10. Cundattheraapadānaṃ

125.

‘‘Siddhatthassa bhagavato, lokajeṭṭhassa tādino;

Agghiyaṃ kārayitvāna, jātipupphehi chādayiṃ.

126.

‘‘Niṭṭhāpetvāna taṃ pupphaṃ, buddhassa upanāmayiṃ;

Pupphāvasesaṃ paggayha, buddhassa abhiropayiṃ.

127.

‘‘Kañcanagghiyasaṅkāsaṃ , buddhaṃ lokagganāyakaṃ;

Pasannacitto sumano, pupphagghiyamupānayiṃ.

128.

‘‘Vitiṇṇakaṅkho sambuddho, tiṇṇoghehi purakkhato;

Bhikkhusaṅghe nisīditvā, imā gāthā abhāsatha.

129.

‘‘‘Dibbagandhaṃ pavāyantaṃ, yo me pupphagghiyaṃ adā;

Tamahaṃ kittayissāmi, suṇātha mama bhāsato.

130.

‘‘‘Ito cuto ayaṃ poso, devasaṅghapurakkhato;

Jātipupphehi parikiṇṇo, devalokaṃ gamissati.

131.

‘‘‘Ubbiddhaṃ bhavanaṃ tassa, sovaṇṇañca maṇīmayaṃ;

Byamhaṃ pātubhavissati, puññakammappabhāvitaṃ.

132.

‘‘‘Catusattatikkhattuṃ so, devarajjaṃ karissati;

Anubhossati sampattiṃ, accharāhi purakkhato.

133.

‘‘‘Pathabyā rajjaṃ tisataṃ, vasudhaṃ āvasissati;

Pañcasattatikkhattuñca, cakkavattī bhavissati.

134.

‘‘‘Dujjayo nāma nāmena, hessati manujādhipo;

Anubhotvāna taṃ puññaṃ, sakakammaṃ apassito ².

135.

‘‘‘Vinipātaṃ agantvāna, manussattaṃ gamissati;

Hiraññaṃ tassa ⁴ nicitaṃ, koṭisatamanappakaṃ.

136.

‘‘‘Nibbattissati yonimhi, brāhmaṇe so bhavissati;

Vaṅgantassa suto dhīmā, sāriyā oraso piyo.

137.

‘‘‘So ca pacchā pabbajitvā, aṅgīrasassa sāsane;

Cūḷacundoti ⁶ nāmena, hessati satthu sāvako.

138.

‘‘‘Sāmaṇerova so santo, khīṇāsavo bhavissati;

Sabbāsave pariññāya, nibbāyissatināsavo’.

139.

‘‘Upaṭṭhahiṃ mahāvīraṃ, aññe ca pesale bahū;

Bhātaraṃ me cupaṭṭhāsiṃ, uttamatthassa pattiyā.

140.

‘‘Bhātaraṃ me upaṭṭhitvā, dhātuṃ pattamhi ohiya ⁸;

Sambuddhaṃ upanāmesiṃ, lokajeṭṭhaṃ narāsabhaṃ.

141.

‘‘Ubho hatthehi paggayha, buddho loke sadevake;

Sandassayanto taṃ dhātuṃ, kittayi aggasāvakaṃ.

142.

‘‘Cittañca suvimuttaṃ me, saddhā mayhaṃ patiṭṭhitā;

Sabbāsave pariññāya, viharāmi anāsavo.

143.

‘‘Paṭisambhidānuppattā, vimokkhāpi ca phassitā ¹⁰;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā cundo thero imā gāthāyo abhāsitthāti.

Cundattherassāpadānaṃ dasamaṃ.

Upālivaggo pañcamo.

Tassuddānaṃ –

Upāli soṇo bhaddiyo, sanniṭṭhāpakahatthiyo;

Chadanaṃ seyyacaṅkamaṃ, subhaddo cundasavhayo;

Gāthāsataṃ satālīsaṃ ¹², catasso ca taduttari.