| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၅. ဒာမလိသုတ္တဝဏ္ဏနာ
5. Dāmalisuttavaṇṇanā
၈၆. ပဉ္စမေ န တေနာသီသတေ ဘဝန္တိ တေန ကာရဏေန ယံ ကိဉ္စိ ဘဝံ န ပတ္ထေတိ။ အာယတပဂ္ဂဟော နာမေသ ဒေဝပုတ္တော, ခီဏာသဝသ္သ ကိစ္စဝောသာနံ နတ္ထိ။ ခီဏာသဝေန ဟိ အာဒိတော အရဟတ္တပ္ပတ္တိယာ ဝီရိယံ ကတံ , အပရဘာဂေ မယာ အရဟတ္တံ ပတ္တန္တိ မာ တုဏ္ဟီ ဘဝတု, တထေဝ ဝီရိယံ ဒဠ္ဟံ ကရောတု ပရက္ကမတူတိ စိန္တေတ္ဝာ ဧဝမာဟ။
86. Pañcame na tenāsīsate bhavanti tena kāraṇena yaṃ kiñci bhavaṃ na pattheti. Āyatapaggaho nāmesa devaputto, khīṇāsavassa kiccavosānaṃ natthi. Khīṇāsavena hi ādito arahattappattiyā vīriyaṃ kataṃ , aparabhāge mayā arahattaṃ pattanti mā tuṇhī bhavatu, tatheva vīriyaṃ daḷhaṃ karotu parakkamatūti cintetvā evamāha.
အထ ဘဂဝာ ‘‘အယံ ဒေဝပုတ္တော ခီဏာသဝသ္သ ကိစ္စဝောသာနံ အကထေန္တော မမ သာသနံ အနိယ္ယာနိကံ ကထေတိ, ကိစ္စဝောသာနမသ္သ ကထေသ္သာမီ’’တိ စိန္တေတ္ဝာ နတ္ထိ ကိစ္စန္တိအာဒိမာဟ။ တီသု ကိရ ပိဋကေသု အယံ ဂာထာ အသံကိဏ္ဏာ။ ဘဂဝတာ ဟိ အညတ္ထ ဝီရိယသ္သ ဒောသော နာမ ဒသ္သိတော နတ္ထိ။ ဣဓ ပန ဣမံ ဒေဝပုတ္တံ ပဋိဗာဟိတ္ဝာ ‘‘ခီဏာသဝေန ပုဗ္ဗဘာဂေ အာသဝက္ခယတ္ထာယ အရညေ ဝသန္တေန ကမ္မဋ္ဌာနံ အာဒာယ ဝီရိယံ ကတံ, အပရဘာဂေ သစေ ဣစ္ဆတိ, ကရောတု, နော စေ ဣစ္ဆတိ, ယထာသုခံ ဝိဟရတူ’’တိ ခီဏာသဝသ္သ ကိစ္စဝောသာနဒသ္သနတ္ထံ ဧဝမာဟ။ တတ္ထ ဂာဓန္တိ ပတိဋ္ဌံ။ ပဉ္စမံ။
Atha bhagavā ‘‘ayaṃ devaputto khīṇāsavassa kiccavosānaṃ akathento mama sāsanaṃ aniyyānikaṃ katheti, kiccavosānamassa kathessāmī’’ti cintetvā natthi kiccantiādimāha. Tīsu kira piṭakesu ayaṃ gāthā asaṃkiṇṇā. Bhagavatā hi aññattha vīriyassa doso nāma dassito natthi. Idha pana imaṃ devaputtaṃ paṭibāhitvā ‘‘khīṇāsavena pubbabhāge āsavakkhayatthāya araññe vasantena kammaṭṭhānaṃ ādāya vīriyaṃ kataṃ, aparabhāge sace icchati, karotu, no ce icchati, yathāsukhaṃ viharatū’’ti khīṇāsavassa kiccavosānadassanatthaṃ evamāha. Tattha gādhanti patiṭṭhaṃ. Pañcamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. ဒာမလိသုတ္တံ • 5. Dāmalisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. ဒာမလိသုတ္တဝဏ္ဏနာ • 5. Dāmalisuttavaṇṇanā
