| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. ទព្ពសុត្តវណ្ណនា
8. Dabbasuttavaṇṇanā
៤៧៨. សោតោ អាបជ្ជីយតិ ឯតេនាតិ សោតាបត្តិ, អនាគតំ បតិ បឋមមគ្គោ។ សោតោតិ អរិយមគ្គសោតោ ទដ្ឋព្ពោ។ អាបជ្ជីយតីតិអាទិតោ បដិបជ្ជីយតិ។ បឋមមគ្គបដិលាភនិមិត្តានិ សោតាបន្នស្ស អង្គានិ ឥធ ‘‘សោតាបត្តិយង្គានី’’តិ វុត្តានិ។ តានិ បន តីសុ ឋានេសុ សទ្ធា អរិយកន្តសីលញ្ចាតិ វេទិតព្ពានិ។ សវិសយេតិ សកវិសយេ។ ជេដ្ឋកភាវទស្សនត្ថន្តិ បធានភាវទស្សនត្ថំ។ យត្ថ សទ្ធាទិឥន្ទ្រិយានំ សាតិសយកិច្ចំ, តេសំ កិច្ចាតិរេកតំ ទស្សេតុន្តិ អត្ថោ។ ឥទានិ តមត្ថំ ឧបមាហិ វិភាវេតុំ ‘‘យថា ហី’’តិអាទិ វុត្តំ។ បត្វាតិ អត្តនោ កិច្ចាតិរេកដ្ឋានំ បដិលភិត្វា។ បុព្ពង្គមន្តិ សទ្ទហនកិច្ចេសុ បុរេចារំ ធោរយ្ហំ។ សេសានិ វីរិយិន្ទ្រិយាទីនិ។ តទន្វយានីតិ តទនុគតានិ តស្ស សទ្ធិន្ទ្រិយាទិកស្ស បក្ខិកានិ។ ឯស នយោ សេសេសុបិ។ ឈានវិមោក្ខេតិ ឈានសង្ខាតេ វិមោក្ខេ សមាធិបធានតាយ ឈានានំ។ ឯវញ្ច កត្វា ‘‘សោតាបត្តិយង្គានិ បត្វា’’តិ ឥទញ្ច វចនំ សមត្ថិតំ ហោតិ។ សទ្ធូបនិសញ្ហិ សីលន្តិ។ អរិយសច្ចានិ បត្វាតិ ចត្តារិ សច្ចានិ អភិសមេតព្ពានិ បាបុណិត្វា។
478. Soto āpajjīyati etenāti sotāpatti, anāgataṃ pati paṭhamamaggo. Sototi ariyamaggasoto daṭṭhabbo. Āpajjīyatītiādito paṭipajjīyati. Paṭhamamaggapaṭilābhanimittāni sotāpannassa aṅgāni idha ‘‘sotāpattiyaṅgānī’’ti vuttāni. Tāni pana tīsu ṭhānesu saddhā ariyakantasīlañcāti veditabbāni. Savisayeti sakavisaye. Jeṭṭhakabhāvadassanatthanti padhānabhāvadassanatthaṃ. Yattha saddhādiindriyānaṃ sātisayakiccaṃ, tesaṃ kiccātirekataṃ dassetunti attho. Idāni tamatthaṃ upamāhi vibhāvetuṃ ‘‘yathā hī’’tiādi vuttaṃ. Patvāti attano kiccātirekaṭṭhānaṃ paṭilabhitvā. Pubbaṅgamanti saddahanakiccesu purecāraṃ dhorayhaṃ. Sesāni vīriyindriyādīni. Tadanvayānīti tadanugatāni tassa saddhindriyādikassa pakkhikāni. Esa nayo sesesupi. Jhānavimokkheti jhānasaṅkhāte vimokkhe samādhipadhānatāya jhānānaṃ. Evañca katvā ‘‘sotāpattiyaṅgāni patvā’’ti idañca vacanaṃ samatthitaṃ hoti. Saddhūpanisañhi sīlanti. Ariyasaccāni patvāti cattāri saccāni abhisametabbāni pāpuṇitvā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. ទដ្ឋព្ពសុត្តំ • 8. Daṭṭhabbasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. ទដ្ឋព្ពសុត្តវណ្ណនា • 8. Daṭṭhabbasuttavaṇṇanā
