| Library / Tipiṭaka / ติปิฎก • Tipiṭaka / ปญฺจปกรณ-อฎฺฐกถา • Pañcapakaraṇa-aṭṭhakathā |
๑๑. ทกฺขิณาวิสุทฺธิกถาวณฺณนา
11. Dakkhiṇāvisuddhikathāvaṇṇanā
๘๐๐-๘๐๑. อิทานิ ทกฺขิณาวิสุทฺธิกถา นาม โหติฯ ตตฺถ ‘‘ยทิ ปฎิคฺคาหกโต ทกฺขิณา วิสุเชฺฌยฺย, มหปฺผลา ภเวยฺยฯ ทายเกน ทานํ ทินฺนํ, ปฎิคฺคาหเกน วิปาโก นิพฺพตฺติโตติ อโญฺญ อญฺญสฺส การโก ภเวยฺย, ปรํกตํ สุขทุกฺขํ อาปเชฺชยฺย, อโญฺญ กเรยฺย, อโญฺญ ปฎิสํเวเทยฺยฯ ตสฺมา ทายกโตว ทานํ วิสุชฺฌติ, โน ปฎิคฺคาหกโต, ทายกเสฺสว จิตฺตวิสุทฺธิ วิปากทายิกา โหตี’’ติ เยสํ ลทฺธิ, เสยฺยถาปิ อุตฺตราปถกานํ; เต สนฺธาย ปุจฺฉา สกวาทิสฺส, ปฎิญฺญา อิตรสฺสฯ อาหุเนยฺยาติอาทิ ‘‘ยทิ ปฎิคฺคาหกโต ทานํ น วิสุเชฺฌยฺย, กิมสฺส อาหุเนยฺยาทิภาโว กเรยฺยา’’ติ ทสฺสนตฺถํ วุตฺตํฯ อโญฺญ อญฺญสฺส การโกติ ยทิ ทายกสฺส ทานเจตนา ปฎิคฺคาหเกน กตา ภเวยฺย, ยุตฺตรูปํ สิยาฯ ตสฺส ปน ทานเจตนา ปริสุทฺธา ปฎิคฺคาหกสงฺขาตํ วตฺถุํ ปฎิจฺจ มหาวิปากเฎฺฐน วิสุชฺฌติ, ตสฺมา อโจทนา เอสา ‘‘ปฎิคฺคาหกโต ทานํ วิสุชฺฌตี’’ติฯ
800-801. Idāni dakkhiṇāvisuddhikathā nāma hoti. Tattha ‘‘yadi paṭiggāhakato dakkhiṇā visujjheyya, mahapphalā bhaveyya. Dāyakena dānaṃ dinnaṃ, paṭiggāhakena vipāko nibbattitoti añño aññassa kārako bhaveyya, paraṃkataṃ sukhadukkhaṃ āpajjeyya, añño kareyya, añño paṭisaṃvedeyya. Tasmā dāyakatova dānaṃ visujjhati, no paṭiggāhakato, dāyakasseva cittavisuddhi vipākadāyikā hotī’’ti yesaṃ laddhi, seyyathāpi uttarāpathakānaṃ; te sandhāya pucchā sakavādissa, paṭiññā itarassa. Āhuneyyātiādi ‘‘yadi paṭiggāhakato dānaṃ na visujjheyya, kimassa āhuneyyādibhāvo kareyyā’’ti dassanatthaṃ vuttaṃ. Añño aññassa kārakoti yadi dāyakassa dānacetanā paṭiggāhakena katā bhaveyya, yuttarūpaṃ siyā. Tassa pana dānacetanā parisuddhā paṭiggāhakasaṅkhātaṃ vatthuṃ paṭicca mahāvipākaṭṭhena visujjhati, tasmā acodanā esā ‘‘paṭiggāhakato dānaṃ visujjhatī’’ti.
ทกฺขิณาวิสุทฺธิกถาวณฺณนาฯ
Dakkhiṇāvisuddhikathāvaṇṇanā.
สตฺตรสโม วโคฺคฯ
Sattarasamo vaggo.
Related texts:
ติปิฎก (มูล) • Tipiṭaka (Mūla) / อภิธมฺมปิฎก • Abhidhammapiṭaka / กถาวตฺถุปาฬิ • Kathāvatthupāḷi / (๑๗๖) ๑๑. ทกฺขิณาวิสุทฺธิกถา • (176) 11. Dakkhiṇāvisuddhikathā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๑๑. ทกฺขิณาวิสุทฺธิกถาวณฺณนา • 11. Dakkhiṇāvisuddhikathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๑๑. ทกฺขิณาวิสุทฺธิกถาวณฺณนา • 11. Dakkhiṇāvisuddhikathāvaṇṇanā
