| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
17. සත්‌තරසමවග්‌ගො
17. Sattarasamavaggo
(176) 11. දක්‌ඛිණාවිසුද්‌ධිකථා
(176) 11. Dakkhiṇāvisuddhikathā
800. දායකතොව දානං විසුජ්‌ඣති, නො පටිග්‌ගාහකතොති? ආමන්‌තා. නනු අත්‌ථි කෙචි පටිග්‌ගාහකා ආහුනෙය්‍යා පාහුනෙය්‍යා දක්‌ඛිණෙය්‍යා අඤ්‌ජලිකරණීයා අනුත්‌තරං පුඤ්‌ඤක්‌ඛෙත්‌තං ලොකස්‌සාති? ආමන්‌තා . හඤ්‌චි අත්‌ථි කෙචි පටිග්‌ගාහකා ආහුනෙය්‍යා පාහුනෙය්‍යා දක්‌ඛිණෙය්‍යා අඤ්‌ජලිකරණීයා අනුත්‌තරං පුඤ්‌ඤක්‌ඛෙත්‌තං ලොකස්‌ස, නො ච වත රෙ වත්‌තබ්‌බෙ – ‘‘දායකතොව දානං විසුජ්‌ඣති, නො පටිග්‌ගාහකතො’’ති.
800. Dāyakatova dānaṃ visujjhati, no paṭiggāhakatoti? Āmantā. Nanu atthi keci paṭiggāhakā āhuneyyā pāhuneyyā dakkhiṇeyyā añjalikaraṇīyā anuttaraṃ puññakkhettaṃ lokassāti? Āmantā . Hañci atthi keci paṭiggāhakā āhuneyyā pāhuneyyā dakkhiṇeyyā añjalikaraṇīyā anuttaraṃ puññakkhettaṃ lokassa, no ca vata re vattabbe – ‘‘dāyakatova dānaṃ visujjhati, no paṭiggāhakato’’ti.
දායකතොව දානං විසුජ්‌ඣති, නො පටිග්‌ගාහකතොති? ආමන්‌තා . නනු චත්‌තාරො පුරිසයුගා අට්‌ඨ පුරිසපුග්‌ගලා දක්‌ඛිණෙය්‍යා වුත්‌තා භගවතාති? ආමන්‌තා. හඤ්‌චි චත්‌තාරො පුරිසයුගා අට්‌ඨ පුරිසපුග්‌ගලා දක්‌ඛිණෙය්‍යා වුත්‌තා භගවතා, නො ච වත රෙ වත්‌තබ්‌බෙ – ‘‘දායකතොව දානං විසුජ්‌ඣති, නො පටිග්‌ගාහකතො’’ති.
Dāyakatova dānaṃ visujjhati, no paṭiggāhakatoti? Āmantā . Nanu cattāro purisayugā aṭṭha purisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, no ca vata re vattabbe – ‘‘dāyakatova dānaṃ visujjhati, no paṭiggāhakato’’ti.
දායකතොව දානං විසුජ්‌ඣති, නො පටිග්‌ගාහකතොති? ආමන්‌තා. නනු අත්‌ථි කෙචි සොතාපන්‌නෙ දානං දත්‌වා දක්‌ඛිණං ආරාධෙන්‌තීති? ආමන්‌තා. හඤ්‌චි අත්‌ථි කෙචි සොතාපන්‌නෙ දානං දත්‌වා දක්‌ඛිණං ආරාධෙන්‌ති, නො ච වත රෙ වත්‌තබ්‌බෙ – ‘‘දායකතොව දානං විසුජ්‌ඣති, නො පටිග්‌ගාහකතො’’ති.
Dāyakatova dānaṃ visujjhati, no paṭiggāhakatoti? Āmantā. Nanu atthi keci sotāpanne dānaṃ datvā dakkhiṇaṃ ārādhentīti? Āmantā. Hañci atthi keci sotāpanne dānaṃ datvā dakkhiṇaṃ ārādhenti, no ca vata re vattabbe – ‘‘dāyakatova dānaṃ visujjhati, no paṭiggāhakato’’ti.
නනු අත්‌ථි කෙචි සකදාගාමිස්‌ස…පෙ.… අනාගාමිස්‌ස…පෙ.… අරහතො දානං දත්‌වා දක්‌ඛිණං ආරාධෙන්‌තීති? ආමන්‌තා. හඤ්‌චි අත්‌ථි කෙචි අරහතො දානං දත්‌වා දක්‌ඛිණං ආරාධෙන්‌ති, නො ච වත රෙ වත්‌තබ්‌බෙ – ‘‘දායකතොව දානං විසුජ්‌ඣති, නො පටිග්‌ගාහකතො’’ති.
Nanu atthi keci sakadāgāmissa…pe… anāgāmissa…pe… arahato dānaṃ datvā dakkhiṇaṃ ārādhentīti? Āmantā. Hañci atthi keci arahato dānaṃ datvā dakkhiṇaṃ ārādhenti, no ca vata re vattabbe – ‘‘dāyakatova dānaṃ visujjhati, no paṭiggāhakato’’ti.
801. පටිග්‌ගාහකතො දානං විසුජ්‌ඣතීති? ආමන්‌තා. අඤ්‌ඤො අඤ්‌ඤස්‌ස කාරකො, පරකතං සුඛදුක්‌ඛං, අඤ්‌ඤො කරොති අඤ්‌ඤො පටිසංවෙදෙතීති? න හෙවං වත්‌තබ්‌බෙ…පෙ.….
801. Paṭiggāhakato dānaṃ visujjhatīti? Āmantā. Añño aññassa kārako, parakataṃ sukhadukkhaṃ, añño karoti añño paṭisaṃvedetīti? Na hevaṃ vattabbe…pe….
දායකතොව දානං විසුජ්‌ඣති, නො පටිග්‌ගාහකතොති? ආමන්‌තා. නනු වුත්‌තං භගවතා – ‘‘චතස්‌සො ඛො ඉමා, ආනන්‌ද, දක්‌ඛිණා විසුද්‌ධියො! කතමා චතස්‌සො? අත්‌ථානන්‌ද, දක්‌ඛිණා දායකතො විසුජ්‌ඣති, නො පටිග්‌ගාහකතො; අත්‌ථානන්‌ද, දක්‌ඛිණා පටිග්‌ගාහකතො විසුජ්‌ඣති, නො දායකතො ; අත්‌ථානන්‌ද, දක්‌ඛිණා දායකතො චෙව විසුජ්‌ඣති පටිග්‌ගාහකතො ච; අත්‌ථානන්‌ද, දක්‌ඛිණා නෙව දායකතො විසුජ්‌ඣති, නො පටිග්‌ගාහකතො. ඉමා ඛො, ආනන්‌ද, චතස්‌සො දක්‌ඛිණා විසුද්‌ධියො’’ති 1. අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘දායකතොව දානං විසුජ්‌ඣති, නො පටිග්‌ගාහකතො’’ති.
Dāyakatova dānaṃ visujjhati, no paṭiggāhakatoti? Āmantā. Nanu vuttaṃ bhagavatā – ‘‘catasso kho imā, ānanda, dakkhiṇā visuddhiyo! Katamā catasso? Atthānanda, dakkhiṇā dāyakato visujjhati, no paṭiggāhakato; atthānanda, dakkhiṇā paṭiggāhakato visujjhati, no dāyakato ; atthānanda, dakkhiṇā dāyakato ceva visujjhati paṭiggāhakato ca; atthānanda, dakkhiṇā neva dāyakato visujjhati, no paṭiggāhakato. Imā kho, ānanda, catasso dakkhiṇā visuddhiyo’’ti 2. Attheva suttantoti? Āmantā. Tena hi na vattabbaṃ – ‘‘dāyakatova dānaṃ visujjhati, no paṭiggāhakato’’ti.
දක්‌ඛිණාවිසුද්‌ධිකථා නිට්‌ඨිතා.
Dakkhiṇāvisuddhikathā niṭṭhitā.
සත්‌තරසමවග්‌ගො.
Sattarasamavaggo.
තස්‌සුද්‌දානං –
Tassuddānaṃ –
අත්‌ථි අරහතො පුඤ්‌ඤූපචයො, නත්‌ථි අරහතො අකාලමච්‌චු, සබ්‌බමිදං කම්‌මතො, ඉන්‌ද්‍රියබද්‌ධඤ්‌ඤෙව දුක්‌ඛං, ඨපෙත්‌වා අරියමග්‌ගං අවසෙසා සඞ්‌ඛාරා දුක්‌ඛා, සඞ්‌ඝො දක්‌ඛිණං පටිග්‌ගණ්‌හාති, සඞ්‌ඝො දක්‌ඛිණං විසොධෙති, සඞ්‌ඝො භුඤ්‌ජති පිවති ඛාදති සායති, සඞ්‌ඝස්‌ස දින්‌නං මහප්‌ඵලං, අත්‌ථි දානං විසුද්‌ධියාති 3.
Atthi arahato puññūpacayo, natthi arahato akālamaccu, sabbamidaṃ kammato, indriyabaddhaññeva dukkhaṃ, ṭhapetvā ariyamaggaṃ avasesā saṅkhārā dukkhā, saṅgho dakkhiṇaṃ paṭiggaṇhāti, saṅgho dakkhiṇaṃ visodheti, saṅgho bhuñjati pivati khādati sāyati, saṅghassa dinnaṃ mahapphalaṃ, atthi dānaṃ visuddhiyāti 4.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 11. දක්‌ඛිණාවිසුද්‌ධිකථාවණ්‌ණනා • 11. Dakkhiṇāvisuddhikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 11. දක්‌ඛිණාවිසුද්‌ධිකථාවණ්‌ණනා • 11. Dakkhiṇāvisuddhikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 11. දක්‌ඛිණාවිසුද්‌ධිකථාවණ්‌ණනා • 11. Dakkhiṇāvisuddhikathāvaṇṇanā
