| Library / Tipiṭaka / तिपिटक • Tipiṭaka / पञ्चपकरण-अनुटीका • Pañcapakaraṇa-anuṭīkā |
४. दानकथावण्णना
4. Dānakathāvaṇṇanā
४७९. फलदानभावदीपनत्थन्ति फलदानसब्भावदीपनत्थं। फलदानं वुत्तं विय होतीति चित्तेन फलदानं पधानभावे वुत्तं विय होतीति अत्थो। अञ्ञथा दानभावोति न सक्का वत्तुं। दानभावोपि हि ‘‘दानं अनिट्ठफल’’न्तिआदिना वुत्तोयेवाति। तन्निवारणत्थन्ति फलदाननिवारणत्थं। एतन्ति ‘‘दानं अनिट्ठफल’’न्तिआदिवचनं। भेसज्जादिवसेन आबाधानिट्ठता देय्यधम्मस्स अनिट्ठफलतापरियायो दट्ठब्बो।
479. Phaladānabhāvadīpanatthanti phaladānasabbhāvadīpanatthaṃ. Phaladānaṃ vuttaṃ viya hotīti cittena phaladānaṃ padhānabhāve vuttaṃ viya hotīti attho. Aññathā dānabhāvoti na sakkā vattuṃ. Dānabhāvopi hi ‘‘dānaṃ aniṭṭhaphala’’ntiādinā vuttoyevāti. Tannivāraṇatthanti phaladānanivāraṇatthaṃ. Etanti ‘‘dānaṃ aniṭṭhaphala’’ntiādivacanaṃ. Bhesajjādivasena ābādhāniṭṭhatā deyyadhammassa aniṭṭhaphalatāpariyāyo daṭṭhabbo.
कथं तथेव सुत्तं सकवादिपरवादिवादेसु युज्जतीति चोदनाय ‘‘न पन एकेनत्थेना’’ति वुत्तं विभावेतुं ‘‘देय्यधम्मोव दान’’न्तिआदि वुत्तं। तत्थ निवत्तनपक्खेयेव एव-कारो युत्तो, न साधनपक्खे द्विन्नम्पि दानभावस्स इच्छितत्ता। तेनाह ‘‘चेतसिकोवाति अत्थो दट्ठब्बो, देय्यधम्मोवा’’ति च। तेनेवाह ‘‘द्विन्नञ्हि दानानन्तिआदि। सङ्करभावमोचनत्थन्ति सतिपि दानभावे सभावसङ्करमोचनत्थं। तेनाह ‘‘चेतसिकस्सा’’तिआदि।
Kathaṃ tatheva suttaṃ sakavādiparavādivādesu yujjatīti codanāya ‘‘na pana ekenatthenā’’ti vuttaṃ vibhāvetuṃ ‘‘deyyadhammova dāna’’ntiādi vuttaṃ. Tattha nivattanapakkheyeva eva-kāro yutto, na sādhanapakkhe dvinnampi dānabhāvassa icchitattā. Tenāha ‘‘cetasikovāti attho daṭṭhabbo, deyyadhammovā’’ti ca. Tenevāha ‘‘dvinnañhi dānānantiādi. Saṅkarabhāvamocanatthanti satipi dānabhāve sabhāvasaṅkaramocanatthaṃ. Tenāha ‘‘cetasikassā’’tiādi.
दानकथावण्णना निट्ठिता।
Dānakathāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (६६) ४. दानकथा • (66) 4. Dānakathā
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ४. दानकथावण्णना • 4. Dānakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ४. दानकथावण्णना • 4. Dānakathāvaṇṇanā
