| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. দামলিসুত্তৰণ্ণনা
5. Dāmalisuttavaṇṇanā
৮৬. পঞ্চমে ন তেনাসীসতে ভৰন্তি তেন কারণেন যং কিঞ্চি ভৰং ন পত্থেতি। আযতপগ্গহো নামেস দেৰপুত্তো, খীণাসৰস্স কিচ্চৰোসানং নত্থি। খীণাসৰেন হি আদিতো অরহত্তপ্পত্তিযা ৰীরিযং কতং , অপরভাগে মযা অরহত্তং পত্তন্তি মা তুণ্হী ভৰতু, তথেৰ ৰীরিযং দল়্হং করোতু পরক্কমতূতি চিন্তেত্ৰা এৰমাহ।
86. Pañcame na tenāsīsate bhavanti tena kāraṇena yaṃ kiñci bhavaṃ na pattheti. Āyatapaggaho nāmesa devaputto, khīṇāsavassa kiccavosānaṃ natthi. Khīṇāsavena hi ādito arahattappattiyā vīriyaṃ kataṃ , aparabhāge mayā arahattaṃ pattanti mā tuṇhī bhavatu, tatheva vīriyaṃ daḷhaṃ karotu parakkamatūti cintetvā evamāha.
অথ ভগৰা ‘‘অযং দেৰপুত্তো খীণাসৰস্স কিচ্চৰোসানং অকথেন্তো মম সাসনং অনিয্যানিকং কথেতি, কিচ্চৰোসানমস্স কথেস্সামী’’তি চিন্তেত্ৰা নত্থি কিচ্চন্তিআদিমাহ। তীসু কির পিটকেসু অযং গাথা অসংকিণ্ণা। ভগৰতা হি অঞ্ঞত্থ ৰীরিযস্স দোসো নাম দস্সিতো নত্থি। ইধ পন ইমং দেৰপুত্তং পটিবাহিত্ৰা ‘‘খীণাসৰেন পুব্বভাগে আসৰক্খযত্থায অরঞ্ঞে ৰসন্তেন কম্মট্ঠানং আদায ৰীরিযং কতং, অপরভাগে সচে ইচ্ছতি, করোতু, নো চে ইচ্ছতি, যথাসুখং ৰিহরতূ’’তি খীণাসৰস্স কিচ্চৰোসানদস্সনত্থং এৰমাহ। তত্থ গাধন্তি পতিট্ঠং। পঞ্চমং।
Atha bhagavā ‘‘ayaṃ devaputto khīṇāsavassa kiccavosānaṃ akathento mama sāsanaṃ aniyyānikaṃ katheti, kiccavosānamassa kathessāmī’’ti cintetvā natthi kiccantiādimāha. Tīsu kira piṭakesu ayaṃ gāthā asaṃkiṇṇā. Bhagavatā hi aññattha vīriyassa doso nāma dassito natthi. Idha pana imaṃ devaputtaṃ paṭibāhitvā ‘‘khīṇāsavena pubbabhāge āsavakkhayatthāya araññe vasantena kammaṭṭhānaṃ ādāya vīriyaṃ kataṃ, aparabhāge sace icchati, karotu, no ce icchati, yathāsukhaṃ viharatū’’ti khīṇāsavassa kiccavosānadassanatthaṃ evamāha. Tattha gādhanti patiṭṭhaṃ. Pañcamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. দামলিসুত্তং • 5. Dāmalisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. দামলিসুত্তৰণ্ণনা • 5. Dāmalisuttavaṇṇanā
