| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༨. དཀྑིཎསུཏྟཝཎྞནཱ
8. Dakkhiṇasuttavaṇṇanā
༧༨. ཨཊྛམེ དཱནསངྑཱཏཱཡ དཀྑིཎཱཡཱཏི དེཡྻདྷམྨསངྑཱཏཱཡ དཀྑིཎཱཡ། ཝིསུདྡྷི ནཱམ མཧཱཛུཏིཀཏཱ། སཱ པན མཧཔྥལཏཱཡ ཝེདིཏབྦཱཏི ཨཱཧ ‘‘མཧཔྥལབྷཱཝེནཱ’’ཏི། ཝིསུཛ྄ཛྷཏཱིཏི ན ཀིལིསྶཏི, ཨམལིནཱ མཧཱཛུཏིཀཱ མཧཱཝིཔྥཱརཱ ཧོཏཱིཏི ཨཏྠོ། སུཙིདྷམྨོཏི རཱགཱདིཨསུཙིཝིདྷམནེན སུཙིསབྷཱཝོ། ལཱམཀདྷམྨོཏི ཧཱིནསབྷཱཝོ པཱཔཀིརིཡཱཡ། ཨཀུསལདྷམྨཱ ཧི ཨེཀནྟནིཧཱིནཱ། ཛཱུཛཀོ སཱིལཝཱ ཀལྱཱཎདྷམྨོ ན ཧོཏི, ཏསྶ མཧཱབོདྷིསཏྟསྶ ཨཏྟནོ པུཏྟདཱནཾ དཱནཔཱརམིཡཱ མཏྠཀཾ གཎྷནྟཾ མཧཱཔཐཝིཀམྤནསམཏྠཾ ཛཱཏཾ། སྭཱཡཾ དཱཡཀགུཎོཏི ཨཱཧ ‘‘ཝེསྶནྟརམཧཱརཱཛཱ ཀཐེཏབྦོ’’ཏིཨཱདི། ཨུདྡྷརཏཱིཏི བཧུལཾ པཱཔཀམྨཝསེན ལདྡྷབྦཝིནིཔཱཏཏོ ཨུདྡྷརཏི, ཏསྨཱ ནཏྠི མཡ྄ཧཾ ཀིཉྩི ཙིཏྟསྶ ཨཉྙཏྠཏྟནྟི ཨདྷིཔྤཱཡོ།
78. Aṭṭhame dānasaṅkhātāya dakkhiṇāyāti deyyadhammasaṅkhātāya dakkhiṇāya. Visuddhi nāma mahājutikatā. Sā pana mahapphalatāya veditabbāti āha ‘‘mahapphalabhāvenā’’ti. Visujjhatīti na kilissati, amalinā mahājutikā mahāvipphārā hotīti attho. Sucidhammoti rāgādiasucividhamanena sucisabhāvo. Lāmakadhammoti hīnasabhāvo pāpakiriyāya. Akusaladhammā hi ekantanihīnā. Jūjako sīlavā kalyāṇadhammo na hoti, tassa mahābodhisattassa attano puttadānaṃ dānapāramiyā matthakaṃ gaṇhantaṃ mahāpathavikampanasamatthaṃ jātaṃ. Svāyaṃ dāyakaguṇoti āha ‘‘vessantaramahārājā kathetabbo’’tiādi. Uddharatīti bahulaṃ pāpakammavasena laddhabbavinipātato uddharati, tasmā natthi mayhaṃ kiñci cittassa aññatthattanti adhippāyo.
པེཏདཀྑིཎནྟི པེཏེ ཨུདྡིསྶ དཱཏབྦདཀྑིཎཾ། པཱཔིཏཀཱལེཡེཝཱཏི ‘‘ཨིདཾ དཱནཾ ཨསུཀསྶ པེཏསྶ ཧོཏཱུ’’ཏི ཏཾཨུདྡིསནཝསེན པཏྟིཡཱ པཱཔིཏཀཱལེཡེཝ། ཨསྶཱཏི པེཏསྶ། པཱཔུཎཱིཏི ཕལསམྤཏྟིལབྷཱཔནཝསེན པཱཔུཎི། ཨཡཉྷི པེཏེ ཨུདྡིསྶ དཱནེ དྷམྨཏཱ། ཏདཱ ཀོསལརཉྙོ པརིཙྩཱགཝསེན ཨཏིཝིཡ དཱནཛ྄ཛྷཱསཡཏཾ བུདྡྷཔྤམུཁསྶ ཙ སངྒྷསྶ ཨུཀྐཾསགཏགུཎཝིསིཊྛཏཾ སནྡྷཱཡཱཧ ‘‘ཨསདིསདཱནཾ ཀཐེཏབྦ’’ནྟི།
Petadakkhiṇanti pete uddissa dātabbadakkhiṇaṃ. Pāpitakāleyevāti ‘‘idaṃ dānaṃ asukassa petassa hotū’’ti taṃuddisanavasena pattiyā pāpitakāleyeva. Assāti petassa. Pāpuṇīti phalasampattilabhāpanavasena pāpuṇi. Ayañhi pete uddissa dāne dhammatā. Tadā kosalarañño pariccāgavasena ativiya dānajjhāsayataṃ buddhappamukhassa ca saṅghassa ukkaṃsagataguṇavisiṭṭhataṃ sandhāyāha ‘‘asadisadānaṃ kathetabba’’nti.
དཀྑིཎསུཏྟཝཎྞནཱ ནིཊྛིཏཱ།
Dakkhiṇasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༨. དཀྑིཎསུཏྟཾ • 8. Dakkhiṇasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. དཀྑིཎསུཏྟཝཎྞནཱ • 8. Dakkhiṇasuttavaṇṇanā
