| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৪. দানকথাৰণ্ণনা
4. Dānakathāvaṇṇanā
৪৭৮. ইদানি দানকথা নাম হোতি। তত্থ দানং নাম তিৰিধং – চাগচেতনাপি, ৰিরতিপি, দেয্যধম্মোপি। ‘‘সদ্ধা হিরিযং কুসলঞ্চ দান’’ন্তি (অ॰ নি॰ ৮.৩০) আগতট্ঠানে চাগচেতনা দানং। ‘‘অভযং দেতী’’তি (অ॰ নি॰ ৮.৩৯) আগতট্ঠানে ৰিরতি। ‘‘দানং দেতি অন্নং পান’’ন্তি আগতট্ঠানে দেয্যধম্মো। তত্থ চাগচেতনা ‘‘দেতি ৰা দেয্যধম্মং, দেন্তি ৰা এতায দেয্যধম্ম’’ন্তি দানং। ৰিরতি অৰখণ্ডনট্ঠেন লৰনট্ঠেন ৰা দানং। সা হি উপ্পজ্জমানা ভযভেরৰাদিসঙ্খাতং দুস্সীল্যচেতনং দাতি খণ্ডেতি লুনাতি ৰাতি দানং। দেয্যধম্মো দিয্যতীতি দানং। এৰমেতং তিৰিধম্পি অত্থতো চেতসিকো চেৰ ধম্মো দেয্যধম্মো চাতি দুৰিধং হোতি। তত্থ যেসং ‘‘চেতসিকোৰ ধম্মো দানং, ন দেয্যধম্মো’’তি লদ্ধি, সেয্যথাপি রাজগিরিকসিদ্ধত্থিকানং; তে সন্ধায চেতসিকোতি পুচ্ছা সকৰাদিস্স, পটিঞ্ঞা ইতরস্স। অথ নং দেয্যধম্মৰসেন চোদেতুং লব্ভাতি পুচ্ছা সকৰাদিস্স, অন্নাদীনি ৰিয সো ন সক্কা দাতুন্তি পটিক্খেপো ইতরস্স। পুন দল়্হং কত্ৰা পুট্ঠে ‘‘অভযং দেতী’’তি সুত্তৰসেন পটিঞ্ঞা তস্সেৰ। ফস্সপঞ্হাদীসু পন ফস্সং দেতীতিআদিৰোহারং অপস্সন্তো পটিক্খিপতেৰ।
478. Idāni dānakathā nāma hoti. Tattha dānaṃ nāma tividhaṃ – cāgacetanāpi, viratipi, deyyadhammopi. ‘‘Saddhā hiriyaṃ kusalañca dāna’’nti (a. ni. 8.30) āgataṭṭhāne cāgacetanā dānaṃ. ‘‘Abhayaṃ detī’’ti (a. ni. 8.39) āgataṭṭhāne virati. ‘‘Dānaṃ deti annaṃ pāna’’nti āgataṭṭhāne deyyadhammo. Tattha cāgacetanā ‘‘deti vā deyyadhammaṃ, denti vā etāya deyyadhamma’’nti dānaṃ. Virati avakhaṇḍanaṭṭhena lavanaṭṭhena vā dānaṃ. Sā hi uppajjamānā bhayabheravādisaṅkhātaṃ dussīlyacetanaṃ dāti khaṇḍeti lunāti vāti dānaṃ. Deyyadhammo diyyatīti dānaṃ. Evametaṃ tividhampi atthato cetasiko ceva dhammo deyyadhammo cāti duvidhaṃ hoti. Tattha yesaṃ ‘‘cetasikova dhammo dānaṃ, na deyyadhammo’’ti laddhi, seyyathāpi rājagirikasiddhatthikānaṃ; te sandhāya cetasikoti pucchā sakavādissa, paṭiññā itarassa. Atha naṃ deyyadhammavasena codetuṃ labbhāti pucchā sakavādissa, annādīni viya so na sakkā dātunti paṭikkhepo itarassa. Puna daḷhaṃ katvā puṭṭhe ‘‘abhayaṃ detī’’ti suttavasena paṭiññā tasseva. Phassapañhādīsu pana phassaṃ detītiādivohāraṃ apassanto paṭikkhipateva.
৪৭৯. অনিট্ঠফলন্তিআদি অচেতসিকস্স ধম্মস্স দানভাৰদীপনত্থং ৰুত্তং। ন হি অচেতসিকো অন্নাদিধম্মো আযতিং ৰিপাকং দেতি, ইট্ঠফলভাৰনিযমনত্থং পনেতং ৰুত্তন্তি ৰেদিতব্বং। অযম্পি হেত্থ অধিপ্পাযো – যদি অচেতসিকো অন্নাদিধম্মো দানং ভৰেয্য, হিতচিত্তেন অনিট্ঠং অকন্তং ভেসজ্জং দেন্তস্স নিম্ববীজাদীহি ৰিয নিম্বাদযো অনিট্ঠমেৰ ফলং নিব্বত্তেয্য। যস্মা পনেত্থ হিতফরণচাগচেতনা দানং, তস্মা অনিট্ঠেপি দেয্যধম্মে দানং ইট্ঠফলমেৰ হোতীতি।
479. Aniṭṭhaphalantiādi acetasikassa dhammassa dānabhāvadīpanatthaṃ vuttaṃ. Na hi acetasiko annādidhammo āyatiṃ vipākaṃ deti, iṭṭhaphalabhāvaniyamanatthaṃ panetaṃ vuttanti veditabbaṃ. Ayampi hettha adhippāyo – yadi acetasiko annādidhammo dānaṃ bhaveyya, hitacittena aniṭṭhaṃ akantaṃ bhesajjaṃ dentassa nimbabījādīhi viya nimbādayo aniṭṭhameva phalaṃ nibbatteyya. Yasmā panettha hitapharaṇacāgacetanā dānaṃ, tasmā aniṭṭhepi deyyadhamme dānaṃ iṭṭhaphalameva hotīti.
এৰং পরৰাদিনা চেতসিকধম্মস্স দানভাৰে পতিট্ঠাপিতে সকৰাদী ইতরেন পরিযাযেন দেয্যধম্মস্স দানভাৰং সাধেতুং দানং ইট্ঠফলং ৰুত্তং ভগৰতাতিআদিমাহ। পরৰাদী পন চীৰরাদীনং ইট্ঠৰিপাকতং অপস্সন্তো পটিক্খিপতি। সুত্তসাধনং পরৰাদীৰাদেপি যুজ্জতি সকৰাদীৰাদেপি, ন পন একেনত্থেন। দেয্যধম্মো ইট্ঠফলোতি ইট্ঠফলভাৰমত্তমেৰ পটিক্খিত্তং। তস্মা তেন হি ন ৰত্তব্বন্তি ইট্ঠফলভাৰেনেৰ ন ৰত্তব্বতা যুজ্জতি । দাতব্বট্ঠেন পন দেয্যধম্মো দানমেৰ। দিন্নঞ্হি দানানং সঙ্করভাৰমোচনত্থমেৰ অযং কথাতি।
Evaṃ paravādinā cetasikadhammassa dānabhāve patiṭṭhāpite sakavādī itarena pariyāyena deyyadhammassa dānabhāvaṃ sādhetuṃ dānaṃ iṭṭhaphalaṃ vuttaṃ bhagavatātiādimāha. Paravādī pana cīvarādīnaṃ iṭṭhavipākataṃ apassanto paṭikkhipati. Suttasādhanaṃ paravādīvādepi yujjati sakavādīvādepi, na pana ekenatthena. Deyyadhammo iṭṭhaphaloti iṭṭhaphalabhāvamattameva paṭikkhittaṃ. Tasmā tena hi na vattabbanti iṭṭhaphalabhāveneva na vattabbatā yujjati . Dātabbaṭṭhena pana deyyadhammo dānameva. Dinnañhi dānānaṃ saṅkarabhāvamocanatthameva ayaṃ kathāti.
দানকথাৰণ্ণনা।
Dānakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৬৬) ৪. দানকথা • (66) 4. Dānakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. দানকথাৰণ্ণনা • 4. Dānakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. দানকথাৰণ্ণনা • 4. Dānakathāvaṇṇanā
