| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༣. སུཉྙཏཝགྒོ
3. Suññatavaggo
༡. ཙཱུལ༹སུཉྙཏསུཏྟཝཎྞནཱ
1. Cūḷasuññatasuttavaṇṇanā
༡༧༦. ཀཱལཔརིཙྪེདཾ ཀཏྭཱཏི སམཱཔཛྫནྟེཧི ནཱམ ཀཱལཔརིཙྪེདོ ཀཱཏབྦོ། ཐེརོ པན བྷགཝཏོ ཝཏྟཀརཎཏྠཾ ཀཱལཔརིཙྪེདཾ ཀརོཏི, ‘‘ཨེཏྟཀེ ཀཱལེ ཝཱིཏིཝཏྟེ ཨིདཾ ནཱམ བྷགཝཏོ ཀཱཏབྦ’’ནྟི། སོ ཏཏྠཀཾཡེཝ སམཱཔཏྟིཾ སམཱཔཛྫིཏྭཱ ཝུཊྛཱཏི, ཏཾ སནྡྷཱཡ ཝུཏྟཾ ‘‘ཀཱལཔརིཙྪེདཾ ཀཏྭཱ’’ཏི། སུཉྙཏཱཕལསམཱཔཏྟིཾ ཨཔྤེཏྭཱཏི ཨེཏེན ཨིཏརེ, ‘‘ན སོཏཱཔནྣསཀདཱགཱམཱི ཕལསམཱཔཏྟིཾ སམཱཔཛྫནྟཱི’’ཏི ཝདནྟི, ཏཾ ཝཱདཾ པཊིསེདྷེཏི། སུཉྙཏོཏི ཨཏྟསུཉྙཏོ ཙ ནིཙྩསུཉྙཏོ ཙ སངྑཱརཱ ཨུཔཊྛཧིཾསུ། སེཀྑཱནཉྷི སུཉྙཏཱཔཊིཝེདྷོ པཱདེསིཀོ སུབྷསུཁསཉྙཱནཾ ཨཔྤཧཱིནཏྟཱ, ཏསྨཱ སོ ཐེརོ སུཉྙཏཱཀཐཾ སོཏུཀཱམོ ཛཱཏོ། དྷུརེན དྷུརཾ པཧརནྟེན ཝིཡཱཏི རཐདྷུརེན རཐདྷུརཾ པཧརནྟེན ཝིཡ ཀཏྭཱ ཨུཛུཀམེཝ སུཉྙཏཱ…པེ॰… ཝཏྠུཾ ན སཀྐཱཏི ཡོཛནཱ། ཨེཀཾ པདནྟི ཨེཀཾ སུཉྙཏཱཔདཾ།
176.Kālaparicchedaṃkatvāti samāpajjantehi nāma kālaparicchedo kātabbo. Thero pana bhagavato vattakaraṇatthaṃ kālaparicchedaṃ karoti, ‘‘ettake kāle vītivatte idaṃ nāma bhagavato kātabba’’nti. So tatthakaṃyeva samāpattiṃ samāpajjitvā vuṭṭhāti, taṃ sandhāya vuttaṃ ‘‘kālaparicchedaṃ katvā’’ti. Suññatāphalasamāpattiṃ appetvāti etena itare, ‘‘na sotāpannasakadāgāmī phalasamāpattiṃ samāpajjantī’’ti vadanti, taṃ vādaṃ paṭisedheti. Suññatoti attasuññato ca niccasuññato ca saṅkhārā upaṭṭhahiṃsu. Sekkhānañhi suññatāpaṭivedho pādesiko subhasukhasaññānaṃ appahīnattā, tasmā so thero suññatākathaṃ sotukāmo jāto. Dhurena dhuraṃ paharantena viyāti rathadhurena rathadhuraṃ paharantena viya katvā ujukameva suññatā…pe… vatthuṃ na sakkāti yojanā. Ekaṃ padanti ekaṃ suññatāpadaṃ.
པུབྦེཔཱཧནྟིཨཱདིནཱ བྷགཝཱ པཋམབོདྷིཡམྤི ཨཏྟནོ སུཉྙཏཱཝིཧཱརབཱཧུལླཾ པཀཱསེཏཱིཏི དསྶེནྟོ ‘‘པཋམབོདྷིཡམྤཱི’’ཏི ཨཱཧ། ཨེཀོཏིཨཱདི ཐེརསྶ སུཉྙཏཱཀཐཱཡ བྷཱཛནབྷཱཝདསྶནཏྠཾ། སོཏུནྟི ཨཊྛིཾ ཀཏྭཱ མནསི ཀཏྭཱ སབྦཙེཏསཱ སམནྣཱཧརིཏྭཱ སོཏུམྤི། ཨུགྒཧེཏུམྤིཏི ཡཐཱབྷཱུཏཾ དྷམྨཾ དྷཱརཎཔརིཔུཙྪཱཔརིཙཡཝསེན ཧདཡེན ཨུགྒཧིཏཾ སུཝཎྞབྷཱཛནེ པཀྑིཏྟསཱིཧཝསཱ ཝིཡ ཨཝིནཊྛེ ཀཱཏུམྤི། ཀཐེཏུམྤཱིཏི ཝིཏྠཱརེན པརེསཾ དསྶེཏུམྤི སཀྐཱ། ཏཏྠཱཏི མིགཱརམཱཏུཔཱསཱདེ། ཀཊྛརཱུཔཔོཏྠཀརཱུཔཙིཏྟརཱུཔཝསེན ཀཏཱཏི ཐམྦྷཱདཱིསུ ཨུཏྟིརིཏྭཱ ཀཏཱནཾ ཀཊྛརཱུཔཱནཾ, ནིཡྻཱུཧཱདཱིསུ པཊིམཱཝསེན རཙིཏཱནཾ པོཏྠཀརཱུཔཱནཾ, སིཏྟིཔསྶེ ཙིཏྟཀམྨཝསེན ཝིརཙིཏཱནཾ ཙིཏྟརཱུཔཱནཉྩ ཀཏཱ ནིཊྛཔིཏཱ། ཝེསྶཝཎམནྡྷཱཏཱདཱིནནྟི པཊིམཱརཱུཔེན ཀཏཱནཾ ཝེསྶཝཎམནྡྷཱཏུསཀྐཱདཱིནཾ། ཙིཏྟཀམྨཝསེནཱཏི ཨཱརཱམཱདིཙིཏྟཀམྨཝསེན། སཎྛིཏམྤཱིཏི ཨཝཡཝབྷཱཝེན སཎྛིཏཾ ཧུཏྭཱ ཋིཏམྤི། ཛིཎྞཔཊིསངྑརཎཏྠནྟི ཛིཎྞཱནཾ ནིཡྻཱུཧཀཱུཊཱགཱརཔཱསཱདཱཝཡཝཱནཾ ཨབྷིསངྑརཎཏྠཱཡ ཏསྨིཾ ཏསྨིཾ ཋཱནེ རཧསྶསཉྙཱཎེན ཋཔིཏཾ། ‘‘པརིབྷུཉྫིསྶཱམཱི’’ཏི ཏསྨིཾ ཏསྨིཾ ཀིཙྩེ ཝིནིཡུཉྫནཝསེན པརིབྷུཉྫིཏབྦསྶ། ཨེཏཾ ཝུཏྟནྟི, ‘‘ཨཡཾ མིགཱརམཱཏུཔཱསཱདོ སུཉྙོ’’ཏིཨཱདིཀཾ ཝུཏྟཾ།
Pubbepāhantiādinā bhagavā paṭhamabodhiyampi attano suññatāvihārabāhullaṃ pakāsetīti dassento ‘‘paṭhamabodhiyampī’’ti āha. Ekotiādi therassa suññatākathāya bhājanabhāvadassanatthaṃ. Sotunti aṭṭhiṃ katvā manasi katvā sabbacetasā samannāharitvā sotumpi. Uggahetumpiti yathābhūtaṃ dhammaṃ dhāraṇaparipucchāparicayavasena hadayena uggahitaṃ suvaṇṇabhājane pakkhittasīhavasā viya avinaṭṭhe kātumpi. Kathetumpīti vitthārena paresaṃ dassetumpi sakkā. Tatthāti migāramātupāsāde. Kaṭṭharūpapotthakarūpacittarūpavasena katāti thambhādīsu uttiritvā katānaṃ kaṭṭharūpānaṃ, niyyūhādīsu paṭimāvasena racitānaṃ potthakarūpānaṃ, sittipasse cittakammavasena viracitānaṃ cittarūpānañca katā niṭṭhapitā. Vessavaṇamandhātādīnanti paṭimārūpena katānaṃ vessavaṇamandhātusakkādīnaṃ. Cittakammavasenāti ārāmādicittakammavasena. Saṇṭhitampīti avayavabhāvena saṇṭhitaṃ hutvā ṭhitampi. Jiṇṇapaṭisaṅkharaṇatthanti jiṇṇānaṃ niyyūhakūṭāgārapāsādāvayavānaṃ abhisaṅkharaṇatthāya tasmiṃ tasmiṃ ṭhāne rahassasaññāṇena ṭhapitaṃ. ‘‘Paribhuñjissāmī’’ti tasmiṃ tasmiṃ kicce viniyuñjanavasena paribhuñjitabbassa. Etaṃ vuttanti, ‘‘ayaṃ migāramātupāsādo suñño’’tiādikaṃ vuttaṃ.
ནིཙྩནྟི སབྦཀཱལཾ རཏྟིཉྩ དིཝཱ ཙ། ཨེཀབྷཱཝཾ ཨེཀཾ ཨསུཉྙཏནྟི པཙྩཏྟེ ཨུཔཡོགཝཙནཾ, ཨེཀཏྟཾ ཨེཀོ ཨསུཉྙཏོཏི ཨཏྠོ། གཱམོཏི པཝཏྟནཝསེནཱཏི གེཧསནྣིཝེསཝཱིཐིཙཙྩརསིངྒྷཱཊཀཱདིཀེ ཨུཔཱདཱཡ གཱམོཏི ལོཀུཔྤཏྟིཝསེན། ཀིལེསཝསེནཱཏི ཏཏྠ ཨནུནཡཔཊིགྷཝསེན། ཨེསེཝ ནཡོཏི ཨིམིནཱ ‘‘པཝཏྟཝསེན ཝཱ ཀིལེསཝསེན ཝཱ ཨུཔྤནྣཾ མནུསྶསཉྙ’’ནྟི ཨིམམཏྠཾ ཨཏིདིསཏི། ཨེཏྠ ཙ ཡཐཱ གཱམགྒཧཎེན གྷརཱདིསཉྙཱ སངྒཧིཏཱ, ཨེཝཾ མནུསྶགྒཧཎེན ཨིཏྠིཔུརིསཱདིསཉྙཱ སངྒཧིཏཱ། ཡསྨཱ རུཀྑཱདིཀེ པཊིཙྩ ཨརཉྙསཉྙཱ ཏཏྠ པབྦཏཝནསཎྜཱདཡོ ཨནྟོགདྷཱ, ཏསྨཱ ཏཏྠ ཝིཛྫམཱནམྤི ཏཾ ཝིབྷཱགཾ ཨགྒཧེཏྭཱ ཨེཀཾ ཨརཉྙཾཡེཝ པཊིཙྩ ཨརཉྙསཉྙཾ མནསི ཀརོཏི། ཨོཏརཏཱིཏི ཨནུཔྤཝིསཏི། ཨདྷིམུཙྩཏཱིཏི ནིཙྪིནོཏི། པཝཏྟདརཐཱཏི ཏཐཱརཱུཔཱཡ པསྶདྡྷིཡཱ ཨབྷཱཝཏོ ཨོལཱ༹རིཀདྷམྨཔྤཝཏྟིསིདྡྷཱ དརཐཱ། ཀིལེསདརཐཱཏི ཨནུནཡཔཊིགྷསམྦྷཝཱ ཀིལེསདརཐཱ། དུཏིཡཔདེཏི ‘‘ཡེ ཨསྶུ དརཐཱ མནུསྶསཉྙཾ པཊིཙྩཱ’’ཏི ཨིམསྨིཾ པདེ། མནསིཀཱརསནྟཏཱཡ, – ‘‘ནཱཡཾ པུབྦེ ཝིཡ ཨོལཱ༹རིཀཱ, དྷམྨཔྤཝཏྟཱི’’ཏི སངྑཱརདསྶནདརཐཱནཾ སུཁུམཏཱ སལླཧུཀཏཱ ཙ ཙརིཏཏྠཱཏི ཨཱཧ ‘‘པཝཏྟདརཐམཏྟཱ ཨཏྠཱི’’ཏི།
Niccanti sabbakālaṃ rattiñca divā ca. Ekabhāvaṃ ekaṃ asuññatanti paccatte upayogavacanaṃ, ekattaṃ eko asuññatoti attho. Gāmoti pavattanavasenāti gehasannivesavīthicaccarasiṅghāṭakādike upādāya gāmoti lokuppattivasena. Kilesavasenāti tattha anunayapaṭighavasena. Eseva nayoti iminā ‘‘pavattavasena vā kilesavasena vā uppannaṃ manussasañña’’nti imamatthaṃ atidisati. Ettha ca yathā gāmaggahaṇena gharādisaññā saṅgahitā, evaṃ manussaggahaṇena itthipurisādisaññā saṅgahitā. Yasmā rukkhādike paṭicca araññasaññā tattha pabbatavanasaṇḍādayo antogadhā, tasmā tattha vijjamānampi taṃ vibhāgaṃ aggahetvā ekaṃ araññaṃyeva paṭicca araññasaññaṃ manasi karoti. Otaratīti anuppavisati. Adhimuccatīti nicchinoti. Pavattadarathāti tathārūpāya passaddhiyā abhāvato oḷārikadhammappavattisiddhā darathā. Kilesadarathāti anunayapaṭighasambhavā kilesadarathā. Dutiyapadeti ‘‘ye assu darathā manussasaññaṃ paṭiccā’’ti imasmiṃ pade. Manasikārasantatāya, – ‘‘nāyaṃ pubbe viya oḷārikā, dhammappavattī’’ti saṅkhāradassanadarathānaṃ sukhumatā sallahukatā ca caritatthāti āha ‘‘pavattadarathamattā atthī’’ti.
ཡཾ ཀིལེསདརཐཛཱཏཾ, ཏཾ ཨིམིསྶཱ དརཐསཉྙཱཡ ན ཧོཏཱིཏི ཡོཛནཱ། པཝཏྟདརཐམཏྟཾ ཨཝསིཊྛཾ ཧོཏི, ཝིཛྫམཱནམེཝ ཨཏྠི ཨིདནྟི པཛཱནཱཏཱིཏི ཡོཛནཱ། སུཉྙཏཱ ནིབྦཏྟཱིཏི སུཉྙཏནྟི པཝཏྟི། སུཉྙཏཱ སཧཙརིཏཉྷི སུཉྙཾ, ཨིདྷ སུཉྙཏཱཏི ཝུཏྟཱ།
Yaṃ kilesadarathajātaṃ, taṃ imissā darathasaññāya na hotīti yojanā. Pavattadarathamattaṃ avasiṭṭhaṃ hoti, vijjamānameva atthi idanti pajānātīti yojanā. Suññatā nibbattīti suññatanti pavatti. Suññatā sahacaritañhi suññaṃ, idha suññatāti vuttā.
༡༧༧. ཨསྶཱཏི བྷགཝཏོ ཨེཝཾ ཨིདཱནི ཝུཙྩམཱནཱཀཱརེན ཙིཏྟཔྤཝཏྟི ཨཧོསི། ཨཙྩནྟསུཉྙཏནྟི ‘‘པརམཱནུཏྟར’’ནྟི ཝུཏྟཾ ཨརཧཏྟཾ དེསེསྶཱམཱིཏི། ཨརཉྙསཉྙཱཡ ཝིསེསཱནདྷིགམནཏོཏི, ‘‘ཨརཉྙཾ ཨརཉྙ’’ནྟི མནསིཀཱརེན ཛྷཱནཱདིཝིསེསསྶ ཨདྷིགམཱབྷཱཝཏོ, ‘‘པཐཝཱི’’ཏི མནསིཀཱརེན ཝིསེསཱདྷིགམནཏོ། ཨིདཱནི ཏམེཝཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ། ཨེཝཾ སནྟེཏི ཨེཝཾ ཝཔིཏེ སཱལིཨཱདཡོ སམྤཛྫནྟི། དྷུཝསེཝནནྟི ནིཡཏསེཝནཾ པཱརིཧཱརིཡཀམྨཊྛཱནཾ། པཊིཙྩཱཏི ཨེཏྠ ‘‘སམྦྷཱུཏ’’ནྟི ཝཙནསེསོ ཨིཙྪིཏོཏི ཨཱཧ ‘‘པཊིཙྩ སམྦྷཱུཏ’’ནྟི། པཐཝིཾ པཊིཙྩ སམྦྷཱུཏཱ ཧི སཉྙཱཏི།
177.Assāti bhagavato evaṃ idāni vuccamānākārena cittappavatti ahosi. Accantasuññatanti ‘‘paramānuttara’’nti vuttaṃ arahattaṃ desessāmīti. Araññasaññāya visesānadhigamanatoti, ‘‘araññaṃ arañña’’nti manasikārena jhānādivisesassa adhigamābhāvato, ‘‘pathavī’’ti manasikārena visesādhigamanato. Idāni tamevatthaṃ upamāya vibhāvetuṃ ‘‘yathā hī’’tiādi vuttaṃ. Evaṃ santeti evaṃ vapite sāliādayo sampajjanti. Dhuvasevananti niyatasevanaṃ pārihāriyakammaṭṭhānaṃ. Paṭiccāti ettha ‘‘sambhūta’’nti vacanaseso icchitoti āha ‘‘paṭicca sambhūta’’nti. Pathaviṃ paṭicca sambhūtā hi saññāti.
པཐཝཱིཀསིཎེ སོ པཐཝཱིསཉྙཱི ཧོཏི, ན པཀཏིཔཐཝིཡཾ། ཏསྶཱཏི པཐཝཱིཀསིཎསྶ། ཏེཧཱིཏི གཎྜཱདཱིཧི། སུཊྛུ ཝིཧཏནྟི ཡཐཱ ཝལཱིནཾ ལེསོཔི ན ཧོཏི, ཨེཝཾ སམྨདེཝ ཨཱཀོཊིཏཾ། ནདཱིཏལཱ༹ཀཱདཱིནཾ ཏཱིརཔྤདེསོ ཨུདཀསྶ ཨཱཀརཊྛེན ཀཱུལཾ, ཨུནྣཏབྷཱཝཏོ ཨུགྒཏཾ ཀཱུལཾ ཝིཡཱཏི ཨུཀྐཱུལཾ, བྷཱུམིཡཱ ཨུཙྩཊྛཱནཾ། ཝིགཏཾ ཀཱུལནྟི ཝིཀྐཱུལཾ, ནཱིཙཊྛཱནཾ། ཏེནཱཧ ‘‘ཨུཙྩནཱིཙ’’ནྟི། ཨེཀཾ སཉྙནྟི ཨེཀཾ པཐཝཱིཏིསཉྙཾཡེཝ།
Pathavīkasiṇeso pathavīsaññī hoti, na pakatipathaviyaṃ. Tassāti pathavīkasiṇassa. Tehīti gaṇḍādīhi. Suṭṭhu vihatanti yathā valīnaṃ lesopi na hoti, evaṃ sammadeva ākoṭitaṃ. Nadītaḷākādīnaṃ tīrappadeso udakassa ākaraṭṭhena kūlaṃ, unnatabhāvato uggataṃ kūlaṃ viyāti ukkūlaṃ, bhūmiyā uccaṭṭhānaṃ. Vigataṃ kūlanti vikkūlaṃ, nīcaṭṭhānaṃ. Tenāha ‘‘uccanīca’’nti. Ekaṃ saññanti ekaṃ pathavītisaññaṃyeva.
༡༨༢. སཏིཔི སངྑཱརནིམིཏྟཝིརཧེ ཡཱདིསཱནཾ ནིམིཏྟཱནཾ ཨབྷཱཝེན ‘‘ཨནིམིཏྟ’’ནྟི ཝུཙྩཏི, ཏཱནི དསྶེཏུཾ, ‘‘ནིཙྩནིམིཏྟཱདིཝིརཧིཏོ’’ཏི ཝུཏྟཾ། ཙཏུམཧཱབྷཱུཏིཀཾ ཙཏུམཧཱབྷཱུཏནིསྶིཏཾ། སལཱ༹ཡཏནཔཊིསཾཡུཏྟཾ ཙཀྑཱཡཏནཱདིསལཱ༹ཡཏནསཧིཏཾ།
182. Satipi saṅkhāranimittavirahe yādisānaṃ nimittānaṃ abhāvena ‘‘animitta’’nti vuccati, tāni dassetuṃ, ‘‘niccanimittādivirahito’’ti vuttaṃ. Catumahābhūtikaṃ catumahābhūtanissitaṃ. Saḷāyatanapaṭisaṃyuttaṃ cakkhāyatanādisaḷāyatanasahitaṃ.
༡༨༣. ཝིཔསྶནཱཡ པཊིཝིཔསྶནནྟི དྷམྨཱནཉྩ པུན ཝིཔསྶནཾ། ཨིདྷཱཏི ཨཏྟནོ པཙྩཀྑབྷཱུཏཡཐཱདྷིགཏམགྒཕལཾ ཝདཏཱིཏི ཨཱཧ – ‘‘ཨརིཡམགྒེ ཙེཝ ཨརིཡཕལེ ཙཱ’’ཏི། ཨུཔཱདིསེསདརཐདསྶནཏྠནྟི སབྦསོ ཀིལེསུཔདྷིཡཱ པཧཱིནཱཡ ཁནྡྷོཔདྷི ཨཝིསིཊྛཱ, ཏཔྤཙྩཡཱ དརཐཱ ཨུཔཱདིསེསདརཐཱ, ཏཾ དསྶནཏྠཾ། ཡསྨཱ ཝིསཡཏོ གཱམསཉྙཱ ཨོལཱ༹རིཀཱ, མནུསྶསཉྙཱ སུཁུམཱ, ཏསྨཱ མནུསྶསཉྙཱཡ གཱམསཉྙཾ ནིཝཏྟེཏྭཱ། ཡསྨཱ པན མནུསྶསཉྙཱཔི སབྷཱགཝཏྠུཔརིགྒཧཏོ ཨོལཱ༹རིཀཱ, སབྷཱགཝཏྠུཏོ ཨརཉྙསཉྙཱ སུཁུམཱ, ཏསྨཱ ཨརཉྙསཉྙཱཡ མནུསྶསཉྙཾ ནིཝཏྟེཏྭཱ། པཐཝཱིསཉྙཱདིནིཝཏྟནེ ཀཱརཎཾ ཧེཊྛཱ སུཏྟནྟརེསུ ཙ ཝུཏྟམེཝ། ཨནུཔུབྦེནཱཏི མགྒཔྤཊིཔཱཊིཡཱ། ནིཙྩསཱརཱདཱིནཾ སབྦསོ ཨཝཏྠུཏཱཡ ཨཙྩནྟམེཝ སུཉྙཏྟཱ ཨཙྩནྟསུཉྙཏཱ།
183.Vipassanāya paṭivipassananti dhammānañca puna vipassanaṃ. Idhāti attano paccakkhabhūtayathādhigatamaggaphalaṃ vadatīti āha – ‘‘ariyamagge ceva ariyaphale cā’’ti. Upādisesadarathadassanatthanti sabbaso kilesupadhiyā pahīnāya khandhopadhi avisiṭṭhā, tappaccayā darathā upādisesadarathā, taṃ dassanatthaṃ. Yasmā visayato gāmasaññā oḷārikā, manussasaññā sukhumā, tasmā manussasaññāya gāmasaññaṃ nivattetvā. Yasmā pana manussasaññāpi sabhāgavatthupariggahato oḷārikā, sabhāgavatthuto araññasaññā sukhumā, tasmā araññasaññāya manussasaññaṃ nivattetvā. Pathavīsaññādinivattane kāraṇaṃ heṭṭhā suttantaresu ca vuttameva. Anupubbenāti maggappaṭipāṭiyā. Niccasārādīnaṃ sabbaso avatthutāya accantameva suññattā accantasuññatā.
༡༨༤. སུཉྙཏཕལསམཱཔཏྟིནྟི སུཉྙཏཝིམོཀྑསྶ ཕལབྷཱུཏཏྟཱ, སུཉྙཏཱནུཔསྶནཱཡ ཝསེན སམཱཔཛྫིཏབྦཏྟཱ ཙ སུཉྙཏཕལསམཱཔཏྟིནྟི ལདྡྷནཱམཾ ཨརཧཏྟཕལསམཱཔཏྟིཾ། ཡསྨཱ ཨཏཱིཏེ པཙྩེཀསམྦུདྡྷཱ ཨཧེསུཾ, ཨནཱགཏེ བྷཝིསྶནྟི, ཨིདཱནི པན བུདྡྷསཱསནསྶ དྷརམཱནཏྟཱ པཙྩེཀབུདྡྷཱ ན ཝཏྟནྟི, ཏསྨཱ པཙྩེཀབུདྡྷགྒཧཎཾ ཨཀཏྭཱ, ‘‘ཨེཏརཧིཔི བུདྡྷབུདྡྷསཱཝཀསངྑཱཏཱ’’ཨིཙྩེཝ ཝུཏྟཾ། ན ཧི བུདྡྷསཱསནེ དྷརནྟེ པཙྩེཀབུདྡྷཱ བྷཝནྟི། སེསཾ སུཝིཉྙེཡྻམེཝ།
184.Suññataphalasamāpattinti suññatavimokkhassa phalabhūtattā, suññatānupassanāya vasena samāpajjitabbattā ca suññataphalasamāpattinti laddhanāmaṃ arahattaphalasamāpattiṃ. Yasmā atīte paccekasambuddhā ahesuṃ, anāgate bhavissanti, idāni pana buddhasāsanassa dharamānattā paccekabuddhā na vattanti, tasmā paccekabuddhaggahaṇaṃ akatvā, ‘‘etarahipi buddhabuddhasāvakasaṅkhātā’’icceva vuttaṃ. Na hi buddhasāsane dharante paccekabuddhā bhavanti. Sesaṃ suviññeyyameva.
ཙཱུལ༹སུཉྙཏསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Cūḷasuññatasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༡. ཙཱུལ༹སུཉྙཏསུཏྟཾ • 1. Cūḷasuññatasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༡. ཙཱུལ༹སུཉྙཏསུཏྟཝཎྞནཱ • 1. Cūḷasuññatasuttavaṇṇanā
