| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. சுந்த³த்தே²ரஅபதா³னவண்ணனா
10. Cundattheraapadānavaṇṇanā
ஸித்³த⁴த்த²ஸ்ஸ ப⁴க³வதோதிஆதி³கங் ஆயஸ்மதோ சுந்த³த்தே²ரஸ்ஸ அபதா³னங். அயம்பி புரிமபு³த்³தே⁴ஸு கதபுஞ்ஞஸம்பா⁴ரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே விப⁴வஸம்பன்னே குலே நிப்³ப³த்தோ விஞ்ஞுதங் பத்வா ஸத்த²ரி பஸீதி³த்வா ஸத்தரதனமயங் ஸுவண்ணக்³கி⁴யங் காரெத்வா ஸுமனபுப்பே²ஹி சா²தெ³த்வா ப⁴க³வந்தங் பூஜேஸி. தானி புப்பா²னி ஆகாஸங் ஸமுக்³க³ந்த்வா விதானாகாரேன அட்ட²ங்ஸு. அத² நங் ப⁴க³வா ‘‘அனாக³தே கோ³தமஸ்ஸ நாம ப⁴க³வதோ ஸாஸனே சுந்தோ³ நாம ஸாவகோ ப⁴விஸ்ஸதீ’’தி ப்³யாகாஸி. ஸோ தேன புஞ்ஞகம்மேன ததோ சுதோ தே³வலோகே உபபன்னோ கமேன ச²ஸு காமாவசரதே³வேஸு ஸுக²ங் அனுப⁴வித்வா மனுஸ்ஸேஸு சக்கவத்திஆதி³ஸம்பத்தியோ ச அனுப⁴வித்வா இமஸ்மிங் பு³த்³து⁴ப்பாதே³ ப்³ராஹ்மணகுலே ரூபஸாரியா புத்தோ ஸாரிபுத்தத்தே²ரஸ்ஸ கனிட்டோ² ஹுத்வா நிப்³ப³த்தி. தஸ்ஸ விஞ்ஞுதங் பத்தஸ்ஸ ஆரோஹபரிணாஹரூபவயானங் ஸுந்த³ரதாய ஸகாரஸ்ஸ சகாரங் கத்வா சுந்தோ³தி நாமங் கரிங்ஸு. ஸோ வயப்பத்தோ க⁴ராவாஸே ஆதீ³னவங் பப்³ப³ஜ்ஜாய ச ஆனிஸங்ஸங் தி³ஸ்வா பா⁴துத்தே²ரஸ்ஸ ஸந்திகே பப்³ப³ஜித்வா விபஸ்ஸனங் வட்³டெ⁴த்வா நசிரஸ்ஸேவ அரஹத்தங் பாபுணி.
Siddhatthassabhagavatotiādikaṃ āyasmato cundattherassa apadānaṃ. Ayampi purimabuddhesu katapuññasambhāro tattha tattha bhave vivaṭṭūpanissayāni puññāni upacinanto siddhatthassa bhagavato kāle vibhavasampanne kule nibbatto viññutaṃ patvā satthari pasīditvā sattaratanamayaṃ suvaṇṇagghiyaṃ kāretvā sumanapupphehi chādetvā bhagavantaṃ pūjesi. Tāni pupphāni ākāsaṃ samuggantvā vitānākārena aṭṭhaṃsu. Atha naṃ bhagavā ‘‘anāgate gotamassa nāma bhagavato sāsane cundo nāma sāvako bhavissatī’’ti byākāsi. So tena puññakammena tato cuto devaloke upapanno kamena chasu kāmāvacaradevesu sukhaṃ anubhavitvā manussesu cakkavattiādisampattiyo ca anubhavitvā imasmiṃ buddhuppāde brāhmaṇakule rūpasāriyā putto sāriputtattherassa kaniṭṭho hutvā nibbatti. Tassa viññutaṃ pattassa ārohapariṇāharūpavayānaṃ sundaratāya sakārassa cakāraṃ katvā cundoti nāmaṃ kariṃsu. So vayappatto gharāvāse ādīnavaṃ pabbajjāya ca ānisaṃsaṃ disvā bhātuttherassa santike pabbajitvā vipassanaṃ vaḍḍhetvā nacirasseva arahattaṃ pāpuṇi.
125. ஸோ பத்தஅரஹத்தப²லோ ஏகதி³வஸங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸித்³த⁴த்த²ஸ்ஸ ப⁴க³வதோதிஆதி³மாஹ. தங் ஹெட்டா² வுத்தத்த²மேவ. அக்³கி⁴யந்திஆத³யோபி உத்தானத்தா²யேவ.
125. So pattaarahattaphalo ekadivasaṃ attano pubbakammaṃ saritvā somanassajāto pubbacaritāpadānaṃ pakāsento siddhatthassa bhagavatotiādimāha. Taṃ heṭṭhā vuttatthameva. Agghiyantiādayopi uttānatthāyeva.
128. விதிண்ணகங்கோ² ஸம்பு³த்³தோ⁴தி விஸேஸேன மக்³கா³தி⁴க³மேன விசிகிச்சா²ய கே²பிதத்தா விதிண்ணகங்கோ² அஸங்ஸயோ ஸம்பு³த்³தோ⁴. திண்ணோகே⁴ஹி புரக்க²தோதி காமோகா⁴தீ³னங் சதுன்னங் ஓகா⁴னங் திண்ணத்தா அதிக்கந்தத்தா ஓக⁴திண்ணேஹி கீ²ணாஸவேஹி புரக்க²தோ பரிவாரிதோதி அத்தோ². ப்³யாகரணகா³தா² உத்தானத்தா²யேவ.
128.Vitiṇṇakaṅkho sambuddhoti visesena maggādhigamena vicikicchāya khepitattā vitiṇṇakaṅkho asaṃsayo sambuddho. Tiṇṇoghehi purakkhatoti kāmoghādīnaṃ catunnaṃ oghānaṃ tiṇṇattā atikkantattā oghatiṇṇehi khīṇāsavehi purakkhato parivāritoti attho. Byākaraṇagāthā uttānatthāyeva.
139. உபட்ட²ஹிங் மஹாவீரந்தி உத்தமத்த²ஸ்ஸ நிப்³பா³னஸ்ஸ பத்தியா பாபுணனத்தா²ய கப்பஸதஸஹஸ்ஸாதி⁴கேஸு சதுராஸங்க்²யெய்யேஸு கப்பேஸு பாரமியோ பூரெந்தேன கதவீரியத்தா மஹாவீரங் பு³த்³த⁴ங் உபட்ட²ஹிங் உபட்டா²னங் அகாஸிந்தி அத்தோ². அஞ்ஞே ச பேஸலே ப³ஹூதி ந கேவலமேவ பு³த்³த⁴ங் உபட்ட²ஹிங், பேஸலே பியஸீலே ஸீலவந்தே அஞ்ஞே ச ப³ஹுஅக்³க³ப்பத்தே ஸாவகே, மே மய்ஹங் பா⁴தரங் ஸாரிபுத்தத்தே²ரஞ்ச உபட்ட²ஹிந்தி ஸம்ப³ந்தோ⁴.
139.Upaṭṭhahiṃ mahāvīranti uttamatthassa nibbānassa pattiyā pāpuṇanatthāya kappasatasahassādhikesu caturāsaṅkhyeyyesu kappesu pāramiyo pūrentena katavīriyattā mahāvīraṃ buddhaṃ upaṭṭhahiṃ upaṭṭhānaṃ akāsinti attho. Aññe ca pesale bahūti na kevalameva buddhaṃ upaṭṭhahiṃ, pesale piyasīle sīlavante aññe ca bahuaggappatte sāvake, me mayhaṃ bhātaraṃ sāriputtattherañca upaṭṭhahinti sambandho.
140. பா⁴தரங் மே உபட்ட²ஹித்வாதி மய்ஹங் பா⁴தரங் உபட்ட²ஹித்வா வத்தபடிவத்தங் கத்வா தஸ்ஸ பரினிப்³பு³தகாலே ப⁴க³வதோ பட²மங் பரினிப்³பு³தத்தா தஸ்ஸ தா⁴துயோ க³ஹெத்வா பத்தம்ஹி ஓகிரித்வா லோகஜெட்ட²ஸ்ஸ நரானங் ஆஸப⁴ஸ்ஸ பு³த்³த⁴ஸ்ஸ உபனாமேஸிங் அதா³ஸிந்தி அத்தோ².
140.Bhātaraṃme upaṭṭhahitvāti mayhaṃ bhātaraṃ upaṭṭhahitvā vattapaṭivattaṃ katvā tassa parinibbutakāle bhagavato paṭhamaṃ parinibbutattā tassa dhātuyo gahetvā pattamhi okiritvā lokajeṭṭhassa narānaṃ āsabhassa buddhassa upanāmesiṃ adāsinti attho.
141. உபோ⁴ ஹத்தே²ஹி பக்³க³ய்ஹாதி தங் மஹா தி³ன்னங் தா⁴துங் ஸோ ப⁴க³வா அத்தனோ உபோ⁴ஹி ஹத்தே²ஹி பகாரேன க³ஹெத்வா தங் தா⁴துங் ஸங்ஸுட்டு² த³ஸ்ஸயந்தோ அக்³க³ஸாவகங் ஸாரிபுத்தத்தே²ரங் கித்தயி பகாஸேஸீதி அத்தோ². ஸேஸங் உத்தானத்த²மேவாதி.
141.Ubho hatthehi paggayhāti taṃ mahā dinnaṃ dhātuṃ so bhagavā attano ubhohi hatthehi pakārena gahetvā taṃ dhātuṃ saṃsuṭṭhu dassayanto aggasāvakaṃ sāriputtattheraṃ kittayi pakāsesīti attho. Sesaṃ uttānatthamevāti.
சுந்த³த்தே²ரஅபதா³னவண்ணனா ஸமத்தா.
Cundattheraapadānavaṇṇanā samattā.
பஞ்சமவக்³க³வண்ணனா ஸமத்தா.
Pañcamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. சுந்த³த்தே²ரஅபதா³னங் • 10. Cundattheraapadānaṃ
