| Library / Tipiṭaka / တိပိဋက • Tipiṭaka / မဇ္ဈိမနိကာယ (ဋီကာ) • Majjhimanikāya (ṭīkā) |
၃. သုညတဝဂ္ဂော
3. Suññatavaggo
၁. စူဠသုညတသုတ္တဝဏ္ဏနာ
1. Cūḷasuññatasuttavaṇṇanā
၁၇၆. ကာလပရိစ္ဆေဒံ ကတ္ဝာတိ သမာပဇ္ဇန္တေဟိ နာမ ကာလပရိစ္ဆေဒော ကာတဗ္ဗော။ ထေရော ပန ဘဂဝတော ဝတ္တကရဏတ္ထံ ကာလပရိစ္ဆေဒံ ကရောတိ, ‘‘ဧတ္တကေ ကာလေ ဝီတိဝတ္တေ ဣဒံ နာမ ဘဂဝတော ကာတဗ္ဗ’’န္တိ။ သော တတ္ထကံယေဝ သမာပတ္တိံ သမာပဇ္ဇိတ္ဝာ ဝုဋ္ဌာတိ, တံ သန္ဓာယ ဝုတ္တံ ‘‘ကာလပရိစ္ဆေဒံ ကတ္ဝာ’’တိ။ သုညတာဖလသမာပတ္တိံ အပ္ပေတ္ဝာတိ ဧတေန ဣတရေ, ‘‘န သောတာပန္နသကဒာဂာမီ ဖလသမာပတ္တိံ သမာပဇ္ဇန္တီ’’တိ ဝဒန္တိ, တံ ဝာဒံ ပဋိသေဓေတိ။ သုညတောတိ အတ္တသုညတော စ နိစ္စသုညတော စ သင္ခာရာ ဥပဋ္ဌဟိံသု။ သေက္ခာနဉ္ဟိ သုညတာပဋိဝေဓော ပာဒေသိကော သုဘသုခသညာနံ အပ္ပဟီနတ္တာ, တသ္မာ သော ထေရော သုညတာကထံ သောတုကာမော ဇာတော။ ဓုရေန ဓုရံ ပဟရန္တေန ဝိယာတိ ရထဓုရေန ရထဓုရံ ပဟရန္တေန ဝိယ ကတ္ဝာ ဥဇုကမေဝ သုညတာ။ပေ.။ ဝတ္ထုံ န သက္ကာတိ ယောဇနာ။ ဧကံ ပဒန္တိ ဧကံ သုညတာပဒံ။
176.Kālaparicchedaṃkatvāti samāpajjantehi nāma kālaparicchedo kātabbo. Thero pana bhagavato vattakaraṇatthaṃ kālaparicchedaṃ karoti, ‘‘ettake kāle vītivatte idaṃ nāma bhagavato kātabba’’nti. So tatthakaṃyeva samāpattiṃ samāpajjitvā vuṭṭhāti, taṃ sandhāya vuttaṃ ‘‘kālaparicchedaṃ katvā’’ti. Suññatāphalasamāpattiṃ appetvāti etena itare, ‘‘na sotāpannasakadāgāmī phalasamāpattiṃ samāpajjantī’’ti vadanti, taṃ vādaṃ paṭisedheti. Suññatoti attasuññato ca niccasuññato ca saṅkhārā upaṭṭhahiṃsu. Sekkhānañhi suññatāpaṭivedho pādesiko subhasukhasaññānaṃ appahīnattā, tasmā so thero suññatākathaṃ sotukāmo jāto. Dhurena dhuraṃ paharantena viyāti rathadhurena rathadhuraṃ paharantena viya katvā ujukameva suññatā…pe… vatthuṃ na sakkāti yojanā. Ekaṃ padanti ekaṃ suññatāpadaṃ.
ပုဗ္ဗေပာဟန္တိအာဒိနာ ဘဂဝာ ပဌမဗောဓိယမ္ပိ အတ္တနော သုညတာဝိဟာရဗာဟုလ္လံ ပကာသေတီတိ ဒသ္သေန္တော ‘‘ပဌမဗောဓိယမ္ပီ’’တိ အာဟ။ ဧကောတိအာဒိ ထေရသ္သ သုညတာကထာယ ဘာဇနဘာဝဒသ္သနတ္ထံ။ သောတုန္တိ အဋ္ဌိံ ကတ္ဝာ မနသိ ကတ္ဝာ သဗ္ဗစေတသာ သမန္နာဟရိတ္ဝာ သောတုမ္ပိ။ ဥဂ္ဂဟေတုမ္ပိတိ ယထာဘူတံ ဓမ္မံ ဓာရဏပရိပုစ္ဆာပရိစယဝသေန ဟဒယေန ဥဂ္ဂဟိတံ သုဝဏ္ဏဘာဇနေ ပက္ခိတ္တသီဟဝသာ ဝိယ အဝိနဋ္ဌေ ကာတုမ္ပိ။ ကထေတုမ္ပီတိ ဝိတ္ထာရေန ပရေသံ ဒသ္သေတုမ္ပိ သက္ကာ။ တတ္ထာတိ မိဂာရမာတုပာသာဒေ။ ကဋ္ဌရူပပောတ္ထကရူပစိတ္တရူပဝသေန ကတာတိ ထမ္ဘာဒီသု ဥတ္တိရိတ္ဝာ ကတာနံ ကဋ္ဌရူပာနံ, နိယ္ယူဟာဒီသု ပဋိမာဝသေန ရစိတာနံ ပောတ္ထကရူပာနံ, သိတ္တိပသ္သေ စိတ္တကမ္မဝသေန ဝိရစိတာနံ စိတ္တရူပာနဉ္စ ကတာ နိဋ္ဌပိတာ။ ဝေသ္သဝဏမန္ဓာတာဒီနန္တိ ပဋိမာရူပေန ကတာနံ ဝေသ္သဝဏမန္ဓာတုသက္ကာဒီနံ။ စိတ္တကမ္မဝသေနာတိ အာရာမာဒိစိတ္တကမ္မဝသေန။ သဏ္ဌိတမ္ပီတိ အဝယဝဘာဝေန သဏ္ဌိတံ ဟုတ္ဝာ ဌိတမ္ပိ။ ဇိဏ္ဏပဋိသင္ခရဏတ္ထန္တိ ဇိဏ္ဏာနံ နိယ္ယူဟကူဋာဂာရပာသာဒာဝယဝာနံ အဘိသင္ခရဏတ္ထာယ တသ္မိံ တသ္မိံ ဌာနေ ရဟသ္သသညာဏေန ဌပိတံ။ ‘‘ပရိဘုဉ္ဇိသ္သာမီ’’တိ တသ္မိံ တသ္မိံ ကိစ္စေ ဝိနိယုဉ္ဇနဝသေန ပရိဘုဉ္ဇိတဗ္ဗသ္သ။ ဧတံ ဝုတ္တန္တိ, ‘‘အယံ မိဂာရမာတုပာသာဒော သုညော’’တိအာဒိကံ ဝုတ္တံ။
Pubbepāhantiādinā bhagavā paṭhamabodhiyampi attano suññatāvihārabāhullaṃ pakāsetīti dassento ‘‘paṭhamabodhiyampī’’ti āha. Ekotiādi therassa suññatākathāya bhājanabhāvadassanatthaṃ. Sotunti aṭṭhiṃ katvā manasi katvā sabbacetasā samannāharitvā sotumpi. Uggahetumpiti yathābhūtaṃ dhammaṃ dhāraṇaparipucchāparicayavasena hadayena uggahitaṃ suvaṇṇabhājane pakkhittasīhavasā viya avinaṭṭhe kātumpi. Kathetumpīti vitthārena paresaṃ dassetumpi sakkā. Tatthāti migāramātupāsāde. Kaṭṭharūpapotthakarūpacittarūpavasena katāti thambhādīsu uttiritvā katānaṃ kaṭṭharūpānaṃ, niyyūhādīsu paṭimāvasena racitānaṃ potthakarūpānaṃ, sittipasse cittakammavasena viracitānaṃ cittarūpānañca katā niṭṭhapitā. Vessavaṇamandhātādīnanti paṭimārūpena katānaṃ vessavaṇamandhātusakkādīnaṃ. Cittakammavasenāti ārāmādicittakammavasena. Saṇṭhitampīti avayavabhāvena saṇṭhitaṃ hutvā ṭhitampi. Jiṇṇapaṭisaṅkharaṇatthanti jiṇṇānaṃ niyyūhakūṭāgārapāsādāvayavānaṃ abhisaṅkharaṇatthāya tasmiṃ tasmiṃ ṭhāne rahassasaññāṇena ṭhapitaṃ. ‘‘Paribhuñjissāmī’’ti tasmiṃ tasmiṃ kicce viniyuñjanavasena paribhuñjitabbassa. Etaṃ vuttanti, ‘‘ayaṃ migāramātupāsādo suñño’’tiādikaṃ vuttaṃ.
နိစ္စန္တိ သဗ္ဗကာလံ ရတ္တိဉ္စ ဒိဝာ စ။ ဧကဘာဝံ ဧကံ အသုညတန္တိ ပစ္စတ္တေ ဥပယောဂဝစနံ, ဧကတ္တံ ဧကော အသုညတောတိ အတ္ထော။ ဂာမောတိ ပဝတ္တနဝသေနာတိ ဂေဟသန္နိဝေသဝီထိစစ္စရသိင္ဃာဋကာဒိကေ ဥပာဒာယ ဂာမောတိ လောကုပ္ပတ္တိဝသေန။ ကိလေသဝသေနာတိ တတ္ထ အနုနယပဋိဃဝသေန။ ဧသေဝ နယောတိ ဣမိနာ ‘‘ပဝတ္တဝသေန ဝာ ကိလေသဝသေန ဝာ ဥပ္ပန္နံ မနုသ္သသည’’န္တိ ဣမမတ္ထံ အတိဒိသတိ။ ဧတ္ထ စ ယထာ ဂာမဂ္ဂဟဏေန ဃရာဒိသညာ သင္ဂဟိတာ, ဧဝံ မနုသ္သဂ္ဂဟဏေန ဣတ္ထိပုရိသာဒိသညာ သင္ဂဟိတာ။ ယသ္မာ ရုက္ခာဒိကေ ပဋိစ္စ အရညသညာ တတ္ထ ပဗ္ဗတဝနသဏ္ဍာဒယော အန္တောဂဓာ, တသ္မာ တတ္ထ ဝိဇ္ဇမာနမ္ပိ တံ ဝိဘာဂံ အဂ္ဂဟေတ္ဝာ ဧကံ အရညံယေဝ ပဋိစ္စ အရညသညံ မနသိ ကရောတိ။ ဩတရတီတိ အနုပ္ပဝိသတိ။ အဓိမုစ္စတီတိ နိစ္ဆိနောတိ။ ပဝတ္တဒရထာတိ တထာရူပာယ ပသ္သဒ္ဓိယာ အဘာဝတော ဩဠာရိကဓမ္မပ္ပဝတ္တိသိဒ္ဓာ ဒရထာ။ ကိလေသဒရထာတိ အနုနယပဋိဃသမ္ဘဝာ ကိလေသဒရထာ။ ဒုတိယပဒေတိ ‘‘ယေ အသ္သု ဒရထာ မနုသ္သသညံ ပဋိစ္စာ’’တိ ဣမသ္မိံ ပဒေ။ မနသိကာရသန္တတာယ, – ‘‘နာယံ ပုဗ္ဗေ ဝိယ ဩဠာရိကာ, ဓမ္မပ္ပဝတ္တီ’’တိ သင္ခာရဒသ္သနဒရထာနံ သုခုမတာ သလ္လဟုကတာ စ စရိတတ္ထာတိ အာဟ ‘‘ပဝတ္တဒရထမတ္တာ အတ္ထီ’’တိ။
Niccanti sabbakālaṃ rattiñca divā ca. Ekabhāvaṃ ekaṃ asuññatanti paccatte upayogavacanaṃ, ekattaṃ eko asuññatoti attho. Gāmoti pavattanavasenāti gehasannivesavīthicaccarasiṅghāṭakādike upādāya gāmoti lokuppattivasena. Kilesavasenāti tattha anunayapaṭighavasena. Eseva nayoti iminā ‘‘pavattavasena vā kilesavasena vā uppannaṃ manussasañña’’nti imamatthaṃ atidisati. Ettha ca yathā gāmaggahaṇena gharādisaññā saṅgahitā, evaṃ manussaggahaṇena itthipurisādisaññā saṅgahitā. Yasmā rukkhādike paṭicca araññasaññā tattha pabbatavanasaṇḍādayo antogadhā, tasmā tattha vijjamānampi taṃ vibhāgaṃ aggahetvā ekaṃ araññaṃyeva paṭicca araññasaññaṃ manasi karoti. Otaratīti anuppavisati. Adhimuccatīti nicchinoti. Pavattadarathāti tathārūpāya passaddhiyā abhāvato oḷārikadhammappavattisiddhā darathā. Kilesadarathāti anunayapaṭighasambhavā kilesadarathā. Dutiyapadeti ‘‘ye assu darathā manussasaññaṃ paṭiccā’’ti imasmiṃ pade. Manasikārasantatāya, – ‘‘nāyaṃ pubbe viya oḷārikā, dhammappavattī’’ti saṅkhāradassanadarathānaṃ sukhumatā sallahukatā ca caritatthāti āha ‘‘pavattadarathamattā atthī’’ti.
ယံ ကိလေသဒရထဇာတံ, တံ ဣမိသ္သာ ဒရထသညာယ န ဟောတီတိ ယောဇနာ။ ပဝတ္တဒရထမတ္တံ အဝသိဋ္ဌံ ဟောတိ, ဝိဇ္ဇမာနမေဝ အတ္ထိ ဣဒန္တိ ပဇာနာတီတိ ယောဇနာ။ သုညတာ နိဗ္ဗတ္တီတိ သုညတန္တိ ပဝတ္တိ။ သုညတာ သဟစရိတဉ္ဟိ သုညံ, ဣဓ သုညတာတိ ဝုတ္တာ။
Yaṃ kilesadarathajātaṃ, taṃ imissā darathasaññāya na hotīti yojanā. Pavattadarathamattaṃ avasiṭṭhaṃ hoti, vijjamānameva atthi idanti pajānātīti yojanā. Suññatā nibbattīti suññatanti pavatti. Suññatā sahacaritañhi suññaṃ, idha suññatāti vuttā.
၁၇၇. အသ္သာတိ ဘဂဝတော ဧဝံ ဣဒာနိ ဝုစ္စမာနာကာရေန စိတ္တပ္ပဝတ္တိ အဟောသိ။ အစ္စန္တသုညတန္တိ ‘‘ပရမာနုတ္တရ’’န္တိ ဝုတ္တံ အရဟတ္တံ ဒေသေသ္သာမီတိ။ အရညသညာယ ဝိသေသာနဓိဂမနတောတိ, ‘‘အရညံ အရည’’န္တိ မနသိကာရေန ဈာနာဒိဝိသေသသ္သ အဓိဂမာဘာဝတော, ‘‘ပထဝီ’’တိ မနသိကာရေန ဝိသေသာဓိဂမနတော။ ဣဒာနိ တမေဝတ္ထံ ဥပမာယ ဝိဘာဝေတုံ ‘‘ယထာ ဟီ’’တိအာဒိ ဝုတ္တံ။ ဧဝံ သန္တေတိ ဧဝံ ဝပိတေ သာလိအာဒယော သမ္ပဇ္ဇန္တိ။ ဓုဝသေဝနန္တိ နိယတသေဝနံ ပာရိဟာရိယကမ္မဋ္ဌာနံ။ ပဋိစ္စာတိ ဧတ္ထ ‘‘သမ္ဘူတ’’န္တိ ဝစနသေသော ဣစ္ဆိတောတိ အာဟ ‘‘ပဋိစ္စ သမ္ဘူတ’’န္တိ။ ပထဝိံ ပဋိစ္စ သမ္ဘူတာ ဟိ သညာတိ။
177.Assāti bhagavato evaṃ idāni vuccamānākārena cittappavatti ahosi. Accantasuññatanti ‘‘paramānuttara’’nti vuttaṃ arahattaṃ desessāmīti. Araññasaññāya visesānadhigamanatoti, ‘‘araññaṃ arañña’’nti manasikārena jhānādivisesassa adhigamābhāvato, ‘‘pathavī’’ti manasikārena visesādhigamanato. Idāni tamevatthaṃ upamāya vibhāvetuṃ ‘‘yathā hī’’tiādi vuttaṃ. Evaṃ santeti evaṃ vapite sāliādayo sampajjanti. Dhuvasevananti niyatasevanaṃ pārihāriyakammaṭṭhānaṃ. Paṭiccāti ettha ‘‘sambhūta’’nti vacanaseso icchitoti āha ‘‘paṭicca sambhūta’’nti. Pathaviṃ paṭicca sambhūtā hi saññāti.
ပထဝီကသိဏေ သော ပထဝီသညီ ဟောတိ, န ပကတိပထဝိယံ။ တသ္သာတိ ပထဝီကသိဏသ္သ။ တေဟီတိ ဂဏ္ဍာဒီဟိ။ သုဋ္ဌု ဝိဟတန္တိ ယထာ ဝလီနံ လေသောပိ န ဟောတိ, ဧဝံ သမ္မဒေဝ အာကောဋိတံ။ နဒီတဠာကာဒီနံ တီရပ္ပဒေသော ဥဒကသ္သ အာကရဋ္ဌေန ကူလံ, ဥန္နတဘာဝတော ဥဂ္ဂတံ ကူလံ ဝိယာတိ ဥက္ကူလံ, ဘူမိယာ ဥစ္စဋ္ဌာနံ။ ဝိဂတံ ကူလန္တိ ဝိက္ကူလံ, နီစဋ္ဌာနံ။ တေနာဟ ‘‘ဥစ္စနီစ’’န္တိ။ ဧကံ သညန္တိ ဧကံ ပထဝီတိသညံယေဝ။
Pathavīkasiṇeso pathavīsaññī hoti, na pakatipathaviyaṃ. Tassāti pathavīkasiṇassa. Tehīti gaṇḍādīhi. Suṭṭhu vihatanti yathā valīnaṃ lesopi na hoti, evaṃ sammadeva ākoṭitaṃ. Nadītaḷākādīnaṃ tīrappadeso udakassa ākaraṭṭhena kūlaṃ, unnatabhāvato uggataṃ kūlaṃ viyāti ukkūlaṃ, bhūmiyā uccaṭṭhānaṃ. Vigataṃ kūlanti vikkūlaṃ, nīcaṭṭhānaṃ. Tenāha ‘‘uccanīca’’nti. Ekaṃ saññanti ekaṃ pathavītisaññaṃyeva.
၁၈၂. သတိပိ သင္ခာရနိမိတ္တဝိရဟေ ယာဒိသာနံ နိမိတ္တာနံ အဘာဝေန ‘‘အနိမိတ္တ’’န္တိ ဝုစ္စတိ, တာနိ ဒသ္သေတုံ, ‘‘နိစ္စနိမိတ္တာဒိဝိရဟိတော’’တိ ဝုတ္တံ။ စတုမဟာဘူတိကံ စတုမဟာဘူတနိသ္သိတံ။ သဠာယတနပဋိသံယုတ္တံ စက္ခာယတနာဒိသဠာယတနသဟိတံ။
182. Satipi saṅkhāranimittavirahe yādisānaṃ nimittānaṃ abhāvena ‘‘animitta’’nti vuccati, tāni dassetuṃ, ‘‘niccanimittādivirahito’’ti vuttaṃ. Catumahābhūtikaṃ catumahābhūtanissitaṃ. Saḷāyatanapaṭisaṃyuttaṃ cakkhāyatanādisaḷāyatanasahitaṃ.
၁၈၃. ဝိပသ္သနာယ ပဋိဝိပသ္သနန္တိ ဓမ္မာနဉ္စ ပုန ဝိပသ္သနံ။ ဣဓာတိ အတ္တနော ပစ္စက္ခဘူတယထာဓိဂတမဂ္ဂဖလံ ဝဒတီတိ အာဟ – ‘‘အရိယမဂ္ဂေ စေဝ အရိယဖလေ စာ’’တိ။ ဥပာဒိသေသဒရထဒသ္သနတ္ထန္တိ သဗ္ဗသော ကိလေသုပဓိယာ ပဟီနာယ ခန္ဓောပဓိ အဝိသိဋ္ဌာ, တပ္ပစ္စယာ ဒရထာ ဥပာဒိသေသဒရထာ, တံ ဒသ္သနတ္ထံ။ ယသ္မာ ဝိသယတော ဂာမသညာ ဩဠာရိကာ, မနုသ္သသညာ သုခုမာ, တသ္မာ မနုသ္သသညာယ ဂာမသညံ နိဝတ္တေတ္ဝာ။ ယသ္မာ ပန မနုသ္သသညာပိ သဘာဂဝတ္ထုပရိဂ္ဂဟတော ဩဠာရိကာ, သဘာဂဝတ္ထုတော အရညသညာ သုခုမာ, တသ္မာ အရညသညာယ မနုသ္သသညံ နိဝတ္တေတ္ဝာ။ ပထဝီသညာဒိနိဝတ္တနေ ကာရဏံ ဟေဋ္ဌာ သုတ္တန္တရေသု စ ဝုတ္တမေဝ။ အနုပုဗ္ဗေနာတိ မဂ္ဂပ္ပဋိပာဋိယာ။ နိစ္စသာရာဒီနံ သဗ္ဗသော အဝတ္ထုတာယ အစ္စန္တမေဝ သုညတ္တာ အစ္စန္တသုညတာ။
183.Vipassanāya paṭivipassananti dhammānañca puna vipassanaṃ. Idhāti attano paccakkhabhūtayathādhigatamaggaphalaṃ vadatīti āha – ‘‘ariyamagge ceva ariyaphale cā’’ti. Upādisesadarathadassanatthanti sabbaso kilesupadhiyā pahīnāya khandhopadhi avisiṭṭhā, tappaccayā darathā upādisesadarathā, taṃ dassanatthaṃ. Yasmā visayato gāmasaññā oḷārikā, manussasaññā sukhumā, tasmā manussasaññāya gāmasaññaṃ nivattetvā. Yasmā pana manussasaññāpi sabhāgavatthupariggahato oḷārikā, sabhāgavatthuto araññasaññā sukhumā, tasmā araññasaññāya manussasaññaṃ nivattetvā. Pathavīsaññādinivattane kāraṇaṃ heṭṭhā suttantaresu ca vuttameva. Anupubbenāti maggappaṭipāṭiyā. Niccasārādīnaṃ sabbaso avatthutāya accantameva suññattā accantasuññatā.
၁၈၄. သုညတဖလသမာပတ္တိန္တိ သုညတဝိမောက္ခသ္သ ဖလဘူတတ္တာ, သုညတာနုပသ္သနာယ ဝသေန သမာပဇ္ဇိတဗ္ဗတ္တာ စ သုညတဖလသမာပတ္တိန္တိ လဒ္ဓနာမံ အရဟတ္တဖလသမာပတ္တိံ။ ယသ္မာ အတီတေ ပစ္စေကသမ္ဗုဒ္ဓာ အဟေသုံ, အနာဂတေ ဘဝိသ္သန္တိ, ဣဒာနိ ပန ဗုဒ္ဓသာသနသ္သ ဓရမာနတ္တာ ပစ္စေကဗုဒ္ဓာ န ဝတ္တန္တိ, တသ္မာ ပစ္စေကဗုဒ္ဓဂ္ဂဟဏံ အကတ္ဝာ, ‘‘ဧတရဟိပိ ဗုဒ္ဓဗုဒ္ဓသာဝကသင္ခာတာ’’ဣစ္စေဝ ဝုတ္တံ။ န ဟိ ဗုဒ္ဓသာသနေ ဓရန္တေ ပစ္စေကဗုဒ္ဓာ ဘဝန္တိ။ သေသံ သုဝိညေယ္ယမေဝ။
184.Suññataphalasamāpattinti suññatavimokkhassa phalabhūtattā, suññatānupassanāya vasena samāpajjitabbattā ca suññataphalasamāpattinti laddhanāmaṃ arahattaphalasamāpattiṃ. Yasmā atīte paccekasambuddhā ahesuṃ, anāgate bhavissanti, idāni pana buddhasāsanassa dharamānattā paccekabuddhā na vattanti, tasmā paccekabuddhaggahaṇaṃ akatvā, ‘‘etarahipi buddhabuddhasāvakasaṅkhātā’’icceva vuttaṃ. Na hi buddhasāsane dharante paccekabuddhā bhavanti. Sesaṃ suviññeyyameva.
စူဠသုညတသုတ္တဝဏ္ဏနာယ လီနတ္ထပ္ပကာသနာ သမတ္တာ။
Cūḷasuññatasuttavaṇṇanāya līnatthappakāsanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / မဇ္ဈိမနိကာယ • Majjhimanikāya / ၁. စူဠသုညတသုတ္တံ • 1. Cūḷasuññatasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) / ၁. စူဠသုညတသုတ္တဝဏ္ဏနာ • 1. Cūḷasuññatasuttavaṇṇanā
