| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. ஸுஞ்ஞதவக்³கோ³
3. Suññatavaggo
1. சூளஸுஞ்ஞதஸுத்தவண்ணனா
1. Cūḷasuññatasuttavaṇṇanā
176. காலபரிச்சே²த³ங் கத்வாதி ஸமாபஜ்ஜந்தேஹி நாம காலபரிச்சே²தோ³ காதப்³போ³. தே²ரோ பன ப⁴க³வதோ வத்தகரணத்த²ங் காலபரிச்சே²த³ங் கரோதி, ‘‘எத்தகே காலே வீதிவத்தே இத³ங் நாம ப⁴க³வதோ காதப்³ப³’’ந்தி. ஸோ தத்த²கங்யேவ ஸமாபத்திங் ஸமாபஜ்ஜித்வா வுட்டா²தி, தங் ஸந்தா⁴ய வுத்தங் ‘‘காலபரிச்சே²த³ங் கத்வா’’தி. ஸுஞ்ஞதாப²லஸமாபத்திங் அப்பெத்வாதி ஏதேன இதரே, ‘‘ந ஸோதாபன்னஸகதா³கா³மீ ப²லஸமாபத்திங் ஸமாபஜ்ஜந்தீ’’தி வத³ந்தி, தங் வாத³ங் படிஸேதே⁴தி. ஸுஞ்ஞதோதி அத்தஸுஞ்ஞதோ ச நிச்சஸுஞ்ஞதோ ச ஸங்கா²ரா உபட்ட²ஹிங்ஸு. ஸெக்கா²னஞ்ஹி ஸுஞ்ஞதாபடிவேதோ⁴ பாதே³ஸிகோ ஸுப⁴ஸுக²ஸஞ்ஞானங் அப்பஹீனத்தா, தஸ்மா ஸோ தே²ரோ ஸுஞ்ஞதாகத²ங் ஸோதுகாமோ ஜாதோ. து⁴ரேன து⁴ரங் பஹரந்தேன வியாதி ரத²து⁴ரேன ரத²து⁴ரங் பஹரந்தேன விய கத்வா உஜுகமேவ ஸுஞ்ஞதா…பே॰… வத்து²ங் ந ஸக்காதி யோஜனா. ஏகங் பத³ந்தி ஏகங் ஸுஞ்ஞதாபத³ங்.
176.Kālaparicchedaṃkatvāti samāpajjantehi nāma kālaparicchedo kātabbo. Thero pana bhagavato vattakaraṇatthaṃ kālaparicchedaṃ karoti, ‘‘ettake kāle vītivatte idaṃ nāma bhagavato kātabba’’nti. So tatthakaṃyeva samāpattiṃ samāpajjitvā vuṭṭhāti, taṃ sandhāya vuttaṃ ‘‘kālaparicchedaṃ katvā’’ti. Suññatāphalasamāpattiṃ appetvāti etena itare, ‘‘na sotāpannasakadāgāmī phalasamāpattiṃ samāpajjantī’’ti vadanti, taṃ vādaṃ paṭisedheti. Suññatoti attasuññato ca niccasuññato ca saṅkhārā upaṭṭhahiṃsu. Sekkhānañhi suññatāpaṭivedho pādesiko subhasukhasaññānaṃ appahīnattā, tasmā so thero suññatākathaṃ sotukāmo jāto. Dhurena dhuraṃ paharantena viyāti rathadhurena rathadhuraṃ paharantena viya katvā ujukameva suññatā…pe… vatthuṃ na sakkāti yojanā. Ekaṃ padanti ekaṃ suññatāpadaṃ.
புப்³பே³பாஹந்திஆதி³னா ப⁴க³வா பட²மபோ³தி⁴யம்பி அத்தனோ ஸுஞ்ஞதாவிஹாரபா³ஹுல்லங் பகாஸேதீதி த³ஸ்ஸெந்தோ ‘‘பட²மபோ³தி⁴யம்பீ’’தி ஆஹ. ஏகோதிஆதி³ தே²ரஸ்ஸ ஸுஞ்ஞதாகதா²ய பா⁴ஜனபா⁴வத³ஸ்ஸனத்த²ங். ஸோதுந்தி அட்டி²ங் கத்வா மனஸி கத்வா ஸப்³ப³சேதஸா ஸமன்னாஹரித்வா ஸோதும்பி. உக்³க³ஹேதும்பிதி யதா²பூ⁴தங் த⁴ம்மங் தா⁴ரணபரிபுச்சா²பரிசயவஸேன ஹத³யேன உக்³க³ஹிதங் ஸுவண்ணபா⁴ஜனே பக்கி²த்தஸீஹவஸா விய அவினட்டே² காதும்பி. கதே²தும்பீதி வித்தா²ரேன பரேஸங் த³ஸ்ஸேதும்பி ஸக்கா. தத்தா²தி மிகா³ரமாதுபாஸாதே³. கட்ட²ரூபபொத்த²கரூபசித்தரூபவஸேன கதாதி த²ம்பா⁴தீ³ஸு உத்திரித்வா கதானங் கட்ட²ரூபானங், நிய்யூஹாதீ³ஸு படிமாவஸேன ரசிதானங் பொத்த²கரூபானங், ஸித்திபஸ்ஸே சித்தகம்மவஸேன விரசிதானங் சித்தரூபானஞ்ச கதா நிட்ட²பிதா. வெஸ்ஸவணமந்தா⁴தாதீ³னந்தி படிமாரூபேன கதானங் வெஸ்ஸவணமந்தா⁴துஸக்காதீ³னங். சித்தகம்மவஸேனாதி ஆராமாதி³சித்தகம்மவஸேன. ஸண்டி²தம்பீதி அவயவபா⁴வேன ஸண்டி²தங் ஹுத்வா டி²தம்பி. ஜிண்ணபடிஸங்க²ரணத்த²ந்தி ஜிண்ணானங் நிய்யூஹகூடாகா³ரபாஸாதா³வயவானங் அபி⁴ஸங்க²ரணத்தா²ய தஸ்மிங் தஸ்மிங் டா²னே ரஹஸ்ஸஸஞ்ஞாணேன ட²பிதங். ‘‘பரிபு⁴ஞ்ஜிஸ்ஸாமீ’’தி தஸ்மிங் தஸ்மிங் கிச்சே வினியுஞ்ஜனவஸேன பரிபு⁴ஞ்ஜிதப்³ப³ஸ்ஸ. ஏதங் வுத்தந்தி, ‘‘அயங் மிகா³ரமாதுபாஸாதோ³ ஸுஞ்ஞோ’’திஆதி³கங் வுத்தங்.
Pubbepāhantiādinā bhagavā paṭhamabodhiyampi attano suññatāvihārabāhullaṃ pakāsetīti dassento ‘‘paṭhamabodhiyampī’’ti āha. Ekotiādi therassa suññatākathāya bhājanabhāvadassanatthaṃ. Sotunti aṭṭhiṃ katvā manasi katvā sabbacetasā samannāharitvā sotumpi. Uggahetumpiti yathābhūtaṃ dhammaṃ dhāraṇaparipucchāparicayavasena hadayena uggahitaṃ suvaṇṇabhājane pakkhittasīhavasā viya avinaṭṭhe kātumpi. Kathetumpīti vitthārena paresaṃ dassetumpi sakkā. Tatthāti migāramātupāsāde. Kaṭṭharūpapotthakarūpacittarūpavasena katāti thambhādīsu uttiritvā katānaṃ kaṭṭharūpānaṃ, niyyūhādīsu paṭimāvasena racitānaṃ potthakarūpānaṃ, sittipasse cittakammavasena viracitānaṃ cittarūpānañca katā niṭṭhapitā. Vessavaṇamandhātādīnanti paṭimārūpena katānaṃ vessavaṇamandhātusakkādīnaṃ. Cittakammavasenāti ārāmādicittakammavasena. Saṇṭhitampīti avayavabhāvena saṇṭhitaṃ hutvā ṭhitampi. Jiṇṇapaṭisaṅkharaṇatthanti jiṇṇānaṃ niyyūhakūṭāgārapāsādāvayavānaṃ abhisaṅkharaṇatthāya tasmiṃ tasmiṃ ṭhāne rahassasaññāṇena ṭhapitaṃ. ‘‘Paribhuñjissāmī’’ti tasmiṃ tasmiṃ kicce viniyuñjanavasena paribhuñjitabbassa. Etaṃ vuttanti, ‘‘ayaṃ migāramātupāsādo suñño’’tiādikaṃ vuttaṃ.
நிச்சந்தி ஸப்³ப³காலங் ரத்திஞ்ச தி³வா ச. ஏகபா⁴வங் ஏகங் அஸுஞ்ஞதந்தி பச்சத்தே உபயோக³வசனங், ஏகத்தங் ஏகோ அஸுஞ்ஞதோதி அத்தோ². கா³மோதி பவத்தனவஸேனாதி கே³ஹஸன்னிவேஸவீதி²சச்சரஸிங்கா⁴டகாதி³கே உபாதா³ய கா³மோதி லோகுப்பத்திவஸேன. கிலேஸவஸேனாதி தத்த² அனுனயபடிக⁴வஸேன. ஏஸேவ நயோதி இமினா ‘‘பவத்தவஸேன வா கிலேஸவஸேன வா உப்பன்னங் மனுஸ்ஸஸஞ்ஞ’’ந்தி இமமத்த²ங் அதிதி³ஸதி. எத்த² ச யதா² கா³மக்³க³ஹணேன க⁴ராதி³ஸஞ்ஞா ஸங்க³ஹிதா, ஏவங் மனுஸ்ஸக்³க³ஹணேன இத்தி²புரிஸாதி³ஸஞ்ஞா ஸங்க³ஹிதா. யஸ்மா ருக்கா²தி³கே படிச்ச அரஞ்ஞஸஞ்ஞா தத்த² பப்³ப³தவனஸண்டா³த³யோ அந்தோக³தா⁴, தஸ்மா தத்த² விஜ்ஜமானம்பி தங் விபா⁴க³ங் அக்³க³ஹெத்வா ஏகங் அரஞ்ஞங்யேவ படிச்ச அரஞ்ஞஸஞ்ஞங் மனஸி கரோதி. ஓதரதீதி அனுப்பவிஸதி. அதி⁴முச்சதீதி நிச்சி²னோதி. பவத்தத³ரதா²தி ததா²ரூபாய பஸ்ஸத்³தி⁴யா அபா⁴வதோ ஓளாரிகத⁴ம்மப்பவத்திஸித்³தா⁴ த³ரதா². கிலேஸத³ரதா²தி அனுனயபடிக⁴ஸம்ப⁴வா கிலேஸத³ரதா². து³தியபதே³தி ‘‘யே அஸ்ஸு த³ரதா² மனுஸ்ஸஸஞ்ஞங் படிச்சா’’தி இமஸ்மிங் பதே³. மனஸிகாரஸந்ததாய, – ‘‘நாயங் புப்³பே³ விய ஓளாரிகா, த⁴ம்மப்பவத்தீ’’தி ஸங்கா²ரத³ஸ்ஸனத³ரதா²னங் ஸுகு²மதா ஸல்லஹுகதா ச சரிதத்தா²தி ஆஹ ‘‘பவத்தத³ரத²மத்தா அத்தீ²’’தி.
Niccanti sabbakālaṃ rattiñca divā ca. Ekabhāvaṃ ekaṃ asuññatanti paccatte upayogavacanaṃ, ekattaṃ eko asuññatoti attho. Gāmoti pavattanavasenāti gehasannivesavīthicaccarasiṅghāṭakādike upādāya gāmoti lokuppattivasena. Kilesavasenāti tattha anunayapaṭighavasena. Eseva nayoti iminā ‘‘pavattavasena vā kilesavasena vā uppannaṃ manussasañña’’nti imamatthaṃ atidisati. Ettha ca yathā gāmaggahaṇena gharādisaññā saṅgahitā, evaṃ manussaggahaṇena itthipurisādisaññā saṅgahitā. Yasmā rukkhādike paṭicca araññasaññā tattha pabbatavanasaṇḍādayo antogadhā, tasmā tattha vijjamānampi taṃ vibhāgaṃ aggahetvā ekaṃ araññaṃyeva paṭicca araññasaññaṃ manasi karoti. Otaratīti anuppavisati. Adhimuccatīti nicchinoti. Pavattadarathāti tathārūpāya passaddhiyā abhāvato oḷārikadhammappavattisiddhā darathā. Kilesadarathāti anunayapaṭighasambhavā kilesadarathā. Dutiyapadeti ‘‘ye assu darathā manussasaññaṃ paṭiccā’’ti imasmiṃ pade. Manasikārasantatāya, – ‘‘nāyaṃ pubbe viya oḷārikā, dhammappavattī’’ti saṅkhāradassanadarathānaṃ sukhumatā sallahukatā ca caritatthāti āha ‘‘pavattadarathamattā atthī’’ti.
யங் கிலேஸத³ரத²ஜாதங், தங் இமிஸ்ஸா த³ரத²ஸஞ்ஞாய ந ஹோதீதி யோஜனா. பவத்தத³ரத²மத்தங் அவஸிட்ட²ங் ஹோதி, விஜ்ஜமானமேவ அத்தி² இத³ந்தி பஜானாதீதி யோஜனா. ஸுஞ்ஞதா நிப்³ப³த்தீதி ஸுஞ்ஞதந்தி பவத்தி. ஸுஞ்ஞதா ஸஹசரிதஞ்ஹி ஸுஞ்ஞங், இத⁴ ஸுஞ்ஞதாதி வுத்தா.
Yaṃ kilesadarathajātaṃ, taṃ imissā darathasaññāya na hotīti yojanā. Pavattadarathamattaṃ avasiṭṭhaṃ hoti, vijjamānameva atthi idanti pajānātīti yojanā. Suññatā nibbattīti suññatanti pavatti. Suññatā sahacaritañhi suññaṃ, idha suññatāti vuttā.
177. அஸ்ஸாதி ப⁴க³வதோ ஏவங் இதா³னி வுச்சமானாகாரேன சித்தப்பவத்தி அஹோஸி. அச்சந்தஸுஞ்ஞதந்தி ‘‘பரமானுத்தர’’ந்தி வுத்தங் அரஹத்தங் தே³ஸெஸ்ஸாமீதி. அரஞ்ஞஸஞ்ஞாய விஸேஸானதி⁴க³மனதோதி, ‘‘அரஞ்ஞங் அரஞ்ஞ’’ந்தி மனஸிகாரேன ஜா²னாதி³விஸேஸஸ்ஸ அதி⁴க³மாபா⁴வதோ, ‘‘பத²வீ’’தி மனஸிகாரேன விஸேஸாதி⁴க³மனதோ. இதா³னி தமேவத்த²ங் உபமாய விபா⁴வேதுங் ‘‘யதா² ஹீ’’திஆதி³ வுத்தங். ஏவங் ஸந்தேதி ஏவங் வபிதே ஸாலிஆத³யோ ஸம்பஜ்ஜந்தி. து⁴வஸேவனந்தி நியதஸேவனங் பாரிஹாரியகம்மட்டா²னங். படிச்சாதி எத்த² ‘‘ஸம்பூ⁴த’’ந்தி வசனஸேஸோ இச்சி²தோதி ஆஹ ‘‘படிச்ச ஸம்பூ⁴த’’ந்தி. பத²விங் படிச்ச ஸம்பூ⁴தா ஹி ஸஞ்ஞாதி.
177.Assāti bhagavato evaṃ idāni vuccamānākārena cittappavatti ahosi. Accantasuññatanti ‘‘paramānuttara’’nti vuttaṃ arahattaṃ desessāmīti. Araññasaññāya visesānadhigamanatoti, ‘‘araññaṃ arañña’’nti manasikārena jhānādivisesassa adhigamābhāvato, ‘‘pathavī’’ti manasikārena visesādhigamanato. Idāni tamevatthaṃ upamāya vibhāvetuṃ ‘‘yathā hī’’tiādi vuttaṃ. Evaṃ santeti evaṃ vapite sāliādayo sampajjanti. Dhuvasevananti niyatasevanaṃ pārihāriyakammaṭṭhānaṃ. Paṭiccāti ettha ‘‘sambhūta’’nti vacanaseso icchitoti āha ‘‘paṭicca sambhūta’’nti. Pathaviṃ paṭicca sambhūtā hi saññāti.
பத²வீகஸிணே ஸோ பத²வீஸஞ்ஞீ ஹோதி, ந பகதிபத²வியங். தஸ்ஸாதி பத²வீகஸிணஸ்ஸ. தேஹீதி க³ண்டா³தீ³ஹி. ஸுட்டு² விஹதந்தி யதா² வலீனங் லேஸோபி ந ஹோதி, ஏவங் ஸம்மதே³வ ஆகோடிதங். நதீ³தளாகாதீ³னங் தீரப்பதே³ஸோ உத³கஸ்ஸ ஆகரட்டே²ன கூலங், உன்னதபா⁴வதோ உக்³க³தங் கூலங் வியாதி உக்கூலங், பூ⁴மியா உச்சட்டா²னங். விக³தங் கூலந்தி விக்கூலங், நீசட்டா²னங். தேனாஹ ‘‘உச்சனீச’’ந்தி. ஏகங் ஸஞ்ஞந்தி ஏகங் பத²வீதிஸஞ்ஞங்யேவ.
Pathavīkasiṇeso pathavīsaññī hoti, na pakatipathaviyaṃ. Tassāti pathavīkasiṇassa. Tehīti gaṇḍādīhi. Suṭṭhu vihatanti yathā valīnaṃ lesopi na hoti, evaṃ sammadeva ākoṭitaṃ. Nadītaḷākādīnaṃ tīrappadeso udakassa ākaraṭṭhena kūlaṃ, unnatabhāvato uggataṃ kūlaṃ viyāti ukkūlaṃ, bhūmiyā uccaṭṭhānaṃ. Vigataṃ kūlanti vikkūlaṃ, nīcaṭṭhānaṃ. Tenāha ‘‘uccanīca’’nti. Ekaṃ saññanti ekaṃ pathavītisaññaṃyeva.
182. ஸதிபி ஸங்கா²ரனிமித்தவிரஹே யாதி³ஸானங் நிமித்தானங் அபா⁴வேன ‘‘அனிமித்த’’ந்தி வுச்சதி, தானி த³ஸ்ஸேதுங், ‘‘நிச்சனிமித்தாதி³விரஹிதோ’’தி வுத்தங். சதுமஹாபூ⁴திகங் சதுமஹாபூ⁴தனிஸ்ஸிதங். ஸளாயதனபடிஸங்யுத்தங் சக்கா²யதனாதி³ஸளாயதனஸஹிதங்.
182. Satipi saṅkhāranimittavirahe yādisānaṃ nimittānaṃ abhāvena ‘‘animitta’’nti vuccati, tāni dassetuṃ, ‘‘niccanimittādivirahito’’ti vuttaṃ. Catumahābhūtikaṃ catumahābhūtanissitaṃ. Saḷāyatanapaṭisaṃyuttaṃ cakkhāyatanādisaḷāyatanasahitaṃ.
183. விபஸ்ஸனாய படிவிபஸ்ஸனந்தி த⁴ம்மானஞ்ச புன விபஸ்ஸனங். இதா⁴தி அத்தனோ பச்சக்க²பூ⁴தயதா²தி⁴க³தமக்³க³ப²லங் வத³தீதி ஆஹ – ‘‘அரியமக்³கே³ சேவ அரியப²லே சா’’தி. உபாதி³ஸேஸத³ரத²த³ஸ்ஸனத்த²ந்தி ஸப்³ப³ஸோ கிலேஸுபதி⁴யா பஹீனாய க²ந்தோ⁴பதி⁴ அவிஸிட்டா², தப்பச்சயா த³ரதா² உபாதி³ஸேஸத³ரதா², தங் த³ஸ்ஸனத்த²ங். யஸ்மா விஸயதோ கா³மஸஞ்ஞா ஓளாரிகா, மனுஸ்ஸஸஞ்ஞா ஸுகு²மா, தஸ்மா மனுஸ்ஸஸஞ்ஞாய கா³மஸஞ்ஞங் நிவத்தெத்வா. யஸ்மா பன மனுஸ்ஸஸஞ்ஞாபி ஸபா⁴க³வத்து²பரிக்³க³ஹதோ ஓளாரிகா, ஸபா⁴க³வத்து²தோ அரஞ்ஞஸஞ்ஞா ஸுகு²மா, தஸ்மா அரஞ்ஞஸஞ்ஞாய மனுஸ்ஸஸஞ்ஞங் நிவத்தெத்வா. பத²வீஸஞ்ஞாதி³னிவத்தனே காரணங் ஹெட்டா² ஸுத்தந்தரேஸு ச வுத்தமேவ. அனுபுப்³பே³னாதி மக்³க³ப்படிபாடியா. நிச்சஸாராதீ³னங் ஸப்³ப³ஸோ அவத்து²தாய அச்சந்தமேவ ஸுஞ்ஞத்தா அச்சந்தஸுஞ்ஞதா.
183.Vipassanāya paṭivipassananti dhammānañca puna vipassanaṃ. Idhāti attano paccakkhabhūtayathādhigatamaggaphalaṃ vadatīti āha – ‘‘ariyamagge ceva ariyaphale cā’’ti. Upādisesadarathadassanatthanti sabbaso kilesupadhiyā pahīnāya khandhopadhi avisiṭṭhā, tappaccayā darathā upādisesadarathā, taṃ dassanatthaṃ. Yasmā visayato gāmasaññā oḷārikā, manussasaññā sukhumā, tasmā manussasaññāya gāmasaññaṃ nivattetvā. Yasmā pana manussasaññāpi sabhāgavatthupariggahato oḷārikā, sabhāgavatthuto araññasaññā sukhumā, tasmā araññasaññāya manussasaññaṃ nivattetvā. Pathavīsaññādinivattane kāraṇaṃ heṭṭhā suttantaresu ca vuttameva. Anupubbenāti maggappaṭipāṭiyā. Niccasārādīnaṃ sabbaso avatthutāya accantameva suññattā accantasuññatā.
184. ஸுஞ்ஞதப²லஸமாபத்திந்தி ஸுஞ்ஞதவிமொக்க²ஸ்ஸ ப²லபூ⁴தத்தா, ஸுஞ்ஞதானுபஸ்ஸனாய வஸேன ஸமாபஜ்ஜிதப்³ப³த்தா ச ஸுஞ்ஞதப²லஸமாபத்திந்தி லத்³த⁴னாமங் அரஹத்தப²லஸமாபத்திங். யஸ்மா அதீதே பச்சேகஸம்பு³த்³தா⁴ அஹேஸுங், அனாக³தே ப⁴விஸ்ஸந்தி, இதா³னி பன பு³த்³த⁴ஸாஸனஸ்ஸ த⁴ரமானத்தா பச்சேகபு³த்³தா⁴ ந வத்தந்தி, தஸ்மா பச்சேகபு³த்³த⁴க்³க³ஹணங் அகத்வா, ‘‘ஏதரஹிபி பு³த்³த⁴பு³த்³த⁴ஸாவகஸங்கா²தா’’இச்சேவ வுத்தங். ந ஹி பு³த்³த⁴ஸாஸனே த⁴ரந்தே பச்சேகபு³த்³தா⁴ ப⁴வந்தி. ஸேஸங் ஸுவிஞ்ஞெய்யமேவ.
184.Suññataphalasamāpattinti suññatavimokkhassa phalabhūtattā, suññatānupassanāya vasena samāpajjitabbattā ca suññataphalasamāpattinti laddhanāmaṃ arahattaphalasamāpattiṃ. Yasmā atīte paccekasambuddhā ahesuṃ, anāgate bhavissanti, idāni pana buddhasāsanassa dharamānattā paccekabuddhā na vattanti, tasmā paccekabuddhaggahaṇaṃ akatvā, ‘‘etarahipi buddhabuddhasāvakasaṅkhātā’’icceva vuttaṃ. Na hi buddhasāsane dharante paccekabuddhā bhavanti. Sesaṃ suviññeyyameva.
சூளஸுஞ்ஞதஸுத்தவண்ணனாய லீனத்த²ப்பகாஸனா ஸமத்தா.
Cūḷasuññatasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. சூளஸுஞ்ஞதஸுத்தங் • 1. Cūḷasuññatasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 1. சூளஸுஞ்ஞதஸுத்தவண்ணனா • 1. Cūḷasuññatasuttavaṇṇanā
