| Library / Tipiṭaka / තිපිටක • Tipiṭaka / පඤ්‌චපකරණ-අනුටීකා • Pañcapakaraṇa-anuṭīkā |
4. දානකථාවණ්‌ණනා
4. Dānakathāvaṇṇanā
479. ඵලදානභාවදීපනත්‌ථන්‌ති ඵලදානසබ්‌භාවදීපනත්‌ථං. ඵලදානං වුත්‌තං විය හොතීති චිත්‌තෙන ඵලදානං පධානභාවෙ වුත්‌තං විය හොතීති අත්‌ථො. අඤ්‌ඤථා දානභාවොති න සක්‌කා වත්‌තුං. දානභාවොපි හි ‘‘දානං අනිට්‌ඨඵල’’න්‌තිආදිනා වුත්‌තොයෙවාති. තන්‌නිවාරණත්‌ථන්‌ති ඵලදානනිවාරණත්‌ථං. එතන්‌ති ‘‘දානං අනිට්‌ඨඵල’’න්‌තිආදිවචනං. භෙසජ්‌ජාදිවසෙන ආබාධානිට්‌ඨතා දෙය්‍යධම්‌මස්‌ස අනිට්‌ඨඵලතාපරියායො දට්‌ඨබ්‌බො.
479. Phaladānabhāvadīpanatthanti phaladānasabbhāvadīpanatthaṃ. Phaladānaṃ vuttaṃ viya hotīti cittena phaladānaṃ padhānabhāve vuttaṃ viya hotīti attho. Aññathā dānabhāvoti na sakkā vattuṃ. Dānabhāvopi hi ‘‘dānaṃ aniṭṭhaphala’’ntiādinā vuttoyevāti. Tannivāraṇatthanti phaladānanivāraṇatthaṃ. Etanti ‘‘dānaṃ aniṭṭhaphala’’ntiādivacanaṃ. Bhesajjādivasena ābādhāniṭṭhatā deyyadhammassa aniṭṭhaphalatāpariyāyo daṭṭhabbo.
කථං තථෙව සුත්‌තං සකවාදිපරවාදිවාදෙසු යුජ්‌ජතීති චොදනාය ‘‘න පන එකෙනත්‌ථෙනා’’ති වුත්‌තං විභාවෙතුං ‘‘දෙය්‍යධම්‌මොව දාන’’න්‌තිආදි වුත්‌තං. තත්‌ථ නිවත්‌තනපක්‌ඛෙයෙව එව-කාරො යුත්‌තො, න සාධනපක්‌ඛෙ ද්‌වින්‌නම්‌පි දානභාවස්‌ස ඉච්‌ඡිතත්‌තා. තෙනාහ ‘‘චෙතසිකොවාති අත්‌ථො දට්‌ඨබ්‌බො, දෙය්‍යධම්‌මොවා’’ති ච. තෙනෙවාහ ‘‘ද්‌වින්‌නඤ්‌හි දානානන්‌තිආදි. සඞ්‌කරභාවමොචනත්‌ථන්‌ති සතිපි දානභාවෙ සභාවසඞ්‌කරමොචනත්‌ථං. තෙනාහ ‘‘චෙතසිකස්‌සා’’තිආදි.
Kathaṃ tatheva suttaṃ sakavādiparavādivādesu yujjatīti codanāya ‘‘na pana ekenatthenā’’ti vuttaṃ vibhāvetuṃ ‘‘deyyadhammova dāna’’ntiādi vuttaṃ. Tattha nivattanapakkheyeva eva-kāro yutto, na sādhanapakkhe dvinnampi dānabhāvassa icchitattā. Tenāha ‘‘cetasikovāti attho daṭṭhabbo, deyyadhammovā’’ti ca. Tenevāha ‘‘dvinnañhi dānānantiādi. Saṅkarabhāvamocanatthanti satipi dānabhāve sabhāvasaṅkaramocanatthaṃ. Tenāha ‘‘cetasikassā’’tiādi.
දානකථාවණ්‌ණනා නිට්‌ඨිතා.
Dānakathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (66) 4. දානකථා • (66) 4. Dānakathā
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 4. දානකථාවණ්‌ණනා • 4. Dānakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 4. දානකථාවණ්‌ණනා • 4. Dānakathāvaṇṇanā
