| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
7. ஸத்தமவக்³கோ³
7. Sattamavaggo
(66) 4. தா³னகதா²
(66) 4. Dānakathā
478. சேதஸிகோ த⁴ம்மோ தா³னந்தி? ஆமந்தா. லப்³பா⁴ சேதஸிகோ த⁴ம்மோ பரேஸங் தா³துந்தி? ந ஹேவங் வத்தப்³பே³ …பே॰… லப்³பா⁴ சேதஸிகோ த⁴ம்மோ பரேஸங் தா³துந்தி? ஆமந்தா. லப்³பா⁴ ப²ஸ்ஸோ பரேஸங் தா³துந்தி? ந ஹேவங் வத்தப்³பே³ …பே॰… லப்³பா⁴ வேத³னா…பே॰… ஸஞ்ஞா… சேதனா… ஸத்³தா⁴… வீரியங்… ஸதி… ஸமாதி⁴… பஞ்ஞா பரேஸங் தா³துந்தி? ந ஹேவங் வத்தப்³பே³…பே॰….
478. Cetasiko dhammo dānanti? Āmantā. Labbhā cetasiko dhammo paresaṃ dātunti? Na hevaṃ vattabbe …pe… labbhā cetasiko dhammo paresaṃ dātunti? Āmantā. Labbhā phasso paresaṃ dātunti? Na hevaṃ vattabbe …pe… labbhā vedanā…pe… saññā… cetanā… saddhā… vīriyaṃ… sati… samādhi… paññā paresaṃ dātunti? Na hevaṃ vattabbe…pe….
479. ந வத்தப்³ப³ங் – சேதஸிகோ த⁴ம்மோ தா³னந்தி? ஆமந்தா. தா³னங் அனிட்ட²ப²லங் அகந்தப²லங் அமனுஞ்ஞப²லங் ஸேசனகப²லங் து³க்கு²த்³ரயங் து³க்க²விபாகந்தி? ந ஹேவங் வத்தப்³பே³…பே॰… நனு தா³னங் இட்ட²ப²லங் கந்தப²லங் மனுஞ்ஞப²லங் அஸேசனகப²லங் ஸுகு²த்³ரயங் ஸுக²விபாகந்தி? ஆமந்தா. ஹஞ்சி தா³னங் இட்ட²ப²லங் கந்தப²லங் மனுஞ்ஞப²லங் அஸேசனகப²லங் ஸுகு²த்³ரயங் ஸுக²விபாகங் , தேன வத ரே வத்தப்³பே³ – ‘‘சேதஸிகோ த⁴ம்மோ தா³ன’’ந்தி.
479. Na vattabbaṃ – cetasiko dhammo dānanti? Āmantā. Dānaṃ aniṭṭhaphalaṃ akantaphalaṃ amanuññaphalaṃ secanakaphalaṃ dukkhudrayaṃ dukkhavipākanti? Na hevaṃ vattabbe…pe… nanu dānaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti? Āmantā. Hañci dānaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākaṃ , tena vata re vattabbe – ‘‘cetasiko dhammo dāna’’nti.
தா³னங் இட்ட²ப²லங் வுத்தங் ப⁴க³வதா, சீவரங் தா³னந்தி 1? ஆமந்தா. சீவரங் இட்ட²ப²லங் கந்தப²லங் மனுஞ்ஞப²லங் அஸேசனகப²லங் ஸுகு²த்³ரயங் ஸுக²விபாகந்தி? ந ஹேவங் வத்தப்³பே³…பே॰… தா³னங் இட்ட²ப²லங் வுத்தங் ப⁴க³வதா, பிண்ட³பாதோ ஸேனாஸனங் கி³லானபச்சயபே⁴ஸஜ்ஜபரிக்கா²ரோ தா³னந்தி? ஆமந்தா. கி³லானபச்சயபே⁴ஸஜ்ஜபரிக்கா²ரோ இட்ட²ப²லோ கந்தப²லோ மனுஞ்ஞப²லோ அஸேசனகப²லோ ஸுகு²த்³ரயோ ஸுக²விபாகோதி? ந ஹேவங் வத்தப்³பே³…பே॰….
Dānaṃ iṭṭhaphalaṃ vuttaṃ bhagavatā, cīvaraṃ dānanti 2? Āmantā. Cīvaraṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti? Na hevaṃ vattabbe…pe… dānaṃ iṭṭhaphalaṃ vuttaṃ bhagavatā, piṇḍapāto senāsanaṃ gilānapaccayabhesajjaparikkhāro dānanti? Āmantā. Gilānapaccayabhesajjaparikkhāro iṭṭhaphalo kantaphalo manuññaphalo asecanakaphalo sukhudrayo sukhavipākoti? Na hevaṃ vattabbe…pe….
480. ந வத்தப்³ப³ங் – ‘‘சேதஸிகோ த⁴ம்மோ தா³ன’’ந்தி? ஆமந்தா. நனு வுத்தங் ப⁴க³வதா –
480. Na vattabbaṃ – ‘‘cetasiko dhammo dāna’’nti? Āmantā. Nanu vuttaṃ bhagavatā –
‘‘ஸத்³தா⁴ ஹிரியங் குஸலஞ்ச தா³னங்,
‘‘Saddhā hiriyaṃ kusalañca dānaṃ,
த⁴ம்மா ஏதே ஸப்புரிஸானுயாதா;
Dhammā ete sappurisānuyātā;
ஏதஞ்ஹி மக்³க³ங் தி³வியங் வத³ந்தி,
Etañhi maggaṃ diviyaṃ vadanti,
அத்தே²வ ஸுத்தந்தோதி? ஆமந்தா. தேன ஹி சேதஸிகோ த⁴ம்மோ தா³னந்தி.
Attheva suttantoti? Āmantā. Tena hi cetasiko dhammo dānanti.
ந வத்தப்³ப³ங் – ‘‘சேதஸிகோ த⁴ம்மோ தா³ன’’ந்தி? ஆமந்தா. நனு வுத்தங் ப⁴க³வதா – ‘‘பஞ்சிமானி, பி⁴க்க²வே, தா³னானி மஹாதா³னானி அக்³க³ஞ்ஞானி ரத்தஞ்ஞானி வங்ஸஞ்ஞானி போராணானி அஸங்கிண்ணானி அஸங்கிண்ணபுப்³பா³னி, ந ஸங்கியந்தி ந ஸங்கியிஸ்ஸந்தி, அப்படிகுட்டா²னி ஸமணேஹி ப்³ராஹ்மணேஹி விஞ்ஞூஹி! கதமானி பஞ்ச? இத⁴, பி⁴க்க²வே, அரியஸாவகோ பாணாதிபாதங் பஹாய பாணாதிபாதா படிவிரதோ ஹோதி. பாணாதிபாதா படிவிரதோ, பி⁴க்க²வே, அரியஸாவகோ அபரிமாணானங் ஸத்தானங் அப⁴யங் தே³தி அவேரங் தே³தி அப்³யாப³ஜ்ஜ²ங் 5 தே³தி. அபரிமாணானங் ஸத்தானங் அப⁴யங் த³த்வா அவேரங் த³த்வா அப்³யாப³ஜ்ஜ²ங் த³த்வா அபரிமாணஸ்ஸ அப⁴யஸ்ஸ அவேரஸ்ஸ அப்³யாப³ஜ்ஜ²ஸ்ஸ பா⁴கீ³ ஹோதி. இத³ங், பி⁴க்க²வே , பட²மங் தா³னங் மஹாதா³னங் அக்³க³ஞ்ஞங் ரத்தஞ்ஞங் வங்ஸஞ்ஞங் போராணங் அஸங்கிண்ணங் அஸங்கிண்ணபுப்³ப³ங், ந ஸங்கியதி ந ஸங்கியிஸ்ஸதி, அப்படிகுட்ட²ங் ஸமணேஹி ப்³ராஹ்மணேஹி விஞ்ஞூஹி. புன சபரங், பி⁴க்க²வே, அரியஸாவகோ அதி³ன்னாதா³னங் பஹாய…பே॰… காமேஸுமிச்சா²சாரங் பஹாய…பே॰… முஸாவாத³ங் பஹாய…பே॰… ஸுராமேரயமஜ்ஜபமாத³ட்டா²னங் பஹாய ஸுராமேரயமஜ்ஜபமாத³ட்டா²னா படிவிரதோ ஹோதி. ஸுராமேரயமஜ்ஜபமாத³ட்டா²னா படிவிரதோ, பி⁴க்க²வே, அரியஸாவகோ அபரிமாணானங் ஸத்தானங் அப⁴யங் தே³தி அவேரங் தே³தி அப்³யாப³ஜ்ஜ²ங் தே³தி. அபரிமாணானங் ஸத்தானங் அப⁴யங் த³த்வா அவேரங் த³த்வா அப்³யாப³ஜ்ஜ²ங் த³த்வா அபரிமாணஸ்ஸ அப⁴யஸ்ஸ அவேரஸ்ஸ அப்³யாப³ஜ்ஜ²ஸ்ஸ பா⁴கீ³ ஹோதி. இத³ங், பி⁴க்க²வே , பஞ்சமங் தா³னங் மஹாதா³னங் அக்³க³ஞ்ஞங் ரத்தஞ்ஞங் வங்ஸஞ்ஞங் போராணங் அஸங்கிண்ணங் அஸங்கிண்ணபுப்³ப³ங், ந ஸங்கியதி ந ஸங்கியிஸ்ஸதி, அப்படிகுட்ட²ங் ஸமணேஹி ப்³ராஹ்மணேஹி விஞ்ஞூஹி. இமானி கோ², பி⁴க்க²வே, பஞ்ச தா³னானி மஹாதா³னானி அக்³க³ஞ்ஞானி ரத்தஞ்ஞானி வங்ஸஞ்ஞானி போராணானி அஸங்கிண்ணானி அஸங்கிண்ணபுப்³பா³னி, ந ஸங்கியந்தி ந ஸங்கியிஸ்ஸந்தி, அப்படிகுட்டா²னி ஸமணேஹி ப்³ராஹ்மணேஹி விஞ்ஞூஹீ’’தி 6. அத்தே²வ ஸுத்தந்தோதி? ஆமந்தா. தேன ஹி சேதஸிகோ த⁴ம்மோ தா³னந்தி.
Na vattabbaṃ – ‘‘cetasiko dhammo dāna’’nti? Āmantā. Nanu vuttaṃ bhagavatā – ‘‘pañcimāni, bhikkhave, dānāni mahādānāni aggaññāni rattaññāni vaṃsaññāni porāṇāni asaṅkiṇṇāni asaṅkiṇṇapubbāni, na saṅkiyanti na saṅkiyissanti, appaṭikuṭṭhāni samaṇehi brāhmaṇehi viññūhi! Katamāni pañca? Idha, bhikkhave, ariyasāvako pāṇātipātaṃ pahāya pāṇātipātā paṭivirato hoti. Pāṇātipātā paṭivirato, bhikkhave, ariyasāvako aparimāṇānaṃ sattānaṃ abhayaṃ deti averaṃ deti abyābajjhaṃ 7 deti. Aparimāṇānaṃ sattānaṃ abhayaṃ datvā averaṃ datvā abyābajjhaṃ datvā aparimāṇassa abhayassa averassa abyābajjhassa bhāgī hoti. Idaṃ, bhikkhave , paṭhamaṃ dānaṃ mahādānaṃ aggaññaṃ rattaññaṃ vaṃsaññaṃ porāṇaṃ asaṅkiṇṇaṃ asaṅkiṇṇapubbaṃ, na saṅkiyati na saṅkiyissati, appaṭikuṭṭhaṃ samaṇehi brāhmaṇehi viññūhi. Puna caparaṃ, bhikkhave, ariyasāvako adinnādānaṃ pahāya…pe… kāmesumicchācāraṃ pahāya…pe… musāvādaṃ pahāya…pe… surāmerayamajjapamādaṭṭhānaṃ pahāya surāmerayamajjapamādaṭṭhānā paṭivirato hoti. Surāmerayamajjapamādaṭṭhānā paṭivirato, bhikkhave, ariyasāvako aparimāṇānaṃ sattānaṃ abhayaṃ deti averaṃ deti abyābajjhaṃ deti. Aparimāṇānaṃ sattānaṃ abhayaṃ datvā averaṃ datvā abyābajjhaṃ datvā aparimāṇassa abhayassa averassa abyābajjhassa bhāgī hoti. Idaṃ, bhikkhave , pañcamaṃ dānaṃ mahādānaṃ aggaññaṃ rattaññaṃ vaṃsaññaṃ porāṇaṃ asaṅkiṇṇaṃ asaṅkiṇṇapubbaṃ, na saṅkiyati na saṅkiyissati, appaṭikuṭṭhaṃ samaṇehi brāhmaṇehi viññūhi. Imāni kho, bhikkhave, pañca dānāni mahādānāni aggaññāni rattaññāni vaṃsaññāni porāṇāni asaṅkiṇṇāni asaṅkiṇṇapubbāni, na saṅkiyanti na saṅkiyissanti, appaṭikuṭṭhāni samaṇehi brāhmaṇehi viññūhī’’ti 8. Attheva suttantoti? Āmantā. Tena hi cetasiko dhammo dānanti.
481. ந வத்தப்³ப³ங் – ‘‘தெ³ய்யத⁴ம்மோ தா³ன’’ந்தி? ஆமந்தா. நனு வுத்தங் ப⁴க³வதா – ‘‘இதே⁴கச்சோ அன்னங் தே³தி, பானங் தே³தி, வத்த²ங் தே³தி, யானங் தே³தி, மாலங் தே³தி, க³ந்த⁴ங் தே³தி, விலேபனங் தே³தி, ஸெய்யங் தே³தி, ஆவஸத²ங் தே³தி, பதீ³பெய்யங் தே³தீ’’தி 9! அத்தே²வ ஸுத்தந்தோதி? ஆமந்தா. தேன ஹி தெ³ய்யத⁴ம்மோ தா³னந்தி.
481. Na vattabbaṃ – ‘‘deyyadhammo dāna’’nti? Āmantā. Nanu vuttaṃ bhagavatā – ‘‘idhekacco annaṃ deti, pānaṃ deti, vatthaṃ deti, yānaṃ deti, mālaṃ deti, gandhaṃ deti, vilepanaṃ deti, seyyaṃ deti, āvasathaṃ deti, padīpeyyaṃ detī’’ti 10! Attheva suttantoti? Āmantā. Tena hi deyyadhammo dānanti.
482. தெ³ய்யத⁴ம்மோ தா³னந்தி? ஆமந்தா. தெ³ய்யத⁴ம்மோ இட்ட²ப²லோ கந்தப²லோ மனுஞ்ஞப²லோ அஸேசனகப²லோ ஸுகு²த்³ரயோ ஸுக²விபாகோதி? ந ஹேவங் வத்தப்³பே³…பே॰… தா³னங் இட்ட²ப²லங் வுத்தங் ப⁴க³வதா, சீவரங் தா³னந்தி? ஆமந்தா. சீவரங் இட்ட²ப²லங் கந்தப²லங் மனுஞ்ஞப²லங் அஸேசனகப²லங் ஸுகு²த்³ரயங் ஸுக²விபாகந்தி? ந ஹேவங் வத்தப்³பே³…பே॰… தா³னங் இட்ட²ப²லங் வுத்தங் ப⁴க³வதா, பிண்ட³பாதோ தா³னங்… ஸேனாஸனங் தா³னங்… கி³லானபச்சயபே⁴ஸஜ்ஜபரிக்கா²ரோ தா³னந்தி? ஆமந்தா. கி³லானபச்சயபே⁴ஸஜ்ஜபரிக்கா²ரோ இட்ட²ப²லோ கந்தப²லோ மனுஞ்ஞப²லோ அஸேசனகப²லோ ஸுகு²த்³ரயோ ஸுக²விபாகோதி? ந ஹேவங் வத்தப்³பே³…பே॰… தேன ஹி ந வத்தப்³ப³ங் – ‘‘தெ³ய்யத⁴ம்மோ தா³ன’’ந்தி.
482. Deyyadhammo dānanti? Āmantā. Deyyadhammo iṭṭhaphalo kantaphalo manuññaphalo asecanakaphalo sukhudrayo sukhavipākoti? Na hevaṃ vattabbe…pe… dānaṃ iṭṭhaphalaṃ vuttaṃ bhagavatā, cīvaraṃ dānanti? Āmantā. Cīvaraṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti? Na hevaṃ vattabbe…pe… dānaṃ iṭṭhaphalaṃ vuttaṃ bhagavatā, piṇḍapāto dānaṃ… senāsanaṃ dānaṃ… gilānapaccayabhesajjaparikkhāro dānanti? Āmantā. Gilānapaccayabhesajjaparikkhāro iṭṭhaphalo kantaphalo manuññaphalo asecanakaphalo sukhudrayo sukhavipākoti? Na hevaṃ vattabbe…pe… tena hi na vattabbaṃ – ‘‘deyyadhammo dāna’’nti.
தா³னகதா² நிட்டி²தா.
Dānakathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 4. தா³னகதா²வண்ணனா • 4. Dānakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. தா³னகதா²வண்ணனா • 4. Dānakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. தா³னகதா²வண்ணனா • 4. Dānakathāvaṇṇanā
