³தி⁴வஸேன ச பஞ்ஞாதா. லத்³தி⁴கராதி தஸ்ஸா மிச்சா²தி³ட்டி²யா உப்பாத³கா. ப³ஹுஜனஸ்ஸாதி புது²ஜனஸ்ஸ. தஸ்ஸ பன ஆக³மஸம்பதா³பி நாம நத்தி², குதோ அதி⁴க³மோதி ஏகங்ஸதோ அந்த⁴புது²ஜ்ஜனோ ஏவாதி ஆஹ ‘‘அஸ்ஸுதவதோ அந்த⁴பா³லபுது²ஜ்ஜனஸ்ஸா’’தி. ந ஹி விஞ்ஞூ அப்பஸாத³னீயே பஸீத³ந்தி. மங்க³லேஸு காதப்³ப³தா³ஸகிச்சகரோ தா³ஸோ மங்க³லதா³ஸோ.
312.Piṅgaladhātukoti piṅgalasabhāvo piṅgalacchaviko, piṅgalakkhoti vā attho. Pabbajitasamūhasaṅkhāto saṅgho, na sīlādiguṇehi saṅgahitabbabhāvena. Saṅgho etesaṃ atthi parivārabhūtoti saṅghino. Svevāti so eva pabbajitasamūhasaṅkhāto. Ācārasikkhāpanavasenāti attanā parikappitaacelavatādiācārasikkhāpanavasena. Paññātāti yathāsakaṃ samādinnavatavasena ceva viññātaladdhivasena ca paññātā. Laddhikarāti tassā micchādiṭṭhiyā uppādakā. Bahujanassāti puthujanassa. Tassa pana āgamasampadāpi nāma natthi, kuto adhigamoti ekaṃsato andhaputhujjano evāti āha ‘‘assutavato andhabālaputhujjanassā’’ti. Na hi viññū appasādanīye pasīdanti. Maṅgalesu kātabbadāsakiccakaro dāso maṅgaladāso.
தந்தாவுதானந்தி தந்தே பஸாரெத்வா வீதானங். க³ண்ட²னகிலேஸோதி ஸங்ஸாரே ப³ந்த⁴னகிலேஸோ. ஏவங் வாதி³தாயாதி ஏவங் படிஞ்ஞதாய, ஏவங் தி³ட்டி²தாய வா. நிய்யானிகாதி நிய்யானக³திஸப்பாடிஹீரகா அனுபாரம்ப⁴பூ⁴தத்தாதி அதி⁴ப்பாயோ. நோ சே நிய்யானிகாதி ஆனெத்வா யோஜனா. தேஸங் ஸப்³ப³ஞ்ஞுபடிஞ்ஞாய அபூ⁴தத்தா தஸ்ஸா அபூ⁴தபா⁴வகத²னேன தஸ்ஸ ப்³ராஹ்மணஸ்ஸ ந காசி அத்த²ஸித்³தீ⁴தி ஆஹ ‘‘நேஸங் அனிய்யானிகபா⁴வகத²னேன அத்தா²பா⁴வதோ’’தி.
Tantāvutānanti tante pasāretvā vītānaṃ. Gaṇṭhanakilesoti saṃsāre bandhanakileso. Evaṃ vāditāyāti evaṃ paṭiññatāya, evaṃ diṭṭhitāya vā. Niyyānikāti niyyānagatisappāṭihīrakā anupārambhabhūtattāti adhippāyo. No ce niyyānikāti ānetvā yojanā. Tesaṃ sabbaññupaṭiññāya abhūtattā tassā abhūtabhāvakathanena tassa brāhmaṇassa na kāci atthasiddhīti āha ‘‘nesaṃ aniyyānikabhāvakathanena atthābhāvato’’ti.
318. நிஹீனலோகாமிஸே லீனோ அஜ்ஜா²ஸயோ ஏதஸ்ஸ, ந பன நிப்³பா³னேதி. லீனஜ்ஜா²ஸயோ. ஸாஸனங் ஸிதி²லங் கத்வா க³ண்ஹாதி ஸிக்கா²ய ந திப்³ப³கா³ரவத்தா.
318. Nihīnalokāmise līno ajjhāsayo etassa, na pana nibbāneti. Līnajjhāsayo. Sāsanaṃ sithilaṃ katvā gaṇhāti sikkhāya na tibbagāravattā.
323. ஹெட்டா²தி அனந்தராதீதஸுத்தே மஹாஸாரோபமே. பட²மஜ்ஜா²னாதி³த⁴ம்மா விபஸ்ஸனாபாத³காதி விபஸ்ஸனாய பத³ட்டா²னபூ⁴தா. இதா⁴தி இமஸ்மிங் சூளஸாரோபமே ஆக³தா. நிரோத⁴பாத³காதி அனாகா³மினோ, அரஹந்தோ வா நிரோத⁴ஸமாபத்திங் ஸமாபஜ்ஜிதுங் ஸமத்தா². தஸ்மாதி நிரோத⁴பாத³கத்தா. பட²மஜ்ஜா²னாதி³த⁴ம்மா ஞாணத³ஸ்ஸனதோ உத்தரிதராதி வேதி³தப்³பா³.
323.Heṭṭhāti anantarātītasutte mahāsāropame. Paṭhamajjhānādidhammā vipassanāpādakāti vipassanāya padaṭṭhānabhūtā. Idhāti imasmiṃ cūḷasāropame āgatā. Nirodhapādakāti anāgāmino, arahanto vā nirodhasamāpattiṃ samāpajjituṃ samatthā. Tasmāti nirodhapādakattā. Paṭhamajjhānādidhammā ñāṇadassanato uttaritarāti veditabbā.
சூளஸாரோபமஸுத்தவண்ணனாய லீனத்த²ப்பகாஸனா ஸமத்தா.
Cūḷasāropamasuttavaṇṇanāya līnatthappakāsanā samattā.
நிட்டி²தா ச ஓபம்மவக்³க³வண்ணனா.
Niṭṭhitā ca opammavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. சூளஸாரோபமஸுத்தங் • 10. Cūḷasāropamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 10. சூளஸாரோபமஸுத்தவண்ணனா • 10. Cūḷasāropamasuttavaṇṇanā
