| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. চুন্দসুত্তৰণ্ণনা
3. Cundasuttavaṇṇanā
৩৭৯. পুব্বে সাৰত্থিতো ৰেল়ুৰগামস্স গতত্তা ৰুত্তং ‘‘আগতমগ্গেনেৰ পটিনিৰত্তন্তো’’তি। সত্তন্নন্তি উপসেনো, রেৰতো, খদিরৰনিযো, চুন্দো, সমণুদ্দেসো অহন্তি চতুন্নং, চালা, উপচালা, সীসূপচালাতি, তিস্সন্নন্তি ইমেসং সত্তন্নং অরহন্তানং। নত্থি নু খোতি এত্থাপি ‘‘ওলোকেন্তো’’তি আনেত্ৰা সম্বন্ধো সীহাৰলোকনঞাযেন। ভৰিস্সন্তি মে ৰত্তারো হরিতুং নাসক্খীতি সম্বন্ধো। ইদং দানি পচ্ছিমদস্সনন্তি ভূতকথনমত্তং, ন তত্থ সালযতাদস্সনং যথা তথাগতস্স ৰেসালিযা নিক্খমিত্ৰা নাগাপলোকিতং।
379. Pubbe sāvatthito veḷuvagāmassa gatattā vuttaṃ ‘‘āgatamaggeneva paṭinivattanto’’ti. Sattannanti upaseno, revato, khadiravaniyo, cundo, samaṇuddeso ahanti catunnaṃ, cālā, upacālā, sīsūpacālāti, tissannanti imesaṃ sattannaṃ arahantānaṃ. Natthi nu khoti etthāpi ‘‘olokento’’ti ānetvā sambandho sīhāvalokanañāyena. Bhavissanti me vattāro harituṃ nāsakkhīti sambandho. Idaṃ dāni pacchimadassananti bhūtakathanamattaṃ, na tattha sālayatādassanaṃ yathā tathāgatassa vesāliyā nikkhamitvā nāgāpalokitaṃ.
তস্স তস্স ৰিসেসস্স অধিট্ঠানৰসেনেৰ ইদ্ধিভেদদস্সনং ইদ্ধিৰিকুব্বনং। সীহস্স ৰিজম্ভনাদিৰসেন কীল়িত্ৰা নাদসদিসী অযং ধম্মকথাতি ৰুত্তং ‘‘সীহৰিকীল়িতো ধম্মপরিযাযো’’তি। গমনকালো ময্হন্তীতি এত্থ ইতি-সদ্দো পরিসমাপনে। তেন থেরেন যথারম্ভস্স ৰচনপবন্ধস্স সমাপিতভাৰং জোতেতি। এস নযো সেসেসুপি এদিসেসু সব্বট্ঠানেসু। যুগন্ধরাদযো পরিভণ্ডপব্বতাতি ৰেদিতব্বা। একপ্পহারেনেৰাতি একপ্পহারেন ইৰ। স্ৰাযং ইৰ-সদ্দো ন সক্কোমীতি এত্থ আনেত্ৰা সম্বন্ধিতব্বো।
Tassa tassa visesassa adhiṭṭhānavaseneva iddhibhedadassanaṃ iddhivikubbanaṃ. Sīhassa vijambhanādivasena kīḷitvā nādasadisī ayaṃ dhammakathāti vuttaṃ ‘‘sīhavikīḷito dhammapariyāyo’’ti. Gamanakālo mayhantīti ettha iti-saddo parisamāpane. Tena therena yathārambhassa vacanapabandhassa samāpitabhāvaṃ joteti. Esa nayo sesesupi edisesu sabbaṭṭhānesu. Yugandharādayo paribhaṇḍapabbatāti veditabbā. Ekappahārenevāti ekappahārena iva. Svāyaṃ iva-saddo na sakkomīti ettha ānetvā sambandhitabbo.
পটিপাদেস্সামীতি ঠিতকাযং পটিপাদেস্সামি। পত্থনাকালে অনোমদস্সিস্স ভগৰতো ৰচনসুতানুসারেন ঞাণেন দিট্ঠমত্ততং সন্ধায ‘‘তং পঠমদস্সন’’ন্তি ৰুত্তং। ধারেতুং অসক্কোন্তী গুণসারং। এস মগ্গোতি এসো জাতানং সত্তানং মরণনিট্ঠিতো পন্থো। পুনপি এৰংভাৰিনো নাম সঙ্খারাতি সঙ্খারা নাম এৰংভাৰিনো, মরণপরিযোসানাতি অত্থো। এত্তকন্তি এত্তকং কালং। সঙ্কড্ঢিত্ৰা সংহরিত্ৰা। মুখং পিধাযাতি মুখং ছাদেত্ৰা। অগ্ঘিকসতানীতি মকুল়ঙ্কুরচেতিযসতানি।
Paṭipādessāmīti ṭhitakāyaṃ paṭipādessāmi. Patthanākāle anomadassissa bhagavato vacanasutānusārena ñāṇena diṭṭhamattataṃ sandhāya ‘‘taṃ paṭhamadassana’’nti vuttaṃ. Dhāretuṃ asakkontī guṇasāraṃ. Esa maggoti eso jātānaṃ sattānaṃ maraṇaniṭṭhito pantho. Punapi evaṃbhāvino nāma saṅkhārāti saṅkhārā nāma evaṃbhāvino, maraṇapariyosānāti attho. Ettakanti ettakaṃ kālaṃ. Saṅkaḍḍhitvā saṃharitvā. Mukhaṃ pidhāyāti mukhaṃ chādetvā. Agghikasatānīti makuḷaṅkuracetiyasatāni.
পুরিমদিৰসেতি অতীতদিৰসে। যস্মা ধম্মসেনাপতিনো অরহত্তপ্পত্তদিৰসেযেৰ সত্থু সাৰকসন্নিপাতো অহোসি, তস্মা ‘‘পূরিতসাৰকসন্নিপাতো এস ভিক্খূ’’তি ৰুত্তং। পঞ্চ জাতিসতানীতি ভুম্মত্থে, অচ্চন্তসংযোগে ৰা উপযোগৰচনং।
Purimadivaseti atītadivase. Yasmā dhammasenāpatino arahattappattadivaseyeva satthu sāvakasannipāto ahosi, tasmā ‘‘pūritasāvakasannipāto esa bhikkhū’’ti vuttaṃ. Pañca jātisatānīti bhummatthe, accantasaṃyoge vā upayogavacanaṃ.
কল়োপিহত্থোতি ৰিলীৰমযভাজনহত্থো। ‘‘চম্মমযভাজনহত্থো’’তি চ ৰদন্তি। পুরন্তরেতি নগরমজ্ঝে। ৰনেতি অরঞ্ঞে।
Kaḷopihatthoti vilīvamayabhājanahattho. ‘‘Cammamayabhājanahattho’’ti ca vadanti. Purantareti nagaramajjhe. Vaneti araññe.
ওসক্কনাকারৰিরহিতোতি ধম্মদেসনায সঙ্কোচহেতুৰিরহিতো। ৰিসারদোতি সারদৰিরহিতো। ধম্মোজন্তি ধম্মরসং, ওজৰন্তং দেসনাধম্মন্তি অত্থো। ধম্মভোগন্তি ধম্মপরিভোগং, পরেহি সদ্ধিং সংৰিভজনৰসেন পৰত্তং ধম্মসম্ভোগন্তি দেসনাধম্মমেৰ ৰদতি। তেন ৰুত্তং ‘‘উভযেনপি ধম্মপরিভোগোৰ কথিতো’’তি।
Osakkanākāravirahitoti dhammadesanāya saṅkocahetuvirahito. Visāradoti sāradavirahito. Dhammojanti dhammarasaṃ, ojavantaṃ desanādhammanti attho. Dhammabhoganti dhammaparibhogaṃ, parehi saddhiṃ saṃvibhajanavasena pavattaṃ dhammasambhoganti desanādhammameva vadati. Tena vuttaṃ ‘‘ubhayenapi dhammaparibhogova kathito’’ti.
পিযাযিতব্বতো পিযেহি। মনস্স ৰড্ঢনতো মনাপেহি। জাতিযাতি খত্তিযাদিজাতিযা। নানাভাৰো অসহভাৰো ৰিসুংভাৰো। অঞ্ঞথাভাৰো অঞ্ঞথত্তং। সরীরন্তি রূপধম্মকাযসঙ্খাতং সরীরং। রূপকাযে হি ভিজ্জন্তে ভিজ্জন্তেৰ। সো ভিজ্জেয্যাতি সো মহন্ততরো খন্ধো ভিজ্জেয্য।
Piyāyitabbato piyehi. Manassa vaḍḍhanato manāpehi. Jātiyāti khattiyādijātiyā. Nānābhāvo asahabhāvo visuṃbhāvo. Aññathābhāvo aññathattaṃ. Sarīranti rūpadhammakāyasaṅkhātaṃ sarīraṃ. Rūpakāye hi bhijjante bhijjanteva. So bhijjeyyāti so mahantataro khandho bhijjeyya.
দক্খিণদিসং গতোতি দক্খিণদিসামুখে পৰত্তো। মহাখন্ধো ৰিযাতি মহন্তো সারৰন্তো সাখাখন্ধো ৰিয। সাখখন্ধা হি দিসাভিমুখপৰত্তাকারা, মূলখন্ধো পন উদ্ধমুগ্গতো। সোল়সন্নং পঞ্হানন্তি সোল়সন্নং অপরাপরিযপৰত্তনিযানং অত্থানং। ঞাতুং ইচ্ছিতো হি অত্থো পঞ্হো।
Dakkhiṇadisaṃ gatoti dakkhiṇadisāmukhe pavatto. Mahākhandho viyāti mahanto sāravanto sākhākhandho viya. Sākhakhandhā hi disābhimukhapavattākārā, mūlakhandho pana uddhamuggato. Soḷasannaṃ pañhānanti soḷasannaṃ aparāpariyapavattaniyānaṃ atthānaṃ. Ñātuṃ icchito hi attho pañho.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. চুন্দসুত্তং • 3. Cundasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. চুন্দসুত্তৰণ্ণনা • 3. Cundasuttavaṇṇanā
