| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. சுந்த³ஸுத்தங்
3. Cundasuttaṃ
379. ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா ஸாரிபுத்தோ மக³தே⁴ஸு விஹரதி நாலககா³மகே ஆபா³தி⁴கோ து³க்கி²தோ பா³ள்ஹகி³லானோ. சுந்தோ³ ச ஸமணுத்³தே³ஸோ ஆயஸ்மதோ ஸாரிபுத்தஸ்ஸ உபட்டா²கோ ஹோதி.
379. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā sāriputto magadhesu viharati nālakagāmake ābādhiko dukkhito bāḷhagilāno. Cundo ca samaṇuddeso āyasmato sāriputtassa upaṭṭhāko hoti.
அத² கோ² ஆயஸ்மா ஸாரிபுத்தோ தேனேவ ஆபா³தே⁴ன பரினிப்³பா³யி. அத² கோ² சுந்தோ³ ஸமணுத்³தே³ஸோ ஆயஸ்மதோ ஸாரிபுத்தஸ்ஸ பத்தசீவரமாதா³ய யேன ஸாவத்தி² ஜேதவனங் அனாத²பிண்டி³கஸ்ஸ ஆராமோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தங் ஆனந்த³ங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சுந்தோ³ ஸமணுத்³தே³ஸோ ஆயஸ்மந்தங் ஆனந்த³ங் ஏதத³வோச – ‘‘ஆயஸ்மா, ப⁴ந்தே, ஸாரிபுத்தோ பரினிப்³பு³தோ. இத³மஸ்ஸ பத்தசீவர’’ந்தி.
Atha kho āyasmā sāriputto teneva ābādhena parinibbāyi. Atha kho cundo samaṇuddeso āyasmato sāriputtassa pattacīvaramādāya yena sāvatthi jetavanaṃ anāthapiṇḍikassa ārāmo yenāyasmā ānando tenupasaṅkami; upasaṅkamitvā āyasmantaṃ ānandaṃ abhivādetvā ekamantaṃ nisīdi. Ekamantaṃ nisinno kho cundo samaṇuddeso āyasmantaṃ ānandaṃ etadavoca – ‘‘āyasmā, bhante, sāriputto parinibbuto. Idamassa pattacīvara’’nti.
‘‘அத்தி² கோ² இத³ங், ஆவுஸோ சுந்த³, கதா²பாப⁴தங் ப⁴க³வந்தங் த³ஸ்ஸனாய. ஆயாமாவுஸோ சுந்த³, யேன ப⁴க³வா தேனுபஸங்கமிஸ்ஸாம; உபஸங்கமித்வா ப⁴க³வதோ ஏதமத்த²ங் ஆரோசெஸ்ஸாமா’’தி. ‘‘ஏவங், ப⁴ந்தே’’தி கோ² சுந்தோ³ ஸமணுத்³தே³ஸோ ஆயஸ்மதோ ஆனந்த³ஸ்ஸ பச்சஸ்ஸோஸி.
‘‘Atthi kho idaṃ, āvuso cunda, kathāpābhataṃ bhagavantaṃ dassanāya. Āyāmāvuso cunda, yena bhagavā tenupasaṅkamissāma; upasaṅkamitvā bhagavato etamatthaṃ ārocessāmā’’ti. ‘‘Evaṃ, bhante’’ti kho cundo samaṇuddeso āyasmato ānandassa paccassosi.
அத² கோ² ஆயஸ்மா ச ஆனந்தோ³ சுந்தோ³ ச ஸமணுத்³தே³ஸோ யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘அயங், ப⁴ந்தே, சுந்தோ³ ஸமணுத்³தே³ஸோ ஏவமாஹ – ‘ஆயஸ்மா, ப⁴ந்தே, ஸாரிபுத்தோ பரினிப்³பு³தோ; இத³மஸ்ஸ பத்தசீவர’ந்தி. அபி ச மே, ப⁴ந்தே, மது⁴ரகஜாதோ விய காயோ, தி³ஸாபி மே ந பக்கா²யந்தி, த⁴ம்மாபி மங் நப்படிப⁴ந்தி ‘ஆயஸ்மா ஸாரிபுத்தோ பரினிப்³பு³தோ’தி ஸுத்வா’’.
Atha kho āyasmā ca ānando cundo ca samaṇuddeso yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho āyasmā ānando bhagavantaṃ etadavoca – ‘‘ayaṃ, bhante, cundo samaṇuddeso evamāha – ‘āyasmā, bhante, sāriputto parinibbuto; idamassa pattacīvara’nti. Api ca me, bhante, madhurakajāto viya kāyo, disāpi me na pakkhāyanti, dhammāpi maṃ nappaṭibhanti ‘āyasmā sāriputto parinibbuto’ti sutvā’’.
‘‘கிங் நு கோ² தே, ஆனந்த³, ஸாரிபுத்தோ ஸீலக்க²ந்த⁴ங் வா ஆதா³ய பரினிப்³பு³தோ, ஸமாதி⁴க்க²ந்த⁴ங் வா ஆதா³ய பரினிப்³பு³தோ, பஞ்ஞாக்க²ந்த⁴ங் வா ஆதா³ய பரினிப்³பு³தோ, விமுத்திக்க²ந்த⁴ங் வா ஆதா³ய பரினிப்³பு³தோ, விமுத்திஞாணத³ஸ்ஸனக்க²ந்த⁴ங் வா ஆதா³ய பரினிப்³பு³தோ’’தி? ‘‘ந ச கோ² மே, ப⁴ந்தே, ஆயஸ்மா ஸாரிபுத்தோ ஸீலக்க²ந்த⁴ங் வா ஆதா³ய பரினிப்³பு³தோ, ஸமாதி⁴க்க²ந்த⁴ங் வா…பே॰… பஞ்ஞாக்க²ந்த⁴ங் வா… விமுத்திக்க²ந்த⁴ங் வா… விமுத்திஞாணத³ஸ்ஸனக்க²ந்த⁴ங் வா ஆதா³ய பரினிப்³பு³தோ. அபி ச மே, ப⁴ந்தே, ஆயஸ்மா ஸாரிபுத்தோ ஓவாத³கோ அஹோஸி ஓதிண்ணோ விஞ்ஞாபகோ ஸந்த³ஸ்ஸகோ ஸமாத³பகோ ஸமுத்தேஜகோ ஸம்பஹங்ஸகோ, அகிலாஸு த⁴ம்மதே³ஸனாய, அனுக்³கா³ஹகோ ஸப்³ரஹ்மசாரீனங். தங் மயங் ஆயஸ்மதோ ஸாரிபுத்தஸ்ஸ த⁴ம்மோஜங் த⁴ம்மபோ⁴க³ங் த⁴ம்மானுக்³க³ஹங் அனுஸ்ஸராமா’’தி.
‘‘Kiṃ nu kho te, ānanda, sāriputto sīlakkhandhaṃ vā ādāya parinibbuto, samādhikkhandhaṃ vā ādāya parinibbuto, paññākkhandhaṃ vā ādāya parinibbuto, vimuttikkhandhaṃ vā ādāya parinibbuto, vimuttiñāṇadassanakkhandhaṃ vā ādāya parinibbuto’’ti? ‘‘Na ca kho me, bhante, āyasmā sāriputto sīlakkhandhaṃ vā ādāya parinibbuto, samādhikkhandhaṃ vā…pe… paññākkhandhaṃ vā… vimuttikkhandhaṃ vā… vimuttiñāṇadassanakkhandhaṃ vā ādāya parinibbuto. Api ca me, bhante, āyasmā sāriputto ovādako ahosi otiṇṇo viññāpako sandassako samādapako samuttejako sampahaṃsako, akilāsu dhammadesanāya, anuggāhako sabrahmacārīnaṃ. Taṃ mayaṃ āyasmato sāriputtassa dhammojaṃ dhammabhogaṃ dhammānuggahaṃ anussarāmā’’ti.
‘‘நனு தங், ஆனந்த³, மயா படிகச்சேவ 1 அக்கா²தங் – ‘ஸப்³பே³ஹி பியேஹி மனாபேஹி நானாபா⁴வோ வினாபா⁴வோ அஞ்ஞதா²பா⁴வோ . தங் குதெத்த², ஆனந்த³, லப்³பா⁴! யங் தங் ஜாதங் பூ⁴தங் ஸங்க²தங் பலோகத⁴ம்மங், தங் வத மா பலுஜ்ஜீதி – நேதங் டா²னங் விஜ்ஜதி. ஸெய்யதா²பி, ஆனந்த³, மஹதோ ருக்க²ஸ்ஸ திட்ட²தோ ஸாரவதோ யோ மஹந்ததரோ க²ந்தோ⁴ ஸோ பலுஜ்ஜெய்ய; ஏவமேவ கோ² ஆனந்த³, மஹதோ பி⁴க்கு²ஸங்க⁴ஸ்ஸ திட்ட²தோ ஸாரவதோ ஸாரிபுத்தோ பரினிப்³பு³தோ. தங் குதெத்த², ஆனந்த³, லப்³பா⁴! யங் தங் ஜாதங் பூ⁴தங் ஸங்க²தங் பலோகத⁴ம்மங், தங் வத மா பலுஜ்ஜீ’தி – நேதங் டா²னங் விஜ்ஜதி. தஸ்மாதிஹானந்த³, அத்ததீ³பா விஹரத² அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா அனஞ்ஞஸரணா.
‘‘Nanu taṃ, ānanda, mayā paṭikacceva 2 akkhātaṃ – ‘sabbehi piyehi manāpehi nānābhāvo vinābhāvo aññathābhāvo . Taṃ kutettha, ānanda, labbhā! Yaṃ taṃ jātaṃ bhūtaṃ saṅkhataṃ palokadhammaṃ, taṃ vata mā palujjīti – netaṃ ṭhānaṃ vijjati. Seyyathāpi, ānanda, mahato rukkhassa tiṭṭhato sāravato yo mahantataro khandho so palujjeyya; evameva kho ānanda, mahato bhikkhusaṅghassa tiṭṭhato sāravato sāriputto parinibbuto. Taṃ kutettha, ānanda, labbhā! Yaṃ taṃ jātaṃ bhūtaṃ saṅkhataṃ palokadhammaṃ, taṃ vata mā palujjī’ti – netaṃ ṭhānaṃ vijjati. Tasmātihānanda, attadīpā viharatha attasaraṇā anaññasaraṇā, dhammadīpā dhammasaraṇā anaññasaraṇā.
‘‘கத²ஞ்சானந்த³, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ, த⁴ம்மதீ³போ த⁴ம்மஸரணோ அனஞ்ஞஸரணோ? இதா⁴னந்த³, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். ஏவங் கோ², ஆனந்த³, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ, த⁴ம்மதீ³போ த⁴ம்மஸரணோ அனஞ்ஞஸரணோ. யே ஹி கேசி, ஆனந்த³, ஏதரஹி வா மமச்சயே வா அத்ததீ³பா விஹரிஸ்ஸந்தி அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா அனஞ்ஞஸரணா; தமதக்³கே³ மேதே, ஆனந்த³, பி⁴க்கூ² ப⁴விஸ்ஸந்தி யே கேசி ஸிக்கா²காமா’’தி. ததியங்.
‘‘Kathañcānanda, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo? Idhānanda, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Evaṃ kho, ānanda, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo. Ye hi keci, ānanda, etarahi vā mamaccaye vā attadīpā viharissanti attasaraṇā anaññasaraṇā, dhammadīpā dhammasaraṇā anaññasaraṇā; tamatagge mete, ānanda, bhikkhū bhavissanti ye keci sikkhākāmā’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. சுந்த³ஸுத்தவண்ணனா • 3. Cundasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. சுந்த³ஸுத்தவண்ணனா • 3. Cundasuttavaṇṇanā
