| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. কোসলসংযুত্তং
3. Kosalasaṃyuttaṃ
১. পঠমৰগ্গো
1. Paṭhamavaggo
১. দহরসুত্তং
1. Daharasuttaṃ
১১২. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। অথ খো রাজা পসেনদি কোসলো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ভৰম্পি নো গোতমো অনুত্তরং সম্মাসম্বোধিং অভিসম্বুদ্ধোতি পটিজানাতী’’তি? ‘‘যঞ্হি তং, মহারাজ, সম্মা ৰদমানো ৰদেয্য ‘অনুত্তরং সম্মাসম্বোধিং অভিসম্বুদ্ধো’তি, মমেৰ 1 তং সম্মা ৰদমানো ৰদেয্য। অহঞ্হি, মহারাজ, অনুত্তরং সম্মাসম্বোধিং অভিসম্বুদ্ধো’’তি।
112. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho rājā pasenadi kosalo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho rājā pasenadi kosalo bhagavantaṃ etadavoca – ‘‘bhavampi no gotamo anuttaraṃ sammāsambodhiṃ abhisambuddhoti paṭijānātī’’ti? ‘‘Yañhi taṃ, mahārāja, sammā vadamāno vadeyya ‘anuttaraṃ sammāsambodhiṃ abhisambuddho’ti, mameva 2 taṃ sammā vadamāno vadeyya. Ahañhi, mahārāja, anuttaraṃ sammāsambodhiṃ abhisambuddho’’ti.
‘‘যেপি তে, ভো গোতম, সমণব্রাহ্মণা সঙ্ঘিনো গণিনো গণাচরিযা ঞাতা যসস্সিনো তিত্থকরা সাধুসম্মতা বহুজনস্স, সেয্যথিদং – পূরণো কস্সপো, মক্খলি গোসালো, নিগণ্ঠো নাটপুত্তো, সঞ্চযো বেলট্ঠপুত্তো, পকুধো কচ্চাযনো, অজিতো কেসকম্বলো; তেপি মযা ‘অনুত্তরং সম্মাসম্বোধিং অভিসম্বুদ্ধোতি পটিজানাথা’তি পুট্ঠা সমানা অনুত্তরং সম্মাসম্বোধিং অভিসম্বুদ্ধোতি ন পটিজানন্তি। কিং পন ভৰং গোতমো দহরো চেৰ জাতিযা নৰো চ পব্বজ্জাযা’’তি?
‘‘Yepi te, bho gotama, samaṇabrāhmaṇā saṅghino gaṇino gaṇācariyā ñātā yasassino titthakarā sādhusammatā bahujanassa, seyyathidaṃ – pūraṇo kassapo, makkhali gosālo, nigaṇṭho nāṭaputto, sañcayo belaṭṭhaputto, pakudho kaccāyano, ajito kesakambalo; tepi mayā ‘anuttaraṃ sammāsambodhiṃ abhisambuddhoti paṭijānāthā’ti puṭṭhā samānā anuttaraṃ sammāsambodhiṃ abhisambuddhoti na paṭijānanti. Kiṃ pana bhavaṃ gotamo daharo ceva jātiyā navo ca pabbajjāyā’’ti?
‘‘চত্তারো খো মে, মহারাজ, দহরাতি ন উঞ্ঞাতব্বা, দহরাতি ন পরিভোতব্বা। কতমে চত্তারো? খত্তিযো খো, মহারাজ, দহরোতি ন উঞ্ঞাতব্বো, দহরোতি ন পরিভোতব্বো। উরগো খো, মহারাজ, দহরোতি ন উঞ্ঞাতব্বো, দহরোতি ন পরিভোতব্বো। অগ্গি খো, মহারাজ, দহরোতি ন উঞ্ঞাতব্বো, দহরোতি ন পরিভোতব্বো। ভিক্খু, খো, মহারাজ, দহরোতি ন উঞ্ঞাতব্বো, দহরোতি ন পরিভোতব্বো। ইমে খো, মহারাজ, চত্তারো দহরাতি ন উঞ্ঞাতব্বা, দহরাতি ন পরিভোতব্বা’’তি।
‘‘Cattāro kho me, mahārāja, daharāti na uññātabbā, daharāti na paribhotabbā. Katame cattāro? Khattiyo kho, mahārāja, daharoti na uññātabbo, daharoti na paribhotabbo. Urago kho, mahārāja, daharoti na uññātabbo, daharoti na paribhotabbo. Aggi kho, mahārāja, daharoti na uññātabbo, daharoti na paribhotabbo. Bhikkhu, kho, mahārāja, daharoti na uññātabbo, daharoti na paribhotabbo. Ime kho, mahārāja, cattāro daharāti na uññātabbā, daharāti na paribhotabbā’’ti.
ইদমৰোচ ভগৰা। ইদং ৰত্ৰান সুগতো অথাপরং এতদৰোচ সত্থা –
Idamavoca bhagavā. Idaṃ vatvāna sugato athāparaṃ etadavoca satthā –
‘‘খত্তিযং জাতিসম্পন্নং, অভিজাতং যসস্সিনং।
‘‘Khattiyaṃ jātisampannaṃ, abhijātaṃ yasassinaṃ;
দহরোতি নাৰজানেয্য, ন নং পরিভৰে নরো॥
Daharoti nāvajāneyya, na naṃ paribhave naro.
‘‘ঠানঞ্হি সো মনুজিন্দো, রজ্জং লদ্ধান খত্তিযো।
‘‘Ṭhānañhi so manujindo, rajjaṃ laddhāna khattiyo;
সো কুদ্ধো রাজদণ্ডেন, তস্মিং পক্কমতে ভুসং।
So kuddho rājadaṇḍena, tasmiṃ pakkamate bhusaṃ;
তস্মা তং পরিৰজ্জেয্য, রক্খং জীৰিতমত্তনো॥
Tasmā taṃ parivajjeyya, rakkhaṃ jīvitamattano.
‘‘গামে ৰা যদি ৰা রঞ্ঞে, যত্থ পস্সে ভুজঙ্গমং।
‘‘Gāme vā yadi vā raññe, yattha passe bhujaṅgamaṃ;
দহরোতি নাৰজানেয্য, ন নং পরিভৰে নরো॥
Daharoti nāvajāneyya, na naṃ paribhave naro.
সো আসজ্জ ডংসে বালং, নরং নারিঞ্চ একদা।
So āsajja ḍaṃse bālaṃ, naraṃ nāriñca ekadā;
তস্মা তং পরিৰজ্জেয্য, রক্খং জীৰিতমত্তনো॥
Tasmā taṃ parivajjeyya, rakkhaṃ jīvitamattano.
‘‘পহূতভক্খং জালিনং, পাৰকং কণ্হৰত্তনিং।
‘‘Pahūtabhakkhaṃ jālinaṃ, pāvakaṃ kaṇhavattaniṃ;
দহরোতি নাৰজানেয্য, ন নং পরিভৰে নরো॥
Daharoti nāvajāneyya, na naṃ paribhave naro.
‘‘লদ্ধা হি সো উপাদানং, মহা হুত্ৰান পাৰকো।
‘‘Laddhā hi so upādānaṃ, mahā hutvāna pāvako;
তস্মা তং পরিৰজ্জেয্য, রক্খং জীৰিতমত্তনো॥
Tasmā taṃ parivajjeyya, rakkhaṃ jīvitamattano.
জাযন্তি তত্থ পারোহা, অহোরত্তানমচ্চযে॥
Jāyanti tattha pārohā, ahorattānamaccaye.
‘‘যঞ্চ খো সীলসম্পন্নো, ভিক্খু ডহতি তেজসা।
‘‘Yañca kho sīlasampanno, bhikkhu ḍahati tejasā;
ন তস্স পুত্তা পসৰো, দাযাদা ৰিন্দরে ধনং।
Na tassa puttā pasavo, dāyādā vindare dhanaṃ;
অনপচ্চা অদাযাদা, তালাৰত্থূ ভৰন্তি তে॥
Anapaccā adāyādā, tālāvatthū bhavanti te.
‘‘তস্মা হি পণ্ডিতো পোসো, সম্পস্সং অত্থমত্তনো।
‘‘Tasmā hi paṇḍito poso, sampassaṃ atthamattano;
ভুজঙ্গমং পাৰকঞ্চ, খত্তিযঞ্চ যসস্সিনং।
Bhujaṅgamaṃ pāvakañca, khattiyañca yasassinaṃ;
ভিক্খুঞ্চ সীলসম্পন্নং, সম্মদেৰ সমাচরে’’তি॥
Bhikkhuñca sīlasampannaṃ, sammadeva samācare’’ti.
এৰং ৰুত্তে, রাজা পসেনদি কোসলো ভগৰন্তং এতদৰোচ – ‘‘অভিক্কন্তং, ভন্তে, অভিক্কন্তং, ভন্তে! সেয্যথাপি ভন্তে, নিক্কুজ্জিতং 9 ৰা উক্কুজ্জেয্য , পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য , অন্ধকারে ৰা তেলপজ্জোতং ধারেয্য – ‘চক্খুমন্তো রূপানি দক্খন্তী’তি; এৰমেৰং ভগৰতা অনেকপরিযাযেন ধম্মো পকাসিতো। এসাহং, ভন্তে, ভগৰন্তং সরণং গচ্ছামি ধম্মঞ্চ ভিক্খুসঙ্ঘঞ্চ। উপাসকং মং, ভন্তে, ভগৰা ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, rājā pasenadi kosalo bhagavantaṃ etadavoca – ‘‘abhikkantaṃ, bhante, abhikkantaṃ, bhante! Seyyathāpi bhante, nikkujjitaṃ 10 vā ukkujjeyya , paṭicchannaṃ vā vivareyya, mūḷhassa vā maggaṃ ācikkheyya , andhakāre vā telapajjotaṃ dhāreyya – ‘cakkhumanto rūpāni dakkhantī’ti; evamevaṃ bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañca. Upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. দহরসুত্তৰণ্ণনা • 1. Daharasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. দহরসুত্তৰণ্ণনা • 1. Daharasuttavaṇṇanā
