| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
4. தா³னகதா²வண்ணனா
4. Dānakathāvaṇṇanā
478. தெ³ய்யத⁴ம்மவஸேன சோதே³துந்தி யதி³ சேதஸிகோவ த⁴ம்மோ தா³னங், ‘‘தி³ய்யதீதி தா³ன’’ந்தி இமினாபி அத்தே²ன சேதஸிகஸ்ஸேவ தா³னபா⁴வோ ஆபஜ்ஜதீதி சோதே³துந்தி அத்தோ².
478. Deyyadhammavasena codetunti yadi cetasikova dhammo dānaṃ, ‘‘diyyatīti dāna’’nti imināpi atthena cetasikasseva dānabhāvo āpajjatīti codetunti attho.
479. அனிட்ட²ப²லந்திஆதி³ அசேதஸிகஸ்ஸ த⁴ம்மஸ்ஸ தா³னபா⁴வதீ³பனத்த²ங் வுத்தந்தி ப²லதா³னபா⁴வதீ³பனத்த²ங் ந வுத்தந்தி அத்தோ² த³ட்ட²ப்³போ³. அனிட்ட²ப²லந்திஆதி³னா அசேதஸிகஸ்ஸ த⁴ம்மஸ்ஸ ப²லதா³னங் வுத்தங் விய ஹோதி, ந தா³னபா⁴வோ, தன்னிவாரணத்த²ஞ்சேதமாஹாதி. ஏவஞ்ச கத்வா அனந்தரமேவாஹ ‘‘ந ஹி அசேதஸிகோ அன்னாதி³த⁴ம்மோ ஆயதிங் விபாகங் தே³தீ’’தி. இட்ட²ப²லபா⁴வனியமனத்த²ந்தி தெ³ய்யத⁴ம்மோ விய கேனசி பரியாயேன அனிட்ட²ப²லதா தா³னஸ்ஸ நத்தி², ஏகந்தங் பன இட்ட²ப²லமேவாதி நியமனத்த²ந்தி அத்தோ².
479. Aniṭṭhaphalantiādi acetasikassa dhammassa dānabhāvadīpanatthaṃ vuttanti phaladānabhāvadīpanatthaṃ na vuttanti attho daṭṭhabbo. Aniṭṭhaphalantiādinā acetasikassa dhammassa phaladānaṃ vuttaṃ viya hoti, na dānabhāvo, tannivāraṇatthañcetamāhāti. Evañca katvā anantaramevāha ‘‘na hi acetasiko annādidhammo āyatiṃ vipākaṃ detī’’ti. Iṭṭhaphalabhāvaniyamanatthanti deyyadhammo viya kenaci pariyāyena aniṭṭhaphalatā dānassa natthi, ekantaṃ pana iṭṭhaphalamevāti niyamanatthanti attho.
இதரேனாதி ‘‘தி³ய்யதீதி தா³ன’’ந்தி இமினா பரியாயேன. ந பன ஏகேனத்தே²னாதி ‘‘தெ³ய்யத⁴ம்மோவ தா³ன’’ந்தி இமங் ஸகவாதீ³வாத³ங் நிவத்தேதுங் ‘‘ஸத்³தா⁴ ஹிரிய’’ந்திஆதி³கங் ஸுத்தஸாத⁴னங் பரவாதீ³வாதே³ யுஜ்ஜதி, ‘‘இதே⁴கச்சோ அன்னங் தே³தீ’’திஆதி³கஞ்ச, ‘‘சேதஸிகோவ த⁴ம்மோ தா³ன’’ந்தி இமங் நிவத்தேதுங் ‘‘சேதஸிகோ த⁴ம்மோ தா³ன’’ந்தி இமங் பன ஸாதே⁴துங் ‘‘ஸத்³தா⁴ ஹிரிய’’ந்திஆதி³கங் ஸகவாதீ³வாதே³ யுஜ்ஜதி, ‘‘இதே⁴கச்சோ அன்னங் தே³தீ’’திஆதி³கங் வா ‘‘தெ³ய்யத⁴ம்மோ தா³ன’’ந்தி ஸாதே⁴துந்தி ஏவங் நிவத்தனஸாத⁴னத்த²னானத்தங் ஸந்தா⁴ய ‘‘ந பன ஏகேனத்தே²னா’’தி வுத்தந்தி த³ட்ட²ப்³ப³ங். தத்த² யதா² பரவாதீ³வாதே³ ச ஸுத்தஸாத⁴னத்த²ங் ‘‘ந வத்தப்³ப³ங் சேதஸிகோ த⁴ம்மோ தா³ன’’ந்தி புச்சா²யங் சேதஸிகோவாதி அத்தோ² த³ட்ட²ப்³போ³, ததா² ‘‘ந வத்தப்³ப³ங் தெ³ய்யத⁴ம்மோ தா³ன’’ந்தி புச்சா²ய ச தெ³ய்யத⁴ம்மோவாதி . தெ³ய்யத⁴ம்மோ இட்ட²ப²லோதி இட்ட²ப²லாபா⁴வமத்தமேவ படிக்கி²த்தந்தி எத்த² ‘‘இட்ட²ப²லபா⁴வமத்தமேவ படிக்கி²த்த’’ந்தி பாடே²ன ப⁴விதப்³ப³ந்தி . ‘‘இட்ட²ப²லாபா⁴வமத்தமேவ தி³ஸ்வா படிக்கி²த்த’’ந்தி வா வத்தப்³ப³ங். ஸங்கரபா⁴வமோசனத்த²ந்தி சேதஸிகஸ்ஸ தா³தப்³ப³ட்டே²ன தெ³ய்யத⁴ம்மஸ்ஸ ச இட்ட²ப²லட்டே²ன தா³னபா⁴வமோசனத்த²ந்தி வுத்தங் ஹோதி.
Itarenāti ‘‘diyyatīti dāna’’nti iminā pariyāyena. Na pana ekenatthenāti ‘‘deyyadhammova dāna’’nti imaṃ sakavādīvādaṃ nivattetuṃ ‘‘saddhā hiriya’’ntiādikaṃ suttasādhanaṃ paravādīvāde yujjati, ‘‘idhekacco annaṃ detī’’tiādikañca, ‘‘cetasikova dhammo dāna’’nti imaṃ nivattetuṃ ‘‘cetasiko dhammo dāna’’nti imaṃ pana sādhetuṃ ‘‘saddhā hiriya’’ntiādikaṃ sakavādīvāde yujjati, ‘‘idhekacco annaṃ detī’’tiādikaṃ vā ‘‘deyyadhammo dāna’’nti sādhetunti evaṃ nivattanasādhanatthanānattaṃ sandhāya ‘‘na pana ekenatthenā’’ti vuttanti daṭṭhabbaṃ. Tattha yathā paravādīvāde ca suttasādhanatthaṃ ‘‘na vattabbaṃ cetasiko dhammo dāna’’nti pucchāyaṃ cetasikovāti attho daṭṭhabbo, tathā ‘‘na vattabbaṃ deyyadhammo dāna’’nti pucchāya ca deyyadhammovāti . Deyyadhammo iṭṭhaphaloti iṭṭhaphalābhāvamattameva paṭikkhittanti ettha ‘‘iṭṭhaphalabhāvamattameva paṭikkhitta’’nti pāṭhena bhavitabbanti . ‘‘Iṭṭhaphalābhāvamattameva disvā paṭikkhitta’’nti vā vattabbaṃ. Saṅkarabhāvamocanatthanti cetasikassa dātabbaṭṭhena deyyadhammassa ca iṭṭhaphalaṭṭhena dānabhāvamocanatthanti vuttaṃ hoti.
தா³னகதா²வண்ணனா நிட்டி²தா.
Dānakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (66) 4. தா³னகதா² • (66) 4. Dānakathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 4. தா³னகதா²வண்ணனா • 4. Dānakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. தா³னகதா²வண்ணனா • 4. Dānakathāvaṇṇanā
