| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៨. ទក្ខិណសុត្តំ
8. Dakkhiṇasuttaṃ
៧៨. ‘‘ចតស្សោ ឥមា, ភិក្ខវេ, ទក្ខិណា វិសុទ្ធិយោ។ កតមា ចតស្សោ? អត្ថិ, ភិក្ខវេ, ទក្ខិណា ទាយកតោ វិសុជ្ឈតិ, នោ បដិគ្គាហកតោ; អត្ថិ, ភិក្ខវេ, ទក្ខិណា បដិគ្គាហកតោ វិសុជ្ឈតិ, នោ ទាយកតោ; អត្ថិ, ភិក្ខវេ, ទក្ខិណា នេវ ទាយកតោ វិសុជ្ឈតិ, នោ បដិគ្គាហកតោ; អត្ថិ, ភិក្ខវេ, ទក្ខិណា ទាយកតោ ចេវ វិសុជ្ឈតិ បដិគ្គាហកតោ ច។
78. ‘‘Catasso imā, bhikkhave, dakkhiṇā visuddhiyo. Katamā catasso? Atthi, bhikkhave, dakkhiṇā dāyakato visujjhati, no paṭiggāhakato; atthi, bhikkhave, dakkhiṇā paṭiggāhakato visujjhati, no dāyakato; atthi, bhikkhave, dakkhiṇā neva dāyakato visujjhati, no paṭiggāhakato; atthi, bhikkhave, dakkhiṇā dāyakato ceva visujjhati paṭiggāhakato ca.
‘‘កថញ្ច , ភិក្ខវេ, ទក្ខិណា ទាយកតោ វិសុជ្ឈតិ, នោ បដិគ្គាហកតោ? ឥធ, ភិក្ខវេ, ទាយកោ ហោតិ សីលវា កល្យាណធម្មោ; បដិគ្គាហកា ហោន្តិ ទុស្សីលា បាបធម្មា 1។ ឯវំ ខោ, ភិក្ខវេ, ទក្ខិណា ទាយកតោ វិសុជ្ឈតិ, នោ បដិគ្គាហកតោ។
‘‘Kathañca , bhikkhave, dakkhiṇā dāyakato visujjhati, no paṭiggāhakato? Idha, bhikkhave, dāyako hoti sīlavā kalyāṇadhammo; paṭiggāhakā honti dussīlā pāpadhammā 2. Evaṃ kho, bhikkhave, dakkhiṇā dāyakato visujjhati, no paṭiggāhakato.
‘‘កថញ្ច , ភិក្ខវេ, ទក្ខិណា បដិគ្គាហកតោ វិសុជ្ឈតិ, នោ ទាយកតោ? ឥធ, ភិក្ខវេ , ទាយកោ ហោតិ ទុស្សីលោ បាបធម្មោ; បដិគ្គាហកា ហោន្តិ សីលវន្តោ កល្យាណធម្មា។ ឯវំ ខោ, ភិក្ខវេ, ទក្ខិណា បដិគ្គាហកតោ វិសុជ្ឈតិ, នោ ទាយកតោ។
‘‘Kathañca , bhikkhave, dakkhiṇā paṭiggāhakato visujjhati, no dāyakato? Idha, bhikkhave , dāyako hoti dussīlo pāpadhammo; paṭiggāhakā honti sīlavanto kalyāṇadhammā. Evaṃ kho, bhikkhave, dakkhiṇā paṭiggāhakato visujjhati, no dāyakato.
‘‘កថញ្ច, ភិក្ខវេ, ទក្ខិណា នេវ ទាយកតោ វិសុជ្ឈតិ, នោ បដិគ្គាហកតោ? ឥធ, ភិក្ខវេ, ទាយកោ ហោតិ ទុស្សីលោ បាបធម្មោ; បដិគ្គាហកាបិ ហោន្តិ ទុស្សីលា បាបធម្មា។ ឯវំ ខោ, ភិក្ខវេ, ទក្ខិណា នេវ ទាយកតោ វិសុជ្ឈតិ, នោ បដិគ្គាហកតោ។
‘‘Kathañca, bhikkhave, dakkhiṇā neva dāyakato visujjhati, no paṭiggāhakato? Idha, bhikkhave, dāyako hoti dussīlo pāpadhammo; paṭiggāhakāpi honti dussīlā pāpadhammā. Evaṃ kho, bhikkhave, dakkhiṇā neva dāyakato visujjhati, no paṭiggāhakato.
‘‘កថញ្ច, ភិក្ខវេ, ទក្ខិណា ទាយកតោ ចេវ វិសុជ្ឈតិ បដិគ្គាហកតោ ច? ឥធ, ភិក្ខវេ, ទាយកោ ហោតិ សីលវា កល្យាណធម្មោ; បដិគ្គាហកាបិ ហោន្តិ សីលវន្តោ កល្យាណធម្មា។ ឯវំ ខោ, ភិក្ខវេ, ទក្ខិណា ទាយកតោ ចេវ វិសុជ្ឈតិ បដិគ្គាហកតោ ច។ ឥមា ខោ, ភិក្ខវេ, ចតស្សោ ទក្ខិណា វិសុទ្ធិយោ’’តិ។ អដ្ឋមំ។
‘‘Kathañca, bhikkhave, dakkhiṇā dāyakato ceva visujjhati paṭiggāhakato ca? Idha, bhikkhave, dāyako hoti sīlavā kalyāṇadhammo; paṭiggāhakāpi honti sīlavanto kalyāṇadhammā. Evaṃ kho, bhikkhave, dakkhiṇā dāyakato ceva visujjhati paṭiggāhakato ca. Imā kho, bhikkhave, catasso dakkhiṇā visuddhiyo’’ti. Aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៨. ទក្ខិណសុត្តវណ្ណនា • 8. Dakkhiṇasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៨. ទក្ខិណសុត្តវណ្ណនា • 8. Dakkhiṇasuttavaṇṇanā
