| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၁၀. စုန္ဒတ္ထေရအပဒာနဝဏ္ဏနာ
10. Cundattheraapadānavaṇṇanā
သိဒ္ဓတ္ထသ္သ ဘဂဝတောတိအာဒိကံ အာယသ္မတော စုန္ဒတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတပုညသမ္ဘာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော သိဒ္ဓတ္ထသ္သ ဘဂဝတော ကာလေ ဝိဘဝသမ္ပန္နေ ကုလေ နိဗ္ဗတ္တော ဝိညုတံ ပတ္ဝာ သတ္ထရိ ပသီဒိတ္ဝာ သတ္တရတနမယံ သုဝဏ္ဏဂ္ဃိယံ ကာရေတ္ဝာ သုမနပုပ္ဖေဟိ ဆာဒေတ္ဝာ ဘဂဝန္တံ ပူဇေသိ။ တာနိ ပုပ္ဖာနိ အာကာသံ သမုဂ္ဂန္တ္ဝာ ဝိတာနာကာရေန အဋ္ဌံသု။ အထ နံ ဘဂဝာ ‘‘အနာဂတေ ဂောတမသ္သ နာမ ဘဂဝတော သာသနေ စုန္ဒော နာမ သာဝကော ဘဝိသ္သတီ’’တိ ဗ္ယာကာသိ။ သော တေန ပုညကမ္မေန တတော စုတော ဒေဝလောကေ ဥပပန္နော ကမေန ဆသု ကာမာဝစရဒေဝေသု သုခံ အနုဘဝိတ္ဝာ မနုသ္သေသု စက္ကဝတ္တိအာဒိသမ္ပတ္တိယော စ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဗ္ရာဟ္မဏကုလေ ရူပသာရိယာ ပုတ္တော သာရိပုတ္တတ္ထေရသ္သ ကနိဋ္ဌော ဟုတ္ဝာ နိဗ္ဗတ္တိ။ တသ္သ ဝိညုတံ ပတ္တသ္သ အာရောဟပရိဏာဟရူပဝယာနံ သုန္ဒရတာယ သကာရသ္သ စကာရံ ကတ္ဝာ စုန္ဒောတိ နာမံ ကရိံသု။ သော ဝယပ္ပတ္တော ဃရာဝာသေ အာဒီနဝံ ပဗ္ဗဇ္ဇာယ စ အာနိသံသံ ဒိသ္ဝာ ဘာတုတ္ထေရသ္သ သန္တိကေ ပဗ္ဗဇိတ္ဝာ ဝိပသ္သနံ ဝဍ္ဎေတ္ဝာ နစိရသ္သေဝ အရဟတ္တံ ပာပုဏိ။
Siddhatthassabhagavatotiādikaṃ āyasmato cundattherassa apadānaṃ. Ayampi purimabuddhesu katapuññasambhāro tattha tattha bhave vivaṭṭūpanissayāni puññāni upacinanto siddhatthassa bhagavato kāle vibhavasampanne kule nibbatto viññutaṃ patvā satthari pasīditvā sattaratanamayaṃ suvaṇṇagghiyaṃ kāretvā sumanapupphehi chādetvā bhagavantaṃ pūjesi. Tāni pupphāni ākāsaṃ samuggantvā vitānākārena aṭṭhaṃsu. Atha naṃ bhagavā ‘‘anāgate gotamassa nāma bhagavato sāsane cundo nāma sāvako bhavissatī’’ti byākāsi. So tena puññakammena tato cuto devaloke upapanno kamena chasu kāmāvacaradevesu sukhaṃ anubhavitvā manussesu cakkavattiādisampattiyo ca anubhavitvā imasmiṃ buddhuppāde brāhmaṇakule rūpasāriyā putto sāriputtattherassa kaniṭṭho hutvā nibbatti. Tassa viññutaṃ pattassa ārohapariṇāharūpavayānaṃ sundaratāya sakārassa cakāraṃ katvā cundoti nāmaṃ kariṃsu. So vayappatto gharāvāse ādīnavaṃ pabbajjāya ca ānisaṃsaṃ disvā bhātuttherassa santike pabbajitvā vipassanaṃ vaḍḍhetvā nacirasseva arahattaṃ pāpuṇi.
၁၂၅. သော ပတ္တအရဟတ္တဖလော ဧကဒိဝသံ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော သိဒ္ဓတ္ထသ္သ ဘဂဝတောတိအာဒိမာဟ။ တံ ဟေဋ္ဌာ ဝုတ္တတ္ထမေဝ။ အဂ္ဃိယန္တိအာဒယောပိ ဥတ္တာနတ္ထာယေဝ။
125. So pattaarahattaphalo ekadivasaṃ attano pubbakammaṃ saritvā somanassajāto pubbacaritāpadānaṃ pakāsento siddhatthassa bhagavatotiādimāha. Taṃ heṭṭhā vuttatthameva. Agghiyantiādayopi uttānatthāyeva.
၁၂၈. ဝိတိဏ္ဏကင္ခော သမ္ဗုဒ္ဓောတိ ဝိသေသေန မဂ္ဂာဓိဂမေန ဝိစိကိစ္ဆာယ ခေပိတတ္တာ ဝိတိဏ္ဏကင္ခော အသံသယော သမ္ဗုဒ္ဓော။ တိဏ္ဏောဃေဟိ ပုရက္ခတောတိ ကာမောဃာဒီနံ စတုန္နံ ဩဃာနံ တိဏ္ဏတ္တာ အတိက္ကန္တတ္တာ ဩဃတိဏ္ဏေဟိ ခီဏာသဝေဟိ ပုရက္ခတော ပရိဝာရိတောတိ အတ္ထော။ ဗ္ယာကရဏဂာထာ ဥတ္တာနတ္ထာယေဝ။
128.Vitiṇṇakaṅkho sambuddhoti visesena maggādhigamena vicikicchāya khepitattā vitiṇṇakaṅkho asaṃsayo sambuddho. Tiṇṇoghehi purakkhatoti kāmoghādīnaṃ catunnaṃ oghānaṃ tiṇṇattā atikkantattā oghatiṇṇehi khīṇāsavehi purakkhato parivāritoti attho. Byākaraṇagāthā uttānatthāyeva.
၁၃၉. ဥပဋ္ဌဟိံ မဟာဝီရန္တိ ဥတ္တမတ္ထသ္သ နိဗ္ဗာနသ္သ ပတ္တိယာ ပာပုဏနတ္ထာယ ကပ္ပသတသဟသ္သာဓိကေသု စတုရာသင္ခ္ယေယ္ယေသု ကပ္ပေသု ပာရမိယော ပူရေန္တေန ကတဝီရိယတ္တာ မဟာဝီရံ ဗုဒ္ဓံ ဥပဋ္ဌဟိံ ဥပဋ္ဌာနံ အကာသိန္တိ အတ္ထော။ အညေ စ ပေသလေ ဗဟူတိ န ကေဝလမေဝ ဗုဒ္ဓံ ဥပဋ္ဌဟိံ, ပေသလေ ပိယသီလေ သီလဝန္တေ အညေ စ ဗဟုအဂ္ဂပ္ပတ္တေ သာဝကေ, မေ မယ္ဟံ ဘာတရံ သာရိပုတ္တတ္ထေရဉ္စ ဥပဋ္ဌဟိန္တိ သမ္ဗန္ဓော။
139.Upaṭṭhahiṃ mahāvīranti uttamatthassa nibbānassa pattiyā pāpuṇanatthāya kappasatasahassādhikesu caturāsaṅkhyeyyesu kappesu pāramiyo pūrentena katavīriyattā mahāvīraṃ buddhaṃ upaṭṭhahiṃ upaṭṭhānaṃ akāsinti attho. Aññe ca pesale bahūti na kevalameva buddhaṃ upaṭṭhahiṃ, pesale piyasīle sīlavante aññe ca bahuaggappatte sāvake, me mayhaṃ bhātaraṃ sāriputtattherañca upaṭṭhahinti sambandho.
၁၄၀. ဘာတရံ မေ ဥပဋ္ဌဟိတ္ဝာတိ မယ္ဟံ ဘာတရံ ဥပဋ္ဌဟိတ္ဝာ ဝတ္တပဋိဝတ္တံ ကတ္ဝာ တသ္သ ပရိနိဗ္ဗုတကာလေ ဘဂဝတော ပဌမံ ပရိနိဗ္ဗုတတ္တာ တသ္သ ဓာတုယော ဂဟေတ္ဝာ ပတ္တမ္ဟိ ဩကိရိတ္ဝာ လောကဇေဋ္ဌသ္သ နရာနံ အာသဘသ္သ ဗုဒ္ဓသ္သ ဥပနာမေသိံ အဒာသိန္တိ အတ္ထော။
140.Bhātaraṃme upaṭṭhahitvāti mayhaṃ bhātaraṃ upaṭṭhahitvā vattapaṭivattaṃ katvā tassa parinibbutakāle bhagavato paṭhamaṃ parinibbutattā tassa dhātuyo gahetvā pattamhi okiritvā lokajeṭṭhassa narānaṃ āsabhassa buddhassa upanāmesiṃ adāsinti attho.
၁၄၁. ဥဘော ဟတ္ထေဟိ ပဂ္ဂယ္ဟာတိ တံ မဟာ ဒိန္နံ ဓာတုံ သော ဘဂဝာ အတ္တနော ဥဘောဟိ ဟတ္ထေဟိ ပကာရေန ဂဟေတ္ဝာ တံ ဓာတုံ သံသုဋ္ဌု ဒသ္သယန္တော အဂ္ဂသာဝကံ သာရိပုတ္တတ္ထေရံ ကိတ္တယိ ပကာသေသီတိ အတ္ထော။ သေသံ ဥတ္တာနတ္ထမေဝာတိ။
141.Ubho hatthehi paggayhāti taṃ mahā dinnaṃ dhātuṃ so bhagavā attano ubhohi hatthehi pakārena gahetvā taṃ dhātuṃ saṃsuṭṭhu dassayanto aggasāvakaṃ sāriputtattheraṃ kittayi pakāsesīti attho. Sesaṃ uttānatthamevāti.
စုန္ဒတ္ထေရအပဒာနဝဏ္ဏနာ သမတ္တာ။
Cundattheraapadānavaṇṇanā samattā.
ပဉ္စမဝဂ္ဂဝဏ္ဏနာ သမတ္တာ။
Pañcamavaggavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၁၀. စုန္ဒတ္ထေရအပဒာနံ • 10. Cundattheraapadānaṃ
