| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. දක්‌ඛිණසුත්‌තං
8. Dakkhiṇasuttaṃ
78. ‘‘චතස්‌සො ඉමා, භික්‌ඛවෙ, දක්‌ඛිණා විසුද්‌ධියො. කතමා චතස්‌සො? අත්‌ථි, භික්‌ඛවෙ, දක්‌ඛිණා දායකතො විසුජ්‌ඣති, නො පටිග්‌ගාහකතො; අත්‌ථි, භික්‌ඛවෙ, දක්‌ඛිණා පටිග්‌ගාහකතො විසුජ්‌ඣති, නො දායකතො; අත්‌ථි, භික්‌ඛවෙ, දක්‌ඛිණා නෙව දායකතො විසුජ්‌ඣති, නො පටිග්‌ගාහකතො; අත්‌ථි, භික්‌ඛවෙ, දක්‌ඛිණා දායකතො චෙව විසුජ්‌ඣති පටිග්‌ගාහකතො ච.
78. ‘‘Catasso imā, bhikkhave, dakkhiṇā visuddhiyo. Katamā catasso? Atthi, bhikkhave, dakkhiṇā dāyakato visujjhati, no paṭiggāhakato; atthi, bhikkhave, dakkhiṇā paṭiggāhakato visujjhati, no dāyakato; atthi, bhikkhave, dakkhiṇā neva dāyakato visujjhati, no paṭiggāhakato; atthi, bhikkhave, dakkhiṇā dāyakato ceva visujjhati paṭiggāhakato ca.
‘‘කථඤ්‌ච , භික්‌ඛවෙ, දක්‌ඛිණා දායකතො විසුජ්‌ඣති, නො පටිග්‌ගාහකතො? ඉධ, භික්‌ඛවෙ, දායකො හොති සීලවා කල්‍යාණධම්‌මො; පටිග්‌ගාහකා හොන්‌ති දුස්‌සීලා පාපධම්‌මා 1. එවං ඛො, භික්‌ඛවෙ, දක්‌ඛිණා දායකතො විසුජ්‌ඣති, නො පටිග්‌ගාහකතො.
‘‘Kathañca , bhikkhave, dakkhiṇā dāyakato visujjhati, no paṭiggāhakato? Idha, bhikkhave, dāyako hoti sīlavā kalyāṇadhammo; paṭiggāhakā honti dussīlā pāpadhammā 2. Evaṃ kho, bhikkhave, dakkhiṇā dāyakato visujjhati, no paṭiggāhakato.
‘‘කථඤ්‌ච , භික්‌ඛවෙ, දක්‌ඛිණා පටිග්‌ගාහකතො විසුජ්‌ඣති, නො දායකතො? ඉධ, භික්‌ඛවෙ , දායකො හොති දුස්‌සීලො පාපධම්‌මො; පටිග්‌ගාහකා හොන්‌ති සීලවන්‌තො කල්‍යාණධම්‌මා. එවං ඛො, භික්‌ඛවෙ, දක්‌ඛිණා පටිග්‌ගාහකතො විසුජ්‌ඣති, නො දායකතො.
‘‘Kathañca , bhikkhave, dakkhiṇā paṭiggāhakato visujjhati, no dāyakato? Idha, bhikkhave , dāyako hoti dussīlo pāpadhammo; paṭiggāhakā honti sīlavanto kalyāṇadhammā. Evaṃ kho, bhikkhave, dakkhiṇā paṭiggāhakato visujjhati, no dāyakato.
‘‘කථඤ්‌ච, භික්‌ඛවෙ, දක්‌ඛිණා නෙව දායකතො විසුජ්‌ඣති, නො පටිග්‌ගාහකතො? ඉධ, භික්‌ඛවෙ, දායකො හොති දුස්‌සීලො පාපධම්‌මො; පටිග්‌ගාහකාපි හොන්‌ති දුස්‌සීලා පාපධම්‌මා. එවං ඛො, භික්‌ඛවෙ, දක්‌ඛිණා නෙව දායකතො විසුජ්‌ඣති, නො පටිග්‌ගාහකතො.
‘‘Kathañca, bhikkhave, dakkhiṇā neva dāyakato visujjhati, no paṭiggāhakato? Idha, bhikkhave, dāyako hoti dussīlo pāpadhammo; paṭiggāhakāpi honti dussīlā pāpadhammā. Evaṃ kho, bhikkhave, dakkhiṇā neva dāyakato visujjhati, no paṭiggāhakato.
‘‘කථඤ්‌ච, භික්‌ඛවෙ, දක්‌ඛිණා දායකතො චෙව විසුජ්‌ඣති පටිග්‌ගාහකතො ච? ඉධ, භික්‌ඛවෙ, දායකො හොති සීලවා කල්‍යාණධම්‌මො; පටිග්‌ගාහකාපි හොන්‌ති සීලවන්‌තො කල්‍යාණධම්‌මා. එවං ඛො, භික්‌ඛවෙ, දක්‌ඛිණා දායකතො චෙව විසුජ්‌ඣති පටිග්‌ගාහකතො ච. ඉමා ඛො, භික්‌ඛවෙ, චතස්‌සො දක්‌ඛිණා විසුද්‌ධියො’’ති. අට්‌ඨමං.
‘‘Kathañca, bhikkhave, dakkhiṇā dāyakato ceva visujjhati paṭiggāhakato ca? Idha, bhikkhave, dāyako hoti sīlavā kalyāṇadhammo; paṭiggāhakāpi honti sīlavanto kalyāṇadhammā. Evaṃ kho, bhikkhave, dakkhiṇā dāyakato ceva visujjhati paṭiggāhakato ca. Imā kho, bhikkhave, catasso dakkhiṇā visuddhiyo’’ti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. දක්‌ඛිණසුත්‌තවණ්‌ණනා • 8. Dakkhiṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8. දක්‌ඛිණසුත්‌තවණ්‌ණනා • 8. Dakkhiṇasuttavaṇṇanā
