| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༧. ཙཱུལ༹ཏཎྷཱསངྑཡསུཏྟཝཎྞནཱ
7. Cūḷataṇhāsaṅkhayasuttavaṇṇanā
༣༩༠. ཏཏྲཱཏི ཏསྨིཾ པུབྦཱརཱམམིགཱརམཱཏུཔཱསཱདཱནཾ ཨཏྠཝིབྷཱཝནེ ཨཡཾ ཨིདཱནི ཝུཙྩམཱནཱ ཨནུཔུབྦཱི ཀཐཱ། མཎཱིནནྟི ཨེཏྠ པདུམརཱགམཎཱིནཾ ཨདྷིཔྤེཏཏྟཱ ཨཱཧ ‘‘ཨཉྙེཧི ཙཱ’’ཏི། ཏེན ཨིནྡནཱིལཱདིམཎཱིནཾ སངྒཧོ དཊྛབྦོ། ནཱིལཔཱིཏལོཧིཏོདཱཏམཉྫིཊྛཔབྷསྶརཀབརཝཎྞཝསེན སཏྟཝཎྞེཧི།
390.Tatrāti tasmiṃ pubbārāmamigāramātupāsādānaṃ atthavibhāvane ayaṃ idāni vuccamānā anupubbī kathā. Maṇīnanti ettha padumarāgamaṇīnaṃ adhippetattā āha ‘‘aññehi cā’’ti. Tena indanīlādimaṇīnaṃ saṅgaho daṭṭhabbo. Nīlapītalohitodātamañjiṭṭhapabhassarakabaravaṇṇavasena sattavaṇṇehi.
ཏཎྷཱ སབྦསོ ཁཱིཡནྟི ཨེཏྠཱཏི ཏཎྷཱསངྑཡོ (ཨ॰ ནི॰ ཊཱི॰ ༣.༧.༦༡), ཏསྨིཾ། ཏཎྷཱསངྑཡེཏི ཙ ཝིསཡེ ཨིདཾ བྷུམྨནྟི ཨཱཧ ‘‘ཏཾ ཨཱརམྨཎཾ ཀཏྭཱ’’ཏི། ཝིམུཏྟཙིཏྟཏཱཡཱཏི སབྦསཾཀིལེསེཧི ཝིམུཏྟཙིཏྟཏཱཡ། ཨཔརབྷཱགཔཊིཔདཱ ནཱམ ཨརིཡསཙྩཱབྷིསམཡོ, སཱ སཱསནཙཱརིགོཙརཱ པཙྩཏྟཾ ཝེདིཏབྦཏོཏི ཨཱཧ ‘‘པུབྦབྷཱགཔྤཊིཔདཾ སཾཁིཏྟེན དེསེཐཱཏི པུཙྪཏཱི’’ཏི། ཨཀུཔྤདྷམྨཏཱཡ ཁཡཝཡསངྑཱཏཾ ཨནྟཾ ཨཏཱིཏཱཏི ཨཙྩནྟཱ, སོ ཨེཝ ཨཔརིཧཱནསབྷཱཝཏྟཱ ཨཙྩནྟཱ ནིཊྛཱ ཨེཏསྶཱཏི ཨཙྩནྟནིཊྛོ། ཏེནཱཧ ‘‘ཨེཀནྟནིཊྛོ སཏཏནིཊྛོཏི ཨཏྠོ’’ཏི། ན ཧི པཊིཝིདྡྷསྶ ལོཀུཏྟརདྷམྨསྶ དསྶནཾ ཀུཔྤནཾ ནཱམ ཨཏྠི། ཨཙྩནྟམེཝ ཙཏཱུཧི ཡོགེཧི ཁེམོ ཨེཏསྶ ཨཏྠཱིཏི ཨཙྩནྟཡོགཀྑེམཱི། མགྒབྲཧྨཙརིཡསྶ ཝུསིཏཏྟཱ, ཏསྶ ཙ ཨཔརིཧཱནསབྷཱཝཏྟཱ ཨཙྩནྟཾ བྲཧྨཙཱརཱིཏི ཨཙྩནྟབྲཧྨཙཱརཱི། ཏེནཱཧ ‘‘ནིཙྩབྲཧྨཙཱརཱིཏི ཨཏྠོ’’ཏི། པརིཡོསཱནནྟི བྲཧྨཙརིཡསྶ པརིཡོསཱནཾ།
Taṇhā sabbaso khīyanti etthāti taṇhāsaṅkhayo (a. ni. ṭī. 3.7.61), tasmiṃ. Taṇhāsaṅkhayeti ca visaye idaṃ bhummanti āha ‘‘taṃ ārammaṇaṃ katvā’’ti. Vimuttacittatāyāti sabbasaṃkilesehi vimuttacittatāya. Aparabhāgapaṭipadā nāma ariyasaccābhisamayo, sā sāsanacārigocarā paccattaṃ veditabbatoti āha ‘‘pubbabhāgappaṭipadaṃ saṃkhittena desethāti pucchatī’’ti. Akuppadhammatāya khayavayasaṅkhātaṃ antaṃ atītāti accantā, so eva aparihānasabhāvattā accantā niṭṭhā etassāti accantaniṭṭho. Tenāha ‘‘ekantaniṭṭho satataniṭṭhoti attho’’ti. Na hi paṭividdhassa lokuttaradhammassa dassanaṃ kuppanaṃ nāma atthi. Accantameva catūhi yogehi khemo etassa atthīti accantayogakkhemī. Maggabrahmacariyassa vusitattā, tassa ca aparihānasabhāvattā accantaṃ brahmacārīti accantabrahmacārī. Tenāha ‘‘niccabrahmacārīti attho’’ti. Pariyosānanti brahmacariyassa pariyosānaṃ.
ཝེགཱཡཏཱིཏི ཏུརིཏཱཡཏི། སལླཀྑེསཱིཏི ཙིནྟེསི, ཨཏྟནཱ ཡཐཱ སུཏཱཡ སཏྠུ དེསནཱཡ ཨནུསྶརཎཝསེན ཨུཔདྷཱརེསི། ཨནུགྒཎྷིཏྭཱཝཱཏི ཨཏྠཝིནིཙྪཡཝསེན ཨནུགྒཧེཏྭཱ ཨེཝ། ཚསུ དྭཱརེསུ ནིཡུཏྟཱཏི ཚདྭཱརིཀཱ, ཏེཧི།
Vegāyatīti turitāyati. Sallakkhesīti cintesi, attanā yathā sutāya satthu desanāya anussaraṇavasena upadhāresi. Anuggaṇhitvāvāti atthavinicchayavasena anuggahetvā eva. Chasu dvāresu niyuttāti chadvārikā, tehi.
པཉྩཀྑནྡྷཱཏི པཉྩུཔཱདཱནཀྑནྡྷཱ། སཀྐཱཡསབྦཉྷི སནྡྷཱཡ ཨིདྷ ‘‘སབྦེ དྷམྨཱ’’ཏི ཝུཏྟཾ ཝིཔསྶནཱཝིསཡསྶ ཨདྷིཔྤེཏཏྟཱ, ཏསྨཱ ཨཱཡཏནདྷཱཏུཡོཔི ཏགྒཏིཀཱ ཨེཝ དཊྛབྦཱ། ཏེནཱཧ བྷགཝཱ ‘‘ནཱལཾ ཨབྷིནིཝེསཱཡཱ’’ཏི། ན ཡུཏྟཱ ཨབྷིནིཝེསཱཡ ‘‘ཨེཏཾ མམ, ཨེསོ མེ ཨཏྟཱ’’ཏི ཨཛ྄ཛྷོསཱནཱཡ། ‘‘ཨལམེཝ ནིབྦིནྡིཏུཾ ཨལཾ ཝིརཛྫིཏུ’’ནྟིཨཱདཱིསུ (དཱི॰ ནི॰ ༢.༢༧༢; སཾ॰ ནི॰ ༢.༡༢༤-༡༢༥, ༡༢༨, ༡༣༤, ༡༤༣) ཝིཡ ཨལཾ-སདྡོ ཡུཏྟཏྠོཔི ཧོཏཱིཏི ཨཱཧ ‘‘ན ཡུཏྟཱ’’ཏི། སམྤཛྫནྟཱིཏི བྷཝནྟི། ཡདིཔི ‘‘ཏཏིཡཱ, ཙཏུཏྠཱི’’ཏི ཨིདཾ ཝིསུདྡྷིདྭཡཾ ཨབྷིཉྙཱཔཉྙཱ, ཏསྶཱ པན སཔྤཙྩཡནཱམརཱུཔདསྶནབྷཱཝཏོ, སཏི ཙ པཙྩཡཔརིགྒཧེ སཔྤཙྩཡཏྟཱ (ནཱམརཱུཔསྶ ཨནིཙྩཏཱ, ཨནིཙྩཾ དུཀྑཾ, དུཀྑཉྩ ཨནཏྟཱཏི ཨཏྠཏོ) ལཀྑཎཏྟཡཾ སུཔཱཀཊམེཝ ཧོཏཱིཏི ཨཱཧ ‘‘ཨནིཙྩཾ དུཀྑཾ ཨནཏྟཱཏི ཉཱཏཔརིཉྙཱཡ ཨབྷིཛཱནཱཏཱི’’ཏི། ཏཐེཝ ཏཱིརཎཔརིཉྙཱཡཱཏི ཨིམིནཱ ཨནིཙྩཱདིབྷཱཝེན ནཱལཾ ཨབྷིནིཝེསཱཡཱཏི ནཱམརཱུཔསྶ ཨུཔསཾཧརཏི, ན ཨབྷིཉྙཱཔཉྙཱནཾ སམྦྷཱརདྷམྨཱནཾ། པུརིམཱཡ ཧི ཨཏྠཏོ ཨཱཔནྣལཀྑཎཏྟཡཾ གཎྷཱཏི སལཀྑཎསལླཀྑཎཔརཏྟཱ ཏསྶཱ, དུཏིཡཱཡ སརཱུཔཏོ ཏསྶཱ ལཀྑཎཏྟཡཱརོཔནཝསེན སམྨསནབྷཱཝཏོ། ཨེཀཙིཏྟཀྑཎིཀཏཱཡ ཨབྷིནིཔཱཏམཏྟཏཱཡ ཙ ཨཔྤམཏྟཀམྤི། རཱུཔཔརིགྒཧསྶ ཨོལཱ༹རིཀབྷཱཝཏོ ཨརཱུཔཔརིགྒཧཾ དསྶེཏི། དསྶེནྟོ ཙ ཝེདནཱཡ ཨཱསནྣབྷཱཝཏོ, ཝིསེསཏོ སུཁསཱརཱགིཏཱཡ, བྷཝསྶཱདགདྷིཏམཱནསཏཱཡ ཙ སཀྐསྶ ཝེདནཱཝསེན ནིབྦཏྟེཏྭཱ དསྶེཏི།
Pañcakkhandhāti pañcupādānakkhandhā. Sakkāyasabbañhi sandhāya idha ‘‘sabbe dhammā’’ti vuttaṃ vipassanāvisayassa adhippetattā, tasmā āyatanadhātuyopi taggatikā eva daṭṭhabbā. Tenāha bhagavā ‘‘nālaṃ abhinivesāyā’’ti. Na yuttā abhinivesāya ‘‘etaṃ mama, eso me attā’’ti ajjhosānāya. ‘‘Alameva nibbindituṃ alaṃ virajjitu’’ntiādīsu (dī. ni. 2.272; saṃ. ni. 2.124-125, 128, 134, 143) viya alaṃ-saddo yuttatthopi hotīti āha ‘‘na yuttā’’ti. Sampajjantīti bhavanti. Yadipi ‘‘tatiyā, catutthī’’ti idaṃ visuddhidvayaṃ abhiññāpaññā, tassā pana sappaccayanāmarūpadassanabhāvato, sati ca paccayapariggahe sappaccayattā (nāmarūpassa aniccatā, aniccaṃ dukkhaṃ, dukkhañca anattāti atthato) lakkhaṇattayaṃ supākaṭameva hotīti āha ‘‘aniccaṃ dukkhaṃ anattāti ñātapariññāya abhijānātī’’ti. Tatheva tīraṇapariññāyāti iminā aniccādibhāvena nālaṃ abhinivesāyāti nāmarūpassa upasaṃharati, na abhiññāpaññānaṃ sambhāradhammānaṃ. Purimāya hi atthato āpannalakkhaṇattayaṃ gaṇhāti salakkhaṇasallakkhaṇaparattā tassā, dutiyāya sarūpato tassā lakkhaṇattayāropanavasena sammasanabhāvato. Ekacittakkhaṇikatāya abhinipātamattatāya ca appamattakampi. Rūpapariggahassa oḷārikabhāvato arūpapariggahaṃ dasseti. Dassento ca vedanāya āsannabhāvato, visesato sukhasārāgitāya, bhavassādagadhitamānasatāya ca sakkassa vedanāvasena nibbattetvā dasseti.
ཨུཔྤཱདཝཡཊྛེནཱཏི ཨུདཡབྦཡསབྷཱཝེན ཨུཔྤཛྫིཏྭཱ ནིརུཛ྄ཛྷནེན། ཨནིཙྩཱཏི ཨདྡྷུ ཝཱ། ཨནིཙྩལཀྑཎཾ ཨནིཙྩཏཱ ཨུདཡཝཡཏཱ། ཏསྨཱཏི ཡསྨཱ པཉྩནྣཾ ཁནྡྷཱནཾ ཁཡཏོ ཝཡཏོ དསྶནཉཱཎཾ ཨནིཙྩཱནུཔསྶནཱ, ཏཾསམངྒཱི ཙ པུགྒལོ ཨནིཙྩཱནུཔསྶཱི , ཏསྨཱ། ཁཡཝིརཱགོཏི ཁཡསངྑཱཏོ ཝིརཱགོ སངྑཱརཱནཾ པལུཛྫནཱ། ཡཾ ཨཱགམྨ སབྦསོ སངྑཱརེཧི ཝིརཛྫནཱ ཧོཏི, ཏཾ ནིབྦཱནཾ ཨཙྩནྟཝིརཱགོ། ནིརོདྷཱནུཔསྶིམྷིཔཱིཏི ནིརོདྷཱནུཔསྶིཔདེཔི། ‘‘ཨེསེཝ ནཡོ’’ཏི ཨབྷིདིསིཏྭཱ ཏཾ ཨེཀདེསེན ཝིཝརནྟོ ‘‘ནིརོདྷོཔི ཧི…པེ॰… དུཝིདྷོཡེཝཱ’’ཏི ཨཱཧ། སབྦཱསཝསཾཝརེ ཝུཏྟཝོསྶགྒོཝ ཨིདྷ ‘‘པཊིནིསྶགྒོ’’ཏི ཝུཏྟོཏི དསྶེནྟོ ‘‘པཊིནིསྶགྒོ ཝུཙྩཏི ཝོསྶགྒོ’’ཏིཨཱདིམཱཧ། པརིཙྩཱགཝོསྶགྒོ ཝིཔསྶནཱ། པཀྑནྡནཝསེན ཨཔྤནཏོ པཀྑནྡནཝོསྶགྒོ མགྒོ ཨཉྙསྶ ཏདབྷཱཝཏོ། སོཏི མགྒོ། ཨཱརམྨཎཏོཏི ཀིཙྩསཱདྷནཝསེན ཨཱརམྨཎཀརཎཏོ། ཨེཝཉྷི མགྒཏོ ཨཉྙེསཾ ནིབྦཱནཱརམྨཎཱནཾ པཀྑནྡནཝོསྶགྒཱབྷཱཝོ སིདྡྷོ ཧོཏི། པརིཙྩཛནེན པཀྑནྡནེན ཙཱཏི དྭཱིཧིཔི ཝཱ ཀཱརཎེཧི། སབྦེསཾ ཁནྡྷཱནཾ ཝོསྶཛྫནཾ ཏཔྤཊིབདྡྷསཾཀིལེསཔྤཧཱནེན དཊྛབྦཾ། ཙིཏྟཾ པཀྑནྡཏཱིཏི མགྒསམྤཡུཏྟཾ ཙིཏྟཾ སནྡྷཱཡཱཧ། ཨུབྷཡམྤེཏཾ ཝོསྶཛྫནཾ། ཏདུབྷཡསམངྒཱིཏི ཝིཔསྶནཱསམངྒཱི མགྒསམངྒཱི ཙ། ‘‘ཨནིཙྩཱནུཔསྶནཱཡ ནིཙྩསཉྙཾ པཛཧཏཱི’’ཏིཨཱདིཝཙནཏོ (པཊི॰ མ॰ ༡.༥༢) ཡཐཱ ཝིཔསྶནཱཡ ཀིལེསཱནཾ པརིཙྩཱགཔཊིནིསྶགྒོ ལབྦྷཏི, ཨེཝཾ ཨཱཡཏིཾ ཏེཧི ཀིལེསེཧི ཨུཔྤཱདེཏབྦཁནྡྷཱནམྤི པརིཙྩཱགཔཊིནིསྶགྒོ ཝཏྟབྦོ, པཀྑནྡནཔཊིནིསྶགྒོ པན མགྒེ ལབྦྷམཱནཱཡ ཨེཀནྟཀཱརཎབྷཱུཏཱཡ ཝུཊྛཱནགཱམིནིཝིཔསྶནཱཡ ཝསེན ཝེདིཏབྦོ, མགྒེ པན ཏདུབྷཡམྤི ཉཱཡཱགཏམེཝ ནིཔྤརིཡཱཡཏོཝ ལབྦྷམཱནཏྟཱ། ཏེནཱཧ ‘‘ཏདུབྷཡསམངྒཱི པུགྒལོ’’ཏིཨཱདི།
Uppādavayaṭṭhenāti udayabbayasabhāvena uppajjitvā nirujjhanena. Aniccāti addhu vā. Aniccalakkhaṇaṃ aniccatā udayavayatā. Tasmāti yasmā pañcannaṃ khandhānaṃ khayato vayato dassanañāṇaṃ aniccānupassanā, taṃsamaṅgī ca puggalo aniccānupassī , tasmā. Khayavirāgoti khayasaṅkhāto virāgo saṅkhārānaṃ palujjanā. Yaṃ āgamma sabbaso saṅkhārehi virajjanā hoti, taṃ nibbānaṃ accantavirāgo. Nirodhānupassimhipīti nirodhānupassipadepi. ‘‘Eseva nayo’’ti abhidisitvā taṃ ekadesena vivaranto ‘‘nirodhopi hi…pe… duvidhoyevā’’ti āha. Sabbāsavasaṃvare vuttavossaggova idha ‘‘paṭinissaggo’’ti vuttoti dassento ‘‘paṭinissaggo vuccati vossaggo’’tiādimāha. Pariccāgavossaggo vipassanā. Pakkhandanavasena appanato pakkhandanavossaggo maggo aññassa tadabhāvato. Soti maggo. Ārammaṇatoti kiccasādhanavasena ārammaṇakaraṇato. Evañhi maggato aññesaṃ nibbānārammaṇānaṃ pakkhandanavossaggābhāvo siddho hoti. Pariccajanena pakkhandanena cāti dvīhipi vā kāraṇehi. Sabbesaṃ khandhānaṃ vossajjanaṃ tappaṭibaddhasaṃkilesappahānena daṭṭhabbaṃ. Cittaṃ pakkhandatīti maggasampayuttaṃ cittaṃ sandhāyāha. Ubhayampetaṃ vossajjanaṃ. Tadubhayasamaṅgīti vipassanāsamaṅgī maggasamaṅgī ca. ‘‘Aniccānupassanāya niccasaññaṃ pajahatī’’tiādivacanato (paṭi. ma. 1.52) yathā vipassanāya kilesānaṃ pariccāgapaṭinissaggo labbhati, evaṃ āyatiṃ tehi kilesehi uppādetabbakhandhānampi pariccāgapaṭinissaggo vattabbo, pakkhandanapaṭinissaggo pana magge labbhamānāya ekantakāraṇabhūtāya vuṭṭhānagāminivipassanāya vasena veditabbo, magge pana tadubhayampi ñāyāgatameva nippariyāyatova labbhamānattā. Tenāha ‘‘tadubhayasamaṅgī puggalo’’tiādi.
པུཙྪནྟསྶ ཨཛ྄ཛྷཱསཡཝསེན ‘‘ན ཀིཉྩི ལོཀེ ཨུཔཱདིཡཏཱི’’ཏི ཨེཏྠ ཀཱམུཔཱདཱནཝསེན ཨུཔཱདིཡནཾ པཊིཀྑིཔཱིཡཏཱིཏི ཨཱཧ ‘‘ཏཎྷཱཝསེན ན ཨུཔཱདིཡཏཱི’’ཏི། ཏཎྷཱཝསེན ཝཱ ཨསཏི ཨུཔཱདིཡནེ དིཊྛིཝསེན ཨུཔཱདིཡནཾ ཨནཝཀཱསམེཝཱཏི ‘‘ཏཎྷཱཝསེན’’ཨིཙྩེཝ ཝུཏྟཾ། ན པརཱམསཏཱིཏི ནཱདིཡཏི, དིཊྛིཔརཱམཱསཝསེན ཝཱ ‘‘ནིཙྩ’’ནྟིཨཱདིནཱ ན པརཱམསཏི། སཾཁིཏྟེནེཝ ཁིཔྤཾ ཀཐེསཱིཏི ཏསྶ ཨཛ྄ཛྷཱསཡཝསེན པཔཉྩཾ ཨཀཏྭཱ ཀཐེསི།
Pucchantassa ajjhāsayavasena ‘‘na kiñci loke upādiyatī’’ti ettha kāmupādānavasena upādiyanaṃ paṭikkhipīyatīti āha ‘‘taṇhāvasena na upādiyatī’’ti. Taṇhāvasena vā asati upādiyane diṭṭhivasena upādiyanaṃ anavakāsamevāti ‘‘taṇhāvasena’’icceva vuttaṃ. Na parāmasatīti nādiyati, diṭṭhiparāmāsavasena vā ‘‘nicca’’ntiādinā na parāmasati. Saṃkhitteneva khippaṃ kathesīti tassa ajjhāsayavasena papañcaṃ akatvā kathesi.
༣༩༡. ཨབྷིསམཱགནྟྭཱཏི ཨབྷིམུཁཉཱཎེན ཉེཡྻཾ སམཱགནྟྭཱ ཡཱཐཱཝཏོ ཝིདིཏྭཱ། ཏེནཱཧ ‘‘ཛཱནིཏྭཱ’’ཏི། ཡཐཱཔརིསཝིཉྙཱཔཀཏྟཱཏི ཡཐཱཔརིསཾ དྷམྨསམྤཊིགྒཱཧིཀཱཡ མཧཏིཡཱ, ཨཔྤཀཱཡ ཝཱ པརིསཱཡ ཨནུརཱུཔམེཝ ཝིཉྙཱཔནཏོ། པརིཡནྟཾ ན ནིཙྪརཏཱིཏི ན པཝཏྟཏི། མཱ ནིརཏྠཀཱ ཨགམཱསཱིཏི ཨིདཾ དྷམྨཏཱཝསེན ཝུཏྟཾ, ན སཏྠུ ཨཛ྄ཛྷཱསཡཝསེན། ཨེཀཉྷེཏཾ སཏྠུ ཝཙཱིགྷོསསྶ ཨཊྛསུ ཨངྒེསུ, ཡདིདཾ པརིསཔརིཡནྟཏཱ། ཚིདྡཝིཝརོཀཱསོཏི ཚིདྡབྷཱུཏོ, ཝིཝརབྷཱུཏོ ཝཱ ཨོཀཱསོཔི ནཏྠི, བྷགཝཏོ སདྡཱསཝནཀཱརཎཾ ཝུཏྟམེཝ། ཏསྨཱཏི ཡཐཱཝུཏྟཀཱརཎཏོ།
391.Abhisamāgantvāti abhimukhañāṇena ñeyyaṃ samāgantvā yāthāvato viditvā. Tenāha ‘‘jānitvā’’ti. Yathāparisaviññāpakattāti yathāparisaṃ dhammasampaṭiggāhikāya mahatiyā, appakāya vā parisāya anurūpameva viññāpanato. Pariyantaṃ na niccharatīti na pavattati. Mā niratthakā agamāsīti idaṃ dhammatāvasena vuttaṃ, na satthu ajjhāsayavasena. Ekañhetaṃ satthu vacīghosassa aṭṭhasu aṅgesu, yadidaṃ parisapariyantatā. Chiddavivarokāsoti chiddabhūto, vivarabhūto vā okāsopi natthi, bhagavato saddāsavanakāraṇaṃ vuttameva. Tasmāti yathāvuttakāraṇato.
པཉྩ ཨངྒཱནི ཨེཏསྶཱཏི པཉྩངྒཾ, པཉྩངྒཾ ཨེཝ པཉྩངྒིཀཾ། མཧཏཱིཨཱདི ཝཱིཎཱཝིསེསོཔི ཨཱཏཏམེཝཱཏི ‘‘ཙམྨཔརིཡོནདྡྷེསཱུ’’ཏི ཝིསེསིཏཾ། ཨེཀཏལཾ ཀུམྦྷཐཱུཎདདྡརཱདི། ཙམྨཔརིཡོནདྡྷཾ ཧུཏྭཱ ཏནྟིབདྡྷཾ ཨཱཏཏཝིཏཏཾ། ཏེནཱཧ ‘‘ཏནྟིབདྡྷཔཎཝཱདཱི’’ཏི། གོམུཁཱིཨཱདཱིནམྤི ཨེཏྠེཝ སངྒཧོ དཊྛབྦོ། ཝཾསཱདཱིཏི ཨཱདི-སདྡེན སངྑསིངྒཱདཱིནཾ སངྒཧོ། སམྨཱདཱིཏི སམྨཏཱལ༹ཀཾསཏཱལ༹སིལཱསལཱཀཏཱལཱ༹དི། ཏཏྠ སམྨཏཱལ༹ཾ ནཱམ དཎྜམཡཏཱལ༹ཾ། ཀཾསཏཱལ༹ཾ ལོཧམཡཾ། སིལཱཡ ཨཡོཔཏྟེན ཙ ཝཱདནཏཱལ༹ཾ སིལཱསལཱཀཏཱལ༹ཾ། སམཔྤིཏོཏི སམྨཱ ཨཔྤིཏོ ཨུཔེཏོ། ཏེནཱཧ ‘‘ཨུཔགཏོ’’ཏི། ཨུཔཊྛཱནཝསེན པཉྩཧི ཏཱུརིཡསཏེཧི ཨུཔེཏོ། ཨེཝཾབྷཱུཏོ ཙ ཡསྨཱ ཏེཧི ཨུཔཊྛིཏོ སམནྣཱགཏོ ནཱམ ཧོཏི, ཏསྨཱ ཝུཏྟཾ ‘‘སམངྒཱིབྷཱུཏོཏི ཏསྶེཝ ཝེཝཙན’’ནྟི། པརིཙཱརེཏཱིཏི པརིཏོ ཙཱརེཏི། ཀཱནི པན ཙཱརེཏི, ཀཐཾ ཝཱ ཙཱརེཏཱིཏི ཨཱཧ ‘‘སམྤཏྟིཾ…པེ॰… ཙཱརེཏཱི’’ཏི། ཏཏྠ ཏཏོ ཏཏོཏི ཏསྨིཾ ཏསྨིཾ ཝཱདིཏེ ཏཏྠ ཏཏྠ ཙ ཝཱདཀཛནེ། ཨཔནེཏྭཱཏི ཝཱདཀཛནེ ནིསེདྷེཏྭཱ། ཏེནཱཧ ‘‘ནིསྶདྡཱནི ཀཱརཱཔེཏྭཱ’’ཏི། དེཝཙཱརིཀཾ གཙྪཏིཡེཝ དེཝཏཱནཾ མནུསྶཱནཉྩ ཨནུཀམྤཱཡ། སྭཱཡམཏྠོ ཝིམཱནཝཏྠཱུཧི (ཝི॰ ཝ॰ ༡) དཱིཔེཏབྦོ།
Pañca aṅgāni etassāti pañcaṅgaṃ, pañcaṅgaṃ eva pañcaṅgikaṃ. Mahatīādi vīṇāvisesopi ātatamevāti ‘‘cammapariyonaddhesū’’ti visesitaṃ. Ekatalaṃ kumbhathūṇadaddarādi. Cammapariyonaddhaṃ hutvā tantibaddhaṃ ātatavitataṃ. Tenāha ‘‘tantibaddhapaṇavādī’’ti. Gomukhīādīnampi ettheva saṅgaho daṭṭhabbo. Vaṃsādīti ādi-saddena saṅkhasiṅgādīnaṃ saṅgaho. Sammādīti sammatāḷakaṃsatāḷasilāsalākatāḷādi. Tattha sammatāḷaṃ nāma daṇḍamayatāḷaṃ. Kaṃsatāḷaṃ lohamayaṃ. Silāya ayopattena ca vādanatāḷaṃ silāsalākatāḷaṃ. Samappitoti sammā appito upeto. Tenāha ‘‘upagato’’ti. Upaṭṭhānavasena pañcahi tūriyasatehi upeto. Evaṃbhūto ca yasmā tehi upaṭṭhito samannāgato nāma hoti, tasmā vuttaṃ ‘‘samaṅgībhūtoti tasseva vevacana’’nti. Paricāretīti parito cāreti. Kāni pana cāreti, kathaṃ vā cāretīti āha ‘‘sampattiṃ…pe… cāretī’’ti. Tattha tato tatoti tasmiṃ tasmiṃ vādite tattha tattha ca vādakajane. Apanetvāti vādakajane nisedhetvā. Tenāha ‘‘nissaddāni kārāpetvā’’ti. Devacārikaṃ gacchatiyeva devatānaṃ manussānañca anukampāya. Svāyamattho vimānavatthūhi (vi. va. 1) dīpetabbo.
༣༩༢. ཨཔྤེཝ སཀེན ཀརཎཱིཡེནཱཏི མཱརིས, མོགྒལླཱན, མཡཾ སཀེན ཀརཎཱིཡེན ཨཔྤེཝ བཧུཀིཙྩཱཔི ན ཧོམ། ཨཔིཙ དེཝཱནཾཡེཝཱཏི ཨཔིཙ ཁོ པན དེཝཱནཾཡེཝ ཏཱཝཏིཾསཱནཾ ཀརཎཱིཡེན ཝིསེསཏོ བཧུཀིཙྩཱཏི ཨཏྠཡོཛནཱ། བྷུམྨཊྛཀདེཝཏཱནམྤི ཀེཙི ཨཊྚཱ སཀྐེན ཝིནིཙྪིཏབྦཱ ཧོནྟཱིཏི ཨཱཧ ‘‘པཐཝིཏོ པཊྛཱཡཱ’’ཏི། ནིཡམེནྟོཏི ཨཝདྷཱརེནྟོ། ཏཾ པན ཀརཎཱིཡཾ སརཱུཔཏོ དསྶེཏུཾ ‘‘དེཝཱནཾ ཧཱི’’ཏིཨཱདི ཝུཏྟཾ། ཏཱསནྟི དེཝདྷཱིཏུདེཝཔུཏྟཔཱདཔརིཙཱརིཀཱནཾ། མཎྜནཔསཱདྷནཀཱརིཀཱཏི མཎྜནཔསཱདྷནསཾཝིདྷཱཡིཀཱ། ཨཊྚཀརཎཾ ནཏྠི སཾསཡསྶེཝ ཨབྷཱཝཏོ།
392.Appeva sakena karaṇīyenāti mārisa, moggallāna, mayaṃ sakena karaṇīyena appeva bahukiccāpi na homa. Apica devānaṃyevāti apica kho pana devānaṃyeva tāvatiṃsānaṃ karaṇīyena visesato bahukiccāti atthayojanā. Bhummaṭṭhakadevatānampi keci aṭṭā sakkena vinicchitabbā hontīti āha ‘‘pathavito paṭṭhāyā’’ti. Niyamentoti avadhārento. Taṃ pana karaṇīyaṃ sarūpato dassetuṃ ‘‘devānaṃ hī’’tiādi vuttaṃ. Tāsanti devadhītudevaputtapādaparicārikānaṃ. Maṇḍanapasādhanakārikāti maṇḍanapasādhanasaṃvidhāyikā. Aṭṭakaraṇaṃ natthi saṃsayasseva abhāvato.
ཡནྟི སཝནུགྒཧཎཱདིཝསེན སུཔརིཙིཏམྤི ཡཾ ཨཏྠཛཱཏཾ། ན དིསྶཏི, པཉྙཱཙཀྑུནོ སབྦསོ ན པཊིབྷཱཏཱིཏི ཨཏྠོ། ཀེཙཱིཏི སཱརསམཱསཱཙརིཡཱ། སོམནསྶསཾཝེགནྟི སོམནསྶསམུཊྛཱནཾ སཾཝེགཾ, ན ཙིཏྟསནྟཱསཾ།
Yanti savanuggahaṇādivasena suparicitampi yaṃ atthajātaṃ. Na dissati, paññācakkhuno sabbaso na paṭibhātīti attho. Kecīti sārasamāsācariyā. Somanassasaṃveganti somanassasamuṭṭhānaṃ saṃvegaṃ, na cittasantāsaṃ.
སམུཔབྱཱུལ༹ྷོཏི ཡུཛ྄ཛྷནཝསེན སཧཔཏིཏོ སམོགཱལ༹ྷོ། ཨེཝཾབྷཱུཏོ ཙ ཡསྨཱ སམཱུཧཝསེན སམྤིཎྜིཏོ ཧོཏི, ཏསྨཱ ཝུཏྟཾ ‘‘སནྣིཔཏིཏོ རཱསིབྷཱུཏོ’’ཏི། ཨནནྟརེ ཨཏྟབྷཱཝེཏི ཨིདཾ དུཏིཡཾ སཀྐཏྟབྷཱཝཾ ཏཏོ ཨནནྟརཱཏཱིཏེན སཀྐཏྟབྷཱཝེན སཀྐཏྟབྷཱཝསཱམཉྙཏོ ཨེཀམིཝ ཀཏྭཱ གཧཎཝསེན ཝུཏྟཾ, ཨཉྙཐཱ ‘‘ཏཏིཡེ ཨཏྟབྷཱཝེ’’ཏི ཝཏྟབྦཾ སིཡཱ། མགྷཏྟབྷཱཝོ ཧི ཨིཏོ ཏཏིཡོཏི། ཨཐ ཝཱ ཡསྨིཾ ཨཏྟབྷཱཝེ སོ དེཝཱསུརསངྒཱམོ ཨཧོསི, ཏསྶ ཨནནྟརཏྟཱ མགྷཏྟབྷཱཝསྶ ཝུཏྟཾ ‘‘ཨནནྟརེ ཨཏྟབྷཱཝེ’’ཏི། སཏྟཱནཾ ཧིཏེསིཏཱཡ མཱཏཱཔིཏུཨུཔཊྛཱནཱདིནཱ ཙརིཡཱཧི བོདྷིསཏྟཙརིཡཱ ཝིཡསྶ ཙརིཡཱ ཨཧོསི། སཏྟ ཝཏཔདཱནཱིཏི སཏྟ ཝཏཀོཊྛཱསེ།
Samupabyūḷhoti yujjhanavasena sahapatito samogāḷho. Evaṃbhūto ca yasmā samūhavasena sampiṇḍito hoti, tasmā vuttaṃ ‘‘sannipatito rāsibhūto’’ti. Anantare attabhāveti idaṃ dutiyaṃ sakkattabhāvaṃ tato anantarātītena sakkattabhāvena sakkattabhāvasāmaññato ekamiva katvā gahaṇavasena vuttaṃ, aññathā ‘‘tatiye attabhāve’’ti vattabbaṃ siyā. Maghattabhāvo hi ito tatiyoti. Atha vā yasmiṃ attabhāve so devāsurasaṅgāmo ahosi, tassa anantarattā maghattabhāvassa vuttaṃ ‘‘anantare attabhāve’’ti. Sattānaṃ hitesitāya mātāpituupaṭṭhānādinā cariyāhi bodhisattacariyā viyassa cariyā ahosi. Satta vatapadānīti satta vatakoṭṭhāse.
མཧཱཔཱནནྟི མཧནྟཾ སུརཱཔཱནཾ། གཎྜཔཱནནྟི གཎྜསུརཱཔཱནཾ, ཨདྷིམཏྟཔཱནནྟི ཨཏྠོ། པརིཧརམཱནཱཏི པརིཝཱརེནྟཱ། ཝེདིཀཱཔཱདཱཏི སིནེརུསྶ པརིཡནྟེ ཝེདིཀཱཔརིཀྑེཔཱ། པཉྩསུ ཋཱནེསཱུཏི པཉྩསུ པརིབྷཎྜཊྛཱནེསུ ནཱགསེནཱདཱིཧི ཨཱརཀྑཾ ཋཔེསི།
Mahāpānanti mahantaṃ surāpānaṃ. Gaṇḍapānanti gaṇḍasurāpānaṃ, adhimattapānanti attho. Pariharamānāti parivārentā. Vedikāpādāti sinerussa pariyante vedikāparikkhepā. Pañcasu ṭhānesūti pañcasu paribhaṇḍaṭṭhānesu nāgasenādīhi ārakkhaṃ ṭhapesi.
༣༩༣. རཱམཎེཡྻཀནྟི རམཎཱིཡབྷཱཝཾ། མསཱརགལླཏྠམྦྷེཏི ཀབརམཎིམཡེ ཐམྦྷེ། སུཝཎྞཱདིམཡེ གྷཊཀེཏི ‘‘རཛཏཏྠམྦྷེསུ སུཝཎྞམཡེ, སུཝཎྞཏྠམྦྷེསུ རཛཏམཡེ’’ཏིཨཱདིནཱ སུཝཎྞཱདིམཡེ གྷཊཀེ ཝཱལ༹རཱུཔཀཱནི ཙ། པབཱལ༹ྷཾ མཏྟོཏི པམཏྟོ། ཏེནཱཧ ‘‘ཨཏིཝིཡ མཏྟོ’’ཏི། ནཱཊཀཔརིཝཱརེནཱཏི ཨཙྪརཱཔརིཝཱརེན།
393.Rāmaṇeyyakanti ramaṇīyabhāvaṃ. Masāragallatthambheti kabaramaṇimaye thambhe. Suvaṇṇādimaye ghaṭaketi ‘‘rajatatthambhesu suvaṇṇamaye, suvaṇṇatthambhesu rajatamaye’’tiādinā suvaṇṇādimaye ghaṭake vāḷarūpakāni ca. Pabāḷhaṃ mattoti pamatto. Tenāha ‘‘ativiya matto’’ti. Nāṭakaparivārenāti accharāparivārena.
ཨཙྪརིཡབྦྷུཏནྟི པདདྭཡེནཔི ཝིམྷཡནཱཀཱརོཝ ཝུཏྟོ, ཏསྨཱ སཉྫཱཏཾ ཨཙྪརིཡབྦྷུཏཾ ཝིམྷཡནཱཀཱརོ ཨེཏེསནྟི སཉྫཱཏཨཙྪརིཡཨབྦྷུཏཱ, ཏཐཱ པཝཏྟཙིཏྟུཔྤཱདཱ། ཨཙྪརིཡབྦྷུཏཧེཏུཀཱ སཉྫཱཏཱ ཏུཊྛི ཨེཏེསནྟི སཉྫཱཏཏུཊྛིནོ། སཾཝིགྒནྟི སཉྫཱཏསཾཝེགཾ། སྭཱཡཾ སཾཝེགོ ཡསྨཱ པུརིམཱཝཏྠཱཡ ཙིཏྟསྶ ཙལནཾ ཧོཏི, ཏསྨཱ ཝུཏྟཾ ‘‘ཙལིཏ’’ནྟི།
Acchariyabbhutanti padadvayenapi vimhayanākārova vutto, tasmā sañjātaṃ acchariyabbhutaṃ vimhayanākāro etesanti sañjātaacchariyaabbhutā, tathā pavattacittuppādā. Acchariyabbhutahetukā sañjātā tuṭṭhi etesanti sañjātatuṭṭhino. Saṃvigganti sañjātasaṃvegaṃ. Svāyaṃ saṃvego yasmā purimāvatthāya cittassa calanaṃ hoti, tasmā vuttaṃ ‘‘calita’’nti.
༣༩༤. ཏམཾ ཝིནོདིཏནྟི པཱཊིཧཱརིཡདསྶནེན ‘‘ཨཧོ ཐེརསྶ ཨིདྡྷཱནུབྷཱཝོ’’ཏི སམྨཱཔཊིཔཏྟིཡཾ སཉྫཱཏབཧུམཱནོ, ཨཱིདིསཾ ནཱམ སཱསནཾ ལབྷིཏྭཱཔི མཡཾ ནིརཏྠཀེན བྷོགམདེན སམྨཏྟཱ བྷཝཱམཱཏི ཡོནིསོ མནསིཀཱརུཔྤཱདནེན སམྨོཧཏམཾ ཝིནོདིཏཾ ཝིདྷམིཏཾ། ཨེཏེཏི མཧཱཐེརོ སཀྐོ ཙཱཏི ཏེ དྭེཔི སམཱནབྲཧྨཙརིཡཏཱཡ སབྲཧྨཙཱརིནོ།
394.Tamaṃ vinoditanti pāṭihāriyadassanena ‘‘aho therassa iddhānubhāvo’’ti sammāpaṭipattiyaṃ sañjātabahumāno, īdisaṃ nāma sāsanaṃ labhitvāpi mayaṃ niratthakena bhogamadena sammattā bhavāmāti yoniso manasikāruppādanena sammohatamaṃ vinoditaṃ vidhamitaṃ. Eteti mahāthero sakko cāti te dvepi samānabrahmacariyatāya sabrahmacārino.
༣༩༥. པཉྙཱཏཱནནྟི པཱཀཊཱནཾ ཙཱཏུམཧཱརཱཛ-སུཡཱམ-སནྟུསིཏ-པརནིམྨིཏཝསཝཏྟིམཧཱབྲཧྨཱནཾ ཨཉྙཏརོ, ན ཡེསཾ ཀེསཉྩཱིཏི ཨདྷིཔྤཱཡོ། ཨཱརདྡྷདྷམྨཝསེནེཝ པརིཡོསཱཔིཏཏྟཱ ཡཐཱནུསནྡྷིནཱཝ ནིཊྛཔེསི།
395.Paññātānanti pākaṭānaṃ cātumahārāja-suyāma-santusita-paranimmitavasavattimahābrahmānaṃ aññataro, na yesaṃ kesañcīti adhippāyo. Āraddhadhammavaseneva pariyosāpitattā yathānusandhināva niṭṭhapesi.
ཙཱུལ༹ཏཎྷཱསངྑཡསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Cūḷataṇhāsaṅkhayasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༧. ཙཱུལ༹ཏཎྷཱསངྑཡསུཏྟཾ • 7. Cūḷataṇhāsaṅkhayasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༧. ཙཱུལ༹ཏཎྷཱསངྑཡསུཏྟཝཎྞནཱ • 7. Cūḷataṇhāsaṅkhayasuttavaṇṇanā
