| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) |
೧೦. ಚೂಳಸಾರೋಪಮಸುತ್ತವಣ್ಣನಾ
10. Cūḷasāropamasuttavaṇṇanā
೩೧೨. ಪಿಙ್ಗಲಧಾತುಕೋತಿ ಪಿಙ್ಗಲಸಭಾವೋ ಪಿಙ್ಗಲಚ್ಛವಿಕೋ, ಪಿಙ್ಗಲಕ್ಖೋತಿ ವಾ ಅತ್ಥೋ। ಪಬ್ಬಜಿತಸಮೂಹಸಙ್ಖಾತೋ ಸಙ್ಘೋ, ನ ಸೀಲಾದಿಗುಣೇಹಿ ಸಙ್ಗಹಿತಬ್ಬಭಾವೇನ। ಸಙ್ಘೋ ಏತೇಸಂ ಅತ್ಥಿ ಪರಿವಾರಭೂತೋತಿ ಸಙ್ಘಿನೋ। ಸ್ವೇವಾತಿ ಸೋ ಏವ ಪಬ್ಬಜಿತಸಮೂಹಸಙ್ಖಾತೋ। ಆಚಾರಸಿಕ್ಖಾಪನವಸೇನಾತಿ ಅತ್ತನಾ ಪರಿಕಪ್ಪಿತಅಚೇಲವತಾದಿಆಚಾರಸಿಕ್ಖಾಪನವಸೇನ। ಪಞ್ಞಾತಾತಿ ಯಥಾಸಕಂ ಸಮಾದಿನ್ನವತವಸೇನ ಚೇವ ವಿಞ್ಞಾತಲದ್ಧಿವಸೇನ ಚ ಪಞ್ಞಾತಾ। ಲದ್ಧಿಕರಾತಿ ತಸ್ಸಾ ಮಿಚ್ಛಾದಿಟ್ಠಿಯಾ ಉಪ್ಪಾದಕಾ। ಬಹುಜನಸ್ಸಾತಿ ಪುಥುಜನಸ್ಸ। ತಸ್ಸ ಪನ ಆಗಮಸಮ್ಪದಾಪಿ ನಾಮ ನತ್ಥಿ, ಕುತೋ ಅಧಿಗಮೋತಿ ಏಕಂಸತೋ ಅನ್ಧಪುಥುಜ್ಜನೋ ಏವಾತಿ ಆಹ ‘‘ಅಸ್ಸುತವತೋ ಅನ್ಧಬಾಲಪುಥುಜ್ಜನಸ್ಸಾ’’ತಿ। ನ ಹಿ ವಿಞ್ಞೂ ಅಪ್ಪಸಾದನೀಯೇ ಪಸೀದನ್ತಿ। ಮಙ್ಗಲೇಸು ಕಾತಬ್ಬದಾಸಕಿಚ್ಚಕರೋ ದಾಸೋ ಮಙ್ಗಲದಾಸೋ।
312.Piṅgaladhātukoti piṅgalasabhāvo piṅgalacchaviko, piṅgalakkhoti vā attho. Pabbajitasamūhasaṅkhāto saṅgho, na sīlādiguṇehi saṅgahitabbabhāvena. Saṅgho etesaṃ atthi parivārabhūtoti saṅghino. Svevāti so eva pabbajitasamūhasaṅkhāto. Ācārasikkhāpanavasenāti attanā parikappitaacelavatādiācārasikkhāpanavasena. Paññātāti yathāsakaṃ samādinnavatavasena ceva viññātaladdhivasena ca paññātā. Laddhikarāti tassā micchādiṭṭhiyā uppādakā. Bahujanassāti puthujanassa. Tassa pana āgamasampadāpi nāma natthi, kuto adhigamoti ekaṃsato andhaputhujjano evāti āha ‘‘assutavato andhabālaputhujjanassā’’ti. Na hi viññū appasādanīye pasīdanti. Maṅgalesu kātabbadāsakiccakaro dāso maṅgaladāso.
ತನ್ತಾವುತಾನನ್ತಿ ತನ್ತೇ ಪಸಾರೇತ್ವಾ ವೀತಾನಂ। ಗಣ್ಠನಕಿಲೇಸೋತಿ ಸಂಸಾರೇ ಬನ್ಧನಕಿಲೇಸೋ। ಏವಂ ವಾದಿತಾಯಾತಿ ಏವಂ ಪಟಿಞ್ಞತಾಯ, ಏವಂ ದಿಟ್ಠಿತಾಯ ವಾ। ನಿಯ್ಯಾನಿಕಾತಿ ನಿಯ್ಯಾನಗತಿಸಪ್ಪಾಟಿಹೀರಕಾ ಅನುಪಾರಮ್ಭಭೂತತ್ತಾತಿ ಅಧಿಪ್ಪಾಯೋ। ನೋ ಚೇ ನಿಯ್ಯಾನಿಕಾತಿ ಆನೇತ್ವಾ ಯೋಜನಾ। ತೇಸಂ ಸಬ್ಬಞ್ಞುಪಟಿಞ್ಞಾಯ ಅಭೂತತ್ತಾ ತಸ್ಸಾ ಅಭೂತಭಾವಕಥನೇನ ತಸ್ಸ ಬ್ರಾಹ್ಮಣಸ್ಸ ನ ಕಾಚಿ ಅತ್ಥಸಿದ್ಧೀತಿ ಆಹ ‘‘ನೇಸಂ ಅನಿಯ್ಯಾನಿಕಭಾವಕಥನೇನ ಅತ್ಥಾಭಾವತೋ’’ತಿ।
Tantāvutānanti tante pasāretvā vītānaṃ. Gaṇṭhanakilesoti saṃsāre bandhanakileso. Evaṃ vāditāyāti evaṃ paṭiññatāya, evaṃ diṭṭhitāya vā. Niyyānikāti niyyānagatisappāṭihīrakā anupārambhabhūtattāti adhippāyo. No ce niyyānikāti ānetvā yojanā. Tesaṃ sabbaññupaṭiññāya abhūtattā tassā abhūtabhāvakathanena tassa brāhmaṇassa na kāci atthasiddhīti āha ‘‘nesaṃ aniyyānikabhāvakathanena atthābhāvato’’ti.
೩೧೮. ನಿಹೀನಲೋಕಾಮಿಸೇ ಲೀನೋ ಅಜ್ಝಾಸಯೋ ಏತಸ್ಸ, ನ ಪನ ನಿಬ್ಬಾನೇತಿ। ಲೀನಜ್ಝಾಸಯೋ। ಸಾಸನಂ ಸಿಥಿಲಂ ಕತ್ವಾ ಗಣ್ಹಾತಿ ಸಿಕ್ಖಾಯ ನ ತಿಬ್ಬಗಾರವತ್ತಾ।
318. Nihīnalokāmise līno ajjhāsayo etassa, na pana nibbāneti. Līnajjhāsayo. Sāsanaṃ sithilaṃ katvā gaṇhāti sikkhāya na tibbagāravattā.
೩೨೩. ಹೇಟ್ಠಾತಿ ಅನನ್ತರಾತೀತಸುತ್ತೇ ಮಹಾಸಾರೋಪಮೇ। ಪಠಮಜ್ಝಾನಾದಿಧಮ್ಮಾ ವಿಪಸ್ಸನಾಪಾದಕಾತಿ ವಿಪಸ್ಸನಾಯ ಪದಟ್ಠಾನಭೂತಾ। ಇಧಾತಿ ಇಮಸ್ಮಿಂ ಚೂಳಸಾರೋಪಮೇ ಆಗತಾ। ನಿರೋಧಪಾದಕಾತಿ ಅನಾಗಾಮಿನೋ, ಅರಹನ್ತೋ ವಾ ನಿರೋಧಸಮಾಪತ್ತಿಂ ಸಮಾಪಜ್ಜಿತುಂ ಸಮತ್ಥಾ। ತಸ್ಮಾತಿ ನಿರೋಧಪಾದಕತ್ತಾ। ಪಠಮಜ್ಝಾನಾದಿಧಮ್ಮಾ ಞಾಣದಸ್ಸನತೋ ಉತ್ತರಿತರಾತಿ ವೇದಿತಬ್ಬಾ।
323.Heṭṭhāti anantarātītasutte mahāsāropame. Paṭhamajjhānādidhammā vipassanāpādakāti vipassanāya padaṭṭhānabhūtā. Idhāti imasmiṃ cūḷasāropame āgatā. Nirodhapādakāti anāgāmino, arahanto vā nirodhasamāpattiṃ samāpajjituṃ samatthā. Tasmāti nirodhapādakattā. Paṭhamajjhānādidhammā ñāṇadassanato uttaritarāti veditabbā.
ಚೂಳಸಾರೋಪಮಸುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।
Cūḷasāropamasuttavaṇṇanāya līnatthappakāsanā samattā.
ನಿಟ್ಠಿತಾ ಚ ಓಪಮ್ಮವಗ್ಗವಣ್ಣನಾ।
Niṭṭhitā ca opammavaggavaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೧೦. ಚೂಳಸಾರೋಪಮಸುತ್ತಂ • 10. Cūḷasāropamasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) / ೧೦. ಚೂಳಸಾರೋಪಮಸುತ್ತವಣ್ಣನಾ • 10. Cūḷasāropamasuttavaṇṇanā
