| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. ဒက္ခိဏသုတ္တံ
8. Dakkhiṇasuttaṃ
၇၈. ‘‘စတသ္သော ဣမာ, ဘိက္ခဝေ, ဒက္ခိဏာ ဝိသုဒ္ဓိယော။ ကတမာ စတသ္သော? အတ္ထိ, ဘိက္ခဝေ, ဒက္ခိဏာ ဒာယကတော ဝိသုဇ္ဈတိ, နော ပဋိဂ္ဂာဟကတော; အတ္ထိ, ဘိက္ခဝေ, ဒက္ခိဏာ ပဋိဂ္ဂာဟကတော ဝိသုဇ္ဈတိ, နော ဒာယကတော; အတ္ထိ, ဘိက္ခဝေ, ဒက္ခိဏာ နေဝ ဒာယကတော ဝိသုဇ္ဈတိ, နော ပဋိဂ္ဂာဟကတော; အတ္ထိ, ဘိက္ခဝေ, ဒက္ခိဏာ ဒာယကတော စေဝ ဝိသုဇ္ဈတိ ပဋိဂ္ဂာဟကတော စ။
78. ‘‘Catasso imā, bhikkhave, dakkhiṇā visuddhiyo. Katamā catasso? Atthi, bhikkhave, dakkhiṇā dāyakato visujjhati, no paṭiggāhakato; atthi, bhikkhave, dakkhiṇā paṭiggāhakato visujjhati, no dāyakato; atthi, bhikkhave, dakkhiṇā neva dāyakato visujjhati, no paṭiggāhakato; atthi, bhikkhave, dakkhiṇā dāyakato ceva visujjhati paṭiggāhakato ca.
‘‘ကထဉ္စ , ဘိက္ခဝေ, ဒက္ခိဏာ ဒာယကတော ဝိသုဇ္ဈတိ, နော ပဋိဂ္ဂာဟကတော? ဣဓ, ဘိက္ခဝေ, ဒာယကော ဟောတိ သီလဝာ ကလ္ယာဏဓမ္မော; ပဋိဂ္ဂာဟကာ ဟောန္တိ ဒုသ္သီလာ ပာပဓမ္မာ 1။ ဧဝံ ခော, ဘိက္ခဝေ, ဒက္ခိဏာ ဒာယကတော ဝိသုဇ္ဈတိ, နော ပဋိဂ္ဂာဟကတော။
‘‘Kathañca , bhikkhave, dakkhiṇā dāyakato visujjhati, no paṭiggāhakato? Idha, bhikkhave, dāyako hoti sīlavā kalyāṇadhammo; paṭiggāhakā honti dussīlā pāpadhammā 2. Evaṃ kho, bhikkhave, dakkhiṇā dāyakato visujjhati, no paṭiggāhakato.
‘‘ကထဉ္စ , ဘိက္ခဝေ, ဒက္ခိဏာ ပဋိဂ္ဂာဟကတော ဝိသုဇ္ဈတိ, နော ဒာယကတော? ဣဓ, ဘိက္ခဝေ , ဒာယကော ဟောတိ ဒုသ္သီလော ပာပဓမ္မော; ပဋိဂ္ဂာဟကာ ဟောန္တိ သီလဝန္တော ကလ္ယာဏဓမ္မာ။ ဧဝံ ခော, ဘိက္ခဝေ, ဒက္ခိဏာ ပဋိဂ္ဂာဟကတော ဝိသုဇ္ဈတိ, နော ဒာယကတော။
‘‘Kathañca , bhikkhave, dakkhiṇā paṭiggāhakato visujjhati, no dāyakato? Idha, bhikkhave , dāyako hoti dussīlo pāpadhammo; paṭiggāhakā honti sīlavanto kalyāṇadhammā. Evaṃ kho, bhikkhave, dakkhiṇā paṭiggāhakato visujjhati, no dāyakato.
‘‘ကထဉ္စ, ဘိက္ခဝေ, ဒက္ခိဏာ နေဝ ဒာယကတော ဝိသုဇ္ဈတိ, နော ပဋိဂ္ဂာဟကတော? ဣဓ, ဘိက္ခဝေ, ဒာယကော ဟောတိ ဒုသ္သီလော ပာပဓမ္မော; ပဋိဂ္ဂာဟကာပိ ဟောန္တိ ဒုသ္သီလာ ပာပဓမ္မာ။ ဧဝံ ခော, ဘိက္ခဝေ, ဒက္ခိဏာ နေဝ ဒာယကတော ဝိသုဇ္ဈတိ, နော ပဋိဂ္ဂာဟကတော။
‘‘Kathañca, bhikkhave, dakkhiṇā neva dāyakato visujjhati, no paṭiggāhakato? Idha, bhikkhave, dāyako hoti dussīlo pāpadhammo; paṭiggāhakāpi honti dussīlā pāpadhammā. Evaṃ kho, bhikkhave, dakkhiṇā neva dāyakato visujjhati, no paṭiggāhakato.
‘‘ကထဉ္စ, ဘိက္ခဝေ, ဒက္ခိဏာ ဒာယကတော စေဝ ဝိသုဇ္ဈတိ ပဋိဂ္ဂာဟကတော စ? ဣဓ, ဘိက္ခဝေ, ဒာယကော ဟောတိ သီလဝာ ကလ္ယာဏဓမ္မော; ပဋိဂ္ဂာဟကာပိ ဟောန္တိ သီလဝန္တော ကလ္ယာဏဓမ္မာ။ ဧဝံ ခော, ဘိက္ခဝေ, ဒက္ခိဏာ ဒာယကတော စေဝ ဝိသုဇ္ဈတိ ပဋိဂ္ဂာဟကတော စ။ ဣမာ ခော, ဘိက္ခဝေ, စတသ္သော ဒက္ခိဏာ ဝိသုဒ္ဓိယော’’တိ။ အဋ္ဌမံ။
‘‘Kathañca, bhikkhave, dakkhiṇā dāyakato ceva visujjhati paṭiggāhakato ca? Idha, bhikkhave, dāyako hoti sīlavā kalyāṇadhammo; paṭiggāhakāpi honti sīlavanto kalyāṇadhammā. Evaṃ kho, bhikkhave, dakkhiṇā dāyakato ceva visujjhati paṭiggāhakato ca. Imā kho, bhikkhave, catasso dakkhiṇā visuddhiyo’’ti. Aṭṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. ဒက္ခိဏသုတ္တဝဏ္ဏနာ • 8. Dakkhiṇasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈. ဒက္ခိဏသုတ္တဝဏ္ဏနာ • 8. Dakkhiṇasuttavaṇṇanā
