| Library / Tipiṭaka / តិបិដក • Tipiṭaka / បញ្ចបករណ-អនុដីកា • Pañcapakaraṇa-anuṭīkā |
៤. ទានកថាវណ្ណនា
4. Dānakathāvaṇṇanā
៤៧៩. ផលទានភាវទីបនត្ថន្តិ ផលទានសព្ភាវទីបនត្ថំ។ ផលទានំ វុត្តំ វិយ ហោតីតិ ចិត្តេន ផលទានំ បធានភាវេ វុត្តំ វិយ ហោតីតិ អត្ថោ។ អញ្ញថា ទានភាវោតិ ន សក្កា វត្តុំ។ ទានភាវោបិ ហិ ‘‘ទានំ អនិដ្ឋផល’’ន្តិអាទិនា វុត្តោយេវាតិ។ តន្និវារណត្ថន្តិ ផលទាននិវារណត្ថំ។ ឯតន្តិ ‘‘ទានំ អនិដ្ឋផល’’ន្តិអាទិវចនំ។ ភេសជ្ជាទិវសេន អាពាធានិដ្ឋតា ទេយ្យធម្មស្ស អនិដ្ឋផលតាបរិយាយោ ទដ្ឋព្ពោ។
479. Phaladānabhāvadīpanatthanti phaladānasabbhāvadīpanatthaṃ. Phaladānaṃ vuttaṃ viya hotīti cittena phaladānaṃ padhānabhāve vuttaṃ viya hotīti attho. Aññathā dānabhāvoti na sakkā vattuṃ. Dānabhāvopi hi ‘‘dānaṃ aniṭṭhaphala’’ntiādinā vuttoyevāti. Tannivāraṇatthanti phaladānanivāraṇatthaṃ. Etanti ‘‘dānaṃ aniṭṭhaphala’’ntiādivacanaṃ. Bhesajjādivasena ābādhāniṭṭhatā deyyadhammassa aniṭṭhaphalatāpariyāyo daṭṭhabbo.
កថំ តថេវ សុត្តំ សកវាទិបរវាទិវាទេសុ យុជ្ជតីតិ ចោទនាយ ‘‘ន បន ឯកេនត្ថេនា’’តិ វុត្តំ វិភាវេតុំ ‘‘ទេយ្យធម្មោវ ទាន’’ន្តិអាទិ វុត្តំ។ តត្ថ និវត្តនបក្ខេយេវ ឯវ-ការោ យុត្តោ, ន សាធនបក្ខេ ទ្វិន្នម្បិ ទានភាវស្ស ឥច្ឆិតត្តា។ តេនាហ ‘‘ចេតសិកោវាតិ អត្ថោ ទដ្ឋព្ពោ, ទេយ្យធម្មោវា’’តិ ច។ តេនេវាហ ‘‘ទ្វិន្នញ្ហិ ទានានន្តិអាទិ។ សង្ករភាវមោចនត្ថន្តិ សតិបិ ទានភាវេ សភាវសង្ករមោចនត្ថំ។ តេនាហ ‘‘ចេតសិកស្សា’’តិអាទិ។
Kathaṃ tatheva suttaṃ sakavādiparavādivādesu yujjatīti codanāya ‘‘na pana ekenatthenā’’ti vuttaṃ vibhāvetuṃ ‘‘deyyadhammova dāna’’ntiādi vuttaṃ. Tattha nivattanapakkheyeva eva-kāro yutto, na sādhanapakkhe dvinnampi dānabhāvassa icchitattā. Tenāha ‘‘cetasikovāti attho daṭṭhabbo, deyyadhammovā’’ti ca. Tenevāha ‘‘dvinnañhi dānānantiādi. Saṅkarabhāvamocanatthanti satipi dānabhāve sabhāvasaṅkaramocanatthaṃ. Tenāha ‘‘cetasikassā’’tiādi.
ទានកថាវណ្ណនា និដ្ឋិតា។
Dānakathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (៦៦) ៤. ទានកថា • (66) 4. Dānakathā
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៤. ទានកថាវណ្ណនា • 4. Dānakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៤. ទានកថាវណ្ណនា • 4. Dānakathāvaṇṇanā
