| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৮. দক্খিণসুত্তৰণ্ণনা
8. Dakkhiṇasuttavaṇṇanā
৭৮. অট্ঠমে দানসঙ্খাতায দক্খিণাযাতি দেয্যধম্মসঙ্খাতায দক্খিণায। ৰিসুদ্ধি নাম মহাজুতিকতা। সা পন মহপ্ফলতায ৰেদিতব্বাতি আহ ‘‘মহপ্ফলভাৰেনা’’তি। ৰিসুজ্ঝতীতি ন কিলিস্সতি, অমলিনা মহাজুতিকা মহাৰিপ্ফারা হোতীতি অত্থো। সুচিধম্মোতি রাগাদিঅসুচিৰিধমনেন সুচিসভাৰো। লামকধম্মোতি হীনসভাৰো পাপকিরিযায। অকুসলধম্মা হি একন্তনিহীনা। জূজকো সীলৰা কল্যাণধম্মো ন হোতি, তস্স মহাবোধিসত্তস্স অত্তনো পুত্তদানং দানপারমিযা মত্থকং গণ্হন্তং মহাপথৰিকম্পনসমত্থং জাতং। স্ৰাযং দাযকগুণোতি আহ ‘‘ৰেস্সন্তরমহারাজা কথেতব্বো’’তিআদি। উদ্ধরতীতি বহুলং পাপকম্মৰসেন লদ্ধব্বৰিনিপাততো উদ্ধরতি, তস্মা নত্থি ময্হং কিঞ্চি চিত্তস্স অঞ্ঞত্থত্তন্তি অধিপ্পাযো।
78. Aṭṭhame dānasaṅkhātāya dakkhiṇāyāti deyyadhammasaṅkhātāya dakkhiṇāya. Visuddhi nāma mahājutikatā. Sā pana mahapphalatāya veditabbāti āha ‘‘mahapphalabhāvenā’’ti. Visujjhatīti na kilissati, amalinā mahājutikā mahāvipphārā hotīti attho. Sucidhammoti rāgādiasucividhamanena sucisabhāvo. Lāmakadhammoti hīnasabhāvo pāpakiriyāya. Akusaladhammā hi ekantanihīnā. Jūjako sīlavā kalyāṇadhammo na hoti, tassa mahābodhisattassa attano puttadānaṃ dānapāramiyā matthakaṃ gaṇhantaṃ mahāpathavikampanasamatthaṃ jātaṃ. Svāyaṃ dāyakaguṇoti āha ‘‘vessantaramahārājā kathetabbo’’tiādi. Uddharatīti bahulaṃ pāpakammavasena laddhabbavinipātato uddharati, tasmā natthi mayhaṃ kiñci cittassa aññatthattanti adhippāyo.
পেতদক্খিণন্তি পেতে উদ্দিস্স দাতব্বদক্খিণং। পাপিতকালেযেৰাতি ‘‘ইদং দানং অসুকস্স পেতস্স হোতূ’’তি তংউদ্দিসনৰসেন পত্তিযা পাপিতকালেযেৰ। অস্সাতি পেতস্স। পাপুণীতি ফলসম্পত্তিলভাপনৰসেন পাপুণি। অযঞ্হি পেতে উদ্দিস্স দানে ধম্মতা। তদা কোসলরঞ্ঞো পরিচ্চাগৰসেন অতিৰিয দানজ্ঝাসযতং বুদ্ধপ্পমুখস্স চ সঙ্ঘস্স উক্কংসগতগুণৰিসিট্ঠতং সন্ধাযাহ ‘‘অসদিসদানং কথেতব্ব’’ন্তি।
Petadakkhiṇanti pete uddissa dātabbadakkhiṇaṃ. Pāpitakāleyevāti ‘‘idaṃ dānaṃ asukassa petassa hotū’’ti taṃuddisanavasena pattiyā pāpitakāleyeva. Assāti petassa. Pāpuṇīti phalasampattilabhāpanavasena pāpuṇi. Ayañhi pete uddissa dāne dhammatā. Tadā kosalarañño pariccāgavasena ativiya dānajjhāsayataṃ buddhappamukhassa ca saṅghassa ukkaṃsagataguṇavisiṭṭhataṃ sandhāyāha ‘‘asadisadānaṃ kathetabba’’nti.
দক্খিণসুত্তৰণ্ণনা নিট্ঠিতা।
Dakkhiṇasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৮. দক্খিণসুত্তং • 8. Dakkhiṇasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. দক্খিণসুত্তৰণ্ণনা • 8. Dakkhiṇasuttavaṇṇanā
