| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. চূল়সুগন্ধত্থেরঅপদানৰণ্ণনা
10. Cūḷasugandhattheraapadānavaṇṇanā
দসমাপদানে ইমম্হি ভদ্দকে কপ্পেতিআদিকং আযস্মতো সুগন্ধত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো কস্সপসম্মাসম্বুদ্ধকালে বারাণসিযং ৰিভৰসম্পন্নে কুলে নিব্বত্তো ৰিঞ্ঞুতং পত্ৰা সত্থু সন্তিকে ধম্মং সুত্ৰা সব্বদা নমস্সমানো মহাদানং দদমানো মাসস্স সত্তক্খত্তুং ভগৰতো গন্ধকুটিযা চতুজ্জাতিগন্ধেন ৰিলিম্পেসি। ‘‘মম নিব্বত্তনিব্বত্তট্ঠানে সরীরতো সুগন্ধগন্ধো নিব্বত্ততূ’’তি পত্থনং অকাসি। ভগৰা তং ব্যাকাসি। সো যাৰতাযুকং ঠত্ৰা পুঞ্ঞানি করোন্তো ততো চুতো দেৰলোকে নিব্বত্তো কামাৰচরলোকং সরীরগন্ধেন সুগন্ধং কুরুমানো সুগন্ধদেৰপুত্তোতি পাকটো অহোসি। সো দেৰলোকসম্পত্তিযো অনুভৰিত্ৰা ততো চুতো ইমস্মিং বুদ্ধুপ্পাদে মহাভোগকুলে নিব্বত্তি, তস্স মাতুকুচ্ছিগতস্সেৰ মাতুযা সরীরগন্ধেন সকলগেহং সকলনগরঞ্চ সুগন্ধেন একগন্ধং অহোসি, জাতক্খণে সকলং সাৰত্থিনগরং সুগন্ধকরণ্ডকো ৰিয অহোসি, তেনস্স সুগন্ধোতি নামং করিংসু। সো ৰুদ্ধিং অগমাসি। তদা সত্থা সাৰত্থিযং পত্ৰা জেতৰনমহাৰিহারং পটিগ্গহেসি, তং দিস্ৰা পসন্নমানসো ভগৰতো সন্তিকে পব্বজিত্ৰা নচিরস্সেৰ সহ পটিসম্ভিদাহি অরহত্তং পাপুণি। তস্স উপ্পন্নদিৰসতো পট্ঠায যাৰ পরিনিব্বানা এত্থন্তরে নিপন্নট্ঠানাদীসু সুগন্ধমেৰ ৰাযি। দেৰাপি দিব্বচুণ্ণদিব্বগন্ধপুপ্ফানি ওকিরন্তি।
Dasamāpadāne imamhi bhaddake kappetiādikaṃ āyasmato sugandhattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto kassapasammāsambuddhakāle bārāṇasiyaṃ vibhavasampanne kule nibbatto viññutaṃ patvā satthu santike dhammaṃ sutvā sabbadā namassamāno mahādānaṃ dadamāno māsassa sattakkhattuṃ bhagavato gandhakuṭiyā catujjātigandhena vilimpesi. ‘‘Mama nibbattanibbattaṭṭhāne sarīrato sugandhagandho nibbattatū’’ti patthanaṃ akāsi. Bhagavā taṃ byākāsi. So yāvatāyukaṃ ṭhatvā puññāni karonto tato cuto devaloke nibbatto kāmāvacaralokaṃ sarīragandhena sugandhaṃ kurumāno sugandhadevaputtoti pākaṭo ahosi. So devalokasampattiyo anubhavitvā tato cuto imasmiṃ buddhuppāde mahābhogakule nibbatti, tassa mātukucchigatasseva mātuyā sarīragandhena sakalagehaṃ sakalanagarañca sugandhena ekagandhaṃ ahosi, jātakkhaṇe sakalaṃ sāvatthinagaraṃ sugandhakaraṇḍako viya ahosi, tenassa sugandhoti nāmaṃ kariṃsu. So vuddhiṃ agamāsi. Tadā satthā sāvatthiyaṃ patvā jetavanamahāvihāraṃ paṭiggahesi, taṃ disvā pasannamānaso bhagavato santike pabbajitvā nacirasseva saha paṭisambhidāhi arahattaṃ pāpuṇi. Tassa uppannadivasato paṭṭhāya yāva parinibbānā etthantare nipannaṭṭhānādīsu sugandhameva vāyi. Devāpi dibbacuṇṇadibbagandhapupphāni okiranti.
২৭২. সোপি থেরো অরহত্তং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ইমম্হি ভদ্দকে কপ্পেতিআদিমাহ। তং সব্বং হেট্ঠা ৰুত্তনযত্তা উত্তানত্থত্তা চ সুৰিঞ্ঞেয্যমেৰ, কেৰলং পুঞ্ঞনানত্তং নামনানত্তঞ্চ ৰিসেসো।
272. Sopi thero arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento imamhi bhaddake kappetiādimāha. Taṃ sabbaṃ heṭṭhā vuttanayattā uttānatthattā ca suviññeyyameva, kevalaṃ puññanānattaṃ nāmanānattañca viseso.
চূল়সুগন্ধত্থেরঅপদানৰণ্ণনা সমত্তা।
Cūḷasugandhattheraapadānavaṇṇanā samattā.
পঞ্চপঞ্ঞাসমৰগ্গৰণ্ণনা সমত্তা।
Pañcapaññāsamavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. চূল়সুগন্ধত্থেরঅপদানং • 10. Cūḷasugandhattheraapadānaṃ
