| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. சூளஸுக³ந்த⁴த்தே²ரஅபதா³னவண்ணனா
10. Cūḷasugandhattheraapadānavaṇṇanā
த³ஸமாபதா³னே இமம்ஹி ப⁴த்³த³கே கப்பேதிஆதி³கங் ஆயஸ்மதோ ஸுக³ந்த⁴த்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ கஸ்ஸபஸம்மாஸம்பு³த்³த⁴காலே பா³ராணஸியங் விப⁴வஸம்பன்னே குலே நிப்³ப³த்தோ விஞ்ஞுதங் பத்வா ஸத்து² ஸந்திகே த⁴ம்மங் ஸுத்வா ஸப்³ப³தா³ நமஸ்ஸமானோ மஹாதா³னங் த³த³மானோ மாஸஸ்ஸ ஸத்தக்க²த்துங் ப⁴க³வதோ க³ந்த⁴குடியா சதுஜ்ஜாதிக³ந்தே⁴ன விலிம்பேஸி. ‘‘மம நிப்³ப³த்தனிப்³ப³த்தட்டா²னே ஸரீரதோ ஸுக³ந்த⁴க³ந்தோ⁴ நிப்³ப³த்ததூ’’தி பத்த²னங் அகாஸி. ப⁴க³வா தங் ப்³யாகாஸி. ஸோ யாவதாயுகங் ட²த்வா புஞ்ஞானி கரொந்தோ ததோ சுதோ தே³வலோகே நிப்³ப³த்தோ காமாவசரலோகங் ஸரீரக³ந்தே⁴ன ஸுக³ந்த⁴ங் குருமானோ ஸுக³ந்த⁴தே³வபுத்தோதி பாகடோ அஹோஸி. ஸோ தே³வலோகஸம்பத்தியோ அனுப⁴வித்வா ததோ சுதோ இமஸ்மிங் பு³த்³து⁴ப்பாதே³ மஹாபோ⁴க³குலே நிப்³ப³த்தி, தஸ்ஸ மாதுகுச்சி²க³தஸ்ஸேவ மாதுயா ஸரீரக³ந்தே⁴ன ஸகலகே³ஹங் ஸகலனக³ரஞ்ச ஸுக³ந்தே⁴ன ஏகக³ந்த⁴ங் அஹோஸி, ஜாதக்க²ணே ஸகலங் ஸாவத்தி²னக³ரங் ஸுக³ந்த⁴கரண்ட³கோ விய அஹோஸி, தேனஸ்ஸ ஸுக³ந்தோ⁴தி நாமங் கரிங்ஸு. ஸோ வுத்³தி⁴ங் அக³மாஸி. ததா³ ஸத்தா² ஸாவத்தி²யங் பத்வா ஜேதவனமஹாவிஹாரங் படிக்³க³ஹேஸி, தங் தி³ஸ்வா பஸன்னமானஸோ ப⁴க³வதோ ஸந்திகே பப்³ப³ஜித்வா நசிரஸ்ஸேவ ஸஹ படிஸம்பி⁴தா³ஹி அரஹத்தங் பாபுணி. தஸ்ஸ உப்பன்னதி³வஸதோ பட்டா²ய யாவ பரினிப்³பா³னா எத்த²ந்தரே நிபன்னட்டா²னாதீ³ஸு ஸுக³ந்த⁴மேவ வாயி. தே³வாபி தி³ப்³ப³சுண்ணதி³ப்³ப³க³ந்த⁴புப்பா²னி ஓகிரந்தி.
Dasamāpadāne imamhi bhaddake kappetiādikaṃ āyasmato sugandhattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto kassapasammāsambuddhakāle bārāṇasiyaṃ vibhavasampanne kule nibbatto viññutaṃ patvā satthu santike dhammaṃ sutvā sabbadā namassamāno mahādānaṃ dadamāno māsassa sattakkhattuṃ bhagavato gandhakuṭiyā catujjātigandhena vilimpesi. ‘‘Mama nibbattanibbattaṭṭhāne sarīrato sugandhagandho nibbattatū’’ti patthanaṃ akāsi. Bhagavā taṃ byākāsi. So yāvatāyukaṃ ṭhatvā puññāni karonto tato cuto devaloke nibbatto kāmāvacaralokaṃ sarīragandhena sugandhaṃ kurumāno sugandhadevaputtoti pākaṭo ahosi. So devalokasampattiyo anubhavitvā tato cuto imasmiṃ buddhuppāde mahābhogakule nibbatti, tassa mātukucchigatasseva mātuyā sarīragandhena sakalagehaṃ sakalanagarañca sugandhena ekagandhaṃ ahosi, jātakkhaṇe sakalaṃ sāvatthinagaraṃ sugandhakaraṇḍako viya ahosi, tenassa sugandhoti nāmaṃ kariṃsu. So vuddhiṃ agamāsi. Tadā satthā sāvatthiyaṃ patvā jetavanamahāvihāraṃ paṭiggahesi, taṃ disvā pasannamānaso bhagavato santike pabbajitvā nacirasseva saha paṭisambhidāhi arahattaṃ pāpuṇi. Tassa uppannadivasato paṭṭhāya yāva parinibbānā etthantare nipannaṭṭhānādīsu sugandhameva vāyi. Devāpi dibbacuṇṇadibbagandhapupphāni okiranti.
272. ஸோபி தே²ரோ அரஹத்தங் பத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ இமம்ஹி ப⁴த்³த³கே கப்பேதிஆதி³மாஹ. தங் ஸப்³ப³ங் ஹெட்டா² வுத்தனயத்தா உத்தானத்த²த்தா ச ஸுவிஞ்ஞெய்யமேவ, கேவலங் புஞ்ஞனானத்தங் நாமனானத்தஞ்ச விஸேஸோ.
272. Sopi thero arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento imamhi bhaddake kappetiādimāha. Taṃ sabbaṃ heṭṭhā vuttanayattā uttānatthattā ca suviññeyyameva, kevalaṃ puññanānattaṃ nāmanānattañca viseso.
சூளஸுக³ந்த⁴த்தே²ரஅபதா³னவண்ணனா ஸமத்தா.
Cūḷasugandhattheraapadānavaṇṇanā samattā.
பஞ்சபஞ்ஞாஸமவக்³க³வண்ணனா ஸமத்தா.
Pañcapaññāsamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. சூளஸுக³ந்த⁴த்தே²ரஅபதா³னங் • 10. Cūḷasugandhattheraapadānaṃ
