| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. ဒဗ္ဗသုတ္တဝဏ္ဏနာ
8. Dabbasuttavaṇṇanā
၄၇၈. သောတော အာပဇ္ဇီယတိ ဧတေနာတိ သောတာပတ္တိ, အနာဂတံ ပတိ ပဌမမဂ္ဂော။ သောတောတိ အရိယမဂ္ဂသောတော ဒဋ္ဌဗ္ဗော။ အာပဇ္ဇီယတီတိအာဒိတော ပဋိပဇ္ဇီယတိ။ ပဌမမဂ္ဂပဋိလာဘနိမိတ္တာနိ သောတာပန္နသ္သ အင္ဂာနိ ဣဓ ‘‘သောတာပတ္တိယင္ဂာနီ’’တိ ဝုတ္တာနိ။ တာနိ ပန တီသု ဌာနေသု သဒ္ဓာ အရိယကန္တသီလဉ္စာတိ ဝေဒိတဗ္ဗာနိ။ သဝိသယေတိ သကဝိသယေ။ ဇေဋ္ဌကဘာဝဒသ္သနတ္ထန္တိ ပဓာနဘာဝဒသ္သနတ္ထံ။ ယတ္ထ သဒ္ဓာဒိဣန္ဒ္ရိယာနံ သာတိသယကိစ္စံ, တေသံ ကိစ္စာတိရေကတံ ဒသ္သေတုန္တိ အတ္ထော။ ဣဒာနိ တမတ္ထံ ဥပမာဟိ ဝိဘာဝေတုံ ‘‘ယထာ ဟီ’’တိအာဒိ ဝုတ္တံ။ ပတ္ဝာတိ အတ္တနော ကိစ္စာတိရေကဋ္ဌာနံ ပဋိလဘိတ္ဝာ။ ပုဗ္ဗင္ဂမန္တိ သဒ္ဒဟနကိစ္စေသု ပုရေစာရံ ဓောရယ္ဟံ။ သေသာနိ ဝီရိယိန္ဒ္ရိယာဒီနိ။ တဒန္ဝယာနီတိ တဒနုဂတာနိ တသ္သ သဒ္ဓိန္ဒ္ရိယာဒိကသ္သ ပက္ခိကာနိ။ ဧသ နယော သေသေသုပိ။ ဈာနဝိမောက္ခေတိ ဈာနသင္ခာတေ ဝိမောက္ခေ သမာဓိပဓာနတာယ ဈာနာနံ။ ဧဝဉ္စ ကတ္ဝာ ‘‘သောတာပတ္တိယင္ဂာနိ ပတ္ဝာ’’တိ ဣဒဉ္စ ဝစနံ သမတ္ထိတံ ဟောတိ။ သဒ္ဓူပနိသဉ္ဟိ သီလန္တိ။ အရိယသစ္စာနိ ပတ္ဝာတိ စတ္တာရိ သစ္စာနိ အဘိသမေတဗ္ဗာနိ ပာပုဏိတ္ဝာ။
478. Soto āpajjīyati etenāti sotāpatti, anāgataṃ pati paṭhamamaggo. Sototi ariyamaggasoto daṭṭhabbo. Āpajjīyatītiādito paṭipajjīyati. Paṭhamamaggapaṭilābhanimittāni sotāpannassa aṅgāni idha ‘‘sotāpattiyaṅgānī’’ti vuttāni. Tāni pana tīsu ṭhānesu saddhā ariyakantasīlañcāti veditabbāni. Savisayeti sakavisaye. Jeṭṭhakabhāvadassanatthanti padhānabhāvadassanatthaṃ. Yattha saddhādiindriyānaṃ sātisayakiccaṃ, tesaṃ kiccātirekataṃ dassetunti attho. Idāni tamatthaṃ upamāhi vibhāvetuṃ ‘‘yathā hī’’tiādi vuttaṃ. Patvāti attano kiccātirekaṭṭhānaṃ paṭilabhitvā. Pubbaṅgamanti saddahanakiccesu purecāraṃ dhorayhaṃ. Sesāni vīriyindriyādīni. Tadanvayānīti tadanugatāni tassa saddhindriyādikassa pakkhikāni. Esa nayo sesesupi. Jhānavimokkheti jhānasaṅkhāte vimokkhe samādhipadhānatāya jhānānaṃ. Evañca katvā ‘‘sotāpattiyaṅgāni patvā’’ti idañca vacanaṃ samatthitaṃ hoti. Saddhūpanisañhi sīlanti. Ariyasaccāni patvāti cattāri saccāni abhisametabbāni pāpuṇitvā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ဒဋ္ဌဗ္ဗသုတ္တံ • 8. Daṭṭhabbasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. ဒဋ္ဌဗ္ဗသုတ္တဝဏ္ဏနာ • 8. Daṭṭhabbasuttavaṇṇanā
