| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༧. ཙཱུལ༹ཏཎྷཱསངྑཡསུཏྟཝཎྞནཱ
7. Cūḷataṇhāsaṅkhayasuttavaṇṇanā
༣༩༠. ཨེཝཾ མེ སུཏནྟི ཙཱུལ༹ཏཎྷཱསངྑཡསུཏྟཾ། ཏཏྠ པུབྦཱརཱམེ མིགཱརམཱཏུཔཱསཱདེཏི པུབྦཱརཱམསངྑཱཏེ ཝིཧཱརེ མིགཱརམཱཏུཡཱ པཱསཱདེ། ཏཏྲཱཡཾ ཨནུཔུབྦཱིཀཐཱཨཏཱིཏེ སཏསཧསྶཀཔྤམཏྠཀེ ཨེཀཱ ཨུཔཱསིཀཱ པདུམུཏྟརཾ བྷགཝནྟཾ ནིམནྟེཏྭཱ བུདྡྷཔྤམུཁསྶ བྷིཀྑུསངྒྷསྶ སཏསཧསྶཾ དཱནཾ དཏྭཱ བྷགཝཏོ པཱདམཱུལེ ནིཔཛྫིཏྭཱ, ‘‘ཨནཱགཏེ ཏུམྷཱདིསསྶ བུདྡྷསྶ ཨགྒུཔཊྛཱཡིཀཱ ཧོམཱི’’ཏི པཏྠནམཀཱསི། སཱ ཀཔྤསཏསཧསྶཾ དེཝེསུ ཙེཝ མནུསྶེསུ ཙ སཾསརིཏྭཱ ཨམྷཱཀཾ བྷགཝཏོ ཀཱལེ བྷདྡིཡནགརེ མེཎྜཀསེཊྛིཔུཏྟསྶ དྷནཉྫཡསྶ སེཊྛིནོ གཧེ སུམནདེཝིཡཱ ཀུཙྪིམྷི པཊིསནྡྷིཾ གཎྷི། ཛཱཏཀཱལེ ཙསྶཱ ཝིསཱཁཱཏི ནཱམཾ ཨཀཾསུ། སཱ ཡདཱ བྷགཝཱ བྷདྡིཡནགརཾ ཨགམཱསི, ཏདཱ པཉྩཧི དཱརིཀཱསཏེཧི སདྡྷིཾ བྷགཝཏོ པཙྩུགྒམནཾ ཀཏྭཱ པཋམདསྶནམྷིཡེཝ སོཏཱཔནྣཱ ཨཧོསི། ཨཔརབྷཱགེ སཱཝཏྠིཡཾ མིགཱརསེཊྛིཔུཏྟསྶ པུཎྞཝཌྜྷནཀུམཱརསྶ གེཧཾ གཏཱ, ཏཏྠ ནཾ མིགཱརསེཊྛི མཱཏིཊྛཱནེ ཋཔེསི, ཏསྨཱ མིགཱརམཱཏཱཏི ཝུཙྩཏི།
390.Evaṃme sutanti cūḷataṇhāsaṅkhayasuttaṃ. Tattha pubbārāme migāramātupāsādeti pubbārāmasaṅkhāte vihāre migāramātuyā pāsāde. Tatrāyaṃ anupubbīkathāatīte satasahassakappamatthake ekā upāsikā padumuttaraṃ bhagavantaṃ nimantetvā buddhappamukhassa bhikkhusaṅghassa satasahassaṃ dānaṃ datvā bhagavato pādamūle nipajjitvā, ‘‘anāgate tumhādisassa buddhassa aggupaṭṭhāyikā homī’’ti patthanamakāsi. Sā kappasatasahassaṃ devesu ceva manussesu ca saṃsaritvā amhākaṃ bhagavato kāle bhaddiyanagare meṇḍakaseṭṭhiputtassa dhanañjayassa seṭṭhino gahe sumanadeviyā kucchimhi paṭisandhiṃ gaṇhi. Jātakāle cassā visākhāti nāmaṃ akaṃsu. Sā yadā bhagavā bhaddiyanagaraṃ agamāsi, tadā pañcahi dārikāsatehi saddhiṃ bhagavato paccuggamanaṃ katvā paṭhamadassanamhiyeva sotāpannā ahosi. Aparabhāge sāvatthiyaṃ migāraseṭṭhiputtassa puṇṇavaḍḍhanakumārassa gehaṃ gatā, tattha naṃ migāraseṭṭhi mātiṭṭhāne ṭhapesi, tasmā migāramātāti vuccati.
པཏིཀུལཾ གཙྪནྟིཡཱ ཙསྶཱ པིཏཱ མཧཱལཏཱཔིལ༹ནྡྷནཾ ནཱམ ཀཱརཱཔེསི། ཏསྨིཾ པིལ༹ནྡྷནེ ཙཏསྶོ ཝཛིརནཱལི༹ཡོ ཨུཔཡོགཾ ཨགམཾསུ, མུཏྟཱནཾ ཨེཀཱདས ནཱལི༹ཡོ, པཝཱལཱ༹ནཾ དྭཱཝཱིསཏི ནཱལི༹ཡོ, མཎཱིནཾ ཏེཏྟིཾས ནཱལི༹ཡོ, ཨིཏི ཨེཏེཧི ཙ ཨཉྙེཧི ཙ སཏྟཝཎྞེཧི རཏནེཧི ནིཊྛཱནཾ ཨགམཱསི། ཏཾ སཱིསེ པཊིམུཀྐཾ ཡཱཝ པཱདཔིཊྛིཡཱ བྷསྶཏི, པཉྩནྣཾ ཧཏྠཱིནཾ བལཾ དྷཱརཡམཱནཱཝ ནཾ ཨིཏྠཱི དྷཱརེཏུཾ སཀྐོཏི། སཱ ཨཔརབྷཱགེ དསབལསྶ ཨགྒུཔཊྛཱཡིཀཱ ཧུཏྭཱ ཏཾ པསཱདྷནཾ ཝིསྶཛྫེཏྭཱ ནཝཧི ཀོཊཱིཧི བྷགཝཏོ ཝིཧཱརཾ ཀཱརཡམཱནཱ ཀརཱིསམཏྟེ བྷཱུམིབྷཱགེ པཱསཱདཾ ཀཱརེསི། ཏསྶ ཨུཔརིབྷཱུམིཡཾ པཉྩ གབྦྷསཏཱནི ཧོནྟི, ཧེཊྛཱབྷཱུམིཡཾ པཉྩཱཏི གབྦྷསཧསྶཔྤཊིམཎྜིཏོ ཨཧོསི། སཱ ‘‘སུདྡྷཔཱསཱདོཝ ན སོབྷཏཱི’’ཏི ཏཾ པརིཝཱརེཏྭཱ པཉྩ དྭིཀཱུཊགེཧསཏཱནི, པཉྩ ཙཱུལ༹པཱསཱདསཏཱནི, པཉྩ དཱིགྷསཱལསཏཱནི ཙ ཀཱརཱཔེསི། ཝིཧཱརམཧོ ཙཏཱུཧི མཱསེཧི ནིཊྛཱནཾ ཨགམཱསི།
Patikulaṃ gacchantiyā cassā pitā mahālatāpiḷandhanaṃ nāma kārāpesi. Tasmiṃ piḷandhane catasso vajiranāḷiyo upayogaṃ agamaṃsu, muttānaṃ ekādasa nāḷiyo, pavāḷānaṃ dvāvīsati nāḷiyo, maṇīnaṃ tettiṃsa nāḷiyo, iti etehi ca aññehi ca sattavaṇṇehi ratanehi niṭṭhānaṃ agamāsi. Taṃ sīse paṭimukkaṃ yāva pādapiṭṭhiyā bhassati, pañcannaṃ hatthīnaṃ balaṃ dhārayamānāva naṃ itthī dhāretuṃ sakkoti. Sā aparabhāge dasabalassa aggupaṭṭhāyikā hutvā taṃ pasādhanaṃ vissajjetvā navahi koṭīhi bhagavato vihāraṃ kārayamānā karīsamatte bhūmibhāge pāsādaṃ kāresi. Tassa uparibhūmiyaṃ pañca gabbhasatāni honti, heṭṭhābhūmiyaṃ pañcāti gabbhasahassappaṭimaṇḍito ahosi. Sā ‘‘suddhapāsādova na sobhatī’’ti taṃ parivāretvā pañca dvikūṭagehasatāni, pañca cūḷapāsādasatāni, pañca dīghasālasatāni ca kārāpesi. Vihāramaho catūhi māsehi niṭṭhānaṃ agamāsi.
མཱཏུགཱམཏྟབྷཱཝེ ཋིཏཱཡ ཝིསཱཁཱཡ ཝིཡ ཨཉྙིསྶཱ བུདྡྷསཱསནེ དྷནཔརིཙྩཱགོ ནཱམ ནཏྠི, པུརིསཏྟབྷཱཝེ ཋིཏསྶ ཙ ཨནཱཐཔིཎྜིཀསྶ ཝིཡ ཨཉྙསྶ བུདྡྷསཱསནེ དྷནཔརིཙྩཱགོ ནཱམ ནཏྠི། སོ ཧི ཙཏུཔཉྙཱསཀོཊིཡོ ཝིསྶཛྫེཏྭཱ སཱཝཏྠིཡཱ དཀྑིཎབྷཱགེ ཨནུརཱདྷཔུརསྶ མཧཱཝིཧཱརསདིསེ ཋཱནེ ཛེཏཝནམཧཱཝིཧཱརཾ ནཱམ ཀཱརེསི། ཝིསཱཁཱ, སཱཝཏྠིཡཱ པཱཙཱིནབྷཱགེ ཨུཏྟམདེཝཱིཝིཧཱརསདིསེ ཋཱནེ པུབྦཱརཱམཾ ནཱམ ཀཱརེསི། བྷགཝཱ ཨིམེསཾ དྭིནྣཾ ཀུལཱནཾ ཨནུཀམྤཱཡ སཱཝཏྠིཾ ནིསྶཱཡ ཝིཧརནྟོ ཨིམེསུ དྭཱིསུ ཝིཧཱརེསུ ནིབདྡྷཝཱསཾ ཝསི། ཨེཀཾ ཨནྟོཝསྶཾ ཛེཏཝནེ ཝསཏི, ཨེཀཾ པུབྦཱརཱམེ, ཨེཏསྨིཾ པན སམཡེ བྷགཝཱ པུབྦཱརཱམེ ཝིཧརཏི། ཏེན ཝུཏྟཾ – ‘‘པུབྦཱརཱམེ མིགཱརམཱཏུཔཱསཱདེ’’ཏི།
Mātugāmattabhāve ṭhitāya visākhāya viya aññissā buddhasāsane dhanapariccāgo nāma natthi, purisattabhāve ṭhitassa ca anāthapiṇḍikassa viya aññassa buddhasāsane dhanapariccāgo nāma natthi. So hi catupaññāsakoṭiyo vissajjetvā sāvatthiyā dakkhiṇabhāge anurādhapurassa mahāvihārasadise ṭhāne jetavanamahāvihāraṃ nāma kāresi. Visākhā, sāvatthiyā pācīnabhāge uttamadevīvihārasadise ṭhāne pubbārāmaṃ nāma kāresi. Bhagavā imesaṃ dvinnaṃ kulānaṃ anukampāya sāvatthiṃ nissāya viharanto imesu dvīsu vihāresu nibaddhavāsaṃ vasi. Ekaṃ antovassaṃ jetavane vasati, ekaṃ pubbārāme, etasmiṃ pana samaye bhagavā pubbārāme viharati. Tena vuttaṃ – ‘‘pubbārāme migāramātupāsāde’’ti.
ཀིཏྟཱཝཏཱ ནུ ཁོ, བྷནྟེཏི ཀིཏྟཀེན ནུ ཁོ, བྷནྟེ། སཾཁིཏྟེན ཏཎྷཱསངྑཡཝིམུཏྟོ ཧོཏཱིཏི ཏཎྷཱསངྑཡེ ནིབྦཱནེ ཏཾ ཨཱརམྨཎཾ ཀཏྭཱ ཝིམུཏྟཙིཏྟཏཱཡ ཏཎྷཱསངྑཡཝིམུཏྟོ ནཱམ སཾཁིཏྟེན ཀིཏྟཱཝཏཱ ཧོཏི? ཡཱཡ པཊིཔཏྟིཡཱ ཏཎྷཱསངྑཡཝིམུཏྟོ ཧོཏི, ཏཾ མེ ཁཱིཎཱསཝསྶ བྷིཀྑུནོ པུབྦབྷཱགཔྤཊིཔདཾ སཾཁིཏྟེན དེསེཐཱཏི པུཙྪཏི། ཨཙྩནྟནིཊྛོཏི ཁཡཝཡསངྑཱཏཾ ཨནྟཾ ཨཏཱིཏཱཏི ཨཙྩནྟཱ། ཨཙྩནྟཱ ནིཊྛཱ ཨསྶཱཏི ཨཙྩནྟནིཊྛོ, ཨེཀནྟནིཊྛོ སཏཏནིཊྛོཏི ཨཏྠོ། ཨཙྩནྟཾ ཡོགཀྑེམཱིཏི ཨཙྩནྟཡོགཀྑེམཱི, ནིཙྩཡོགཀྑེམཱིཏི ཨཏྠོ། ཨཙྩནྟཾ བྲཧྨཙཱརཱིཏི ཨཙྩནྟབྲཧྨཙཱརཱི, ནིཙྩབྲཧྨཙཱརཱིཏི ཨཏྠོ། ཨཙྩནྟཾ པརིཡོསཱནམསྶཱཏི པུརིམནཡེནེཝ ཨཙྩནྟཔརིཡོསཱནོ། སེཊྛོ དེཝམནུསྶཱནནྟི དེཝཱནཉྩ མནུསྶཱནཉྩ སེཊྛོ ཨུཏྟམོ། ཨེཝརཱུཔོ བྷིཀྑུ ཀིཏྟཱཝཏཱ ཧོཏི, ཁིཔྤམེཏསྶ སངྑེཔེནེཝ པཊིཔཏྟིཾ ཀཐེཐཱཏི བྷགཝནྟཾ ཡཱཙཏི། ཀསྨཱ པནེས ཨེཝཾ ཝེགཱཡཏཱིཏི? ཀཱིལ༹ཾ ཨནུབྷཝིཏུཀཱམཏཱཡ།
Kittāvatānu kho, bhanteti kittakena nu kho, bhante. Saṃkhittena taṇhāsaṅkhayavimutto hotīti taṇhāsaṅkhaye nibbāne taṃ ārammaṇaṃ katvā vimuttacittatāya taṇhāsaṅkhayavimutto nāma saṃkhittena kittāvatā hoti? Yāya paṭipattiyā taṇhāsaṅkhayavimutto hoti, taṃ me khīṇāsavassa bhikkhuno pubbabhāgappaṭipadaṃ saṃkhittena desethāti pucchati. Accantaniṭṭhoti khayavayasaṅkhātaṃ antaṃ atītāti accantā. Accantā niṭṭhā assāti accantaniṭṭho, ekantaniṭṭho satataniṭṭhoti attho. Accantaṃ yogakkhemīti accantayogakkhemī, niccayogakkhemīti attho. Accantaṃ brahmacārīti accantabrahmacārī, niccabrahmacārīti attho. Accantaṃ pariyosānamassāti purimanayeneva accantapariyosāno. Seṭṭho devamanussānanti devānañca manussānañca seṭṭho uttamo. Evarūpo bhikkhu kittāvatā hoti, khippametassa saṅkhepeneva paṭipattiṃ kathethāti bhagavantaṃ yācati. Kasmā panesa evaṃ vegāyatīti? Kīḷaṃ anubhavitukāmatāya.
ཨཡཾ ཀིར ཨུཡྻཱནཀཱིལ༹ཾ ཨཱཎཱཔེཏྭཱ ཙཏཱུཧི མཧཱརཱཛཱུཧི ཙཏཱུསུ དིསཱསུ ཨཱརཀྑཾ གཱཧཱཔེཏྭཱ དྭཱིསུ དེཝལོཀེསུ དེཝསངྒྷེན པརིཝུཏོ ཨཌྜྷཏིཡཱཧི ནཱཊཀཀོཊཱིཧི སདྡྷིཾ ཨེརཱཝཎཾ ཨཱརུཡ྄ཧ ཨུཡྻཱནདྭཱརེ ཋིཏོ ཨིམཾ པཉྷཾ སལླཀྑེསི – ‘‘ཀིཏྟཀེན ནུ ཁོ ཏཎྷཱསངྑཡཝིམུཏྟསྶ ཁཱིཎཱསཝསྶ སངྑེཔཏོ ཨཱགམནིཡཔུབྦབྷཱགཔཊིཔདཱ ཧོཏཱི’’ཏི། ཨཐསྶ ཨེཏདཧོསི – ‘‘ཨཡཾ པཉྷོ ཨཏིཝིཡ སསྶིརིཀོ, སཙཱཧཾ ཨིམཾ པཉྷཾ ཨནུགྒཎྷིཏྭཱཝ ཨུཡྻཱནཾ པཝིསིསྶཱམི, ཚདྭཱརིཀེཧི ཨཱརམྨཎེཧི ནིམྨཐིཏོ ན པུན ཨིམཾ པཉྷཾ སལླཀྑེསྶཱམི , ཏིཊྛཏུ ཏཱཝ ཨུཡྻཱནཀཱིལཱ༹, སཏྠུ སནྟིཀཾ གནྟྭཱ ཨིམཾ པཉྷཾ པུཙྪིཏྭཱ ཨུགྒཧིཏཔཉྷོ ཨུཡྻཱནེ ཀཱིལི༹སྶཱམཱི’’ཏི ཧཏྠིཀྑནྡྷེ ཨནྟརཧིཏོ བྷགཝཏོ སནྟིཀེ པཱཏུརཧོསི། ཏེཔི ཙཏྟཱརོ མཧཱརཱཛཱནོ ཨཱརཀྑཾ གཧེཏྭཱ ཋིཏཊྛཱནེཡེཝ ཋིཏཱ, པརིཙཱརིཀདེཝསངྒྷཱཔི ནཱཊཀཱནིཔི ཨེརཱཝཎོཔི ནཱགརཱཛཱ ཏཏྠེཝ ཨུཡྻཱནདྭཱརེ ཨཊྛཱསི, ཨེཝམེས ཀཱིལ༹ཾ ཨནུབྷཝིཏུཀཱམཏཱཡ ཝེགཱཡནྟོ ཨེཝམཱཧ།
Ayaṃ kira uyyānakīḷaṃ āṇāpetvā catūhi mahārājūhi catūsu disāsu ārakkhaṃ gāhāpetvā dvīsu devalokesu devasaṅghena parivuto aḍḍhatiyāhi nāṭakakoṭīhi saddhiṃ erāvaṇaṃ āruyha uyyānadvāre ṭhito imaṃ pañhaṃ sallakkhesi – ‘‘kittakena nu kho taṇhāsaṅkhayavimuttassa khīṇāsavassa saṅkhepato āgamaniyapubbabhāgapaṭipadā hotī’’ti. Athassa etadahosi – ‘‘ayaṃ pañho ativiya sassiriko, sacāhaṃ imaṃ pañhaṃ anuggaṇhitvāva uyyānaṃ pavisissāmi, chadvārikehi ārammaṇehi nimmathito na puna imaṃ pañhaṃ sallakkhessāmi , tiṭṭhatu tāva uyyānakīḷā, satthu santikaṃ gantvā imaṃ pañhaṃ pucchitvā uggahitapañho uyyāne kīḷissāmī’’ti hatthikkhandhe antarahito bhagavato santike pāturahosi. Tepi cattāro mahārājāno ārakkhaṃ gahetvā ṭhitaṭṭhāneyeva ṭhitā, paricārikadevasaṅghāpi nāṭakānipi erāvaṇopi nāgarājā tattheva uyyānadvāre aṭṭhāsi, evamesa kīḷaṃ anubhavitukāmatāya vegāyanto evamāha.
སབྦེ དྷམྨཱ ནཱལཾ ཨབྷིནིཝེསཱཡཱཏི ཨེཏྠ སབྦེ དྷམྨཱ ནཱམ པཉྩཀྑནྡྷཱ དྭཱདསཱཡཏནཱནི ཨཊྛཱརས དྷཱཏུཡོ། ཏེ སབྦེཔི ཏཎྷཱདིཊྛིཝསེན ཨབྷིནིཝེསཱཡ ནཱལཾ ན པརིཡཏྟཱ ན སམཏྠཱ ན ཡུཏྟཱ, ཀསྨཱ? གཧིཏཱཀཱརེན ཨཏིཊྛནཏོ། ཏེ ཧི ནིཙྩཱཏི གཧིཏཱཔི ཨནིཙྩཱཝ སམྤཛྫནྟི, སུཁཱཏི གཧིཏཱཔི དུཀྑཱཝ སམྤཛྫནྟི, ཨཏྟཱཏི གཧིཏཱཔི ཨནཏྟཱཝ སམྤཛྫནྟི, ཏསྨཱ ནཱལཾ ཨབྷིནིཝེསཱཡ། ཨབྷིཛཱནཱཏཱིཏི ཨནིཙྩཾ དུཀྑཾ ཨནཏྟཱཏི ཉཱཏཔརིཉྙཱཡ ཨབྷིཛཱནཱཏི། པརིཛཱནཱཏཱིཏི ཏཐེཝ ཏཱིརཎཔརིཉྙཱཡ པརིཛཱནཱཏི། ཡཾཀིཉྩི ཝེདནནྟི ཨནྟམསོ པཉྩཝིཉྙཱཎསམྤཡུཏྟམྤི ཡཾཀིཉྩི ཨཔྤམཏྟཀམྤི ཝེདནཾ ཨནུབྷཝཏི། ཨིམིནཱ བྷགཝཱ སཀྐསྶ དེཝཱནམིནྡསྶ ཝེདནཱཝསེན ནིབྦཏྟེཏྭཱ ཨརཱུཔཔརིགྒཧཾ དསྶེཏི། སཙེ པན ཝེདནཱཀམྨཊྛཱནཾ ཧེཊྛཱ ན ཀཐིཏཾ བྷཝེཡྻ, ཨིམསྨིཾ ཋཱནེ ཀཐེཏབྦཾ སིཡཱ། ཧེཊྛཱ པན ཀཐིཏཾ, ཏསྨཱ སཏིཔཊྛཱནེ ཝུཏྟནཡེནེཝ ཝེདིཏབྦཾ། ཨནིཙྩཱནུཔསྶཱིཏི ཨེཏྠ ཨནིཙྩཾ ཝེདིཏབྦཾ, ཨནིཙྩཱནུཔསྶནཱ ཝེདིཏབྦཱ, ཨནིཙྩཱནུཔསྶཱི ཝེདིཏབྦོ། ཏཏྠ ཨནིཙྩནྟི པཉྩཀྑནྡྷཱ, ཏེ ཧི ཨུཔྤཱདཝཡཊྛེན ཨནིཙྩཱ། ཨནིཙྩཱནུཔསྶནཱཏི པཉྩཀྑནྡྷཱནཾ ཁཡཏོ ཝཡཏོ དསྶནཉཱཎཾ། ཨནིཙྩཱནུཔསྶཱིཏི ཏེན ཉཱཎེན སམནྣཱགཏོ པུགྒལོ ། ཏསྨཱ ‘‘ཨནིཙྩཱནུཔསྶཱི ཝིཧརཏཱི’’ཏི ཨནིཙྩཏོ ཨནུཔསྶནྟོ ཝིཧརཏཱིཏི ཨཡམེཏྠ ཨཏྠོ།
Sabbe dhammā nālaṃ abhinivesāyāti ettha sabbe dhammā nāma pañcakkhandhā dvādasāyatanāni aṭṭhārasa dhātuyo. Te sabbepi taṇhādiṭṭhivasena abhinivesāya nālaṃ na pariyattā na samatthā na yuttā, kasmā? Gahitākārena atiṭṭhanato. Te hi niccāti gahitāpi aniccāva sampajjanti, sukhāti gahitāpi dukkhāva sampajjanti, attāti gahitāpi anattāva sampajjanti, tasmā nālaṃ abhinivesāya. Abhijānātīti aniccaṃ dukkhaṃ anattāti ñātapariññāya abhijānāti. Parijānātīti tatheva tīraṇapariññāya parijānāti. Yaṃkiñci vedananti antamaso pañcaviññāṇasampayuttampi yaṃkiñci appamattakampi vedanaṃ anubhavati. Iminā bhagavā sakkassa devānamindassa vedanāvasena nibbattetvā arūpapariggahaṃ dasseti. Sace pana vedanākammaṭṭhānaṃ heṭṭhā na kathitaṃ bhaveyya, imasmiṃ ṭhāne kathetabbaṃ siyā. Heṭṭhā pana kathitaṃ, tasmā satipaṭṭhāne vuttanayeneva veditabbaṃ. Aniccānupassīti ettha aniccaṃ veditabbaṃ, aniccānupassanā veditabbā, aniccānupassī veditabbo. Tattha aniccanti pañcakkhandhā, te hi uppādavayaṭṭhena aniccā. Aniccānupassanāti pañcakkhandhānaṃ khayato vayato dassanañāṇaṃ. Aniccānupassīti tena ñāṇena samannāgato puggalo . Tasmā ‘‘aniccānupassī viharatī’’ti aniccato anupassanto viharatīti ayamettha attho.
ཝིརཱགཱནུཔསྶཱིཏི ཨེཏྠ དྭེ ཝིརཱགཱ ཁཡཝིརཱགོ ཙ ཨཙྩནྟཝིརཱགོ ཙ། ཏཏྠ སངྑཱརཱནཾ ཁཡཝཡཏོ ཨནུཔསྶནཱཔི, ཨཙྩནྟཝིརཱགཾ ནིབྦཱནཾ ཝིརཱགཏོ དསྶནམགྒཉཱཎམྤི ཝིརཱགཱནུཔསྶནཱ། ཏདུབྷཡསམཱངྒཱིཔུགྒལོ ཝིརཱགཱནུཔསྶཱི ནཱམ, ཏཾ སནྡྷཱཡ ཝུཏྟཾ ‘‘ཝིརཱགཱནུཔསྶཱི’’ཏི, ཝིརཱགཏོ ཨནུཔསྶནྟོཏི ཨཏྠོ། ནིརོདྷཱནུཔསྶིམྷིཔི ཨེསེཝ ནཡོ, ནིརོདྷོཔི ཧི ཁཡནིརོདྷོ ཙ ཨཙྩནྟནིརོདྷོ ཙཱཏི དུཝིདྷོཡེཝ། པཊིནིསྶགྒཱནུཔསྶཱིཏི ཨེཏྠ པཊིནིསྶགྒོ ཝུཙྩཏི ཝོསྶགྒོ, སོ ཙ པརིཙྩཱགཝོསྶགྒོ པཀྑནྡནཝོསྶགྒོཏི དུཝིདྷོ ཧོཏི ། ཏཏྠ པརིཙྩཱགཝོསྶགྒོཏི ཝིཔསྶནཱ, སཱ ཧི ཏདངྒཝསེན ཀིལེསེ ཙ ཁནྡྷེ ཙ ཝོསྶཛྫཏི། པཀྑནྡནཝོསྶགྒོཏི མགྒོ, སོ ཧི ནིབྦཱནཾ ཨཱརམྨཎཾ ཨཱརམྨཎཏོ པཀྑནྡཏི། དྭཱིཧིཔི ཝཱ ཀཱརཎེཧི ཝོསྶགྒོཡེཝ, སམུཙྪེདཝསེན ཁནྡྷཱནཾ ཀིལེསཱནཉྩ ཝོསྶཛྫནཏོ, ནིབྦཱནཉྩ པཀྑནྡནཏོ། ཏསྨཱ ཀིལེསེ ཙ ཁནྡྷེ ཙ པརིཙྩཛཏཱིཏི པརིཙྩཱགཝོསྶགྒོ, ནིརོདྷེ ནིབྦཱནདྷཱཏུཡཱ ཙིཏྟཾ པཀྑནྡཏཱིཏི པཀྑནྡནཝོསྶགྒོཏི ཨུབྷཡམྤེཏཾ མགྒེ སམེཏི། ཏདུབྷཡསམངྒཱིཔུགྒལོ ཨིམཱཡ པཊིནིསྶགྒཱནུཔསྶནཱཡ སམནྣཱགཏཏྟཱ པཊིནིསྶགྒཱནུཔསྶཱི ནཱམ ཧོཏི། ཏཾ སནྡྷཱཡ ཝུཏྟཾ ‘‘པཊིནིསྶགྒཱནུཔསྶཱི’’ཏི། ན ཀིཉྩི ལོཀེ ཨུཔཱདིཡཏཱིཏི ཀིཉྩི ཨེཀམྤི སངྑཱརགཏཾ ཏཎྷཱཝསེན ན ཨུཔཱདིཡཏི ན གཎྷཱཏི ན པརཱམསཏི། ཨནུཔཱདིཡཾ ན པརིཏསྶཏཱིཏི ཨགྒཎྷནྟོ ཏཎྷཱཔརིཏསྶནཱཡ ན པརིཏསྶཏི། པཙྩཏྟཉྙེཝ པརིནིབྦཱཡཏཱིཏི སཡམེཝ ཀིལེསཔརིནིབྦཱནེན པརིནིབྦཱཡཏི། ཁཱིཎཱ ཛཱཏཱིཏིཨཱདིནཱ པནསྶ པཙྩཝེཀྑཎཱཝ དསྶིཏཱ། ཨིཏི བྷགཝཱ སཀྐསྶ དེཝཱནམིནྡསྶ སཾཁིཏྟེན ཁཱིཎཱསཝསྶ པུབྦབྷཱགཔྤཊིཔདཾ པུཙྪིཏོ སལླཧུཀཾ ཀཏྭཱ སཾཁིཏྟེནེཝ ཁིཔྤཾ ཀཐེསི།
Virāgānupassīti ettha dve virāgā khayavirāgo ca accantavirāgo ca. Tattha saṅkhārānaṃ khayavayato anupassanāpi, accantavirāgaṃ nibbānaṃ virāgato dassanamaggañāṇampi virāgānupassanā. Tadubhayasamāṅgīpuggalo virāgānupassī nāma, taṃ sandhāya vuttaṃ ‘‘virāgānupassī’’ti, virāgato anupassantoti attho. Nirodhānupassimhipi eseva nayo, nirodhopi hi khayanirodho ca accantanirodho cāti duvidhoyeva. Paṭinissaggānupassīti ettha paṭinissaggo vuccati vossaggo, so ca pariccāgavossaggo pakkhandanavossaggoti duvidho hoti . Tattha pariccāgavossaggoti vipassanā, sā hi tadaṅgavasena kilese ca khandhe ca vossajjati. Pakkhandanavossaggoti maggo, so hi nibbānaṃ ārammaṇaṃ ārammaṇato pakkhandati. Dvīhipi vā kāraṇehi vossaggoyeva, samucchedavasena khandhānaṃ kilesānañca vossajjanato, nibbānañca pakkhandanato. Tasmā kilese ca khandhe ca pariccajatīti pariccāgavossaggo, nirodhe nibbānadhātuyā cittaṃ pakkhandatīti pakkhandanavossaggoti ubhayampetaṃ magge sameti. Tadubhayasamaṅgīpuggalo imāya paṭinissaggānupassanāya samannāgatattā paṭinissaggānupassī nāma hoti. Taṃ sandhāya vuttaṃ ‘‘paṭinissaggānupassī’’ti. Na kiñci loke upādiyatīti kiñci ekampi saṅkhāragataṃ taṇhāvasena na upādiyati na gaṇhāti na parāmasati. Anupādiyaṃ na paritassatīti aggaṇhanto taṇhāparitassanāya na paritassati. Paccattaññeva parinibbāyatīti sayameva kilesaparinibbānena parinibbāyati. Khīṇā jātītiādinā panassa paccavekkhaṇāva dassitā. Iti bhagavā sakkassa devānamindassa saṃkhittena khīṇāsavassa pubbabhāgappaṭipadaṃ pucchito sallahukaṃ katvā saṃkhitteneva khippaṃ kathesi.
༣༩༡. ཨཝིདཱུརེ ནིསིནྣོ ཧོཏཱིཏི ཨནནྟརེ ཀཱུཊཱགཱརེ ནིསིནྣོ ཧོཏི། ཨབྷིསམེཙྩཱཏི ཉཱཎེན ཨབྷིསམཱགནྟྭཱ, ཛཱནིཏྭཱཏི ཨཏྠོ། ཨིདཾ ཝུཏྟཾ ཧོཏི – ཀིཾ ནུ ཁོ ཨེས ཛཱནིཏྭཱ ཨནུམོདི, ཨུདཱཧུ ཨཛཱནིཏྭཱ ཝཱཏི། ཀསྨཱ པནསྶ ཨེཝམཧོསཱིཏི? ཐེརོ ཀིར ན བྷགཝཏོ པཉྷཝིསྶཛྫནསདྡཾ ཨསྶོསི, སཀྐསྶ པན དེཝརཉྙོ, ‘‘ཨེཝམེཏཾ བྷགཝཱ ཨེཝམེཏཾ སུགཏཱ’’ཏི ཨནུམོདནསདྡཾ ཨསྶོསི། སཀྐོ ཀིར དེཝརཱཛཱ མཧཏཱ སདྡེན ཨནུམོདི། ཨཐ ཀསྨཱ ན བྷགཝཏོ སདྡཾ ཨསྶོསཱིཏི? ཡཐཱཔརིསཝིཉྙཱཔཀཏྟཱ། བུདྡྷཱནཉྷི དྷམྨཾ ཀཐེནྟཱནཾ ཨེཀཱབདྡྷཱཡ ཙཀྐཝཱལ༹པརིཡནྟཱཡཔི པརིསཱཡ སདྡོ སུཡྻཏི, པརིཡནྟཾ པན མུཉྩིཏྭཱ ཨངྒུལིམཏྟམྤི བཧིདྡྷཱ ན ནིཙྪརཏི། ཀསྨཱ? ཨེཝརཱུཔཱ མདྷུརཀཐཱ མཱ ནིརཏྠཀཱ ཨགམཱསཱིཏི། ཏདཱ བྷགཝཱ མིགཱརམཱཏུཔཱསཱདེ སཏྟརཏནམཡེ ཀཱུཊཱགཱརེ སིརིགབྦྷམྷི ནིསིནྣོ ཧོཏི, ཏསྶ དཀྑིཎཔསྶེ སཱརིཔུཏྟཏྠེརསྶ ཝསནཀཱུཊཱགཱརཾ, ཝཱམཔསྶེ མཧཱམོགྒལླཱནསྶ, ཨནྟརེ ཚིདྡཝིཝརོཀཱསོ ནཏྠི, ཏསྨཱ ཐེརོ ན བྷགཝཏོ སདྡཾ ཨསྶོསི, སཀྐསྶེཝ ཨསྶོསཱིཏི།
391.Avidūre nisinno hotīti anantare kūṭāgāre nisinno hoti. Abhisameccāti ñāṇena abhisamāgantvā, jānitvāti attho. Idaṃ vuttaṃ hoti – kiṃ nu kho esa jānitvā anumodi, udāhu ajānitvā vāti. Kasmā panassa evamahosīti? Thero kira na bhagavato pañhavissajjanasaddaṃ assosi, sakkassa pana devarañño, ‘‘evametaṃ bhagavā evametaṃ sugatā’’ti anumodanasaddaṃ assosi. Sakko kira devarājā mahatā saddena anumodi. Atha kasmā na bhagavato saddaṃ assosīti? Yathāparisaviññāpakattā. Buddhānañhi dhammaṃ kathentānaṃ ekābaddhāya cakkavāḷapariyantāyapi parisāya saddo suyyati, pariyantaṃ pana muñcitvā aṅgulimattampi bahiddhā na niccharati. Kasmā? Evarūpā madhurakathā mā niratthakā agamāsīti. Tadā bhagavā migāramātupāsāde sattaratanamaye kūṭāgāre sirigabbhamhi nisinno hoti, tassa dakkhiṇapasse sāriputtattherassa vasanakūṭāgāraṃ, vāmapasse mahāmoggallānassa, antare chiddavivarokāso natthi, tasmā thero na bhagavato saddaṃ assosi, sakkasseva assosīti.
པཉྩཧི ཏཱུརིཡསཏེཧཱིཏི པཉྩངྒིཀཱནཾ ཏཱུརིཡཱནཾ པཉྩཧི སཏེཧི། པཉྩངྒིཀཾ ཏཱུརིཡཾ ནཱམ ཨཱཏཏཾ ཝིཏཏཾ ཨཱཏཏཝིཏཏཾ སུསིརཾ གྷནནྟི ཨིམེཧི པཉྩཧི ཨངྒེཧི སམནྣཱགཏཾ། ཏཏྠ ཨཱཏཏཾ ནཱམ ཙམྨཔརིཡོནདྡྷེསུ བྷེརིཨཱདཱིསུ ཨེཀཏལཏཱུརིཡཾ། ཝིཏཏཾ ནཱམ ཨུབྷཡཏལཾ། ཨཱཏཏཝིཏཏཾ ནཱམ ཏནྟིབདྡྷཔཎཝཱདི། སུསིརཾ ཝཾསཱདི། གྷནཾ སམྨཱདི། སམཔྤིཏོཏི ཨུཔགཏོ། སམངྒཱིབྷཱུཏོཏི ཏསྶེཝ ཝེཝཙནཾ། པརིཙཱརེཏཱིཏི ཏཾ སམྤཏྟིཾ ཨནུབྷཝནྟོ ཏཏོ ཏཏོ ཨིནྡྲིཡཱནི ཙཱརེཏི། ཨིདཾ ཝུཏྟཾ ཧོཏི – པརིཝཱརེཏྭཱ ཝཛྫམཱནེཧི པཉྩཧི ཏཱུརིཡསཏེཧི སམནྣཱགཏོ ཧུཏྭཱ དིབྦསམྤཏྟིཾ ཨནུབྷཝཏཱི། པཊིཔཎཱམེཏྭཱཏི ཨཔནེཏྭཱ, ནིསྶདྡཱནི ཀཱརཱཔེཏྭཱཏི ཨཏྠོ། ཡཐེཝ ཧི ཨིདཱནི སདྡྷཱ རཱཛཱནོ གརུབྷཱཝནིཡཾ བྷིཀྑུཾ དིསྭཱ – ‘‘ཨསུཀོ ནཱམ ཨཡྻོ ཨཱགཙྪཏི, མཱ, ཏཱཏཱ, གཱཡཐ, མཱ ཝཱདེཐ, མཱ ནཙྩཐཱ’’ཏི ནཱཊཀཱནི པཊིཝིནེནྟི, སཀྐོཔི ཐེརཾ དིསྭཱ ཨེཝམཀཱསི། ཙིརསྶཾ ཁོ, མཱརིས མོགྒལླཱན, ཨིམཾ པརིཡཱཡམཀཱསཱིཏི ཨེཝརཱུཔཾ ལོཀེ པཀཏིཡཱ པིཡསམུདཱཧཱརཝཙནཾ ཧོཏི, ལོཀིཡཱ ཧི ཙིརསྶཾ ཨཱགཏམྤི ཨནཱགཏཔུབྦམྤི མནཱཔཛཱཏིཡཾ ཨཱགཏཾ དིསྭཱ, – ‘‘ཀུཏོ བྷཝཾ ཨཱགཏོ, ཙིརསྶཾ བྷཝཾ ཨཱགཏོ, ཀཐཾ ཏེ ཨིདྷཱགམནམགྒོ ཉཱཏོ མགྒམཱུལ༹ྷོསཱི’’ཏིཨཱདཱིནི ཝདནྟི། ཨཡཾ པན ཨཱགཏཔུབྦཏྟཱཡེཝ ཨེཝམཱཧ། ཐེརོ ཧི ཀཱལེན ཀཱལཾ དེཝཙཱརིཀཾ གཙྪཏིཡེཝ། ཏཏྠ པརིཡཱཡམཀཱསཱིཏི ཝཱརམཀཱསི། ཡདིདཾ ཨིདྷཱགམནཱཡཱཏི ཡོ ཨཡཾ ཨིདྷཱགམནཱཡ ཝཱརོ, ཏཾ, བྷནྟེ, ཙིརསྶམཀཱསཱིཏི ཝུཏྟཾ ཧོཏི། ཨིདམཱསནཾ པཉྙཏྟནྟི ཡོཛནིཀཾ མཎིཔལླངྐཾ པཉྙཔཱཔེཏྭཱ ཨེཝམཱཧ།
Pañcahitūriyasatehīti pañcaṅgikānaṃ tūriyānaṃ pañcahi satehi. Pañcaṅgikaṃ tūriyaṃ nāma ātataṃ vitataṃ ātatavitataṃ susiraṃ ghananti imehi pañcahi aṅgehi samannāgataṃ. Tattha ātataṃ nāma cammapariyonaddhesu bheriādīsu ekatalatūriyaṃ. Vitataṃ nāma ubhayatalaṃ. Ātatavitataṃ nāma tantibaddhapaṇavādi. Susiraṃ vaṃsādi. Ghanaṃ sammādi. Samappitoti upagato. Samaṅgībhūtoti tasseva vevacanaṃ. Paricāretīti taṃ sampattiṃ anubhavanto tato tato indriyāni cāreti. Idaṃ vuttaṃ hoti – parivāretvā vajjamānehi pañcahi tūriyasatehi samannāgato hutvā dibbasampattiṃ anubhavatī. Paṭipaṇāmetvāti apanetvā, nissaddāni kārāpetvāti attho. Yatheva hi idāni saddhā rājāno garubhāvaniyaṃ bhikkhuṃ disvā – ‘‘asuko nāma ayyo āgacchati, mā, tātā, gāyatha, mā vādetha, mā naccathā’’ti nāṭakāni paṭivinenti, sakkopi theraṃ disvā evamakāsi. Cirassaṃ kho, mārisa moggallāna, imaṃ pariyāyamakāsīti evarūpaṃ loke pakatiyā piyasamudāhāravacanaṃ hoti, lokiyā hi cirassaṃ āgatampi anāgatapubbampi manāpajātiyaṃ āgataṃ disvā, – ‘‘kuto bhavaṃ āgato, cirassaṃ bhavaṃ āgato, kathaṃ te idhāgamanamaggo ñāto maggamūḷhosī’’tiādīni vadanti. Ayaṃ pana āgatapubbattāyeva evamāha. Thero hi kālena kālaṃ devacārikaṃ gacchatiyeva. Tattha pariyāyamakāsīti vāramakāsi. Yadidaṃ idhāgamanāyāti yo ayaṃ idhāgamanāya vāro, taṃ, bhante, cirassamakāsīti vuttaṃ hoti. Idamāsanaṃ paññattanti yojanikaṃ maṇipallaṅkaṃ paññapāpetvā evamāha.
༣༩༢. བཧུཀིཙྩཱ བཧུཀརཎཱིཡཱཏི ཨེཏྠ ཡེསཾ བཧཱུནི ཀིཙྩཱནི, ཏེ བཧུཀིཙྩཱ། བཧུཀརཎཱིཡཱཏི ཏསྶེཝ ཝེཝཙནཾ། ཨཔྤེཝ སཀེན ཀརཎཱིཡེནཱཏི སཀརཎཱིཡམེཝ ཨཔྤཾ མནྡཾ, ན བཧུ, དེཝཱནཾ ཀརཎཱིཡཾ པན བཧུ, པཐཝིཏོ པཊྛཱཡ ཧི ཀཔྤརུཀྑམཱཏུགཱམཱདཱིནཾ ཨཏྠཱཡ ཨཊྚཱ སཀྐསྶ སནྟིཀེ ཚིཛྫནྟི, ཏསྨཱ ནིཡམེནྟོ ཨཱཧ – ཨཔིཙ དེཝཱནཾཡེཝ ཏཱཝཏིཾསཱནཾ ཀརཎཱིཡེནཱཏི། དེཝཱནཉྷི དྷཱིཏཱ ཙ པུཏྟཱ ཙ ཨངྐེ ནིབྦཏྟནྟི, པཱདཔརིཙཱརིཀཱ ཨིཏྠིཡོ སཡནེ ནིབྦཏྟནྟི, ཏཱསཾ མཎྜནཔསཱདྷནཀཱརིཀཱ དེཝདྷཱིཏཱ སཡནཾ པརིཝཱརེཏྭཱ ནིབྦཏྟནྟི, ཝེཡྻཱཝཙྩཀརཱ ཨནྟོཝིམཱནེ ནིབྦཏྟནྟི, ཨེཏེསཾ ཨཏྠཱཡ ཨཊྚཀརཎཾ ནཏྠི། ཡེ པན སཱིམནྟརེ ནིབྦཏྟནྟི, ཏེ ‘‘མམ སནྟཀཱ ཏཝ སནྟཀཱ’’ཏི ནིཙྪེཏུཾ ཨསཀྐོནྟཱ ཨཊྚཾ ཀརོནྟི, སཀྐཾ དེཝརཱཛཱནཾ པུཙྪནྟི, སོ ཡསྶ ཝིམཱནཾ ཨཱསནྣཏརཾ, ཏསྶ སནྟཀོཏི ཝདཏི། སཙེ དྭེཔི སམཊྛཱནེ ཧོནྟི, ཡསྶ ཝིམཱནཾ ཨོལོཀེནྟོ ཋིཏོ, ཏསྶ སནྟཀོཏི ཝདཏི། སཙེ ཨེཀམྤི ན ཨོལོཀེཏི, ཏཾ ཨུབྷིནྣཾ ཀལཧུཔཙྪེདནཏྠཾ ཨཏྟནོ སནྟཀཾ ཀརོཏི། ཏཾ སནྡྷཱཡ, ‘‘དེཝཱནཾཡེཝ ཏཱཝཏིཾསཱནཾ ཀརཎཱིཡེནཱ’’ཏི ཨཱཧ། ཨཔིཙསྶ ཨེཝརཱུཔཾ ཀཱིལཱ༹ཀིཙྩམྤི ཀརཎཱིཡམེཝ།
392.Bahukiccā bahukaraṇīyāti ettha yesaṃ bahūni kiccāni, te bahukiccā. Bahukaraṇīyāti tasseva vevacanaṃ. Appeva sakena karaṇīyenāti sakaraṇīyameva appaṃ mandaṃ, na bahu, devānaṃ karaṇīyaṃ pana bahu, pathavito paṭṭhāya hi kapparukkhamātugāmādīnaṃ atthāya aṭṭā sakkassa santike chijjanti, tasmā niyamento āha – apica devānaṃyeva tāvatiṃsānaṃ karaṇīyenāti. Devānañhi dhītā ca puttā ca aṅke nibbattanti, pādaparicārikā itthiyo sayane nibbattanti, tāsaṃ maṇḍanapasādhanakārikā devadhītā sayanaṃ parivāretvā nibbattanti, veyyāvaccakarā antovimāne nibbattanti, etesaṃ atthāya aṭṭakaraṇaṃ natthi. Ye pana sīmantare nibbattanti, te ‘‘mama santakā tava santakā’’ti nicchetuṃ asakkontā aṭṭaṃ karonti, sakkaṃ devarājānaṃ pucchanti, so yassa vimānaṃ āsannataraṃ, tassa santakoti vadati. Sace dvepi samaṭṭhāne honti, yassa vimānaṃ olokento ṭhito, tassa santakoti vadati. Sace ekampi na oloketi, taṃ ubhinnaṃ kalahupacchedanatthaṃ attano santakaṃ karoti. Taṃ sandhāya, ‘‘devānaṃyeva tāvatiṃsānaṃ karaṇīyenā’’ti āha. Apicassa evarūpaṃ kīḷākiccampi karaṇīyameva.
ཡཾ ནོ ཁིཔྤམེཝ ཨནྟརདྷཱཡཏཱིཏི ཡཾ ཨམྷཱཀཾ སཱིགྷམེཝ ཨནྡྷཀཱརེ རཱུཔགཏཾ ཝིཡ ན དིསྶཏི། ཨིམིནཱ – ‘‘ཨཧཾ, བྷནྟེ, ཏཾ པཉྷཝིསྶཛྫནཾ ན སལླཀྑེམཱི’’ཏི དཱིཔེཏི། ཐེརོ – ‘‘ཀསྨཱ ནུ ཁོ ཨཡཾ ཡཀྑོ ཨསལླཀྑཎབྷཱཝཾ དཱིཔེཏི, པསྶེན པརིཧརཏཱི’’ཏི ཨཱཝཛྫནྟོ – ‘‘དེཝཱ ནཱམ མཧཱམཱུལ༹ྷཱ ཧོནྟི། ཚདྭཱརིཀེཧི ཨཱརམྨཎེཧི ནིམྨཐཱིཡམཱནཱ ཨཏྟནོ བྷུཏྟཱབྷུཏྟབྷཱཝམྤི པཱིཏཱཔཱིཏབྷཱཝམྤི ན ཛཱནནྟི, ཨིདྷ ཀཏམེཏྠ པམུསྶནྟཱི’’ཏི ཨཉྙཱསི། ཀེཙི པནཱཧུ – ‘‘ཐེརོ ཨེཏསྶ གརུ བྷཱཝནིཡོ, ཏསྨཱ ‘ཨིདཱནེཝ ལོཀེ ཨགྒཔུགྒལསྶ སནྟིཀེ པཉྷཾ ཨུགྒཧེཏྭཱ ཨཱགཏོ, ཨིདཱནེཝ ནཱཊཀཱནཾ ཨནྟརཾ པཝིཊྛོཏི ཨེཝཾ མཾ ཐེརོ ཏཛྫེཡྻཱ’ཏི བྷཡེན ཨེཝམཱཧཱ’’ཏི། ཨེཏཾ པན ཀོཧཉྙཾ ནཱམ ཧོཏི, ན ཨརིཡསཱཝཀསྶ ཨེཝརཱུཔཾ ཀོཧཉྙཾ ནཱམ ཧོཏི, ཏསྨཱ མཱུལ༹ྷབྷཱཝེནེཝ ན སལླཀྑེསཱིཏི ཝེདིཏབྦཾ། ཨུཔརི ཀསྨཱ སལླཀྑེསཱིཏི? ཐེརོ ཏསྶ སོམནསྶསཾཝེགཾ ཛནཡིཏྭཱ ཏམཾ ནཱིཧརི, ཏསྨཱ སལླཀྑེསཱིཏི།
Yaṃno khippameva antaradhāyatīti yaṃ amhākaṃ sīghameva andhakāre rūpagataṃ viya na dissati. Iminā – ‘‘ahaṃ, bhante, taṃ pañhavissajjanaṃ na sallakkhemī’’ti dīpeti. Thero – ‘‘kasmā nu kho ayaṃ yakkho asallakkhaṇabhāvaṃ dīpeti, passena pariharatī’’ti āvajjanto – ‘‘devā nāma mahāmūḷhā honti. Chadvārikehi ārammaṇehi nimmathīyamānā attano bhuttābhuttabhāvampi pītāpītabhāvampi na jānanti, idha katamettha pamussantī’’ti aññāsi. Keci panāhu – ‘‘thero etassa garu bhāvaniyo, tasmā ‘idāneva loke aggapuggalassa santike pañhaṃ uggahetvā āgato, idāneva nāṭakānaṃ antaraṃ paviṭṭhoti evaṃ maṃ thero tajjeyyā’ti bhayena evamāhā’’ti. Etaṃ pana kohaññaṃ nāma hoti, na ariyasāvakassa evarūpaṃ kohaññaṃ nāma hoti, tasmā mūḷhabhāveneva na sallakkhesīti veditabbaṃ. Upari kasmā sallakkhesīti? Thero tassa somanassasaṃvegaṃ janayitvā tamaṃ nīhari, tasmā sallakkhesīti.
ཨིདཱནི སཀྐོ པུབྦེ ཨཏྟནོ ཨེཝཾ བྷཱུཏཀཱརཎཾ ཐེརསྶ ཨཱརོཙེཏུཾ བྷཱུཏཔུབྦནྟིཨཱདིམཱཧ། ཏཏྠ སམུཔབྱཱུལ༹ྷོཏི སནྣིཔཏིཏོ རཱསིབྷཱུཏོ། ཨསུརཱ པརཱཛིནིཾསཱུཏི ཨསུརཱ པརཱཛཡཾ པཱཔུཎིཾསུ། ཀདཱ པནེཏེ པརཱཛིཏཱཏི? སཀྐསྶ ནིབྦཏྟཀཱལེ། སཀྐོ ཀིར ཨནནྟརེ ཨཏྟབྷཱཝེ མགདྷརཊྛེ མཙལགཱམེ མགྷོ ནཱམ མཱཎཝོ ཨཧོསི, པཎྜིཏོ བྱཏྟོ, བོདྷིསཏྟཙརིཡཱ ཝིཡསྶ ཙརིཡཱ ཨཧོསི། སོ ཏེཏྟིཾས པུརིསེ གཧེཏྭཱ ཀལྱཱཎམཀཱསི། ཨེཀདིཝསཾ ཨཏྟནོཝ པཉྙཱཡ ཨུཔཔརིཀྑིཏྭཱ གཱམམཛ྄ཛྷེ མཧཱཛནསྶ སནྣིཔཏིཏཊྛཱནེ ཀཙཝརཾ ཨུབྷཡཏོ ཨཔབྦཧིཏྭཱ ཏཾ ཋཱནཾ ཨཏིརམཎཱིཡམཀཱསི, པུན ཏཏྠེཝ མཎྜཔཾ ཀཱརེསི, པུན གཙྪནྟེ ཀཱལེ སཱལཾ ཀཱརེསི། གཱམཏོ ཙ ནིཀྑམིཏྭཱ གཱཝུཏམྤི ཨཌྜྷཡོཛནམྤི ཏིགཱཝུཏམྤི ཡོཛནམྤི ཝིཙརིཏྭཱ ཏེཧི སཧཱཡེཧི སདྡྷིཾ ཝིསམཾ སམཾ ཨཀཱསི། ཏེ སབྦེཔི ཨེཀཙྪནྡཱ ཏཏྠ ཏཏྠ སེཏུཡུཏྟཊྛཱནེསུ སེཏུཾ, མཎྜཔསཱལཱཔོཀྑརཎཱིམཱལཱགཙྪརོཔནཱདཱིནཾ ཡུཏྟཊྛཱནེསུ མཎྜཔཱདཱིནི ཀརོནྟཱ བཧུཾ པུཉྙམཀཾསུ ། མགྷོ སཏྟ ཝཏཔདཱནི པཱུརེཏྭཱ ཀཱཡསྶ བྷེདཱ སདྡྷིཾ སཧཱཡེཧི ཏཱཝཏིཾསབྷཝནེ ནིབྦཏྟི།
Idāni sakko pubbe attano evaṃ bhūtakāraṇaṃ therassa ārocetuṃ bhūtapubbantiādimāha. Tattha samupabyūḷhoti sannipatito rāsibhūto. Asurā parājiniṃsūti asurā parājayaṃ pāpuṇiṃsu. Kadā panete parājitāti? Sakkassa nibbattakāle. Sakko kira anantare attabhāve magadharaṭṭhe macalagāme magho nāma māṇavo ahosi, paṇḍito byatto, bodhisattacariyā viyassa cariyā ahosi. So tettiṃsa purise gahetvā kalyāṇamakāsi. Ekadivasaṃ attanova paññāya upaparikkhitvā gāmamajjhe mahājanassa sannipatitaṭṭhāne kacavaraṃ ubhayato apabbahitvā taṃ ṭhānaṃ atiramaṇīyamakāsi, puna tattheva maṇḍapaṃ kāresi, puna gacchante kāle sālaṃ kāresi. Gāmato ca nikkhamitvā gāvutampi aḍḍhayojanampi tigāvutampi yojanampi vicaritvā tehi sahāyehi saddhiṃ visamaṃ samaṃ akāsi. Te sabbepi ekacchandā tattha tattha setuyuttaṭṭhānesu setuṃ, maṇḍapasālāpokkharaṇīmālāgaccharopanādīnaṃ yuttaṭṭhānesu maṇḍapādīni karontā bahuṃ puññamakaṃsu . Magho satta vatapadāni pūretvā kāyassa bhedā saddhiṃ sahāyehi tāvatiṃsabhavane nibbatti.
ཏསྨིཾ ཀཱལེ ཨསུརགཎཱ ཏཱཝཏིཾསདེཝལོཀེ པཊིཝསནྟི། སབྦེ ཏེ དེཝཱནཾ སམཱནཱཡུཀཱ སམཱནཝཎྞཱ ཙ ཧོནྟི, ཏེ སཀྐཾ སཔརིསཾ དིསྭཱ ཨདྷུནཱ ནིབྦཏྟཱ ནཝཀདེཝཔུཏྟཱ ཨཱགཏཱཏི མཧཱཔཱནཾ སཛྫཡིཾསུ། སཀྐོ དེཝཔུཏྟཱནཾ སཉྙཾ ཨདཱསི – ‘‘ཨམྷེཧི ཀུསལཾ ཀརོནྟེཧི ན པརེཧི སདྡྷིཾ སཱདྷཱརཎཾ ཀཏཾ, ཏུམྷེ གཎྜཔཱནཾ མཱ པིཝིཏྠ པཱིཏམཏྟམེཝ ཀརོཐཱ’’ཏི། ཏེ ཏཐཱ ཨཀཾསུ། བཱལཨསུརཱ གཎྜཔཱནཾ པིཝིཏྭཱ མཏྟཱ ནིདྡཾ ཨོཀྐམིཾསུ། སཀྐོ དེཝཱནཾ སཉྙཾ དཏྭཱ ཏེ པཱདེསུ གཱཧཱཔེཏྭཱ སིནེརུཔཱདེ ཁིཔཱཔེསི, སིནེརུསྶ ཧེཊྛིམཏལེ ཨསུརབྷཝནཾ ནཱམ ཨཏྠི, ཏཱཝཏིཾསདེཝལོཀཔྤམཱཎམེཝ། ཏཏྠ ཨསུརཱ ཝསནྟི། ཏེསམྤི ཙིཏྟཔཱཊལི ནཱམ རུཀྑོ ཨཏྠི། ཏེ ཏསྶ པུཔྥནཀཱལེ ཛཱནནྟི – ‘‘ནཱཡཾ ཏཱཝཏིཾསཱ, སཀྐེན ཝཉྩིཏཱ མཡ’’ནྟི། ཏེ གཎྷཐ ནནྟི ཝཏྭཱ སིནེརུཾ པརིཧརམཱནཱ དེཝེ ཝུཊྛེ ཝམྨིཀཔཱདཏོ ཝམྨིཀམཀྑིཀཱ ཝིཡ ཨབྷིརུཧིཾསུ། ཏཏྠ ཀཱལེན དེཝཱ ཛིནནྟི, ཀཱལེན ཨསུརཱ། ཡདཱ དེཝཱནཾ ཛཡོ ཧོཏི, ཨསུརེ ཡཱཝ སམུདྡཔིཊྛཱ ཨནུབནྡྷནྟི། ཡདཱ ཨསུརཱནཾ ཛཡོ ཧོཏི, དེཝེ ཡཱཝ ཝེདིཀཔཱདཱ ཨནུབནྡྷནྟི། ཏསྨིཾ པན སངྒཱམེ དེཝཱནཾ ཛཡོ ཨཧོསི, དེཝཱ ཨསུརེ ཡཱཝ སམུདྡཔིཊྛཱ ཨནུབནྡྷིཾསུ། སཀྐོ ཨསུརེ པལཱཔེཏྭཱ པཉྩསུ ཋཱནེསུ ཨཱརཀྑཾ ཋཔེསི། ཨེཝཾ ཨཱརཀྑཾ དཏྭཱ ཝེདིཀཔཱདེ ཝཛིརཧཏྠཱ ཨིནྡཔཊིམཱཡོ ཋཔེསི། ཨསུརཱ ཀཱལེན ཀཱལཾ ཨུཊྛཧིཏྭཱ ཏཱ པཊིམཱཡོ དིསྭཱ, ‘‘སཀྐོ ཨཔྤམཏྟོ ཏིཊྛཏཱི’’ཏི ཏཏོཝ ནིཝཏྟནྟི། ཏཏོ པཊིནིཝཏྟིཏྭཱཏི ཝིཛིཏཊྛཱནཏོ ནིཝཏྟིཏྭཱ། པརིཙཱརིཀཱཡོཏི མཱལཱགནྡྷཱདིཀམྨཀཱརིཀཱཡོ།
Tasmiṃ kāle asuragaṇā tāvatiṃsadevaloke paṭivasanti. Sabbe te devānaṃ samānāyukā samānavaṇṇā ca honti, te sakkaṃ saparisaṃ disvā adhunā nibbattā navakadevaputtā āgatāti mahāpānaṃ sajjayiṃsu. Sakko devaputtānaṃ saññaṃ adāsi – ‘‘amhehi kusalaṃ karontehi na parehi saddhiṃ sādhāraṇaṃ kataṃ, tumhe gaṇḍapānaṃ mā pivittha pītamattameva karothā’’ti. Te tathā akaṃsu. Bālaasurā gaṇḍapānaṃ pivitvā mattā niddaṃ okkamiṃsu. Sakko devānaṃ saññaṃ datvā te pādesu gāhāpetvā sinerupāde khipāpesi, sinerussa heṭṭhimatale asurabhavanaṃ nāma atthi, tāvatiṃsadevalokappamāṇameva. Tattha asurā vasanti. Tesampi cittapāṭali nāma rukkho atthi. Te tassa pupphanakāle jānanti – ‘‘nāyaṃ tāvatiṃsā, sakkena vañcitā maya’’nti. Te gaṇhatha nanti vatvā sineruṃ pariharamānā deve vuṭṭhe vammikapādato vammikamakkhikā viya abhiruhiṃsu. Tattha kālena devā jinanti, kālena asurā. Yadā devānaṃ jayo hoti, asure yāva samuddapiṭṭhā anubandhanti. Yadā asurānaṃ jayo hoti, deve yāva vedikapādā anubandhanti. Tasmiṃ pana saṅgāme devānaṃ jayo ahosi, devā asure yāva samuddapiṭṭhā anubandhiṃsu. Sakko asure palāpetvā pañcasu ṭhānesu ārakkhaṃ ṭhapesi. Evaṃ ārakkhaṃ datvā vedikapāde vajirahatthā indapaṭimāyo ṭhapesi. Asurā kālena kālaṃ uṭṭhahitvā tā paṭimāyo disvā, ‘‘sakko appamatto tiṭṭhatī’’ti tatova nivattanti. Tato paṭinivattitvāti vijitaṭṭhānato nivattitvā. Paricārikāyoti mālāgandhādikammakārikāyo.
༣༩༣. ཝེསྶཝཎོ ཙ མཧཱརཱཛཱཏི སོ ཀིར སཀྐསྶ ཝལླབྷོ, བལཝཝིསྶཱསིཀོ, ཏསྨཱ སཀྐེན སདྡྷིཾ ཨགམཱསི། པུརཀྑཏྭཱཏི པུརཏོ ཀཏྭཱ། པཝིསིཾསཱུཏི པཝིསིཏྭཱ པན ཨུཔཌྜྷཔིཧིཏཱནི དྭཱརཱནི ཀཏྭཱ ཨོལོཀཡམཱནཱ ཨཊྛཾསུ། ཨིདམྤི, མཱརིས མོགྒལླཱན, པསྶ ཝེཛཡནྟསྶ པཱསཱདསྶ རཱམཎེཡྻཀནྟི, མཱརིས མོགྒལླཱན, ཨིདམྤི ཝེཛཡནྟསྶ པཱསཱདསྶ རཱམཎེཡྻཀཾ པསྶ, སུཝཎྞཏྠམྦྷེ པསྶ, རཛཏཏྠམྦྷེ མཎིཏྠམྦྷེ པཝཱལ༹ཏྠམྦྷེ ལོཧིཏངྒཏྠམྦྷེ མསཱརགལླཏྠམྦྷེ མུཏྟཏྠམྦྷེ སཏྟརཏནཏྠམྦྷེ, ཏེསཾཡེཝ སུཝཎྞཱདིམཡེ གྷཊཀེ ཝཱལ༹རཱུཔཀཱནི ཙ པསྶཱཏི ཨེཝཾ ཐམྦྷཔནྟིཡོ ཨཱདིཾ ཀཏྭཱ རཱམཎེཡྻཀཾ དསྶེནྟོ ཨེཝམཱཧ། ཡཐཱ ཏཾ པུབྦེཀཏཔུཉྙསྶཱཏི ཡཐཱ པུབྦེ ཀཏཔུཉྙསྶ ཨུཔབྷོགཊྛཱནེན སོབྷིཏབྦཾ, ཨེཝམེཝཾ སོབྷཏཱིཏི ཨཏྠོ། ཨཏིབཱལ༹ྷཾ ཁོ ཨཡཾ ཡཀྑོ པམཏྟོ ཝིཧརཏཱིཏི ཨཏྟནོ པཱསཱདེ ནཱཊཀཔརིཝཱརེན སམྤཏྟིཡཱ ཝསེན ཨཏིཝིཡ མཏྟོ།
393.Vessavaṇo ca mahārājāti so kira sakkassa vallabho, balavavissāsiko, tasmā sakkena saddhiṃ agamāsi. Purakkhatvāti purato katvā. Pavisiṃsūti pavisitvā pana upaḍḍhapihitāni dvārāni katvā olokayamānā aṭṭhaṃsu. Idampi, mārisa moggallāna, passa vejayantassa pāsādassa rāmaṇeyyakanti, mārisa moggallāna, idampi vejayantassa pāsādassa rāmaṇeyyakaṃ passa, suvaṇṇatthambhe passa, rajatatthambhe maṇitthambhe pavāḷatthambhe lohitaṅgatthambhe masāragallatthambhe muttatthambhe sattaratanatthambhe, tesaṃyeva suvaṇṇādimaye ghaṭake vāḷarūpakāni ca passāti evaṃ thambhapantiyo ādiṃ katvā rāmaṇeyyakaṃ dassento evamāha. Yathā taṃ pubbekatapuññassāti yathā pubbe katapuññassa upabhogaṭṭhānena sobhitabbaṃ, evamevaṃ sobhatīti attho. Atibāḷhaṃkho ayaṃ yakkho pamatto viharatīti attano pāsāde nāṭakaparivārena sampattiyā vasena ativiya matto.
ཨིདྡྷཱབྷིསངྑཱརཾ ཨབྷིསངྑཱསཱིཏི ཨིདྡྷིམཀཱསི། ཨཱཔོཀསིཎཾ སམཱཔཛྫིཏྭཱ པཱསཱདཔཏིཊྛིཏོཀཱསཾ ཨུདཀཾ ཧོཏཱུཏི ཨིདྡྷིཾ ཨདྷིཊྛཱཡ པཱསཱདཀཎྞིཀེ པཱདངྒུཊྛཀེན པཧརི། སོ པཱསཱདོ ཡཐཱ ནཱམ ཨུདཀཔིཊྛེ ཋཔིཏཔཏྟཾ མུཁཝཊྚིཡཾ ཨངྒུལིཡཱ པཧཊཾ ཨཔརཱཔརཾ ཀམྤཏི ཙལཏི ན སནྟིཊྛཏི། ཨེཝམེཝཾ སཾཀམྤི སམྤཀམྤི སམྤཝེདྷི, ཐམྦྷཔིཊྛསངྒྷཱཊཀཎྞིཀགོཔཱནསིཨཱདཱིནི ཀརཀརཱཏི སདྡཾ མུཉྩནྟཱནི པཏིཏུཾ ཝིཡ ཨཱརདྡྷཱནི། ཏེན ཝུཏྟཾ – ‘‘སངྐམྤེསི སམྤཀམྤེསི སམྤཝེདྷེསཱི’’ཏི། ཨཙྪརིཡབྦྷུཏཙིཏྟཛཱཏཱཏི ཨཧོ ཨཙྪརིཡཾ, ཨཧོ ཨབྦྷུཏནྟི ཨེཝཾ སཉྫཱཏཨཙྪརིཡཨབྦྷུཏཱ ཙེཝ སཉྫཱཏཏུཊྛིནོ ཙ ཨཧེསུཾ ཨུཔྤནྣབལཝསོམནསྶཱ། སཾཝིགྒནྟི ཨུབྦིགྒཾ། ལོམཧཊྛཛཱཏནྟི ཛཱཏལོམཧཾསཾ, ཀཉྩནབྷིཏྟིཡཾ ཋཔིཏམཎིནཱགདནྟེཧི ཝིཡ ཨུདྡྷགྒེཧི ལོམེཧི ཨཱཀིཎྞསརཱིརནྟི ཨཏྠོ། ལོམཧཾསོ ཙ ནཱམེས སོམནསྶེནཔི ཧོཏི དོམནསྶེནཔི, ཨིདྷ པན སོམནསྶེན ཛཱཏོ། ཐེརོ ཧི སཀྐསྶ སོམནསྶཝེགེན སཾཝེཛེཏུཾ ཏཾ པཱཊིཧཱརིཡམཀཱསི། ཏསྨཱ སོམནསྶཝེགེན སཾཝིགྒལོམཧཊྛཾ ཝིདིཏྭཱཏི ཨཏྠོ།
Iddhābhisaṅkhāraṃ abhisaṅkhāsīti iddhimakāsi. Āpokasiṇaṃ samāpajjitvā pāsādapatiṭṭhitokāsaṃ udakaṃ hotūti iddhiṃ adhiṭṭhāya pāsādakaṇṇike pādaṅguṭṭhakena pahari. So pāsādo yathā nāma udakapiṭṭhe ṭhapitapattaṃ mukhavaṭṭiyaṃ aṅguliyā pahaṭaṃ aparāparaṃ kampati calati na santiṭṭhati. Evamevaṃ saṃkampi sampakampi sampavedhi, thambhapiṭṭhasaṅghāṭakaṇṇikagopānasiādīni karakarāti saddaṃ muñcantāni patituṃ viya āraddhāni. Tena vuttaṃ – ‘‘saṅkampesi sampakampesi sampavedhesī’’ti. Acchariyabbhutacittajātāti aho acchariyaṃ, aho abbhutanti evaṃ sañjātaacchariyaabbhutā ceva sañjātatuṭṭhino ca ahesuṃ uppannabalavasomanassā. Saṃvigganti ubbiggaṃ. Lomahaṭṭhajātanti jātalomahaṃsaṃ, kañcanabhittiyaṃ ṭhapitamaṇināgadantehi viya uddhaggehi lomehi ākiṇṇasarīranti attho. Lomahaṃso ca nāmesa somanassenapi hoti domanassenapi, idha pana somanassena jāto. Thero hi sakkassa somanassavegena saṃvejetuṃ taṃ pāṭihāriyamakāsi. Tasmā somanassavegena saṃviggalomahaṭṭhaṃ viditvāti attho.
༣༩༤. ཨིདྷཱཧཾ, མཱརིསཱཏི ཨིདཱནིསྶ ཡསྨཱ ཐེརེན སོམནསྶསཾཝེགཾ ཛནཡིཏྭཱ ཏམཾ ཝིནོདིཏཾ, ཏསྨཱ སལླཀྑེཏྭཱ ཨེཝམཱཧ། ཨེསོ ནུ ཏེ, མཱརིས, སོ བྷགཝཱ སཏྠཱཏི, མཱརིས, ཏྭཾ ཀུཧིཾ གཏོསཱིཏི ཝུཏྟེ མཡ྄ཧཾ སཏྠུ སནྟིཀནྟི ཝདེསི, ཨིམསྨིཾ དེཝལོཀེ ཨེཀཔཱདཀེན ཝིཡ ཏིཊྛསི, ཡཾ ཏྭཾ ཨེཝཾ ཝདེསི, ཨེསོ ནུ ཏེ, མཱརིས, སོ བྷགཝཱ སཏྠཱཏི པུཙྪིཾསུ། སབྲཧྨཙཱརཱི མེ ཨེསོཏི ཨེཏྠ ཀིཉྩཱཔི ཐེརོ ཨནགཱརིཡོ ཨབྷིནཱིཧཱརསམྤནྣོ ཨགྒསཱཝཀོ, སཀྐོ ཨགཱརིཡོ, མགྒབྲཧྨཙརིཡཝསེན པནེཏེ སབྲཧྨཙཱརིནོ ཧོནྟི, ཏསྨཱ ཨེཝམཱཧ། ཨཧོ ནཱུན ཏེ སོ བྷགཝཱ སཏྠཱཏི སབྲཧྨཙཱརཱི ཏཱཝ ཏེ ཨེཝཾམཧིདྡྷིཀོ, སོ པན ཏེ བྷགཝཱ སཏྠཱ ཨཧོ ནཱུན མཧིདྡྷིཀོཏི སཏྠུ ཨིདྡྷིཔཱཊིཧཱརིཡདསྶནེ ཛཱཏཱབྷིལཱཔཱ ཧུཏྭཱ ཨེཝམཱཧཾསུ།
394.Idhāhaṃ, mārisāti idānissa yasmā therena somanassasaṃvegaṃ janayitvā tamaṃ vinoditaṃ, tasmā sallakkhetvā evamāha. Eso nu te, mārisa, so bhagavā satthāti, mārisa, tvaṃ kuhiṃ gatosīti vutte mayhaṃ satthu santikanti vadesi, imasmiṃ devaloke ekapādakena viya tiṭṭhasi, yaṃ tvaṃ evaṃ vadesi, eso nu te, mārisa, so bhagavā satthāti pucchiṃsu. Sabrahmacārī me esoti ettha kiñcāpi thero anagāriyo abhinīhārasampanno aggasāvako, sakko agāriyo, maggabrahmacariyavasena panete sabrahmacārino honti, tasmā evamāha. Ahonūna te so bhagavā satthāti sabrahmacārī tāva te evaṃmahiddhiko, so pana te bhagavā satthā aho nūna mahiddhikoti satthu iddhipāṭihāriyadassane jātābhilāpā hutvā evamāhaṃsu.
༣༩༥. ཉཱཏཉྙཏརསྶཱཏི པཉྙཱཏཉྙཏརསྶ, སཀྐོ ཧི པཉྙཱཏཱནཾ ཨཉྙཏརོ། སེསཾ སབྦཏྠ པཱཀཊམེཝ, དེསནཾ པན བྷགཝཱ ཡཐཱནུསནྡྷིནཱཝ ནིཊྛཱཔེསཱིཏི།
395.Ñātaññatarassāti paññātaññatarassa, sakko hi paññātānaṃ aññataro. Sesaṃ sabbattha pākaṭameva, desanaṃ pana bhagavā yathānusandhināva niṭṭhāpesīti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཙཱུལ༹ཏཎྷཱསངྑཡསུཏྟཝཎྞནཱ ནིཊྛིཏཱ།
Cūḷataṇhāsaṅkhayasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༧. ཙཱུལ༹ཏཎྷཱསངྑཡསུཏྟཾ • 7. Cūḷataṇhāsaṅkhayasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༧. ཙཱུལ༹ཏཎྷཱསངྑཡསུཏྟཝཎྞནཱ • 7. Cūḷataṇhāsaṅkhayasuttavaṇṇanā
