| Library / Tipiṭaka / තිපිටක • Tipiṭaka / මජ්‌ඣිමනිකාය (ටීකා) • Majjhimanikāya (ṭīkā) |
10. චූළසාරොපමසුත්‌තවණ්‌ණනා
10. Cūḷasāropamasuttavaṇṇanā
312. පිඞ්‌ගලධාතුකොති පිඞ්‌ගලසභාවො පිඞ්‌ගලච්‌ඡවිකො, පිඞ්‌ගලක්‌ඛොති වා අත්‌ථො. පබ්‌බජිතසමූහසඞ්‌ඛාතො සඞ්‌ඝො, න සීලාදිගුණෙහි සඞ්‌ගහිතබ්‌බභාවෙන. සඞ්‌ඝො එතෙසං අත්‌ථි පරිවාරභූතොති සඞ්‌ඝිනො. ස්‌වෙවාති සො එව පබ්‌බජිතසමූහසඞ්‌ඛාතො. ආචාරසික්‌ඛාපනවසෙනාති අත්‌තනා පරිකප්‌පිතඅචෙලවතාදිආචාරසික්‌ඛාපනවසෙන. පඤ්‌ඤාතාති යථාසකං සමාදින්‌නවතවසෙන චෙව විඤ්‌ඤාතලද්‌ධිවසෙන ච පඤ්‌ඤාතා. ලද්‌ධිකරාති තස්‌සා මිච්‌ඡාදිට්‌ඨියා උප්‌පාදකා. බහුජනස්‌සාති පුථුජනස්‌ස. තස්‌ස පන ආගමසම්‌පදාපි නාම නත්‌ථි, කුතො අධිගමොති එකංසතො අන්‌ධපුථුජ්‌ජනො එවාති ආහ ‘‘අස්‌සුතවතො අන්‌ධබාලපුථුජ්‌ජනස්‌සා’’ති. න හි විඤ්‌ඤූ අප්‌පසාදනීයෙ පසීදන්‌ති. මඞ්‌ගලෙසු කාතබ්‌බදාසකිච්‌චකරො දාසො මඞ්‌ගලදාසො.
312.Piṅgaladhātukoti piṅgalasabhāvo piṅgalacchaviko, piṅgalakkhoti vā attho. Pabbajitasamūhasaṅkhāto saṅgho, na sīlādiguṇehi saṅgahitabbabhāvena. Saṅgho etesaṃ atthi parivārabhūtoti saṅghino. Svevāti so eva pabbajitasamūhasaṅkhāto. Ācārasikkhāpanavasenāti attanā parikappitaacelavatādiācārasikkhāpanavasena. Paññātāti yathāsakaṃ samādinnavatavasena ceva viññātaladdhivasena ca paññātā. Laddhikarāti tassā micchādiṭṭhiyā uppādakā. Bahujanassāti puthujanassa. Tassa pana āgamasampadāpi nāma natthi, kuto adhigamoti ekaṃsato andhaputhujjano evāti āha ‘‘assutavato andhabālaputhujjanassā’’ti. Na hi viññū appasādanīye pasīdanti. Maṅgalesu kātabbadāsakiccakaro dāso maṅgaladāso.
තන්‌තාවුතානන්‌ති තන්‌තෙ පසාරෙත්‌වා වීතානං. ගණ්‌ඨනකිලෙසොති සංසාරෙ බන්‌ධනකිලෙසො. එවං වාදිතායාති එවං පටිඤ්‌ඤතාය, එවං දිට්‌ඨිතාය වා. නිය්‍යානිකාති නිය්‍යානගතිසප්‌පාටිහීරකා අනුපාරම්‌භභූතත්‌තාති අධිප්‌පායො. නො චෙ නිය්‍යානිකාති ආනෙත්‌වා යොජනා. තෙසං සබ්‌බඤ්‌ඤුපටිඤ්‌ඤාය අභූතත්‌තා තස්‌සා අභූතභාවකථනෙන තස්‌ස බ්‍රාහ්‌මණස්‌ස න කාචි අත්‌ථසිද්‌ධීති ආහ ‘‘නෙසං අනිය්‍යානිකභාවකථනෙන අත්‌ථාභාවතො’’ති.
Tantāvutānanti tante pasāretvā vītānaṃ. Gaṇṭhanakilesoti saṃsāre bandhanakileso. Evaṃ vāditāyāti evaṃ paṭiññatāya, evaṃ diṭṭhitāya vā. Niyyānikāti niyyānagatisappāṭihīrakā anupārambhabhūtattāti adhippāyo. No ce niyyānikāti ānetvā yojanā. Tesaṃ sabbaññupaṭiññāya abhūtattā tassā abhūtabhāvakathanena tassa brāhmaṇassa na kāci atthasiddhīti āha ‘‘nesaṃ aniyyānikabhāvakathanena atthābhāvato’’ti.
318. නිහීනලොකාමිසෙ ලීනො අජ්‌ඣාසයො එතස්‌ස, න පන නිබ්‌බානෙති. ලීනජ්‌ඣාසයො. සාසනං සිථිලං කත්‌වා ගණ්‌හාති සික්‌ඛාය න තිබ්‌බගාරවත්‌තා.
318. Nihīnalokāmise līno ajjhāsayo etassa, na pana nibbāneti. Līnajjhāsayo. Sāsanaṃ sithilaṃ katvā gaṇhāti sikkhāya na tibbagāravattā.
323. හෙට්‌ඨාති අනන්‌තරාතීතසුත්‌තෙ මහාසාරොපමෙ. පඨමජ්‌ඣානාදිධම්‌මා විපස්‌සනාපාදකාති විපස්‌සනාය පදට්‌ඨානභූතා. ඉධාති ඉමස්‌මිං චූළසාරොපමෙ ආගතා. නිරොධපාදකාති අනාගාමිනො, අරහන්‌තො වා නිරොධසමාපත්‌තිං සමාපජ්‌ජිතුං සමත්‌ථා. තස්‌මාති නිරොධපාදකත්‌තා. පඨමජ්‌ඣානාදිධම්‌මා ඤාණදස්‌සනතො උත්‌තරිතරාති වෙදිතබ්‌බා.
323.Heṭṭhāti anantarātītasutte mahāsāropame. Paṭhamajjhānādidhammā vipassanāpādakāti vipassanāya padaṭṭhānabhūtā. Idhāti imasmiṃ cūḷasāropame āgatā. Nirodhapādakāti anāgāmino, arahanto vā nirodhasamāpattiṃ samāpajjituṃ samatthā. Tasmāti nirodhapādakattā. Paṭhamajjhānādidhammā ñāṇadassanato uttaritarāti veditabbā.
චූළසාරොපමසුත්‌තවණ්‌ණනාය ලීනත්‌ථප්‌පකාසනා සමත්‌තා.
Cūḷasāropamasuttavaṇṇanāya līnatthappakāsanā samattā.
නිට්‌ඨිතා ච ඔපම්‌මවග්‌ගවණ්‌ණනා.
Niṭṭhitā ca opammavaggavaṇṇanā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / මජ්‌ඣිමනිකාය • Majjhimanikāya / 10. චූළසාරොපමසුත්‌තං • 10. Cūḷasāropamasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) / 10. චූළසාරොපමසුත්‌තවණ්‌ණනා • 10. Cūḷasāropamasuttavaṇṇanā
