| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. চুন্দত্থেরঅপদানৰণ্ণনা
10. Cundattheraapadānavaṇṇanā
সিদ্ধত্থস্স ভগৰতোতিআদিকং আযস্মতো চুন্দত্থেরস্স অপদানং। অযম্পি পুরিমবুদ্ধেসু কতপুঞ্ঞসম্ভারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে ৰিভৰসম্পন্নে কুলে নিব্বত্তো ৰিঞ্ঞুতং পত্ৰা সত্থরি পসীদিত্ৰা সত্তরতনমযং সুৰণ্ণগ্ঘিযং কারেত্ৰা সুমনপুপ্ফেহি ছাদেত্ৰা ভগৰন্তং পূজেসি। তানি পুপ্ফানি আকাসং সমুগ্গন্ত্ৰা ৰিতানাকারেন অট্ঠংসু। অথ নং ভগৰা ‘‘অনাগতে গোতমস্স নাম ভগৰতো সাসনে চুন্দো নাম সাৰকো ভৰিস্সতী’’তি ব্যাকাসি। সো তেন পুঞ্ঞকম্মেন ততো চুতো দেৰলোকে উপপন্নো কমেন ছসু কামাৰচরদেৰেসু সুখং অনুভৰিত্ৰা মনুস্সেসু চক্কৰত্তিআদিসম্পত্তিযো চ অনুভৰিত্ৰা ইমস্মিং বুদ্ধুপ্পাদে ব্রাহ্মণকুলে রূপসারিযা পুত্তো সারিপুত্তত্থেরস্স কনিট্ঠো হুত্ৰা নিব্বত্তি। তস্স ৰিঞ্ঞুতং পত্তস্স আরোহপরিণাহরূপৰযানং সুন্দরতায সকারস্স চকারং কত্ৰা চুন্দোতি নামং করিংসু। সো ৰযপ্পত্তো ঘরাৰাসে আদীনৰং পব্বজ্জায চ আনিসংসং দিস্ৰা ভাতুত্থেরস্স সন্তিকে পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহত্তং পাপুণি।
Siddhatthassabhagavatotiādikaṃ āyasmato cundattherassa apadānaṃ. Ayampi purimabuddhesu katapuññasambhāro tattha tattha bhave vivaṭṭūpanissayāni puññāni upacinanto siddhatthassa bhagavato kāle vibhavasampanne kule nibbatto viññutaṃ patvā satthari pasīditvā sattaratanamayaṃ suvaṇṇagghiyaṃ kāretvā sumanapupphehi chādetvā bhagavantaṃ pūjesi. Tāni pupphāni ākāsaṃ samuggantvā vitānākārena aṭṭhaṃsu. Atha naṃ bhagavā ‘‘anāgate gotamassa nāma bhagavato sāsane cundo nāma sāvako bhavissatī’’ti byākāsi. So tena puññakammena tato cuto devaloke upapanno kamena chasu kāmāvacaradevesu sukhaṃ anubhavitvā manussesu cakkavattiādisampattiyo ca anubhavitvā imasmiṃ buddhuppāde brāhmaṇakule rūpasāriyā putto sāriputtattherassa kaniṭṭho hutvā nibbatti. Tassa viññutaṃ pattassa ārohapariṇāharūpavayānaṃ sundaratāya sakārassa cakāraṃ katvā cundoti nāmaṃ kariṃsu. So vayappatto gharāvāse ādīnavaṃ pabbajjāya ca ānisaṃsaṃ disvā bhātuttherassa santike pabbajitvā vipassanaṃ vaḍḍhetvā nacirasseva arahattaṃ pāpuṇi.
১২৫. সো পত্তঅরহত্তফলো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিদ্ধত্থস্স ভগৰতোতিআদিমাহ। তং হেট্ঠা ৰুত্তত্থমেৰ। অগ্ঘিযন্তিআদযোপি উত্তানত্থাযেৰ।
125. So pattaarahattaphalo ekadivasaṃ attano pubbakammaṃ saritvā somanassajāto pubbacaritāpadānaṃ pakāsento siddhatthassa bhagavatotiādimāha. Taṃ heṭṭhā vuttatthameva. Agghiyantiādayopi uttānatthāyeva.
১২৮. ৰিতিণ্ণকঙ্খো সম্বুদ্ধোতি ৰিসেসেন মগ্গাধিগমেন ৰিচিকিচ্ছায খেপিতত্তা ৰিতিণ্ণকঙ্খো অসংসযো সম্বুদ্ধো। তিণ্ণোঘেহি পুরক্খতোতি কামোঘাদীনং চতুন্নং ওঘানং তিণ্ণত্তা অতিক্কন্তত্তা ওঘতিণ্ণেহি খীণাসৰেহি পুরক্খতো পরিৰারিতোতি অত্থো। ব্যাকরণগাথা উত্তানত্থাযেৰ।
128.Vitiṇṇakaṅkho sambuddhoti visesena maggādhigamena vicikicchāya khepitattā vitiṇṇakaṅkho asaṃsayo sambuddho. Tiṇṇoghehi purakkhatoti kāmoghādīnaṃ catunnaṃ oghānaṃ tiṇṇattā atikkantattā oghatiṇṇehi khīṇāsavehi purakkhato parivāritoti attho. Byākaraṇagāthā uttānatthāyeva.
১৩৯. উপট্ঠহিং মহাৰীরন্তি উত্তমত্থস্স নিব্বানস্স পত্তিযা পাপুণনত্থায কপ্পসতসহস্সাধিকেসু চতুরাসঙ্খ্যেয্যেসু কপ্পেসু পারমিযো পূরেন্তেন কতৰীরিযত্তা মহাৰীরং বুদ্ধং উপট্ঠহিং উপট্ঠানং অকাসিন্তি অত্থো। অঞ্ঞে চ পেসলে বহূতি ন কেৰলমেৰ বুদ্ধং উপট্ঠহিং, পেসলে পিযসীলে সীলৰন্তে অঞ্ঞে চ বহুঅগ্গপ্পত্তে সাৰকে, মে ময্হং ভাতরং সারিপুত্তত্থেরঞ্চ উপট্ঠহিন্তি সম্বন্ধো।
139.Upaṭṭhahiṃ mahāvīranti uttamatthassa nibbānassa pattiyā pāpuṇanatthāya kappasatasahassādhikesu caturāsaṅkhyeyyesu kappesu pāramiyo pūrentena katavīriyattā mahāvīraṃ buddhaṃ upaṭṭhahiṃ upaṭṭhānaṃ akāsinti attho. Aññe ca pesale bahūti na kevalameva buddhaṃ upaṭṭhahiṃ, pesale piyasīle sīlavante aññe ca bahuaggappatte sāvake, me mayhaṃ bhātaraṃ sāriputtattherañca upaṭṭhahinti sambandho.
১৪০. ভাতরং মে উপট্ঠহিত্ৰাতি ময্হং ভাতরং উপট্ঠহিত্ৰা ৰত্তপটিৰত্তং কত্ৰা তস্স পরিনিব্বুতকালে ভগৰতো পঠমং পরিনিব্বুতত্তা তস্স ধাতুযো গহেত্ৰা পত্তম্হি ওকিরিত্ৰা লোকজেট্ঠস্স নরানং আসভস্স বুদ্ধস্স উপনামেসিং অদাসিন্তি অত্থো।
140.Bhātaraṃme upaṭṭhahitvāti mayhaṃ bhātaraṃ upaṭṭhahitvā vattapaṭivattaṃ katvā tassa parinibbutakāle bhagavato paṭhamaṃ parinibbutattā tassa dhātuyo gahetvā pattamhi okiritvā lokajeṭṭhassa narānaṃ āsabhassa buddhassa upanāmesiṃ adāsinti attho.
১৪১. উভো হত্থেহি পগ্গয্হাতি তং মহা দিন্নং ধাতুং সো ভগৰা অত্তনো উভোহি হত্থেহি পকারেন গহেত্ৰা তং ধাতুং সংসুট্ঠু দস্সযন্তো অগ্গসাৰকং সারিপুত্তত্থেরং কিত্তযি পকাসেসীতি অত্থো। সেসং উত্তানত্থমেৰাতি।
141.Ubho hatthehi paggayhāti taṃ mahā dinnaṃ dhātuṃ so bhagavā attano ubhohi hatthehi pakārena gahetvā taṃ dhātuṃ saṃsuṭṭhu dassayanto aggasāvakaṃ sāriputtattheraṃ kittayi pakāsesīti attho. Sesaṃ uttānatthamevāti.
চুন্দত্থেরঅপদানৰণ্ণনা সমত্তা।
Cundattheraapadānavaṇṇanā samattā.
পঞ্চমৰগ্গৰণ্ণনা সমত্তা।
Pañcamavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. চুন্দত্থেরঅপদানং • 10. Cundattheraapadānaṃ
