| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
५. चुन्दसुत्तं
5. Cundasuttaṃ
८३.
83.
‘‘पुच्छामि मुनिं पहूतपञ्ञं, (इति चुन्दो कम्मारपुत्तो)
‘‘Pucchāmi muniṃ pahūtapaññaṃ, (iti cundo kammāraputto)
बुद्धं धम्मस्सामिं वीततण्हं।
Buddhaṃ dhammassāmiṃ vītataṇhaṃ;
द्विपदुत्तमं 1 सारथीनं पवरं, कति लोके समणा तदिङ्घ ब्रूहि’’॥
Dvipaduttamaṃ 2 sārathīnaṃ pavaraṃ, kati loke samaṇā tadiṅgha brūhi’’.
८४.
84.
‘‘चतुरो समणा न पञ्चमत्थि, (चुन्दाति भगवा)
‘‘Caturo samaṇā na pañcamatthi, (cundāti bhagavā)
ते ते आविकरोमि सक्खिपुट्ठो।
Te te āvikaromi sakkhipuṭṭho;
मग्गजिनो मग्गदेसको च, मग्गे जीवति यो च मग्गदूसी’’॥
Maggajino maggadesako ca, magge jīvati yo ca maggadūsī’’.
८५.
85.
‘‘कं मग्गजिनं वदन्ति बुद्धा, (इति चुन्दो कम्मारपुत्तो)
‘‘Kaṃ maggajinaṃ vadanti buddhā, (iti cundo kammāraputto)
मग्गक्खायी कथं अतुल्यो होति।
Maggakkhāyī kathaṃ atulyo hoti;
मग्गे जीवति मे ब्रूहि पुट्ठो, अथ मे आविकरोहि मग्गदूसिं’’ 3॥
Magge jīvati me brūhi puṭṭho, atha me āvikarohi maggadūsiṃ’’ 4.
८६.
86.
‘‘यो तिण्णकथंकथो विसल्लो, निब्बानाभिरतो अनानुगिद्धो।
‘‘Yo tiṇṇakathaṃkatho visallo, nibbānābhirato anānugiddho;
लोकस्स सदेवकस्स नेता, तादिं मग्गजिनं वदन्ति बुद्धा॥
Lokassa sadevakassa netā, tādiṃ maggajinaṃ vadanti buddhā.
८७.
87.
‘‘परमं परमन्ति योध ञत्वा, अक्खाति विभजते इधेव धम्मं।
‘‘Paramaṃ paramanti yodha ñatvā, akkhāti vibhajate idheva dhammaṃ;
तं कङ्खछिदं मुनिं अनेजं, दुतियं भिक्खुनमाहु मग्गदेसिं॥
Taṃ kaṅkhachidaṃ muniṃ anejaṃ, dutiyaṃ bhikkhunamāhu maggadesiṃ.
८८.
88.
‘‘यो धम्मपदे सुदेसिते, मग्गे जीवति सञ्ञतो सतीमा।
‘‘Yo dhammapade sudesite, magge jīvati saññato satīmā;
अनवज्जपदानि सेवमानो, ततियं भिक्खुनमाहु मग्गजीविं॥
Anavajjapadāni sevamāno, tatiyaṃ bhikkhunamāhu maggajīviṃ.
८९.
89.
‘‘छदनं कत्वान सुब्बतानं, पक्खन्दी कुलदूसको पगब्भो।
‘‘Chadanaṃ katvāna subbatānaṃ, pakkhandī kuladūsako pagabbho;
मायावी असञ्ञतो पलापो, पतिरूपेन चरं स मग्गदूसी॥
Māyāvī asaññato palāpo, patirūpena caraṃ sa maggadūsī.
९०.
90.
‘‘एते च पटिविज्झि यो गहट्ठो, सुतवा अरियसावको सपञ्ञो।
‘‘Ete ca paṭivijjhi yo gahaṭṭho, sutavā ariyasāvako sapañño;
सब्बे नेतादिसाति 5 ञत्वा, इति दिस्वा न हापेति तस्स सद्धा।
Sabbe netādisāti 6 ñatvā, iti disvā na hāpeti tassa saddhā;
कथं हि दुट्ठेन असम्पदुट्ठं, सुद्धं असुद्धेन समं करेय्या’’ति॥
Kathaṃ hi duṭṭhena asampaduṭṭhaṃ, suddhaṃ asuddhena samaṃ kareyyā’’ti.
चुन्दसुत्तं पञ्चमं निट्ठितं।
Cundasuttaṃ pañcamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ५. चुन्दसुत्तवण्णना • 5. Cundasuttavaṇṇanā
